Read Kodava ಯೋನ 3 Bible Online

ಯೋನ 3 - Kodava bible

ಯೋನ 3

¹ದಂಡನೆ ಕುರಿ ಯೆಹೋವಂಡ ವಾಕ್ಯ ಯೋನಂಗ್‌ ಉಂಟಾಯಿತ್, ಅಂವೊ:

²ನೀನ್‌ ಎದ್ದಿತ್‌ ಬಲ್ಯ ಪಟ್ಟಣವಾನ ನಿನೆವೆಕ್‌ ಪೋಯಿತ್, ನಾನ್‌ ನೀಕ್‌ ಎಣ್ಣ್‌ವ ಪ್ರಕಾರ ಅಲ್ಲಿ ಉಳ್ಳಯಿಂಗಕ್‌ ಎಚ್ಚರ ಕೊಡ್‌ಕೊಂಡೂಂದ್‌ ಎಣ್ಣ್‌ಚಿ.

³ಅಕ್ಕ ಯೋನ ಎದ್ದಿತ್, ಯೆಹೋವ ಆಜ್ಞೆ ಮಾಡ್‌ನ ಪ್ರಕಾರ ನಿನೆವೆಕ್‌ ಪೋಚಿ. ಆ ಪಟ್ಟಣ ಮೂಂದ್‌ ದಿನ ನಡ್‌ಪಚ್ಚಕ್‌ ದೂರ ವಿಸ್ತಾರವಾನ ಬಲ್ಯ ಪಟ್ಟಣವಾಯಿತ್‌ಂಜತ್.

⁴ಯೋನ ಆ ಬಲ್ಯ ಪಟ್ಟಣತ್‌ಲ್‌ ಪ್ರವೇಷ ಮಾಡಿತ್, ಒರ್‌ ದಿನ ಪ್ರಯಾಣ ಮಾಡಿತ್: ಇಂಞು ನಾಪ್ಪದ್‌ ದಿವಸತ್‌ಲ್‌ ನಿನೆವೆ ಪಟ್ಟಣ ನಾಶ ಆಪಾಂದ್‌ ಪ್ರಚಾರ ಮಾಡ್‌ಚಿ.

⁵ಇದನ ಕ್‍ೕಟ ನಿನೆವೆ ಜನ, ದೇವಡ ಮೇಲೆ ನಂಬಿಕೆ ಬೆಚ್ಚಿತ್, ಒಂದೂ ತಿಂಗತೆ ಪಟ್ಟಣಿ ನಿಕ್ಕಂಡೂಂದ್‌ ಎಣ್ಣ್‌ಚಿ. ಪೆರಿಯಯಿಂಗಯಿಂಜ ಸುರು ಮಾಡಿತ್‌ ಚೆರಿಯಯಿಂಗತ್ತನೆ ಎಲ್ಲಾರು ಗೋಣಿಚೀಲತ್‌ರ ಬಟ್ಟೇನ ಕೆಟ್ಟಿಯಂಡತ್.

⁶ಈ ಸುದ್ದಿ ನಿನೆವೆ ಪಟ್ಟಣತ್‌ರ ರಾಜಂಗ್‌ ಮುಟ್ಟ್‌ವಕ, ಅಂವೊ ತಾಂಡ ಸಿಂಹಾಸನತ್‌ಂಜ ಎದ್ದಿತ್, ಇಟ್ಟಂಡಿಂಜ ತಾಂಡ ರಾಜ ವಸ್ತ್ರತ್‌ನ ಉತ್ತಿತ್, ಗೋಣಿಚೀಲತ್‌ರ ಬಟ್ಟೇನ ಕೆಟ್ಟಿಯಂಡ್‌ ಬೂದಿರ ಮೇಲೆ ಅಳ್‌ತಂಡತ್.

⁷ಇದಲ್ಲತೆ ಅಂವೊನು ಅಂವೊಂಡ ಅದಿಕಾರಿಯಳು ತೀರ್ಮಾನ ಮಾಡ್‌ನ ಆಜ್ಞೆಯಾಯಿತ್‌ ಕೊಡ್‌ತ ಆಜ್ಞೆರ ವಿವರ ಎಂತ ಎಣ್ಣ್‌ಚೇಂಗಿ: ನಿನೆವೆರ ಜನ, ಪ್ರಾಣಿಯ, ಎತ್ತ್‌ಕಡ್‌ಚಿಯ, ಆಡ್‌ಕೊರಿಯ ಸಹ ಏದ್‌ ರಸವು ನೋಟ್‌ವಕ್ಕಾಗ, ತಿಂಬಕು ಕುಡಿಪಕು ಆಗ.

⁸ಅದಲ್ಲತೆ ಜನಳು ಪ್ರಾಣಿಯಳು ಗೋಣಿಚೀಲ ಬಟ್ಟೆನ ಕೆಟ್ಟಂಡು, ಎಲ್ಲರು ದೇವಕ್‌ ಜೋರಾಯಿತ್‌ ಮೊರೆಯಿಡಂಡು. ಒಬ್ಬೊಬ್ಬನು ತಾಂಡ ಪಾಳ್‌ ಬಟ್ಟೆನ ಪಿಂಞ ಹಿಂಸೆ ಮಾಡ್‌ವದ್‌ನ ಬುಡಂಡು.

⁹ದಾರ್‌ಕ್‌ ಗೊತ್ತುಂಡ್, ಒರ್‌ ಸಮಯ ದೇವ ಕನಿಕರಪಟ್ಟಿತ್‌ ತಾಂಡ ಬಯಂಕರ ಚೆಡಿನ ಬಯ್ಯಕ್‌ ಎಡ್‌ಕು, ನಂಗ ನಾಶ ಆಕತೆ ಬದ್‌ಕುವಾಂದ್‌ ಎಣ್ಣ್‌ವಕ್‌ ಎಣ್ಣ್‌ಚಿ.

¹⁰ದೇವ ನಿನೆವೆರ ಜನ ಮಾಡುವ ಕಾರ್ಯತ್‌ನೆಲ್ಲಾ ನೋಟಿತ್‌ ಅಯಿಂಗ ಪಾಳ್‌ ಬಟ್ಟೆಯಿಂಜ ತಿರ್‌ಗ್‌ಚೀಂದ್‌ ಅರ್‌ಂಜಂಡ್, ಅಂವೊಂಡ ಮನಸ್ಸ್‌ನ ಬದ್‌ಲಾಯಿಚಿಟ್ಟಿತ್, ಕಣಿಕಾರಪಟ್ಟಿತ್, ಅಂವೊ ಕೊಡ್‌ಕಂಡೂಂದ್‌ ಇಂಜ ದಂಡನೆನ ಕೊಡ್‌ಕತೆ ಬುಟ್ಟ್‌ರ್‌ತ್.