Read Kodava ಮಲಾಕಿ 2 Bible Online

ಮಲಾಕಿ 2 - Kodava bible

ಮಲಾಕಿ 2

¹ಇಕ್ಕ ಯಾಜಕಂಗಳೇ, ಇದ್‌ ನಿಂಗಕಾಯಿತ್‌ ಉಳ್ಳ ಆಜ್ಞೆ.

²ನಿಂಗ ನಾಡ ತಕ್ಕ್‌ನ ಕ್‍ೕಕತೆ, ನನ್ನ ಗನಪಡುತ್‌ವಕ್‌ ಮನಸ್ಸ್‌ ಮಾಡತೆ ಇಂಜತೇಂಗಿ, ನಿಂಗಕ್‌ ಶಾಪ ಇಟ್ಟಿತ್, ನಿಂಗಡ ಆಶೀರ್ವಾದತ್‌ನ ಶಾಪವಾಯಿತ್‌ ಬದ್‌ಲ್‌ ಮಾಡುವಿ; ಅಕ್ಕು ನಾನ್‌ ಅಯಿಂಗಕ್‌ ಅಕ್ಕಲೆ ಶಾಪ ಇಟ್ಟಿತುಳ್ಳ, ಎನ್ನಂಗೆಣ್ಣ್‌ಚೇಂಗಿ ನಿಂಗ ನನ್ನ ಗನಪಡುತ್‌ವಕ್‌ ಮನಸ್ಸ್‌ ಮಾಡಿತ್‌ಲ್ಲೇಂದ್‌ ಸೈನ್ಯರ ಒಡೆಯನಾನ ಯೆಹೋವ ಎಣ್ಣಿಯಂಡುಂಡ್.

³ಚಾಯಿ ಕೆಮಿ ಕೊಡ್‌ತಿತ್‌ ಕ್‍ೕಳಿ, ನಿಂಗಡ ಸಂತಾನಕ್‌ ದಂಡನೆ ತಪ್ಪಿ; ನಿಂಗಡ ನಮ್ಮೆಳ್‌ ಬಲಿ ಕೊಡ್‌ಪ ಪ್ರಾಣಿಯಡ ಚಾಣತ್‌ನ ನಿಂಗಡ ಮೂಡ್‌ಕ್‌ ಪರ್‌ತ್‌ವಿ. ಆ ಚಾಣ ಗುಡ್ಡೆರ ಕೂಡೆ ನಿಂಗಳ ಎಡ್‌ತಂಡ್‌ ಪೋಯಿರ್ವ.

⁴ಲೇವಿಯಡ ಸಂತಾನವಾನ ಈ ಯಾಜಕಂಗಡ ಕೂಡೆ ನಾನ್‌ ಮಾಡ್‌ನ ಒಪ್ಪಂದತ್‌ನ, ಮಿಂಞಕ್‌ ನಡ್‌ತಿಯಂಡ್‌ ಪೋಪಕಾಯಿತ್‌ ನಾನ್‌ ಆ ಆಜ್ಞೆನ ಕೊಡ್‌ತ್‍ೕಂದ್‌ ಅಕ್ಕ ನಿಂಗಕ್‌ ಗೊತ್ತಾಪಾಂದ್‌ ಒಡೆಯನಾನ ಸರ್ವಶಕ್ತಿವಂತಂವೊ ಎಣ್ಣಿಯಂಡುಂಡ್.

⁵ನಾನ್‌ ಲೇವಿಯಂಗಡ ಕೂಡೆ ಮಾಡ್‌ನ ಒಪ್ಪಂದ ಜೀವ ಉಳ್ಳದು, ಸಮಾದಾನ ಉಳ್ಳದು ಆಯಿತ್‌ಂಜತ್. ಅಯಿಂಗ ನಾಕ್‍ ಬಕ್ತಿಯಿಂಜ ಇರಂಡೂಂದ್‌ ನಾನ್‌ ಅದ್‌ನ ಕೊಡ್‌ತ. ಅನ್ನನೆ ಅಯಿಂಗ ನಾಕ್‍ ಬೊತ್ತಿತ್‌ ಬಕ್ತಿಲ್‌ ಇಂಜತ್.

⁶ಅಯಿಂಗಡ ಬಾಯಿಲ್‌ ನೇರಾನ ಬೋದನೆ[2] ಇಂಜತ್. ಅಯಿಂಗಡ ಕಿರಿಲ್‌ ಒರ್‌ ತಪ್ಪ್‌ನ ಸತ ಕಂಡಿತ್‌ಲ್ಲೆ. ಅಯಿಂಗ ನಾಡ ಕೂಡೆ ಸಮಾದಾನತ್‌ಲ್‌ ಪಿಂಞ ನೀತಿಲ್‌ ನಡ್‌ಂದಿತ್, ಬೋರೆ ದುಂಬ ಜನಳ ಪಾಪತ್‌ರ ಕಾರ್ಯ ಮಾಡುವದಿಂಜ ತಿರುಕಿತ್.

⁷ಸತ್ಯತ್‌ನ ಬೋದನೆ ಮಾಡ್‌ವದ್‌ ಯಾಜಕಂಗಡ ಕರ್ತವ್ಯ. ದೇವ ಎಂತ ಎಣ್ಣಿಯಂಡುಂಡ್‍ೕಂದ್‌ ಕ್‍ೕಪಕಾಯಿತ್‌ ಜನ ನಿಂಗಡ ಪಕ್ಕ ಬರಂಡು. ಎನ್ನಂಗೆಣ್ಣ್‌ಚೇಂಗಿ, ಯಾಜಕಂಗಳೇ ದೇವಡ ದೂತಂಗಾಂದ್‌ ಒಡೆಯನಾನ ಸೇನೇನ ಒಡಯನಾನ ಯೆಹೋವ ಎಣ್ಣಿಯಂಡುಂಡ್.

⁸ಆಚೇಂಗಿ ನಿಂಗ ಆ ಬಟ್ಟೆನ ಬುಟ್ಟಿತ್‌ ದೂರ ಪೋಯಿತುಳ್ಳಿರ. ನಿಂಗಡ ಬೋದನೆಯಿಂಜ ದುಂಬ ಜನಳ ಬಟ್ಟೆ ತಪ್ಪಿ ಪೋಪನೆಕೆ ಮಾಡಿತುಳ್ಳಿರಾಂದು. ಲೇವಿಯ ಗೋರ್‌ರತ್‌ರ ಕೂಡ ನಾನ್‌ ಮಾಡ್‌ನ ಒಡಂಬಡಿಕ್ಕೇನ ನಿಂಗ ಅಶುದ್ದ ಮಾಡಿತುಳ್ಳಂದ್‌ ಸೈನ್ಯತ್‌ರ ಒಡೆಯನಾನ ಯೆಹೋವ ಎಣ್ಣಿಯಂಡುಂಡ್.

⁹ನಿಂಗ ನಾಡ ಬಟ್ಟೆನ ಬುಟ್ಟಿತ್‌ ದೂರ ಪೋಯಿತ್, ನಿಂಗಡ ಬೋದನೆಲ್‌ ಪಕ್ಷಪಾತ ಮಾಡಿತ್‌ ನಾಡ ಒಪ್ಪಂದತ್‌ನ ಮುರ್ಚನಗುಂಡ್, ನಾನ್‌ ಸತ ನಿಂಗಳ ಇಸ್ರಾಯೇಲ್‌ ದೇಶತ್‌ರ ಎಲ್ಲಾ ಜನಡ ಮಿಂಞತ್‌ ನಿಂಗಳ ದ್ವೇಷ ಮಾಡಿತ್‌ ನಿಂಗಕ್‌ ಅವಮಾನ ಆಪನೆಕೆ, ಅಯಿಂಗ ನಿಂಗಳ ಹಿಯಾಳಿಚಿಟ್ಟಿತ್‌ ಕೀಳ್‌ತರತ್‌ಲ್‌ ನೋಟುವನೆಕೆ ಮಾಡ್‌ನ.

¹⁰ನಂಗ ಎಲ್ಲಾರ್‌ಕು ಒರೇ ಅಪ್ಪ ಅಲ್ಲಾ? ಒರೇ ದೇವ ನಂಗಳೆಲ್ಲ ಸೃಷ್ಟಿ ಮಾಡ್‌ಚಲ್ಲಾ? ಇನ್ನನೆ ಇಪ್ಪಕ ಎನ್ನಂಗ್‌ ನಂಗ ಒಬ್ಬಂಗ್‌ ಒಬ್ಬ ದ್ರೋಹ ಮಾಡಿಯಂಡ್‌ ಒಡೆಯನಾನ ಯೆಹೋವ ನಂಗಡ ಮುತ್ತಜ್ಜಂಗಡ ಕೂಡೆ ಮಾಡ್‌ನ ಒಪ್ಪಂದತ್‌ನ ಮುರ್ಚಂಡುಂಡ್?

¹¹ಯೆಹೂದ ಜನ ದ್ರೋಹ ಮಾಡಿತ್, ಇಸ್ರಾಯೇಲ್‌ಲ್‌ ಪಿಂಞ ಯೆರೂಸಲೇಮ್‌ಲ್‌ ಅಸಹ್ಯವಾನ ಕಾರ್ಯ ಮಾಡ್‌ಚಿ; ಒಡೆಯನಾನ ಯೆಹೋವ ಕುಶಿಪಡುವ ಪವಿತ್‌ರತ್‌ನ ದೇವಾಲಯತ್‌ನ, ಯೆಹೂದ ಜನ ಅಶುದ್ದ ಮಾಡಿತ್, ಪರದೇಶಿಯಡ ದೇವಳ ಆರಾದನೆ ಮಾಡುವ ಮೂಡಿ ಮಕ್ಕಳ ಮಂಗಲ ಕಯಿಚತ್.

¹²ಇಂತ ಒರ್‌ ಅಸಹ್ಯವಾನ ಕಾರ್ಯ ಮಾಡ್‌ನ ಓರೋರ್‌ ಮನುಷ್ಯಂಗು, ಇಸ್ರಾಯೇಲ್‌ ಜನತ್‌ಲ್‌ ಅಂವೊ ಇಲ್ಲತೆ ಆಯಿ ಪೋಡ್. ಅಂವೊ ನಂಗಡ ಒಡಯನಾನ ಯೆಹೋವಂಗ್‌ ಅರ್ಪಿಚಿಡುವಕ್‌ ಬಪ್ಪಕುಲ್ಳಂವೊನಾಯಿತಿಂಜತೇಂಗಿಯು ಆಪ್ಪಲೆ.

¹³ಇಂಞೊರ್‌ ಕಾರ್ಯತ್‌ನ ಸಹ ನಿಂಗ ಮಾಡ್‌ವಿರ. ಒಡೆಯನಾನ ಯೆಹೋವಂಡ ಬಲಿಪೀಠತ್‌ನ ಕಣ್ಣೀರಿಂಜ, ಗೋಳಾಡ್‌ವದಿಂಜ, ನಿಟ್ಟುಸಿರ್ಯಿಂಜ ದುಂಬ್‌ವಿರ. ಎನ್ನಂಗೆಣ್ಣ್‌ಚೇಂಗಿ, ಅಂವೊ ಇಂಞು ಮಿಂಞಕ್‌ ನಿಂಗಡ ಕಾಣಿಕ್ಕ್‌ ಮರ್ಯಾದಿಯು ತಪ್ಪುಲೆ, ಅದ್‌ನ ನಿಂಗಡ ಕೈಯಿಂಜ ಕುಶೀಲ್‌ ಸ್ವೀಕಾರವು ಮಾಡುಲೆ.

¹⁴ಇದ್‌ಂಗ್‌ ಎಂತ ಕಾರಾಣಾಂದ್‌ ಕ್‍ೕಪಿರ? ಒಡೆಯನಾನ ಯೆಹೋವ ನೀಕು, ನೀಡ ಪ್ರಾಯತ್‌ರ ಪೊಣ್ಣ್‌ಕೂ ಸಾಕ್ಷಿಯಾಯಿತುಂಡ್. ನೀಡ ಚಂಙಾದಿಯು, ನೀಡ ಪೊಣ್ಣು ಆನ ಅವಕ್‌ ನೀನ್‌ ದ್ರೋಹ ಮಾಡಿಯಲ್ಲಾ.

¹⁵ಒಡೆಯನಾನ ಯೆಹೋವ ನಿನ್ನ ಪಿಂಞ ನೀಡ ಪೊಣ್ಣ್‌ನ ಒಂದಾಯಿತ್‌ ಮಾಡ್‌ಚಲ್ಲಾ? ತಡಿಲ್‌ ಪಿಂಞ ಆತ್ಮತ್‌ಲ್‌ ನಿಂಗ ಅಂವೊಂಗ್‌ ಸ್ವಂತವಾನಯಿಂಗ. ಅಂವೊಂಗ್‌ ಎಂತ ಬೋಂಡು? ನಿಂಗ ಒಂದಾಯಿತ್‌ ಕೂಡಿತ್‌ ನಿಂಗಡಯಿಂಜ ದೇವಡ ಪೋಡಿ ಉಳ್ಳ ಮಕ್ಕಳ ಪುಟ್ಟ್‌ಚಿಡುವದ್‌ ತಾನೆ ಅಂವೊಂಗ್‌ ಬೋಂಡು. ಆನಗುಂಡ ನಿಂಗ ದಾರೂ ತಾಂಡ ಪ್ರಾಯತ್‌ರ ಪೊಣ್ಣ್‌ಕ್ ದ್ರೋಹ ಮಾಡತೆ ನಿಂಗಡ ಆತ್ಮತ್‌ರ ವಿಷಯತ್‌ ಎಚ್ಚರ ಎಡತೊಳಿ.

¹⁶ಒರ್‌ ವಡಿಯ ತಾಂಡ ಪೊಣ್ಣ್‌ನ ಬೋಂಡಾಂದ್‌ ಬುಟ್ಟಿತ್‌ ಪೋಪದ್‌ನ ನಾನ್‌ ದ್ವೇಶ ಮಾಡುವೀಂದ್‌ ಇಸ್ರಾಯೇಲ್‌ಂಡ ದೇವನಾನ ಯೆಹೋವ ಎಣ್ಣಿಯಂಡುಂಡ್. ಅಂತ ಕಠಿಣ ಕಾರ್ಯ ಮಾಡುವದ್‌ನ ನಾನ್‌ ದ್ವೇಶ ಮಾಡುವಿ. ನಿಂಗಡ ಪೊಣ್ಣ್‌ರ ಕೂಡೆ ಮಾಡ್‌ನ ಒಪ್ಪಂದಕ್‌ ನಂಬಿಕಸ್ತನಾಯಿತ್‌ ಇಪ್ಪಕ್‌ ಎಚ್ಚರ ಎಡ್‌ತೊಳಿಂದ್‌ ಒಡಯನಾನ ಸೇನೇನ ಯೆಹೋವ ಎಣ್ಣಿಯಂಡುಂಡ್.

¹⁷ನಿಂಗಡ ತಕ್ಕ್‌ಯಿಂಜ ಒಡೆಯನಾನ ಯೆಹೋವಂಗ್‌ ಮದಿ ಆಪನೆಕೆ ಮಾಡಿರ. ಆಚೇಂಗಿಯು ನಿಂಗ: ನಂಗ ಏದ್‌ ವಿಷಯತ್‌ಲ್‌ ಅಂವೊನ ಮದಿ ಆಪನೆಕೆ ಮಾಡಿಯೇಂದ್‌ ಕ್‍ೕಪಿರ. ಕ್‍ೕಡ್‌ ಮಾಡುವಂವೊ ಒಡೆಯನಾನ ಯೆಹೋವಡ ಮಿಂಞತ್‌ ನಲ್ಲಂವೋಂದು, ಅನ್ನನೆ ಮಾಡುವಂವೊಂಡ ಮೇಲೆ ದೇವ ಕುಶೀಲ್‌ ಉಂಡ್‍ೕಂದು, ನ್ಯಾಯ ತೀರ್‌ಪ್‌ ತಪ್ಪ ದೇವ ಎಲ್ಲೀಂದು ನಿಂಗ ಕ್‍ೕಪಗುಂಡ್‌ ನಿಂಗಡ ತಕ್ಕ್‌ಯಿಂಜ ಮದಿ ಆಪನೆಕೆ ಮಾಡ್‌ವಿರ.