Read Kodava ಮತ್ತಾಯ 19 Bible Online

ಮತ್ತಾಯ 19 - Kodava bible

ಮತ್ತಾಯ 19

¹ಯೇಸು ಇನ್ನನೆ ಎಲ್ಲಾ ಎಣ್ಣಿತ್ ಆನ ಪಿಂಞ, ಗಲಿಲಾಯ ಪ್ರಾಂತ್ಯತ್‍ನ ಬುಟ್ಟಿತ್ ಯೊರ್ದನ್ ಕೆರೆರ ಆಬರಿಲ್ ಉಳ್ಳ ಯೆಹೂದ್ಯ ಪ್ರಾಂತ್ಯಕ್ ಬಾತ್.

²ಬಲ್ಯ ಗುಂಪ್ ಗುಂಪಾಯಿತ್ ಜನ ಅಂವೊಂಡ ಬಯ್ಯತ್ ಪೋಚಿ; ಅಯಿಂಗಳ ಕಾಯಿಲೆಯಿಂಜ ಯೇಸು ವಾಸಿ ಮಾಡ್‍ಚಿ.

³ಅಕ್ಕ, ಚೆನ್ನ ಫರಿಸಾಯ ಯೇಸುನ ಕೆಣಿಪಕಾಯಿತ್ ಅಂವೊಂಡ ಪಕ್ಕ ಬಂದಿತ್: ಒರ್ ಮನುಷ್ಯ ಅಂವೊಂಡ ಪೊಣ್ಣ್‌ನ ಏದ್ ಕಾರಣಕಾಯಿತು ಬೋಂಡಾಂದ್ ಬುಡ್‌ವದ್ ನ್ಯಾಯವಾಂದ್ ಕ್‍ೕಟತ್.

⁴ಅದ್ಂಗ್ ಯೇಸು: ದೇವ ಈ ಲೋಕತ್‍ನ ಸೃಷ್ಟಿ ಮಾಡ್‌ವಕ ಆಣಾಳ್ ಪೊಣ್ಣಾಳಾಯಿತ್ ಸೃಷ್ಟಿ ಮಾಡ್‍ಚಿ.[51]

⁵ಇದ್ಂಗಾಯಿತ್ ವಡಿಯ ಅಂವೊಂಡ ಅಪ್ಪವ್ವನ ಬುಟ್ಟಿತ್ ತಾಂಡ ಪೊಣ್ಣ್‌ರ ಕೂಡೆ ಒಂದಾಯಿತ್ ಇಪ್ಪ, ಅಯಿಂಗ ದಂಡಾಳು ಒರೇ ತಡಿಯಾಯಿತ್‌ಪ್ಪಾಂದ್ ಎಣ್ಣ್‌ನ ವಿಷಯತ್‍ನ ನಿಂಗ ಓದಿತ್‌ಲ್ಲೆಯಾಂದ್ ಕ್‍ೕಟತ್.[52]

⁶ದೇವ ಇನ್ನನೆ ಮಾಡ್‍ನಗುಂಡ್, ಅಯಿಂಗ ದಂಡಾಳು ದಂಡಾಳಾಯಿತ್ ಇಲ್ಲತೆ ಒರೇ ತಡಿಯಾಯಿತ್ ಇಪ್ಪ. ಆನಗುಂಡ್ ದೇವ ಒಂದ್ ಮಾಡ್‍ನಯಿಂಗಳ, ಮನುಷ್ಯ ಬೋರೆ ಬೋರೆ ಮಾಡ್‌ವಕ್ ಆಗಾಂದ್ ಎಣ್ಣ್‌ಚಿ.

⁷ಅದ್ಂಗ್ ಅಯಿಂಗ: ಪಿಂಞ ಎನ್ನಂಗ್ ಮೋಶೆ ಪೊಣ್ಣ್‌ನ ಬೋಂಡಾಂದ್ ಬುಡ್‍ವಂವೊ ಒರ್ ಕಾಗದತ್‍ಲ್ ಒಳ್‍ದಿ ಕೊಡ್‍ತತೇಂಗಿ ಅವಳ ಬುಡಲೂಂದ್ ಆಜ್ಞೆ ಕೊಡ್‌ತತ್‍ೕಂದ್[53] ಕ್‍ೕಪಕ,

⁸ಯೇಸು: ನಿಂಗ ಎಚ್ಚಕ್ ಬೋದನೆ ಕ್‍ೕಟತೇಂಗಿಯು ನಿಂಗಡ ಕಠಿಣ ಹೃದಯತ್‍ರಗುಂಡ್ ಕೆಮಿ ಕೊಡ್‍ಪ್‍ಲೇಂದ್ ಮೋಶೇಕ್ ಗೊತ್ತ್ಂಜಗುಂಡ್ ಅಂವೊ ಇನ್ನನೆ ಎಣ್ಣ್‌ಚಿ. ಆಚೇಂಗಿ ದೇವ, ಲೋಕತ್‍ನ ಸೃಷ್ಟಿ ಮಾಡ್‌ವಕ ಇನ್ನನೆ ಮಾಡಿತ್‌ಲ್ಲೆ.

⁹ಒರ್ ಪೊಣ್ಣ್ ತಾಂಡ ವಡಿಯನ ಬುಟ್ಟಿತ್ ವ್ಯಬಿಚಾರ ಮಾಡ್‍ಚೇಂಗಿ, ಅವಡ ವಡಿಯ ಅವಳ ಬೋಂಡಾಂದ್ ಬುಡ್‌ವಕ್ ಕಯ್ಯು, ಅನ್ನನೆ ವ್ಯಬಿಚಾರ ಮಾಡ್‍ನ ಕಾರಣಕ್ ಅಲ್ಲತೆ ಬೋರೆ ಏದ್ ಕಾರಣಕಾಯಿತು ಒಬ್ಬ ತಾಂಡ ಪೊಣ್ಣ್‌ನ ಬುಟ್ಟ್‌ರ್‍ತೇಂಗಿ, ಅವ ವ್ಯಬಿಚಾರ ಮಾಡ್‌ವಕ್ ಇಂವೊ ಕಾರಣ ಆಪ. ಅನ್ನನೆ ಬೋಂಡಾಂದ್ ಮಾಡ್‍ನವಳ ಮಂಗಲ ಕಯಿಪಂವೊನು ವ್ಯಬಿಚಾರ ಮಾಡ್‍ವಂವೊನಾಯಿತ್‌ಪ್ಪ.

¹⁰ಅದ್ಂಗ್: ಒರ್ ವಡಿಯಂಗ್ ಪೊಣ್ಣ್‌ರ ವಿಷಯತ್‍ಲ್ ನ್ಯಾಯಪ್ರಮಾಣ ಇನ್ನನೆ ಉಂಡೇಂಗಿ ಮಂಗಲ ಆಕತೆ ಇಪ್ಪದೇ ನಲ್ಲದ್‍ೕಂದ್ ಅಂವೊಂಡ ಶಿಷ್ಯಂಗ ಎಣ್ಣ್‌ಚಿ.

¹¹ಅದ್ಂಗ್ ಯೇಸು: ಈ ಬೋದನೆನ ಎಲ್ಲಾರು ಸ್ವೀಕಾರ ಮಾಡುಲೆ, ದೇವ ದಾರ್‌ಕ್ ಈ ವರತ್‍ನ ತಪ್ಪ ಅಯಿಂಗ ಮಾತ್ರ ಇದ್‍ನ ಸ್ವೀಕಾರ ಮಾಡ್‌ವ.

¹²ಮಂಗಲ ಕಯಿಕತೆ ಇಪ್ಪಕ್ ದುಂಬ ಕಾರಣ ಉಂಡ್. ಚೆನ್ನ ಜನ ಮಂಗಲ ಕಯಿಪಕ್ ಕಯ್ಯತನೆಕೆ ಪುಟ್ಟಿತ್‌ಪ್ಪ, ಚೆನ್ನ ಜನತ್‍ನ ಮಂಗಲ ಕಯಿಕತನೆಕೆ ಬೋರೆ ಜನ ಮಾಡಿತ್‌ಪ್ಪ, ಚೆನ್ನ ಜನ ಪರಲೋಕ ರಾಜ್ಯತ್‍ರ ಸುದ್ದಿನ ಎಣ್ಣ್‌ವಕಾಯಿತ್ ಮಂಗಲ ಕಯಿಕತೆ ಇಪ್ಪ. ಈ ಬೋದನೆನ ಸ್ವೀಕಾರ ಮಾಡ್‌ವಂವೊ ಮಾಡಡ್‍ೕಂದ್ ಯೇಸು ಎಣ್ಣ್‌ಚಿ.

¹³ಚೆನ್ನ ಜನ ಚೆರಿಯ ಮಕ್ಕಳ ಕಾಕಿಯಂಡ್ ಬಂದಿತ್, ಯೇಸು ಅಯಿಂಗಡ ಮೇಲೆ ಕೈ ಬೆಚ್ಚಿತ್ ಪ್ರಾರ್ಥನೆ ಮಾಡಡ್‍ೕಂದ್ ಬಾತ್. ಆಚೇಂಗಿ ಶಿಷ್ಯಂಗ ಅನ್ನನೆ ಬಂದಯಿಂಗಕ್ ಜೋರ್ ಮಾಡ್‍ಚಿ.

¹⁴ಅಕ್ಕ ಯೇಸು: ಚೆರಿಯ ಮಕ್ಕ ನಾಡ ಪಕ್ಕ ಬರಡ್ ಅಯಿಂಗಳ ತಡೆ ಮಾಡ್‌ವಕ್ಕಾಗ. ಪರಲೋಕ ರಾಜ್ಯ ಚೆರಿಯ ಮಕ್ಕಡನೆಕೆ ಉಳ್ಳಯಿಂಗಡದ್‍ೕಂದ್ ಎಣ್ಣಿಯಂಡ್,

¹⁵ಅಯಿಂಗಡ ಮೇಲೆ ಕೈ ಬೆಚ್ಚಿತ್ ಆಶೀರ್ವಾದ ಮಾಡ್‍ಚಿ, ಪಿಂಞ ಯೇಸು ಅಲ್ಲಿಂಜ ಪೋಚಿ.

¹⁶ಒಮ್ಮ ಒರ್ ಮನುಷ್ಯ ಯೇಸುರ ಪಕ್ಕ ಬಂದಿತ್: ಉಪಾದ್ಯನೇ, ನಾಕ್ ನಿತ್ಯ ಜೀವ ಕ್‍ಟ್ಟ್‌ವಕ್ ನಾನ್ ಏದ್ ನಲ್ಲ ಕಾರ್ಯತ್‍ನ ಮಾಡಂಡೂಂದ್ ಕ್‍ೕಟತ್.

¹⁷ಅದ್ಂಗ್ ಯೇಸು: ನಲ್ಲದ್ ಎಂತದ್‍ೕಂದ್ ನನ್ನ ಎನ್ನಂಗ್ ಕ್‍ೕಪಿಯ? ದೇವ ಒಬ್ಬನೇ ನಲ್ಲಂವೊ. ಆಚೇಂಗಿ, ನೀಕ್ ನಿತ್ಯ ಜೀವ ಕ್‍ಟ್ಟ್‌ವಕ್ ನೀನ್ ಒಂದ್ ಮಾಡಂಡು. ನ್ಯಾಯಪ್ರಮಾಣ ಎಣ್ಣ್‌ನನೆಕೆ ಮಾಡಂಡೂಂದ್ ಎಣ್ಣ್‌ಚಿ.

¹⁸ಅದ್ಂಗ್ ಆ ಬಾಲೆಕಾರ: ಏದೆಲ್ಲಾಂದ್ ಕ್‍ೕಟತ್. ಅಂವೊಂಗ್: ಕೊಲೆ ಮಾಡ್‌ವಕ್ಕಾಗ, ವ್ಯಬಿಚಾರ ಮಾಡ್‌ವಕ್ಕಾಗ, ಕಪ್ಪಕ್ಕಾಗ, ದಾರ್‌ಕು ಪೊಟ್ಟ್ ಸಾಕ್ಷಿ ಎಣ್ಣುವಕ್ಕಾಗ, ದಾರ್‌ಕು ಮೋಸ ಮಾಡ್‌ವಕ್ಕಾಗ,

¹⁹ನಿಂಗ ನಿಂಗಡ ಅಪ್ಪವ್ವಂಗಕ್ ಮರ್ಯಾದೆ ಕೊಡಿ, ನೀನ್ ನಿನ್ನ ಎನ್ನನೆ ಪ್ರೀತಿ ಮಾಡ್‌ವಿಯೋ ಅನ್ನನೆ ನೀಡ ನೆರಮನೆಕಾರಳ ಪ್ರೀತಿ ಮಾಡ್‍ೕಂದ್ ಯೇಸು ಎಣ್ಣ್‌ಚಿ. [54]

²⁰ಅಕ್ಕ ಆ ಮನುಷ್ಯ: ನಾನ್ ಇದ್ಂಡ ಪ್ರಕಾರ ಇಲ್ಲಿಕತ್ತನೆ ನಡ್‌ದಂಡ್ ಬಂದಿಯೆ, ಇಂಞು ಎಂತ ನಾನ್ ಮಾಡಂಡೂಂದ್ ಕ್‍ೕಟತ್.

²¹ಅದ್ಂಗ್ ಯೇಸು: ನೀನ್ ಒರ್ ಕುತ್ತವು ಇಲ್ಲತೆ ಬದ್‍ಕಂಡೂಂದ್ ನೀಕ್ ಆಸೆ ಉಂಡೇಂಗಿ, ಮನೆಕ್ ಪೋಯಿತ್, ನೀಡ ಪಕ್ಕ ಉಳ್ಳ ಆಸ್ತಿನೆಲ್ಲ ಮಾರ್‌ವಂಜಿ ಆ ಪಣತ್‍ನ ಗರೀಬಂಗಕ್ ಕೊಡ್, ಅಕ್ಕ ಪರಲೋಕತ್‍ಲ್ ನೀಕ್ ಐಶ್ವರ್ಯ ದುಂಬಿತ್ ಕ್‍ಟ್ಟುವ, ಪಿಂಞ ನಾಡ ಬಯ್ಯ ಬಾಂದ್ ಯೇಸು ಎಣ್ಣ್‌ಚಿ.

²²ಅಂವೊ ಇದ್‍ನ ಕ್‍ೕಟಿತ್ ಬೇಜಾರತ್‍ಲ್ ಪೋಯಿರ್‌ತ್. ಎನ್ನಂಗೆಣ್ಣ್‌ಚೇಂಗಿ ಅಂವೊ ದುಂಬ ಆಸ್ತಿ ಉಳ್ಳಂವೊನಾಯಿತ್ ಇಂಜತ್.

²³ಅಕ್ಕ ಯೇಸು: ಪರಲೋಕ ರಾಜ್ಯತ್‍ಲ್ ಪೋಪಕ್ ಪಣಕಾರಂಗಕ್ ದುಂಬ ಕಷ್ಟ ಆಪಾಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣುವೀಂದ್ ಅಂವೊಂಡ ಶಿಷ್ಯಂಗಕ್ ಎಣ್ಣ್‌ಚಿ.

²⁴ಪಣಕಾರಂಗ ಪರಲೋಕ ರಾಜ್ಯಕ್ ಪೋಪಕಿಂಜ ಚೂದ್‌ರ ಕಣ್ಣ್‌ಲ್ ಒರ್ ಒಂಟೆ ನುಗ್ಗ್‌ವದ್ ಸುಲಬಾಂದ್ ಎಣ್ಣ್‌ಚಿ.

²⁵ಶಿಷ್ಯಂಗ ಇದ್‍ನೆಲ್ಲ ಕ್‍ೕಪಕ ಅಯಿಂಗಕ್ ಆಶ್ಚರ್ಯ ಆಚಿ. ಅಕ್ಕ ಅಯಿಂಗ: ಅನ್ನನಾಚೇಂಗಿ ದಾರ್‌ಕ್ ರಕ್ಷಣೆ ಕ್‌ಟ್ಟೂಂದ್ ಕ್‍ೕಟತ್.

²⁶ಯೇಸು ಅಯಿಂಗಳ ನೋಟುವಂಜಿ: ಇದ್ ಮನುಷ್ಯಗಂಕ್ ಕಯ್ಯುಲೆ, ಆಚೇಂಗಿ ದೇವಕ್ ಎಲ್ಲಾ ಕಯ್ಯೂಂದ್ ಎಣ್ಣ್‌ಚಿ.

²⁷ಅಕ್ಕ ಪೇತ್ರ ಯೇಸುನ ನೋಟಿತ್: ನೋಟ್, ನಂಗ ಎಲ್ಲಾನ ಬುಟ್ಟಿತ್ ನೀಡ ಬಯ್ಯತ್ ಬಾತ್; ನಂಗಕ್ ಎಂತ ಕ್‍ಟ್ಟ್‌ವಾಂದ್ ಕ್‍ೕಟತ್.

²⁸ಅದ್ಂಗ್ ಯೇಸು: ಮನುಷ್ಯಕುಮಾರ ಪುದಿಯ ಲೋಕತ್‍ನ ಮಾಡಿತ್ ತಾಂಡ ಮಹಿಮೇರ ಸಿಂಹಾಸನತ್‍ಲ್ ಅಳ್‌ಪಕಾಪಕ, ನಾಡ ಬೋದನೆನ ಕ್‍ೕಟಿತ್ ನಾಡ ಬಯ್ಯ ಬಂದ ನಿಂಗ ಇಸ್ರಾಯೇಲ್‍ರ ಪನ್ನೆರಂಡ್ ಕುಲತ್‍ನ ನ್ಯಾಯತೀರ್ಪ್ ಕೊಡ್‍ಪಕ್ ಪನ್ನೆರಂಡ್ ಸಿಂಹಾಸನತ್‍ರ ಮೇಲೆ ಅಳ್‌ಪಿರಾಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.

²⁹ಇದ್‍ಲ್ಲತೆ, ನಾಕಾಯಿತ್ ನಿಂಗಡ ಅಪ್ಪವ್ವನ, ನಿಂಗಡ ಅಣ್ಣತಮ್ಮಣಂಗಳ ಅಕ್ಕತಂಗೆಯಳ, ನಿಂಗಡ ಮನೆನ, ನಿಂಗಡ ತೋಟ ಬೇಲ್‍ನ ಬುಟ್ಟಿತ್ ಬಂದಯಿಂಗಕ್ ನೂರ್ ಪಾಲ್ ಜಾಸ್ತಿ ಕ್‍ಟ್ಟ್‌ವ ಪಿಂಞ ನಿತ್ಯ ಜೀವತ್‍ಲ್ ಪೋಪಕ್ ಹಕ್ಕ್‌ದಾರಂಗಳಾಯಿತ್ ಇಪ್ಪಿರ.

³⁰ಮಿಂಞತ್‍ಲ್ ಇಪ್ಪ ದುಂಬ ಜನ ಬಯ್ಯತ್ ಆಪ, ದಾರ್ ಬಯ್ಯತ್‌ಲ್ ಇಪ್ಪ ಅಯಿಂಗ ಮಿಂಞಕ್ ಬಪ್ಪ ಎಣ್ಣಿಯಂಡ್ ಯೇಸು ಎಣ್ಣ್‌ಚಿ.