Read Kodava ಯೋನ 1 Bible Online

ಯೋನ 1 - Kodava bible

ಯೋನ 1

¹ಯೆಹೋವ ದೇವ, ಅಮಿತ್ತೈ ಎಣ್ಣುವಂವೊಂಡ ಮೊಂವೊನಾನ ಯೋನಂಗ್:

²ನೀನ್‌ ಎದ್ದಿತ್‌ ನಿನೆವೆ ಎಣ್ಣುವ ಆ ಬಲ್ಯ ಪಟ್ಟಣಕ್‌ ಪೋಯಿತ್, ಅದ್‌ಂಗ್‌ ವಿರೋದವಾಯಿತ್, ಅಲ್ಲಿ ಉಳ್ಳ ಜನಕ್‌ ಜೋರಾಯಿತ್, ಅಯಿಂಗಡ ದುಷ್ಟತನ ನಾಕ್‍ ಮುಟ್ಟಿತ್‍ೕಂದ್‌ ಕೂತ್ತ್‌ ಕೊಡ್‍ೕಂದ್‌ ಎಣ್ಣ್‌ಚಿ.

³ಅಕ್ಕ ಯೋನ, ಯೆಹೋವಂಡ ಸನ್ನಿದಿಯಿಂಜ ಓಡಿ ಪೋಪಕಾಯಿತ್‌ ತಾರ್ಷೀಷ್ ಎಣ್ಣುವ ಪಟ್ಟಣಕ್‌ ಪೊರ್‌ಟತ್. ಅಂವೊ ಯೊಪ್ಪ ಎಣ್ಣುವ ಪಟ್ಟಣಕ್‌ ಪೋಯಿತ್‌ ಅಲ್ಲಿಂಜ ತಾರ್ಷೀಷ್‌ಕ್‌ ಪೋಪ ಹಡಗ್‌ನ ಕಂಡಿತ್‌ ಅಲ್ಲಿಕತ್ತನೆ ಪೋಪಕುಳ್ಳ ದುಡ್ಡ್‌ನ ಕೊಡ್‌ತಿತ್, ಯೆಹೋವಂಡ ಸನ್ನಿದಿಯಿಂಜ ಓಡಿ ಪೋಪಕಾಯಿತ್, ಹಡಗ್‌ಲುಳ್ಳಯಿಂಗಡ ಕೂಡೆ ಪೊರ್‌ಟ್ ಪೋಚಿ.

⁴ಅಕ್ಕಣೆಕ್ ಯೆಹೋವ ಬಲ್ಯ ಬಿರ್‌ಗಾಳಿನ ಸಮುದ್ರತ್‌ರ ಮೇಲೆ ಬಪ್ಪನೆಕೆ ಮಾಡ್‌ಚಿ. ಆ ಬಿರ್‌ಗಾಳಿ ಬಯಂಕರವಾಯಿತ್‌ ಬಪ್ಪಕ, ಬಲ್ಯ ಅಲೆ ಪೊಜ್ಜಿತ್, ಹಡಗ್‌ ಪೊಳಿಂಜಿ ಪೋಪನೆಕೆ ಆಚಿ.

⁵ಅಕ್ಕ ಹಡಗ್‌ಲ್‌ ಪ್ರಯಾಣ ಮಾಡುವಯಿಂಗಕ್‌ ಪೋಡಿ ಆಯಿತ್, ಅಯಿಂಗಯಿಂಗ ಅಯಿಂಗಯಿಂಗಡ ದೇವಳ ಬೋಡ್‌ಚಿ. ಅದಲ್ಲತೆ ಹಡಗ್‌ರ ಬಾರತ್‌ನ ಕಮ್ಮಿ ಮಾಡ್‌ವಕಾಯಿತ್, ಹಡಗ್‌ಲ್‌ ಇಂಜ ಸಾಮಾನತ್‌ನ ಸಮುದ್ರಕ್‌ ಎಡ್‌ತ್‌ ಕನ್‌ಚತ್. ಆಚೇಂಗಿ ಯೋನ ಹಡ್‌ಗ್‌ರ ಒಳ್‌ಕ್‌ ಪೋಯಿತ್‌ ಅಟ್ಟತ್‌ರ ಒರ್‌ ಬರಿಲ್‌ ಬುದ್ದಂಡಿಂಜತ್. ಅಂವೊಂಗ್‌ ನಲ್ಲ ವರ್‌ಕ್‌ ಪತ್ತಿತ್‌ಂಜತ್.

⁶ಅಕ್ಕಣೆಕ್ ಹಡ್‌ಗ್‌ರ ನಾಯಕ ಅಂವೊಂಡ ಪಕ್ಕ ಬಂತ್: ನೀನ್‌ ಎನ್ನಂಗ್‌ ಇನ್ನನೆ ಒರ್ವೊ? ಎದ್ದಿತ್‌ ನೀಡ ದೇವಕ್‌ ಮೊರೆ ಇಡ್. ನಂಗ ನಾಶ ಆಯಿಪೋಕತೆ ನೀಡ ದೇವ ಒಮ್ಮಕೆ ನಂಗಳ ರಕ್ಷಣೆ ಮಾಡುವೊ ಎಂತೋಂದ್‌ ಎಣ್ಣ್‌ಚಿ.

⁷ಅಕ್ಕಣೆಕ್ ಹಡಗ್‌ಲ್‌ ಪ್ರಯಾಣ ಮಾಡುವಯಿಂಗ, ಈ ಕ್‍ೕಡ್‌ ಬಪ್ಪಕ್‌ ದಾರ್‌ ಕಾರಣಾಂದ್‌ ಕಂಡ್‌ ಪುಡಿಪಕ್‌ ನಂಗ ಚೀಟಿ ಇಡಂಗ ಬಾರೀಂದ್‌ ಅಯಿಂಗಯಿಂಗಳೇ ತಕ್ಕ್‌ ಪರ್ಂದತ್. ಅನ್ನನೆ ಅಯಿಂಗ ಚೀಟಿ ಇಡ್‌ವಕ, ಆ ಚೀಟಿ ಯೋನಂಡ ಪೆದಕ್‌ ಬುದ್ದತ್.

⁸ಅಯಿಂಗ ಅಂವೊನ ನೋಟಿತ್: ಇನ್ನನೆಲ್ಲಾ ಆಪಕ್‌ ಕಾರಣ ದಾರ್‍ೕಂದ್‌ ನೀನೇ ನಂಗಕ್‌ ಎಣ್ಣಂಡು. ನೀಡ ಕೆಲಸ ಎಂತ? ನೀನ್‌ ಎಲ್ಲಿಂಜ ಬಂದಿಯಾ? ನೀನ್‌ ಏದ್‌ ದೇಶಕ್‌ ಕೂಡ್‌ನಂವೊ? ಏದ್‌ ಕುಲಕ್‌ ಕೂಡ್‌ನಂವೋಂದ್‌ ಕ್‍ೕಟತ್.

⁹ಅದ್‌ಂಗ್‌ ಅಂವೊ: ನಾನ್‌ ಇಬ್ರಿಯ ದೇಶಕ್‌ ಕೂಡ್‌ನಂವೊ. ಕಡಲ್‌ ಪಿಂಞ ಬೂಮಿನ ಸೃಷ್ಟಿ ಮಾಡ್‌ನ ಪರಲೋಕತ್‌ರ ದೇವನಾನ ಯೆಹೋವಂಡ ಬಕ್ತಾಂದ್‌ ಎಣ್ಣ್‌ಚಿ.

¹⁰ಇಂವೊ ಯೆಹೋವಂಡ ಸನ್ನಿದಿಯಿಂಜ ಓಡಿ ಪೋಯೇಂಡುಂಡ್‌ಂದ್‌ ಅಂವೊ ಅಯಿಂಗಕ್‌ ಎಣ್ಣ್‌ನಗುಂಡ್, ಅಯಿಂಗಕ್‌ ದುಂಬ ಪೋಡಿ ಆಯಿತ್: ನೀನ್‌ ಎನ್ನಂಗ್‌ ಇನ್ನನೆ ಮಾಡಿಯಾಂದ್‌ ಕ್‍ೕಟತ್.

¹¹ಅಕ್ಕಣೆಕ್ ಕಡಲ್‌ಲ್‌ ಬಿರ್‌ಗಾಳಿ ಇಂಞು ಬಯಂಕರವಾಯಿತ್‌ ಬಂದಂಡಿಂಜಗುಂಡ್‌ ಅಯಿಂಗ: ಈ ಕಡಲ್‌ ಶಾಂತಿ ಆಪಕ್‌ ನಂಗ ನೀಕ್‌ ಎಂತ ಮಾಡಂಡೂಂದ್‌ ಅಂವೊನ ಕ್‍ೕಟತ್.

¹²ಅಂವೊ ಅಯಿಂಗಕ್: ನಿಂಗ ನನ್ನ ಎಡ್‌ತಿತ್‌ ಕಡಲ್‍ಕ್ ಚಾಡಿ, ಅಕ್ಕ ನಿಂಗಡ ಮೇಲೆ ಬಪ್ಪ ಬಿರ್‌ಗಾಳಿ ಶಾಂತಿ ಆಪ; ನನ್ನಗುಂಡ್‌ ಇನ್ನನೆ ಬಿರ್‌ಗಾಳಿ ನಿಂಗಡ ಮೇಲೆ ಬಂದಂಡುಂಡ್‍ೕಂದ್‌ ನಾಕ್‍ ಗೊತ್ತುಂಡ್‍ೕಂದ್‌ ಎಣ್ಣ್‌ಚಿ.

¹³ಅದಂಡ ಬದ್‌ಲ್‌ ಅಯಿಂಗ, ಕಯ್ಯುವಚ್ಚಕ್‌ ಹಡಗ್‌ನ ಕಡಲ್‌ರ ಕರೆಕ್‌ ತಳ್ಳಿಯಂಡ್‌ ಪೋಪಕ್‌ ಪ್ರಯತ್‌ನಪಟ್ಟತ್. ಆಚೇಂಗಿ ಬಿರ್‌ಗಾಳಿ ಇಂಞು ಜೋರಾಯಿತ್‌ ಪೊಜ್ಜಂಗ್‌ ಅಯಿಂಗಕ್‌ ಎಲ್ಲಿಕು ಪೋಪಕ್‌ ಕಯಿಂಜಿತ್‌ಲ್ಲೆ.

¹⁴ಅಕ್ಕ ಅಯಿಂಗ ಯೆಹೋವನ ನೋಟಿತ್: ಈ ಮನುಷ್ಯಂಡ ಜೀವತ್‌ರಗುಂಡ್‌ ನಂಗಳ ನಾಶ ಮಾಡತೆ. ಇಂವೊಂಡ ಚಾವ್‌ಕ್‌ ನಂಗಳ ಜವಾಬ್ದಾರಂಗಳಾಯಿತ್‌ ಎಣ್ಣಂಡ. ಓ ಯೆಹೋವನೇ, ನೀಡ ಚಿತ್ತತ್‌ರ ಪ್ರಕಾರ ನೀನ್‌ ಮಾಡಿಯಾಂದ್‌ ಮೊರೆ ಇಟ್ಟಿತ್,

¹⁵ಯೋನಾನ ಎಡ್‌ತಿತ್‌ ಕಡಲ್‍ಕ್ ಕನ್‌ಚತ್. ಅಕ್ಕ ಕಡಲ್‌ ಶಾಂತಿಯಾಚಿ.

¹⁶ಇದನಗುಂಡ್‌ ಅಯಿಂಗಕ್‌ ಇಂಞು ಪೋಡಿ ಆಯಿತ್, ದೇವಕ್‌ ಬಲಿ ಕೊಡ್‌ತಿತ್, ಎಲ್ಲಾ ತರತ್‌ರ ವಾಗ್ದಾನ ಮಾಡ್‌ಚಿ.

¹⁷ಯೆಹೋವ, ಯೋನನ ನುಂಗುವಕಾಯಿತ್‌ ಒರ್‌ ಬಲ್ಯ ಮೀನ್ನ ತಯಾರ್‌ ಮಾಡಿತ್‌ ಅಯಿಚತ್. ಯೋನ, ಮೂಂದ್‌ ದಿನ ಪೊಲಾಕ ಬಯಿಟ್ ಆ ಮೀನ್‌ರ ಪೊಟ್ಟೆರ ಒಳ್‌ಲ್‌ ಇಂಜತ್.