Read Kodava ಮಲಾಕಿ 1 Bible Online

ಮಲಾಕಿ 1 - Kodava bible

ಮಲಾಕಿ 1

¹ಯೆಹೋವ ಮಲಾಕಿರ ಮೂಲಕ ಇಸ್ರಾಯೇಲ್‌ ಜನಕ್‌ ಕೊಡ್‌ತ ಸುದ್ದಿ.

²ನಾನ್‌ ನಿಂಗಳ ಪ್ರೀತಿ ಮಾಡಿಯೇಂದ್‌ ಯೆಹೋವ ಎಣ್ಣಿಯಂಡುಂಡ್. ಆಚೇಂಗಿ ನಿಂಗ: ನಂಗಳ ಎನ್ನನೆ ಪ್ರೀತಿ ಮಾಡಿಯಾಂದ್‌ ಕ್‍ೕಪಿರ. ಅದ್‌ಂಗ್‌ ಯೆಹೋವ: ಏಸಾವ ಯಾಕೋಬಂಡ ಅಣ್ಣನಲ್ಲ? ಆಚೇಂಗಿಯು ಯಾಕೋಬನ ನಾನ್‌ ಪ್ರೀತಿ ಮಾಡಿಯೆ.

³ಆಚೇಂಗಿ ಏಸಾವನ ನಾನ್‌ ದ್ವೇಷ ಮಾಡ್‌ನ. ಅಂವೊಂಡ ಕುಂದ್‌ನೆಲ್ಲ ಪಾಳ್‌ ಮಾಡಿತ್, ಅಂವೊಂಡ ಜಾಗತ್‌ನ ಮಣಬೂಮಿಲ್‌ ಉಳ್ಳ ಕುರ್‌ಕಂಗಕ್‌ ಬಾದ್ಯತೇಯಾಯಿತ್‌ ಮಾಡ್‌ನ.

⁴ಇನ್ನನೆ ಇಪ್ಪಕ ಏಸಾವಂಡ ಸಂತಾನಕಾರಂಗಳಾನ ಎದೋಮ್ಯರಯಿಂಗ: ನಂಗಡ ಊರೆಲ್ಲ ನಾಶ ಆಯಿತುಂಡ್‌ ಆಚೇಂಗಿಯು ನಂಗ ಅದ್‌ನೆಲ್ಲ ಪುನಃ ಕೆಟ್ಟುವಾಂದ್‌ ಎಣ್ಣಿಯಂಡುಂಡ್. ಅದ್‌ಂಗ್‌ ಯೆಹೋವ: ಅಯಿಂಗ ಕೆಟ್ಟುವ, ಆಚೇಂಗಿ ನಾನ್‌ ಅದ್‌ನ ಪೊಳಿಚಿಡುವಿ. ಜನ ಅಯಿಂಗಳ ದುಷ್ಟಯಿಂಗಡ ಗಡೀಂದು, ಯೆಹೋವಂಡ ಬಲ್ಯ ಚೆಡಿರ ಜನಾಂದು ಕಾಕುವ.

⁵ಇದ್‌ನ ನಿಂಗಡ ಸ್ವಂತ ಕಣ್ಣ್‌ ಕಾಂಬ. ಅಕ್ಕ ನಿಂಗ: ಯೆಹೋವ ಬಲ್ಯಂವೊ. ಅಂವೊಂಡ ಮಹಿಮೆನ ಇಸ್ರಾಯೇಲ್‌ ಗಡಿನ ದಾಟಿತ್‌ ಕಾಂಬಕಯ್ಯೂಂದ್‌ ಎಣ್ಣುವಿರ.

⁶ಒರ್‌ ಮೋಂವೊ ತಾಂಡ ಅಪ್ಪನ ಪಿಂಞ ಒರ್‌ ಆಳ್‌ ತಾಂಡ ಎಜಮಾನನ ಗನ ಪಡುತುವಲ್ಲಾ; ನಾನ್‌ ಅಪ್ಪನಾಚೇಂಗಿ ನಾಕ್‍ ಕೊಡ್‌ಪಕುಳ್ಳ ಮರ್ಯಾದೆ ಎಲ್ಲಿ? ನಾನ್‌ ಎಜಮಾನನಾಚೇಂಗಿ ನಾಕ್‍ ಬೊತ್ತುವಕುಳ್ಳ ಪೋಡಿ ಎಲ್ಲೀಂದ್‌ ಸೈನ್ಯತ್‌ರ ಒಡೆಯನಾನ ಯೆಹೋವ, ತಾಂಡ ಪೆದತ್‌ನ ಅಲ್ಲಗೆಳಯುವ ಯಾಜಕಂಗಳಾನ ನಿಂಗಳ ಕೇಟಂಡುಂಡ್. ಅದಂಗ್‌ ಅಯಿಂಗ: ನೀಡ ಪೆದತ್‌ರ ಏದ್‌ ವಿಷಯತ್‌ಲ್‌ ಅಲ್ಲಗೆಳಿಚ್ಚತ್‌ಂದ್‌ ಕ್‌ಟ್ಟತ್.

⁷ನಾಡ ಬಲಿಪೀಠತ್‌ಲ್‌ ಅಶುದ್ದವಾನ ಆಹಾರತ್‌ನ ಅರ್ಪಿಚಿಡುವಿರಲ್ಲ. ಆಚೇಂಗಿಯು ನಂಗ ಏದ್‌ ವಿಷಯತ್‌ಲ್‌ ಅಶುದ್ದ ಮಾಡಿಯೇಂದ್‌ ಕ್‍ೕಪಿರ. ನಿಂಗ: ಯೆಹೋವಂಡ ಬಲಿಪೀಠತ್‌ರ[1] ಆಹಾರಕ್‌ ಎಂತ ಮರ್ಯಾದೆ ಉಂಡ್‍ೕಂದ್‌ ಗೇನ ಮಾಡ್‌ನಗುಂಡ್‌ ಅದ್‌ನ ನಿಂಗ ಅಶುದ್ದ ಮಾಡಿರ.

⁸ನಿಂಗ ಕುರ್‌ಡಾನ ಒರ್‌ ಪ್ರಾಣಿನ ಬಲಿ ಕೊಡ್‌ಪಕ್‌ ಎಡ್‌ತ್‌ ಬಾತೇಂಗಿ, ಅದ್‌ ತಪ್ಪಿಲ್ಲೇಂದ್‌ ಎಣ್ಣುವಿರ; ನಿಂಗ ಕುಂಟಾಯಿತ್‌ ಉಳ್ಳದ್‌ನ, ಕಾಯಿಲೆ ಉಳ್ಳದ್‌ನ ಕೊಂಡ್‌ ಬಾತೇಂಗಿಯು ಅದ್‌ ತಪ್ಪಿಲ್ಲೇಂದ್‌ ಎಣ್ಣುವಿರಲ್ಲ? ಇನ್ನನೆ ಉಳ್ಳದ್‌ನ ನೀನ್‌ ನೀಡ ಅದಿಕಾರಿಕ್‌ ಅರ್ಪಿಚಿಟ್ಟತೇಂಗಿ, ಅಂವೊ ನೀಡ ಮೇಲೆ ಕುಶೀಲ್‌ ಇಪ್ಪಾ? ಅಂವೊ ನೀಕ್‌ ದಯೆ ಕಾಟುವೊ? ಎಣ್ಣಿಯಂಡ್‌ ಸೈನ್ಯತ್‌ರ ಒಡೆಯನಾನ ಯೆಹೋವ ಕ್‍ೕಟಂಡುಂಡ್.

⁹ಆನಗುಂಡ್‌ ಯಾಜಕಂಗಳೇ, ಇಕ್ಕ ಯೆಹೋವನಾನ ದೇವಡ ದಯೆ ಕ್‌ಟ್ಟುವನೆಕೆ ಅಂವೊನ ನೋಟಿತ್‌ ಬೋಡಿಯೊಳಿ. ಇದ್‌ ನಿಂಗಡಯಿಂಜ ಬಂದದ್; ಅಂವೊ ನಿಂಗಳ ಅಂಗಿಕಾರ ಮಾಡ್‌ವಾ ಇಲ್ಲೆಯಾಂದ್‌ ಸೈನ್ಯತ್‌ರ ಒಡೆಯನಾನ ಯೆಹೋವ ಕ್‍ೕಟಂಡುಂಡ್.

¹⁰ಪ್ರಯೋಜನ ಇಲ್ಲತೆ, ದಾರು ನಾಡ ಬಲಿಪೀಠತ್‌ರ ಮೇಲೆ ತಿತ್ತ್‌ನ ಕತ್ತ್‌ಚಿಡತೆ ಇಪ್ಪಕ್‌ ನಿಂಗಡಲ್ಲಿ ಒಬ್ಬ ದೇವಾಲಯತ್‌ರ ಪಡಿನ ಮಚ್ಚಿರ್ತೇಂಗಿ, ಅದ್‌ ಎಚ್ಚಕೋ ನಲ್ಲದಾಯಿತ್‌ಪ್ಪ. ನಿಂಗಡ ಮೇಲೆ ನಾಕ್‍ ಕುಶಿ ಇಲ್ಲೇಂದ್‌ ಸೈನ್ಯತ್‌ರ ಒಡೆಯನಾನ ಯೆಹೋವ ಎಣ್ಣಿಯಂಡುಂಡ್. ನಿಂಗಡ ಕೈಯಿಂಜ ಇಡುವ ಕಾಣಿಕೆನ ಸತ ನಾನ್‌ ಸ್ವೀಕಾರ ಮಾಡುಲೆ.

¹¹ಸೂರ್ಯ ಉದಿಪ ದಿಕ್ಕ್‌ ಪುಡಿಚಿತ್, ಅದ್‌ ಮುಳಿವ ದಿಕ್ಕ್‌ಕತ್ತನೆ, ಎಲ್ಲಾ ದೇಶತ್‌ರ ಜನಳು ನಾಡ ಪೆದತ್‌ನ ಗನ ಪಡ್‌ತುವ. ಎಲ್ಲಾ ಜಾಗತ್‌ಲು ನಾಕ್‍ ದೂಪತ್‌ನ ಪಿಂಞ ಶುದ್ದ ಕಾಣಿಕೆನ ಅರ್ಪಿಚಿಡುವ. ಅಕ್ಕು, ಎಲ್ಲಾ ಜನಾಂಗತ್‌ರ ಮದ್ಯತ್‌ಲು ನಾಡ ಪೆದ ಬಲ್ಯದಾಯಿತ್‌ಪ್ಪಾಂದ್‌ ಸೈನ್ಯತ್‌ರ ಒಡೆಯನಾನ ಯೆಹೋವ ಎಣ್ಣಿಯಂಡುಂಡ್.

¹²ಆಚೇಂಗಿ ನಿಂಗ ನಾಡ ಬಲಿಪೀಠಕ್‌ ಎಂತ ಮರ್ಯಾದೆ ಕೊಡ್‌ಕಂಡೂಂದ್‌ ಎಣ್ಣುವಕ ಪಿಂಞ ಅದ್‌ಂಡ ಮೇಲೆ ಅಶುದ್ದವಾನ ಆಹಾರತ್‌ನ ಅರ್ಪಿಚಿಡುವಕ ನಾಡ ಪೆದತ್‌ನ ಗನ ಪಡುತಿಯಂಡಿಲ್ಲೆ.

¹³ಅದಾ, ನಂಗ ಈ ಸೇವೇನ ಮಾಡಿತ್‌ ಎಚ್ಚಕ್‌ ತಳ್‌ಂದ್‌ ಪೋಯಿತುಂಡ್‍ೕಂದ್‌ ಎಣ್ಣಿತ್‌ ಕಾಡ್‌ ಪ್ರಾಣಿಯ ಆಕ್ರಮಣ ಮಾಡ್‌ನ ಪ್ರಾಣಿಯಳ, ಕುಂಟಾಯಿತ್‌ ಉಳ್ಳದ್‌ನ, ಕಾಯಿಲೆ ಉಳ್ಳದ್‌ನ ಎಡ್‌ತ ಬಪ್ಪಿರ. ಅದ್‌ನ ನಾನ್‌ ಸ್ವೀಕಾರ ಮಾಡುವೀಂದ್‌ ಗೇನ ಮಾಡ್‌ವಿರಾಂದ್‌ ಯೆಹೋವ ಕ್‍ೕಟಂಡುಂಡ್.

¹⁴ಒಬ್ಬ, ಯೆಹೋವಂಗ್‌ ಪರಕೆ ಮಾಡಿತ್‌ ಅಂವೊಂಡ ಹಿಂಡ್‌ಲ್‌ ಎತ್ತ್‌ ಬೆಚ್ಚಂಡು, ಊನ ಉಳ್ಳದ್‌ನ ಅರ್ಪಿಚಿಡುವಕ, ಮೋಸಗಾರಂಗ್‌ ಶಾಪ ಬಪ್ಪ. ಎಲ್ಲಾ ಜನಾಂಗತ್‌ರ ಜನಳು ನಾಡ ಪೆದತ್‌ನ ಗನ ಪಡ್‌ತುವ. ನಾನ್‌ ಬಲ್ಯ ರಾಜಾಂದ್‌ ಸೇನೆರ ಒಡೆಯನಾನ ಯೆಹೋವ ಎಣ್ಣಿಯಂಡುಂಡ್.