Read Kodava ಮತ್ತಾಯ 24 Bible Online

ಮತ್ತಾಯ 24 - Kodava bible

ಮತ್ತಾಯ 24

¹ಯೇಸು ದೇವಾಲಯತ್ಂಜ ಪೊರಮೆ ಪೋಪಕಾಪಕ ಅಂವೊಂಡ ಶಿಷ್ಯಂಗ ದೇವಲಾಯತ್‌ರ ಕಟ್ಟಡತ್‌ನ ಅಂವೊಂಗ್ ಕಾಟ್‍ವಕ್ ಪಕ್ಕ ಬಾತ್.

²ಅಕ್ಕ ಯೇಸು ಅಯಿಂಗಳ ನೋಟಿತ್, ಇದ್‍ನೆಲ್ಲ ನೋಟ್‌ವಿರಲ್ಲ, ಈ ಜಾಗತ್‍ಲ್ ಒರ್ ಕಲ್ಲ್‌ರ ಮೇಲೆ ಇಂಞ್ಞೊರ್ ಕಲ್ಲ್ ಇಲ್ಲತನೆಕೆ ಎಲ್ಲಾನ ಪೊಳಿಚಿಡ್‍ವಾಂದ್ ನೇರಾಯಿತು ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.

³ಯೇಸು ಆಲಿವ್ ಕುಂದ್‌ರ ಕೊಡಿಲ್ ಅಳ್‌ತಿತಿಪ್ಪಕ, ಅಂವೊಂಡ ಶಿಷ್ಯಂಗ ಯೇಸುರ ಪಕ್ಕ ಬೋರೆಯಾಯಿತ್ ಬಂತ್: ಇದೆಲ್ಲಾ ಎಕ್ಕ ಆಪಾಂದ್ ಗುಟ್ಟಾಯಿತ್ ಕ್‍ೕಟತ್. ನೀನ್ ಇಂಞೊಮ್ಮ ಬಪ್ಪಕೂ, ಈ ಯುಗತ್‌ರ ಅಂತ್ಯಕೂ ಗುರ್‌ತ್ ಎಂತ್‍ೕಂದ್ ನಂಗಕ್ ಎಣ್ಣಂಡೂಂದ್ ಕ್‍ೕಟತ್.

⁴ಅದ್ಂಗ್ ಯೇಸು: ನಿಂಗಳ ದಾರೂ ವಂಚನೆ ಮಾಡತನೆಕೆ ಎಚ್ಚರತ್ ಇರಿ.

⁵ಎನ್ನಂಗೆಣ್ಣ್‌ಚೇಂಗಿ ನಾಡ ಪೆದ ಎಣ್ಣಿಯಂಡ್, ನಾನೇ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್ ದುಂಬ ಜನ ಬಂತ್ ಜನಳ ವಂಚನೆ ಮಾಡ್‌ವ.

⁶ಯುದ್ದತ್‍ನ ಪಿಂಞ ಯುದ್ದತ್‍ರ ಸುದ್ದಿನ ಕ್‍ೕಪಿರ. ಆಚೇಂಗಿ ನಿಂಗ ಬೊತ್ತತನೆಕೆ ಎಚ್ಚರತ್ ಇರಿ. ಎನ್ನಂಗೆಣ್ಣ್‌ಚೇಂಗಿ ಇನ್ನನೆ ಎಲ್ಲಾ ನಡ್‌ಕಂಡು. ಆಚೇಂಗಿಯು ಅದ್ ಅಂತ್ಯ ಕಾಲವಾಯಿತ್‌ಪ್ಪುಲೆ.

⁷ಜನಕ್ ವಿರೋದವಾಯಿತ್ ಜನಳು, ರಾಜ್ಯಕ್ ವಿರೋದವಾಯಿತ್ ರಾಜ್ಯವು ಯುದ್ದ ಮಾಡ್‌ವ; ದುಂಬ ಜಾಗತ್‍ಲ್ ಬಲ್ಯ ಬೂಕಂಪ ಆಪ, ಬರಗಾಲ ಬಪ್ಪ.

⁸ಇದೆಲ್ಲ, ಪೊಣ್ಣಾಳ್‌ಕ್ ಪೆರುವ ನೊಂಬಲ ಸುರು ಆಪನೆಕೆ.

⁹ಅಕ್ಕ ನಿಂಗಳ ಹಿಂಸೆ ಮಾಡ್‌ವಕಾಯಿತ್ ಒಪ್ಪ್‌ಚಿಟ್ಟಿತ್, ನಿಂಗಳ ಕೊಲ್ಲ್‌ಚಿಡುವ. ನಾಡ ಪೆದತ್‍ನಗುಂಡ್ ಎಲ್ಲಾ ದೇಶತ್‍ರ ಜನ ನಿಂಗಳ ದ್ವೇಶ ಮಾಡ್‌ವ.

¹⁰ಆ ಸಮಯತ್‍ಲ್ ದುಂಬ ಜನ ನಂಬಿಕೆಯಿಂಜ ದೂರ ಪೋಯಿತ್, ಒಬ್ಬಂಗ್ ಒಬ್ಬ ಮೋಸ ಮಾಡಿತ್, ಒಬ್ಬಂಡ ಮೇಲೆ ಒಬ್ಬ ದ್ವೇಶ ಮಾಡ್‌ವ.

¹¹ದುಂಬ ಕಳ್ಳ ಪ್ರವಾದಿಯಂಗಡ ಕೂಟ ಬೊಳ್ಂದಿತ್ ದುಂಬ ಜನಳ ಮೋಸ ಮಾಡ್‌ವ.

¹²ಇದ್‍ಲ್ಲತೆ ಪಾಪ ದುಂಬಿತ್, ದುಂಬ ಜನಡ ಪ್ರೀತಿ ತಣ್ಂಜ್ ಪೋಪ.

¹³ಆಚೇಂಗಿ ಕಡೇಕತ್ತನೆ ಸ್ತಿರವಾಯಿತ್ ನಿಪ್ಪಂವೊಂಗ್ ರಕ್ಷಣೆ ಕ್‍ಟ್ಟುವ.

¹⁴ದೇವಡ ರಾಜ್ಯತ್‍ರ ಈ ನಲ್ಲ ಸುದ್ದಿ ಎಲ್ಲಾ ಜನಕು ಸಾಕ್ಷಿಯಾಯಿತ್ ಪ್ರಚಾರ ಆಯಿತ್‌ಪ್ಪ. ಅಕ್ಕ ಅಂತ್ಯ ಬಪ್ಪ.

¹⁵ಇಂಞು ಎಣ್ಣಕ, ಪ್ರವಾದಿಯಾನ ದಾನಿಯೇಲ ಎಣ್ಣ್‌ನನೆಕೆ: ಇದ್‍ನ ಓದ್‍ವಂವೊ, ಅರ್ಥ ಮಾಡಿಯಡ್, ಪಾಳ್ ಮಾಡ್‌ವ ಅಸಹ್ಯ ವಸ್ತು, ಪವಿತ್ರ ಜಾಗತ್‍ಲ್ ನಿಪ್ಪದ್‌ನ ನಿಂಗ ಕಾಂಬಕ,[70]

¹⁶ಯೂದಾಯ ದೇಶತ್‍ಲ್ ಉಳ್ಳಯಿಂಗ ಕುಂದ್‌ರ ಕೊಡಿಕ್ ಓಡಡ್;

¹⁷ಮನೆರ ಕೊಡಿಲ್ ಉಳ್ಳಂವೊ, ಮನೇರೊಳ್‌ಕ್ ಪೋಯಿತ್ ಏದ್ ಒರ್ ಸಾಮಾನ್‌ನ ಎಡ್‌ತ ಬಪ್ಪಕ್ ಪೋಕತೆ ಇರಂಡು. ಬೇಲ್‌ಲ್ ಇಪ್ಪ ಮನುಷ್ಯಂಗ ಅಂವೊಂಡ ಬಟ್ಟೇನ ಎಡ್‌ತ ಬಪ್ಪಕ್ ಪೋಪಕ್ಕಾಗ.

¹⁸ಬೇಲ್‌ಲ್ ಉಳ್ಳಂವೊ ತಾಂಡ ಬಟ್ಟೇನ ಎಡ್‌ತ ಬಪ್ಪಕ್ ಪೋಕತೆ ಇರಡ್.

¹⁹ಆ ದಿವಸತ್‍ಲ್ ಕೆಲಕರ್ತಿಯಂಗಕೂ, ಕುಂಞಿಕ್ ಪಾಲ್ ಕೊಡ್‍ಪ ಅವ್ವಂಗಕೂ ಅಯ್ಯೋ!

²⁰ನಿಂಗ ತಪ್ಪ್‌ಚಿಟ್ಟಂಟ್ ಪೋಪ ದಿವಸ ಕುಳ್‌ರ್ ಕಾಲವಾಯಿತ್ ಅಥವ ಸಬ್ಬತ್ ದಿವಸವಾಯಿತ್ ಇಪ್ಪದ್ ಬೋಂಡಾಂದ್ ದೇವನ ಪ್ರಾರ್ಥನೆ ಮಾಡಿಯೊಳಿ.

²¹ಎನ್ನಂಗೆಣ್ಣ್‌ಚೇಂಗಿ, ಈ ಲೋಕತ್‍ನ ಸೃಷ್ಟಿ ಮಾಡ್‍ನ ಸಮಯತ್ಂಜ ಇಲ್ಲಿಕತ್ತನೆ ಆಯಿತಿಲ್ಲತ, ಇಂಞು ಮಿಂಞಕು ಆಕತ, ದುಂಬ ಹಿಂಸೆ ಅಕ್ಕ ಆಪ.

²²ಆ ದಿವಸತ್‍ನ ದೇವ ಕಮ್ಮಿ ಮಾಡತೆ ಇಂಜತೇಂಗಿ ದಾರೂ ಬದ್‌ಕ್‌ಲೆ. ಆಚೇಂಗಿ, ದೇವ ಗೊತ್ತ್ ಮಾಡಿತುಳ್ಳ ಮಕ್ಕಕಾಯಿತ್ ಆ ದಿವಸತ್‍ನ ಕಮ್ಮಿ ಮಾಡ್‌ವ.

²³ಅಕ್ಕ, ನೋಟಿ! ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಇಲ್ಲಿ ಉಂಡ್, ಅಲ್ಲಿ ಉಂಡ್‍ೕಂದ್ ಎಣ್ಣ್‌ಚೇಂಗಿ, ನಂಬತಿ.

²⁴ಎನ್ನಂಗೆಣ್ಣ್‌ಚೇಂಗಿ, ಕಳ್ಳ ಕ್ರಿಸ್ತಂಗ ಪಿಂಞ ಕಳ್ಳ ಪ್ರವಾದಿಯಂಗ ಬಂದಿತ್, ಕಯ್ಯುವೇಂಗಿ ದೇವ ಗೊತ್ತ್ ಮಾಡಿತುಳ್ಳಯಿಂಗಡ ನಂಬಿಕೇನ ಕೆಡ್‍ತ್‌ವಕ್ ವಂಚನೆ ಮಾಡ್‌ವನೆಕೆ ಗುರ್‌ತ್ ಕಾಟಿತ್ ಆಶ್ಚರ್ಯ ಕಾರ್ಯತ್‍ನ ಮಾಡ್‌ವ.

²⁵ಆಚೇಂಗಿ, ನಾನ್ ಇದ್‍ನೆಲ್ಲ ಆಪಕ್ ಮಿಂಞಲೇ ಎಣ್ಣಿ ತಂದಿಯೆ.

²⁶ಆಂಗ್, ಜನ ನೋಟಿ ಅಂವೊ ಮಣಬೂಮಿಲ್ ಉಂಡ್‍ೕಂದ್ ಎಣ್ಣ್‌ಚೇಂಗಿ, ನಿಂಗ ಅಲ್ಲಿಕ್ ಪೋಕತಿ; ಇಲ್ಲಿ ನೋಟಿ ಕೋಂಬರೆ ಒಳ್‍ಕ್ ಉಂಡ್‍ೕಂದ್ ಎಣ್ಣ್‌ಚೇಂಗಿ ಅದ್‍ನ ನಂಬತಿ.

²⁷ಮಿನ್ನಲ್ ಕ್‍ೕಕ್ ದಿಕ್ಕ್‌ಲ್ ಪುಟ್ಟಿತ್ ಮೇಕ್ ದಿಕ್ಕ್‌ಕತ್ತನೆ ಪ್ರಕಾಶ ಆಪನೆಕೆ ಮನುಷ್ಯಕುಮಾರ ಬಪ್ಪದ್ ಇನ್ನನೆ ಇಪ್ಪ.

²⁸ಚಾವ್ ತಡಿ ಎಲ್ಲಿ ಉಂಡೋ ಅಲ್ಲಿ ಅಡ್‍ಪದ್ದ್ ಬಂತ್ ಕೂಡ್‍ವ.

²⁹ಅಂದತ ಕಾಲತ್‍ಲ್, ಅಂತ ಸಂಕಟ ಕಾಲ ಆನ ಪಿಂಞ, ಸೂರ್ಯ ಇರ್‌ಟ್ ಆಪ, ಚಂದ್ರ ಬೊಳಿ ಕೊಡ್‍ಪ್‍ಲೆ. ಬಾನತ್‍ರ ಮೀನ್ ಅಡಿಕ್ ಬೂವ. ಬಾನತ್‍ರ ಪ್ರತಿಯೊರ್ ಶಕ್ತಿಯು ನಡ್‌ಗುವ.

³⁰ಅಕ್ಕ ಮನುಷ್ಯಕುಮಾರಂಡ ಗುರ್‌ತ್ ಬಾನತ್‍ಲ್ ಕಾಂಬ. ಮನುಷ್ಯಕುಮಾರ ದುಂಬ ಶಕ್ತಿಲ್, ದುಂಬ ಮಹಿಮೆಲ್ ಮೋಡತ್‍ಲ್ ಬಾನತ್‍ಲ್ ಬಪ್ಪದ್‍ನ ಈ ಲೋಕತ್‍ಲ್ ಉಳ್ಳ ಎಲ್ಲಾ ಜನಳು ಕಂಡಿತ್ ಮೊರಡ್‍ವ.

³¹ವಾಲಗತ್‍ರ ಬಲ್ಯ ಸದ್ದ್‌ರ ಕೂಡೆ ಅಂವೊ ತಾಂಡ ದೇವದೂತಂಗಳ ಅಯಿಪ. ಅಯಿಂಗ ಅಂವೊ ಗೊತ್ತ್ ಮಾಡಿತುಳ್ಳಯಿಂಗಳ ಬಾನತ್‍ರ ಒರ್ ಮೂಲೆಯಿಂಜ ಇಂಞೊರ್ ಮೂಲೆಕತ್ತನೆ ನಾಲ್ ದಿಕ್ಕ್‌ಯಿಂಜಲೂ ಕೂಟ್‌ವ.

³²ಅತ್ತಿ ಮರ ನಿಂಗಕ್ ಒರ್ ಪಾಠ ಪಡಿಪ್‌ಚಿಡಡ್. ಆ ಮರತ್‍ರ ಕೊಂಬ್ ಪಚ್ಚೆ ಆಯಿತ್, ಚಿಗ್‌ರ್ ಎಲೆ ಬಪ್ಪಕ, ನಿಂಗಕ್ ಬೇನಿಕಾಲ ಬಪ್ಪಕಾಚೀಂದ್ ಗೊತ್ತಾಪ.

³³ಅನ್ನನೆ ಈ ತರತ್‍ರ ಘಟನೆಯೆಲ್ಲ ನಿಂಗ ಕಾಂಬಕಾಪಕ, ಆ ದಿನ ದುಂಬ ಪಕ್ಕ ಉಂಡ್, ಅಂವೊ ಪಡಿರ ಪಕ್ಕತ್ ಬಂದಿತುಂಡ್‍ೕಂದ್ ನಿಂಗಕ್ ಗೊತ್ತಿರಡ್.

³⁴ಈ ಘಟನೆಯೆಲ್ಲ ಆಪಕ್ ಮಿಂಞ ಈ ಸಂತಾನ ಪಾಳಾಯಿ ಪೋಪುಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ.

³⁵ಬಾನ ಬೂಮಿ ಎಲ್ಲಾ ನಾಶ ಆಪ, ಆಚೇಂಗಿ ನಾಡ ತಕ್ಕ್ ನಾಶ ಆಪುಲೆ.

³⁶ಆ ದಿನವು, ಆ ಸಮಯವು ನಾಡ ಅಪ್ಪನಾನ ದೇವ ಒಬ್ಬನ ಬುಟ್ಟಿತ್ ಬೋರೆ ದಾರ್‌ಕು ಗೊತ್ತ್‌ಲ್ಲೆ. ಪರಲೋಕತ್‍ಲ್ ಉಳ್ಳ ದೇವದೂತಂಗಕೂ ಪಿಂಞ ಅಂವೊಂಡ ಮೋಂವೊಂಗೂ ಸಹ ಗೊತ್ತಿಪ್ಪುಲೆ.

³⁷ನೋಹಂಡ [71] ದಿವಸತ್‍ಲ್ ಎನ್ನನೆ ನಡ್ಂದತೋ, ಅನ್ನನೆ ಮನುಷ್ಯಕುಮಾರ ಬಪ್ಪ ಕಾಲತ್‍ಲು ನಡ್‍ಪ.

³⁸ಎನ್ನನೆ ಎಣ್ಣ್‌ಚೇಂಗಿ ಜಲಪ್ರಳಯ ಬಪ್ಪಕ್ ಮಿಂಞ, ನೋಹ ಕಪ್ಪಲ್‍ರ ಒಳ್‍ಕ್ ಪೋಪಕತ್ತನೆ ಜನ ಉಂಡಿತ್, ಕುಡಿಚಿತ್ ಮಂಗಲ ಕಯಿಚಂಡ್ ಮಂಗಲ ಮಾಡಿ ಕೊಡ್‌ತಂಡ್ ಇಂಜತ್.

³⁹ಜಲಪ್ರಳಯ ಬಂತ್ ಎಲ್ಲಾ ಜನಳ ಒಕ್ಕಿಯಂಡ್ ಪೋಪಕತ್ತನೆ ಅಯಿಂಗ ಅರ್ಥ ಮಾಡತೆ ಇಂಜತ್. ಅನ್ನನೆ ಮನುಷ್ಯಕುಮಾರ ಬಪ್ಪ ಕಾಲತ್‍ಲು ಇಪ್ಪ.

⁴⁰ಅಕ್ಕ ದಂಡ್ ಜನ ಬೇಲ್‌ಲ್ ಕೆಲಸ ಮಾಡಿಯಂಡ್ ಇಪ್ಪ; ಒಬ್ಬನ ಕೊಡಿಕ್ ಎಡ್‌ತ್‌ರ್‌ವ, ಒಬ್ಬನ ಬುಟ್ಟ್‌ರ್‌ವ.

⁴¹ದಂಡ್ ಪೊಣ್ಣಾಳುವ ಅರ್‍ಪ ಕಲ್ಲ್‌ಲ್ ಬೀಜಿಯಂಡ್ ಇಪ್ಪಕ, ಒಬ್ಬಳ ಎಡ್‌ತ್‌ರ್‌ವ ಇಂಞೊಬ್ಬಳ ಬುಟ್ಟ್‌ರ್‌ವ.

⁴²ನಿಂಗಡ ಒಡೆಯ ಎಕ್ಕ ಬಪ್ಪಾಂದ್ ಗೊತ್ತಿಲ್ಲತಗುಂಡ್, ಎಚ್ಚರವಾಯಿತಿರಿ.

⁴³ಒರ್ ಮನೆರ ಎಜಮಾನಂಗ್ ಕಳ್ಳ ಎಕ್ಕ ಬಪ್ಪಾಂದ್ ಗೊತ್ತ್‌ಂಜತೇಂಗಿ ಅಂವೊ ವರಿಯತೆ, ಕಳ್ಳ ಮನೆರ ಒಳ್‍ಕ್ ನುಗ್ಗತನೆಕೆ ಮನೆನ ಕಾತಂಡಿಪ್ಪಾಂದ್ ನಿಂಗಕ್ ಗೊತ್ತುಂಡ್.

⁴⁴ಆನಗುಂಡ್ ನಿಂಗಳು ತಯಾರಾಯಿತಿರಿ. ಎನ್ನಂಗೆಣ್ಣ್‌ಚೇಂಗಿ ನಿಂಗ ಗೇನ ಮಾಡತ ಸಮಯತ್‍ಲ್ ಮನುಷ್ಯಕುಮಾರ ಬಪ್ಪ.

⁴⁵ಅನ್ನನಾಚೇಂಗಿ ತಾಂಡ ಮನೆಕಾರಂಗಕ್ ಸರಿಯಾನ ಸಮಯತ್‍ಲ್ ಉಂಬಕ್ ಕೂಳ್ ಕೊಡ್‍ಪನೆಕೆ, ಅಯಿಂಗಡ ಮೇಲೆ ಎಜಮಾನ ನೇಮಿಚಿಟ್ಟ ಅದಿಕಾರಿಯಾಯಿತುಳ್ಳ ನಂಬಿಕಸ್ತನು, ಜ್ಞಾನಿಯೂ ಆನ ಸೇವಕ ದಾರ್?

⁴⁶ಎಜಮಾನ ಬಪ್ಪಕ ಏದ್ ಒರ್ ಆಳ್ ಇನ್ನನೆ ಮಾಡ್‌ವಾನ ಅಂವೊ ಕಾಂಬ, ಆ ಆಳ್‍ಕಾರನೇ ಆಶೀರ್ವಾದ ಪಡ್ಂದಂವೊ.

⁴⁷ಅಂವೊನ ಆ ಎಜಮಾನ ತಾಂಡ ಎಲ್ಲಾ ಆಸ್ತಿಕೂ ಜವಾಬ್ದಾರನಾಯಿತ್ ನೇಮಿಚಿಡ್‍ವಾಂದ್ ನೇರಾಯಿತು ನಿಂಗಕ್ ಎಣ್ಣ್‌ವಿ.

⁴⁸ಆಚೇಂಗಿ, ಆ ಆಳ್‍ಕಾರ ಕೆಟ್ಟಂವೊನಾಯಿತ್ಂಜಿತ್, ನಾಡ ಎಜಮಾನ ಚೆನ್ನ ತಡೆಯಾಯಿತ್ ಬಪ್ಪಾಂದ್ ಗೇನ ಮಾಡಿತ್,

⁴⁹ತಾಂಡಕೂಡೆ ಕೆಲಸ ಮಾಡ್‌ವಯಿಂಗಳ ಪೊಜ್ಜಿಯಂಡ್, ಕುಡ್‍ಕಂಗಡ ಕೂಡೆ ಉಂಬಕ್, ಕುಡಿಪಕ್ ಸುರು ಮಾಡ್‍ಚೇಂಗಿ

⁵⁰ಅಕ್ಕ ಆ ಆಳ್‍ರ ಎಜಮಾನ ಗೇನ ಮಾಡತ ದಿವಸ ಗೊತ್ತಿಲ್ಲತೆ ಗಳಿಗೆಲ್ ಬಂದ್‍ರ್‍ವ.

⁵¹ಬಂದಿತ್ ಆ ಆಳ್‍ಕ್ ಕಠಿಣವಾಯಿತ್ ಶಿಕ್ಷೆ ಕೊಡ್‌ತಿತ್, ಕಪಟಿಯಂಗ ಉಳ್ಳ ಜಾಗತ್‍ಲ್ ಅಂವೊನ ಸಹ ಇಟ್ಟ್‌ರ್‍ವ. ಅಲ್ಲಿ ಮೊರಟಂಡ್ ಪಲ್ಲ್ ಕಡಿಚಂಡ್ ಇಪ್ಪ.