Read Kodava ಜ್ಞಾನತ್‌ರ ಪಡಿಮ 7 Bible Online

ಜ್ಞಾನತ್‌ರ ಪಡಿಮ 7 - Kodava bible

ಜ್ಞಾನತ್‌ರ ಪಡಿಮ 7

¹ನಾಡ ಮೋನೇ, ನಾಡ ತಕ್ಕ್‌ನ ಜಾಗ್‌ರತೆಲ್‌ ಕ್‍ೕಳ್. ನಾಡ ಆಜ್ಞೆನ ಬಂಡಾರತ್‌ರನೆಕೆ ಕಾಪಾಡಿಯ.

²ನಾಡ ಆಜ್ಞೆರ ಪ್ರಕಾರ ನಡ್‌ಂದಿತ್‌ ಜೀವತ್‌ನ ಪಡ್‌ಂದ. ನಾಡ ಬೋದನೆನ ನೀಡ ಕಣ್ಣ್‌ ಗುಡ್ಡೆನ ಬದ್ರತ್‌ಲ್‌ ಕಾಪಾಡುವನೆಕೆ ಕಾಪಾಡಿಯ.

³ಅದ್‌ನೆಲ್ಲಾ ನೀಡ ಬೆರಕ್‌ ಕಟ್ಟಿಯಂಡ್, ನೀಡ ಹೃದಯತ್‌ರ ಓಳ್‌ತ ಕಲ್ಲ್‌ಲ್ ಒಳ್‌ದಿ ಬೆಚ್ಚ.

⁴ನೊಣೆ ತಕ್ಕ್‌ ಪರಿವ ವ್ಯಬಿಚಾರಿಯಾನ ಕೈಯಿಂಜ ಕಾಪಾಡಿತ್, ಇಞ್ಞೊಬ್ಬಂಡ ಪೊಣ್ಣಾಳ್‌ರ ಕೈಯಿಂಜ ನಿನ್ನ ದೂರ ಬೆಚ್ಚಿತ್‌ ಕಾಪಾಡಿಯೊಕಾಯಿತ್,

⁵ಜ್ಞಾನತ್‌ನ ನೋಟಿತ್‌ ನೀಡ ಅಕ್ಕಾ ಎಣ್ಣಿಯುಂಡು, ವಿವೇಕತ್‌ನ ನೋಟಿತ್‌ ನಾಡ ಬೆಂದ್‌ಕಾಂದು ಎಣ್ಣ್.

⁶ಒಮ್ಮ ನಾಡ ಮನೆರ ಕಿಡ್‌ಕೆರ ಪಕ್ಕ ನಿಂದಂಡ್, ಗಾಳಿ ಕ್‌ಡ್‌ಕೆ ಮೂಲಕ ಪೊರಮೆ ನೋಟ್‌ವಕ,

⁷ಸಾದು ಬಾಲೆಕಾರಂಗಡ ಮದ್ಯತ್‌ ಒಬ್ಬನ ನೋಟಿತ್, ದಡ್ಡನಾನ ಒರ್‌ ಬಾಲೆಕಾರನ ಕಂಡ.

⁸ಅಂವೊ ಅಂದಿಮಂದಿ ನೇರತು, ಬಯಿಟ್ ಇರ್‌ಟ್ ನೇರತು,

⁹ಅವ ಉಳ್ಳ ಬೀದಿರ ಮೂಲೆಕ್‌ ಪೋಯಿತ್, ಅವಡ ಮನೆರ ಪಕ್ಕ ಬೈಯಿಟಟಪ್ಪಕ ನಡ್‌ಂದ್‌ ಪೋಚಿ.

¹⁰ಅದಾ, ಅಕ್ಕ ಆ ಪೊಣ್ಣಾಳ್‌ ವೇಶಿರನೆಕೆ ಬಟ್ಟೆ ಇಟ್ಟಂಡ್, ಬಟ್ಟೆಲ್‌ ಅಂವೊನ ಕಾಂಬಕ್‌ ಪೊರಮೆ ಬಾತ್.

¹¹ಅವ ದುಂಬ ತಕ್ಕ್‌ ಪರಿಯುವವಳು, ಹಠಮಾರಿಯು ಆಯಿತ್ತಿಂಜತ್. ಅವಡ ಕಾಲ್‌ ಮನೆಲ್ ನಿಪ್ಪಯಿಂಜಿತ್‌ಲ್ಲೆ.

¹²ಅವ ಚೆನ್ನ ಸಮಯ ಪೊರಮೆ ನಿಂದಂಡ್‌ ಇಪ್ಪ, ಚೆನ್ನ ಸಮಯ ಬೀದಿಲ್‌ ನಿಂದಂಡಿಪ್ಪ, ಇಲ್ಲೇಂಗಿ ಮೂಲೆ ಮೂಲೆಲ್‌ ಪದ್‌ಂಗಿ ಕಾತಂಡಿಪ್ಪ.

¹³ಅವ ಆ ಬಾಲೆಕಾರನ ಪುಡ್‌ಚಿತ್‌ ಮುತ್ತ್‌ಕೊಡ್‌ತಿತ್, ಒಚ್ಚಿಕು ಞಾಣ ಇಲ್ಲತೆ ಅಂವೊನ ನೋಟಿತ್,

¹⁴ನಾನ್‌ ಸಮಾದಾನ ಬಲಿನ ಕೊಡ್‌ಕಂಡಿಂಜತ್. ಇಂದ್‌ ನಾಡ ಪರ್‌ಕೆನ ತೀತಿತ್‌ ಬಂದ.

¹⁵ಆನಗುಂಡ್, ನಾನ್‌ ನಿನ್ನ ಕಾಂಬಕಾಯಿತ್‌ ಪೊರ್‌ಟಿತ್‌ ಬಂದ, ನೀಡ ಮೂಡ್‌ನ ಕಾಂಗಂಡೂಂದ್‌ ತುಡ್‌ಚಿತ್‌ ತ್‍ೕಡ್‌ನ. ಇಕ್ಕ ನಾನ್‌ ನಿನ್ನ ಕಂಡ್‌ಪುಡ್‌ಚ.

¹⁶ನಾಡ ಮೆತ್ತೆಕ್‌ ಐಗುಪ್ತ ದೇಶತ್‌ಲ್‌ ಚಾಯಿ ರಂಗ್‌ರ, ನಯವಾನ ಪಿಂಞ ಚೋಂದ ನೂಲ್‌ಲ್‌ ಮಾಡ್‌ನ ಮೆತ್ತೆಬಟ್ಟೆನ ಇಟ್ಟಿತುಳ್ಳ.

¹⁷ನಾಡ ಮೆತ್ತೆಕ್‌ ರಕ್ತಬೋಳ, ಲೋಳಿಸರ ಪಿಂಞ ಪಟ್ಟೆಯಿಂಜ ತಯಾರ್‌ ಮಾಡ್‌ನ ಸುಗಂದ ದ್ರವ್ಯತ್‌ನ ಇಟ್ಟಿತುಳ್ಳ.

¹⁸ನಾಡ ಕೂಡೆ ಬಾ, ಪೊಲಾಕಕತನೆ ನಂಗ ಕುಶೀಲ್‌ ಇಂಜಿತ್, ಸುಕ ಪಡನ.

¹⁹ನಾಡ ವಡಿಯ ಮನೇಲ್‌ ಇಲ್ಲೆ, ಅಂವೊ ದುಂಬ ದೂರತ್‌ರ ಜಾಗಕ್‌ ಪ್ರಯಾಣ ಮಾಡಿತ್.

²⁰ಅಂವೊ, ಪನಚೀಲನ ಎಡ್‌ತಂಡ್‌ ಪೋಯಿತುಂಡ್, ಆನಗುಂಡ್‌ ಗೊತ್ತ್‌ಮಾಡ್‌ನ ದಿವಸತ್‌ ಅಂವೊ ಬಪ್ಪಾಂದ್‌ ಎಣ್ಣ್‌ಚಿ.

²¹ಅವ ಮೊದ್ರವಾಯಿತ್‌ ದುಂಬ ತಕ್ಕ್‌ ಪರ್‌ಂದಿತ್‌ ಆ ಬಾಲೆಕಾರನ ತಾಂಡ ವಶಕ್‌ ಬಪ್ಪಕ್‌ ಮಾಡಿತ್, ತಾಂಡ ನೊಣೆ ತಕ್ಕ್‌ಯಿಂಜ ಅಂವೊನ ತಾಂಗ್‌ ಒತ್ತೊನೆಕೆ ಮಾಡ್‌ಚಿ.

²²ಒಮ್ಮಕೆ ಅಂವೊ ಅವಡ ಬಯ್ಯ ಪೋಚಿ. ಒರ್‌ ಎತ್ತ್‌ ಅರ್ಪಕಾಯಿತ್‌ ಪೋಪನೆಕೆಯು, ಒರ್‌ ಮೂಡ ತಾಂಗ್‌ ಸರ್ಪಣಿ ಇಟ್ಟಿತ್‌ ದಂಡನೆಕ್‌ ಪೋಪನೆಕೆಯು,

²³ಒರ್‌ ಪಕ್ಷಿ ತಾಂಡ ಜೀವ ಪೋಪಾಂದ್‌ ಗೊತ್ತಿಲ್ಲತೆ ಬಲೆಕ್‌ ಬೂವಕ್‌ ಅವಸರತ್‌ಲ್‌ ಇಂಜನೆಕೆಯು, ಅವಡ ಬಯ್ಯತ್‌ ಪೋಚಿ, ತಾಂಡ ಪ್ರಾಣ ಪೋಪದ್‌ ಅಂವೊಂಗೇ ಗೊತ್ತಿಲ್ಲತ ಇಂಜತ್[5].

²⁴ಆನಗುಂಡ್‌ ಮಕ್ಕಳೇ, ನಾಡ ತಕ್ಕ್‌ನ ಕ್‍ೕಳಿ, ನಾನ್‌ ಎಣ್ಣುವ ತಕ್ಕ್‌ಕ್‌ ಕೆಮಿ ಕೊಡಿ.

²⁵ನೀಡ ಹೃದಯ ಅಂತ ಪೊಣ್ಣಾಳ್‌ರ ಬರಿಕ್‌ ಪೋಕತೆ ಇರಡ್, ಅವಡ ಬದ್‌ಕ್‌ರ ಬಟ್ಟೆಲ್‌ ತಿರ್‌ಗಾಡತೆ.

²⁶ಅವ ಸುಮಾರ್‌ ಜನಳ ಗಾಯ ಪಡ್‌ತಿತ್, ಬುದ್ದ್ ಪೋಪಕ್‌ ಮಾಡಿತ್. ಅವ ದುಂಬ ಶಕ್ತಿವಂದ ಆಣಾಳ್‌ವಳ ಕೊಂದಿತ್.

²⁷ಅವಡ ಮನೆಕ್‌ ಪೋಪ ಬಟ್ಟೆ ಪಾತಾಳಕ್‌ ಪೋಪ ಬಟ್ಟೆ ಆಯಿತುಂಡ್, ಅದ್‌ ಚಾವುರ ಕೋಂಬರೆಕ್‌ ಕೊಂಡ್‌ ಪೋಪ.