Read Kodava ಮತ್ತಾಯ 14 Bible Online

ಮತ್ತಾಯ 14 - Kodava bible

ಮತ್ತಾಯ 14

¹ಆ ಕಾಲತ್‍ಲ್, ಗಲಿಲಾಯತ್‍ಲ್ ಹೆರೋದ ಅಂತಿಪ ರಾಜನಾಯಿತ್ಂಜತ್. ಅಂವೊ ಯೇಸು ಮಾಡಿಯಂಡಿಂಜ ಅದ್ಬುತ ಕಾರ್ಯತ್‍ನೆಲ್ಲ ಕ್‍ೕಟಿತ್,

²ತಾಂಡ ಕಚೇರಿಕಾರಂಗಳ ನೋಟಿತ್: ಇಂವೊ ನೇರಾಯಿತು ಚತ್ತ್‌ಪೋನ ದೀಕ್ಷಾಸ್ನಾನ ತಪ್ಪ ಯೋಹಾನ. ಇಂವೊ ಚಾವ್‍ಯಿಂಜ ಬದ್‌ಕಿತ್ ಬಂದಿತುಂಡ್. ಅದ್ಂಗೇ ಇಚ್ಚಕ್ ಬಲ್ಯ ಅದ್ಬುತ ಕಾರ್ಯತ್‍ನೆಲ್ಲಾ ಇಂವೊಂಗ್ ಮಾಡ್‌ವಕ್ ಕಯ್ಯೂಂದ್ ಎಣ್ಣ್‌ಚಿ.

³ಹೆರೋದ, ಅಂವೊಂಡ ಅಣ್ಣ ಫಿಲಿಪ್ಪಂಡ ಪೊಣ್ಣ್ ಹೆರೋದ್ಯಳಗುಂಡ್ ಯೋಹಾನನ ಬಂದಿಚಿಟ್ಟಿತ್ ಜೈಲ್‌ಕ್ ಇಟ್ಟಿತ್ಂಜತ್.

⁴ಎನ್ನಂಗೆಣ್ಣ್‌ಚೇಂಗಿ, ಯೋಹಾನ ಹೆರೋದಂಗ್: ನೀಡ ಅಣ್ಣ ಫಿಲಿಪ್ಪಂಡ ಪೊಣ್ಣ್ ಹೆರೋದ್ಯಳ ನೀಡ ಕೂಡೆ ಬೆಚ್ಚಂಡಿಪ್ಪದ್ ಮಂಗಲ ಮಾಡ್‍ನದ್ ನ್ಯಾಯವಲ್ಲಾಂದ್ ಎಣ್ಣಿತ್ಂಜತ್.

⁵ಹೆರೋದಂಗ್ ಅಂವೊನ ಕೊಲ್ಲುವಕ್ ಮನಸ್ಸ್ ಇಂಜತೇಂಗಿಯು, ಜನ ಯೋಹಾನನ ಪ್ರವಾದೀಂದ್ ಗೇನ ಮಾಡ್‍ನಗುಂಡ್, ಅಂವೊಂಗ್ ಜನಡಗುಂಡ್ ಪೋಡಿ ಇಂಜತ್.

⁶ಅನ್ನನೆ ಇಪ್ಪಕ, ಹೆರೋದ ರಾಜ ಪುಟ್ಟ್‌ನ ದಿವಸ ಬಾತ್. ಹೆರೋದ್ಯಡ ಮೋವ, ಅರಮನೇಲ್ ಎಲ್ಲಾಡ ಮಿಂಞತ್‍ಲ್ ಚಾಯಿತೆ ಆಡ್‌ಚಿ. ಅವಡ ಆಟತ್‌ನ ನೋಟಿತ್ ಹೆರೋದ ರಾಜಂಗ್ ದುಂಬ ಕುಶಿ ಆಚಿ.

⁷ಆನಗುಂಡ್ ರಾಜ ಅವಡ ಪಕ್ಕ: ನೀನ್ ಎಂತ ಕ್‍ೕಟತೇಂಗಿಯು ಅದ್‍ನ ನಾನ್ ನೀಕ್ ತಪ್ಪೀಂದ್ ಆಣೆ ಮಾಡ್‍ಚಿ.

⁸ಆ ಮೂಡಿ ಪೋಯಿತ್ ಅವಡ ಅವ್ವನ ಕ್‍ೕಪಕ, ಅವಡ ಅವ್ವ ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಮಂಡೆನ ಕೆತ್ತುವಂಜಿ ಅದ್‍ನ ಒರ್ ತಳಿಯತ್‍ಲ್ ಬೆಚ್ಚಿತ್ ತಪ್ಪಕ್ ಕ್‍ೕಳ್‍ೕಂದ್ ಎಣ್ಣ್‌ಚಿ.

⁹ರಾಜಂಗ್ ಇದ್‍ನ ಕ್‍ೕಪಕ ದುಂಬ ಬೇಜಾರ್ ಆಚಿ. ಆಚೇಂಗಿಯು ಎಲ್ಲಾಡ ಮಿಂಞತ್ ಆಣೆ ಮಾಡ್‍ನಗುಂಡ್, ಅನ್ನನೆ ಮಾಡ್‌ವಕ್ ಆಜ್ಞೆ ಮಾಡ್‍ಚಿ.

¹⁰ಅಕ್ಕ, ಆಳ್‍ವಳ ಅಯಿಚಿತ್ ಯೋಹಾನಂಡ ಮಂಡೆನ ಕೆತ್ತ್‌ಚಿ.

¹¹ಯೋಹಾನಂಡ ಮಂಡೆನ ಒರ್ ತಳಿಯತ್‍ಲ್ ಎಡ್‌ತ ಬಂತ್ ಆ ಮೂಡಿಕ್ ಕೊಡ್‍ತತ್. ಆ ಮೂಡಿ, ತಾಂಡ ಅವ್ವಂಡ ಪಕ್ಕ ಎಡ್‍ತಂಡ್ ಪೋಯಿತ್ ಕೊಡ್‍ತತ್.

¹²ಬಯ್ಯ, ಯೋಹಾನಂಡ ಶಿಷ್ಯಂಗ ಬಂದಿತ್ ಅಂವೊಂಡ ಚಾವ್ ತಡೀನ ಎಡ್‌ತ ಪೋಯಿತ್ ಪೂತತ್. ಪಿಂಞ ಅಯಿಂಗ ಯೇಸುಕ್ ಈ ಸುದ್ದಿನ ಎಣ್ಣ್‌ವಕ್ ಪೋಚಿ.

¹³ಯೇಸು ಈ ವಿಷಯ ಕ್‍ೕಟದು ಆ ಜಾಗ ಬುಟ್ಟಿತ್, ದೋಣಿಲ್ ಪತ್ತ್‌ವಂಜಿ ದಾರೂ ಇಲ್ಲತ ಜಾಗಕ್ ಒಬ್ಬನೇ ಪೋಚಿ. ಯೇಸು ಎಲ್ಲಿಕ್ ಪೋಚೀಂದ್ ಜನಕ್ ಗೊತ್ತಾನ ಪಿಂಞ ಅಯಿಂಗಡ ಪಟ್ಟಣತ್ಂಜ ನಡ್ಂದಂಡೇ ಯೇಸುರ ಪಕ್ಕ ಪೋಚಿ.

¹⁴ಯೇಸು ದೋಣಿಯಿಂಜ ಇಳಿವಕ ದುಂಬ ಜನಡ ಗುಂಪ್‍ನ ಕಂಡಿತ್, ಅಯಿಂಗಡ ಮೇಲೆ ಕನಿಕರ ಪಟ್ಟಿತ್, ಅಯಿಂಗಡಡೆಲ್ ಕಾಯಿಲೆ ಉಳ್ಳಯಿಂಗಳ ವಾಸಿ ಮಾಡ್‍ಚಿ.

¹⁵ಬಯಿಟಾಪಕ ಯೇಸುರ ಶಿಷ್ಯಂಗ ಯೇಸುರ ಪಕ್ಕ ಬಪ್ಪಂಜಿ: ಇದ್ ದಾರೂ ವಾಸ ಮಾಡತ ಜಾಗ, ಬಯಿಟಾಯಂಡುಳ್ಳಗುಂಡ್, ಜನ ಪಕ್ಕತ್‍ಲ್ ಉಳ್ಳ ಊರ್‌ಕ್ ಪೋಯಿತ್ ಅಯಿಂಗಕ್ ಬೋಂಡಿಯಾನ ಆಹಾರತ್‍ನ ಎಡ್‍ಪಕ್ ಅಯಿಂಗಳ ಅಯಿಚಿರ್‍ೕಂದ್ ಎಣ್ಣ್‌ಚಿ.

¹⁶ಆಚೇಂಗಿ ಯೇಸು ಅಯಿಂಗಕ್: ಅಯಿಂಗ ಇಲ್ಲಿಂಜ ಪೋಪದ್ ಬೋಂಡ, ನಿಂಗಳೇ ಅಯಿಂಗಕ್ ಉಂಬಕ್ ಕೊಡೀಂದ್ ಎಣ್ಣ್‌ಚಿ.

¹⁷ಅಕ್ಕ ಅಯಿಂಗ: ನಂಗಡ ಪಕ್ಕ ಅಂಜ್ ಒಟ್ಟಿ ದಂಡ್ ಮೀನ್ ಮಾತ್ರ ಉಂಡ್‍ೕಂದ್ ಎಣ್ಣ್‌ಚಿ.

¹⁸ಅಂದಕ, ಅದ್‍ನ ನಾಡ ಪಕ್ಕ ಎಡ್‌ತ ಬಾರೀಂದ್ ಯೇಸು ಎಣ್ಣ್‌ಚಿ.

¹⁹ಪಿಂಞ ಯೇಸು ಅಯಿಂಗಳೆಲ್ಲ ಪಿಲ್ಲ್‌ರ ಮೇಲೆ ಅಳ್‌ಪಕ್ ಹುಕುಮ್ ಕೊಡ್‍ತತ್. ಯೇಸು, ಅಂಜ್ ಒಟ್ಟಿ ಪಿಂಞ ದಂಡ್ ಮೀನ್‌ನ ಎಡ್‍ತಿತ್, ಕೊಡಿಕ್ ಪರಲೋಕತ್‌ನ ನೋಟುವಂಜಿ ದೇವಕ್ ವಂದನೆ ಮಾಡಿತ್, ಒಟ್ಟಿನ ಮುರಿಪಂಜಿ ಅಂವೊಂಡ ಶಿಷ್ಯಂಗಕ್ ಕೊಡ್‍ತತ್; ಶಿಷ್ಯಂಗ, ಎಲ್ಲಾ ಜನಕ್ ಕೊಡ್‍ತತ್.

²⁰ಜನಯೆಲ್ಲ ಕೆಲ ದುಂಬ ತಿಂದಿತ್ ತೃಪ್ತಿಯಾನ ಪಿಂಞ, ಶಿಷ್ಯಂಗ ಪನ್ನೆರಂಡ್ ಕುಕ್ಕೆರಚ್ಚಕ್ ಒಟ್ಟಿಯು ಮೀನು ಬಾಕಿ ಆನದ್‍ನ ಒಟ್ಟ್ ಕೂಟ್‌ಚಿ.

²¹ಒಟ್ಟಿ ಪಿಂಞ ಮೀನ್‌ನ ತಿಂದ ಪೊಣ್ಣಾಳ್ ಪಿಂಞ ಮಕ್ಕಳ ಬುಟ್ಟಿತ್, ಆಣಾಳ್ ಮಾತ್ರ ಸುಮಾರ್ ಅಂಜ್ ಆಯಿರ ಜನ ಇಂಜತ್.

²²ಯೇಸು ಜನಳ ಅಯಿಚಂಡಿಪ್ಪಕ, ಅಂವೊಂಡ ಶಿಷ್ಯಂಗಕ್, ದೋಣಿಲ್ ಪತ್ತಿತ್, ಕೆರೆರ ಆಬರಿಕ್ ಬೆರಿಯ ತಾಂಡ ಮಿಂಞಲೇ ಪೋಪಕ್ ಒತ್ತಾಯ ಮಾಡ್‍ಚಿ.

²³ಎಲ್ಲಾ ಜನಳ ಅಯಿಚಿರುವಂಜಿ, ಅಂವೊ ಒಬ್ಬನೇ ಪ್ರಾರ್ಥನೆ ಮಾಡ್‌ವಕ್ ಕುಂದ್‌ರ ಕೊಡಿಕ್ ಪೋಚಿ. ಬಯಿಟಾಪಕ ಯೇಸು ಒಬ್ಬನೇ ಅಲ್ಲಿ ಇಂಜತ್.

²⁴ಅಕ್ಕ, ಶಿಷ್ಯಂಗ ಇಂಜ ದೋಣಿ ಕೆರೆರ ಮದ್ಯತ್‍ಲ್ ಪೋಯಿತ್ಂಜತ್. ಗಾಳಿ ಜೋರಾಯಿತ್ ಅಯಿಂಗಕ್ ಎದ್‍ಕೆ ಬೀಜಿಯಂಡಿಂಜಗುಂಡ್, ಅಲೆ ದೋಣಿನ ಬಡಿಚಂಡಿಂಜತ್.

²⁵ಪೊಲಾಕ ನೇರತ್ ಸುಮಾರ್‌ ಮೂಂದ್ ನಾಲ್ ಗಂಟೆಕ್ ಯೇಸು ನೀರ್‌ರ ಮೇಲೆ ನಡ್‌ದಂಡ್ ಶಿಷ್ಯಂಗಡ ಪಕ್ಕ ಬಾತ್.

²⁶ಅಂವೊ ನೀರ್‌ಲ್ ನಡ್‍ಪದ್‌ನ ಕಂಡ ಒಡನೆ ಅಯಿಂಗಕ್ ಪೋಡಿ ಆಯಿತ್, ಅದ್ ಬೂತಾಂದ್ ಪೋಡಿಲ್ ಕೂತ್ ಕೊಡ್‍ಪಕ್ ಸುರು ಮಾಡ್‍ಚಿ.

²⁷ಅಕ್ಕಣೆ ಯೇಸು ಅಯಿಂಗಡ ಕೂಡೆ ತಕ್ಕ್ ಪರಿಂದಿತ್: ನಿಂಗ ದೈರ್ಯ ಎಡ್‌ತೊಳಿ, ಇದ್ ನಾನೇ, ಪೋಡಿ ಬೋಂಡಾಂದ್ ಎಣ್ಣ್‌ಚಿ.

²⁸ಅಕ್ಕ ಪೇತ್ರ: ಒಡೆಯನೇ ಇದ್ ನೇರಾಯಿತು ನೀನಾಚೇಂಗಿ, ನಾನ್ ಈ ನೀರ್‌ರ ಮೇಲೆ ನಡ್‌ದಂಡ್ ನೀಡ ಪಕ್ಕ ಬಪ್ಪಕ್ ಹುಕುಮ್ ಕೊಡ್‍ೕಂದ್ ಎಣ್ಣ್‌ಚಿ.

²⁹ಯೇಸು ಬಾಂದ್ ಎಣ್ಣ್‌ಚಿ. ಅಕ್ಕ, ಪೇತ್ರ ಯೇಸುರ ಪಕ್ಕ ಪೋಪಕ್ ದೋಣಿಯಿಂಜ ಇಳಿಂಜಿತ್, ನೀರ್‌ರ ಮೇಲೆ ನಡ್ಂದತ್.

³⁰ಆಚೇಂಗಿ, ಜೋರ್ ಬಿರ್‌ಗಾಳಿ ಜೀಜ್‌ವಕ್ ಸುರು ಆಪಕ ಅಂವೊ ನೀರ್‌ಲ್ ಮುಳ್‌ಗ್‌ವನೆಕೆ ಆಚಿ. ಒಡೆಯನೇ, ನನ್ನ ಕಾಪಾಡ್‍ೕಂದ್ ಕೂತ್ ಕೊಡ್‍ತತ್.

³¹ಯೇಸು ಒಡನೆ ಕೈಯಿನ ನೀಟುವಂಜಿ ಅಂವೊನ ಪುಡ್‌ಚಿತ್: ಓ ಅಲ್ಪ ನಂಬಿಕೆ ಉಳ್ಳಂವೊನೇ, ಎನ್ನಂಗ್ ನಾಡ ಮೇಲೆ ಅನುಮಾನ ಪಟ್ಟಿಯಾಂದ್ ಕ್‍ೕಟತ್.

³²ಅಯಿಂಗ ದಂಡಾಳು ದೋಣಿಕ್ ಪತ್ತ್‌ವಕ್ಕಲೆ, ಅಲ್ಲಿ ಬೀಜಿಯಂಡಿಂಜ ಗಾಳಿ ನಿಂದತ್.

³³ಅಕ್ಕ, ದೋಣಿಲ್ ಇಂಜಯಿಂಗ ಬಂತ್: ನೀನ್ ನೇರಾಯಿತು ದೇವಡ ಮೋಂವೋಂದ್ ಎಣ್ಣಿತ್, ಯೇಸುನ ಆರಾದನೆ ಮಾಡ್‍ಚಿ.

³⁴ಪಿಂಞ ಅಯಿಂಗ ಕೆರೆನ ದಾಟಿತ್ ಗೆನೆಜರೇತ್ ಪ್ರಾಂತ್ಯಕ್ ಬಾತ್.

³⁵ಅಲ್ಲಿಯತ್‍ರ ಜನ ಯೇಸುನ ಗೊತ್ತ್ ಮಾಡಿತ್, ಸುತ್ತ್‌ಲ್ ಉಳ್ಳ ಜನಕ್ ಸುದ್ದಿ ಅಯಿಚಿತ್, ಯೇಸುರ ಪಕ್ಕ ರೋಗಿಯಳ ಕಾಕಿಯಂಡ್ ಬಾತ್.

³⁶ಅಯಿಂಗ ಯೇಸುರ ಬಟ್ಟೇರ ತುದಿನಾಚೇಂಗಿಯು ಮುಟ್ಟ್‌ವಕ್ ಅನುಮತಿ ಕೊಡ್‍ಪಕ್ ಬೋಡಿಯಂಡತ್. ದಾರೆಲ್ಲಾ ಮುಟ್ಟ್‌ಚೋ, ಅಯಿಂಗಡ ಕಾಯಿಲೆ ವಾಸಿ ಆಚಿ.