Read Kodava ಮತ್ತಾಯ 17 Bible Online

ಮತ್ತಾಯ 17 - Kodava bible

ಮತ್ತಾಯ 17

¹ಆರ್ ದಿವಸ ಆನ ಪಿಂಞ, ಯೇಸು ತಾಂಡ ಶಿಷ್ಯಂಗಳಾನ ಪೇತ್ರ, ಯಾಕೋಬ ಪಿಂಞ ಅಂವೊಂಡ ತಮ್ಮಣನಾನ ಯೋಹಾನನ ಕಾಕಿಯಂಡ್ ಅಯಿಂಗ ಮಾತ್ರ ಇಪ್ಪಕಾಯಿತ್ ಒರ್ ಉದ್ದವಾನ ಕುಂದ್‌ರ ಕೊಡಿಕ್ ಪೋಚಿ.

²ಅಲ್ಲಿ ಅಯಿಂಗಡ ಮಿಂಞತ್‍ಲೇ, ಯೇಸುರ ರೂಪ ಬದ್‍ಲಾಚಿ; ಅಂವೊಂಡ ಮೂಡ್ ಸೂರ್ಯಂಡನೆಕೆ ಬೊಳಿಯುವಕ್ ಸುರ್ ಆಚಿ; ಅಂವೊಂಡ ಬಟ್ಟೆ ಬಲ್ಯ ಬೊಳಿರನೆಕೆ ಬೊಳ್‍ಂದಂಡಿಂಜತ್

³ಅಚ್ಚಕ್ ಬೆರಿಯ ಮೋಶೆ ಪಿಂಞ ಎಲೀಯ ಯೇಸುರ ಕೂಡೆ ತಕ್ಕ್ ಪರಿಯುವಂಗಳಾಯಿತ್ ಅಯಿಂಗ ಕಂಡತ್

⁴ಅಕ್ಕ ಪೇತ್ರ ಯೇಸುನ ನೋಟಿತ್: ಒಡೆಯನೇ ನಂಗ ಇಲ್ಲಿ ಇಪ್ಪದ್ ನಲ್ಲದ್; ನೀಕ್ ಕುಶಿಯುಂಡೇಂಗಿ, ಇಲ್ಲಿ ನೀಕ್ ಒರ್ ಗುಡಾರ, ಮೋಶೇಕ್ ಒರ್ ಗುಡಾರ, ಎಲೀಯಂಗ್ ಒರ್ ಗುಡಾರಾಂದ್, ಮೂಂದ್ ಗುಡಾರ ಮಾಡ್‌ವೀಂದ್ ಎಣ್ಣ್‌ಚಿ.

⁵ಪೇತ್ರ ಅನ್ನನೆ ತಕ್ಕ್ ಪರ್ಂದಂಡ್ ಇಪ್ಪಕಲೆ, ಒರ್ ಮಿನ್ನುವ ಮೋಡ ಅಯಿಂಗಳ ಆವರಿಚಿಟ್ಟತ್. ಇಂವೊ ನಾಡ ಕೊದಿರ ಮೋಂವೊ, ಇಂವೊಂಡ ಮೇಲೆ ನಾಕ್ ದುಂಬ ಕುಶಿ ಉಂಡ್, ಇಂವೊ ಎಣ್ಣುವಾನ ನಿಂಗ ಕ್‍ೕಳೀಂದ್, ಆ ಮೋಡತ್ಂಜ ಒರ್ ವಾಣಿ ಬಾತ್.

⁶ಶಿಷ್ಯಂಗಕ್ ದುಂಬ ಪೋಡಿಯಾಯಿತ್ ಅಂವೊಂಡ ಮಿಂಞ ಅನ್ನನೆ ಅಡ್ಡ ಬುದ್ದತ್.

⁷ಯೇಸು ಅಯಿಂಗಡ ಪಕ್ಕ ಬಂದಿತ್ ಅಯಿಂಗಳ ಮುಟ್ಟ್‌ವಂಜಿ, ಏಳೀ, ಬೊತ್ತತೀಂದ್ ಅಯಿಂಗಕ್ ಎಣ್ಣ್‌ಚಿ

⁸ಅದ್ ಆನ ಪಿಂಞ ಅಯಿಂಗ ಕಣ್ಣ್ ಎಡ್‍ತಿತ್ ನೋಟ್‍ವಕ ಯೇಸುನ ಬುಟ್ಟಿತ್ ಬೋರೆ ದಾರೂ ಅಲ್ಲಿ ಇಂಜಿತ್‌ಲ್ಲೆ.

⁹ಅಯಿಂಗ ಕುಂದಿಂಜ ಅಡಿಕ್ ಇಳ್ಂಜಿತ್ ಬಂದಂಡ್ ಇಪ್ಪಕ ಯೇಸು ಅಯಿಂಗಳ ನೋಟಿತ್: ಮನುಷ್ಯಕುಮಾರ ಚಾವ್‍ಯಿಂಜ ಪುನಃ ಜೀವವಾಯಿತ್ ಬಪ್ಪಕತ್ತನೆ ಅಯಿಂಗ ಕಂಡದ್‍ನ ದಾರ್‌ಕು ಎಣ್ಣ್‌ವಕ್ಕಾಗಾಂದ್ ಆಜ್ಞೆ ಕೊಡ್‍ತತ್.

¹⁰ಅಕ್ಕ ಅಂವೊಂಡ ಶಿಷ್ಯಂಗ ಅಂವೊನ ನೋಟಿತ್: ಎಲೀಯ ಮಿಂಞ ಬರಂಡೂಂದ್, ನ್ಯಾಯಪ್ರಮಾಣ ಗೊತ್ತುಳ್ಳ ಉಪಾದ್ಯಂಗ್ ಎಣ್ಣ್‌ವದ್ ಎನ್ನನೇಂದ್ ಕ್‍ೕಟತ್.

¹¹ಅದ್ಂಗ್ ಯೇಸು: ಎಲೀಯ ಮಿಂಞ ಬಂದಿತ್ ಎಲ್ಲಾನ ಸರಿ ಮಾಡ್‌ವಾಂದುಳ್ಳದ್ ನೇರೇ.

¹²ಆಚೇಂಗಿಯು ಎಲೀಯ ಮಿಂಞಲೇ ಬಂದಿತಾಚೀಂದ್ ನಾನ್ ನಿಂಗಕ್ ಎಣ್ಣ್‌ವಿ; ಆಚೇಂಗಿ ಜನಕ್ ಅಂವೊನ ಗೊತ್ತಾಯಿತ್‌ಲ್ಲೆ, ಜನ ತಾಂಡ ಮನಸ್ಸ್‌ಕ್ ಬಂದನೆಕೆ ಅಂವೊಂಗ್ ಮಾಡ್‍ಚಿ; ಅನ್ನನೆ ಮನುಷ್ಯಕುಮಾರನ ಸಹ ಜನ ಕಷ್ಟಪಡ್‌ತ್‍ವಾಂದ್ ಎಣ್ಣ್‌ಚಿ.

¹³ಇನ್ನನೆ ಯೇಸು ಎಣ್ಣುವಕ ಅಂವೊ ದೀಕ್ಷಾಸ್ನಾನ ತಪ್ಪ ಯೋಹಾನಂಡ ವಿಷಯತ್‍ನ ತಕ್ಕ್ ಪರ್ಂದತ್‍ೕಂದ್ ಅಂವೊಂಡ ಶಿಷ್ಯಂಗಕ್ ಗೊತ್ತಾಚಿ.

¹⁴ಅಯಿಂಗ, ಜನಡ ಗುಂಪ್‌ಕ್ ಬಪ್ಪಕ, ಒರ್ ಮನುಷ್ಯ ಯೇಸುರ ಪಕ್ಕ ಬಂದಿತ್ ಮೊಣಕಾಲ್ ಇಟ್ಟಿತ್,

¹⁵ಯೇಸುನ ನೋಟಿತ್: ಒಡೆಯನೇ, ನಾಡ ಮೋಂವೊಂಡ ಮೇಲೆ ಕನಿಕರ ಕಾಟ್, ಅಂವೊಂಗ್ ಸೊಯ ತಪ್ಪಿ ಪೋಪ ಕಾಯಿಲೆ ಉಂಡ್. ಅಂವೊ ಅಕ್ಕಕ್ಕ ತಿತ್ತ್‌ಕ್ ಪಿಂಞ ನೀರ್‌ಕ್ ಬುದ್ದ್‌ರ್‌ವ, ಇನ್ನನೆ ಅಂವೊ ದುಂಬ ಕಷ್ಟಪಟ್ಟಂಡುಂಡ್.

¹⁶ನಾನ್ ಅಂವೊನ ನೀಡ ಶಿಷ್ಯಂಗಡ ಪಕ್ಕ ಕಾಕಿಯಂಡ್ ಬಂದಿಯೆ, ಆಚೇಂಗಿ ಅಯಿಂಗಕ್ ಅಂವೊನ ವಾಸಿ ಮಾಡ್‌ವಕ್ ಕಯಿಂಜಿತ್‌ಲ್ಲೇಂದ್ ಎಣ್ಣ್‌ಚಿ.

¹⁷ಯೇಸು ಅಲ್ಲಿ ಕೂಡಿತ್ಂಜ ಜನಳ ನೋಟಿತ್: ನಂಬಿಕೆ ಇಲ್ಲತ ಮೋಸವಾನ ಸಂತಾನಕಾರಳೇ, ನಿಂಗಡ ಕೂಡೆ ಎಚ್ಚಕ್ ಕಾಲ ನಾನ್ ತಾಳ್ಮೆಯಾಯಿತ್ ಇಪ್ಪಕ್ ಕಯ್ಯು? ನೀಡ ಮೋಂವೊನ ಇಲ್ಲಿ ಕಾಕಿಯಂಡ್ ಬಾಂದ್ ಆ ಕ್‍ಣ್ಣಂಡ ಅಪ್ಪಂಗ್ ಎಣ್ಣ್‌ಚಿ.

¹⁸ಯೇಸು ಆ ಕ್‍ಣ್ಣಂಡ ಮೇಲೆ ಉಳ್ಳ ಕೂಳಿಕ್ ಹುಕುಮ್ ಕೊಡ್‍ತತ್; ಅಕ್ಕಲೆ, ಆ ಕೂಳಿ ಅಂವೊನ ಬುಟ್ಟಿತ್ ಪೋಯಿರ್‌ತ್; ಅಕ್ಕಣೆಕ್ ಆ ಕ್‍ಣ್ಣ ವಾಸಿ ಆಚಿ.

¹⁹ಯೇಸುರ ಶಿಷ್ಯಂಗ ಯೇಸುರ ಪಕ್ಕ ಗುಟ್ಟಾಯಿತ್ ಬಂದಿತ್: ನಂಗಕ್ ಎನ್ನಂಗ್ ಈ ಕೂಳಿನ ಬುಡ್‌ತ್‌ವಕ್ ಕಯಿಂಜಿತ್ತಿಲ್ಲೇಂದ್ ಕ್‍ೕಟತ್.

²⁰ಅದ್ಂಗ್ ಯೇಸು: ನಿಂಗಕ್ ನಾಡ ಮೇಲೆ ಬೋಂಡಿಯಾನ ನಂಬಿಕೆ ಇಲ್ಲೆ; ನಿಂಗಕ್ ನಾಡ ಮೇಲೆ ಕಡು ಕುರುರಚ್ಚಕ್ ನಂಬಿಕೆ ಉಂಡೇಂಗಿ, ನಿಂಗ ಈ ಕುಂದ್‌ಕ್ ನೀನ್ ಇಲ್ಲಿಂಜ ಪೋಯಿತ್ ಅಲ್ಲಿ ಇರ್‍ೕಂದ್ ಎಣ್ಣ್‌ಚೇಂಗಿ ಆ ಕುಂದ್ ಅಲ್ಲಿಕ್ ಪೋಪ; ನಿಂಗಕ್ ಮಾಡ್‌ವಕ್ ಕಯ್ಯತದ್‍ೕಂದ್ ಒಂದು ಇಲ್ಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.

²¹ಆಚೇಂಗಿ ಈ ತರ ಕೂಳಿ ನಿಂಗಡ ಪ್ರಾರ್ಥನೆ ಪಿಂಞ ಉಪವಾಸತ್ಂಜ ಅಲ್ಲತೆ ಬೋರೆ ವಿಷಯತ್ಂಜ ಬುಟ್ಟ್ ಪೋಪುಲೆ[48].

²²ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಗಲಿಲಾಯಕ್ ಒಟ್ಟಾಯಿತ್ ಬಪ್ಪಕ, ಯೇಸು ಅಯಿಂಗಕ್:

²³ಮನುಷ್ಯಕುಮಾರನ ಜನಡ ಕೈಯಿಕ್ ಪುಡ್‍ಚಿ ಕೊಡ್‍ಪ ಸಮಯ ಬಾತ್, ಅಯಿಂಗ ಮನುಷ್ಯಕುಮಾರನ ಕೊಲ್ಲುವ. ಆಚೇಂಗಿಯು, ಅಂವೊ ಮೂಂದ್ ದಿವಸ ಆನ ಪಿಂಞ ಚಾವ್‍ಯಿಂಜ ಜೀವವಾಯಿತ್ ಏವಾಂದ್ ಎಣ್ಣ್‌ಚಿ. ಅದ್‍ನ ಕ್‍ೕಪಕ ಶಿಷ್ಯಂಗಕೆಲ್ಲ ದುಂಬ ಬೇಜಾರ್ ಆಚಿ.

²⁴ಅಯಿಂಗ ಕಪೆರ್ನೌಮ್‍ಕ್ ಬಪ್ಪಕ, ದೇವಾಲಯತ್‍ರ ಕಂದಾಯ ಎಡ್‍ಪಯಿಂಗ ಪೇತ್ರಂಡ ಪಕ್ಕ ಬಂದಿತ್: ನಿಂಗಡ ಉಪಾದ್ಯ ದೇವಾಲಯತ್‍ರ ಕಂದಾಯ ಕೆಟ್ಟಿಯಂಡ್ ಉಂಡಾಂದ್ ಕ್‍ೕಟತ್; ಅದ್ಂಗ್ ಪೇತ್ರ: ಅಕ್ಕು ಅಂವೊ ಕೆಟ್ಟಿಯಂಡುಂಡ್‍ೕಂದ್ ಎಣ್ಣ್‌ಚಿ.

²⁵ಪೇತ್ರ ಮನೆಕ್ ಪೋನ ಪಿಂಞ ಅಂವೊ ತಕ್ಕ್ ಪರಿಯುವಕ್ ಮಿಂಞಲೇ ಯೇಸು ಅಂವೊನ ನೋಟಿತ್: ಈ ಲೋಕತ್‍ರ ರಾಜಂಗ ದಾಡ ಕೈಯಿಂಜ ಕಂದಾಯ ಎಡ್‍ತಂಡುಂಡ್? ತಾಂಡ ಮಕ್ಕಡ ಕೈಯಿಂಜಾ ಅಥವ ಬೋರೆಯಿಂಗಡ ಕೈಯಿಂಜಾ? ನೀನ್ ಎಂತ ಗೇನ ಮಾಡ್‌ವಿಯಾಂದ್ ಕ್‍ೕಟತ್.

²⁶ಅದ್ಂಗ್ ಪೇತ್ರ: ಬೋರೆಯಿಂಗಡ ಕೈಯಿಂಜ ಎಡ್‍ತವಾಂದ್ ಎಣ್ಣ್‌ಚಿ. ಅಕ್ಕ ಯೇಸು: ಅನ್ನನೆ ಆಚೇಂಗಿ ಅಯಿಂಗಡ ಮಕ್ಕ ಕಂದಾಯ ಕೊಡ್‍ಪದ್ ಬೋಂಡಲ್ಲಾಂದ್ ಎಣ್ಣ್‌ಚಿ.

²⁷ಆಚೇಂಗಿಯು, ನಂಗಡ ವಿಷಯತ್‍ಲ್ ಅಯಿಂಗ ಬೇಜಾರ್ ಮಾಡಂಡ. ನೀನ್ ಸಮುದ್ರಕ್ ಪೋಯಿತ್ ಮೀನ್‌ಕ್ ಗಾಣ ಇಡ್, ಅಕ್ಕ ಒರ್ ಮೀನ್ ಕ್‍ಟ್ಟುವ. ಅದ್ಂಡ ಬಾಯಿರ ಒಳ್‍ಲ್ ಒರ್ ಬೊಳ್ಳಿ ಉರುಪಿಯ ಕ್‍ಟ್ಟುವ; ಅದ್‍ನ ನಾಕಾಯಿತ್, ನೀಕಾಯಿತ್, ಈ ದೇವಾಲಯತ್‍ರ ಕಂದಾಯ ಎಡ್‌ಪಯಿಂಗಡ ಪಕ್ಕ ಕೊಡ್‍ೕಂದ್ ಯೇಸು ಎಣ್ಣ್‌ಚಿ.