Read Kodava ಮತ್ತಾಯ 15 Bible Online

ಮತ್ತಾಯ 15 - Kodava bible

ಮತ್ತಾಯ 15

¹ಅಕ್ಕ ಯೆರೂಸಲೇಮ್ಂಜ ಚೆನ್ನ ಫರಿಸಾಯಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಯೇಸುರ ಪಕ್ಕ ಬಂದಿತ್:

²ಎನ್ನಂಗ್ ನೀಡ ಶಿಷ್ಯಂಗ ಪೂರ್ವ ಕಾಲತ್‍ರ ಪೆರಿಯಯಿಂಗ ಎಣ್ಣ್‌ನ ಪದ್ದತಿನ ಮೀರಿ ನಡ್‍ಪ? ಪದ್ದತಿರ ಪ್ರಕಾರ ಕೈ ಕತ್ತತೆ ಉಂಬಲ್ಲಾಂದ್ ಕ್‍ೕಟತ್.

³ಅದ್ಂಗ್ ಯೇಸು: ಅನ್ನನಾಚೇಂಗಿ, ನಿಂಗ ನಿಂಗಡ ಪದ್ದತಿರ ಪ್ರಕಾರ ನಡ್‍ಪಕಾಯಿತ್, ದೇವಡ ವಾಕ್ಯತ್‍ನ ಬುಟ್ಟ್‌ರ್‍ವಿರಲ್ಲ? ಅನ್ನನೆ ಎನ್ನಂಗ್ ಮಾಡ್‌ವಿರ?

⁴ನಿಂಗ ನಿಂಗಡ ಅಪ್ಪವ್ವಂಗಕ್ ಮರ್ಯಾದೆ ಕೊಡಿ, ದಾರ್ ಅಪ್ಪವ್ವನ ದೂಷಣೆ ಮಾಡ್‌ವ ಅಂವೊನ ಕೊಲ್ಲಂಡೂಂದ್ ದೇವ ನಿಂಗಕ್ ಪಡಿಪ್‍ಚಿಟ್ಟಿತುಂಡಲ್ಲ![44]

⁵ಆಚೇಂಗಿ, ನಿಂಗ ಜನಕ್: ನಾಕ್ ಇಕ್ಕ ಸಹಾಯ ಮಾಡ್‌ವಕ್ ಕಯ್ಯುಲೆ, ನಾನ್ ನಿಂಗಕ್ ತಪ್ಪಕುಳ್ಳಾನ, ದೇವಕ್ ಕೊಡ್‍ಪಕ್ ಪರ್‍ಕೆ ಮಾಡಿಯೇಂದ್ ಅಪ್ಪವ್ವಂಗಕ್ ಎಣ್ಣ್‌ವಕ್ ಬೋದನೆ ಮಾಡಿಯಂಡುಳ್ಳಿರ.

⁶ಇನ್ನನೆ ಮಾಡ್‍ಚೇಂಗಿ ನಿಂಗ ನಿಂಗಡ ಜವಾಬ್ದಾರಿ ತ್‍ೕಂದತ್‍ೕಂದ್ ಎಣ್ಣುವಿರ, ಇನ್ನನೆ ನಿಂಗ ಮಾಡ್‍ಚೇಂಗಿ, ನಿಂಗ ನಿಂಗಡ ಪದ್ದತಿಕಾಯಿತ್ ದೇವಡ ವಾಕ್ಯತ್‍ನ ಬುಟ್ಟ್‌ರ್‌ವಿರ.

⁷ಕಪಟಿಯಳೇ, ನಿಂಗಡ ವಿಷಯತ್ ಯೆಶಾಯ ಪ್ರವಾದಿ:

⁸ಈ ಜನ ಬರಿ ತಕ್ಕ್‌ಲ್ ನನ್ನ ತುದಿಪ. ಆಚೇಂಗಿ, ಅಯಿಂಗಡ ಹೃದಯ ನೇರಾಯಿತು ನನ್ನಿಂಜ ದೂರ ಉಂಡ್.

⁹ಅಯಿಂಗ ನನ್ನ ಆರಾದನೆ ಮಾಡ್‌ವ ಆಚೇಂಗಿ ಪ್ರಯೋಜನ ಇಲ್ಲೆ. ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ಜನ ಎಣ್ಣ್‌ನ ಕಾನೂನ್‌ನ, ನ್ಯಾಯಪ್ರಮಾಣವಾಯಿತ್ ಉಪದೇಶ ಮಾಡಿಯಂಡುಂಡ್‍ೕಂದ್, ಯೇಸು ಎಣ್ಣ್‌ಚಿ.[45]

¹⁰ಪಿಂಞ ಯೇಸು, ಜನಡ ಗುಂಪ್‍ನ ಕಾಕುವಂಜಿ, ಅಯಿಂಗಳ ನೋಟಿತ್: ನಿಂಗ ಇದ್‍ನ ಚಾಯಿ ಕ್‍ೕಳಿ.

¹¹ಒಬ್ಬಂಡ ಬಾಯಿರ ಒಳ್‍ಕ್ ಪೋಪದ್ ಅಂವೊನ ಅಶುದ್ದ ಮಾಡುಲೆ, ಬಾಯಿಂಜ ಪೊರಮೆ ಬಪ್ಪದೇ ಅಂವೊನ ಅಶುದ್ದ ಮಾಡ್‌ವಾಂದ್ ಎಣ್ಣ್‌ಚಿ.

¹²ಅಕ್ಕ ಅಂವೊಂಡ ಶಿಷ್ಯಂಗ ಅಂವೊಂಡ ಪಕ್ಕ ಬಂತ್, ನಿಂಗ ಇನ್ನನೆ ಎಣ್ಣ್‌ನಗುಂಡ್ ಫರಿಸಾಯಂಗಕ್ ದುಂಬ ಬೇಜಾರ್ ಆಚೀಂದ್ ನಿಂಗಕ್ ಗೊತ್ತುಂಡಾಂದ್ ಕ್‍ೕಟತ್.

¹³ಅದ್ಂಗ್ ಯೇಸು: ನಾಡ ಪರಲೋಕತ್ ಅಪ್ಪ ನೆಡತೆ ಗಿಡತ್‌ನೆಲ್ಲ ಬೇರೋಡೆ ಬಲ್‍ಚಿತ್ ಚಾಡಿರ್‍ವ

¹⁴ಅಯಿಂಗ ಎಣ್ಣ್‌ವಾಂಗ್ ಕೆಮಿ ಕೊಡ್‌ಕತಿ. ಅಯಿಂಗ ಕುರ್‌ಡಂಗಕ್ ಬಟ್ಟೆ ಕಾಟುವ ಕುರ್‌ಡಂಗಳಾಯಿತುಂಡ್. ಒರ್ ಕುರ್‌ಡ ಇಂಞೊರ್ ಕುರ್‌ಡಂಗ್ ಬಟ್ಟೆ ಕಾಟ್‍ಚೇಂಗಿ, ದಂಡಾಳು ಕುಂಡ್‌ಕ್ ಬೂವಲ್ಲಾಂದ್ ಎಣ್ಣ್‌ಚಿ.

¹⁵ಅಕ್ಕ ಪೇತ್ರ: ನಂಗ ಉಂಬದ್‍ಲ್ ಅಶುದ್ದ ಆಪುಲೇಂದ್ ಎಣ್ಣುವ ಕಥೇರ ರೂಪತ್‍ನ ಚಾಯಿತೆ ಬುಡ್‌ತಿತ್ ಎಣ್ಣೀಂದ್ ಕ್‍ೕಟತ್.

¹⁶ನಿಂಗಕ್ ಇಂಞು ಅರ್ಥ ಆಯಿತಿಲ್ಲೆಯಾ?

¹⁷ಬಾಯಿಕ್ ಪೋಪದೆಲ್ಲ ಕೆಲಕ್ ಪೋಯಿತ್, ಕೆಲತ್ಂಜ ಪೊರಮೆ ಪೋಪಾಂದ್ ನಿಂಗಕ್ ಗೊತ್ತ್‌ಲ್ಲೆಯಾ?

¹⁸ಆಚೇಂಗಿ ಬಾಯಿಂಜ ಬಪ್ಪದ್, ಹೃದಯತ್‍ಲ್ ಎಂತ ಉಂಡೋ ಅದೇ ಪೊರಮೆ ಬಪ್ಪ; ಅದೇ ಮನುಷ್ಯನ ಅಶುದ್ದ ಮಾಡ್‌ವ.

¹⁹ಎನ್ನನೆ ಎಣ್ಣ್‌ಚೇಂಗಿ, ಹೃದಯತ್ಂಜಲೇ ಕೆಟ್ಟ ಗೇನ, ಕೊಲೆ, ವ್ಯಬಿಚಾರ, ಲೈಂಗಿಕ ಪಾಪ, ಕಕ್ಕಂಡೂ, ಪೊಟ್ಟ್ ಪರಿಯಂಡು, ಪೊಟ್ಟ್ ಸಾಕ್ಷಿ ಪರಿಯಂಡು, ಬೋರೆಯಿಂಗಳ ನಾಶ ಮಾಡ್‌ವಕ್ ಕೆಟ್ಟ ತಕ್ಕ್ ಪರಿಯಂಡೂಂದ್ ಉಳ್ಳ ಗೇನ ಎಲ್ಲಾ ಬಪ್ಪ.

²⁰ಇಂತ ವಿಷಯವೇ ಒರ್ ಮನುಷ್ಯನ ಅಶುದ್ದ ಮಾಡ್‌ವ. ಕೈ ಕತ್ತತೆ ಉಂಬದ್ ಮನುಷ್ಯನ ಪಾಳ್ ಮಾಡುಲೇಂದ್ ಯೇಸು ಎಣ್ಣಿ ಕೊಡ್‍ತತ್.

²¹ಪಿಂಞ ಯೇಸು ಆ ಜಾಗತ್‍ನ ಬುಟ್ಟಿತ್ ಗಲಿಲಾಯತ್ಂಜ ತೀರ್ ಪಿಂಞ ಸೀದೋನ್ ಎಣ್ಣುವ ಪಟ್ಟಣತ್‍ರ ಪಕ್ಕತ್‍ರ ಜಾಗಕ್ ಪೋಚಿ.

²²ಅಕ್ಕ ಅಲ್ಲಿ ಒರ್ ಕಾನಾನ್ಯ ದೇಶತ್‍ರ ಪೊಣ್ಣಾಳ್ ಯೇಸುರ ಪಕ್ಕ ಬಂದಿತ್: ಒಡೆಯನೇ, ದಾವೀದಂಡ ಮೋಂವೊನೇ, ನಾಡ ಮೇಲೆ ಕನಿಕರ ಕಾಟ್; ನಾಡ ಮೋವಕ್ ಕೂಳಿ ಪುಡ್‌ಚಿತ್ ಬಲ್ಯ ಕಷ್ಟತ್‍ಲ್ ಉಂಡ್‍ೕಂದ್ ಎಣ್ಣಿತ್ ಕಾಕ್‍ಚಿ.

²³ಅದ್ಂಗ್ ಯೇಸು, ಅವಕ್ ಒರ್ ತಕ್ಕ್ ಸಹ ಪರ್ಂದಿತ್ ಜವಾಬ್ ಕೊಡ್‍ತಿತ್‌ಲ್ಲೆ. ಅಕ್ಕ ಯೇಸುರ ಶಿಷ್ಯಂಗ ಬಂತ್: ಅವಳ ಇಲ್ಲಿಂಜ ಅಯಿಚಿರ್, ಎನ್ನಂಗೆಣ್ಣ್‌ಚೇಂಗಿ ಅವ ನಂಗಡ ಬಯ್ಯ ಬಂದಂಡ್ ಉಂಡ್‍ೕಂದ್ ಬೋಡ್‍ಚಿ.

²⁴ಅದ್ಂಗ್ ಯೇಸು: ತಪ್ಪಿ ಪೋಯಿತುಳ್ಳ ಕೊರಿಯಡನೆಕೆ ಉಳ್ಳ ಇಸ್ರಾಯೇಲ್ ಜನಕಾಯಿತ್ ದೇವ ನನ್ನ ಅಯಿಚತ್‍ೕಂದ್ ಎಣ್ಣ್‌ಚಿ.

²⁵ಆ ಪೊಣ್ಣಾಳ್ ಯೇಸುರ ಕಾಲ್‌ಕ್ ಅಡ್ಡ ಬೂವಂಜಿ: ಒಡೆಯನೇ, ನಾಕ್ ಸಹಾಯ ಮಾಡ್‍ೕಂದ್ ಬೋಡಿಯಂಡತ್.

²⁶ಅಕ್ಕ ಯೇಸು: ಚೆರಿಯ ಮಕ್ಕಡ ಆಹಾರತ್‍ನ ಎಡ್‍ತಿತ್ ನಾಯಿಕ್ ಕನಿಪದ್ ಸರಿಯಲ್ಲಾಂದ್ ಎಣ್ಣ್‌ಚಿ

²⁷ಅದ್ಂಗ್ ಅವ: ಅಕ್ಕು ಒಡೆಯನೇ, ಅದ್ ನೇರ್. ಆಚೇಂಗಿಯು, ಒರ್ ಮನೆರ ಎಜಮಾನ ತಿಂಬಕ, ಅಡಿಕ್ ಬೂವ ಒಟ್ಟಿ ತುಂಡ್‍ನ ನಾಯಿ ತಿಂಬಲ್ಲಾಂದ್ ಎಣ್ಣ್‌ಚಿ.

²⁸ಅವಕ್‌ ಯೇಸು: ನೀಡ ನಂಬಿಕೆ ದುಂಬ ಬಲ್ಯದ್: ನೀಕ್ ಎಂತ ಕುಶಿ ಉಂಡೋ ಅದ್ ಆಡ್‍ೕಂದ್ ಯೇಸು ಆ ಪೊಣ್ಣಾಳ್‌ಕ್ ಎಣ್ಣ್‌ಚಿ. ಅದೇ ಕ್ಷಣತ್‍ಲ್ ಅವಡ ಮೋವಕ್ ವಾಸಿ ಆಚಿ.

²⁹ಯೇಸು ಆ ಜಾಗತ್‍ನ ಬುಟ್ಟಿತ್ ಗಲಿಲಾಯ ಕಡಲ್‍ರ ಬರಿಕ್ ಪೋಚಿ. ಅಲ್ಲಿ ಒರ್ ಕುಂದ್‌ರ ಕೊಡಿಕ್ ಪೋಯಿತ್ ಅಳ್‌ತತ್.

³⁰ಬಲ್ಯ ಜನಡ ಗುಂಪ್ ಅಂವೊಂಡ ಪಕ್ಕ ಕುಂಟಂಗಳ, ಕುರ್‌ಡಂಗಳ, ಕೈಕಾಲ್ ಬರತಯಿಂಗಳ, ಬಾಯಿ ಬರತಯಿಂಗಳ, ಬೋರೆ ಎಲ್ಲಾ ತರ ಕಾಯಿಲೆ ಉಳ್ಳಯಿಂಗಳ ಕಾಕಿಯಂಡ್ ಬಂದಿತ್ ಯೇಸುರ ಕಾಲ್‍ರ ಬರಿಲ್ ಅಳ್‍ಪ್‍ಚಿಟ್ಟತ್; ಅಯಿಂಗಳೆಲ್ಲ ಯೇಸು ವಾಸಿ ಮಾಡ್‍ಚಿ.

³¹ಮೂಡಂಗ ತಕ್ಕ್ ಪರಿವಾನ, ಕೈಕಾಲ್ ಬಕ್ಕತಯಿಂಗ ವಾಸಿ ಆನಾನ, ಕುಂಟಂಗ ನಡ್‌ಪಾನ, ಕುರ್‌ಡಂಗ ಕಣ್ಣ್ ಕಾಂಬಾನೆಲ್ಲ ನೋಟ್‌ನ ಜನ ಆಶ್ಚರ್ಯಪಟ್ಟಿತ್, ಇಸ್ರಾಯೇಲಂಡ ದೇವನ ತುದಿಚತ್.

³²ಪಿಂಞ ಯೇಸು, ಅಂವೊಂಡ ಶಿಷ್ಯಂಗಳ ಕಾಕುವಂಜಿ: ನಾಕ್ ಈ ಜನಳ ಕಾಂಬಕ ದುಂಬ ಬೇಜಾರಾಯಂಡುಂಡ್. ಈಂಗ ನಾಡ ಪಕ್ಕ ಮೂಂದ್ ದಿವಸತ್ಂಜ ಉಂಡ್, ಅಯಿಂಗ ಒಂದು ತಂದಿತ್‍ಲ್ಲೆ; ಒಂದು ಕೊಡ್‍ಕತೆ ಬರಿ ಕೆಲತ್‌ಲ್ ಅಯಿಂಗಳ ಅಯಿಪಕ್ ನಾಕ್ ಕುಶಿ ಇಲ್ಲೆ. ಅಯಿಂಗ ಮನೆಕ್ ಪೋಪಕ ಬಟ್ಟೇಲ್ ಸೊಯ ತಪ್ಪಿತ್ ಬುದ್ದ್ ಪೋಪಲ್ಲಾಂದ್ ಎಣ್ಣ್‌ಚಿ.

³³ಅದ್ಂಗ್ ಶಿಷ್ಯಂಗ: ಇಚ್ಚಕ್ ಬಲ್ಯ ಜನಡ ಗುಂಪ್ ತೃಪ್ತಿ ಆಪನೆಕೆ ಈ ಮಣಬೂಮಿಲ್ ಎಲ್ಲಿಂಜ ಒಟ್ಟಿ ಕ್‌ಟ್ಟುವಾಂದ್ ಕ್‍ೕಟತ್.

³⁴ಅಕ್ಕ ಯೇಸು: ನಿಂಗಡ ಪಕ್ಕ ಎಚ್ಚಕ್ ಒಟ್ಟಿ ಉಂಡ್‍ೕಂದ್ ಕ್‍ೕಟತ್. ಏಳ್ ಒಟ್ಟಿಯು ಚೆನ್ನ ಚೆರಿಯ ಮೀನು ಉಂಡ್‍ೕಂದ್ ಶಿಷ್ಯಂಗ ಎಣ್ಣ್‌ಚಿ.

³⁵ಅಲ್ಲಿ ಇಂಜ ಜನಳ ನೆಲತ್‍ರ ಮೇಲೆ ಅಳ್‌ಪಕ್ ಯೇಸು ಎಣ್ಣ್‌ಚಿ.

³⁶ಯೇಸು, ಏಳ್ ಒಟ್ಟಿ ಪಿಂಞ ಮೀನ್‌ನ ಎಡ್‍ತಿತ್, ದೇವಕ್ ವಂದನೆ ಮಾಡಿತ್, ಒಟ್ಟಿನ ಪೊಳ್‌ಚಿತ್ ಶಿಷ್ಯಂಗಕ್ ಕೊಡ್‌ತಿತ್, ಇದ್‍ನ ನಿಂಗ ಎಲ್ಲಾರ್‌ಕು ಕೊಡೀಂದ್ ಎಣ್ಣ್‌ಚಿ; ಶಿಷ್ಯಂಗ ಜನಕ್ ಉಂಬಕ್ ಕೊಡ್‍ತತ್.

³⁷ಎಲ್ಲಾರು ತೃಪ್ತಿಯಾಯಿತ್ ತಿಂದತ್; ಏಳ್ ಕುಕ್ಕೆ ಒಟ್ಟಿ ಬಾಕಿ ಇಂಜತ್.

³⁸ಪೊಣ್ಣಾಳ್‍ವ ಪಿಂಞ ಮಕ್ಕಳ ಕೂಟತೆ ಬರಿ ಆಣಾಳ್ ಮಾತ್ರ ನಾಲ್ ಆಯಿರ ಇಂಜತ್.

³⁹ಬಯ್ಯ, ಅಯಿಂಗಳೆಲ್ಲ ಮನೆಕ್ ಅಯಿಚತ್. ಅಲ್ಲಿಯಿಂಜ ದೋಣಿಲ್ ಅಳ್‌ತಂಡ್ ಮಗ್ದಲ ಎಣ್ಣುವ ಪ್ರಾಂತ್ಯಕ್ ಪೋಚಿ.