Read Kodava ಮತ್ತಾಯ 20 Bible Online

ಮತ್ತಾಯ 20 - Kodava bible

ಮತ್ತಾಯ 20

¹ಪರಲೋಕ ರಾಜ್ಯ ಎನ್ನನೆ ಎಣ್ಣ್‌ಚೇಂಗಿ, ಒರ್ ಮನೆರ ಎಜಮಾನ, ಅಂವೊಂಡ ತೋಟತ್‍ಲ್ ಪಣಿಕ್ ಆಳ್‍ವಳ ಕಾಕಿಯಂಡ್ ಬಪ್ಪಕ್ ಪೊಲಾಕಲೆ ಪೋಚಿ.

²ಅಂವೊ ಅಯಿಂಗಕ್ ಒರ್ ದಿವಸತ್‍ರ ಕೂಲಿಯಾಯಿತ್ ಒರ್ ಬೊಳ್ಳಿರ ನಾಣ್ಯತ್‍ನ ತಪ್ಪೀಂದ್ ಎಣ್ಣಿತ್ ಕೆಲಸಕ್ ಕಾಕಿಯಂಡ್ ಬಾತ್.

³ಒಯಿಂಬದ್ ಗಂಟೆಕ್ ಅಂವೊ ಪೊರಮೆ ಪೋಪಕ ಚತ್ತೆಲ್ ಚೆನ್ನ ಆಳ್‌ವ ಮುಂಡತೆ ನಿಂದಂಡಿಪ್ಪದ್‌ನ ಕಂಡಿತ್,

⁴ನಾಡ ದ್ರಾಕ್ಷಿ ತೋಟಕ್ ಪೋಯಿತ್ ಕೆಲಸ ಮಾಡಿ ನಿಂಗಕ್ ತಕ್ಕಂತ ಕೂಲಿನ ತಪ್ಪೀಂದ್ ಎಣ್ಣಿತ್ ಅಯಿಂಗಳ ಅಯಿಚತ್.

⁵ಅಕ್ಕ ಅಯಿಂಗ ಪೋಚಿ. ಪುನಃ ಮಜ್ಜಣ ಮೂಂದ್ ಗಂಟೆಕು ಅನ್ನನೆ ಮಾಡ್‍ಚಿ.

⁶ಅಂಜ್ ಗಂಟೆಕ್ ಅಂವೊ ಪುನಃ ಪೇಟೇಲ್ ಇಪ್ಪಕ ಇಂಞು ಚೆನ್ನ ಆಳುವಳ ಕಂಡಿತ್, ಎನ್ನಂಗ್ ನಿಂಗ ಪೂರ್ತಿ ದಿವಸ ಕೆಲಸ ಮಾಡತೆ ಸಮಯತ್‍ನ ಕಳೆಂದಂಡ್ ಉಳ್ಳಿರಾಂದ್ ಕ್‍ೕಟತ್.

⁷ಅದ್ಂಗ್ ಅಯಿಂಗ: ನಂಗಳ ದಾರೂ ಕೆಲಸಕ್ ಕಾಕಿತ್‌ಲ್ಲೇಂದ್ ಎಣ್ಣ್‌ಚಿ. ಅಕ್ಕ ಅಂವೊ ಅಯಿಂಗಳ ನೋಟಿತ್: ಅನ್ನನಾಚೇಂಗಿ ನಿಂಗಳು ನಾಡ ತೋಟತ್‍ಲ್ ಪಣಿಕ್ ಪೋಯೀಂದ್ ಅಯಿಚತ್.

⁸ಬಯಿಟಾಪಕ ದ್ರಾಕ್ಷಿ ತೋಟತ್‍ರ ಎಜಮಾನ ಅಂವೊಂಡ ಮೇಸ್ತ್ರಿನ ಕಾಕಿತ್ ಎಲ್ಲಾರ್‌ಕು ಕೂಲಿ ಕೊಡ್‍ಪಕ್ ಎಣ್ಣ್‌ಚಿ. ಬಯ್ಯ ಬಂದಯಿಂಗಕು ಆದ್ಯವಾಯಿತ್ ಬಂದಯಿಂಗಕು ಕೊಡ್‍ಪಕ್ ಎಣ್ಣ್‌ಚಿ.

⁹ಅಂಜ್ ಗಂಟೆಕ್ ಕೆಲಸಕ್ ಬಂದಯಿಂಗಕ್ ಒರ್ ದಿವಸತ್‍ರ ಕೂಲಿಯಾಯಿತ್ ಒರ್ ಬೊಳ್ಳಿರ ನಾಣ್ಯ ಕ್‍ಟ್ಟ್‌ಚಿ.

¹⁰ಅಕ್ಕ, ಪೊಲಾಕಲೆ ಪಣಿಕ್ ಬಂದಯಿಂಗ, ಅಲ್ಲಿ ಬಂದಿತ್ ನಂಗಕ್ ಚೆನ್ನ ಜಾಸ್ತಿ ಕ್‍ಟ್ಟ್‌ವಾಂದ್ ಗೇನ ಮಾಡ್‍ಚಿ. ಆಚೇಂಗಿ ಅಯಿಂಗಕ್ ಸಹ ಒರ್ ಬೊಳ್ಳಿರ ನಾಣ್ಯತ್‍ನ ಕೊಡ್‍ತತ್.

¹¹ಅಯಿಂಗ ಆ ದುಡ್ಡ್‌ನ ಎಡ್‍ತಂಡ್ ಎಜಮಾನಂಗ್:

¹²ಬಯ್ಯ ಬಂದ ಈಂಗ ಒರ್ ಗಂಟೆ ಮಾತ್ರ ಕೆಲಸ ಮಾಡ್‍ಚಿ. ಆಚೇಂಗಿ ನಂಗ ಪೊಲಾಕಯಿಂಜ ಬೆದ್‍ಲ್ ಕಷ್ಟಪಟ್ಟಿತ್ ಕೆಲಸ ಮಾಡಿಯೆ, ನಂಗಳ ಈಂಗಕ್ ಸರಿಸಮವವಾಯಿತ್ ಮಾಡಿರಲ್ಲಾಂದ್ ಗೊಣಗ್‍ಚಿ.

¹³ಅಕ್ಕ ಎಜಮಾನ, ಅಯಿಂಗಡಲ್ಲಿ ಇಂಜ ಒಬ್ಬಂಗ್: ಸ್ನೇಹಿತನೇ, ನಾನ್ ನೀಕ್ ಮೋಸ ಮಾಡಿತ್‌ಲ್ಲೆ. ನೀನ್ ನಾಡ ಪಕ್ಕ ಒರ್ ಬೊಳ್ಳಿರ ನಾಣ್ಯಕ್ ಒತ್ತಂಡಿಯಲ್ಲಾ?

¹⁴ನೀಡ ದುಡ್ಡ್‌ನ ಎಡ್‍ತಂಡ್ ಪೋ. ಕಡೇಕ್ ಬಂದ ಈಂಗಕ್, ನೀಕ್ ಕೊಡ್‍ತಚ್ಚಕೇ ಕೊಡ್‍ಪದ್ ನಾಡ ಇಷ್ಟ.

¹⁵ನಾಡ ಪಣತ್‍ನ ನಾಕ್ ಕುಶಿ ಆಪನೆಕೆ ಮಾಡ್‌ವಕ್ ನಾಕ್ ಹಕ್ಕ್ ಇಲ್ಲೆಯಾ? ಅಥವ, ನಾಕ್ ಉದಾರ ಮನಸ್ಸ್ ಉಳ್ಳಾಂಗ್ ನೀಕ್ ಹೊಟ್ಟೆಕಿಚ್ಚಾ?

¹⁶ಅನ್ನನೆ, ದಾರ್ ಮಿಂಞತ್‍ಲ್ ಉಂಡೋ ಅಯಿಂಗ ಬಯ್ಯತ್ ಆಯಿಪೋಪ. ಬಯ್ಯತ್ ಉಳ್ಳಯಿಂಗ ಮಿಂಞಕ್ ಇಪ್ಪಾಂದ್ ಯೇಸು ಎಣ್ಣ್‌ಚಿ.

¹⁷ಯೇಸು ಯೆರೂಸಲೇಮ್‌ಕ್ ಪೋಪಕಾಪಕ, ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಕಾಕುವಂಜಿ, ಅಂವೊಂಗ್ ಎಂತ ನಡ್‌ಪಾಂದ್ ಎಣ್ಣ್‌ಚಿ.

¹⁸ನಂಗ ಯೆರೂಸಲೇಮ್‌ಕ್ ಎತ್ತ್‌ವಕ, ಮನುಷ್ಯಕುಮಾರನ ಪುಡ್‌ಚಿತ್ ಮುಕ್ಯ ಯಾಜಕಂಗಡ ಕೈಯಿಕೂ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡ ಕೈಯಿಕೂ ಪುಡ್‌ಚಿತ್ ಕೊಡ್‍ಪ.

¹⁹ಅಯಿಂಗ ಕೊಲ್ಲ್‌ವಕ್ ಒಪ್ಪ್‌ಚಿಡ್‌ವ. ಅಯಿಂಗ ಅಂವೊನ ನಾನಾತರ ಬೈಗಳ ಬೈಯುವ, ಚಾಟಿಲ್ ಪೊಯ್ಯುವ, ಪಿಂಞ ಶಿಲುಬೇಕ್ ಇಡ್‌ವಕಾಯಿತ್ ಯೆಹೂದ್ಯಂಗಲ್ಲತಯಿಂಗಡ ಕೈಯಿಕ್ ಒಪ್ಪ್‌ಚಿಡ್‌ವ. ಆಚೇಂಗಿ ಮೂಂದನೆ ದಿನ ಚಾವ್‍ಯಿಂಜ ಜೀವವಾಯಿತ್ ಅಂವೊ ಏವಾಂದ್ ಎಣ್ಣ್‌ಚಿ.

²⁰ಅಕ್ಕ ಜೆಬೆದಾಯಂಡ ಪೊಣ್ಣ್ ಅವಡ ದಂಡ್ ಮಕ್ಕಳ ಯೇಸುರ ಪಕ್ಕ ಕಾಕಿಯಂಡ್ ಬಂದಿತ್, ಅಂವೊಂಡ ಪಕ್ಕ ಒರ್ ಸಹಾಯ ಕ್‍ೕಪಕಾಯಿತ್ ಮೊಣಕಾಲ್ ಇಟ್ಟತ್.

²¹ಅಕ್ಕ ಯೇಸು ಅವಳ ನೋಟಿತ್: ನೀಡ ಬೋಡಿಕೆ ಎಂತ್‍ೕಂದ್ ಕ್‍ೕಟತ್. ಅಕ್ಕ ಅವ: ನಾಡ ಈ ದಂಡ್ ಮಕ್ಕಳ, ನೀನ್ ನೀಡ ರಾಜ್ಯತ್‍ಲ್ ಇಪ್ಪಕ, ಒಬ್ಬನ ನೀಡ ಬಲ್‌ತೆ ಬರಿಲ್ ಇಂಞೊಬ್ಬನ ನೀಡ ಎಡ್‍ತೆ ಬರಿಲ್ ಅಳ್‍ಪನೆಕೆ ಮಾಡ್‍ೕಂದ್ ಎಣ್ಣ್‌ಚಿ.

²²ಅದ್ಂಗ್ ಯೇಸು: ನೀನ್ ಎಂತಾನ ಕ್‍ೕಟಂಡುಳ್ಳಿಯಾಂದ್ ನೀಕ್ ಗೊತ್ತ್‌ಲ್ಲೆ. ನಾನ್ ಕುಡಿಪಕುಳ್ಳ ಕಷ್ಟತ್‍ರ ಪಾತ್ರತ್‍ನ[55] ನೀನ್ ಕುಡಿಪಕಯ್ಯುವಾಂದ್ ಕ್‍ೕಟತ್. ಅಕ್ಕು, ನಂಗಕ್ ಕಯ್ಯೂಂದ್ ಎಣ್ಣ್‌ಚಿ.

²³ಅಯಿಂಗಕ್ ಯೇಸು: ನಿಂಗ ನೇರಾಯಿತು ನಾನ್ ಕುಡಿಪ ಕಷ್ಟತ್‍ರ ಪಾತ್ರತ್‍ನ ಕುಡಿಪಿರ. ಆಚೇಂಗಿ ನಾಡ ಬಲ್‌ತೆ ಬರಿಲ್ ಪಿಂಞ ಎಡ್‍ತೆ ಬರಿಲ್ ದಾರ್ ಅಳ್‍ಕಂಡೂಂದ್ ಎಣ್ಣ್‌ವಕ್ ನಾಕ್ ಅದಿಕಾರ ಇಲ್ಲೆ. ಆ ಜಾಗತ್‍ನ ದಾರ್‌ಕ್ ನಾಡ ಅಪ್ಪ ಆಯ್ಕೆ ಮಾಡಿತುಂಡೋ ಅಯಿಂಗಕಾಯಿತ್ ಬೆಚ್ಚಿತುಂಡ್‍ೕಂದ್ ಎಣ್ಣ್‌ಚಿ.

²⁴ಯಾಕೋಬ ಪಿಂಞ ಯೋಹಾನ ಎಣ್ಣ್‌ನದ್‍ನ ಕ್‍ೕಟಿತ್ ಬೋರೆ ಪತ್ತ್ ಶಿಷ್ಯಂಗಕ್ ಚೆಡಿ ಬಾತ್.

²⁵ಯೇಸು ಅಯಿಂಗಳೆಲ್ಲ ತಾಂಡ ಪಕ್ಕ ಕಾಕುವಂಜಿ, ಈ ಲೋಕತ್‍ನ ಆಳುವಯಿಂಗ ಅಯಿಂಗಯಿಂಗಡ ಜನಳ ಆಂಗಾರತ್‍ಲ್ ಆಳುವ, ಪಿಂಞ ಅಯಿಂಗಡ ಅದಿಕಾರಿಯಂಗ ಅಯಿಂಗಡ ಮೇಲೆ ಬಲತ್ಕಾರತ್‌ಲ್ ಅದಿಕಾರ ಮಾಡ್‍ವದ್ ನಿಂಗಕ್ ಗೊತ್ತುಂಡ್.

²⁶ಆಚೇಂಗಿ ನಿಂಗಡ ಒಳ್‍ಲ್ ಅನ್ನನೆ ಇಪ್ಪಕ್ಕಾಗ. ನಿಂಗಡಲ್ಲಿ ದಾರ್‌ಕ್ ಬಲ್ಯಂವೊನಾಯಿತ್ ಇಪ್ಪಕ್ ಕುಶಿಯುಂಡೋ ಅಂವೊ ಎಲ್ಲಾರ್‌ಕು ಅಡಿಯಾಳಾಯಿತ್ ಸೇವೆ ಮಾಡ್‌ವನೆಕೆ ಇಕ್ಕಂಡು.

²⁷ಪಿಂಞ ನಿಂಗಡಲ್ಲಿ ದಾರ್‌ಕ್ ಮಿಂಞತ್ ಇಪ್ಪಕ್ ಕುಶಿ ಉಂಡೋ, ಅಯಿಂಗ ನಿಂಗಕ್ ಆಳಾಯಿತ್ ಇಕ್ಕಂಡು.

²⁸ಅನ್ನನೆ, ಮನುಷ್ಯಕುಮಾರ ಸಹ ಬೋರೆಯಿಂಗಡಿಂಜ ಸೇವೆ ಮಾಡ್‌ಚಿಟ್ಟ್‌ವಕಾಯಿತ್ ಬಂದಿತ್ತ್‌ಲ್ಲೆ. ಆಚೇಂಗಿ ಸೇವೆ ಮಾಡ್‌ವಕಾಯಿತು, ದುಂಬ ಜನಳ ಬುಡ್‍ಗಡೆ ಮಾಡ್‌ವಕ್ ತಾಂಡ ಜೀವತ್‍ನ ಕೊಡ್‍ಪಕಾಯಿತು ಬಂದಿಯೇಂದ್ ಎಣ್ಣ್‌ಚಿ.

²⁹ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಯೆರಿಕೋಯಿಂಜ ಪೋಪಕ ಬಲ್ಯ ಜನಡ ಗುಂಪ್ ಅಯಿಂಗಡ ಬಯ್ಯತ್ ಪೋಚಿ.

³⁰ಅಕ್ಕ ಬಟ್ಟೆ ಬರಿಲ್ ಅಳ್‌ತಂಡಿಂಜ ದಂಡ್ ಕುರ್‌ಡಂಗಕ್ ಯೇಸು ಈಲೆ ಪೋಯಂಡ್ ಉಂಡ್‍ೕಂದ್ ಗೊತ್ತಾಚಿ. ಅಕ್ಕ ಅಯಿಂಗ, ಒಡೆಯನೇ, ದಾವೀದಂಡ ಮೋಂವೊನೇ, ನಂಗಡ ಮೇಲೆ ಕನಿಕರ ಕಾಟ್‍ೕಂದ್ ಜೋರಾಯಿತ್ ಕೂತ್ ಕೊಡ್‍ತತ್.

³¹ಜನಡ ಗುಂಪ್, ಅಯಿಂಗಕ್ ಮುಂಡತೆ ಇರೀಂದ್ ಜೋರ್ ಮಾಡ್‍ಚಿ. ಆಚೇಂಗಿ ಅಯಿಂಗ ಇಂಞು ಜೋರಾಯಿತ್ ಒಡೆಯನಾನ ದಾವೀದಂಡ ಮೋಂವೊನೇ ನಾಡ ಮೇಲೆ ದಯಕಾಟ್‍ೕಂದ್ ಕೂತ್ ಕೊಡ್‍ಪಕ್ ಸರುಮಾಡ್‌ಚಿ.

³²ಯೇಸು ನಿಪ್ಪಂಜಿ ಅಯಿಂಗಳ ಕಾಕಿತ್: ನಿಂಗಕ್ ನನ್ನಗುಂಡ್ ಎಂತಾಂಡೂಂದ್ ಕ್‍ೕಟತ್.

³³ಅದ್ಂಗ್ ಅಯಿಂಗ: ಒಡೆಯನೇ ನಂಗಕ್ ಕಣ್ಣ್ ಕಾಂಬನೆಕೆ ಮಾಡ್‍ೕಂದ್ ಎಣ್ಣ್‌ಚಿ.

³⁴ಯೇಸುಕ್ ಬಾರಿ ಕನಿಕರ ಆಚಿ. ಅಯಿಂಗಡ ಕಣ್ಣ್‌ನ ಮುಟ್ಟ್‌ಚಿ. ಒಡನೆ ಅಯಿಂಗಕ್ ಕಣ್ಣ್ ಕಾಂಬಕಾಚಿ, ಅಯಿಂಗ ಯೇಸುರ ಬಯ್ಯತ್ ಪೋಚಿ.