Read Kodava ಮತ್ತಾಯ 23 Bible Online

ಮತ್ತಾಯ 23 - Kodava bible

ಮತ್ತಾಯ 23

¹ಯೇಸು ಜನಡ ಗುಂಪ್‌ಕ್ ಪಿಂಞ ಅಂವೊಂಡ ಶಿಷ್ಯಂಗಕ್ ಇನ್ನನೆ ಎಣ್ಣ್‌ಚಿ.

²ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಪಿಂಞ ಫರಿಸಾಯಂಗಕ್ ಮಾತ್ರ ಮೋಶೇರ ಕಾನೂನ್‌ನ ವಿವರಿಚಿಟ್ಟಿತ್ ಬೋದನೆ ಮಾಡ್‌ವಕ್ ಅದಿಕಾರ ಉಂಡ್.

³ಆನಗುಂಡ್, ಅಯಿಂಗ ಬೋದೆನೆ ಮಾಡ್‌ವ ಪ್ರಕಾರ ನಿಂಗ ನಡ್‌ಕಂಡು ಆಚೇಂಗಿ ಅಯಿಂಗಡ ನಡತೆರ ಪ್ರಕಾರ ನಿಂಗ ನಡ್‌ಕತಿ, ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ಬೋದನೆ ಮಾಡ್‌ವ, ಆಚೇಂಗಿ ಅದ್ಂಡ ಪ್ರಕಾರ ನಡ್‍ಪ್‍ಲೆ.

⁴ಅಯಿಂಗ ಜನಕ್ ಬಾರ ಆಯಿತುಳ್ಳ ಪೊರೆನ ನಿಪ್ಪ್‌ಕ್ ಕೆಟ್ಟಿತ್ ಬುಡುವ ಆಚೇಂಗಿ ಅಯಿಂಗ ಒರ್ ಬೆರತ್‌ನ ಕೂಡೆ ಮುಟ್ಟಿತ್ ನಿಂಗಕ್ ಸಹಾಯ ಮಾಡುಲೆ.

⁵ಅಯಿಂಗ ಮಾಡ್‌ವದೆಲ್ಲ ಜನ ನೋಟ್‍ವಕಾಯಿತ್ ಮಾಡ್‌ವ. ಅಯಿಂಗ ಬಟ್ಟೇಕ್ ಕೆಟ್ಟ್‌ವ ಜ್ಞಾಪಕ ಪಟ್ಟಿನ ಅಗಲ ಮಾಡ್‌ವ.

⁶ಅಯಿಂಗ, ಸಬಾಮಂದಿರಕ್ ಪೋನಕ ಮುಕ್ಯಪಟ್ಟ ಕುರ್ಚಿಲ್ ಅಳ್‌ಪಕ್, ಗದ್ದಾಳತ್‍ಲ್ ಗನಪಟ್ಟ ಜಾಗತ್‍ಲ್ ಅಳ್‌ಪಕ್ ಕುಶಿ ಪಡುವ.

⁷ಚತ್ತೆಲ್ ಎಲ್ಲಾರು ಮರ್ಯಾದೆ ಕೊಡ್‌ಕಡ್ ಎಣ್ಣಿಯಂಡ್, ಎಲ್ಲಾರು ಅಯಿಂಗಳ ಉಪಾದ್ಯನೇಂದ್ ಕಾಕಂಡೂಂದ್ ಅಯಿಂಗ ಆಸೆ ಪಡುವ.

⁸ನಿಂಗಳ ದಾರೂ ಉಪಾದ್ಯನೇಂದ್ ಕಾಕ್‍ವಕ್ ಬುಡತಿ. ಕ್ರಿಸ್ತ ಒಬ್ಬನೇ ನಿಂಗಕ್ ಉಪಾದ್ಯನಾಯಿತುಂಡ್. ನಿಂಗ ಎಲ್ಲಾರು ಅಣ್ಣತಮ್ಮಣಂಗಳಾಯಿತುಳ್ಳಿರ.

⁹ಈ ಲೋಕತ್‍ಲ್ ದಾರ್‌ನು ನಿಂಗ ಅಪ್ಪಾಂದ್ ಎಣ್ಣಂಡ; ಪರಲೋಕತ್‍ಲ್ ಉಳ್ಳ ಒಬ್ಬನೇ ನಿಂಗಕ್ ಆತ್ಮೀಯ ಅಪ್ಪನಾಯಿತುಂಡ್.

¹⁰ನಿಂಗಳ ದಾರೂ ಗುರು ಎಣ್ಣಿಯಂಡ್ ಕಾಕ್‍ವಕ್ ಬುಡತಿ ಎನ್ನಂಗೆಣ್ಣ್‌ಚೇಂಗಿ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಒಬ್ಬನೇ ನಿಂಗಕ್ ಗುರು ಆಯಿತುಂಡ್.

¹¹ನಿಂಗಡ ಕೂಟ್‌ಲ್ ಬಲ್ಯಂವೊನಾಯಿತ್ ಇಪ್ಪಂವೊ ಎಲ್ಲಾರ್‌ಕು ಆಳಾಯಿತಿರಂಡು.

¹²ಬೋರೆಯಿಂಗಕಿಂಜ ಬಲ್ಯದಾಯಿತ್ ಇರಂಡೂಂದ್ ನೋಟ್‍ವಂವೊ ಅಡಿಕ್ ಬಪ್ಪ, ಆಚೇಂಗಿ ಬಗ್ಗಿತ್ ನಡ್‌ಪಂವೊ ಮಿಂಞಕ್ ಬಪ್ಪ.

¹³ಕಪಟಿಯಾನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳೇ, ಫರಿಸಾಯಂಗಳೇ ನಿಂಗಕ್ ಅಯ್ಯೋ. ಜನ ಪ್ರವೇಶ ಮಾಡತನೆಕೆ ಪರಲೋಕ ರಾಜ್ಯತ್‍ರ ಪಡಿನ ಬೀಗ ಇಡ್‍ವಿರ. ನಿಂಗಳು ಅದ್ಂಡ ಒಳ್‍ಕ್ ಪೋಪುಲೆ, ಪೋಪಯಿಂಗಳ ಪೋಪಕ್ ಬುಡ್‍ವದು ಇಲ್ಲೆ.

¹⁴ಕಪಟಿಯಾನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳೇ, ಫರಿಸಾಯಂಗಳೇ ನಿಂಗಕ್ ಅಯ್ಯೋ! ಬೋರೆಯಿಂಗ ಕಾಂಗಂಡೂಂದ್ ಉದ್ದವಾಯಿತ್ ಪ್ರಾರ್ಥನೆ ಮಾಡಿಯಂಡ್, ವಿದವೆರ ಮನೆಕ್ ನುಗ್ಗಿತ್ ಅಯಿಂಗಕ್ ವಂಚನೆ ಮಾಡಿಯಂಡ್ ಉಳ್ಳಯಿಂಗಳೇ, ನಿಂಗಕ್ ದುಂಬ ಶಿಕ್ಷೆ ಉಂಡ್.

¹⁵ಕಪಟಿಯಾನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳೇ, ಫರಿಸಾಯಂಗಳೇ ನಿಂಗಕ್ ಅಯ್ಯೋ! ಒಬ್ಬನ ನಿಂಗಡ ಕೂಟ್‍ಕ್ ಕೊಂಡ್ ಬಪ್ಪಕಾಯಿತ್, ಬೂಮಿನ ಸಮುದ್ರತ್‍ನ ಸುತ್ತಿತ್ ಬಪ್ಪಿರ. ಒಬ್ಬ ನಿಂಗಡ ಮಾರ್ಗಕ್ ಕೂಡ್‍ನ ಪಿಂಞ ಅಂವೊನ ನಿಂಗಕಿಂಜ ದಂಡ್ ಪಾಲ್ ನರಕತ್‍ಲ್ ಇಪ್ಪನೆಕೆ ಮಾಡ್‌ವಿರ.

¹⁶ಬಟ್ಟೆ ಕಾಟುವ ಕುರ್‌ಡಂಗಳೇ, ನಿಂಗಕ್ ಅಯ್ಯೋ! ಒಬ್ಬ ದೇವಾಲಯತ್‍ರ ಮೇಲೆ ಆಣೆ ಇಟ್ಟತೇಂಗಿ ಅದ್ ಆಣೆ ಅಲ್ಲಾಂದ್ ಎಣ್ಣುವಿರ, ಆಚೇಂಗಿ ದೇವಾಲಯತ್‍ಲ್ ಉಳ್ಳ ಪೊನ್ನ್‌ರ ಪೆದತ್‍ಲ್ ಆಣೆ ಇಟ್ಟತೇಂಗಿ, ಅದ್‍ನ ಪೂರೈಚಿಡಂಡೂಂದ್ ಎಣ್ಣುವಿರ.

¹⁷ಬುದ್ದಿಯಿಲ್ಲತ ಕುರ್‌ಡಂಗಳೇ, ಏದ್ ಬಲ್ಯದ್? ಪೊನ್ನಾ ಅಥವ ಪೊನ್ನ್‌ನ ಪವಿತ್ರ ಮಾಡ್‌ವ ದೇವಾಲಯವ?

¹⁸ಇಂಞು ನಿಂಗ, ಒಬ್ಬ ಬಲಿಪೀಠತ್‍ರ ಮೇಲೆ ಆಣೆ ಇಟ್ಟತೇಂಗಿ ಅದ್ ಆಣೆ ಅಲ್ಲಾಂದು, ಅದ್‍ಲ್ ಉಳ್ಳ ಕಾಣಿಕೆರ ಮೇಲೆ ಆಣೆ ಇಟ್ಟತೇಂಗಿ ಅದ್‍ನ ನಡ್‌ತಿತೇ ತ್‍ೕಕಂಡೂಂದು ಎಣ್ಣುವಿರ.

¹⁹ಕುರ್‌ಡಂಗಳೇ ಏದ್ ಬಲ್ಯದ್? ಕಾಣಿಕೆಯಾ ಅಥವ ಕಾಣಿಕೆನ ಪವಿತ್ರ ಮಾಡ್‌ವ ಬಲಿಪೀಠವಾ?

²⁰ಆನಗುಂಡ್ ಒಬ್ಬ, ಬಲಿಪೀಠತ್‍ರ ಮೇಲೆ ಆಣೆ ಇಟ್ಟತೇಂಗಿ, ಆ ಜಾಗತ್‍ರ ಮೇಲೆ ಪಿಂಞ ಅದ್ಂಡಮೇಲೆ ಉಳ್ಳ ಎಲ್ಲಾ ವಸ್ತುರ ಮೇಲೆ ಆಣೆ ಇಟ್ಟನೆಕೆ.

²¹ಅನ್ನನೆ ಒಬ್ಬ ದೇವಾಲಯತ್‍ರ ಮೇಲೆ ಆಣೆ ಇಟ್ಟತೇಂಗಿ, ಅದ್ಂಡಮೇಲೆ ಪಿಂಞ ಅದ್‍ಲ್ ವಾಸ ಮಾಡ್‌ವ ದೇವಡ ಮೇಲೆ ಆಣೆ ಇಟ್ಟನೆಕೆ.

²²ಪಿಂಞ ನಿಂಗ ಪರಲೋಕತ್‍ರ ಮೇಲೆ ಆಣೆ ಇಟ್ಟತೇಂಗಿ, ನಿಂಗ ದೇವಡ ಸಿಂಹಾಸನತ್‍ರ ಮೇಲೆ ಪಿಂಞ ಅದ್‍ಲ್ ಅಳ್‍ತಂಡುಳ್ಳಂವೊಂಡ ಮೇಲೆ ಆಣೆ ಇಟ್ಟನೆಕೆ.

²³ಕಪಟಿಯಾನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳೇ, ಫರಿಸಾಯಂಗಳೇ, ನಿಂಗಕ್ ಅಯ್ಯೋ, ನಿಂಗ ಪುದಿನ ತೊಪ್ಪು, ತೊಳ್‌ಸಿ ಪಿಂಞ ಜೀರಿಗೆನ ಪತ್ತ್‌ಲ್ ಒರ್ ಪಾಲ್ ಕೊಡ್‍ಪಿರ, ಆಚೇಂಗಿ ದರ್ಮಶಾಸ್ತ್ರ ಪುಸ್ತಕತ್‍ಲ್ ದುಂಬ ಮುಕ್ಯವಾನ ನೀತಿನ, ಕನಿಕರತ್‍ನ, ನಂಬಿಕೇನ ಬುಟ್ಟಿತುಳ್ಳಿರ. ಇದ್‍ನೆಲ್ಲಾ ನಿಂಗ ಮಾಡಂಡು, ಅದ್‍ನೂ ಬುಡ್‌ವಕ್ಕಾಗ.

²⁴ಬಟ್ಟೆ ಕಾಟುವ ಕುರ್‌ಡಂಗಳೇ! ನಿಂಗ ಗೊತ್ತಿಲ್ಲತೆ ಸೊಳ್ಳೆನ ತಿಂಬಕ್ಕಾಗಾಂದ್ ಸೋಸುವಿರ ಆಚೇಂಗಿ ಒಂಟೆನ ನುಗ್ಗ್‌ವಯಿಂಗಳಾಯಿತುಳ್ಳಿರ.

²⁵ಕಪಟಿಯಾನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳೇ, ಫರಿಸಾಯಂಗಳೇ ನಿಂಗಕ್ ಅಯ್ಯೋ! ನಿಂಗ ಉಂಬ ಪಾತ್ರತ್‍ನ ಪಿಂಞ ಕಪ್ಪ್‌ನ ಪೊರಮೆ ಚಾಯಿತೆ ಶುದ್ದವಾಯಿತ್ ಕತ್ತ್‌ವಿರ ಆಚೇಂಗಿ ಒಳ್‍ಲ್ ಬರಿ ಅತಿ ಆಸೆ ಪಿಂಞ ಒಟ್ಟೆಕಿಚ್ಚ್ ಮಾತ್ರ ದುಂಬಿತುಂಡ್.

²⁶ಕುರ್‌ಡನಾನ ಫರಿಸಾಯನೇ, ಮಿಂಞ ನೀನ್ ಉಂಬ ಪಾತ್ರತ್‍ರ ಒಳ್‍ಲ್ ಚಾಯಿತೆ ಶುದ್ದ ಮಾಡ್. ಅಕ್ಕ, ಪೊರಮೆ ಉಳ್ಳದು ಶುದ್ದ ಆಪ.

²⁷ಕಪಟಿಯಾನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳೇ, ಫರಿಸಾಯಂಗಳೇ ನಿಂಗಕ್ ಅಯ್ಯೋ! ನಿಂಗ ಚುಣ್ಣ ಪೊಜ್ಜ ಗೋರಿರನೆಕೆ ಉಳ್ಳಿರ. ಎನ್ನನೆ ಎಣ್ಣ್‌ಚೇಂಗಿ, ಅದ್ ಪೊರಮೆ ಚಾಯಿ ಕಾಂಬ ಒಳ್‍ಲ್ ನೋಟ್‌ನಕ ಚತ್ತ ಮನುಷ್ಯಂಗಡ ಮೂಳೆ ಪಿಂಞ ಅಶುದ್ದ ಚಾವ್ ತಡಿ ಇಪ್ಪ.

²⁸ಅನ್ನನೆ ನಿಂಗ ಪೊರಮೆ ನೀತಿವಂತಯಿಂಗಡನೆಕೆ ಕಾಂಬಿರ. ಆಚೇಂಗಿ ಒಳ್‍ಲ್ ದುಂಬ ಕಪಟತ್‌ಲು ಅನ್ಯಾಯತ್‌ಲು ದುಂಬಿತುಳ್ಳಿರ.

²⁹ಕಪಟಿಯಾನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳೇ, ಫರಿಸಾಯಂಗಳೇ ನಿಂಗಕ್ ಅಯ್ಯೋ! ನಿಂಗ ಪ್ರವಾದಿಯಂಗಡ ಗೋರಿನ ಕೆಟ್ಟಿತ್ ನೀತಿವಂತಯಿಂಗಡ ಗೋರಿಕ್ ಅಲಂಕಾರ ಮಾಡಿತ್,

³⁰ನಂಗ ಪೆರಿಯಯಿಂಗಡ ಕಾಲತ್‍ಲ್ ಇಂಜಿತುಂಡೇಂಗಿ ಅಯಿಂಗಡ ಕೂಡೆ ಪ್ರವಾದಿಯಂಗಳ ಕೊಂದ ಪಾಪತ್‍ಲ್ ನಂಗ ಪಾಲ್‌ದಾರರಾಯಿತ್ ಇಪ್ಪಕಿಂಜಿಲೇಂದ್ ಎಣ್ಣುವಿರ.

³¹ಅನ್ನನಾಚೇಂಗಿ, ಪ್ರವಾದಿಯಂಗಳ ಕೊಂದಯಿಂಗಡ ಮಕ್ಕಳಾಯಿತುಳ್ಳಿರಾಂದ್ ನಿಂಗಕ್ ನಿಂಗಳೇ ಸಾಕ್ಷಿ ಆಯಿತುಳ್ಳಿರ.

³²ನಿಂಗ ನಿಂಗಡ ಪೆರಿಯಯಿಂಗ ಸುರು ಮಾಡ್‍ನ ಪಾಪತ್‍ನೆಲ್ಲಾ ಪೂರ್ತಿ ಮಾಡಿ.

³³ಪಾಂಬ್‍ರನೆಕೆ ಉಳ್ಳಯಿಂಗಳೇ, ಸರ್ಪಜಾತಿಕ್ ಕೂಡ್‌ನಯಿಂಗಳೇ! ನರಕಕ್ ಪೋಪದಿಂಜ ನಿಂಗ ಎನ್ನನೆ ಬಚಾವಾಪಿರ?

³⁴ಆನಗುಂಡ್ ನಾನ್ ಪ್ರವಾದಿಯಳ, ಜ್ಞಾನಿಯಳ ಪಿಂಞ ನ್ಯಾಯಪ್ರಮಾಣ ಗೊತ್ತುಳ್ಳ ಉಪಾದ್ಯಂಗಳ ನಿಂಗಡ ಪಕ್ಕ ಅಯಿಪಿ. ಅಯಿಂಗಡ ಕೂಟ್‌ಲ್ ಚೆನ್ನ ಜನಳ ನಿಂಗ ಕೊಲ್ಲ್‌ವಿರ, ಚೆನ್ನ ಜನಳ ಶಿಲುಬೇಕ್ ಇಡ್‌ವಿರ. ಚೆನ್ನ ಜನಳ ನಿಂಗಡ ಸಬಾಮಂದಿರತ್‍ಲ್ ಕೊರಡ್‍ಲ್ ಪೊಜ್ಜಿತ್ ನಾಡಿಂಜ ನಾಡ್‍ಕ್ ದೌತಿಯಂಡ್ ಪೋಪಿರ.

³⁵ನೀತಿವಂತಂವೊನಾನ ಕೊಲೆಯಾನ ಹಾಬೇಲಂಡ ಚೋರೆಯಿಂಜ ಪುಡ್‌ಚಿತ್, ಬಲಿ ಕೊಡ್‍ಪ ಜಾಗಕು ದೇವಾಲಯಕು ಮದ್ಯತ್‍ಲ್ ಕೊಲೆಯಾನ ಬರಕೀಯಂಡ ಮೋಂವೊನಾನ ಜಕರಿಯಂಡ ಚೋರೆಕತ್ತನೆ ಈ ಲೋಕತ್‍ರ ಮೇಲೆ ಚೆಲ್ಲ್‌ನ ಎಲ್ಲಾ ನೀತಿವಂತಯಿಂಗಡ ಚೋರೆಯಿಂಜ ಬಪ್ಪಂತ ಅಪರಾದ ನಿಂಗಡ ಮೇಲೆ ಬೂವ.

³⁶ಇದೆಲ್ಲ ಈ ಸಂತಾನಕಾರಂಗಡ ಮೇಲೆ ಬಪ್ಪಾಂದ್ ನಾನ್ ನಿಂಗಕ್ ನೇರಾಯಿತು ಎಣ್ಣ್‌ವಿ.

³⁷ಓ ಯೆರೂಸಲೇಮೇ, ಯೆರೂಸಲೇಮೇ, ಪ್ರವಾದಿಯಂಗಳ ಕೊಂದಿತ್ ದೇವ ಅಯಿಚ ಜನಳ ಕಲ್ಲ್ ಕನ್‍ಚಿತ್ ಕೊಲ್ಲುವ ಜನಳೇ, ಕೋಳಿ ತಾಂಡ ಕುಂಞಿಯಳ ರೆಕ್ಕೆರ ಒಳ್‍ಕ್ ಕೂಟಿಯಂಡ್ ಇಪ್ಪನೆಕೆ, ನೀಡ ಮಕ್ಕಳ ನಾನ್ ಸಹ ಕೂಟಿತ್ ರಕ್ಷಣೆ ಮಾಡ್‌ವಕ್ ಎಚ್ಚಕೋ ಕುರಿ ನಾಕ್ ಮನಸ್ಸ್ ಇಂಜತ್, ಆಚೇಂಗಿ ನಿಂಗಕ್ ನಾನ್ ಅನ್ನನೆ ಮಾಡ್‍ವದ್ ಕುಶಿಯಿಲ್ಲೆ.

³⁸ಆನಗುಂಡ್, ನಿಂಗಡ ದೇವಾಲಯ ದಾರೂ ಪೋಪಕ್ಕಾಗತ ಜಾಗ ಆಯಿಪೋಪ.

³⁹ಒಡೆಯಂಡ ಪೆದತ್‍ಲ್ ಬಪ್ಪಂವೊ ಆಶೀರ್ವಾದ ಮಾಡ್‍ನಂವೋಂದ್[69] ನಿಂಗ ಎಣ್ಣ್‌ವಕತ್ತನೆ ಇಲ್ಲಿಂಜ ನನ್ನ ನಿಂಗ ಕಾಂಬ್‍ಲೇಂದ್ ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.