Read Kodava ಮತ್ತಾಯ 16 Bible Online

ಮತ್ತಾಯ 16 - Kodava bible

ಮತ್ತಾಯ 16

¹ಫರಿಸಾಯಂಗ ಪಿಂಞ ಸದ್ದುಕಾಯಂಗ ಯೇಸುನ ಕೆಣಿಪಕಾಯಿತ್ ಯೇಸುರ ಪಕ್ಕ ಬಂದಿತ್, ನೀನ್ ಬಾನತ್ಂಜ ಒರ್ ಗುರ್‌ತ್‌ ಕಾರ್ಯತ್‍ನ ಕಾಟಿತಾಂದ್ ಕ್‍ೕಟತ್.

²ಅಯಿಂಗಕ್ ಅಂವೊ ಇನ್ನನೆ ಎಣ್ಣ್‌ಚಿ: ಬಯಿಟಾಪಕ ಸೂರ್ಯ ಮುಳ್‍ಗುವ ಸಮಯತ್‍ಲ್ ಬಾನ ಚೋಂದಿತ್ ಇಂಜತೇಂಗಿ ಬಪ್ಪ ದಿವಸ ಚಾಯಿ ಇಪ್ಪಾಂದ್ ನಿಂಗ ಎಣ್ಣುವಿರ.

³ಪೊಲಾಕ ನೇರತೆ ನಿಂಗ ಬಾನತ್‍ನ ನೋಟ್‍ವಕ ಬಾನ ಚೋಂದಿತ್, ಕರ್ತಿತ್ ಇಂಜತೇಂಗಿ, ಇಂದ್ ಮಳೆ ಪೊಯ್ಯೂಂದ್ ಎಣ್ಣುವಿರ. ನಿಂಗ ಬಾನತ್‍ನ ನೋಟಿತ್, ಹವಾಗುಣ ಎಂತ್‍ೕಂದ್ ಎಣ್ಣುವಿರ, ಆಚೇಂಗಿ ಈ ಕಾಲತ್‍ಲ್ ದೇವ ಮಾಡ್‌ವಾನ ನೋಟಿತ್ ಸಮಯತ್‍ರ ಗುರ್‍ತ್‍ನ ನಿಂಗಕ್ ಎಣ್ಣುವಕ್ ಕಯ್ಯುಲೆ.

⁴ದೇವನ ನೇರಾಯಿತ್ ಆರಾದನೆ ಮಾಡತ ಮೋಸವಾನ ಈ ಸಂತಾನಕಾರಂಗ, ನನ್ನಿಂಜ ಒರ್ ಗುರ್‌ತ್ ಬೋಂಡೂಂದ್ ಕ್‍ೕಪ. ಆಚೇಂಗಿ, ಯೋನ ಪ್ರವಾದಿರ ಗುರ್‌ತ್ ಅಲ್ಲತೆ ಬೋರೆ ಒರ್ ಗುರ್‌ತು ಈಂಗಕ್ ತಪ್ಪ್‌ಲೇಂದ್ ಎಣ್ಣಿತ್ ಅಯಿಂಗಳ ಬುಟ್ಟಿತ್ ಪೋಚಿ.

⁵ಯೇಸುರ ಶಿಷ್ಯಂಗ ಕೆರೆರ ಆಬರಿಕ್ ಪೋಪಕಾಪಕ ಒಟ್ಟಿ ಎಡ್‌ತ ಬಪ್ಪಕ್ ಮರ್ಂದ್‌ರ್‌ತ್.

⁶ಯೇಸು ಅಯಿಂಗಕ್: ಫರಿಸಾಯ ಪಿಂಞ ಸದ್ದುಕಾಯಂಗಡ ಈಸ್ಟ್‌ರ ವಿಷಯತ್ ಎಚ್ಚರತ್ ಇರೀಂದ್ ಎಣ್ಣ್‌ಚಿ.[46]

⁷ಇದ್‍ನ ಶಿಷ್ಯಂಗ ಕ್‍ೕಪಕ: ನಂಗ ಒಟ್ಟಿ ಎಡ್‌ತ ಬರತಾಂಗ್ ಯೇಸು ಇನ್ನನೆ ತಕ್ಕ್ ಪರ್ಂದಿಯೆ ಎಣ್ಣಿಯಂಡ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.

⁸ಯೇಸುಕ್ ಇದ್ ಗೊತ್ತಾಯಿ ಪೋಚಿ. ಅಂವೊ ಅಯಿಂಗಳ ನೋಟಿತ್: ಅಪನಂಬಿಕೆಕಾರಳೇ, ನಿಂಗ ಎನ್ನಂಗ್ ಒಟ್ಟಿ ಎಡ್‌ತ ಬರತಾಂಗ್ ತಕ್ಕ್ ಪರಿವಿರ?

⁹ಇಂಞು ನಿಂಗಕ್ ಗೊತ್ತ್‌ಲ್ಲೆಯಾ? ನಾಡ ಪಕ್ಕ ಇಂಜ ಅಂಜ್ ಒಟ್ಟಿನ ಅಂಜ್ ಆಯಿರ ಜನಕ್ ನಾನ್ ಕೊಡ್‌ತಿತ್‌ಲ್ಲೆಯಾ? ಅಲ್ಲಿಂಜ ಎಚ್ಚಕ್ ಕುಕ್ಕೆ ಒಟ್ಟಿ ಬಾಕಿ ಇಂಜತ್?

¹⁰ಏಳ್ ಒಟ್ಟಿ ಮಾತ್ರ ಇಪ್ಪಕ ನಾಲ್ ಆಯಿರ ಜನಕ್ ಉಂಬಕ್ ಕೊಡ್‌ತಿತ್‌ಲ್ಲೆಯಾ? ಅಲ್ಲಿಂಜ ಎಚ್ಚಕ್ ಕುಕ್ಕೆ ಒಟ್ಟಿ ಬಾಕಿ ಆಚಿ? ನಿಂಗಕ್ ಎನ್ನಂಗ್ ಗೊತ್ತಾಯಂಡ್ ಇಲ್ಲೆ?

¹¹ನಾನ್ ಒಟ್ಟಿರ ವಿಷಯತ್‍ನ ತಕ್ಕ್ ಪರ್‌ಂದಿತ್‌ಲ್ಲೇಂದ್ ಎನ್ನಂಗ್ ಇಂಞು ಅರ್ಥ ಆಯಂಡಿಲ್ಲೆ. ನಿಂಗ ಫರಿಸಾಯ ಪಿಂಞ ಸದ್ದುಕಾಯಂಗಡ ಈಸ್ಟ್‌ರ ವಿಷಯತ್ ಎಚ್ಚರವಾಯಿತಿರಂಡೂಂದ್ ನಾನ್ ಎಣ್ಣಿಯೆ.

¹²ಅಲ್ಲಿಂಜ, ಯೇಸು ಒಟ್ಟಿಕ್ ಇಡ್‌ವ ಈಸ್ಟ್‌ರ ವಿಷಯತ್ ತಕ್ಕ್ ಪರಿಯತೆ ಫರಿಸಾಯ ಪಿಂಞ ಸದ್ದುಕಾಯಂಗಡ ಬೋದನೆರ ವಿಷಯತ್ ಎಚ್ಚರವಾಯಿತ್ ಇಪ್ಪಕ್ ಎಣ್ಣ್‌ಚೀಂದ್ ಶಿಷ್ಯಂಗಕ್ ಗೊತ್ತಾಚಿ.

¹³ಕೈಸರೈಯ ಫಿಲಿಪ್ಪಿ ಎಣ್ಣುವ ಪಟ್ಟಣತ್‍ರ ಸುತ್ತ್‌ಲ್ ಇಂಜ ಪ್ರಾಂತ್ಯತ್‍ರ ಪಕ್ಕ ಬಪ್ಪಕಾಪಕ, ತಾಂಡ ಶಿಷ್ಯಂಗಳ ನೋಟುವಂಜಿ: ಈ ಜನ ಮನುಷ್ಯಕುಮಾರನ ದಾರ್‍ೕಂದ್ ಎಣ್ಣುವಾಂದ್ ಕ್‍ೕಟತ್.

¹⁴ಅದ್ಂಗ್ ಅಯಿಂಗ: ಚೆನ್ನ ಜನ ನಿನ್ನ ದೀಕ್ಷಾಸ್ನಾನ ತಪ್ಪ ಯೋಹಾನಾಂದು, ಚೆನ್ನ ಜನ ಎಲೀಯಾಂದು, ಇಂಞು ಚೆನ್ನ ಜನ ಯೆರೆ‌ಮೀಯಾಂದು ಪಿಂಞ ಇಂಞು ಚೆನ್ನ ಜನ ದೇವಡ ಒರು ಪ್ರವಾದೀಂದು ಕಾಕುವಾಂದ್ ಎಣ್ಣ್‌ಚಿ.

¹⁵ಅಕ್ಕ ಯೇಸು ಅಯಿಂಗಳ ನೋಟಿತ್: ನಿಂಗ ನನ್ನ ದಾರ್‍ೕಂದ್ ಎಣ್ಣುವಿರಾಂದ್ ಕ್‍ೕಟತ್.

¹⁶ಅದ್ಂಗ್ ಸೀಮೋನ ಪೇತ್ರ: ನೀನ್ ಎಕ್ಕಾಲು ಬದ್‍ಕಿಯಂಡುಳ್ಳ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್[47] ಎಣ್ಣ್‌ಚಿ.

¹⁷ಅದ್ಂಗ್ ಯೇಸು: ಯೋನಂಡ ಮೋಂವೊನಾನ ಸೀಮೋನನೇ, ನೀನ್ ಆಶೀರ್ವಾದ ಪಡ್ಂದಂವೊ, ನೀಡ ಈ ತಕ್ಕ್ ಮನುಷ್ಯಡಿಂಜ ಬಂತ್‌ಲ್ಲೆ. ಇದ್ ಪರಲೋಕತ್‌ಲುಳ್ಳ, ನಾಡ ಅಪ್ಪ, ಈ ತಕ್ಕ್‌ನ ನೀನ್ ಪರಿಯುವಕ್ ಮಾಡ್‍ಚಿ.

¹⁸ನಾನ್ ನೀಕ್ ಎಣ್ಣ್‌ವಿ, ನೀನ್ ಪೇತ್ರ, (ಪೇತ್ರಾಂದ್ ಎಣ್ಣ್‌ಚೇಂಗಿ ಬಂಡೆ ಕಲ್ಲ್‍ೕಂದ್ ಅರ್ಥ) ಈ ಬಂಡೆ ಕಲ್ಲ್‌ರ ಮೇಲೆ ನಾನ್ ನಾಡ ಸಬೇನ ಕೆಟ್ಟ್‌ವಿ. ನರಕತ್‌ರ ಶಕ್ತಿ ಅದ್‍ನ ಗೆಲ್ಲುವಕ್ ಕಯ್ಯುಲೆ.

¹⁹ನಾನ್ ನೀಕ್ ಪರಲೋಕ ರಾಜ್ಯತ್‍ರ ಬೀತ್‌ಕೈನ ತಪ್ಪಿ; ನೀನ್ ಈ ಲೋಕತ್‍ಲ್ ಎಂತಾನ ಕೆಟ್ಟ್‌ವಿಯೋ ಅದ್ ಪರಲೋಕತ್‌ಲು ಕೆಟ್ಟಿತ್‌ಪ್ಪ, ನೀನ್ ಈ ಲೋಕತ್‍ಲ್ ಎಂತಾನ ಉತ್ತ್‌ವಿಯೋ ಅದ್ ಪರಲೋಕತ್‍ಲ್ ಸಹ ಉತ್ತಿತ್‌ಪ್ಪಾಂದ್ ಎಣ್ಣ್‌ಚಿ.

²⁰ನಾನ್ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್ ನಿಂಗ ದಾರ್‌ಕು ಎಣ್ಣತೀಂದ್ ಯೇಸು ಶಿಷ್ಯಂಗಕ್ ಹುಕುಮ್ ಕೊಡ್‍ತತ್.

²¹ಅಕ್ಕಯಿಂಜ ಯೇಸು ಅಯಿಂಗಕ್: ನಾನ್ ಯೆರೂಸಲೇಮ್‌ಕ್ ಪೋಪಕ ಅಲ್ಲಿಯತ್ ಪೆರಿಯಯಿಂಗ, ಮುಕ್ಯ ಯಾಜಕಂಗ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡಗುಂಡ್ ಕಷ್ಟಪಡಂಡೂಂದ್ ಎಣ್ಣ್‌ವಕ್‌ ಸುರು ಮಾಡ್‍ಚಿ. ಅಲ್ಲಿ ಪೋಪಕ ನನ್ನ ಕೊಂದ್‌ರ್‌ವ, ಆಚೇಂಗಿಯು ಮೂಂದನೆ ದಿವಸತ್‍ಲ್ ಚಾವ್‍ಯಿಂಜ ಜೀವವಾಯಿತ್ ಏವೀಂದ್ ಯೇಸು ಎಣ್ಣ್‌ಚಿ.

²²ಅಕ್ಕ ಪೇತ್ರ ಯೇಸುನ ಆಬರಿಕ್ ಕಾಕುವಂಜಿ, ಒಡೆಯನೇ, ಇನ್ನನೆ ನೀಕ್ ಆಪಕ್ಕಾಗ, ಇನ್ನನೆ ನೀಕ್ ಆಪಕ್ ದೇವ ಬುಡ್‍ಲೇಂದ್ ಅಂವೊನ ಬೈಯುವಕ್ ಸುರು ಮಾಡ್‍ಚಿ.

²³ಆಚೇಂಗಿ, ಯೇಸು ಅಂವೊಂಡ ಪಕ್ಕ ತಿರಿತ್, ನಾಡ ಬಯ್ಯಕ್ ಪೋ ಸೈತಾನೇ, ನಾನ್ ದೇವಡ ಚಿತ್ತತ್‍ನ ಮಾಡ್‌ವಕ್ ನೀನ್ ತಡೆ ಮಾಡ್‌ವಿಯ, ಇಕ್ಕ, ನೀನ್ ದೇವಡ ಚಿತ್ತತ್‍ರನೆಕೆ ಗೇನ ಮಾಡತೆ, ಮನುಷ್ಯಂಗಡ ಚಿತ್ತತ್‍ರನೆಕೆ ಗೇನ ಮಾಡ್‌ವಿಯಾಂದ್ ಎಣ್ಣ್‌ಚಿ.

²⁴ಅಕ್ಕ, ಯೇಸು ಅಂವೊಂಡ ಶಿಷ್ಯಂಗಳ ನೋಟುವಂಜಿ: ನಿಂಗಡಲ್ಲಿ ದಾರ್‌ಕೇಂಗಿ ನಾಡ ಶಿಷ್ಯನಾಯಿತ್ ಇಪ್ಪಕ್ ಕುಶಿ ಇಂಜತೇಂಗಿ, ಅಂವೊ ಅಂವೊಂಡ ಆಸೆನೆಲ್ಲಾ ಬುಟ್ಟಿತ್, ತಾಂಡ ಶಿಲುಬೇನ ನೇತಿಯಂಡ್ ನಾಡ ಬಯ್ಯತ್ ಬರಡ್.

²⁵ದಾರ್ ಅಂವೊಂಡ ಜೀವತ್‍ನ ಕಾಪಾಡ್‌ವಕ್ ಕುಶಿ ಪಡುವ, ಅಂವೊ ಅಂವೊಂಡ ಜೀವತ್‍ನ ಕಳೆಂದ್‍ರ್‍ವ. ಆಚೇಂಗಿ ದಾರ್ ನಾಕಾಯಿತ್ ಅಂವೊಂಡ ಜೀವತ್‍ನ ಕಳೆಂದ್‍ರ್‍ವ, ಅಂವೊ ಅಂವೊಂಡ ಜೀವತ್‍ನ ನಿತ್ಯ ಜೀವಕಾಯಿತ್ ಕಾಪಾಡ್‌ವ.

²⁶ಒರ್ ಮನುಷ್ಯ ಈ ಲೋಕತ್‍ಲ್ ಉಳ್ಳಾನೆಲ್ಲಾ ತಾಂಗ್ ಸ್ವಂತವಾಯಿತ್ ಮಾಡ್‍ಚೇಂಗಿಯು, ಅಂವೊ ನಾಡ ಶಿಷ್ಯನಾಯಿತ್ ನಾಡ ಬಯ್ಯತ್ ಬರತೆ ಪೋಚೇಂಗಿ, ಅಂವೊಂಗ್ ಎಂತ ಲಾಬ? ಅಂವೊ ನಿತ್ಯ ಜೀವ ಇಲ್ಲತೆ ಚತ್ತ್ ಪೋಪ. ಅನ್ನನೆ ಆಚೇಂಗಿ ಅಂವೊಂಗ್ ನಿತ್ಯ ಜೀವ ಕ್‍ಟ್ಟ್‌ವಕ್ ಒಂದು ಮಾಡ್‌ವಕ್ ಕಯ್ಯುಲೆ.

²⁷ಮನುಷ್ಯಕುಮಾರನಾನ ನಾನ್ ನಾಡ ಅಪ್ಪಂಡ ದುಂಬ್‍ನ ಮಹಿಮೆಲ್ ನಾಡ ದೂತಂಗಡ ಕೂಡೆ ಬಪ್ಪಿ; ಆ ಸಮಯತ್‍ಲ್ ನಾನ್ ಒಬ್ಬೊಬ್ಬಂಗ್ ಅಯಿಂಗಯಿಂಗ ಮಾಡ್‍ನ ಕೆಲಸಕ್ ಆನ ಇನಾಮ್‍ನ ಕೊಡ್‍ಪಿ.

²⁸ಇಲ್ಲಿ ಉಳ್ಳ ಚೆನ್ನ ಜನ ಮನುಷ್ಯಕುಮಾರ ತಾಂಡ ರಾಜ್ಯತ್‍ಲ್ ಆಳುವಕಾಯಿತ್ ಬಪ್ಪದ್‍ನ ಕಾಂಬಕತ್ತನೆ ಚಾವ್‍ಲೇಂದ್ ನೇರಾಯಿತು ನಿಂಗಕ್ ಎಣ್ಣ್‌ವಿ.