Read Kodava ಮತ್ತಾಯ 2 Bible Online

ಮತ್ತಾಯ 2 - Kodava bible

ಮತ್ತಾಯ 2

¹ರಾಜನಾನ ಹೆರೋದಂಡ ದಿವಸತ್‍ಲ್ ಯೂದಾಯ ಪ್ರಾಂತ್ಯತ್‍ಲ್ ಬೇತ್ಲೆಹೇಮ್ ಎಣ್ಣುವ ಊರ್‌ಲ್ ಯೇಸು ಪುಟ್ಟ್‌ಚಿ. ಅಕ್ಕ ಕ್‍ೕಕ್ ದಿಕ್ಕಿಂಜ ಬಂದ ಚೆನ್ನ ಜ್ಞಾನಿಯಂಗ ಯೆರೂಸಲೇಮ್‌ಕ್ ಬಂತ್:

²ಯೆಹೂದ್ಯಂಗಡ ರಾಜನಾಯಿತ್ ಪುಟ್ಟ್‌ನ ಕುಂಞಿ ಎಲ್ಲಿ? ಕ್‍ೕಕ್ ದಿಕ್ಕ್‌ಲ್ ಅಂವೊಂಡ ನಕ್ಷತ್ರತ್‍ನ ಕಂಡಿತ್, ಅಂವೊನ ಆರಾದನೆ ಮಾಡ್‌ವಕ್ ನಂಗ ಬಂದಿಯೇಂದ್ ಎಣ್ಣ್‌ಚಿ.

³ಹೆರೋದ ರಾಜ ಈ ಸುದ್ದಿನ ಕ್‍ೕಪಕ, ಅಂವೊಂಡ ಮನಸ್ಸ್‌ಕ್ ಗಾಬರಿ ಆಚಿ. ಅಂವೊಂಗ್ ಮಾತ್ರ ಅಲ್ಲ ಯೆರೂಸಲೇಮ್‍ಲ್ ಉಳ್ಳಯಿಂಗಕೆಲ್ಲಾ ಗಾಬರಿ ಆಚಿ.

⁴ರಾಜ ಮುಕ್ಯ ಯಾಜಕಂಗಳ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳ ಒಕ್ಕಚೆ ಕೂಟಿತ್: ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಎಲ್ಲಿ ಪುಟ್ಟ್‌ವಾಂದ್ ಕ್‍ೕಟತ್.

⁵ಅಯಿಂಗ ರಾಜಂಗ್, ಯೂದಾಯತ್‍ರ ಬೇತ್ಲೆಹೇಮ್‌ಲ್ ಪುಟ್ಟ್‌ವಾಂದ್ ಎಣ್ಣ್‌ಚಿ. ಎನ್ನಂಗೆಣ್ಣ್‌ಚೇಂಗಿ:

⁶ಯೂದಾಯ ಪ್ರಾಂತ್ಯತ್‍ರ ಬೇತ್ಲೆಹೇಮೇ, ಯೆಹೂದ್ಯಂಡ ಅದಿಕಾರತ್ ನೀ ಚೆರಿಯದಲ್ಲ; ನಾಡ ಇಸ್ರಾಯೇಲ್ ಜನಳ ಆಳುವ ಅದಿಪತಿ ನೀಡಗುಂಡ್ ಪುಟ್ಟ್‌ವಾಂದ್ ಪ್ರಾವಾದಿಯ[4] ಒಳ್‍ದಿತುಂಡ್‍ೕಂದ್ ಎಣ್ಣ್‌ಚಿ.

⁷ಅಕ್ಕ ಹೆರೋದ ರಾಜ ಅಲ್ಲಿಕ್ ಬಂದ ಜ್ಞಾನಿಯಳ ಗುಟ್ಟಾಯಿತ್ ಕಾಕಿತ್: ಅಯಿಂಗ ಏದ್ ಸಮಯತ್‍ಲ್ ನಕ್ಷತ್ರತ್‍ನ ಕಂಡತ್‍ೕಂದ್ ಕ್‍ೕಟತ್.

⁸ನಿಂಗ ಬೆತ್ಲೆಹೇಮ್‍ಕ್ ಪೋಯಿತ್ ಆ ಕುಂಞಿ ಎಲ್ಲಿ ಉಂಡ್‍ೕಂದ್ ತ್‍ೕಡಿ, ಆ ಕುಂಞಿನ ನಿಂಗ ಕಂಡ ಪಿಂಞ ನಾಕ್ ಎಣ್ಣಿ. ನಾನ್ ಸಹ ಪೋಯಿತ್ ಆ ಕುಂಞಿನ ಆರಾದನೆ ಮಾಡ್‌ವೀಂದ್ ಅಯಿಂಗಕ್ ಎಣ್ಣ್‌ಚಿ.

⁹ರಾಜ ಎಣ್ಣ್‌ನಾನ ಕ್‍ೕಟಿತ್ ಅಲ್ಲಿಂಜ ಪೋಪಕ, ಅಯಿಂಗ ಕ್‍ೕಕ್ ದಿಕ್ಕ್‌ಲ್ ಕಂಡ ಆ ನಕ್ಷತ್ರ ಅಯಿಂಗಡ ಮಿಂಞತ್ ಪೋಯಂಡ್ ಕುಂಞಿ ಇಂಜ ಜಾಗಕ್ ಬಂತ್ ನಿಂದತ್.

¹⁰ಅಯಿಂಗ ಆ ನಕ್ಷತ್ರತ್‍ನ ಕಾಂಬಕ ದುಂಬ ಕುಶಿಪಟ್ಟತ್.

¹¹ಅಯಿಂಗ ಆ ಮನೆರ ಒಳ್‍ಕ್ ಪೋಪಂಜಿ ಅಲ್ಲಿ ಆ ಕುಂಞಿನೂ ಕುಂಞಿರ ಅವ್ವ ಮರಿಯಳನೂ ಕಂಡತ್. ಕಂಡ ಪಿಂಞ ಅಯಿಂಗ ಮೊಣಕಾಲ್ ಊರಿತ್ ಅಂವೊನ ಆರಾದನೆ ಮಾಡ್‍ಚಿ. ಅಯಿಂಗ ಗಂಟ್‍ನ ತೊರಂದಿತ್ ಪೊನ್ನ್, ದೂಪ, ರಕ್ತಬೋಳನೆಲ್ಲ ಕೊಡ್‍ತತ್.

¹²ಪಿಂಞ ದೇವ ಅಯಿಂಗಕ್ ಸ್ವಪ್ನತ್‌ಲ್: ನಿಂಗ ಹೆರೋದ ರಾಜಂಡ ಪಕ್ಕ ಪೋಂಡಾಂದ್ ಎಚ್ಚರ ಮಾಡ್‍ನಗುಂಡ್ ಅಯಿಂಗ ಅಲ್ಲಿಂಜ ಬೋರೆ ಬಟ್ಟೇಕಾಲೆ ಅಯಿಂಗಡ ಊರ್‌ಕ್ ಪೋಚಿ.

¹³ಅಯಿಂಗ ಅಲ್ಲಿಂಜ ಪೋನ ಪಿಂಞ ಒಡೆಯಂಡ ದೂತ ಯೋಸೇಫಂಗ್ ಸ್ವಪ್ನತ್‌ಲ್ ಕಾಂಬ್‌ಚಿಟ್ಟಂಡ್: ಹೆರೋದ ರಾಜ, ಕುಂಞಿನ ಕೊಲ್ಲುವಕ್ ನೋಟುವ. ನೀನ್ ನೀಡ ಕುಂಞಿನ ಪಿಂಞ ಕುಂಞಿರ ಅವ್ವನ ಕಾಕಿಯಂಡ್ ಐಗುಪ್ತ ದೇಶಕ್ ಪೋಯಿತ್ ಬಚಾವ್ ಆಯಿರ್. ನಾನ್ ಎಣ್ಣ್‌ವಕತ್ತನೆ ಅಲ್ಲಿ ಇರ್‍ೕಂದ್ ಎಣ್ಣ್‌ಚಿ.

¹⁴ಯೋಸೇಫ ವರ್‌ಕ್ಂಜ ಎದ್ದಿತ್ ಕುಂಞಿನ ಪಿಂಞ ಅವ್ವನ ಕಾಕಿಯಂಡ್ ಬಯಿಟೇ ಐಗುಪ್ತ ದೇಶಕ್ ಪೋಯಿತ್,

¹⁵ಹೆರೋದ ರಾಜ ಚತ್ತ್‌ಪೋಪಕತ್ತನೆ ಅಲ್ಲೇ ಇಂಜತ್. ಐಗುಪ್ತ ದೇಶತ್ಂಜ ನಾಡ ಮೋಂವೊನ ಬಪ್ಪ್‌ಚಿಟ್ಟತ್‍ೕಂದ್ ಪ್ರವಾದಿಯಡ ಮೂಲಕ ದೇವ ಎಣ್ಣ್‌ನದ್[5] ನೆರೆವೇರುವನೆಕೆ ಇನ್ನನೆ ಆಚಿ.

¹⁶ಜ್ಞಾನಿಯ ಅಂವೊಂಗ್ ಮೋಸ ಮಾಡಿತ್ ಬೋರೆ ಬಟ್ಟೇಕಾಲೆ ಪೋಯಿರ್‌ತ್‍ೕಂದ್ ಗೊತ್ತಾನ ಪಿಂಞ, ಹೆರೋದ ರಾಜಂಗ್ ದುಂಬ ಚೆಡಿ ಬಾತ್. ತಾಂಡ ಜನತ್‍ನ ಅಯಿಚಿತ್, ಜ್ಞಾನಿಯಡ ಪಕ್ಕ ವಿಚಾರ ಮಾಡ್‍ನ ಕಾಲಕ್ ಸರಿಯಾಯಿತ್ ಬೆತ್ಲಹೇಮ್ ಪಿಂಞ ಅದ್ಂಡ ಸುತ್ತ್‌ಮುತ್ತ್‌ಲ್ ಉಳ್ಳ ದಂಡ್ ವಯಸ್‍ಕ್ ಒಳ್‍ಲ್ ಉಳ್ಳ ಎಲ್ಲಾ ಕ್‍ಣ್ಣ ಕುಂಞಿಯಳ ಕೊಲ್ಲಂಡೂಂದ್ ಹುಕುಮ್ ಕೊಡ್‍ತತ್.

¹⁷ಯೆರೆಮೀಯನೆಂಬ ಪ್ರವಾದಿ ಎಣ್ಣ್‌ನ ತಕ್ಕ್ ಆ ಕಾಲತ್‍ಲ್ ನೆರೆವೇರ್‍ಚಿ. ಅದ್ ಎಂತ ಎಣ್ಣ್‌ಚೇಂಗಿ:

¹⁸ರಾಮ ಎಣ್ಣುವ ಜಾಗತ್‍ಲ್ ನೆರ್‍ಕುವ ವಾಣಿ ಕ್‍ೕಟತ್. ಮೊರಡ್‍ವದ್ ಪಿಂಞ ಗೋಳಾಟ ಜಾಸ್ತಿ ಆಚಿ. ರಾಹೇಲ[6] ತಾಂಡ ಮಕ್ಕಕಾಯಿತ್ ಮೊರಟತ್[7]. ಅಯಿಂಗ ಇಲ್ಲತೆ ಪೋನಾಂಗ್ ಸಮಾದಾನಯಿಲ್ಲತೆ ಇಂಜತ್.

¹⁹ಹೆರೋದ ರಾಜ ಚತ್ತ್‌ಪೋನ ಪಿಂಞ ಐಗುಪ್ತತ್‍ಲ್, ಒಡೆಯಂಡ ದೂತ ಯೋಸೇಫಂಗ್ ಸ್ವಪ್ನತ್‌ಲ್ ಕಾಂಬ್‌ಚಿಟ್ಟಂಡ್:

²⁰ಏಳ್, ನೀಡ ಕುಂಞಿನ ಪಿಂಞ ಅದ್ಂಡ ಅವ್ವನ ಕಾಕಿತ್ ಇಸ್ರಾಯೇಲ್ ದೇಶಕ್ ಪೋ. ಕುಂಞಿನ ಕೊಲ್ಲ್‌ವಕ್ ನೋಟಿಯಂಡಿಂಜ ಜನ ಚತ್ತ್ ಪೋಚೀಂದ್ ಎಣ್ಣ್‌ಚಿ.

²¹ಆನಗುಂಡ್, ಯೋಸೇಫ ಕುಂಞಿ ಪಿಂಞ ಅವ್ವನ ಕಾಕಿಯಂಡ್ ಇಸ್ರಾಯೇಲ್‍ಕ್ ಪೋಚಿ.

²²ಆಚೇಂಗಿ ಅಲ್ಲಿ ಪೋಯಿತ್, ಹೆರೋದ ರಾಜಂಡ ಮೋಂವೊ ಅರ್ಖೆಲಾಯ ಎಣ್ಣ್‌ವಂವೊ ಯೆಹೂದ್ಯ ಪ್ರಾಂತ್ಯತ್‍ರ ರಾಜನಾಯಿತ್ ಉಂಡ್‍ೕಂದ್ ಗೊತ್ತಾನ ಪಿಂಞ ಯೋಸೇಫಂಗ್ ದುಂಬ ಪೋಡಿ ಆಚಿ. ಪುನಃ ಯೋಸೇಫಂಗ್ ಸ್ವಪ್ನತ್‌ಲ್ ಎಂತ ಮಾಡಂಡೂಂದ್ ಎಚ್ಚರ ಕ್‍ಟ್ಟ್‌ಚಿ.

²³ಆನಗುಂಡ್ ಅಂವೊ ನಜರೇತ್ ಎಣ್ಣುವ ಊರ್‌ಕ್ ಪೋಯಿತ್ ವಾಸಮಾಡ್‍ಚಿ. ಅಂವೊನ ನಜರೇತ್ ಎಣ್ಣುವ ಊರ್‌ಕ್ ಕೂಡ್‍ನಂವೋಂದ್ ಕಾಕ್‍ವಾಂದ್ ಪ್ರವಾದಿಯಂಗ ಎಣ್ಣ್‌ನದ್ ಪೂರ್ತಿ ಆಪನೆಕೆ ಇನ್ನನೆ ನಡ್ಂದತ್.