Read Kodava ಯೋನ 2 Bible Online

ಯೋನ 2 - Kodava bible

ಯೋನ 2

¹ಯೋನ ಆ ಮೀನ್‌ರ ಪೊಟ್ಟೆರ ಒಳ್‌ಲ್‌ ಇಂಜಂಡ್, ಅಂವೊಂಡ ದೇವನಾನ ಯೆಹೋವಂಗ್‌ ಇನ್ನನೆ ಪ್ರಾರ್ಥನೆ ಮಾಡ್‌ಚಿ.

²ನಾಡ ಕಷ್ಟತ್‌ಲ್‌ ನಾನ್‌ ಯೆಹೋವನ ಬೋಡ್‌ವಕ, ಅಂವೊ ನಾಕ್‍ ಜವಾಬ್ ಕೊಡ್‌ತತ್. ನಾನ್‌ ಪಾತಾಳತ್‌ರ ಅಡಿಲಿಂಜ ಸಹಾಯಕಾಯಿತ್‌ ನಿನ್ನ ಕಾಕ್‌ನ, ನೀನ್‌ ನಾಡ ಮೊರೇಕ್‌ ಜವಾಬ್ ತಂದಿಯ.

³ಕಡಲ್‌ರ ಮದ್ಯತ್‌ರ ಆಳಕ್‌ ನೀ ನನ್ನ ಚಾಡ್‌ನ, ಸುಳಿ ನೀರ್‌ ನನ್ನ ಮುಚ್ಚಿರ್‌ತ್. ನೀಡ ಬಯಂಕರ ಅಲೆ ಪಿಂಞ ನೊರೆ ನಾಡ ಮಂಡರೆ ಮೇಲೆ ಪೋಚಿ.

⁴ನೀಡ ಸನ್ನಿದಾನತಿಂಜ ನನ್ನ ಎಡ್‍ತ್‍ಟ್ಟಿಯಾಂದ್‌ ನಾನ್‌ ಗೇನ ಮಾಡ್‌ನ. ಆಚೇಂಗಿಯು ಇಂಞು ನಾನ್‌ ನೀಡ ಪವಿತ್‌ರ ದೇವಾಲಯತ್‌ನ ಪುನಃ ನೋಟ್‌ವಿ.

⁵ಸುಳಿ ನೀರ್‌ ನನ್ನ ಸುತ್ತ್‌ನಂಗ್‌ ನಾನ್‌ ಮುಳುಗೊನಕೆ ಆಯಿತ್, ನಾಡ ಪ್ರಾಣ ಪೋಪನೆಕೆ ಆಚಿ. ಕಡಲ್‌ರ ಆಳ ನನ್ನ ಸುತ್ತಿರತ್, ಕಡಲ್‌ರ ಕಚ್ಚಡ ನಾಡ ಮಂಡೆರ ಮೇಲೆ ಅಂಟಿಚಿ.

⁶ಕಡಲ್‌ರ ಒಳ್‌ಲ್‌ ಉಳ್ಳ ಕುಂದ್ರ ಅಡಿಕ್‌ ಮುಳ್‌ಗಿಟ, ಬೂಮಿರ ಬೀಗ ನನ್ನ ಅಲ್ಲಿಯೇ ಕೈದಿಯಾಯಿತ್‌ ಬೆಚ್ಚತ್. ಆಚೇಂಗಿಯು ನಾಡ ಯೆಹೋವ ದೇವನೇ, ನೀನ್‌ ನಾಡ ಪ್ರಾಣನ ಪಾತಾಳತಿಂಜ ಕಾಪಾಡಿಯಲ್ಲ!

⁷ನಾಡ ಆತ್ಮ ನಾಡ ಒಳ್‌ಲ್‌ ಕುಂದಿ ಪೋಪಕ ನಾನ್‌ ಯೆಹೋವನಾನ ನಿನ್ನ ಗೇನಮಾಡ್‌ನ. ಅಕ್ಕ ನಾಡ ಪ್ರಾರ್ಥನೆ ನೀಡ ಪವಿತ್‌ರ ದೇವಾಲಯತ್‌ಲ್‌ ನೀಡ ಪಕ್ಕ ಮುಟ್ಟ್‌ಚಿ.

⁸ಒರ್‌ ಪ್ರಯೋಜನ ಇಲ್ಲತ ವಿಗ್‌ರಹತ್ಟ ಬಯ್ಯ ಪೋಪಯಿಂಗ, ಅಯಿಂಗಕ್‌ ದೇವ ಕೊಡ್‌ಪ ಕೃಪೇನ ತ್‌ಕ್ಕಾರ ಮಾಡುವ.

⁹ಆಚೇಂಗಿ ನಾನ್, ನಿನ್ನ ತುದಿಚಿತ್‌ ನೀಕ್‌ ಬಲಿ ಕೊಡ್‌ಪಿ; ನಾನ್‌ ಮಾಡ್‌ನ ಪರಕೆನ ಒಪ್ಪಿಚಿಡ್‌ವಿ; ಎನ್ನಂಗೆಣ್ಣ್‌ಚೇಂಗಿ ರಕ್ಷಣೆ ಯೆಹೋವನಗುಂಡ್‌ ಮಾತ್‌ರ ಬಪ್ಪ.

¹⁰ಪಿಂಞ, ಯೆಹೋವ ಮೀನ್‌ಕ್‌ ಆಜ್ಞೆ ಕೊಡ್‌ತತ್, ಅದ್‌ ಯೋನನ ಒಣ ಬೂಮಿಕ್‌ ಕಕ್ಕ್‌ಚಿ.