Read Kodava ಮತ್ತಾಯ 18 Bible Online

ಮತ್ತಾಯ 18 - Kodava bible

ಮತ್ತಾಯ 18

¹ಅದೇ ಸಮಯತ್‍ಲ್ ಯೇಸುರ ಶಿಷ್ಯಂಗ ಯೇಸುರ ಪಕ್ಕ ಬಂದಿತ್: ಪರಲೋಕ ರಾಜ್ಯತ್‍ಲ್ ದಾರ್ ದುಂಬ ಬಲ್ಯಂವೊ ಎಣ್ಣಿಯಂಡ್ ಕ್‍ೕಟತ್?

²ಯೇಸು ಒರ್ ಚೆರಿಯ ಕುಂಞಿನ ಕಾಕುವಂಜಿ ಅಯಿಂಗಡ ಮಿಂಞತ್‍ ನಿಪ್ಪ್‌ಚಿಟ್ಟತ್.

³ನಾನ್ ನಿಂಗಕ್ ನೇರಾಯಿತು ಎಣ್ಣ್‌ವಿ: ನಿಂಗಡ ಮನಸ್ಸ್ ಬದ್‍ಲಾಯಿತ್ ಈ ಕುಂಞಿರನೆಕೆ ಆಕತಪೋನಕ ನಿಂಗ ಪರಲೋಕ ರಾಜ್ಯಕ್ ಪೋಪಕ್ ಕಯ್ಯುಲೆ.

⁴ಆನಗುಂಡ್ ಒರ್ ಚೆರಿಯ ಕುಂಞಿರನೆಕೆ ದಾರ್ ಒಬ್ಬ ಅಂವೊನ ತಗ್ಗ್‌ಚಿಡ್‌ವ, ಅಂವೊನೇ ಪರಲೋಕ ರಾಜ್ಯತ್‍ಲ್ ಎಲ್ಲಾಕಿಂಜ ಬಲ್ಯಂವೋಂದ್ ಎಣ್ಣ್‌ಚಿ.

⁵ಇನ್ನನೆ ಒರ್ ಕುಂಞಿನ ದಾರ್ ನಾಕಾಯಿತ್ ಸ್ವೀಕಾರ ಮಾಡ್‌ವ, ಅಂವೊ ನನ್ನ ಸ್ವೀಕಾರ ಮಾಡ್‍ನನೆಕೆ.

⁶ಆಚೇಂಗಿ ನಾಡ ಮೇಲೆ ನಂಬಿಕೆಯುಳ್ಳ ಈ ಚೆರಿಯಯಿಂಗಳ ದಾರ್ ನಾಡ ಮೇಲೆ ನಂಬಿಕೆ ಇಲ್ಲತ್ತನೆಕೆ ಮಾಡ್‌ವ, ಅಯಿಂಗಡ ಬೋಳೆಕ್ ಬಲ್ಯೊರ್ ಬೀಜುವ ಕಲ್ಲ್‌ನ ಕೆಟ್ಟಿತ್ ಸಮುದ್ರತ್‍ರ ಆಳತ್‍ಲ್ ಅಂವೊನ ಮುಳ್‍ಕ್‍ವದ್ ಅಂವೊಂಗ್ ನಲ್ಲದಾಯಿತ್‌ಪ್ಪ.

⁷ನಾಡ ಮೇಲೆ ನಂಬಿಕೆ ಬೆಕ್ಕತನೆಕೆ ಮಾಡ್‌ವಯಿಂಗಕ್ ಅಯ್ಯೋ! ಅನ್ನನೆ ಬಪ್ಪ ಸೋದನೆನ ದಾರೂ ತಡ್‍ಪಕ್ ಕಯ್ಯುಲೆ. ಆಚೇಂಗಿ ಅನ್ನನೆ ಮಾಡ್‌ವಯಿಂಗಕ್ ಅಯ್ಯೋ!

⁸ನೀಡ ಕೈ ಅಥವ ಕಾಲ್ ಪಾಪ ಮಾಡ್‌ವಕ್ ಕಾರಣವಾಯಿತ್ ಇಂಜತೇಂಗಿ, ಅದ್‍ನ ಕೆತ್ತಿತ್ ಚಾಡಿರ್. ದಂಡ್ ಕೈ ದಂಡ್ ಕಾಲ್ ಉಳ್ಳಂವೊನಾಯಿತ್ ನಿನ್ನ ನಿತ್ಯ ತಿತ್ತ್‌ಕ್ ತಳ್ಳ್‌ವಕಿಂಜ, ಒರ್ ಕೈ ಒರ್ ಕಾಲ್ ಉಳ್ಳಂವೊನಾಯಿತ್ ನಿತ್ಯ ಜೀವಕ್ ಪ್ರವೇಶ ಮಾಡ್‍ವದ್ ನಲ್ಲದ್.

⁹ನೀಡ ಕಣ್ಣ್ ಪಾಪ ಮಾಡ್‌ವಕ್ ಕಾರಣವಾಯಿತ್ ಇಂಜತೇಂಗಿ ಅದ್‍ನ ಬಲ್‍ಚಿತ್ ಚಾಡಿರ್. ದಂಡ್ ಕಣ್ಣ್ ಉಳ್ಳಂವೊನಾಯಿತ್ ನಿತ್ಯ ತಿತ್ತ್‌ಕ್ ತಳ್ಳ್‌ವಕಿಂಜ, ಒರ್ ಕಣ್ಣ್ ಉಳ್ಳಂವೊನಾಯಿತ್ ನಿತ್ಯ ಜೀವಕ್ ಪ್ರವೇಶ ಮಾಡ್‍ವದ್ ನಲ್ಲದ್.

¹⁰ಈ ಚೆರಿಯಯಿಂಗಡಡೆಲ್ ಒಬ್ಬನನೂ ಕಮ್ಮಿಯಾಯಿತ್ ನೋಟತೆ ಇಪ್ಪಕ್ ಎಚ್ಚರತ್‍ಲ್ ಇರಿ. ಅಯಿಂಗಡ ದೇವದೂತಂಗ ನಾಡ ಪರಲೋಕತುಲುಳ್ಳ ಅಪ್ಪಂಡ ಮೂಡ್‍ನ ಎಕ್ಕಲೂ ಅಯಿಂಗಕಾಯಿತ್ ನೋಟಿಯಂಡ್ ಇಪ್ಪ.

¹¹ಪಾಪತ್‍ರಗುಂಡ್ ದೇವಡಯಿಂಜ ಕಳೆಂದ್ ಪೋನ ಜನಳ ಕಾಪಾಡ್‌ವಕಾಯಿತ್ ಮನುಷ್ಯಕುಮಾರ ಬಾತ್.[49]

¹²ಒರ್ ಮನುಷ್ಯಂಗ್ ನೂರ್ ಕೊರಿಯ ಇಪ್ಪಕ, ಅದ್‍ಲ್ ಒರ್ ಕೊರಿ ತಪ್ಪ್‌ಚಿಟ್ಟಂಡ್ ಪೋಚೇಂಗಿ, ಅಕ್ಕ ಅಂವೊ ಬಾಕಿ ತೊಂಬತೊಯಿಂಬದ್ ಕೊರಿಯಳ ಕುಂದ್‌ರ ಪಕ್ಕ ಬುಟ್ಟಿತ್, ತಪ್ಪ್‌ಚಿಟ್ಟ್ ಪೋನ ಒರ್ ಕೊರಿನ ತ್‍ೕಡ್‌ವಕ್ ಪೋಪ್‍ಲೆಯಾ? ನಿಂಗ ಎಂತ ಗೇನ ಮಾಡ್‌ವಿರ?

¹³ಅದ್‍ನ ಅಂವೊ ಕಂಡ್‌ಪುಡ್‌ಚತೇಂಗಿ, ಅಂವೊಂಡ ಪಕ್ಕ ಉಳ್ಳ ಬೋರೆ ತೊಂಬತೊಯಿಂಬದ್ ಕೊರಿಕಿಂಜ, ಕ್‍ಟ್ಟಿಪೋನ ಕೊರಿಕಾಯಿತ್ ದುಂಬ ಕುಶಿಪಡ್‌ವಾಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ.

¹⁴ಅನ್ನನೆ, ಈ ಚೆರಿಯಯಿಂಗಡಡೆಲ್ ಒಬ್ಬ ಕೂಡೆ ಬಟ್ಟೆ ತಪ್ಪಿ ಪೋಪದ್ ಪರಲೋಕತ್‍ಲ್ ಉಳ್ಳ ನಿಂಗಡ ಅಪ್ಪಂಡ ಚಿತ್ತ ಅಲ್ಲ.

¹⁵ನೀಡ ಅಣ್ಣತಮ್ಮಣಂಡಡೆಲ್ ದಾರೇಂಗಿ ತಪ್ಪ್ ಮಾಡ್‍ಚೇಂಗಿ ನೀನ್ ಅಂವೊಂಡ ಪಕ್ಕ ಪೋಯಿತ್, ನಿಂಗ ದಂಡಾಳ್ ಮಾತ್ರ ಇಪ್ಪಕಾಪಕ ಅಂವೊಂಡ ತಪ್ಪ್‌ನ ಎಣ್ಣಿ ಕೊಡ್, ಅಕ್ಕ ಅಂವೊ ಅಂವೊಂಡ ತಪ್ಪ್‌ನ ಒತ್ತತೇಂಗಿ, ನೀನ್ ಅಂವೊನ ನೀಡ ಬಟ್ಟೇಕ್ ಕೊಂಡ್ ಬಂದಿಯ.

¹⁶ಅಂವೊ ನೀಕ್ ಒತ್ತತೆ ಪೋನಕ, ಬೋರೆ ದಂಡ್ ಮೂಂದಾಳ್‍ನ ಕಾಕಿಯಂಡ್ ಪೋ. ಅಕ್ಕ ಅಂವೊ ಮಾಡ್‍ನ ವಿಷಯತ್‍ನ ದಂಡ್ ಅಲ್ಲ ಮೂಂದ್ ಸಾಕ್ಷಿರಗುಂಡ್ ನಿರೂಬಿಚಿಡ್‌ವಕ್ ಆಪ.[50]

¹⁷ಅಯಿಂಗಕ್ ಸಹ ಅಂವೊ ಒತ್ತತೆ ಪೋನಕ, ಅಂವೊಂಡ ವಿಷಯತ್‍ನ ಸಬೇಕ್ ಎಣ್ಣ್. ಆ ಸಬೇಕ್ ಒತ್ತತೆ ಪೋನಕ, ಅಂವೊನ ದೇವನ ನಂಬತಂವೊಂಡನೆಕೆ ಕಾಂಗಂಡು, ಅಥವ ಒರ್ ಪಾಪಿರನೆಕೆ ನೋಟಂಡು.

¹⁸ನಿಂಗ ಈ ಲೋಕತ್‍ಲ್ ಎಂತಾನ ಕೆಟ್ಟ್‌ವಿರೋ ಅದ್ ಪರಲೋಕತ್‌ಲೂ ಕೆಟ್ಟಿತ್‌ಪ್ಪ. ನಿಂಗ ಈ ಲೋಕತ್‍ಲ್ ಎಂತಾನ ಉತ್ತ್‌ವಿರೋ ಅದ್ ಪರಲೋಕತ್‍ಲ್ ಸಹ ಉತ್ತಿತಿಪ್ಪಾಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ.

¹⁹ಇದ್‍ಲ್ಲತೆ ಬೂಲೋಕತ್‍ಲ್ ದಂಡಾಳ್ ಕೂಡಿಯಂಡ್ ಒರ್ ವಿಷಯಕಾಯಿತ್ ಒರೇ ಮನಸ್ಸ್‌ಲ್ ದೇವಡ ಪಕ್ಕ ಬೋಡ್‌ನಕ, ಪರಲೋಕತ್‍ಲ್ ಉಳ್ಳ ನಾಡ ಅಪ್ಪ ಅದ್‍ನ ಅನ್ನನೆ ಮಾಡ್‌ವಾಂದ್ ನಿಂಗಕ್ ಎಣ್ಣ್‌ವಿ.

²⁰ಎನ್ನಂಗೆಣ್ಣ್‌ಚೇಂಗಿ, ಎಲ್ಲಿ ದಂಡ್‍ಮೂಂದಾಳ್ ನಾಡ ಪೆದತ್‍ಲ್ ಕೂಡಿ ಬಪ್ಪ, ಅಲ್ಲಿ ಅಯಿಂಗಡ ಮದ್ಯತ್‍ಲ್ ನಾನ್ ಇಪ್ಪೀಂದ್ ಎಣ್ಣ್‌ಚಿ.

²¹ಅಕ್ಕ ಪೇತ್ರ ಯೇಸುರ ಪಕ್ಕ ಬಪ್ಪಂಜಿ: ನಾಡ ಅಣ್ಣತಮ್ಮಣಂಗಡಡೆಲ್ ದಾರೇಂಗಿ ನಾಕ್ ವಿರೋದವಾಯಿತ್ ತಪ್ಪ್ ಮಾಡಿಯಂಡ್ ಉಂಡೇಂಗಿ, ನಾನ್ ಅಂವೊನ ಎಚ್ಚಕ್ ಕುರಿ ಮನ್ನಿಚಿಡಡ್? ಏಳ್ ಕುರಿ ಮನ್ನಿಚಿಟ್ಟತೇಂಗಿ ಮದಿಯಾಂದ್ ಕ್‍ೕಟತ್.

²²ಅಕ್ಕ ಯೇಸು: ಏಳ್ ಕುರಿ ಅಲ್ಲ, ಏಳ್ ಎಳ್‌ವದ್ ಕುರಿ ಅಂವೊನ ಮನ್ನಿಚಿಡಂಡು.

²³ಎನ್ನನೆ ಎಣ್ಣ್‌ಚೇಂಗಿ, ಪರಲೋಕ ರಾಜ್ಯತ್‍ರ ವಿಷಯ ಇನ್ನನೆ ಉಂಡ್. ಒರ್ ರಾಜ ತಾಂಡ ಆಳ್‍ವಳ ಕಾಕಿತ್ ಅಯಿಂಗಡ ಲೆಕ್ಕಚಾರ ನೋಟ್‍ವಕ್ ಸುರು ಮಾಡ್‍ಚಿ.

²⁴ಒಬ್ಬ ಪತ್ತಾಯಿರ ಬೊಳ್ಳಿ ನಾಣ್ಯ ಸಾಲ ಮಾಡ್‌ನಂವೊನ ಕಾಕಿಯಂಡ್ ಬಾತ್.

²⁵ಆ ಮನುಷ್ಯಂಗ್ ಸಾಲ ತ್‍ೕಪಕ್ ಅಂವೊಂಡ ಪಕ್ಕ ಒಂದು ಇಲ್ಲೆ. ಅಕ್ಕ ಅಂವೊಂಡ ಎಜಮಾನ ನೀಡ ಪೊಣ್ಣ್ ಮಕ್ಕ ಪಿಂಞ ಸೊತ್ತ್‌ನೆಲ್ಲ ಮಾರಿತ್ ನಾಡ ಸಾಲ ತ್‍ೕಕಂಡೂಂದ್ ಹುಕುಮ್ ಕೊಡ್‍ತತ್.

²⁶ಅಕ್ಕ ಅಂವೊ ಎಜಮಾನಂಡ ಕಾಲ್‌ಕ್ ಬೂವಂಜಿ: ಚೆನ್ನ ಸಮಾದಾನ ಎಡ್‌ತ, ನೀಡ ಸಾಲತನೆಲ್ಲ ನಾನ್ ತ್‍ೕಪೀಂದ್ ಎಣ್ಣ್‌ಚಿ.

²⁷ಅಕ್ಕ ಎಜಮಾನಂಗ್ ಅಂವೊಂಡ ಮೇಲೆ ಕನಿಕರ ಆಯಿತ್ ಅಂವೊ ಮಾಡ್‍ನ ಸಾಲತನೆಲ್ಲ ತಪ್ಪದ್ ಬೋಂಡಾಂದ್ ಎಣ್ಣಿತ್, ಮನ್ನಿಚಿಟ್ಟ್‌ರ್‌ತ್.

²⁸ಆ ಮನುಷ್ಯ ಪೊರಮೆ ಪೋಚಿ. ಆ ರಾಜಂಡ ಬೋರೆ ಒರ್ ಆಳ್, ಇಂವೊಂಡ ಪಕ್ಕ ನೂರ್ ಬೊಳ್ಳಿರ ಸಾಲ ಮಾಡಿತ್ಂಜತ್. ಈ ಮನುಷ್ಯ ಅಂವೊನ ಪುಡ್‌ಚಿತ್ ಬಲಿಪಂಜಿ, ಅಂವೊಂಗ್ ಪೊಜ್ಜಿತ್, ಅಂವೊಂಡ ತೊಂಡೆನ ಪುಡ್‍ಚತ್. ನೀನ್ ನಾಕ್ ತಪ್ಪಕುಳ್ಳ ದುಡ್ಡ್‌ನ ಇಕ್ಕಲೆ ತಾಂದ್ ಕ್‍ೕಟತ್.

²⁹ಅದ್ಂಗ್ ಅಂವೊ, ಅಂವೊಂಡ ಕಾಲ್‌ಕ್ ಬೂವಂಜಿ: ಚೆನ್ನ ಸಮಾದಾನ ಎಡ್‌ತ, ನಾನ್ ನೀಡ ಸಾಲತ್‍ನ ತ್‍ೕಪೀಂದ್ ಬೋಡ್‍ಚಿ.

³⁰ಅಂವೊ ಅಂವೊಂಡ ತಕ್ಕ್‌ನ ಕ್‍ೕಕತೆ, ಅಂವೊಂಡ ದುಡ್ಡ್ ಕೊಡ್‌ಪಕತ್ತನೆ ಜೈಲ್‌ಕ್ ಇಟ್ಟತ್.

³¹ರಾಜಂಡ ಬೋರೆ ಆಳ್‍ವ ಇಂವೊ ಮಾಡ್‌ನಾನ ಕಾಂಬಕ, ಅಯಿಂಗಕ್ ಬೇಜಾರ್ ಆಚಿ. ಅಯಿಂಗ ಪೋಯಿತ್ ರಾಜಂಗ್ ಎಣ್ಣ್‌ಚಿ.

³²ಅಕ್ಕ ರಾಜ ಆ ಆಳ್‌ನ ಕಾಕುವಂಜಿ: ಎಚ್ಚಕ್ ಮೋಸವಾನ ಆಳ್ ನೀನ್. ನೀನ್ ನಾಡ ಕಾಲ್ ಪುಡಿಪಕ, ನಾಕ್ ತಪ್ಪಕುಳ್ಳ ದುಡ್ಡ್‌ನ, ತಪ್ಪದ್ ಬೋಂಡಾಂದ್ ಮನ್ನಿಚಿಟ್ಟಿಯೆ, ನೀನ್ ಕ್‍ೕಟಾಂಗ್ ನಾನ್ ಅನ್ನನೆ ಮಾಡಿಯೆ.

³³ನಾನ್ ನೀಕ್ ಕನಿಕರ ಕಾಟ್‍ನನೆಕೆ, ನೀನ್ ಅಂವೊಂಡ ಮೇಲೆ ಕನಿಕರ ಕಾಟ್‍ವಕಿಂಜತಲ್ಲ.

³⁴ರಾಜಂಗ್ ಚೆಡಿ ಬಾತ್, ನೀನ್ ನಾಡ ಸಾಲನೆಲ್ಲ ತ್‍ೕಪಕತ್ತನೆ ಜೈಲ್‍ಲ್ ಇರಂಡೂಂದ್ ಎಣ್ಣ್‌ಚಿ.

³⁵ಇನ್ನನೆ ನಿಂಗಳು ಸಹ, ನಿಂಗಡ ಅಣ್ಣತಮ್ಮಣಂಗ ಮಾಡ್‍ನ ಪಾಪತ್‍ನ ನೇರಾಯಿತ್ ಮನ್ನಿಚಿಡತ ಪೋನಕ, ಪರಲೋಕತ್‍ಲ್ ಉಳ್ಳ ನಾಡ ಅಪ್ಪ ಇನ್ನನೆ ನಿಂಗಕ್ ಸಹ ಮಾಡ್‌ವಾಂದ್ ಯೇಸು ಎಣ್ಣ್‌ಚಿ.