Read Kodava ಮತ್ತಾಯ 10 Bible Online

ಮತ್ತಾಯ 10 - Kodava bible

ಮತ್ತಾಯ 10

¹ಯೇಸು ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಕಾಕುವಂಜಿ, ಕೂಳಿ ಪುಡ್‌ಚಯಿಂಗಕ್ ಕೂಳಿ ಬುಡ್‌ತ್‌ವಕು, ಎಲ್ಲಾ ರೋಗ ಪಿಂಞ ಎಲ್ಲಾ ಕಾಯಿಲೆನ ವಾಸಿ ಮಾಡ್‌ವಕು ಅಯಿಂಗಕ್ ಅದಿಕಾರ ಕೊಡ್‍ತತ್.

²ಆ ಪನ್ನೆರಂಡ್ ಅಪೊಸ್ತಲಂಗಡ ಪೆದ ಎಂತ ಎಣ್ಣ್‌ಚೇಂಗಿ, ಆದ್ಯವಾಯಿತ್, ಪೇತ್ರಾಂದ್ ಕಾಕುವ ಸೀಮೋನ ಪಿಂಞ ಅಂವೊಂಡ ತಮ್ಮಣ ಅಂದ್ರೆಯ, ಜೆಬೆದಾಯಂಡ ಮೋನೆಯಂಗಳಾನ ಯಾಕೋಬ ಪಿಂಞ ಅಂವೊಂಡ ತಮ್ಮಣನಾನ ಯೋಹಾನ,

³ಫಿಲಿಪ್ಪ, ಬಾರ್ತೊಲೊಮಾಯ, ತೋಮ, ಕಂದಾಯ ಎಡ್‌ಪಂವೊನಾನ ಮತ್ತಾಯ, ಅಲ್ಫಾಯಂಡ ಮೋಂವೊ ಯಾಕೋಬ, ತದ್ದಾಯ,

⁴ದೇಶ ಪ್ರೇಮಿಯಾನ[28] ಸೀಮೋನ ಪಿಂಞ ಯೇಸುನ ವಿರೋದಿಯಂಗಡ ಪಕ್ಕ ಪುಡ್‌ಚಿತ್ ಕೊಡ್‍ಪ ಇಸ್ಕರಿಯೋತ ಯೂದ ಎಣ್ಣ್‌ವಯಿಂಗಳೇ.

⁵ಈ ಪನ್ನೆರಂಡ್ ಶಿಷ್ಯಂಗಳ ಯೇಸು ಅಯಿಪಕ, ಇನ್ನನೆ ಎಚ್ಚರಿಕೆ ಮಾಡಿತ್ ಅಯಿಚತ್: ಯೆಹೂದ್ಯಂಗ ಇಲ್ಲತ ಜಾಗಕ್ ಪೋಕತಿ ಪಿಂಞ ಸಮಾರ್ಯ[29] ಪಟ್ಟಣತ್‍ಲ್ ಕಾಲಿಡತಿ.

⁶ಅದ್ಂಡ ಬದ್‍ಲ್ ಇಸ್ರಾಯೇಲ್‍ಕ್ ಮಾತ್ರ ಪೋಯಿ. ಅಯಿಂಗ ಬಟ್ಟೆ ತಪ್ಪಿ ಪೋನ ಕೊರಿರನೆಕೆ ಉಂಡ್.

⁷ಅಲ್ಲಿಕ್ ಪೋಯಿತ್, ಪರಲೋಕ ರಾಜ್ಯ ಬೆರಿಯ ಬಪ್ಪಾಂದ್ ಎಣ್ಣಿ.

⁸ಕಾಯಿಲಸ್ತಂಗಳ ವಾಸಿ ಮಾಡಿ, ಚತ್ತಯಿಂಗಳ ಬದ್‍ಕ್‍ಚಿಡಿ. ಕುಷ್ಟರೋಗಿಯಳ ವಾಸಿ ಮಾಡಿ ಪಿಂಞ ಕೂಳಿ ಪುಡ್‌ಚಯಿಂಗಕ್, ಕೂಳಿನ ಬುಡ್‍ತಿ. ನಿಂಗಕ್ ಪುಕ್ಕಟೆಯಾಯಿತ್ ಕ್‍ಟ್ಟ್‌ನದ್‍ನ ಪುಕ್ಕಟೆಯಾಯಿತ್ ಕೊಡಿ.

⁹ನಿಂಗಡ ಕೂಡೆ ಪೊನ್ನ್, ಬೊಳ್ಳಿ, ತಾಂಬ್ರ ಏದು ಎಡ್‍ತಂಡ್ ಪೋಕತಿ.

¹⁰ಪ್ರಯಾಣಕಾಯಿತ್ ಒರ್ ಚೀಲ ಆಡ್, ದಂಡ್ ಕೋಟ್ ಆಡ್, ಎಕ್ಕಡ ಆಡ್, ಕೋಲ್ ಆಡ್, ಒಂದನೂ ಎಡ್‍ಕತಿ. ಒರ್ ಕೆಲಸಕಾರಂಗ್ ಎಂತ ಬೋಂಡ್‌ವೋ ಅದ್‍ನ ಜನ ಕೊಡ್‍ಕಂಡು.

¹¹ನಿಂಗ ಒರ್ ಊರ್‌ಕ್ ಅಥವ ಪಟ್ಟಣಕ್ ಪೋಪಕ, ಯೋಗ್ಯನಾಯಿತುಳ್ಳ ಒರ್ ಮನುಷ್ಯನ ಕಂಡ್‍ಪುಡ್‌ಚಿತ್, ಇಂಞೊರ್ ಊರ್‌ಕ್ ಪೋಪಕತ್ತನೆ ಅಂವೊಂಡ ಮನೆಲ್ಲೇ ಇರಿ.

¹²ನಿಂಗ ಅಯಿಂಗಡ ಮನೆರೊಳ್‌ಕ್ ಪೋಪಕ ಅಯಿಂಗಕ್ ಸಮಾದಾನಾಂದ್ ಆಶೀರ್ವಾದ ಮಾಡಿ.

¹³ಆ ಸಮಾದಾನಕ್ ಅಯಿಂಗ ಯೋಗ್ಯವಾಯಿತುಂಡೇಂಗಿ ಆ ಸಮಾದಾನ ಅಲ್ಲಿ ಇರಡ್ ಇಲ್ಲತೆಪೋಚೇಂಗಿ, ಆ ಸಮಾದಾನ ನಿಂಗಡ ಪಕ್ಕ ಪುನಃ ಬರಡ್.

¹⁴ದಾರೇಂಗಿ, ನಿಂಗಳ ಸ್ವಾಗತ ಮಾಡತ ಪೋಚೇಂಗಿ ಅಥವ ನಿಂಗ ಎಣ್ಣ್‌ವಾನ ಕ್‍ೕಕತೆ ಪೋಚೇಂಗಿ, ಅಯಿಂಗಡ ಊರ್‌ನ ಬುಟ್ಟಿತ್ ಬಪ್ಪಕ, ನಿಂಗಡ ಕಾಲ್‌ಲ್ ಉಳ್ಳ ದೂಳ್‍ನ ಕೊಡ್‍ಕಿತ್ ಬಾರಿ[30].

¹⁵ದೇವ ತೀರ್ಪ್ ತಪ್ಪ ದಿವಸತ್‍ಲ್, ಈ ಪಟ್ಟಣಕ್ ಕ್‍ಟ್ಟ್‌ವ ಶಿಕ್ಷೆಕಿಂಜ, ಸೊದೋಮ್[31] ಗೊಮೋರ ಪಟ್ಟಣಕ್ ಕ್‍ಟ್ಟ್‌ವ ಶಿಕ್ಷೆ ಕಮ್ಮಿಯಾಯಿತಿಪ್ಪಾಂದ್ ನೇರಾಯಿತು ನಿಂಗಕ್ ಎಣ್ಣ್‌ವಿ.

¹⁶ನೋಟಿ, ನಿಂಗಳ ತೋಳಯಡ ಮದ್ಯತ್ ಕೊರಿಯಳ ಅಯಿಪನೆಕೆ ನಾನ್ ನಿಂಗಳ ಅಯಿಚಂಡುಳ್ಳ. ಅದ್ಂಗಾಯಿತ್ ನಿಂಗ ಪಾಂಬ್‍ರನೆಕೆ ಜಾಣವಾಯಿತು, ಪಾರಿವಾಳರನೆಕೆ ಸಾದುವಾಯಿತು ಇರಿ.

¹⁷ಇದ್‍ಲ್ಲತೆ ಜನಡ ಕೂಡೆ ಎಚ್ಚರತ್‍ಲ್ ಇರಿ. ಅಯಿಂಗ ನಿಂಗಳ ನ್ಯಾಯಾಲಯಕ್ ಬಲ್‍ಚಂಡ್ ಪೋಯಿತ್, ಅಯಿಂಗಡ ಆಲೋಚನೆ ಸಬೇಲ್ ಒಪ್ಪ್‌ಚಿಟ್ಟಿತ್ ಅಯಿಂಗಡ ಸಬಾಮಂದಿರತ್‍ಲ್ ನಿಂಗಳ ಚಾಟಿಲ್ ಪೊಯ್ಯುವ.

¹⁸ನಾಡಗುಂಡ್ ಬಲ್ಯ ಅದಿಪತಿಯಂಗಡ ಪಿಂಞ ರಾಜಂಗಡ ಎದಿಕೆ ನಾಡ ನಲ್ಲ ಸುದ್ದಿ ಎಣ್ಣ್‌ವಕಾಯಿತ್ ನಿಪ್ಪ್‌ಚಿಡ್‌ವ. ಇನ್ನನೆ ಅಯಿಂಗಕು ಪಿಂಞ ಅನ್ಯ ಜನಾಂಗಕು ನಾಡ ವಿಷಯತ್‍ನ ಎಣ್ಣ್‌ವಿರ.

¹⁹ಆಚೇಂಗಿ ನಿಂಗಳ ಬಂದಿಚಿಡ್‌ವಕ, ನಿಂಗ ಎಂತ ಎಣ್ಣಂಡೂಂದ್, ಎನ್ನನೆ ಎಣ್ಣಂಡೂಂದ್ ಬೇಜಾರ್ ಮಾಡಂಡ. ಏದ್ ಸಮಯತ್‍ಲ್ ಎಂತ ತಕ್ಕ್ ಪರಿಯಂಡೂಂದ್ ನಿಂಗಕ್ ಗೊತ್ತ್ ಮಾಡ್‌ವ.

²⁰ಎನ್ನಂಗೆಣ್ಣ್‌ಚೇಂಗಿ ಅಕ್ಕ ತಕ್ಕ್ ಪರಿವದ್ ನಿಂಗ ಅಲ್ಲ, ನಿಂಗಡ ಅಪ್ಪಂಡ ಆತ್ಮವೇ ನಿಂಗಡ ಒಳ್‌ಳಿಂಜ ತಕ್ಕ್ ಪರಿವ.

²¹ಅಣ್ಣತಮ್ಮಣಂಗ ತಾಂಡ ಸ್ವಂತ ಅಣ್ಣತಮ್ಮಣಂಗಳ ಒಪ್ಪ್‌ಚಿಡ್‌ವಂಜಿ ಕೊಲ್ಲ್‌ಚಿಡ್‌ವ, ಅಪ್ಪಂಗ ಸಹ ತಾಂಡ ಸ್ವಂತ ಮಕ್ಕಳ ಅದೇ ಪ್ರಕಾರ ಒಪ್ಪ್‌ಚಿಡ್‌ವಂಜಿ ಕೊಲ್ಲ್‌ಚಿಡ್‌ವ. ಮಕ್ಕ ಅಪ್ಪವ್ವಂಗಕ್ ವಿರೋದವಾಯಿತ್ ಮಕ್ಕಳೇ ಅಯಿಂಗಳ ಕೊಲ್ಲ್‌ಚಿಡ್‌ವ.

²²ನಾಡಗುಂಡ್ ಎಲ್ಲಾ ಜನಳು ನಿಂಗಳ ದ್ವೇಶಿಚುಡುವ, ಆಚೇಂಗಿ ಕಡೇಕತ್ತನೆ ದೃಡವಾಯಿತ್ ನಂಬಿಕೇಲ್ ನಿಪ್ಪಂವೊಂಗ್ ರಕ್ಷಣೆ ಕ್‍ಟ್ಟ್‌ವ.

²³ಒರ್ ಊರ್‌ಲ್ ನಿಂಗಕ್ ಹಿಂಸೆ ತಂದಕ ಬೋರೆ ಊರ್‌ಕ್ ಓಡಿ ಪೋಯಿ. ಎನ್ನಂಗೆಣ್ಣ್‌ಚೇಂಗಿ ಮನುಷ್ಯಕುಮಾರ ಬಪ್ಪಕ್ ಮಿಂಞ ಇಸ್ರಾಯೇಲ್‌ಲ್ ಉಳ್ಳ ಪಟ್ಟಣಕೆಲ್ಲ ನಿಂಗಕ್ ಪೋಪಕ್ ಕಯ್ಯುಲೇಂದ್ ನಾನ್ ನಿಂಗಕ್ ನೇರಾಯಿತು ಎಣ್ಣ್‌ವಿ.

²⁴ಉಪಾದ್ಯಕಿಂಜ ಶಿಷ್ಯ ಬಲ್ಯಂವೊನು ಅಲ್ಲ, ಎಜಮಾನಕಿಂಜ ಆಳ್ ಬಲ್ಯಂವೊನು ಅಲ್ಲ.

²⁵ಒರ್ ಶಿಷ್ಯ ಉಪಾದ್ಯಂಡನೆಕೆ ಇಂಜತೇಂಗಿ ಮದಿ, ಅನ್ನನೆ ಒರ್ ಆಳ್ ಅಂವೊಂಡ ಎಜಮಾನಂಡನೆಕೆ ಇಂಜತೇಂಗಿ ಮದಿ. ಮನೆರ ಎಜಮಾನನೇ ಬೆಲ್ಜೆಬೂಲ್[32] ಎಂದ್ ಕಾಕ್‍ಚೇಂಗಿ, ಅಂವೊಂಡ ಮನೆಕಾರಳ ಇಂಞು ಎಚ್ಚಕ್ ಎಣ್ಣುವ?

²⁶ಆನಗುಂಡ್ ನಿಂಗಳ ದಬಾಯಿಚಿಡ್‍ವಯಿಂಗಕ್ ಬೊತ್ತತಿ. ಎನ್ನಂಗೆಣ್ಣ್‌ಚೇಂಗಿ, ಒಳ್‌ಪ್‌ಚ್ಚಿಟಂಡ್ ಉಳ್ಳದೆಲ್ಲ ಪೊರಮೆ ಬಪ್ಪ, ಮುಚ್ಚಿತುಳ್ಳದೆಲ್ಲಾ ಬೊಳಿಕ್ ಬಪ್ಪ.

²⁷ನಾನ್ ನಿಂಗಕ್ ಇರ್‌ಟ್‌ಲ್ ಪಡಿಪ್‍ಚಿಡ್‍ವಾನ, ನಿಂಗ ಬೊಳಿಲ್ ಎಣ್ಣಿ ಕೊಡಿ. ನಿಂಗಕ್ ಗುಟ್ಟಾಯಿತ್ ಕೆಮಿಲ್ ಎಣ್ಣ್‌ವಾನ ಮನೆರ ಕೊಡಿಲ್ ಪೋಯಿತ್ ಕೂತ್ ಕೊಡ್‌ತಿತ್ ಎಣ್ಣಿ ಕೊಡಿ.

²⁸ತಡೀನ ಮಾತ್ರ ಕೊಂದಿತ್ ಆತ್ಮತ್‌ನ ಕೊಲ್ಲ್‌ವಕ್ ಕಯ್ಯತಯಿಂಗಕ್ ಬೊತ್ತತಿ. ಆಚೇಂಗಿ ಆತ್ಮತ್‍ನು ತಡೀನು ನರಕತ್‍ಲ್ ನಾಶ ಮಾಡ್‌ವಕ್ ಶಕ್ತಿವಂತನಾಯಿತುಳ್ಳಂವೊಂಗ್ ಬೊತ್ತಿಚಿಡಿ.

²⁹ಗುಬ್ಬಚ್ಚಿನ ಚೆನ್ನ ಗೇನ ಮಾಡಿಯೊಳಿ, ಅದ್ಂಡ ಕ್ರಯ ದುಂಬ ಕಮ್ಮಿ. ಒರ್ ನಾಣ್ಯಕ್ ದಂಡ್ ಗುಬ್ಬಚ್ಚಿನ ಎಡ್‍ಪಕಯ್ಯು. ಆಚೇಂಗಿಯು ದೇವಡ ಚಿತ್ತ ಇಲ್ಲತೆ ಒರ್ ಗುಬ್ಬಚಿ ಸಹ ಅಡಿಕ್ ಬೂವ್‌ಲೆ.

³⁰ನಿಂಗಡ ಮಂಡೆಲುಳ್ಳ ತಲ್‍ಮಿ ಸಹ ಎಚ್ಚಕ್ ಉಂಡ್‍ೕಂದ್ ಅಂವೊಂಗ್ ಲೆಕ್ಕ ಗೊತ್ತುಂಡ್.

³¹ಆನಗುಂಡ್, ನಿಂಗ ಬೊತ್ತತಿ. ದುಂಬ ಮನೆ ಪಕ್ಷಿಯಕಿಂಜ ನಿಂಗ ಎಚ್ಚಕೋ ಬೆಲೆ ಉಳ್ಳಯಿಂಗಳಾಯಿತ್ತುಳ್ಳಿರ.

³²ನಾನ್ ನಿಂಗಕ್ ನೇರಾಯಿತ್ ಎಣ್ಣ್‌ವಿ: ದಾರೆಲ್ಲಾ ಮನುಷ್ಯಂಗಡ ಮಿಂಞತ್, ಅಂವೊ ನಾಡ ಬಕ್ತಾಂದ್ ಎಣ್ಣುವ, ನಾನ್ ಸಹ ಅಂವೊನ ಪರಲೋಕತ್‍ಲ್ ಉಳ್ಳ ನಾಡ ಅಪ್ಪಂಡ ಮಿಂಞತ್‍ಲ್ ನಾಡಂವೋಂದ್ ಎಣ್ಣ್‌ವಿ.

³³ಆಚೇಂಗಿ ದಾರ್ ಮನುಷ್ಯಂಗಡ ಮಿಂಞತ್ ನನ್ನ ತ್‍ಕ್ಕಾರ ಮಾಡ್‌ವ, ಅಂವೊನ ನಾನು ಸಹ ಪರಲೋಕತ್‍ಲ್ ಉಳ್ಳ ದೇವಡ ಮಿಂಞತ್ ತ್‍ಕ್ಕಾರ ಮಾಡ್‌ವಿ.

³⁴ನಾನ್, ಬೂಮಿಲ್ ಸಮಾದಾನತ್‍ನ ಕೊಡ್‍ಪಕಾಯಿತ್ ಬಂದಿಯೇಂದ್ ನಿಂಗ ಗೇನ ಮಾಡತಿ. ಸಮಾದಾನ ಮಾಡ್‌ವಕ್ ಅಲ್ಲ, ಆಚೇಂಗಿ ವಿಂಗಡ ಮಾಡ್‌ವಕ್ ಬಂದಿಯೆ.

³⁵ಎನ್ನನೆ ಎಣ್ಣ್‌ಚೇಂಗಿ: ಮೋಂವೊಂಗು ಅಪ್ಪಂಗು, ಮೋವಕು ಅವ್ವಕು, ಮೈಮಕು ಮಾಂವಿಕು ಆಕತನೆಕೆ ಮಾಡ್‌ವಕ್ ಬಂದಿಯೆ.

³⁶ಅನ್ನನಾಚೇಂಗಿ, ಒರ್ ಮನುಷ್ಯಂಡ ವಿರೋದಿ ಅಂವೊಂಡ ಕುಟುಂಬತ್‍ಲೇ ಇಪ್ಪ.[33]

³⁷ಒಬ್ಬ ತಾಂಡ ಅಪ್ಪನ ಆಚೇಂಗಿಯು, ಅವ್ವಳ ಆಚೇಂಗಿಯು ನಾಕಿಂಜ ದುಂಬ ಪ್ರೀತಿ ಮಾಡ್‍ಚೇಂಗಿ ಅಂವೊ ನಾಡ ಶಿಷ್ಯನಾಯಿತ್‌ಪ್ಪಕ್ ಯೋಗ್ಯನಲ್ಲ. ಪಿಂಞ ತಾಂಡ ಮೋಂವೊನಾಚೇಂಗಿಯು, ಮೋವಳಾಚೇಂಗಿಯು ನಾಕಿಂಜ ದುಂಬ ಪ್ರೀತಿ ಮಾಡ್‍ಚೇಂಗಿ ಅಂವೊ ನಾಡ ಶಿಷ್ಯನಾಯಿತ್‌ಪ್ಪಕ್ ಯೋಗ್ಯನಲ್ಲ.

³⁸ದಾರ್ ತಾಂಡ ಶಿಲುಬೇನ[34] ಎಡ್‍ತಂಡ್ ನಾಡ ಬಯ್ಯ ಬಪ್ಪ್‌ಲೆಯೋ ಅಂವೊ ನಾಡ ಶಿಷ್ಯನಾಯಿತ್‌ಪ್ಪಕ್ ಯೋಗ್ಯನಲ್ಲ.

³⁹ದಾರ್ ಅಂವೊಂಡ ಜೀವತ್‍ನ ಕಾಪಾಡ್‌ವಕ್ ಕುಶಿ ಪಡ್‍ವ, ಅಂವೊ ಅಂವೊಂಡ ಜೀವತ್‍ನ ಕಳೆಂದ್‍ರ್‍ವ, ದಾರ್ ತಾಂಡ ಜೀವತ್‍ನ ನಾಕಾಯಿತ್ ಕಳೆಂದ್‍ರ್‍ವ, ಅಂವೊ ಅದ್‍ನ ಕಾಪಾಡ್‌ವ.

⁴⁰ನಿಂಗಳ ಸತ್ಕಾರ ಮಾಡ್‌ವಯಿಂಗ ನನ್ನ ಸಹ ಸತ್ಕಾರ ಮಾಡ್‍ನನೆಕೆ. ನನ್ನ ಸತ್ಕಾರ ಮಾಡ್‌ವಯಿಂಗ ನನ್ನ ಅಯಿಚಂವೊನ ಸತ್ಕಾರ ಮಾಡ್‍ನನೆಕೆ.

⁴¹ನಿಂಗ, ಒರ್ ಪ್ರವಾದಿನ, ಅಂವೊ ದೇವಡ ಪ್ರವಾದೀಂದ್ ಗೊತ್ತಾನಗುಂಡ್ ಸತ್ಕಾರ ಮಾಡ್‍ನಕ, ಒರ್ ಪ್ರವಾದಿಕ್ ಕ್‍ಟ್ಟ್‌ವ ಅದೇ ಫಲ ನಿಂಗಕು ಕ್‍ಟ್ಟ್‌ವ. ಅನ್ನನೆ, ಒರ್ ಮನುಷ್ಯ ನೀತಿವಂತಂವೋಂದ್ ಗೊತ್ತಾನಗುಂಡ್ ಅಂವೊನ ಸತ್ಕಾರ ಮಾಡ್‍ಚೇಂಗಿ, ಆ ನೀತಿವಂತ ಮನುಷ್ಯಂಗ್ ಕ್‍ಟ್ಟ್‌ವ ಅದೇ ಫಲ ನಿಂಗಕು ಕ್‍ಟ್ಟ್‌ವ.

⁴²ಎಲ್ಲಾ ಶಿಷ್ಯಂಗಕಿಂಜ ಸಾದುವಾನ ಒರ್ ಶಿಷ್ಯಂಗ್, ನಾಡ ಶಿಷ್ಯಾಂದ್ ಗೊತ್ತಾನಗುಂಡ್, ನಿಂಗ, ಒರ್ ಲೋಟ ನೀರ್ ಕೊಡ್‍ತಕ, ಕಂಡಿತವಾಯಿತ್ ಅದ್ಂಡ ಫಲ ಕ್‍ಟ್ಟತೆ ಪೋಪ್‌ಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ.