Read Kodava ಜ್ಞಾನತ್‌ರ ಪಡಿಮ 8 Bible Online

ಜ್ಞಾನತ್‌ರ ಪಡಿಮ 8 - Kodava bible

ಜ್ಞಾನತ್‌ರ ಪಡಿಮ 8

¹ಜ್ಞಾನ ಕಾಕಿಯಂಡಿಲ್ಲೆಯಾ? ಬುದ್ದಿ ಕೂತ್‌ ಕೊಡ್‌ತಂಡಿಲ್ಲೆಯಾ?

²ಅದ್‌ ಬಟ್ಟೆಲ್‌ ಉಳ್ಳ ಎತ್ತರವಾನ ಜಾಗತ್‌ಲು, ಅಡ್ಡ ರಸ್ತೆಲು ನಿಪ್ಪ.

³ಅದ್‌ ಊರ್‌ರ ಪಡಿರ ಬಾಯಿ ಕಂಡಿರ ಬರಿಯು, ಪಟ್ಟಣತ್‌ರ ಬಾಯಿಕಂಡಿಲು ನಿಂದಿತ್‌ ಜೋರಾಯಿತ್:

⁴ಜನಳೇ, ನಿಂಗಳ ನೋಟಿತ್‌ ನಾನ್‌ ಕಾಕಿಯಂಡುಳ್ಳ. ಎಲ್ಲಾ ಜನಕು ನಾನ್‌ ಕೂತ್‌ ಕೊಡ್‌ತಂಡುಳ್ಳ.

⁵ಸಾದು ಜನಳೇ, ವಿವೇಕತ್‌ನ ಪಡ್‌ಚೊಳಿ. ಮೂಡಂಗಳೇ, ಅರ್ಥಮಾಡುವಕ್‌ ಪ್ಯತ್ತಮಾಡಿ.

⁶ಕ್‍ೕಳಿ, ಯೋಗ್ಯವಾನ ಕಾರ್ಯತ್‌ನ ನಾನ್‌ ಎಣ್ಣುವಿ. ನಾನ್‌ ಎಣ್ಣ್‌ವದೆಲ್ಲ ಸೆರಿಯಾನದಾಯಿತಿಪ್ಪ.

⁷ನಾಡ ಬಾಯಿ ನೇರಾನದ್‌ನ ತಕ್ಕ್‌ ಪರಿವ. ದುಷ್ಟತನ ನಾಡ ಕಿರಿಕ್‌ ಅಸಹ್ಯವಾನದಾಯಿತ್‌ಪ್ಪ.

⁸ನಾಡ ಬಾಯಿರ ತಕ್ಕ್‌ಯೆಲ್ಲಾ ನೀತಿವಂತದಾಯಿತ್‌ಪ್ಪ. ಅದ್‌ಲ್‌ ಪೊಟ್ಟ್‌ ತಕ್ಕ್‌ ಆಡ್, ಬಟ್ಟೆ ತಪ್ಪುವ ತಕ್ಕ್‌ ಆಡ್‌ ಇಲ್ಲವೇ ಇಲ್ಲೆ.

⁹ಅರ್ಥ ಮಾಡ್‌ವಂವೊಂಗ್‌ ಅದೆಲ್ಲಾ ತೆಳ್‌ಂಗ್‌ನದಾಯಿತು, ಅರಿವುನ ಪಡ್‌ಂದಯಿಂಗಕ್‌ ಅದೆಲ್ಲಾ ಕಳಂಗ ಇಲ್ಲತದಾಯಿತು ಇಪ್ಪ.

¹⁰ಬೊಳ್ಳಿಕಿಂಜ ನಾಡ ಬುದ್ದಿತಕ್ಕ್‌ನ ಪಿಂಞ ಶುದ್ದ ಪೊನ್ನ್‌ಕಿಂಜ ನಾಡ ಜ್ಞಾನತ್‌ನ ಸ್ವೀಕಾರ ಮಾಡಿಯೊಳಿ.

¹¹ಪವಳಕಿಂಜಿ ಜ್ಞಾನ ನಲ್ಲದ್. ನಿಂಗ ಆಸೆ ಪಡುವದ್‌ ಏದು ಅದ್‌ಂಗ್‌ ಸಮವಾಯಿತ್‌ ಇಲ್ಲೆ.

¹²ಜ್ಞಾನ ಆನ ನಾನ್‌ ವಿವೇಕತ್‌ರ ಕೂಡೆ ವಾಸ ಮಾಡಿತ್, ಅರಿವು ಪಿಂಞ ನಲ್ಲ ಆಲೋಚನೆನ ಪಡಂದಿತುಳ್ಳ.

¹³ಯೆಹೋವಂಗ್‌ ಪೋಡಿಚಿಡುವಯಿಂಗ ಪಾಪತ್‌ನ ದ್ವೇಷ ಮಾಡುವ. ನಾನ್‌ ಹಮ್ಮ್‌ನ, ಗರ್ವತ್‌ನ, ಕ್‍ೕಡಾನ ಬಟ್ಟೆನ, ಕಪಟ ತಕ್ಕ್‌ನ ದ್ವೇಷ ಮಾಡುವಿ.

¹⁴ಆಲೋಚನೆಯು, ನೇರಾನ ಜ್ಞಾನವು ನಾಡದೇ. ಬುದ್ದಿಯು, ಶಕ್ತಿಯು ನಾಡ ಪಕ್ಕ ಉಂಡ್.

¹⁵ನಾಡಗೊಂಡ್‌ ರಾಜಂಗ ರಾಜ್ಯತ್‌ನ ಆಳುವ, ನ್ಯಾಯವಾನ ಕಾನೂನ್ನ ಕೊಂಡ ಬಪ್ಪ.

¹⁶ನಾಡಗೊಂಡ್‌ ಪ್ರಬುವ, ಅದಿಪತಿಯ ಆಳುವ, ಪಿಂಞ ಈ ಲೋಕತ್‌ಲ್‌ ಉಳ್ಳ ಎಲ್ಲಾ ನ್ಯಾಯಾದಿಪತಿಯ ಆಳ್‌ವಿಕೆ ಮಾಡುವ.

¹⁷ನನ್ನ ಪ್ರೀತಿಚಿಡುವಯಿಂಗಳ ನಾನ್‌ ಪ್ರೀತಿಚಿಡುವಿ. ನನ್ನ ನೇರಾಯಿತು ತ್‍ೕಡ್‌ವಯಿಂಗ ನನ್ನ ಕಂಡಿತವಾಯಿತ್‌ ಕಂಡ್‌ಪುಡಿಪ.

¹⁸ಐಶ್ವರ್ಯವು, ಗನವು ನಡ ಪಕ್ಕ ಉಂಡ್, ಪಾಳಾಕತ ವಸ್ತುವು, ನೀತಿಯು ನಾಡ ಪಕ್ಕ ಉಂಡ್.

¹⁹ನಾನ್‌ ನಿಂಗಕ್‌ ತಪ್ಪ ಫಲ ಪೊನ್ನ್‌ಕಿಂಜಲು, ಅಕ್ಕು ಶುದ್ದ ಪೊನ್ನಕಿಂಜಲು ನಲ್ಲದ್. ಶುದ್ದ ಬೊಳ್ಳಿಕಿಂಜಲೂ ನಾಡ ಆದಾಯ ನಲ್ಲದ್.

²⁰ನನ್ನ ಪ್ರೀತಿಚಿಡುವಯಿಂಗ ಐಶ್ವರ್ಯತ್‌ನ ಪಡೆಯುವಕು, ಅಯಿಂಗಡ ಬಂಡಾರತ್‌ನ ದುಂಬ್‌ಚಿಡುವಕು,

²¹ನಾನ್‌ ಅಯಿಂಗಳ ನೀತಿರ ಬಟ್ಟೆಲು, ನ್ಯಾಯತ್‌ರ ಬಟ್ಟೆಲು ನಡ್‌ತ್‌ವಿ.

²²ಯೆಹೋವ ತಾಂಡ ಸೃಷ್ಟಿ ಕಾರ್ಯಕ್‌ ಮಿಂಞ, ಆದಿಯಿಂಜಲೇ ಜ್ಞಾನವಾನ ನನ್ನ ತಾಂಡ ಕೃಯೇರ ತೊಡಕವಾಯಿತ್‌ ಬೆಚ್ಚಂಡಿಂಜತ್.

²³ಈ ಬೂಮಿ ಉಂಟಾಪಕ್‌ ಮಿಂಞಲೇ, ಆದ್ಯತ್‌ಲೇ ನನ್ನ ನೇಮಿಚ್ಚಿಟ್ಟತ್‌ ಮಾಡ್‌ಚಿ.

²⁴ಸಮುದ್ರತ್‌ರ ಆಳತ್‌ಲ್‌ ನೀರ್‌ ಉಂಟಾಪಕ್‌ ಮಿಂಞ ಬುಗ್ಗೆಯೆಲ್ಲಾ ನೀರ್‌ ಉಕ್ಕಿ ಬಪ್ಪಕ್‌ ಮಿಂಞಲೇ ನಾನ್‌ ಪುಟ್ಟತ್‌ ಪಬ್ಬನೆಕೆ ಮಾಡ್‌ಚಿ.

²⁵ಬೆಟ್ಟ ನೆಲೆ ಆಪಕ್‌ ಮಿಂಞಲು, ಕುಂದೆಲ್ಲಾ ಉಂಟಾಪಕ್‌ ಮಿಂಞಲು,

²⁶ಯೆಹೋವ ಬೂಮಿನ, ಅದ್‌ಂಡ ಬಯಲ್‌ನ ಪಿಂಞ ಬೂಮಿಲ್‌ ಉಳ್ಳ ಮಣ್ಣ್‌ನ ಉಂಟ್ ಮಾಡ್‌ವಕ್‌ ಮಿಂಞಲೇ ನಾನ್‌ ಪುಟ್ಟಿತ್‌ ಬಬ್ಬನೆಕೆ ಮಾಡ್‌ಚಿ.

²⁷ಅಂವೊ ಬಾನ ಮಂಡಲತ್‌ನ ಸೃಷ್ಟಿ ಮಾಡ್‌ವಕ ನಾನ್‌ ಅಲ್ಲಿ ಇಂಜ. ಅಂವೊ ಸಮುದ್ರತ್‌ರ ಗಡಿನ ಗೊತ್ತ್‌ಮಾಡ್‌ವಕ ನಾನ್‌ ಅಲ್ಲಿ ಇಂಜ.

²⁸ಎತ್ತರತ್‌ ಮೋಡತ್‌ನ ಸೃಷ್ಟಿ ಮಾಡಿತ್, ಸಮುದ್ರತ್‌ ಬುಗ್ಗೆನ ಬದ್ರವಾಯಿತ್‌ ಅಡೆಪಕ ನಾನ್‌ ಅಲ್ಲಿ ಇಂಜ.

²⁹ಸಮುದ್ರತ್‌ರ ನೀರ್‌ ಕರೆನ ದಾಟಿತ್‌ ಬಕ್ಕತನೆಕೆ ಅದ್‌ಂಗ್‌ ಮಿತಿನ ಆಜ್ಞೆ ಮಾಡಿತ್, ಬೂಮಿಕ್‌ ಅಡಿಪಾಯತ್‌ನ ಇಡುವಕಲು ನಾನ್‌ ಅಲ್ಲಿ ಇಂಜ.

³⁰ನಾನ್‌ ಅಂವೊಂಡ ಕೂಡೆ ಕೆತ್ತ್‌ವ ಪಣಿಕಾರಂಡನೆಕೆ[6] ಇಂಜ. ನಾನ್‌ ಎಕ್ಕಾಲು ಅಂವೊಂಡ ಕುತೂಹಲವಾಯಿತ್‌ ಇಂಜಿತ್, ಎಕ್ಕಾಲು ಅಂವೊಂಡ ಪ್ರಸನ್ನತೆಲ್‌ ಕೊಂಡಾಡಿಯಂಡಿಂಜ.

³¹ಅಂವೊಂಡ ಬೂಲೋಕತ್‌ಲ್‌ ಕೊಂಡಾಡಿತ್, ಮನುಷ್ಯ ಕುಲತ್‌ರ ಕೂಡೆ ಕುಶಿಪಟ್ಟಂಡಿಂಜ.

³²ಆನಗುಂಡ್‌ ಮಕ್ಕಳೇ, ನಾಡ ತಕ್ಕ್‌ನ ಕ್‍ೕಳಿ. ನಾನ್‌ ಎಣ್ಣ್‌ವಾನ ಕ್‍ೕಟಿತ್‌ ಅದ್‌ಂಗ್‌ ಬಗ್ಗಿತ್‌ ನಡ್‌ಪಯಿಂಗ ಆಶೀರ್ವಾದ ಪಡ್‌ಂದಯಿಂಗ.

³³ನಾಡ ಬೋದನೆನ ಕ್‍ೕಟಿತ್‌ ಜ್ಞಾನವಂತಯಿಂಗಳಾಯಿ. ಅದ್‌ನ ಬುಟ್ಟಿತ್‌ ಪೋಕತಿ.

³⁴ನಾಡ ಮನೆರ ಪಡಿರ ಪಕ್ಕ ಪಾರಕಾತಂಡ್, ನಾಡ ಪಡಿರ ಪಕ್ಕ ಎಕ್ಕಾಲು ನಿರೀಕ್ಷೆಲ್‌ ಕಾತಂಡ್, ನಾಕ್‍ ಕೆಮಿ ಕೊಡ್‌ಪಂವೊ ಆಶೀರ್ವಾದ ಪಡ್‌ಂದಂವೊ.

³⁵ನನ್ನ ಕಂಡ್‌ಪುಡಿಪಂವೊ ಜೀವತ್‌ನ ಕಂಡ್‌ಪುಡಿಪ. ಒಡೆಯಂಡ ದಯೆ ಸಹ ಅಂವೊಂಗ್‌ ಕ್‌ಟ್ಟುವ.

³⁶ನನ್ನ ಕಂಡ್‌ಪುಡಿಪ್ಪಕ್‌ ಕೈಯಾತಂವೊ, ತಾಂಡ ಆತ್ಮಕ್‌ ಕ್‍ೕಡ್‌ ಮಾಡಿಯೊವ. ನನ್ನ ದ್ವೇಷ ಮಾಡುವಯಿಂಗೆಲ್ಲಾ, ಚಾವುನ ಪ್ರೀತಿಮಾಡುವ.