Read Kodava ಜ್ಞಾನತ್‌ರ ಪಡಿಮ 6 Bible Online

ಜ್ಞಾನತ್‌ರ ಪಡಿಮ 6 - Kodava bible

ಜ್ಞಾನತ್‌ರ ಪಡಿಮ 6

¹ನಾಡ ಮೋನೇ, ಒರ್‌ ಸಮಯ, ನೀನ್‌ ನೀಡ ಸ್ನೇಹಿತ ಎಡ್‌ತ ಸಾಲಕ್‌ ಜಾಮೀನ್‌ ಕೊಡ್‌ತಿತ್, ನೀಕ್‌ ಅರಿಯತಂವೊಂಡ ಪಕ್ಕ ತಕ್ಕ್‌ ಕೊಡ್‌ತ್ತಿಂಜತೇಂಗಿ,

²ನೀನ್‌ ನೀಡ ತಕ್ಕ್‌ರಗುಂಡ್‌ ಕೆಣಿಂಜಿ ಪೋಯಿತುಳ್ಳಿಯ. ನೀಡ ಸ್ವಂತ ತಕ್ಕ್‌ರಗುಂಡ್‌ ನೀನ್‌ ಬಲೆಕ್‌ ಚಿಕ್ಕಿ ಪೋಯಿತುಳ್ಳಿಯ.

³ಆನಗುಂಡ್‌ ಮೋನೇ, ನಿನ್‌ ನೀಡ ಸ್ನೇಹಿತಂಡ ಕೈಕ್‌ ಚಿಕ್ಕಿ ಪೊಯಿತುಳ್ಳಗುಂಡ್, ನೀಡ ಸ್ನೇಹಿತಂಡ ಕೈಯಿಂಜ ಬಚಾವ್‌ ಆಪಕಾಯಿತ್‌ ನೀನ್‌ ಒರ್‌ ಕಾರ್ಯ ಮಾಡ್.

⁴ನೀಡ ಕಣ್ಣ್‌ಕ್ ವರ್‌ಕ್‌ ಬಕ್ಕತನೆಕೆ ನೋಟಿಯಂಡ್, ನೀಡ ಕಣ್ಣ್‌ರ ರೆಪ್ಪೆನ ಮುಚ್ಚತೆ, ನೀಡ ಸ್ನೇಹಿತಂಡ ಪಕ್ಕ ಪೋಯಿತ್, ನೀನ್‌ ತಗ್ಗ್‌ಚಿಟ್ಟಂಡ್, ನೀಡ ಪೆದತ್‌ನ ಅಳಿಚಿಡುವಕ್‌ ಅಂವೊನ ಬೋಡಿಯ.

⁵ಒರ್‌ ಬೋಟೆಗಾರಂಡಿಂಜ ಜಿಂಕೆ ತಪ್ಪಿಪೋಪನೆಕೆಯು, ಪಕ್ಷಿ ಪುಡಿಪವಂಡಿಂಜ ಒರ್‌ ಪಕ್ಕಷಿ ಪಾರಾಪನೆಕೆಯು ನೀನ್‌ ನಿನ್ನ ಕಾಪಾಡಿಯ.

⁶ಸೋಮಾರಿಯೇ, ನೀನ್‌ ಇರ್ಪುರ ಪಕ್ಕ ಪೋಯಿತ್‌ ಅವು ನಡ್‌ಪ ಬಟ್ಟೆನ ನೋಟಿತ್‌ ಬುದ್ದಿವಂತನಾಪಕ್‌ ಪಡ್‌ಚ.

⁷ಅದ್‌ಂಗ್‌ ಕೆಲಸ ಮಾಡ್‌ಚಿಡುವಕ್‌ ಒರ್‌ ರಾಜನಾಡ್, ಅದಿಕಾರಿಯಾಡ್‌ ನಾಯಕನಾಡ್‌ ಇಲ್ಲತೆ ಪೋಚೇಂಗಿಯು,

⁸ಇಡೀ ಬೇನಿ ಕಾಲತ್‌ಲ್‌ ತಾಂಡ ಆಹಾರತ್‌ನ ಕೂಟಿ ಬೆಚ್ಚಿತ್, ಕೊಯಿಪಣಿ ಕಾಲತ್‌ಲ್‌ ಅದ್‌ಂಗ್‌ ಆಹಾರ ದಾನ್ಯತ್‌ನ ಬತ್‌ರ ಮಾಡುವ.

⁹ಸೋಮಾರಿಯೇ, ನೀನ್‌ ಎಚ್ಚಕ್‌ ನೇರ ವರುವಿಯಾ? ಎಕ್ಕ ನೀನ್‌ ನೀಡ ವರ್‌ಕ್‌ನ ಬುಟ್ಟಿತ್‌ ಎಚ್ಚರ ಆಪಿಯಾ?

¹⁰ಇಂಞು ಚೆನ್ನ ನೇರ ವರ್ವಿ, ಇಂಞು ಚೆನ್ನ ನೇರ ಆರಾಮ್‌ ಮಾಡುವಿ, ಇಂಞು ಚೆನ್ನ ನೇರ ಕೈಯಿನ ಮಡ್‌ಕಿತ್‌ ವರಿಯೊವೀಂದ್‌ ಎಣ್ಣುವಿಯಾ?

¹¹ಅಕ್ಕ, ಬಡತನ ಕಳ್ಳಂಗ ಬಪ್ಪನೆಕೆ ಬಪ್ಪ. ಅಂವೊಂಡ ಸ್ತಿತಿಗತಿ[4] ದರೋಡೆಕಾರ ಬಂದಿತ್‌ ಉಳ್ಳದ್‌ನೆಲ್ಲ ಎಡ್‌ತಂಡ್‌ ಪೋನನೆಕೆ ಇಪ್ಪ.

¹²ಒಂದಂಗು ಪ್ರಯೋಜನ ಇಲ್ಲತ ಒರ್‌ ದುಷ್ಟಂಡ ನಡ್‌ತೆನ ನೋಟ್. ಅಂವೊ ಪೊಟ್ಟ್‌ ಪರ್‌ಂದಂಡೆ ತಿರಿಯಂಡಿಪ್ಪ.

¹³ಅಂವೊ ಜನಳ ಮೋಸ ಮಾಡ್‌ವಕಾಯಿತ್‌ ತಾಂಡ ಕಣ್ಣ್‌ಂಜ, ಕಾಲ್‌ಂಜ ಕೈಬೆರತ್ತಿಂಜ ಸನ್ನೆ ಮಾಡುವ.

¹⁴ಅಂವೊಂಡ ಕ್‍ೕಡಾನ ಮನಸ್ಸ್‌ಲ್‌ ಎಕ್ಕಾಲು ಮೋಸ ಮಾಡ್‌ವದನ್ನೇ ಗೇನ ಮಾಡಿಯಂಡಿಪ್ಪ. ಅಂವೊ ಎಕ್ಕಾಲು ಜಗಳ ಬಪ್ಪನೆಕೆ ಮಾಡ್‌ವ.

¹⁵ಆನಗುಂಡ್, ಇಂಜನೆಕೆ ಅಂವೊಂಗ್‌ ಅಪಾಯ ಬಪ್ಪ. ಸಹಾಯ ಇಲ್ಲತೆ ಇಂಜನೆಕೆ ನಾಶ ಆಯಿ ಪೋಪ.

¹⁶ಆರ್‌ ಕಾರ್ಯತ್‌ನ ಯೆಹೋವ ದ್ವೇಷ ಮಾಡುವ, ಅಕ್ಕು ಏಳ್‌ ಕಾರ್ಯ ಅಂವೊಂಗ್‌ ಅಸಹ್ಯವಾನದ್:

¹⁷ಚೊಕ್ಕ್‌ಲ್‌ ನೋಟ್‌ವ ಕಣ್ಣ್, ಪೊಟ್ಟ್‌ ಪರಿಯುವ ನಾವ್, ಕುತ್ತಯಿಲ್ಲತ ಜನಳ ಕೊಲ್ಲುವ ಕೈ,

¹⁸ಕೆಟ್ಟದ್‌ನ ಯೊಜನೆ ಮಾಡುವ ಹೃದಯ, ಕ್‍ೕಡ್‌ ಮಾಡ್‌ವಕ್‌ ಬೆರಿಯ ಓಡುವ ಕಾಲ್,

¹⁹ಪೊಟ್ಟ್‌ನೇ ಪರಿಯುವ ಪೊಟ್ಟ್‌ ಸಾಕ್ಷಿ ಪಿಂಞ ಅಣ್ಣತಮ್ಮಣಂಗಡ ಮದ್ಯತ್‌ ಜಗಳ ಬಿತ್ತ್‌ವದ್‌ ಎಣ್ಣುವದೇ.

²⁰ನಾಡ ಮೋನೇ, ನೀಡ ಅಪ್ಪಂಡ ಆಜ್ಞೆನ ಪಾಲ್‌ಚಿಡ್, ನೀಡ ಅವ್ವಂಡ ಬೋದನೆನ ಕೈ ಬುಡತೆ.

²¹ಅದ್‌ನೆಲ್ಲಾ ಎಕ್ಕಾಲು ನೀಡ ಹೃದಯತ್‌ ಬೆಚ್ಚಂಡ್, ನೀಡ ಬೋಳೆರ ಸುತ್ತ್‌ ಕಟ್ಟಿಯ.

²²ನೀನ್‌ ನಡ್‌ಪಕ ಅದ್‌ ನೀಕ್‌ ಬಟ್ಟೆ ಕಾಟಿತಪ್ಪ. ನೀನ್‌ ವರ್ವಕ ಅದ್‌ ನಿನ್ನ ಕಾಪಾಡುವ. ನೀನ್‌ ಪೊಲಾಕ ಏವೊಕ ಅದ್‌ ನೀಕ್‌ ಆಲೋಚನೆ ತಪ್ಪ.

²³ಎನ್ನಂಗೆಣ್ಣ್‌ಚೇಂಗಿ ಈ ಆಜ್ಞೆವೇ ನೀಕ್‌ ಬೊಳ್‌ಚವಾಯಿತು, ಈ ಬೋದನೆಯೇ ನೀಕ್‌ ಬೊಳಿಯಾಯಿತು, ಈ ಉಪದೇಶತ್‌ಂಜ ಬಪ್ಪ ತಿದ್ದುವಿಕೆಯೇ, ಬದ್‌ಕ್‌ ತಪ್ಪ ಬಟ್ಟೆಯಾಯಿತು ಇಪ್ಪ.

²⁴ಆ ಉಪದೇಶಯೆಲ್ಲಾ ನಿನ್ನ ಕೆಟ್ಟ ಪೊಣ್ಣಾಳಿಂಜ ಕಾಪಾಡಿತ್, ಬೋರೆ ತಪ್ಪ್‌ ಮಾಡುವ ಪೊಣ್ಣಾಳ್‌ರ ನೊಣೆ ತಕ್ಕ್‌ಯಿಂಜ ನಿನ್ನ ಬಚಾಚ್‍ ಮಾಡುವ.

²⁵ಅವಡ ಚಾಯಿ ಚಂದನ ನೋಟಿತ್‌ ಅವಕ್‌ ಇಚ್ಚೆ ಪಡತೆ. ಅವಡ ಕಣ್ಣ್‌ರ ರೆಪ್ಪೆಯಿಂಜ ನಿನ್ನ ವಶ ಪಡ್‌ತುವಕ್‌ ಬುಡತೆ.

²⁶ಎನ್ನಂಗೆಣ್ಣ್‌ಚೇಂಗಿ ವೇಶಿರಗುಂಡ್‌ ಒರ್‌ ತುಂಡ್‌ ಒಟ್ಟಿನ ಸಹ ಇಲ್ಲತನೆಕೆ ನೀನ್‌ ಕಳ್‌ಂದ್‌ರ್‌ವಿಯ. ಆಚೇಂಗಿ ಒರ್‌ ವ್ಯಬಿಚಾರಿ ಬೆಲೆ ಕೊಡ್‌ಪಕಯ್ಯತ ನೀಡ ಜೀವತ್‌ನೇ ಬೋಟೆಯಾಡುವ.

²⁷ತಾಂಡ ಬಟ್ಟೆನ ತಿತ್ತ್‌ ಚುಡತೆ ತೊಡೆರ ಮೇಲೆ ತಿತ್ತ್‌ನ ಬೆಪ್ಪಕಯ್ಯುವ?

²⁸ಕಾಲ್‌ ಚುಡತೆ ತಿತ್ತ್‌ರ ಕಂಡತ್‌ರ ಮೇಲೆ ನಡ್‌ಪ ಕಯ್ಯುವ?

²⁹ಇಂಞೊಬ್ಬಂಡ ಪೊಣ್ಣ್‌ರ ಪಕ್ಕ ಪೋಪಂವೊಂಗು ಇನ್ನನೆ ಆಪ. ಅವಳ ಮುಟ್ಟ್‌ವಂವೊನು ದಂಡನೆಯಿಂಜ ಬಚಾವ್‌ ಆಪುಲೆ.

³⁰ಕೆಲಪೈಚಂಡುಳ್ಳ ಕಳ್ಳ ತಾಂಡ ಕೆಲತ್‌ನ ತೃಪ್ತಿ ಪಡುತ್‌ವಕಾಯಿತ್‌ ಕದ್ದಂಡ್‌ ಪೋಚೇಂಗಿ ಒರ್‌ ಸಮಯ ಅಂವೊಂಗ್‌ ಮಾಪ್ ಕ್‌ಟ್ಟು.

³¹ಆಚೇಂಗಿ ಅಂವೊ ಕ್‌ಟ್ಟಿ ಬುದ್ದತೇಂಗಿ, ಅಂವೊ ಕದ್ದಕಿಂಜಿ ಏಳ್‌ ಪಟ್ಟ್‌ರಚ್ಚಕ್‌ ತಿರಿತ್‌ ಕೊಡ್‌ಕಂಡಾಪ. ಅಂವೊಂಡ ಮನೆಲ್ ಉಳ್ಳ ವಸ್ತುನೆಲ್ಲಾ ಮಾರಿತಾಚೇಂಗಿಯು ಅಂವೊ ಕೊಡ್‌ಕಂಡು.

³²ಆಚೇಂಗಿ ಇಂಞೊಬ್ಬಂಡ ಪೊಣ್ಣಾಳ್‌ರ ಕೂಡೆ ವ್ಯಬಿಚಾರ ಮಾಡ್‌ವಂವೊ ಒರ್‌ ದಡ್ಡೆನಾಯಿತುಂಡ್. ಅನ್ನನೆ ಮಾಡ್‌ವಂವೊ ತಾಂಡ ಬದ್‌ಕ್‌ನೇ ನಾಶ ಮಾಡಿಯೊವ.

³³ಅಂವೊಂಗ್‌ ಗಾಯವು ಅವಮಾನವು ಆಪ. ಅಂವೊಂಗ್‌ ಆನ ಞಾಣಕ್‍ೕಡ್‌ ಅಂವೊನ ಬುಟ್ಟಿತ್‌ ಪೋಪದೇ ಇಲ್ಲೆ.

³⁴ಎನ್ನಂಗೆಣ್ಣ್‌ಚೇಂಗಿ ತಾಂಡ ಪೊಣ್ಣಾಳ್‌ರ ವಿಷಯತ್‌ ವೈರಾಗ್ಯವುಳ್ಳ ವಡಿಯಂಗ್‌ ದುಂಬ ಚೆಡಿ ಬಪ್ಪ. ಅಂವೊ ಪಗೆ ತ್‍ೕಪ ನೇರತ್‌ ಚೆನ್ನಂಗು ಕರುಣೆ ಕಾಟುಲೆ.

³⁵ಅಂವೊಂಗ್‌ ಎಚ್ಚಕೇ ಪಣ ಕೊಡ್‌ತತೇಂಗಿಯು ಸ್ವೀಕಾರ ಮಾಡುಲೆ, ಎಚ್ಚಕ್‌ ಇನಾಮ್‌ ಕೊಡತತೇಂಗಿಯು ಅಂವೊಂಡ ಚೆಡಿನ ತಡ್‌ಪಕಯ್ಯುಲೆ.