Read Kodava ಮತ್ತಾಯ 21 Bible Online

ಮತ್ತಾಯ 21 - Kodava bible

ಮತ್ತಾಯ 21

¹ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಯೆರೂಸಲೇಮ್‍ರ ಆಲಿವ್ ಕುಂದ್‌ರ ಪಕ್ಕತ್‍ಲ್ ಇಂಜ ಬೇತ್ಫಗೆ ಊರ್‌ರ ಪಕ್ಕ ಬಪ್ಪಕ,

²ಅಲ್ಲಿ ಯೇಸು ದಂಡ್ ಶಿಷ್ಯಂಗಳ ಕಾಕುವಂಜಿ, ನಿಂಗಕ್ ಎದ್‍ರ್‌ಲ್ ಉಳ್ಳ ಊರ್‌ಕ್ ಪೋಯಿತ್, ಅಲ್ಲಿ ಎತ್ತ್‌ವಕ ಒರ್ ಕತ್ತೆ ಪಿಂಞ ಅದ್ಂಡ ಕುಟ್ಟಿನ ಕೆಟ್ಟಿತಿಪ್ಪದ್‌ನ ಕಾಂಬಿರ; ಆ ಕತ್ತೆ ಪಿಂಞ ಆಂಡ ಕುಟ್ಟಿನ ಉತ್ತ್‌ವಂಜಿ ನಾಡ ಪಕ್ಕ ಎಡ್‍ತಂಡ್ ಬಾರಿ.

³ಜನ ಕ್‍ೕಟತೇಂಗಿ, ಅದ್ ಒಡೆಯಂಗ್ ಬೋಂಡೂಂದ್ ಎಣ್ಣಿ, ಅಕ್ಕ ಅಯಿಂಗ ಒಡನೆ ಅದ್‍ನ ಅಯಿಚ್‍ರುವ.

⁴ಒರ್ ಪ್ರವಾದಿ ಪ್ರವಾದನೆ ಎಣ್ಣ್‌ನದ್ ನೆರೆವೇರ್‌ವನೆಕೆ ಇದ್ ನಡ್ಂದತ್. ಅದ್ ಎಂತ ಎಣ್ಣ್‌ಚೇಂಗಿ:

⁵ಚೀಯೋನ್‍ರ ಮಕ್ಕಕ್[56] ಎಣ್ಣಿ, ನೋಟಿ ನಿಂಗಡ ರಾಜ ನಿಂಗಡ ಪಕ್ಕ ಬಂದಂಡ್ ಉಂಡ್, ಅಂವೊ ಶಾಂತ ಗುಣ ಉಳ್ಳಂವೊನಾಯಿತು ಕತ್ತೆರ ಮೇಲೆ, ಅಕ್ಕು ಕತ್ತೆ ಕುಟ್ಟಿರ ಮೇಲೆ ಬಪ್ಪಾಂದ್ ಎಣ್ಣ್‌ವದೇ.[57]

⁶ದಂಡ್ ಶಿಷ್ಯಂಗಳು ಯೇಸು ಎಣ್ಣ್‌ನನೆಕೆ ಮಾಡ್‍ಚಿ.

⁷ಅಯಿಂಗ ಕತ್ತೆನ ಪಿಂಞ ಕತ್ತೆ ಕುಟ್ಟಿನ ಕಾಕಿಯಂಡ್ ಬಂತ್ ಅದ್ಂಡಮೇಲೆ ಅಯಿಂಗಡ ಬಟ್ಟೇನ ಬಿರಿಚತ್. ಪಿಂಞ ಯೇಸು ಅದ್ಂಡಮೇಲೆ ಅಳ್‌ತತ್.

⁸ಬಲ್ಯ ಜನಡ ಗುಂಪ್ ಯೇಸುಕ್ ಮರ್ಯಾದೆ ತಪ್ಪಕಾಯಿತ್ ಅಯಿಂಗಡ ವಸ್ತ್ರತ್‍ನ ನಡ್‍ಪ ಬಟ್ಟೇಲ್ ಯೇಸುರ ಮಿಂಞತ್ ಬಿರಿಚತ್. ಚೆನ್ನ ಜನ ಮರತ್‍ರ ಕೊಂಬ್‍ನ ಕೆತ್ತುವಂಜಿ ಬಟ್ಟೇಲ್ ಬಿರಿಚತ್. ಅಂವೊ ಜನಡ ಮದ್ಯತ್‍ಲ್ ಇಪ್ಪಕ,

⁹ಅಂವೊಂಡ ಸುತ್ತ್‌ಲ್ ಇಂಜ ಜನ ಇನ್ನನೆ ಕೂತ್ ಕೊಡ್‍ತತ್. ದಾವೀದಂಡ ಮೋಂವೊಂಗ್ ಹೊಸನ್ನ![58] ಒಡೆಯನಾನ ದೇವಡ ಪೆದತ್‍ಲ್ ಬಪ್ಪಂವೊಂಗ್ ಆಶೀರ್ವಾದ! ಪರಲೋಕತ್‍ಲ್ ಹೊಸನ್ನಾಂದ್ ಕೂತ್ ಕೊಡ್‍ತತ್.[59]

¹⁰ಯೇಸು ಯೆರೂಸಲೇಮ್‌ಕ್ ಎತ್ತ್‌ವಕ ಪಟ್ಟಣತ್‍ಲ್ ದುಂಬ ಕಲಹವಾಯಿತ್ ಇಂವೊ ದಾರ್‍ೕಂದ್ ಕ್‍ೕಟತ್.

¹¹ಇಂವೊ ಗಲಿಲಾಯತ್‍ಲ್ ಉಳ್ಳ ನಜರೇತ್‍ರ ಪ್ರವಾದಿ ಯೇಸೂಂದ್ ಎಣ್ಣ್‌ಚಿ.

¹²ಯೇಸು ದೇವಾಲಯತ್‍ರ ಒಳ್‍ಕ್ ಪೋಯಿತ್, ಅಲ್ಲಿ ವ್ಯಾಪಾರ ಮಾಡಿಯಂಡಿಂಜ ಜನಳೆಲ್ಲಾ ಓಡ್‌ಚಿಟ್ಟತ್. ದುಡ್ಡ್‌ನ ಬದ್‍ಲ್ ಮಾಡಿಯಂಡಿಂಜ ಜನತ್‍ರ ಮೇಜಿನ ಪಿಂಞ ಪಾರಿವಾಳ ಪಕ್ಷಿನ ಮಾರ್‌ವಯಿಂಗಡ ಕುರ್ಚಿನ ಮುರ್‌ಚಿತ್ ಇಟ್ಟತ್.

¹³ನಾಡ ಮನೆ ಪ್ರಾರ್ಥನೆರ ಮನೆಯಾಯಿತ್ ಇಪ್ಪಾಂದ್ ಒಳ್‌ದಿತುಂಡಲ್ಲಾ,[60] ಆಚೇಂಗಿ ನಿಂಗ ಅದ್‍ನ ಕಳ್ಳಂಗಡ ಗುಹೆರನೆಕೆ ಮಾಡಿರಾಂದ್ ಎಣ್ಣ್‌ಚಿ.[61]

¹⁴ಅಕ್ಕ ಕುರ್‌ಡಂಗ ಪಿಂಞ ಕುಂಟಂಗ ಯೇಸುರ ಪಕ್ಕ ಬಾತ್. ಅಂವೊ ಅಯಿಂಗಳೆಲ್ಲ ದೇವಾಲಯತ್‍ಲ್ ವಾಸಿ ಮಾಡ್‍ಚಿ.

¹⁵ಮುಕ್ಯ ಯಾಜಕಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಈ ಬಲ್ಯ ಅದ್ಬುತ ಕಾರ್ಯತ್‍ನ ಪಿಂಞ ಚೆರಿಯ ಮಕ್ಕ ದಾವೀದಂಡ ಮೋಂವೊಂಗ್ ಹೊಸನ್ನಾಂದ್ ಕೂತ್ ಕೊಡ್‍ಪದ್‍ನ ದೇವಾಲಯತ್‍ರ ಜಾಗತ್‍ಲ್ ಕಂಡತ್. ಕಂಡಿತ್ ಅಯಿಂಗಕ್ ದುಂಬ ಚೆಡಿ ಬಂತ್,

¹⁶ಯೇಸುನ ನೋಟಿತ್: ಈ ಮಕ್ಕ ಎಂತ ಎಣ್ಣಿಯಂಡುಂಡ್‍ೕಂದ್ ನೀಕ್ ಕ್‍ೕಟಂಡುಂಡಾಂದ್ ಕ್‍ೕಟತ್. ಅದ್ಂಗ್ ಯೇಸು: ಅಕ್ಕು ನಾಕ್ ಕ್‍ೕಪ. ನೀನ್ ಚೆರಿಯ ಮಕ್ಕಕೂ ಚಿಪ್ಪಿ ಕುಂಞಿಯಕೂ ನಿನ್ನ ತುದಿಪಕ್ ಪಡಿಪ್‌ಚಿಟ್ಟಿತುಳ್ಳಿಯ ಎಣ್ಣುವ ದೇವಡ ವಾಕ್ಯತ್‍ನ ನಿಂಗ ಓದಿತ್‌ಲ್ಲೆಯಾಂದ್ ಕ್‍ೕಟತ್.[62]

¹⁷ಪಿಂಞ ಅಯಿಂಗಳ ಬುಟ್ಟಿತ್, ಆ ಪಟ್ಟಣತ್ಂಜ ಪೊರಟಿತ್ ಬೇಥಾನ್ಯಕ್ ಪೋಯಿತ್ ಬಯಿಟ್ ಅಲ್ಲೇ ಒಳಿಂಜತ್.

¹⁸ಪೊಲಾಕ ಯೇಸು, ಯೆರೂಸಲೇಮ್‌ಕ್ ಪೋಯಂಡಿಪ್ಪಕ ಅಂವೊಂಗ್ ದುಂಬ ಕೆಲಪಯಿಪಕ್ ಸುರ್ ಆಚಿ.

¹⁹ಆ ಬಟ್ಟೇಲ್ ಒರ್ ಅತ್ತಿ ಮರತ್‍ನ ಕಂಡಿತ್ ಅದ್ಂಡ ಪಕ್ಕ ಪೋಯಿತ್, ಪಣ್ಣ್ ಉಂಡಾಂದ್ ನೋಟ್‌ಚಿ. ಆಚೇಂಗಿ, ಬರಿ ಎಲ್‌ಕಂಡ ಉಳ್ಳಾನ ಕಂಡತ್. ಅಕ್ಕ ಆ ಮರಕ್: ನೀನ್ ಇಂಞು ಮಿಂಞಕ್ ಪಣ್ಣ್ ಕೊಡ್‍ಪಕ್ಕಾಗಾಂದ್ ಎಣ್ಣ್‌ಚಿ. ಅಕ್ಕಲೆ ಆ ಮರ ಒಣಂಗಿ ಪೋಚಿ.

²⁰ಶಿಷ್ಯಂಗ ಇದ್‍ನ ಕಂಡಿತ್ ಆಶ್ಚರ್ಯಪಟ್ಟಿತ್: ಎನ್ನನೆ ಈ ಮರ ಅಚ್ಚಕ್ ಬೆರಿಯ ಒಣಂಗಿ ಪೋಚೀಂದ್ ಕ್‍ೕಟತ್.

²¹ಅದ್ಂಗ್ ಯೇಸು: ನಾನ್ ನಿಂಗಕ್ ನೇರಾಯಿತ್ ಎಣ್ಣ್‌ವಿ, ನಿಂಗಕ್ ಅನುಮಾನ ಇಲ್ಲತ ನಂಬಿಕೆ ಉಂಡೇಂಗಿ, ನಾನ್ ಈ ಅತ್ತಿ ಮರಕ್ ಮಾಡ್‌ನಾನ ನಿಂಗಳು ಮಾಡ್‌ವಕ್ ಕಯ್ಯು. ಅಚ್ಚಕೇ ಅಲ್ಲ, ಈ ಕುಂದ್‌ಕ್ ಏಳ್, ನೀನ್ ಆ ಸಮುದ್ರಕ್ ಬುದ್ದ್‌ಪೋಂದ್ ಒರ್ ಅನುಮಾನುವು ಇಲ್ಲತೆ ನಂಬಿಕೇಲ್ ಎಣ್ಣ್‌ಚೇಂಗಿಯು, ಅನ್ನನೆ ಆಪ.

²²ನಿಂಗಕ್ ನಂಬಿಕೆ ಉಂಡೇಂಗಿ, ನಿಂಗ ಎಂತ ಕ್‍ೕಪಿರ ಅದ್ ನಿಂಗಕ್ ಕ್‌ಟ್ಟುವಾಂದ್ ಯೇಸು ಎಣ್ಣ್‌ಚಿ.

²³ಯೇಸು ದೇವಾಲಯಕ್ ಬಂದಿತ್, ಅಲ್ಲಿ ಬೋದನೆ ಮಾಡ್‌ವಕ್ ಸುರ್ ಮಾಡ್‍ಚಿ. ಮುಕ್ಯ ಯಾಜಕಂಗಳು ಪೆರಿಯಯಿಂಗಳು ಯೇಸುರ ಪಕ್ಕ ಬಂದಿತ್: ಇದ್‍ನೆಲ್ಲ ನೀನ್ ಏದ್ ಅದಿಕಾರತ್‍ಲ್ ಮಾಡಿಯಂಡುಳ್ಳಿಯಾ? ದಾರ್ ನೀಕ್ ಅದಿಕಾರತ್‍ನ ಕೊಡ್‌ತತ್‍ೕಂದ್ ಕ್‍ೕಟತ್.

²⁴ಅಕ್ಕ ಯೇಸು: ನಾನ್ ನಿಂಗಳ ಒರ್ ಪ್ರಶ್ನೆ ಕ್‍ೕಪಿ. ಅದ್ಂಗ್ ನಿಂಗ ಉತ್ತರ ತಂದಕ, ನಾನ್ ಏದ್ ಅದಿಕಾರತ್‍ಲ್ ಈ ಕ್ರಿಯೇನೆಲ್ಲ ಮಾಡಿಯಂಡುಳ್ಳ್‌ಂದ್ ನಿಂಗಕ್ ಎಣ್ಣ್‌ವಿ.

²⁵ಯೋಹಾನ ದೀಕ್ಷಾಸ್ನಾನ ಕೊಡ್‍ಪಕ್ ದಾರ್ ಅದಿಕಾರ ಕೊಡ್‍ತತ್? ಪರಲೋಕತ್ಂಜ ಕ್‍ಟ್ಟ್‌ನದಾ? ಅಥವ ಮನುಷ್ಯಡಿಂಜ ಕ್‍ಟ್ಟನದಾಂದ್ ಕ್‍ೕಟತ್.

²⁶ಅಂವೊಂಗ್ ಎಂತ ಉತ್ತರ ಕೊಡುಕಂಡೂಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್. ಇದೆಲ್ಲಾ ದೇವಡಯಿಂಜ ಬಂದಡ್‍ೕಂದ್‌ ಎಣ್ಣ್‌ಚೇಂಗಿ ನಿಂಗ ಎನ್ನಂಗ್ ಯೋಹಾನನ ನಂಬಿತ್‌ಲ್ಲೇಂದ್ ಕ್‍ೕಪ.

²⁷ಮನುಷ್ಯಡಿಂಜ ಬಂದದ್‌ೕಂದ್ ಎಣ್ಣ್‌ನಕ ಜನಕೆಲ್ಲ ಯೋಹಾನ ಒರ್ ಪ್ರವಾದೀಂದ್ ಗೊತ್ತುಂಡ್, ಪಿಂಞ ಅಯಿಂಗ ನಂಗಳ ಎಂತ ಮಾಡ್‌ವಾಂದ್ ಗೇನ ಮಾಡಿತ್, ನಂಗಕ್ ಗೊತ್ತ್‌ಲೇಂದ್ ಉತ್ತರ ಕೊಡ್‍ತತ್. ಅಕ್ಕ ಯೇಸು: ಅನ್ನನಾಚೇಂಗಿ ನಾನು ಇದ್‍ನೆಲ್ಲ ಏದ್ ಅದಿಕಾರತ್‍ಲ್ ಮಾಡಿಯಂಡುಳ್ಳ್‌ಂದ್ ನಿಂಗಕ್ ಎಣ್ಣುಲೇಂದ್ ಉತ್ತರ ಕೊಡ್‍ತತ್.

²⁸ಇಕ್ಕ ಎಂತ ಎಣ್ಣುವಿರ? ಒರ್ ಮನುಷ್ಯಂಗ್ ದಂಡ್ ಕ್‍ಣ್ಣ ಮಕ್ಕ ಇಂಜತ್. ಅಂವೊ, ಪೆರಿಯ ಮೋಂವೊಂಡ ಪಕ್ಕ ಪೋಪಂಜಿ: ಇಂದ್ ನೀನ್ ದ್ರಾಕ್ಷಿ ತೋಟತ್‍ರ ಪಣಿಕ್ ಪೋಂದ್ ಎಣ್ಣ್‌ಚಿ.

²⁹ಅಕ್ಕ ಪೆರಿಯ ಮೋಂವೊ: ನಾನ್ ಪೋಪ್‌ಲೇಂದ್ ಎಣ್ಣ್‌ಚಿ. ಬಯ್ಯಂಜಿ ಅಂವೊಂಗ್ ಬೇಜಾರ್ ಆಯಿತ್, ಅಂವೊ ಪಣಿಕ್ ಪೋಚಿ.

³⁰ದಂಡನೆ ಮೋಂವೊಂಡ ಪಕ್ಕ ಬಂದಿತ್: ದ್ರಾಕ್ಷಿ ತೋಟತ್‍ರ ಪಣಿಕ್ ಪೋಂದ್ ಎಣ್ಣ್‌ಚಿ. ಅಕ್ಕ ಅಂವೊ, ನಾನ್ ಪೋಪೀಂದ್ ಎಣ್ಣ್‌ಚಿ. ಆಚೇಂಗಿ ಕೆಲಸ ಮಾಡ್‌ವಕ್ ಪೋಯಿತ್‌ಲ್ಲೆ.

³¹ಈಂಗ ದಂಡಾಳ್‌ರ ಕೂಟ್‌ಲ್ ಅಪ್ಪಂಡ ಆಸೆ ಪ್ರಕಾರ ನಡ್ಂದಂವೊ ದಾರ್‍ೕಂದ್ ಕ್‍ೕಟತ್; ಅದ್ಂಗ್ ಅಯಿಂಗ: ಪೆರಿಯ ಮೋಂವೊನೇಂದ್ ಎಣ್ಣ್‌ಚಿ. ಪಿಂಞ ಯೇಸು, ಅನ್ನನೆ ಕಂದಾಯ ಎಡ್‌ಪಯಿಂಗಳು, ವೇಶಿಯಳು ನಿಂಗಕಿಂಜ ಮಿಂಞ ದೇವಡ ರಾಜ್ಯಕ್ ಪೋಪಾಂದ್ ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ.

³²ದೀಕ್ಷಾಸ್ನಾನ ತಪ್ಪ ಯೋಹಾನ ನಿಂಗಕ್ ನೀತಿರ ಬಟ್ಟೇನ ಕಾಟ್‍ಚಿ, ನಿಂಗ ಅಂವೊನ ನಂಬಿತ್‌ಲ್ಲೆ. ಆಚೇಂಗಿ, ಕಂದಾಯ ಎಡ್‍ಪಯಿಂಗ, ವೇಶಿಯ ಅಂವೊಂಡ ಬೋದನೆನ ನಂಬ್‍ಚಿ. ಇದ್‍ನೆಲ್ಲಾ ನಿಂಗ ಕಂಡಿತ್ ಉಂಡೇಂಗಿಯು ನಿಂಗ ನಂಬಿತು ಇಲ್ಲೆ ದೇವಡ ಪಕ್ಕ ಪಾಪಕಾಯಿತ್ ಪಶ್ಚಾತಾಪ ಪಟ್ಟಿತ್ ತಿರ್‌ಗಿತು ಇಲ್ಲೆ.

³³ಇಕ್ಕ ಈ ಕಥೇರ ರೂಪತ್‍ನ ಕ್‍ೕಳಿ: ಒರ್ ಎಜಮಾನ ದ್ರಾಕ್ಷಿ ಪಣ್ಣ್‌ರ ತೋಟ ಮಾಡ್‍ಚಿ. ತೋಟತ್‍ರ ಸುತ್ತ್‌ಲ್‌ ಬೇಲಿ ಇಟ್ಟತ್. ದ್ರಾಕ್ಷಿರಸ ಮಾಡ್‌ವಕ್ ಉಳ್ಳ ಒರ್ ಕುಂಡ್‌ನ ಸಹ ಎಡ್‍ತಿತ್, ಆಂಡ ಪಕ್ಕತ್‍ಲ್ ಒರ್ ಕಾಕೂಡ್ ಕೆಟ್ಟ್‌ಚಿ. ಪಿಂಞ ಅಂವೊ, ಆ ತೋಟತ್‍ನ ವಾರಕಾರಂಗಕ್ ಕೊಡ್‌ತಿತ್ ದೂರ ದೇಶಕ್ ಪೋಚಿ.

³⁴ದ್ರಾಕ್ಷಿ ಪಣ್ಣ್ ಕೊಯ್ಯುವ ಸಮಯ ಬಪ್ಪಕ, ಆ ತೋಟತ್‍ರ ಎಜಮಾನ, ಅಂವೊಂಡ ಪಾಲ್‍ಕ್ ಬಂದ ದ್ರಾಕ್ಷಿ ಪಣ್ಣ್‌ನ ಎಡ್‌ತ ಬಪ್ಪಕ್ ಒರ್ ಆಳ್‌ನ ಅಯಿಚತ್.

³⁵ವಾರಕಾರಂಗ ಆ ಆಳ್‌ನ ಪೊಯ್ಯುವಂಜಿ ಇಂಞೊಬ್ಬನ ಕೊಂದಿತ್, ಮೂಂದನೆ ಆಳ್‍ಕ್ ಕಲ್ಲ್ ಕನ್‍ಚತ್.

³⁶ಆ ಎಜಮಾನ ಇಂಞು ಚೆನ್ನ ಆಳ್‌ನ ಮಿಂಞಕಿಂಜ ಜಾಸ್ತಿಯಾಯಿತ್ ಅಯಿಚತ್. ಅಯಿಂಗಳ ಕೂಡೆ ವಾರಕಾರಂಗ ಅನ್ನನೆ ಮಾಡ್‌ವಂಜಿ ಅಯಿಚತ್.

³⁷ಕಡೇಕ್ ದ್ರಾಕ್ಷಿ ತೋಟತ್‍ರ ಎಜಮಾನ, ಕಂಡಿತವಾಯಿತ್ ನಾಡ ಮೋಂವೊಂಗ್ ಮರ್ಯಾದೆ ತಪ್ಪಾಂದ್ ಗೇನ ಮಾಡಿತ್ ಅಂವೊಂಡ ಮೋಂವೊನ ಅಯಿಚತ್.

³⁸ಆಚೇಂಗಿ, ವಾರಕಾರಂಗ ಎಜಮಾನಂಡ ಮೋಂವೊ ಬಪ್ಪದ್‍ನ ಕಂಡದು, ತೋಟತ್‍ರ ಹಕ್ಕ್‌ದಾರ ಆಪಕುಳ್ಳ ನಂಗಡ ಎಜಮಾನಂಡ ಮೋಂವೊ ಇಂವೊನೇ, ಬಾರಿ, ನಂಗ ಅಂವೊನ ಕೊಲೆ ಮಾಡನ. ಅಕ್ಕ ಈ ಸೊತ್ತ್ ನಂಗಡದಾಪಾಂದ್ ಎಣ್ಣ್‌ಚಿ.

³⁹ಪಿಂಞ ಅಂವೊನ ದ್ರಾಕ್ಷಿ ತೋಟತ್‍ರ ಪೊರಮೆ ಚಾಡ್‍ವಂಜಿ, ಮೋಂವೊನ ಕೊಂದ್‍ರ್‌ತ್.

⁴⁰ಅನ್ನನಾಚೇಂಗಿ ದ್ರಾಕ್ಷಿ ತೋಟತ್‍ರ ಎಜಮಾನ ಬಪ್ಪಕ, ವಾರಕಾರಂಗಕ್ ಎಂತ ಮಾಡ್‌ವಾಂದ್ ಯೇಸು ಕ್‍ೕಟತ್.

⁴¹ಅಂವೊ ಆ ದುಷ್ಟ ಜನಳ ಕ್ರೂರವಾಯಿತ್ ಕೊಲ್ಲ್‌ವಂಜಿ, ಪಣ್ಣ್ ಕೊಯ್ಯುವ ಸಮಯ ಬಪ್ಪಕ ದಾರ್ ಎಜಮಾನಂಗ್ ಅಂವೊಂಡ ಪಾಲ್‍ನ ಕೊಡ್‍ಪ, ಅಯಿಂಗಕ್ ತೋಟತ್‍ನ ವಾರಕ್ ಕೊಡ್‍ಪಾಂದ್ ಅಯಿಂಗ ಎಣ್ಣ್‌ಚಿ.

⁴²ಯೇಸು ಅಯಿಂಗಳ ನೋಟ್‌ವಂಜಿ: ಮನೆ ಕೆಟ್ಟ್‌ವಯಿಂಗ, ಆ ಕಲ್ಲ್ ಲಾಯಕಾಯಿತ್‌ಲ್ಲೇಂದ್ ತ್‍ಕ್ಕಾರ ಮಾಡ್‍ನ ಕಲ್ಲೇ ಮುಕ್ಯವಾನ ಮೂಲೆ ಕಲ್ಲಾಚಿ, ಇದ್ ದೇವ ಮಾಡ್‍ನದ್, ಅದ್‍ನ ನೋಟ್‍ವಕ ನಂಗಕ್ ಆಶ್ಚರ್ಯವಾಯಿತ್ ಉಂಡ್‍ೕಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳದ್ ನಿಂಗ ಓದಿತ್‌ಲ್ಲೆಯಾ?[63]

⁴³ಆನಗುಂಡ್ ನಾನ್ ಎಣ್ಣ್‌ವಿ, ಪರಲೋಕ ರಾಜ್ಯತ್‍ನ ನಿಂಗಡ ಕೈಯಿಂಜ ಎಡ್‍ತಿತ್, ಆಂಗ್ ತಕ್ಕ ಫಲತ್‍ನ ಕೊಡ್‍ಪ ಮಕ್ಕಕ್ ಕೊಡ್‍ಪ.

⁴⁴ಆ ಕಲ್ಲ್‌ರ ಮೇಲೆ ಬೂವಯಿಂಗ ತುಂಡ್ ತುಂಡಾಯಿಪೋಪ. ಆ ಕಲ್ಲ್ ದಾಡ ಮೇಲೆ ಬೂವ ಅಯಿಂಗ ಪೊಡಿ ಪೊಡಿ ಆಯಿ ಪೋಪಾಂದ್ ಎಣ್ಣ್‌ಚಿ.

⁴⁵ಮುಕ್ಯ ಯಾಜಕಂಗ ಪಿಂಞ ಫರಿಸಾಯಂಗ ಇದ್‍ನ ಕ್‍ೕಪಕ, ಯೇಸು ಅಯಿಂಗಡ ವಿಷಯತ್‍ನೇ ಎಣ್ಣಿಯಂಡುಂಡ್‍ೕಂದ್ ಅಯಿಂಗಕ್ ಗೊತ್ತಾಚಿ.

⁴⁶ಯೇಸುನ ಪುಡಿಪಕ್ ಸಮಯ ನೋಟಿಯಂಡಿಂಜತ್, ಆಚೇಂಗಿ ಜನ ಯೇಸುನ ಪ್ರವಾದೀಂದ್ ಗೇನ ಮಾಡ್‍ನಗುಂಡ್ ಅಂವೊನ ಬಂದಿಚಿಡ್‍ವಕ್ ಅಯಿಂಗಕ್ ಪೋಡಿ ಆಚಿ.