Read Kodava ಮತ್ತಾಯ 25 Bible Online

ಮತ್ತಾಯ 25 - Kodava bible

ಮತ್ತಾಯ 25

¹ಅಕ್ಕ ಪರಲೋಕ ರಾಜ್ಯ, ತಂಗಡ ಬೊಳ್‌ಚತ್‍ನ ಎಡ್‍ತಂಡ್ ಮಂಗಲಕಾರನ ಕಾಂಬಕ್ ಪೊರಟ ಪತ್ತ್ ಕನ್ನಿ ಮೂಡಿಯಂಗಡನೆಕೆ ಇಪ್ಪ.

²ಅಯಿಂಗಡಡೆಲ್ ಅಂಜ್ ಕನ್ನಿ ಮೂಡಿಯಂಗ ಬುದ್ದಿ ಇಲ್ಲತಯಿಂಗಳು ಇಂಞು ಅಂಜ್ ಕನ್ನಿ ಮೂಡಿಯಂಗ ಬುದ್ದಿವಂತಯಿಂಗಳಾಯಿತ್ಂಜತ್.

³ಬುದ್ದಿ ಇಲ್ಲತಯಿಂಗ ಅಯಿಂಗಡ ಬೊಳ್‌ಚತ್‍ನ ಎಡ್‍ತಂಡ್ ಪೋಚಿ,

⁴ಆಚೇಂಗಿ ಬೋಂಡಿಯಚ್ಚಕ್ ಎಣ್ಣೆ ಎಡ್‍ತಂಡ್ ಪೋಯಿತ್‌ಲ್ಲೆ. ಆಚೇಂಗಿ ಬುದ್ದಿವಂತಯಿಂಗ ಬೊಳ್‍ಚ ಪಿಂಞ ಅದ್ಂಗ್ ಬೋಂಡಿಯಾನ ಎಣ್ಣೇನ, ಎಣ್ಣೆ ಪಾತ್ರತ್‍ಲ್ ಎಡ್‍ತಂಡ್ ಪೋಚಿ.

⁵ಮಂಗಲಕಾರ ಬಪ್ಪಕ್ ಚೆನ್ನ ನೇರ ಆಚಿ. ಅಕ್ಕ ಅಯಿಂಗಕ್ ವರ್‌ಕ್ ಬಂದಿತ್ ವರೀರ್‌ತ್.

⁶ನಡ್‌ಪಾದ್ರೆ ನೇರತ್‍ಲ್: ಮಂಗಲಕಾರ ಬಂದಂಡುಂಡ್, ಅಂವೊಂಡ ಮಿಂಞತ್ ಅಂವೊನ ಕಾಂಬಕ್ ಪೋಯಿ ಎಣ್ಣಿಯಂಡ್ ಕೂತ್ ಕೊಡ್‍ತತ್.

⁷ಅಕ್ಕ ಆ ಬುದ್ದಿವಂತ ಕನ್ನಿ ಮೂಡಿಯ ಎದ್ದಿತ್ ಅಯಿಂಗಡ ಬೊಳ್‌ಚತ್‍ನ ಕತ್ತ್‌ಚಿಟ್ಟ್ ತಯಾರ್ ಮಾಡ್‍ಚಿ.

⁸ಅಕ್ಕ ಬುದ್ದಿ ಇಲ್ಲತಯಿಂಗ ಬುದ್ದಿ ಉಳ್ಳಯಿಂಗಳ ನೋಟಿತ್: ನಿಂಗಡ ಪಕ್ಕ ಉಳ್ಳ ಎಣ್ಣೇಲ್ ನಂಗಕ್ ಚೆನ್ನ ತಾರೀಂದ್ ಕ್‍ೕಟತ್.

⁹ಅಕ್ಕ ಬುದ್ದಿವಂತಯಿಂಗ ನಿಂಗಕ್ ಎಣ್ಣೆ ತಂದತೇಂಗಿ ನಂಗಕು ನಿಂಗಕು ಎಣ್ಣೆ ಪೋರತಾಪಾಂದ್ ಎಣ್ಣ್‌ಚಿ. ಆನಗುಂಡ್, ನಿಂಗ ಎಣ್ಣೆ ಮಾರುವಂವೊಂಡ ಪಕ್ಕ ಪೋಯಿತ್ ಎಣ್ಣೆ ಎಡ್‍ತಂಡ್ ಬಾರೀಂದ್ ಎಣ್ಣ್‌ಚಿ.

¹⁰ಅಯಿಂಗ ಎಣ್ಣೆ ಎಡ್‌ತ ಬಪ್ಪಕ್ ಪೋಯಿತಿಪ್ಪಕ ಮಂಗಲಕಾರ ಬಾತ್. ತಯಾರ್ ಆಯಿತ್ಂಜಯಿಂಗ ಅಂವೊಂಡ ಕೂಡೆ ಮಂಗಲತ್‍ರ ಮನೆಕ್ ಪೋಚಿ; ಅಲ್ಲಿಂಜ ಪಡಿ ಇಟ್ಟ್‌ರ್‌ತ್.

¹¹ಬಯ್ಯ, ಎಣ್ಣೆ ಎಡ್‌ತ ಬಪ್ಪಕ್ ಪೋನ ಕನ್ನಿ ಮೂಡಿಯ ಬಂದಿತ್: ಒಡೆಯನೇ ಒಡೆಯನೇಂದ್ ಪಡಿ ತಟ್ಟಿತ್, ದಯಬೆಚ್ಚಿತ್ ನಂಗಕು ಪಡಿ ತೊರೇಂದ್ ಕಾಕ್‍ಚಿ.

¹²ಅಕ್ಕ ಮಂಗಲಕಾರ: ನಾಕ್ ನಿಂಗಳ ಗೊತ್ತಿಲ್ಲೇಂದ್ ನಿಂಗಕ್ ನೇರಾಯಿತು ಎಣ್ಣ್‌ವೀಂದ್ ಎಣ್ಣ್‌ಚಿ.

¹³ಅನ್ನನೆ ಆ ದಿನವು ಸಮಯವು ನಿಂಗಕ್ ಗೊತ್ತಿಲ್ಲತಗುಂಡ್, ಎಚ್ಚರತ್ ಇರಿ.

¹⁴ಇಂಞು ಪರಲೋಕ ರಾಜ್ಯ, ದೂರ ದೇಶಕ್ ಪೋಪ ಒರ್ ಎಜಮಾನ ಅಂವೊಂಡ ಆಳ್‍ವಳ ಕಾಕುವಂಜಿ ತಾಂಡ ಆಸ್ತಿನ ನೋಟ್‍ವಕ್ ಪಾಲ್ ಮಾಡಿತ್ ಒಪ್ಪ್‌ಚಿಡುವನೆಕೆ ಉಂಡ್.

¹⁵ಅಂವೊಂಡ ಆಸ್ತಿರ ದುಡ್ಡ್‌ಯಿಂಜ ಒಬ್ಬಂಡ ಪಕ್ಕ ಅಂಜ್ ಬಾಗತ್‍ನ, ಒಬ್ಬಂಡ ಪಕ್ಕ ದಂಡ್ ಬಾಗತ್‍ನ ಇಂಞೊಬ್ಬಂಡ ಪಕ್ಕ ಒರ್ ಬಾಗತ್‍ನ ಅಯಿಂಗಯಿಂಗಡ ಬಲಕ್ ಸರಿಯಾಯಿತ್ ಕೊಡ್‌ತಿತ್ ಪೋಪ.

¹⁶ಅಂಜ್ ಬಾಗ ಕ್‍ಟ್ಟ್‌ನಂವೊ ಅದ್‍ನ ಅಕ್ಕಣೆ ಎಡ್‍ತಂಡ್ ಪೋಯಿತ್ ವ್ಯಾಪಾರ ಮಾಡಿತ್ ಇಂಞು ಅಂಜ್ ಬಾಗತ್‍ನ ಸಂಪಾದನೆ ಮಾಡ್‍ಚಿ.

¹⁷ಅನ್ನನೆ ದಂಡ್ ಬಾಗ ಕ್‍ಟ್ಟ್‌ನಂವೊ, ವ್ಯಾಪಾರ ಮಾಡಿತ್ ಇಂಞು ದಂಡ್ ಬಾಗತ್‍ನ ಸಂಪಾದನೆ ಮಾಡ್‍ಚಿ.

¹⁸ಆಚೇಂಗಿ ಒರ್ ಬಾಗ ಕ್‍ಟ್ಟ್‌ನಂವೊ ಅದ್‍ನ ನೆಲತ್‌ಲ್ ಕುಂಡ್ ಎಡ್‍ತಿತ್ ಅದ್ಂಡ ಒಳ್‍ಲ್ ಒಳ್‌ಪ್‌ಚಿಟ್ಟತ್.

¹⁹ದುಂಬ ಕಾಲ ಆನ ಪಿಂಞ, ಆ ಆಳ್‍ವಡ ಎಜಮಾನ ಬಂದಿತ್ ಅಯಿಂಗಡ ಪಕ್ಕ ಲೆಕ್ಕ ಕ್‍ೕಟತ್.

²⁰ಅಂಜ್ ಬಾಗ ಕ್‍ಟ್ಟ್‌ನಂವೊ ಮಿಂಞ ಬಂದಿತ್, ಸ್ವಾಮೀ, ನೀನ್ ನಾಕ್ ಅಂಜ್ ಬಾಗ ತಂದಿಯ, ಇದಾ ಅದ್‍ಲ್ ಇಂಞು ಅಂಜ್ ಬಾಗತ್‍ನ ಸಂಪಾದನೆ ಮಾಡಿಯೇಂದ್ ಎಣ್ಣ್‌ಚಿ.

²¹ಅಂವೊಂಡ ಎಜಮಾನ ಅಂವೊನ ನೋಟಿತ್: ನಲ್ಲದ್ ಆಚಿ, ನೀನ್ ನಲ್ಲ ಪಿಂಞ ನಂಬಿಕಸ್ತನಾನ ಆಳ್. ಚೆರಿಯ ವಿಷಯತ್‍ಲು ನೀನ್ ನಂಬಿಕೆ ಕಾಟಿತುಳ್ಳಿಯ, ನಿನ್ನ ನಾನ್ ಬಲ್ಯ ಕೆಲಸಕ್ ಅದಿಕಾರಿಯಾಯಿತ್ ಮಾಡ್‌ವಿ, ಇಕ್ಕ ಬಾ, ನೀಡ ಎಜಮಾನಂಡ ಕುಶೀಲ್ ಪ್ರವೇಶ ಮಾಡ್‍ೕಂದ್ ಎಣ್ಣ್‌ಚಿ.

²²ದಂಡ್ ಬಾಗ ಕ್‍ಟ್ಟ್‌ನಂವೊ ಮಿಂಞ ಬಂದಿತ್: ಸ್ವಾಮೀ, ನೀನ್ ನಾಕ್ ದಂಡ್ ಬಾಗ ತಂದಿಯ, ಇದಾ ಅದ್‍ಲ್ ಇಂಞು ದಂಡ್ ಬಾಗತ್‍ನ ಸಂಪಾದನೆ ಮಾಡಿಯೇಂದ್ ಎಣ್ಣ್‌ಚಿ. ಅಂವೊಂಡ ಎಜಮಾನ ಅಂವೊನ ನೋಟಿತ್: ನಲ್ಲದ್ ಆಚಿ, ನೀನ್ ನಲ್ಲ ಪಿಂಞ ನಂಬಿಕಸ್ತನಾನ ಆಳ್.

²³ಚೆರಿಯ ವಿಷಯತ್‍ಲು ನೀನ್ ನಂಬಿಕೆ ಕಾಟಿತುಳ್ಳಿಯ, ನಿನ್ನ ನಾನ್ ಬಲ್ಯ ಕೆಲಸಕ್ ಅದಿಕಾರಿಯಾಯಿತ್ ಮಾಡ್‌ವಿ, ಇಕ್ಕ ಬಾ, ನೀಡ ಎಜಮಾನಂಡ ಕುಶೀಲ್ ಪ್ರವೇಶ ಮಾಡ್‍ೕಂದ್ ಎಣ್ಣ್‌ಚಿ

²⁴ಒರ್ ಬಾಗ ಕ್‍ಟ್ಟ್‌ನಂವೊ ಮಿಂಞ ಬಂದಿತ್: ಸ್ವಾಮೀ, ನೀನ್ ಬಿತ್ತ್ ಇಡತ ಜಾಗತ್‍ಲ್ ಕೊಯ್ಯುವಂವೊನು, ಬಿತ್ತ್ ಚದ್‍ರತ ಜಾಗತ್‍ಲ್ ಕೂಟ್‌ವ ಕಠಿಣ ಮನುಷ್ಯಾಂದ್ ನಾಕ್ ಗೊತ್ತುಂಡ್.

²⁵ಆನಗುಂಡ್ ನಾನ್ ನೀಕ್ ಬೊತ್ತಿತ್, ನೀಡ ಪಣತ್‍ನ ನಾನ್ ಕುಂಡ್‍ರ ಒಳ್‍ಲ್ ಒಳ್‍ಪ್‍ಚಿಟ್ಟಿಯೆ. ಇದಾ, ನೀಡದ್‍ನ ಎಡ್‍ತಾಂದ್ ಎಣ್ಣ್‌ಚಿ.

²⁶ಅಕ್ಕ ಅಂವೊಂಡ ಎಜಮಾನ: ಒಂದಂಗೂ ಪ್ರಯೋಜನ ಇಲ್ಲತ ಮೋಸಕಾರನು ಸೋಮಾರಿಯು ಆನ ಆಳ್ ನೀನ್! ನಾನ್ ಬಿತ್ತ್ ಇಡತ ಜಾಗತ್‍ಲ್ ಕೊಯ್ಯುವೀಂದು, ಬಿತ್ತ್ ಚದ್‍ರತ ಜಾಗತ್‍ಲ್ ಕೂಟ್‍ವೀಂದು ನೀಕ್ ಗೊತ್ತ್ಂಜತ್.

²⁷ಅನ್ನನಿಪ್ಪಕ, ನಾನ್ ನೀಕ್ ತಂದಾನ, ಬಡ್ಡಿಕ್ ಕೊಡ್‌ಪಕಿಂಜತ್. ಅಕ್ಕ ನಾನ್ ಬಪ್ಪಕ, ನಾಡದ್‌ನ ಬಡ್ಡಿ ಸಮೇತ ಎಡ್‌ಪಕಿಂಜ್ ಎಣ್ಣಿಯಂಡ್ ಎಣ್ಣ್‌ಚಿ.

²⁸ಪಿಂಞ ಅಂವೊಂಡ ಆಳ್‌ನ ಕಾಕುವಂಜಿ, ಅಂವೊಂಡ ಕೈಯಿಲ್ ಇಂಜಾನ ಎಡ್‍ತಿತ್ ಪತ್ತ್ ಬಾಗ ಉಳ್ಳಂವೊಂಗ್ ಕೊಡ್‍ೕಂದ್ ಎಣ್ಣ್‌ಚಿ.

²⁹ಉಳ್ಳಯಿಂಗಕ್ ಇಂಞು ಕ್‍ಟ್ಟ್‌ವ, ಅಯಿಂಗಕ್ ಬೋಂಡಿಯಚ್ಚಕ್ ಇಪ್ಪ; ಇಲ್ಲತಯಿಂಗಕ್ ಚೆನ್ನ ಉಳ್ಳದ್‍ನ ಸಹ ಎಡ್‌ತ್‌ರ್‌ವ.

³⁰ಈ ಕೆಲಸಕ್ ಆಕತ ಆಳ್‌ನ ಪೊರಮೆ ಇರ್‌ಟ್‌ಲ್ ಇಡೀಂದ್ ಎಜಮಾನ ಎಣ್ಣ್‌ಚಿ. ಅಲ್ಲಿ ಗೋಳಾಟವು ಪಲ್ಲ್ ಕಡಿಪದು ಇಪ್ಪಾಂದ್ ಎಣ್ಣ್‌ಚಿ.

³¹ಮನುಷ್ಯಕುಮಾರ ತಾಂಡ ಮಹಿಮೆಲ್ ಅಂವೊಂಡ ದೂತಂಗಡ ಕೂಡೆ ಬಪ್ಪಕ, ತಾಂಡ ಮಹಿಮೇರ ಸಿಂಹಾಸನತ್‍ಲ್ ಅಳ್‌ತಿತ್‌ಪ್ಪ.

³²ಅಕ್ಕ ಎಲ್ಲಾ ದೇಶತ್‍ರ ಜನ ಒಟ್ಟ್ ಕೂಡಿತ್‌ಪ್ಪ, ಪಿಂಞ ಅಂವೊ ಒರ್ ಕೊರಿ ಕಾಪಂವೊ ಎನ್ನನೆ ಕೊರಿನ ಪಿಂಞ ಆಡ್‍ನ ಬೋರೆ ಬೋರೆ ಮಾಡ್‌ವ ಅನ್ನನೆ ಅಂವೊ ಜನಳ ದಂಡ್ ಗುಂಪಾಯಿತ್ ಬೋರೆ ಬೋರೆ ಮಾಡ್‌ವ.

³³ಕೊರಿನ ತಾಂಡ ಬಲ್‌ತೆ ಬರಿಲ್ ಪಿಂಞ ಆಡ್‍ನ ತಾಂಡ ಎಡ್‍ತೆ ಬರಿಲ್ ಇಡ್‌ವ.

³⁴ಅಕ್ಕ ರಾಜ ತಾಂಡ ಬಲ್‌ತೆ ಬರಿಲ್ ಉಳ್ಳ ಜನಳ ನೋಟಿತ್: ನಾಡ ಅಪ್ಪಂಡ ಆಶೀರ್ವಾದ ಪಡ್ಂದಯಿಂಗಳೇ ಬಾರಿ, ಈ ಲೋಕ ಸೃಷ್ಟಿ ಆಪಕ್ ಮಿಂಞ ತಯಾರ್ ಮಾಡ್‍ನ ನಿಂಗಡ ರಾಜ್ಯತ್‍ನ ಎಡ್‌ತೊಳಿ.

³⁵ಎನ್ನಂಗೆಣ್ಣ್‌ಚೇಂಗಿ, ನಾಕ್ ಕೆಲ ಪಯಿಚಿತ್‌ಪ್ಪಕ, ನಿಂಗ ನಾಕ್ ಉಂಬಕ್ ತಂದಿರ; ನಾಕ್ ಬಾಯರಿಕೆಯಾಯಿತ್‌ಪ್ಪಕ, ಕುಡಿಪಕ್ ನೀರ್ ಕೊಡ್‌ತಿರ. ನಾನ್ ನಿಂಗಕ್ ಪರಿಚಯ ಇಲ್ಲತಂವೊನಾಯಿತಿಪ್ಪಕ, ನಿಂಗಡ ಮನೆಲ್ ಸ್ವೀಕಾರ ಮಾಡಿರ.

³⁶ನಾಕ್ ಇಡ್‌ವಕ್ ಬಟ್ಟೆ ಇಲ್ಲತಿಪ್ಪಕ, ನಾಕ್ ಬಟ್ಟೆ ತಂದಿರ. ನಾಕ್ ಕಾಯಿಲೆ ಇಪ್ಪಕ, ನಿಂಗ ನನ್ನ ಆರೈಕೆ ಮಾಡಿರ, ನಾನ್ ಜೈಲ್‍ಲ್ ಇಪ್ಪಕ ನನ್ನ ನೋಟ್‍ವಕ್ ಬಂದೀರಾಂದ್ ರಾಜ ಎಣ್ಣುವ.

³⁷ಅಕ್ಕ ಈ ನೀತಿವಂತಯಿಂಗ: ಒಡೆಯನೇ, ನಂಗ ಎಕ್ಕ ನೀಕ್ ಕೆಲ ಪಯಿಚದ್‍ನ, ಕಂಡಿತ್ ನೀಕ್ ಉಂಬಕ್ ತಂದಿಯೆ? ಎಕ್ಕ ನೀನ್ ಬಾಯಾರಿಕೆಯಾಯಿತ್ ಇಂಜಾನ ಕಂಡಿತ್, ನೀಕ್ ನೀರ್ ತಂದಿಯೆ?

³⁸ಎಕ್ಕ ನಿನ್ನ ಪರಿಚಯ ಇಲ್ಲತಂವೊನಾಯಿತ್ ಕಂಡಿತ್, ಮನೇರೊಳ್‌ಕ್ ಸ್ವೀಕಾರ ಮಾಡಿಯೆ? ಎಕ್ಕ ನಿನ್ನ ಬಟ್ಟೆ ಇಲ್ಲತಂವೊನಾಯಿತ್ ಕಂಡಿತ್, ನೀಕ್ ಬಟ್ಟೆ ತಂದಿಯೆ?

³⁹ಎಕ್ಕ ನಿನ್ನ ಕಾಯಿಲಸ್ತನಾಯಿತ್ ಪಿಂಞ ಜೈಲ್‍ಲ್ ಉಳ್ಳಾನ ಕಂಡಿತ್, ನಿನ್ನ ನೋಟ್‍ವಕ್ ಬಂದಿಯೇಂದ್ ಕ್‍ೕಪ.

⁴⁰ಅಕ್ಕ ರಾಜ, ನಾಡ ಅಣ್ಣತಮ್ಮಣಂಡಡೆಲ್ ಚೆರಿಯಯಿಂಗಳಾಯಿತುಳ್ಳ ಒಬ್ಬಂಗ್ ಮಾಡ್‍ಚೇಂಗಿಯು, ಅದ್‍ನ ನಿಂಗ ನಾಕ್ ಮಾಡ್‌ನನೆಕೇಂದ್ ನೇರಾಯಿತು ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.

⁴¹ಪಿಂಞ ರಾಜ ತಾಂಡ ಎಡ್‍ತೆ ಬರಿಲ್ ಉಳ್ಳಯಿಂಗಳ ನೋಟಿತ್: ದೇವಡ ಶಾಪ ಪಡ್ಂದಯಿಂಗಳೇ, ನನ್ನ ಬುಟ್ಟಿತ್, ಸೈತಾನಂಗು ಅಂವೊಂಡ ದೂತಂಗಕು ತಯಾರ್ ಮಾಡಿತುಳ್ಳ ನಿತ್ಯ ತಿತ್ತ್‌ಕ್ ಪೋಯಿ.

⁴²ಎನ್ನಂಗೆಣ್ಣ್‌ಚೇಂಗಿ ನಾಕ್ ಕೆಲ ಪಯಿಚಿತ್‌ಪ್ಪಕ, ನಿಂಗ ಉಂಬಕ್ ತಂದಿತ್‍ಲ್ಲೆ, ನಾಕ್ ಬಾಯಾರಿಕೆಯಾಯಿತ್ ಇಪ್ಪಕ ನಾಕ್ ಕುಡಿಪಕ್ ನೀರ್ ತಂದಿತ್‍ಲ್ಲೆ,

⁴³ನಾನ್ ದಾರ್‌ಕು ಗೊತ್ತಿಲ್ಲತಂವೊನಾಯಿತ್‌ಪ್ಪಕ, ನಿಂಗ ನನ್ನ ಮನೆಕ್ ಕೂಟಿತ್‌ಲ್ಲೆ, ಬಟ್ಟೆ ಇಲ್ಲತಿಪ್ಪಕ, ಇಡ್‌ವಕ್ ಬಟ್ಟೆ ತಂದಿತ್‌ಲ್ಲೆ, ನಾನ್ ಕಾಯಿಲೆಲ್ ಪಿಂಞ ಜೈಲ್‍ಲ್ ಇಪ್ಪಕ, ನಿಂಗ ನನ್ನ ನೋಟ್‍ವಕ್ ಬಂದಿತ್‌ಲ್ಲೆ.

⁴⁴ಅಕ್ಕ ಅಯಿಂಗ: ಒಡೆಯನೇ, ನೀನ್ ಎಕ್ಕ ಕೆಲ ಪಯಿಚಂವೊನಾಯಿತ್, ಬಾಯಾರಿಕೆ ಉಳ್ಳಂವೊನಾಯಿತ್, ಪರಿಚಯ ಇಲ್ಲತಂವೊನಾಯಿತ್, ಬಟ್ಟೆ ಇಲ್ಲತಂವೊನಾಯಿತ್, ಕಾಯಿಲಸ್ತನಾಯಿತ್, ಜೈಲ್‍ಲ್ ಇಂಜಂವೊನಾಯಿತ್ ಕಂಡಿತ್ ನಂಗ ನೀಕ್ ಸಹಾಯ ಮಾಡಿತ್‌ಲ್ಲೇಂದ್ ಕ್‍ೕಪ.

⁴⁵ನಾಡ ಅಣ್ಣತಮ್ಮಣಂಡಡೆಲ್ ಚೆರಿಯಯಿಂಗಳಾಯಿತುಳ್ಳ ಒಬ್ಬಂಗ್ ಎಕ್ಕ ಸಹಾಯ ಮಾಡಿತ್‌ಲ್ಲೆಯೋ ಅಕ್ಕಲೆ ನಿಂಗ ನಾಕ್ ಮಾಡಿತ್‌ಲ್ಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ವ.

⁴⁶ಅಕ್ಕ ಈಂಗ ನಿತ್ಯ ಶಿಕ್ಷೆಕು, ನೀತಿವಂತಯಿಂಗ ನಿತ್ಯ ಜೀವಕು ಪೋಪ.