Read Kodava ಮತ್ತಾಯ 22 Bible Online

ಮತ್ತಾಯ 22 - Kodava bible

ಮತ್ತಾಯ 22

¹ಪರಲೋಕ ರಾಜ್ಯತ್‍ನ ಅರ್ಥ ಮಾಡಿ ಕೊಡ್‍ಪಕಾಯಿತ್, ಯೇಸು ಜನಕ್ ದುಂಬ ವಿಷಯತ್‍ನ, ಕಥೇರ ರೂಪತ್‌ಲ್ ಎಣ್ಣಿಯಂಡಿಂಜತ್.

²ಪರಲೋಕ ರಾಜ್ಯ ಎನ್ನನೆ ಎಣ್ಣ್‌ಚೇಂಗಿ, ಒರ್ ರಾಜ ತಾಂಡ ಮೋಂವೊಂಡ ಮಂಗಲಕ್ ಗದ್ದಾಳ ತಯಾರ್ ಮಾಡ್‍ನನೆಕೆ.

³ಅಡಿಗೆಯೆಲ್ಲಾ ತಯಾರಾನ ಪಿಂಞ, ಕಾಕ್‍ನಯಿಂಗಕ್ ಪೋಯಿತ್ ಗದ್ದಾಳ ತಯಾರಾಯಿತುಂಡೂಂದು, ನಿಂಗ ಬಪ್ಪಕ್ ಸಮಯ ಆಚೀಂದು ಎಣ್ಣ್‌ವಕ್ ಅಂವೊಂಡ ಆಳ್‍ವಳ ಅಯಿಚತ್. ಆಚೇಂಗಿ ಮಂಗಲಕ್ ಬಪ್ಪಕುಳ್ಳಯಿಂಗ ಬಪ್ಪ್‌ಲೇಂದ್ ಎಣ್ಣ್‌ಚಿ.

⁴ಪಿಂಞ ಅಂವೊ ಇಂಞು ಚೆನ್ನ ಆಳ್‍ವಳ ಅಯಿಚಿತ್: ನಾಡ ಅಡಿಗೆ ತಯಾರಾಯಿತ್ ಉಂಡ್ ಪುಷ್ಟಿಯಾನ ಎತ್ತ್ ಪಿಂಞ ಪೈಯುರ ಅಡಿಗೆ ಮಾಡಿತುಂಡ್, ಮಂಗಲತ್‍ರ ಗದ್ದಾಳಕ್ ಬಾರೀಂದ್ ಎಣ್ಣ್‌ವಕ್ ಅಯಿಚತ್.

⁵ಆಚೇಂಗಿ ಕಾಕ್‌ನಯಿಂಗ ಅದ್‍ನ ಮನಸ್ಸ್‌ಕ್ ಎಡ್‍ಕತೆ ಒಬ್ಬ ಬೇಲ್‍ಕ್, ಇಂಞೊಬ್ಬ ಅಂವೊಂಡ ವ್ಯಾಪಾರಕ್ ಪೋಚಿ.

⁶ಇಂಞು ಚೆನ್ನ ಜನ ಈ ಆಳುವಳ ಪುಡಿಪಂಜಿ ಅಯಿಂಗಳ ಕೊಂದ್‍ರ್‌ತ್.

⁷ರಾಜಂಗ್ ದುಂಬ ಚೆಡಿ ಬಾತ್. ಅಂವೊ ಅಂವೊಂಡ ಸಿಪಾಯಿಯಳ ಅಯಿಪಂಜಿ, ದಾರ್ ಅಂವೊಂಡ ಆಳ್‍ವಳ ಕೊಂದತೋ, ಅಯಿಂಗಳ ನಾಶ ಮಾಡಿತ್, ಅಯಿಂಗಡ ಪಟ್ಟಣತ್‍ನ ಚುಟ್ಟ್‌ರ್‌ತ್.

⁸ಅಕ್ಕ ರಾಜ ಅಂವೊಂಡ ಆಳ್‍ವಳ ನೋಟಿತ್: ಮಂಗಲತ್‍ರ ಅಡಿಗೆ ತಯಾರಾಯಿತ್ ಉಂಡ್, ನಾನ್ ಕಾಕ್‍ನಯಿಂಗಕ್ ಅದ್ಂಗ್ ಯೋಗ್ಯತೆ ಇಲ್ಲತೆ ಪೋಚಿ.

⁹ಆನಗುಂಡ್ ಇಕ್ಕ ನಿಂಗ, ಬೀದಿರ ಮೂಲೆಕ್ ಪೋಯಿತ್, ಅಲ್ಲಿ ದಾರ್‍ನೆಲ್ಲಾ ನಿಂಗ ಕಾಂಬಿರೋ ಅಯಿಂಗಳೆಲ್ಲ ಉಂಬಕ್ ಕಾಕಿಯಂಡ್ ಬಾರೀಂದ್ ಎಣ್ಣ್‌ಚಿ.

¹⁰ಆ ಆಳ್‍ವ, ಕೆಟ್ಟಯಿಂಗಳ ನಲ್ಲಯಿಂಗಳ ಮಾತ್ರ ಅಲ್ಲತೆ, ದಾರ್‍ನೆಲ್ಲಾ ಕಂಡತೋ ಅಯಿಂಗಳೆಲ್ಲ ಉಂಬಕ್ ಕಾಕಿಯಂಡ್ ಬಾತ್. ಅನ್ನನೆ ಮಂಗಲತ್‍ರ ಮನೆಲ್ ಜನ ದುಂಬ್‍ಚಿ.

¹¹ರಾಜ ಅಲ್ಲಿ ಮಂಗಲಕ್ ಬಂದಯಿಂಗಳ ನೋಟ್‍ವಕ್ ಬಪ್ಪಕ ಮಂಗಲತ್‍ರ ಬಟ್ಟೆ ಇಡತೆ ಬಂದಿತುಳ್ಳ ಒಬ್ಬನ ಕಂಡತ್.

¹²ರಾಜ ಅಂವೊನ: ಮಂಗಲತ್‍ರ ಬಟ್ಟೆ ಇಡತೆ ನೀನ್ ಇಲ್ಲಿಕ್ ಎನ್ನನೆ ಬಂದಿಯಾಂದ್ ಕ್‍ೕಟತ್? ಅಂವೊ ಮುಂಡತೆ ಇಂಜತ್.

¹³ಅಕ್ಕ ರಾಜ ಅಂವೊಂಡ ಆಳ್‍ವಕ್, ಅಂವೊಂಡ ಕೈಕಾಲ್ ಕೆಟ್ಟ್‌ವಂಜಿ ಅಂವೊನ ಪೊರಮೆ ಇರ್‌ಟ್‌ಲ್ ಇಡಿ, ಅಲ್ಲಿ ಅಂವೊ ಪಲ್ಲ್‌ಕಡ್‌ಚಂಡ್ ಗೋಳಾಡಿಯಂಡ್ ಇಪ್ಪಾಂದ್ ಯೇಸು ಎಣ್ಣ್‌ಚಿ.

¹⁴ಇನ್ನನೆ ಕಾಕ್‌ನಯಿಂಗ ದುಂಬ ಇಪ್ಪ, ಆಚೇಂಗಿ ಅದ್‍ಲ್ ಆಯ್ಕೆ ಆನಯಿಂಗ ಚೆನ್ನ ಜನಳೇಂದ್ ಯೇಸು ಎಣ್ಣ್‌ಚಿ.

¹⁵ಫರಿಸಾಯಂಗೆಲ್ಲಾ ಒಂದ್ ಕೂಡಿತ್ ಯೇಸುನ ಅಂವೊಂಡ ತಕ್ಕ್‌ಲ್ ಪುಡಿಪಕಾಯಿತ್ ಗೇನ ಮಾಡ್‍ಚಿ.

¹⁶ಅಯಿಂಗ ಹೆರೋದ ರಾಜಂಡ ಜನಡ ಕೂಡೆ ಅಯಿಂಗಡ ಶಿಷ್ಯಂಗಳ ಅಯಿಚತ್. ಅಯಿಂಗ ಬಂತ್, ಉಪಾದ್ಯನೇ, ನೀನ್ ಸತ್ಯ ಉಳ್ಳಂವೊನು, ದೇವಡ ಚಿತ್ತತ್‍ರ ವಿಷಯತ್ ಜನಕ್ ಸತ್ಯವಾಯಿತ್ ಬೋದನೆ ಮಾಡ್‍ವಿಯಾಂದೂ, ದಾರ್‌ಕು ಬೊತ್ತ್‌ವಂವೊ ಅಲ್ಲಾಂದು, ಪಕ್ಷಪಾತ ಇಲ್ಲತಂವೋಂದು ನಂಗಕ್ ಗೊತ್ತುಂಡ್.

¹⁷ಇಕ್ಕ ಎಣ್ಣ್, ಕೈಸರಂಗ್ ಕಂದಾಯ ಕೊಡ್‍ಪದ್ ಸರಿಯಾ ತಪ್ಪಾಂದ್ ಕ್‍ೕಟತ್.

¹⁸ಅಯಿಂಗಡ ಕೆಟ್ಟ ಗುಣತ್‍ನ ಅರ್ಥ ಮಾಡಿಯಂಡ್: ಕಪಟಿಯಳೇ! ನಿಂಗ ಎನ್ನಂಗ್ ನನ್ನ ಕೆಣಿಪಕ್ ನೋಟ್‍ವಿರ?

¹⁹ಕಂದಾಯ ಕೊಡ್‍ಪ ನಾಣ್ಯತ್‍ನ ಕಾಟೀಂದ್ ಎಣ್ಣ್‌ಚಿ. ಅಯಿಂಗ ಎಡ್‌ತ ಬಂದಿತ್ ಕೊಡ್‍ತತ್.

²⁰ಈ ನಾಣ್ಯತ್‌ಲ್ ಉಳ್ಳ ಮೂಡ್ ಪಿಂಞ ಪೆದ ದಾಡದ್‍ೕಂದ್ ಕ್‍ೕಟತ್.

²¹ಅಯಿಂಗ: ಇದ್‍ಲ್ ಕೈಸರಂಡದ್ ಉಂಡ್‍ೕಂದ್ ಅಯಿಂಗ ಎಣ್ಣ್‌ಚಿ. ಅಕ್ಕ ಅಂವೊ: ಅಕ್ಕುವ, ಅನ್ನನಾಚೇಂಗಿ ಕೈಸರಂಡದ್‍ನ ಕೈಸರಂಗ್ ಕೊಡಿ, ದೇವಡದ್‌ನ ದೇವಕ್ ಕೊಡೀಂದ್ ಉತ್ತರ ಕೊಡ್‍ತತ್.

²²ಅಂವೊ ಕೊಡ್‍ತ ಉತ್ತರತ್‍ನ ಕ್‍ೕಪಕ ಅಯಿಂಗಕೆಲ್ಲ ದುಂಬ ಆಶ್ಚರ್ಯ ಆಯಿತ್, ಅಂವೊನ ಬುಟ್ಟಿತ್ ಪೋಚಿ.

²³ಅದೇ ದಿವಸತ್‍ಲ್, ಚತ್ತ್ ಪೋನಯಿಂಗ ದಾರೂ ಜೀವವಾಯಿತ್ ಏವುಲೇಂದ್ ಎಣ್ಣುವ ಸದ್ದುಕಾಯಂಗ ಯೇಸುರ ಪಕ್ಕ ಬಾತ್. ಅಯಿಂಗ ಯೇಸುಕ್:

²⁴ಉಪಾದ್ಯನೇ, ಒರ್ ಮನುಷ್ಯ, ಮಕ್ಕ ಇಲ್ಲತೆ ಪೊಣ್ಣ್‌ನ ಬುಟ್ಟಿತ್ ಚತ್ತ್ ಪೋನಕ, ಚತ್ತ್ ಪೋನಂವೊಂಡ ತಮ್ಮಣ ಅಂವೊಂಡ ಅಣ್ಣಂಡ ಪೊಣ್ಣ್‌ನ ಮಂಗಲ ಕಯಿಕಲು. ಅಕ್ಕ ಅಯಿಂಗಕ್ ಮಕ್ಕ ಆನಕ, ಆ ಮಕ್ಕ ಚತ್ತ್ ಪೋನಂವೊಂಡ ಮಕ್ಕ ಆಪಾಂದ್ ಮೋಶೆ ನಂಗಕ್ ಎಣ್ಣ್‌ಚಿ.[64]

²⁵ಒಮ್ಮ ಏಳ್ ಅಣ್ಣತಮ್ಮಣಂಗ ಇಂಜತ್. ಪೆರಿಯಂವೊ ಮಂಗಲ ಕಯಿಚತ್. ಅಂವೊಂಗ್ ಮಕ್ಕ ಇಲ್ಲತೆ ಚತ್ತ್ ಪೋನಗುಂಡ್ ದಂಡನೆಯಂವೊ ಅವಳ ಮಂಗಲ ಕಯಿಚತ್,

²⁶ಅಂವೊಂಗು ಮಕ್ಕ ಆಯಿತ್‌ಲ್ಲೆ, ಅಂವೊ ಸಹ ಚತ್ತ್ ಪೋಚಿ. ಅನ್ನನೆ ಮೂಂದನೆಂವೊಂಗೂ ಆಚಿ. ಎಲ್ಲಾ ಏಳ್ ಅಣ್ಣತಮ್ಮಣಂಗಳು ಅವಳ ಮಂಗಲ ಕಯಿಚತ್ ಆಚೇಂಗಿ ಮಕ್ಕ ಆಕತೆ ಏಳಾಳು ಚತ್ತ್ ಪೋಚಿ

²⁷ಆಕೀರ್‌ಕ್ ಆ ಪೊಣ್ಣಾಳು ಚತ್ತ್ ಪೋಚಿ.

²⁸ಅಂದಕ, ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಪ್ಪಕ, ಏಳ್ ಆಣಾಳ್‌ಲ್ ಅವ ದಾಡ ಪೊಣ್ಣಾಯಿತ್‌ಪ್ಪ? ಎಲ್ಲಾ ಏಳ್ ಅಣ್ಣತಮ್ಮಣಂಗಳು ಅವಳ ಮಂಗಲ ಕಯಿಚತಲ್ಲಾಂದ್ ಕ್‍ೕಟತ್.

²⁹ಯೇಸು ಅಯಿಂಗಕ್: ದೇವಡ ವಾಕ್ಯ ಪಿಂಞ ದೇವಡ ಶಕ್ತಿ ನಿಂಗಕ್ ಗೊತ್ತಿಲ್ಲತಗುಂಡ್ ನಿಂಗ ತಪ್ಪ್ ತಪ್ಪಾಯಿತ್ ಗೇನ ಮಾಡ್‌ವಿರ.

³⁰ಚತ್ತ್ ಪೋನಯಿಂಗ ಜೀವವಾಯಿತ್ ಎದ್ದಿತ್ ಬಪ್ಪಕ, ದಾರೂ ಮಂಗಲ ಕಯಿಪದು ಇಲ್ಲೆ, ಮಂಗಲ ಮಾಡಿ ಕೊಡ್‌ಪದು ಇಲ್ಲೆ. ಅಯಿಂಗ ಪರಲೋಕತ್‌ಲುಳ್ಳ ದೇವದೂತಂಗಡನೆಕೆ ಇಪ್ಪ.

³¹ಚತ್ತ್ ಪೋನಯಿಂಗ ಜೀವವಾಯಿತ್ ಏವ ವಿಷಯತ್ ದೇವ: ನಾನ್ ಅಬ್ರಹಾಮಂಡ ದೇವ, ಇಸಾಕಂಡ ದೇವ ಪಿಂಞ ಯಾಕೋಬಂಡ ದೇವಾಂದ್, ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳದ್‍ನ ನಿಂಗ ಓದಿತ್ತ್‌ಲ್ಲೆಯಾ?

³²ಅನ್ನನಾಚೇಂಗಿ ಅಂವೊ ಚತ್ತ್ ಪೋನಯಿಂಗಕ್ ದೇವ ಅಲ್ಲ ಆಚೇಂಗಿ ಜೀವತ್‍ಲ್ ಉಳ್ಳಯಿಂಗಕ್ ದೇವನಾಯಿತುಂಡ್‍ೕಂದ್ ಎಣ್ಣ್‌ಚಿ.[65]

³³ಜನಡ ಗುಂಪ್‌ಕ್ ಈ ಬೋದನೇನೆಲ್ಲಾ ಕ್‍ೕಪಕ, ಅಯಿಂಗಕ್ ದುಂಬ ಆಶ್ಚರ್ಯ ಆಚಿ.

³⁴ಯೇಸು, ಸದ್ದುಕಾಯಂಗಡ ಬಾಯಿನ ಮುಚ್ಚಿರ್‍ತ್‍ೕಂದ್ ಗೊತ್ತಾನ ಪಿಂಞ ಫರಿಸಾಯಂಗ ಕೂಡಿ ಬಂದಿತ್ ಪ್ರಶ್ನೆ ಇಡ್‌ವಕ್ ತಯಾರಾಚಿ.

³⁵ಅಯಿಂಗಡಡೆಲ್ ನ್ಯಾಯಪ್ರಮಾಣತ್‍ರ ಶಾಸ್ತ್ರಿ ಒಬ್ಬ, ಯೇಸುನ ಪುಡಿಪಕಾಯಿತ್ ಈ ಪ್ರಶ್ನೆ ಕ್‍ೕಟತ್:

³⁶ಉಪಾದ್ಯನೇ ನ್ಯಾಯಪ್ರಮಾಣತ್‍ಲ್ ಎಲ್ಲಾಕಿಂಜ ಮುಕ್ಯಪಟ್ಟ ಆಜ್ಞೆ ಏದ್‍ೕಂದ್ ಕ್‍ೕಟತ್.[66]

³⁷ಯೇಸು ಅಂವೊನ ನೋಟಿತ್: ನೀಡ ದೇವನಾನ ಒಡೆಯನ ನೀಡ ತ್‍ೕರ ಹೃದಯತ್‍ಲ್, ನೀಡ ತ್‍ೕರ ಆತ್ಮತ್‍ಲ್, ನೀಡ ತ್‍ೕರ ಮನಸ್ಸ್‌ಲ್ ಪ್ರೀತಿಮಾಡ್.

³⁸ಇದೇ ಮುಕ್ಯಪಟ್ಟ ನ್ಯಾಯಪ್ರಮಾಣ.

³⁹ಇದ್ಂಗ್ ಸಮವಾಯಿತುಳ್ಳ ದಂಡನೆ ಮುಕ್ಯಪಟ್ಟ ನ್ಯಾಯಪ್ರಮಾಣ ಎಂತ ಎಣ್ಣ್‌ಚೇಂಗಿ: ನೀನ್, ನಿನ್ನ ಪ್ರೀತಿ ಮಾಡ್‌ವಚ್ಚಕ್ ನೀಡ ನೆರಮನೆಕಾರಳೂ ಪ್ರೀತಿಮಾಡ್ ಎಣ್ಣ್‌ವದೇ. [67]

⁴⁰ಮೋಶೇರ ಎಲ್ಲಾ ನ್ಯಾಯಪ್ರಮಾಣಕ್ ಪಿಂಞ ಪ್ರವಾದಿಯಂಗಡ ಬೋದನೆಕ್ ಈ ದಂಡ್ ನ್ಯಾಯಪ್ರಮಾಣವೇ ಆದಾರವಾಯಿತುಂಡ್.

⁴¹ಫರಿಸಾಯಂಗ ಎಲ್ಲಾರು ಒಟ್ಟ್‌ಕೂಡಿತ್‌ಪ್ಪಕ, ಯೇಸು ಅಯಿಂಗಳ ನೋಟಿತ್: ನಿಂಗ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಂಡ ವಿಷಯತ್ ಎಂತ ಗೇನ ಮಾಡ್‌ವಿರ? ಅಂವೊ ದಾಡ ಮೋಂವೊ ಎಣ್ಣಿಯಂಡ್ ಕ್‍ೕಟತ್. ಅದ್ಂಗ್ ಅಯಿಂಗ: ಅಂವೊ ದಾವೀದಂಡ ಮೋಂವೊ ಎಣ್ಣಿಯಂಡ್ ಉತ್ತರ ಕೊಡ್‍ತತ್.

⁴²

⁴³ಅದ್ಂಗ್ ಯೇಸು: ಅನ್ನನಾಚೇಂಗಿ ದಾವೀದ ಪವಿತ್ರಾತ್ಮತ್‍ರಗುಂಡ್ ಅಂವೊನ ಒಡೆಯನೇಂದ್ ಕಾಕ್‍ನದ್ ಎನ್ನನೆ?

⁴⁴ನಾಡ ಒಡೆಯನಾನ ದೇವ ನಾಡ ಒಡೆಯಂಗ್: ನಾನ್ ನೀಡ ಶತ್ರುವಳ ನೀಡ ಕಾಲ್‍ರ ಅಡಿಕ್ ಇಡ್‍ವಕತ್ತನೆ, ನೀನ್ ನಾಡ ಬಲ್‌ತೆ ಬರಿಲ್ ಅಳ್‌ತಾಂದ್ ಎಣ್ಣಿತುಂಡಲ್ಲ.[68]

⁴⁵ದಾವೀದ, ಅಂವೊನ ಒಡೆಯನೇಂದ್ ಎಣ್ಣ್‌ವಕ, ಅಂವೊಂಗ್ ಅಂವೊ ಎನ್ನನೆ ಮೋಂವೊನಾಯಿತ್ ಇಪ್ಪಾಂದ್ ಕ್‍ೕಟತ್.

⁴⁶ದಾರ್‌ಕು ಜವಾಬ್ ಕೊಡ್‍ಪಕ್ ಕಯಿಂಜಿತ್ತ್‌ಲ್ಲೆ. ಅಂದಿಂಜ ದಾರ್‌ಕು ಅಂವೊಂಡ ಪಕ್ಕ ಪ್ರಶ್ನೆ ಕ್‍ೕಪಕ್ ದೈರ್ಯ ಇಂಜಿತ್‌ಲ್ಲೆ.