Read Kodava ಜ್ಞಾನತ್‌ರ ಪಡಿಮ 5 Bible Online

ಜ್ಞಾನತ್‌ರ ಪಡಿಮ 5 - Kodava bible

ಜ್ಞಾನತ್‌ರ ಪಡಿಮ 5

¹ನಾಡ ಮೋನೇ, ನಾಡ ಜ್ಞಾನತ್‌ರ ತಕ್ಕ್‌ಕ್‌ ಕೆಮಿ ಕೊಡ್. ನಾಡ ಬುದ್ದಿತಕ್ಕ್‌ ಕೆಮಿ ಕೊಡ್.

²ಅಕ್ಕ ನೀನ್‌ ವಿವೇಕತ್‌ನ ಕಾಪಾಡಿಯೊವಿಯ, ನೀಡ ತಕ್ಕ್, ಬುದ್ದಿ ದುಂಬ್‌ನದಾಯಿತ್‌ಪ್ಪ.

³ಒರ್‌ ವ್ಯಬಿಚಾರಿಯಡ ಕಿರಿ ತೇನೆರಿಯಿಂಜ ತೇನ್‌ ಚೋರೊನೆಕೆ ಇಪ್ಪ, ಅವಡ ತಕ್ಕ್‌ ಎಣ್ಣೆಕಿಂಜಲು ನಯನವಾಯಿತ್‌ ಇಪ್ಪ.

⁴ಆಚೇಂಗಿ ಅವಡ ಕೂಡೆ ಕೂಡುವಯಿಂಗಡ ಪ್ರತಿಫಲ ಕೈಯಿಪಾಯಿತುಳ್ಳ ವಿಷತ್‌ರನೆಕೆ, ಪಿಂಞ ದಂಡ್‌ ಪಕ್ಕವು ಚೂಪಾಯಿತುಳ್ಳ ಬಾಳ್‌ಕತ್ತಿರನೆಕೆಯು ಇಪ್ಪ.

⁵ಅವಡ ಕಾಲ್‌ ಚಾವುಕ್‌ ಇಳ್‌ಂಜಿತ್‌ ಪೋಪ. ಅವಡ ಮೊಟ್ಟ್‌ ನೇರೆ ಪಾತಾಳಕ್‌ ಪೋಪ.

⁶ಅವ ಜೀವ ತಪ್ಪ ಬಟ್ಟೆರ ವಿಷಯತ್‌ ಗೇನ ಮಾಡುಲೆ, ಅವಡ ನಡ್‌ತೆ ಚಂಚಲವಾಯಿತ್‌ಪ್ಪ, ಆಚೇಂಗಿ ಅದ್‌ ಅವಕ್‌ ಅರ್ಥ ಆಪುಲೆ.

⁷ಆನಗುಂಡ್‌ ಮಕ್ಕಳೇ, ಇಕ್ಕ ನಾಡ ತಕ್ಕ್‌ನ ಕ್‍ೕಳಿ; ನಾನ್‌ ಎಣ್ಣ್‌ವ ತಕ್ಕ್‌ನ ಬುಟ್ಟಿತ್‌ ಪೋಕತಿ.

⁸ಅನ್ನನೆ ಉಳ್ಳ ಪೊಣ್ಣಾಳ್‌ಯಿಂಜ ನೀನ್‌ ದೂರ ಇರ್; ಅವಡ ಮನೆರ ಪಡಿರ ಪಕ್ಕಕು ಪೋಕತೆ.

⁹ಅನ್ನನೆ ನೀನ್‌ ಪೋಚೇಂಗಿ, ನೀಡ ಗೌರವತ್‌ನ ಬೋರೆಯಿಂಗಕು, ನೀಡ ಆಯಸ್ಸ್‌ ಕಾಲತ್‌ನ ಕ್ರೂರ ಮನುಷ್ಯಂಗಕು ಕೊಡ್‌ತ್‌ರುವಿಯ.

¹⁰ನೀಕ್‌ ಗೊತ್ತಿಲ್ಲತ ಜನ ನೀಡ ಐಶ್ವರ್ಯತ್‌ಂಜ ತೃಪ್ತಿಯಾಪ; ನೀನ್‌ ಕಷ್ಟಪಟ್ಟಿತ್‌ ಸಂಪಾದನೆ ಮಾಡ್‌ನನ ಬೋರೆ ಮನೆಕಾರ ಅನುಬವಿಚಿಡುವ.

¹¹ಕಡೇಕ್‌ ನೀಡ ಯರ್ಚಿಯು, ನೀಡ ತಡಿಯು ಕುಂದಿ ಪೋಪಕ ನೀನ್‌ ದುಃಖ್‌ಚಿಟ್ಟಂಡ್‌ ಗೋಳಾಡುವಿಯ.

¹²ಅಯ್ಯೋ, ಬೋದನೇನ ನಾನ್‌ ಎಚ್ಚಕ್‌ ದ್ವೇಷ ಮಾಡ್‌ನ, ಚೂಕ್ತಕ್ಕ್‌ನ ನಾಡ ಹೃದಯ ತ್‌ಕ್ಕಾರ ಮಾಡಿಚಲ್ಲಾ!

¹³ನಾಡ ಉಪಾದ್ಯಂಡ ತಕ್ಕ್‌ನ ನಾನ್‌ ಕ್‍ೕಕತೆ, ಅಯಿಂಗಡ ಉಪದೇಶಕ್‌ ಕೆಮಿ ಕೊಡ್‌ಕತೆ ಪೋನನಲ್ಲಾ?

¹⁴ಆನಗುಂಡ್‌ ಇಕ್ಕ ನಾಕ್‍ ಜನಡ ಸಬೆರ ಮಿಂಞತ್‌ ಇಚ್ಚಕ್‌ ಞಾಣಕ್‍ೕಡ್‌ ಆಪನಕೆ ಆಯಿಪೋಚಲ್ಲಾಂದ್‌ ಎಣ್ಣ್‌ವಿಯ.

¹⁵ನೀಡ ಸ್ವಂತ ಕಣತರೆರ ನೀರ್‌ನ ಪಿಂಞ ನೀಡ ಬುಗ್ಗೆರೆ ನೀರ್‌ನ ಮಾತ್‌ರ ಕುಡಿ.

¹⁶ನೀಡ ಬುಗ್ಗೆಯಿಂಜ ನೀರ್‌ ಪೊರಮೆಯು, ನೀಡ ತೋಡ್‌ರ ನೀರ್‌ ಬೀದಿಕು ಎನ್ನಂಗ್‌ ಉಕ್ಕಿಯಂಡ್‌ ಪೋಕಂಡು?

¹⁷ಅದ್‌ ಬೋರೆಯಯಿಂಗಕು ಅಲ್ಲತೆ ನೀಕ್‌ ಮಾತ್‌ರ ಇರಡ್, ಬೋರೆ ಜನ ಕುಡಿಪದ್‌ ಬೋಂಡ.

¹⁸ನೀಡ ಪೊಣ್ಣ್‌ ನೀಕ್‌ ಆಶೀರ್ವಾದತ್‌ರ ಬುಗ್ಗೆಯಾಯಿತ್‌ ಇರಡ್; ನೀಡ ಬಾಲ್ಯ ಕಾಲತ್‌ಲ್‌ ನೀಡ ಪೊಣ್ಣ್‌ರ ಕೂಡೆ ಕುಶಿಯಾಯಿತ್‌ ಇರ್.

¹⁹ಅವ ಪ್ರೀತಿರ ಪೊಣ್ಣ್‌ ಜಿಂಕೆರನೆಕೆಯು, ಚಾಯಿತೆ ಕಾಂಬ ಕಾಡ್‌ ಆಡ್‌ರನೆಕೆಯು ಇಕ್ಕಡ್. ಅವಡ ಎದೆ ನಿನ್ನ ಎಕ್ಕಾಲು ತೃಪ್ತಿ ಪಡ್‌ತಡ್. ಅವಡ ಪ್ರೀತಿರ ಬೋಗತ್‌ಲ್‌ ಎಕ್ಕಾಲು ಇರ್.

²⁰ನಾಡ ಮೋನೇ, ನೀನ್‌ ಎನ್ನಂಗ್‌ ವ್ಯಬಿಚಾರಿಯಡ ಬೋಗತ್‌ಲ್‌ ಇಂಜಂಡ್, ಇಞ್ಞೊರ್‌ ಪೊಣ್ಣಾಳ್‌ರ ಎದೆನ ತಬ್ಬುವಿಯಾ?

²¹ಒರ್‌ ಮನುಷ್ಯ ಮಾಡ್‌ವ ಎಲ್ಲಾ ಕಾರ್ಯವು ಯೆಹೋವಂಗ್‌ ಚಾಯಿತೆ ಕಾಂಬ. ಆ ಮನುಷ್ಯ ಎಡ್‌ಪ ಪ್ರತಿಯೊರ್‌ ಬಟ್ಟೆನ ಯೆಹೋವ ಪರೀಕ್ಷೆ ಮಾಡುವ.

²²ಒರ್‌ ದುಷ್ಟ ಅಂವೊ ಮಾಡ್‌ವ ಕ್‍ೕಡಾನ ಕಾರ್ಯತ್‌ಂಜಲೇ ಚಿಕ್ಕಿತಿಪ್ಪ, ಅಂವೊ ಮಾಡ್‌ವ ಪಾಪತ್‌ರ ಕಾರ್ಯವೇ ಅಂವೊನ ಪುಡ್‌ಚಿತಿಪ್ಪ.

²³ಅಂವೊ ಬುದ್ದಿ ತಕ್ಕ್‌ನ ಕ್‍ೕಕತೆ ಪೋನಗುಂಡ್‌ ಚತ್ತ್‌ ಪೋಪ. ತಾಂಡ ಬಲ್ಯ ಮೂಡತನತ್‌ಂಜ ಅಂವೊ ನಾಶ ಆಯಿಪೋಪ.