Read Kodava ಮತ್ತಾಯ 11 Bible Online

ಮತ್ತಾಯ 11 - Kodava bible

ಮತ್ತಾಯ 11

¹ಯೇಸು ಇನ್ನನೆ ತಾಂಡ ಪನ್ನೆರಂಡ್ ಶಿಷ್ಯಂಗಕ್ ಆಜ್ಞೆ ಕೊಡ್‍ತ ಪಿಂಞ, ಬೋದನೆ ಮಾಡ್‌ವಕು, ಪ್ರಚಾರ ಮಾಡ್‌ವಕು ಪಕ್ಕತ್‌ಲುಳ್ಳ ಅಯಿಂಗಡ ಪಟ್ಟಣಕ್ ಪೋಚಿ.

²ಅಕ್ಕ ಜೈಲ್‍ಲ್ ಇಂಜ ಯೋಹಾನ, ಯೇಸು ಕ್ರಿಸ್ತ ಮಾಡಿಯಂಡುಳ್ಳ ಎಲ್ಲಾ ಅದ್ಬುತ ಕಾರ್ಯತ್‍ನ ಕ್‍ೕಟಿತ್ ಅಂವೊಂಡ ಶಿಷ್ಯಂಗಳ ಯೇಸುರ ಪಕ್ಕ ಅಯಿಚಿತ್:

³ಬಪ್ಪಕುಳ್ಳಂವೊ ನೀನಾ? ಅಥವ ಬೋರೆ ಒಬ್ಬ ಬಪ್ಪಕ್ ನಂಗ ಪಾರಕಾತಂಡಿರಂಡುವಾಂದ್ ಅಂವೊಂಡ ಪಕ್ಕ ಕ್‍ೕಪಕ್ ಎಣ್ಣ್‌ಚಿ.

⁴ಅದ್ಂಗ್ ಯೇಸು ಅಯಿಂಗಕ್: ನಿಂಗ ಪೋಯಿತ್ ಎಂತ ಕಂಡಿರೋ ಎಂತ ಕ್‍ೕಟಿರೋ ಅದ್‍ನ ಯೋಹಾನಂಗ್ ಎಣ್ಣಿ.

⁵ಕುರ್‌ಡಂಗ ಕಂಡಂಡುಂಡ್, ಕುಂಟಂಗ ನಡ್ಂದಂಡುಂಡ್, ಕುಷ್ಟರೋಗಿಯಂಗ ವಾಸಿ ಆಯಂಡುಂಡ್, ಕಿವ್‍ಡಂಗ್ ಕ್‍ೕಟಂಡು, ಚತ್ತಯಿಂಗ ಎದ್ದಡುಂಡ್, ಗರೀಬಂಗಕ್ ನಲ್ಲ ಸುದ್ದಿ ಪ್ರಚಾರ ಆಯಂಡುಂಡ್.

⁶ನಾಡ ಮೇಲೆ ಅನುಮಾನ ಇಲ್ಲತಂವೊ ಆಶೀರ್ವಾದ ಪಡ್ಂದವೋಂದ್ ಅಯಿಂಗಕ್ ಎಣ್ಣ್‌ಚಿ.

⁷ಯೋಹಾನಂಡ ಶಿಷ್ಯಂಗ ಪೋನ ಪಿಂಞ, ಯೇಸು ಯೋಹಾನಂಡ ವಿಷಯತ್‍ನ ಜನಡ ಗುಂಪ್‌ಕ್ ಎಣ್ಣ್‌ನದ್ ಎಂತ ಎಣ್ಣ್‌ಚೇಂಗಿ: ನಿಂಗ ಎಂತ ಕಾಂಬಕ್ ಮಣಬೂಮಿಕ್ ಪೋಯಿತ್ಂಜಿರ? ಗಾಳಿಕ್ ಜೂಂಗುವ ಪಿಲ್ಲ್‌ನ ಕಾಂಬಕ್ ಪೋಯಿತ್ಂಜಿರ?

⁸ಇಲ್ಲತಪೋಚೇಂಗಿ, ಎಂತದ್‍ನ ನಿಂಗ ಕಾಂಬಕ್ ಪೋಯಿತ್ಂಜಿರ? ನಲ್ಲ ಚಾಯುಳ್ಳ ಬಟ್ಟೇನ ಇಟ್ಟಂಡುಳ್ಳ ಒರ್ ಮನುಷ್ಯನ ಕಾಂಬಕ್ ಪೋಯಿರ? ಚಾಯಿ ಬಟ್ಟೆ ಇಟ್ಟಯಿಂಗೆಲ್ಲ ಅರಮನೇಲ್ ವಾಸ ಮಾಡಿಯಂಡುಂಡ್.

⁹ಅಥವ ಎಂತದ್‍ನ ಕಾಂಬಕ್ ಪೋಯಿರ? ಪ್ರವಾದಿನ ನೋಟ್‍ವಕ್ ಪೋಯಿರ? ಅಕ್ಕು, ಅಂವೊ ಪ್ರವಾದಿಕಿಂಜಲೂ ಬಲ್ಯಂವೋಂದ್ ನಾನ್ ನಿಂಗಕ್ ಎಣ್ಣ್‌ವಿ.

¹⁰ಅದ್ ಎನ್ನನೆ ಎಣ್ಣ್‌ಚೇಂಗಿ: ಇದಾ, ನಾನ್ ನಾಡ ದೂತನ ನಿಂಗಕ್ಂಜ ಮಿಂಞ ಅಯಿಪಿ; ಅಂವೊ ನೀಕ್ ಮಿಂಞ ಪೋಯಿತ್, ನೀಡ ಬಟ್ಟೇನ ತಯಾರ್ ಮಾಡ್‌ವಾಂದ್,[35] ದೇವಡ ವಾಕ್ಯತ್‍ಲ್ ಒಳ್‍ದ್‍ನದ್ ಇಂವೊಂಡ ವಿಷಯವೇ.

¹¹ಇಕ್ಕಕತ್ತನೆ ಪುಟ್ಟ್‌ನಯಿಂಗಡಡೆಲ್ ದೀಕ್ಷಾಸ್ನಾನ ತಪ್ಪ ಯೋಹಾನಕಿಂಜ ಬಲ್ಯಂವೊ ದಾರೂ ಇಲ್ಲೆ, ಆಚೇಂಗಿಯು ಪರಲೋಕ ರಾಜ್ಯತ್‍ಲ್ ಚೆರಿಯಂವೊನಾಯಿತುಳ್ಳಂವೊ ಅಂವೊಗಿಂಜ ಬಲ್ಯಂವೊನಾಯಿತುಂಡ್‍ೕಂದ್ ನಾನ್ ನಿಂಗಕ್ ನೇರಾಯಿತು ಎಣ್ಣ್‌ವಿ.

¹²ದೀಕ್ಷಾಸ್ನಾನ ತಪ್ಪ ಯೋಹಾನ ಪರಲೋಕ ರಾಜ್ಯತ್‍ರ ವಿಷಯತ್‍ನ ಬೋದನೆ ಮಾಡ್‌ವಕ್ ಸುರು ಮಾಡ್‍ನ ಕಾಲತ್ಂಜ ಇಲ್ಲಿಕತ್ತನೆ, ಪರಲೋಕ ರಾಜ್ಯ ಬಲ್ಯದಾಯಂಡುಂಡ್ ಪಿಂಞ ಜನ ಅದ್‍ನ ಅಯಿಂಗಡ ಅಡಿಕ್ ಕೊಂಡ್ ಬಪ್ಪಕ್ ಪ್ರಯತ್ನಪಟ್ಟಂಡುಂಡ್; ಆಚೇಂಗಿ ಅದ್ಂಡಮೇಲೆ ಕುಶಿಯುಳ್ಳಯಿಂಗಡಗುಂಡ್ ಪರಲೋಕ ರಾಜ್ಯ ಮಿಂಞಕ್ ಪೋಯಂಡುಂಡ್.

¹³ಯೋಹಾನಂಡ ಕಾಲಕತ್ತನೆ ಎಲ್ಲಾ ಪ್ರವಾದಿಯಂಗಳು, ನ್ಯಾಯಪ್ರಮಾಣ ಪರಲೋಕ ರಾಜ್ಯತ್‍ರ ವಿಷಯತ್‍ನ ಎಣ್ಣಿಯಂಡಿಂಜತ್.

¹⁴ನಿಂಗಕ್ ಸ್ವೀಕಾರ ಮಾಡ್‌ವಕ್ ಮನಸ್ಸುಂಡೇಂಗಿ, ಬಪ್ಪಕುಳ್ಳ ಎಲೀಯ ಇಂವೊನೇ.

¹⁵ಕ್‍ೕಪಕ್ ಕೆಮಿ ಉಳ್ಳಯಿಂಗ ಕ್‍ೕಳೀಂದ್ ಎಣ್ಣ್‌ಚಿ.

¹⁶ನಾನ್ ಈ ಸಂತಾನತ್‍ರ ಜನಳ ಎಂತಾಂಗ್ ಹೋಲಿಕೆ ಮಾಡಡ್? ಅಯಿಂಗ ಗುಂಪ್ ಗುಂಪಾಯಿತ್ ಪೇಟೇಲ್ ಅಳ್‌ತಂಡ್ ಅಯಿಂಗಡ ಸ್ನೇಹಿತಂಗಳ ನೋಟಿತ್:

¹⁷ನಂಗ ನಿಂಗಕಾಯಿತ್ ಪಾಂಗೊಳ ಊದ್‍ಚಿ, ಆಚೇಂಗಿ ನಿಂಗ ಆಡಿತಿಲ್ಲೆ. ನಂಗ ಚಾವ್ ಪಾಟ್ ಪಾಡ್‌ಚಿ, ಆಚೇಂಗಿ ನಿಂಗ ಮೊರಟಿತ್‌ಲ್ಲೇಂದ್ ಎಣ್ಣಿತ್, ಕಳಿಪ ಮಕ್ಕಡನೆಕೆ ಉಂಡ್.

¹⁸ಎನ್ನನೆ ಎಣ್ಣ್‌ಚೇಂಗಿ ಯೋಹಾನ ತಿಂಗತಂವೊನಾಯಿತ್ ಕುಡಿಕತಂವೊನಾಯಿತ್ ಬಾತ್, ಅದ್ಂಗ್ ಅಯಿಂಗ, ಅಂವೊಂಗ್ ಕೂಳಿ ಪುಡ್‌ಚಿತುಂಡ್‍ೕಂದ್ ಎಣ್ಣ್‌ಚಿ.

¹⁹ಮನುಷ್ಯಕುಮಾರ ತಿಂದಂಡ್ ಕುಡಿಚಂಡಿಂಜತ್, ಅದ್ಂಗ್ ಅಯಿಂಗ: ಅಂವೊ ತೀನಿಮಾರಿಯು, ಕುಡ್‌ಕನು, ಕಂದಾಯ ಎಡ್‌ಪಯಿಂಗಡ ಪಿಂಞ ಸಮಾಜ ಪಾಪಿಯಂಗಾಂದ್ ಎಣ್ಣುವ ಜನಡ ಸ್ನೇಹಿತಾಂದ್ ಎಣ್ಣ್‌ಚಿ. ಆಚೇಂಗಿ, ದೇವಡ ಜ್ಞಾನ, ಅಂವೊನ ನಂಬುವಯಿಂಗ ಮಾಡ್‌ವ ಕ್ರಿಯೆರ ಮೂಲಕ ಸತ್ಯವಾಪಾಂದ್ ಯೇಸು ಎಣ್ಣ್‌ಚಿ.

²⁰ಯೇಸು ವಾಸ ಮಾಡಿಯಂಡಿಂಜ ಪಟ್ಟಣತ್‍ರ ಜನ ಅಂವೊ ಮಾಡ್‍ನ ದುಂಬ ಅದ್ಬುತ ಕಾರ್ಯತ್‍ನ ಕಂಡತೇಂಗಿಯು, ಅಯಿಂಗಡ ಪಾಪಕಾಯಿತ್ ಪಶ್ಚಾತಾಪ ಪಟ್ಟಿತ್ ಬಂದಿತ್‌ಲ್ಲೆ. ಆನಗುಂಡ್ ಯೇಸು ಆ ಜನಕ್ ಗದರಿಚಿಟ್ಟತ್.

²¹ಅಂವೊ ಇನ್ನನೆ ಎಣ್ಣ್‌ವಕ್ ಸುರು ಮಾಡ್‍ಚಿ: ಖೊರಾಜಿನೇ ನೀಕ್ ಅಯ್ಯೋ! ಬೆತ್ಸಾಯಿದವೇ[36] ನೀಕ್ ಅಯ್ಯೋ! ನಿಂಗಡ ಮದ್ಯತ್‍ಲ್ ಮಾಡ್‍ನ ಬಲ್ಯ ಅದ್ಬುತ ಕಾರ್ಯತ್‍ನ ತೀರ್ ಪಿಂಞ ಸೀದೋನ್ ಪಟ್ಟಣತ್‍ಲ್ ಮಾಡಿತ್ಂಜತೇಂಗಿ, ಅಕ್ಕಲೆ ಅಯಿಂಗ ಗೋಣಿಚೀಲತ್‍ರ ಬಟ್ಟೆ[37] ಇಟ್ಟಂಡ್, ಬೂದಿರ ಮೇಲೆ ಅಳ್‌ತಿತ್ ಅಯಿಂಗಡ ಪಾಪತ್ಂಜ ಪಶ್ಚಾತಾಪ ಪಟ್ಟಿತ್ ದೇವಡ ಪಕ್ಕ ತಿರುವಕಿಂಜತ್.

²²ಆಚೇಂಗಿ ನಾನ್ ನಿಂಗಕ್ ಎಣ್ಣ್‌ವಿ, ದೇವ ತೀರ್ಪ್ ತಪ್ಪ ದಿವಸತ್‍ಲ್ ನಿಂಗಕ್ ಕ್‍ಟ್ಟ್‌ವ ಶಿಕ್ಷೆಕಿಂಜ ತೀರ್ ಸೀದೋನ್ ಪಟ್ಟಣಕ್ ಕ್‍ಟ್ಟ್‌ವ ಶಿಕ್ಷೆ ಕಮ್ಮಿಯಾಯಿತ್‌ಪ್ಪ.

²³ಬಾನಕತ್ತನೆ ಪೋಪೀಂದ್ ಗೇನ ಮಾಡಿಯಂಡುಳ್ಳ ಕಪೆರ್ನೌಮ್ ಪಟ್ಟಣವೇ, ನೀನ್ ಅನ್ನನೆ ಆಪುಲೆ, ನಿಂಗ ಪಾತಾಳತ್‌ರಚ್ಚಕ್ ಅಡಿಕ್ ಪೋಪಿರ. ನೀಡ ಪಕ್ಕ ಮಾಡ್‍ನ ಬಲ್ಯ ಅದ್ಬುತ ಕಾರ್ಯತ್‍ನೆಲ್ಲ ಸೊದೋಮ್ ಪಟ್ಟಣತ್‍ಲ್ ಮಾಡಿತ್ಂಜತೇಂಗಿ, ಅದ್ ಇಕ್ಕಕತ್ತನೆ ಪಾಳಾಕತನೆಕೆ ಇಪ್ಪಕಿಂಜತ್.

²⁴ಆಚೇಂಗಿ ನಾನ್ ನಿಂಗಕ್ ಎಣ್ಣ್‌ವಿ: ದೇವ ತೀರ್ಪ್ ತಪ್ಪ ದಿವಸತ್‍ಲ್ ನಿಂಗಕ್ ಕ್‍ಟ್ಟ್‌ವ ಶಿಕ್ಷೆಕಿಂಜ ಸೊದೋಮ್ ಪಟ್ಟಣಕ್ ಕ್‍ಟ್ಟ್‌ವ ಶಿಕ್ಷೆ ಕಮ್ಮಿಯಾಯಿತ್‌ಪ್ಪ.

²⁵ಆ ಸಮಯತ್‍ಲ್ ಯೇಸು: ಪರಲೋಕಕು ಬೂಲೋಕಕು ಒಡೆಯನಾನ ನಾಡ ಅಪ್ಪನೇ, ನೀನ್, ಈ ಸತ್ಯವಾನ ವಿಷಯತ್‍ನ ಜ್ಞಾನಿಯಂಗಕು ಪಡಿಚಯಿಂಗಕು ಮರೆ ಮಾಡಿತ್, ಪಡಿಕತ ಸಾದಾರಣ ಜನಕ್ ಎಣ್ಣಿ ಕೊಡ್‌ತಿತುಳ್ಳಗುಂಡ್ ನೀಕ್ ವಂದನೆ ಮಾಡ್‌ವಿ.

²⁶ಅಕ್ಕು ದೇವಾ! ಇನ್ನನೆ ಮಾಡ್‌ವಕ್ ನೀಕ್ ಕುಶಿಯಾಚಿ.

²⁷ನಾಡ ಅಪ್ಪ ನಾಕ್ ಎಲ್ಲಾನ ಒಪ್ಪ್‌ಚಿಟ್ಟತ್; ಅಪ್ಪನ ಬುಟ್ಟಿತ್ ಬೋರೆ ದಾರ್‌ಕು ಮೋಂವೊನ ಗೊತ್ತಿಪ್ಪುಲೆ; ಇಂಞು, ಮೋಂವೊನು, ಮೋಂವೊ ದಾರ್‌ಕ್ ಅಪ್ಪನಾನ ದೇವನ ಕಾಂಬ್‍ಚಿಡ್‍ವಕ್ ಚಿತ್ತ ಉಂಡೋ, ಅಂವೊನಲ್ಲತೆ ಬೋರೆ ದಾರ್‌ಕು ಅಪ್ಪನ ಗೊತ್ತಾಪುಲೆ.

²⁸ಅರಾಮಿಲ್ಲತೆ ಕಷ್ಟಪಟ್ಟಂಡ್ ಬಾರತ್‍ನ ಪೊರ್‍ತಂಡ್ ಉಳ್ಳಯಿಂಗಳೇ, ನಾಡ ಪಕ್ಕ ಬಾರಿ, ನಾನ್ ನಿಂಗಕ್ ಆರಾಮ್ ತಪ್ಪಿ.

²⁹ನಾನ್ ಶಾಂತವು, ತಾಳ್ಮೆ ಮನಸ್ಸು ಉಳ್ಳಂವೊ. ನಾಡ ನೊಗತ್‌ನ ನಿಂಗ ಎಡ್‍ತಂಡ್, ನಾನ್ ಎಣ್ಣುವಾನ ಪಡಿಚೋಳಿ; ಅಕ್ಕ ನಿಂಗಡ ಆತ್ಮಕ್ ಆರಾಮ್ ಕ್‍ಟ್ಟುವ.

³⁰ನಾಡ ನೊಗ ಬಾರವಲ್ಲತದ್, ನಾಡ ಬಾರ ತೂವೆಯಾಯಿತುಂಡ್‍ೕಂದ್ ಎಣ್ಣ್‌ವಿ.