Read Kodava ಮತ್ತಾಯ 26 Bible Online

ಮತ್ತಾಯ 26 - Kodava bible

ಮತ್ತಾಯ 26

¹ಇದೆಲ್ಲಾ ಎಣ್ಣಿತಾನ ಪಿಂಞ, ಯೇಸು ತಾಂಡ ಶಿಷ್ಯಂಗಕ್:

²ಇಂಞು ದಂಡ್ ದಿನ ಆನ ಪಿಂಞ ಪಸ್ಕ[72] ನಮ್ಮೆ ಬಪ್ಪಕುಳ್ಳದ್ ನಿಂಗಕ್ ಗೊತ್ತುಂಡ್. ಅಕ್ಕ ಮನುಷ್ಯಕುಮಾರನ ಶಿಲುಬೇಕ್ ಇಡ್‌ವಕ್ ನಿಂಗಡಲ್ಲಿ ಒಬ್ಬ ನನ್ನ ಒಪ್ಪ್‌ಚಿಡುವ.

³ಅದೇ ಸಮಯತ್‍ಲ್ ಮುಕ್ಯ ಯಾಜಕಂಗಳು, ಜನಡ ಪೆರಿಯಯಿಂಗಳು ಕಾಯಫ ಎಣ್ಣುವ ಮಹಾ ಯಾಜಕಂಡ ಅರಮನೇಲ್

⁴ಯೇಸುನ ಎನ್ನನಾಚೇಂಗಿಯು ಪುಡ್‌ಚಿತ್ ಕೊಲ್ಲ್‌ವಕ್ ಆಲೋಚನೆ ಮಾಡ್‍ಚಿ.

⁵ಆಚೇಂಗಿಯು ಈ ನಮ್ಮೆರ ದಿವಸತ್‍ಲ್ ಮಾಡ್‌ವಕ್ಕಾಗ, ಎನ್ನಂಗೆಣ್ಣ್‌ಚೇಂಗಿ, ನಮ್ಮೆರ ದಿವಸತ್‍ಲ್ ಮಾಡ್‍ಚೇಂಗಿ, ಜನ ನಂಗಡ ಮೇಲೆ ದಂಗೆ ಏವಾಂದ್ ಅಯಿಂಗ ತೀರ್ಮಾನ ಎಡ್‍ತತ್.

⁶ಆ ಸಮಯತ್‍ಲ್ ಯೇಸು ಬೇಥಾನ್ಯತ್‍ಲ್ ಕುಷ್ಟರೋಗಿಯಾಯಿತ್ಂಜ ಸೀಮೋನಂಡ ಮನೆಲ್ ಇಂಜತ್.

⁷ಅಲ್ಲಿ ಅಂವೊ ಉಂಡಂಡ್ ಇಪ್ಪಕ ಒರ್ ಪೊಣ್ಣಾಳ್ ದುಂಬ ಬೆಲೆಯುಳ್ಳ ಸುಗಂದ ತೈಲತ್‌ನ ಅಲಬಸ್ಟರ್[73] ಎಣ್ಣುವ ಕುಪ್ಪಿಲ್ ಕೊಂಡ್ ಬಂದಿತ್ ಯೇಸುರ ಮಂಡೆರ ಮೇಲೆ ಬೂಕ್‍ಚಿ.

⁸ಯೇಸುರ ಶಿಷ್ಯಂಗಕ್ ಚೆಡಿ ಬಾತ್, ಎನ್ನಂಗ್ ಇವ ಇನ್ನನೆ ಪಾಳ್ ಮಾಡ್‍ಚಿ.

⁹ಇದ್‍ನ ಜಾಸ್ತಿ ಬೆಲೇಕ್ ಮಾರಿತ್, ಆ ದುಡ್ಡ್‌ನ ಗರೀಬಂಗಕ್ ಕೊಡ್‍ಪಕಿಂಜತಲ್ಲಾಂದ್ ಎಣ್ಣ್‌ಚಿ.

¹⁰ಯೇಸುಕ್ ಇದ್ ಗೊತ್ತಾಯಿತ್, ಅಯಿಂಗಳ ನೋಟಿತ್: ನಿಂಗ ಎನ್ನಂಗ್ ಆ ಪೊಣ್ಣಾಳ್‍ನ ತೊಂದರೆ ಮಾಡ್‌ವಿರ, ಅವ ನಾಕ್ ನಲ್ಲ ಕಾರ್ಯತ್‍ನ ಮಾಡಿತುಂಡ್.

¹¹ಗರೀಬಂಗ ಎಕ್ಕಾಲು ನಿಂಗಡ ಕೂಡೆ ಇಪ್ಪ. ಆಚೇಂಗಿ ನಾನ್ ನಿಂಗಡ ಕೂಡೆ ಎಕ್ಕಾಲು ಇಪ್ಪುಲೆ.

¹²ಇವ ಈ ಸುಗಂದ ತೈಲತ್‌ನ ಬೂಕಿತ್ ನಾಡ ತಡೀನ ಪೂಪಂಗ್ ತಯಾರ್ ಮಾಡಿತುಂಡ್.

¹³ಬೂಲೋಕತ್‍ಲ್ ಎಲ್ಲೆಲ್ಲಾ ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವ ಅಲ್ಲಿ ಎಲ್ಲಾ ಇವ ಮಾಡ್‌ನದು ಇವಡ ನೆನಪ್‍ಲ್ ಎಣ್ಣುವಾಂದ್ ನಿಂಗಕ್ ನಾನ್ ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ.

¹⁴ಪನ್ನೆರಂಡ್ ಶಿಷ್ಯಂಗಡ ಕೂಟ್‌ಲ್ ಒಬ್ಬನಾನ ಇಸ್ಕರಿಯೋತ ಯೂದ ಎಣ್ಣ್‌ವಂವೊ ಮುಕ್ಯ ಯಾಜಕಂಗಡ ಪಕ್ಕ ಪೋಯಿತ್,

¹⁵ನಾನ್ ಯೇಸುನ ಕಾಟಿ ಕೊಡ್‍ತಕ ನಿಂಗ ನಾಕ್ ಎಂತ ತಪ್ಪಿರಾಂದ್ ಕ್‍ೕಟತ್? ಅಯಿಂಗ ನುಪ್ಪದ್ ಬೊಳ್ಳಿರ ನಾಣ್ಯತ್‍ನ ಕೊಡ್‍ತತ್

¹⁶ಆ ಸಮಯತ್ಂಜ, ಅಂವೊ ಯೇಸುನ ಕಾಟಿ ಕೊಡ್‍ಪಕ್ ಸಂದರ್ಪ ನೋಟಿಯಂಡ್ ಇಂಜತ್.

¹⁷ಪುಳಿಯಿಲ್ಲತ ಒಟ್ಟಿ ತಿಂಬ ನಮ್ಮೆರ ಆದ್ಯ ದಿವಸತ್‍ಲ್ ಯೇಸುರ ಶಿಷ್ಯಂಗ ಅಂವೊಂಡ ಪಕ್ಕ ಬಂದಿತ್: ನಿಂಗ ಪಸ್ಕ ತಿಂಬಕ್ ನಂಗ ಎಲ್ಲಿ ಪೋಯಿತ್ ತಯಾರ್ ಮಾಡನಾಂದ್ ಕ್‍ೕಟತ್.

¹⁸ಅದ್ಂಗ್ ಯೇಸು: ನಿಂಗ, ಪಟ್ಟಣತ್‍ಲ್ ಒರ್ ಮನುಷ್ಯಂಡ ಪಕ್ಕ ಪೋಯಿತ್, ಉಪಾದ್ಯ ಎಣ್ಣ್‌ಚಿ, ನಾಡ ಸಮಯ ಪಕ್ಕ ಉಂಡ್, ನಾನು ನಾಡ ಶಿಷ್ಯಂಗಳು ನೀಡ ಮನೆಲ್ ನಮ್ಮೆ ಮಾಡ್‌ವಾಂದ್ ಎಣ್ಣೀಂದ್ ಎಣ್ಣ್‌ಚಿ.

¹⁹ಶಿಷ್ಯಂಗ ಅಂವೊ ಎಣ್ಣ್‌ನನೆಕೆ ಪಸ್ಕ ನಮ್ಮೆರ ಅಡಿಗೆನ ತಯಾರ್ ಮಾಡ್‍ಚಿ.

²⁰ಬಯಿಟಾಪಕ ಯೇಸು ಅಂವೊಂಡ ಪನ್ನೆರಂಡ್ ಶಿಷ್ಯಂಗಡ ಕೂಡೆ ಉಂಬಕ್ ಅಳ್‌ತತ್.

²¹ಅಕ್ಕ ಅಯಿಂಗೆಲ್ಲಾರು ಅಳ್‌ತಿತ್ ಉಂಬಕಾಪಕ ಯೇಸು: ನಿಂಗಡ ಕೂಟ್‌ಲ್ ಒಬ್ಬ ನನ್ನ ಪುಡ್‌ಚಿತ್ ಕೊಡ್‍ಪಾಂದ್ ನೇರಾಯಿತು ನಾನ್ ಎಣ್ಣ್‌ವೀಂದ್ ಎಣ್ಣ್‌ಚಿ.

²²ಶಿಷ್ಯಂಗಕ್ ದುಂಬ ಬೇಜಾರಾಯಿತ್ ಒಬ್ಬೊಬ್ಬನು, ನಾನಾ, ನಾನಾಂದ್ ಯೇಸುನ ಕ್‍ೕಟತ್.

²³ಅದ್ಂಗ್ ಯೇಸು: ನಾಡ ಕೂಡೆ ಈ ಪಾತ್ರತ್‍ಲ್ ಕೈ ಮುಳ್‍ಕುವಂವೊನೇ ನನ್ನ ಪುಡ್‍ಚಿ ಕೊಡ್‍ಪಾಂದ್ ಎಣ್ಣ್‌ಚಿ.

²⁴ದೇವಡ ವಾಕ್ಯತ್‍ಲ್ ಒಳ್‌ದ್‌ನನೆಕೆ ಮನುಷ್ಯಕುಮಾರ ಚಾವ. ಆಚೇಂಗಿ ಮನುಷ್ಯಕುಮಾರನ, ಏದ್ ಮನುಷ್ಯ ಪುಡ್‍ಚಿ ಕೊಡ್‍ಪ ಅಂವೊಂಗ್ ಅಯ್ಯೋ! ಆ ಮನುಷ್ಯ ಪುಟ್ಟತೆ ಇಂಜತೇಂಗಿ ಅಂವೊಂಗ್ ನಲ್ಲದಾಯಿತ್ಂಜತ್‍ೕಂದ್ ಎಣ್ಣ್‌ಚಿ.

²⁵ಕಾಟಿ ಕೊಡ್‍ಪಕುಳ್ಳ ಯೂದನು ಯೇಸುನ ನೋಟಿತ್, ಉಪಾದ್ಯನೇ, ನಾನಾಂದ್ ಕ್‍ೕಟತ್. ಅದ್ಂಗ್, ನೀನೇ ಎಣ್ಣಿತುಳ್ಳಿಯಾಂದ್ ಯೇಸು ಎಣ್ಣ್‌ಚಿ.

²⁶ಅಯಿಂಗೆಲ್ಲಾರು ಉಂಬಕಾಪಕ, ಯೇಸು ಒಟ್ಟಿನ ಎಡ್‌ಪಂಜಿ, ದೇವನ ತುದಿಚಿತ್, ಪೊಳಿಪಂಜಿ ಶಿಷ್ಯಂಗಕ್ ಕೊಡ್‌ತಿತ್: ಇದ್‍ನ ಎಡ್‌ತ್‌ ತಿನ್ನಿ, ಇದ್ ನಾಡ ತಡೀಂದ್ ಎಣ್ಣ್‌ಚಿ.

²⁷ಅಲ್ಲಿಂಜ ಅಂವೊ ದ್ರಾಕ್ಷಿರಸ ಉಳ್ಳ ಪಾತ್ರತ್‍ನ ಎಡ್‌ಪಂಜಿ ದೇವನ ತುದಿಚಿತ್ ಅಯಿಂಗಕ್ ಕೊಡ್‌ತಿತ್: ನಿಂಗೆಲ್ಲಾರು ಇದ್‍ಯಿಂಜ ಕುಡಿಯಿರಿ,

²⁸ಇದ್, ಪಾಪಕ್ ಮನ್ನಿಪ್ ಕ್‍ಟ್ಟ್‌ವಕ್, ದುಂಬ ಜನಕಾಯಿತ್ ಬೂಕ್‌ವ ಪುದಿಯ ಒಪ್ಪಂದತ್‍ರ[74] ನಾಡ ಚೋರೆಯಾಯಿತುಂಡ್.

²⁹ನಾನ್ ಪರಲೋಕ ರಾಜ್ಯತ್‍ಲ್ ನಿಂಗಡ ಕೂಡೆ ಪುದಿಯ ದ್ರಾಕ್ಷಿರಸತ್‍ನ ಕುಡಿಪಕತ್ತನೆ ಇಂಞು ಮಿಂಞಕ್ ಈ ದ್ರಾಕ್ಷಿರಸತ್‍ನ ಕುಡಿಪ್‌ಲೇಂದ್ ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.

³⁰ಪಿಂಞ ಅಯಿಂಗ ದೇವಡ ಪಾಟ್ ಪಾಡಿಯಂಡೇ ಆಲಿವ್ ಎಣ್ಣುವ ಕುಂದ್‌ಕ್ ಪೋಚಿ.

³¹ಅಕ್ಕ ಯೇಸು ಅಯಿಂಗಳ ನೋಟಿತ್: ಇಂದ್ ಬಯಿಟ್ ನನ್ನಗುಂಡ್ ನಿಂಗ ಓಡಿ ಪೋಪಿರ; ಎನ್ನಂಗೆಣ್ಣ್‌ಚೇಂಗಿ, ನಾನ್ ಕೊರಿ ಕಾಪಂವೊನ ಕೊಲ್ಲುವಿ, ಕೊರಿಯಳು ಚದ್‌ರಿ ಪೋಪಾಂದ್ ದೇವಡ ವಾಕ್ಯ ಎಣ್ಣುವ.[75]

³²ಆಚೇಂಗಿಯು, ನಾನ್ ಚತ್ತಿತ್, ಚಾವ್‍ಯಿಂಜ ಎದ್ದಿತ್ ಬಂದ ಪಿಂಞ, ನಿಂಗಕ್ ಮಿಂಞ ಗಲಿಲಾಯಕ್ ಪೋಪೀಂದ್ ಎಣ್ಣ್‌ಚಿ.

³³ಅದ್ಂಗ್ ಪೇತ್ರ, ಎಲ್ಲಾರು ನಿನ್ನ ಬುಟ್ಟಿತ್ ಪೋಚೇಂಗಿಯು ನಾನ್ ನಿನ್ನ ಬುಟ್ಟಿತ್ ಪೋಪುಲೇಂದ್ ಎಣ್ಣ್‌ಚಿ.

³⁴ಯೇಸು ಅಂವೊನ ನೋಟ್‌ವಂಜಿ, ಇಂದ್ ಬಯಿಟ್ ಮಲ್ಲಂಗೋಳಿ ಕೂವಾಂಗ್ ಮಿಂಞ, ನೀನ್ ನನ್ನ ಗೊತ್ತ್‌ಲೇಂದ್ ಮೂಂದ್ ಕುರಿ ಎಣ್ಣುವಿಯಾಂದ್ ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ.

³⁵ಅದ್ಂಗ್ ಪೇತ್ರ: ನಾನ್ ನೀಡ ಕೂಡೆ ಚತ್ತ್ ಪೋಂಡೂಂದ್ ಇಂಜತೇಂಗಿಯು, ನಾನ್ ಅನ್ನನೆ ಎಣ್ಣುಲೇಂದ್ ಎಣ್ಣ್‌ಚಿ. ಅನ್ನನೆ ಎಲ್ಲಾ ಶಿಷ್ಯಂಗಳು ಅಂವೊ ಎಣ್ಣ್‌ನನೆಕೆ ಎಣ್ಣ್‌ಚಿ.

³⁶ಪಿಂಞ ಯೇಸು ಅಂವೊಂಡ ಶಿಷ್ಯಂಗಡ ಕೂಡೆ ಗೆತ್ಸೇಮನೆ ಎಣ್ಣುವ ಜಾಗಕ್ ಪೋಯಿತ್, ನಾನ್ ಅಲ್ಲಿ ಪೋಯಿತ್ ಪ್ರಾರ್ಥನೆ ಮಾಡ್‌ವಕ, ನಿಂಗ ಇಲ್ಲಿ ಅಳ್‌ತಂಡ್ ಇರೀಂದ್ ಎಣ್ಣ್‌ಚಿ.

³⁷ಯೇಸು, ಅಂವೊಂಡ ಕೂಡೆ ಪೇತ್ರನ ಪಿಂಞ ಜೆಬೆದಾಯಂಡ ದಂಡ್ ಕ್‌ಣ್ಣ ಮಕ್ಕಳ ಕಾಕಿಯಂಡ್ ಪೋಚಿ. ಅಂವೊಂಗ್ ದುಂಬ ದುಃಖ ಆಯಿತ್, ಮನಸ್ಸ್‌ಕ್ ದುಂಬ ಬೇಜಾರಾಚಿ.

³⁸ಯೇಸು ಅಯಿಂಗಕ್: ನಾನ್ ಚಾವ್‍ರ ನೊಂಬಲತ್‍ರಚ್ಚಕ್ ನಾಡ ಆತ್ಮ ದುಃಖಪಟ್ಟಂಡುಂಡ್. ನಿಂಗ ಇಲ್ಲೇ ಇಂಜಿತ್ ವರಿಯತೆ ಎಚ್ಚರವಾಯಿತಿರೀಂದ್ ಎಣ್ಣಿತ್,

³⁹ಚೆನ್ನ ದೂರ ಪೋಪಂಜಿ, ಅಂವೊಂಡ ಮೂಡ್‍ನ ಅಡಿಕ್ ಮಾಡಿತ್ ಮೊಣಕಾಲ್ ಇಟ್ಟಂಡ್: ಓ ನಾಡ ಅಪ್ಪನೇ, ನೀಕ್ ಕಯ್ಯುವೇಂಗಿ ಈ ಕಷ್ಟತ್‍ರ ಪಾತ್ರ ನನ್ನ ಬುಟ್ಟಿತ್ ಪೋಪಕ್ ಮಾಡ್; ಆಚೇಂಗಿಯು ನಾಡ ಚಿತ್ತ ಅಲ್ಲ, ನೀಡ ಚಿತ್ತವೇ ಆಡ್‍ೕಂದ್ ಪ್ರಾರ್ಥನೆ ಮಾಡ್‍ಚಿ.

⁴⁰ಅಲ್ಲಿಂಜ ಅಂವೊ ಶಿಷ್ಯಂಗಡ ಪಕ್ಕ ಬಾತ್. ಅಯಿಂಗ ವರಿಯಂಡಿಂಜಾನ ಕಂಡಿತ್ ಪೇತ್ರಂಗ್: ನಾಕಾಯಿತ್ ಒರ್ ಗಂಟೆ ವರಿಯತೆ ಇಪ್ಪಕ್ ಕಯ್ಯುಲೆಯಾಂದ್ ಎಣ್ಣ್‌ಚಿ.

⁴¹ನಿಂಗ ಪರಿಕ್ಷೇಕ್ ಒಳಪಡತನೆಕೆ ಎಚ್ಚರ ಎಡ್‍ತಂಡ್ ಪ್ರಾರ್ಥನೆ ಮಾಡಿ; ಆತ್ಮಕ್ ಕುಶಿ ಉಂಡ್ ಆಚೇಂಗಿ ತಡಿ ತಳ್ಂದಿತ್ ಉಂಡ್‍ೕಂದ್ ಯೇಸು ಎಣ್ಣ್‌ಚಿ.

⁴²ಇಂಞೊಮ್ಮ ದಂಡನೆ ಕುರಿ ಅಂವೊ ಅಯಿಂಗಳ ಬುಟ್ಟಿತ್ ಪೋಯಿತ್: ನಾಡ ಅಪ್ಪನೇ! ಈ ಕಷ್ಟತ್‍ರ ಪಾತ್ರತ್‍ನ ನಾನ್ ಕುಡಿಚತೇಂಗಿ ಮಾತ್ರ, ಈ ಕಷ್ಟತ್‍ನ ನನ್ನಿಂಜ ಎಡ್‍ಪಕ್ ಕಯ್ಯೂಂದ್ ಇಂಜತೇಂಗಿ, ನೀಡ ಚಿತ್ತತ್‍ರನೆಕೆ ಆಡ್‍ೕಂದ್ ಪ್ರಾರ್ಥನೆ ಮಾಡ್‍ಚಿ.

⁴³ಅಂವೊ ಬಯ್ಯ ಬಂತ್ ನೋಟುವಕ, ಅಯಿಂಗ ಪುನಃ ವರಿಯಂಡಿಂಜಾನ ಕಂಡತ್. ಅಯಿಂಗಕ್ ಕಣ್ಣ್ ತೊರ್‌ಪಕ್ ಕಯ್ಯತಚ್ಚಕ್ ವರ್‌ಕ್ ಇಂಜತ್.

⁴⁴ಅಂವೊ ಪುನಃ ಅಯಿಂಗಳ ಬುಟ್ಟಿತ್ ಪೋಯಿತ್, ಮೂಂದನೆ ಕುರಿ ಅದೇ ತಕ್ಕ್ ಎಣ್ಣಿತ್ ಪ್ರಾರ್ಥನೆ ಮಾಡ್‍ಚಿ.

⁴⁵ಅಂವೊ ತಾಂಡ ಶಿಷ್ಯಂಗಡ ಪಕ್ಕ ಬಯ್ಯಕ್ ಬಂದಿತ್: ಇಂಞು ನಿಂಗ ವರಿಯಂಡ್, ಆರಾಮಾಯಿತ್ ಉಳ್ಳಿರ? ಅದಾ ನೋಟಿ! ಮನುಷ್ಯಕುಮಾರನ, ಪಾಪಿಯಂಗಡ ಕೈಕ್ ಒಪ್ಪ್‌ಚಿಡ್‌ವ ನೇರ ಬಂದ್‌ರ್‌ತ್.

⁴⁶ಏಳೀ, ನಂಗ ಪೋಕ, ನೋಟಿ ನನ್ನ ಪುಡ್‌ಚಿತ್ ಕೊಡ್‍ಪಂವೊ ಇಕ್ಕಲೆ ಬಾತ್‍ೕಂದ್ ಎಣ್ಣ್‌ಚಿ.

⁴⁷ಯೇಸು ಇದ್‍ನ ಎಣ್ಣಿಯಂಡಿಪ್ಪಕಲೇ, ಪನ್ನೆರಂಡ್ ಶಿಷ್ಯಂಗಡ ಕೂಟ್‌ಲ್ ಒಬ್ಬನಾನ ಯೂದ ಬಾತ್. ಅಂವೊಂಡ ಕೂಡೆ ಮುಕ್ಯ ಯಾಜಕಂಗ ಪಿಂಞ ಜನಡ ಪೆರಿಯಯಿಂಗ ಅಯಿಚ ಬಲ್ಯ ಜನಡ ಗುಂಪ್ ಕತ್ತಿ ದೊಣ್ಣೆನೆಲ್ಲ ಎಡ್‍ತಂಡ್ ಬಂದಿತ್ಂಜತ್.

⁴⁸ಯೇಸುನ ಪುಡ್‌ಚಿತ್ ಕೊಡ್‍ಪಂವೊ: ನಾನ್ ದಾರ್‌ಕ್ ಮುತ್ತ್ ಕೊಡ್‍ಪಿ, ಅಂವೊನೇಂದ್ ಆ ಜನಡ ಗುಂಪ್‌ಕ್ ಸನ್ನೆ ಕೊಡ್‌ತಿತ್ಂಜತ್.

⁴⁹ಉಪಾದ್ಯನೇ, ಯೂದ ಯೇಸುರ ಪಕ್ಕ ಬಂದಿತ್, ಉಪಾದ್ಯನೇ ನೀಕ್ ವಂದನೇಂದ್ ಎಣ್ಣಿತ್ ಅಂವೊಂಗ್ ಮುತ್ತ್ ಕೊಡ್‍ತತ್.

⁵⁰ಅದ್ಂಗ್ ಯೇಸು: ನಾಡ ಕೂಟ್‌ಕಾರನೇ, ನೀನ್ ಎನ್ನಂಗ್ ಬಂದಿತುಳ್ಳಿಯಾಂದ್ ಕ್‍ೕಟತ್. ಅಕ್ಕ ಅಯಿಂಗ ಬಂತ್ ಯೇಸುನ ಬಂದನೆ ಮಾಡ್‍ಚಿ.

⁵¹ಅಕ್ಕ ಯೇಸುರ ಕೂಟ್‌ಲ್ ಉಳ್ಳ ಒಬ್ಬ ಕತ್ತಿ ಎಡ್‌ಪಂಜಿ ಮಹಾ ಯಜಕಂಡ ಆಳ್‍ರ ಕೆಮಿನ ಕೆತ್ತಿರ್‌ತ್.

⁵²ಅಕ್ಕ ಯೇಸು ಅಂವೊಂಗ್: ನೀಡ ಕತ್ತಿನ ಅದ್ಂಡ ಕೊತ್ತೆಲ್ ಇಡ್. ಎನ್ನಂಗೆಣ್ಣ್‌ಚೇಂಗಿ ಕತ್ತಿನ ಎಡ್‍ಪಯಿಂಗ ಕತ್ತಿಯಿಂಜಲೇ ಚಾವಾಂದ್ ಎಣ್ಣ್‌ಚಿ.

⁵³ನಾನ್ ಇಕ್ಕ ನಾಡ ಅಪ್ಪಂಡ ಪಕ್ಕ ಬೋಡ್‍ಚೇಂಗಿ, ಅಂವೊ ಇಕ್ಕಲೆ ಪನ್ನೆರಂಡ್ ಗುಂಪ್‌ಕಿಂಜ ಜಾಸ್ತಿ ದೂತಂಗಳ ನಾಕ್ ಅಯಿಪಕಯ್ಯುಲೇಂದ್ ನೀನ್ ಗೇನ ಮಾಡ್‌ವಿಯಾ?

⁵⁴ಆಚೇಂಗಿ ನಾನ್ ಅನ್ನನೆ ಮಾಡ್‍ಚೇಂಗಿ, ಇನ್ನನೆಲ್ಲಾ ನಡ್‍ಕಂಡೂಂದ್ ಒಳ್‍ದಿತುಳ್ಳ ದೇವಡ ವಾಕ್ಯ ಎನ್ನನೆ ನೆರವೇರುವ?

⁵⁵ಅದೇ ಸಮಯತ್‍ಲ್ ಯೇಸು ಜನಡ ಗುಂಪ್‌ಕ್: ಕಳ್ಳನ ಪುಡಿಪಕ್ ಬಂದನೆಕೆ ಕತ್ತಿ ಪಿಂಞ ದೊಣ್ಣೆನೆಲ್ಲ ಎಡ್‌ತ ಬಂದಿತುಳ್ಳಿರಲ್ಲಾ? ನಾನ್ ದಿನಾಲು ನಿಂಗಡ ಕೂಡೆ ದೇವಾಲಯತ್‍ಲ್ ಬೋದನೆ ಮಾಡಿಯಂಡಿಂಜ್, ಅಕ್ಕ ನಿಂಗ ಪುಡ್‌ಚಿತ್‌ಲ್ಲೆ.

⁵⁶ಆಚೇಂಗಿಯು ಪ್ರವಾದಿಯಂಗ ಒಳ್‌ದಿತುಳ್ಳದೆಲ್ಲಾ ನೆರವೇರಿಚಿಡುವನೆಕೆ ಇದೆಲ್ಲ ಆಚೀಂದ್ ಯೇಸು ಎಣ್ಣ್‌ಚಿ. ಅಕ್ಕ ಅಂವೊಂಡ ಎಲ್ಲಾ ಶಿಷ್ಯಂಗ ಅಂವೊನ ಬುಟ್ಟಿತ್ ಓಡಿ ಪೋಯಿರ್‌ತ್.

⁵⁷ಯೇಸುನ ಬಂದನೆ ಮಾಡ್‍ನ ಜನ ಮಹಾ ಯಾಜಕನಾನ ಕಾಯಫಂಡ ಪಕ್ಕ ಕೂಟಿಯಂಡ್ ಪೋಚಿ. ಅಲ್ಲಿ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳು, ಪೆರಿಯಯಿಂಗಳು ಕೂಡಿತಿಂಜತ್.

⁵⁸ಆಚೇಂಗಿ ಪೇತ್ರ ಚೆನ್ನ ದೂರತ್ಂಜ ಯೇಸುರ ಬಯ್ಯಕ್ ಪೋಯಿತ್, ಮಹಾ ಯಾಜಕಂಡ ಅರಮನೆರ ಕಯ್ಯಾಲೆಕತ್ತನೆ ಬಂತ್, ಒಳ್‍ಕ್ ಪೋಯಿತ್, ಆಕೀರ್‌ಕ್, ಯೇಸುಕ್ ಎಂತ ಆಪಾಂದ್ ನೋಟ್‍ವಕ್ ಸಿಪಾಯಿಯಡ ಕೂಡೆ ಅಳ್‌ತತ್.

⁵⁹ಯೇಸುನ ಕೊಲ್ಲ್‌ವಕಾಯಿತ್ ಮುಕ್ಯ ಯಾಜಕಂಗಳು, ಯೆಹೂದ್ಯಂಗಡ ಆಲೋಚನೆ ಸಬೆರ ಜನಳು, ಅಂವೊಂಗ್ ವಿರೋದವಾಯಿತ್ ಪೊಟ್ಟ್ ಸಾಕ್ಷಿ ಎಣ್ಣ್‌ವಕ್ ಜನಳ ತೇಡಿಯಂಡಿಂಜತ್.

⁶⁰ದುಂಬ ಜನ ಯೇಸುಕ್ ವಿರೋದವಾಯಿತ್ ಪೊಟ್ಟ್ ಸಾಕ್ಷಿ ಎಣ್ಣ್‌ಚಿ, ಆಚೇಂಗಿ ಅಯಿಂಗ ಪರಿಯುವ ಪೊಟ್ಟ್ ಸಾಕ್ಷಿ ಸರಿ ಬಂತ್‌ಲೆ. ಕಡೇಕ್ ದಂಡ್ ಮನುಷ್ಯಂಗ ಮಿಂಞಕ್ ಬಂದಿತ್,

⁶¹ಈ ದೇವಾಲಾಯತ್‌ನ ಪೊಳಿಪಕು, ಮೂಂದ್ ದಿವಸತ್‍ಲ್ ಇದ್‍ನ ಕೆಟ್ಟ್‌ವಕೂ ನಾಕ್ ಕಯ್ಯೂಂದ್ ಇಂವೊ ಎಣ್ಣ್‌ಚೀಂದ್ ಅಯಿಂಗ ಎಣ್ಣ್‌ಚಿ.

⁶²ಮಹಾ ಯಾಜಕ ಏವಂಜಿ, ಅಂವೊನ ನೋಟಿತ್: ಈಂಗ ನೀಕ್ ವಿರೋದವಾಯಿತ್ ಸಾಕ್ಷಿ ಎಣ್ಣ್‌ವಲ್ಲಾ? ಇದ್ಂಗ್ ನೀನ್ ಜವಾಬ್ ಕೊಡ್‍ಪ್‌ಲೆಯಾಂದ್ ಕ್‍ೕಟತ್.

⁶³ಆಚೇಂಗಿ ಯೇಸು ಒರ್ ತಕ್ಕು ಪರಿಯತೆ ಮುಂಡತೆ ಇಂಜತ್. ಪುನಃ ಮಹಾ ಯಾಜಕ ಯೇಸುಕ್: ನೀನ್ ದೇವಡ ಮೋಂವೊನಾನ ಕ್ರಿಸ್ತನಾಂದ್ ನಂಗಕ್ ಎಣ್ಣ್. ಇದ್‍ನ ಜೀವವಾಯಿತುಳ್ಳ ದೇವಡ ಪೆದತ್‍ಲ್ ಆಣೆ ಇಟ್ಟಿತ್ ನಾನ್ ಕ್‍ೕಟಂಡುಳ್ಳ್‌ಂದ್ ಎಣ್ಣ್‌ಚಿ.

⁶⁴ಅದ್ಂಗ್ ಯೇಸು: ಅಕ್ಕು, ನೀನ್ ಎಣ್ಣ್‌ನನೆಕೇಂದ್ ಯೇಸು ಎಣ್ಣ್‌ಚಿ. ಇಂಞು ಮಿಂಞಕ್ ಮನುಷ್ಯಕುಮಾರ ಸರ್ವ ಶಕ್ತಿಯುಳ್ಳಂವೊಂಡ ಬಲ್‌ತೆ ಬರಿಲ್ ಅಳ್‌ತಿತ್, ಬಾನತ್‍ರ ಮೋಡತ್‍ಲ್ ಬಪ್ಪದ್‍ನ ನಿಂಗೆಲ್ಲಾರು ಕಾಂಬಿರಾಂದ್ ಎಣ್ಣ್‌ಚಿ.[76]

⁶⁵ಮಹಾ ಯಾಜಕ ಇದ್‍ನ ಕ್‍ೕಟದು, ತಾಂಡ ಬಟ್ಟೇನ ಕೀತಿತ್[77], ಇಂವೊ ದೇವ ದೂಷಣೆ ಮಾಡ್‍ಚಿ. ಇಂಞು ಏದ್ ಸಾಕ್ಷಿ ಬೋಂಡು? ನಿಂಗೆಲ್ಲಾರು ಅಂವೊಂಡ ದೇವ ದೂಷಣೆನ ಕ್‍ೕಟಿರಲ್ಲ!

⁶⁶ನಿಂಗ ಎಂತ ತೀರ್ಮಾನ ಮಾಡ್‌ವಿರಾಂದ್ ಕ್‍ೕಟತ್. ಅದ್ಂಗ್ ಅಯಿಂಗ: ಇಂವೊ ಕಂಡಿತವಾಯಿತ್ ಮರಣಕ್ ಯೋಗ್ಯನಾಯಿತುಂಡ್.

⁶⁷ಅಯಿಂಗ ಯೇಸುರ ಮೂಡ್‍ಕ್ ತುಪ್ಪಿತ್, ಗುದ್ದ್‌ಚಿ. ಚೆನ್ನ ಜನ ಅಂವೊಂಗ್ ಪೊಜ್ಜಿತ್,

⁶⁸ನೀಕ್ ದಾರ್ ಪೊಜ್ಜತ್‍ೕಂದ್ ಪ್ರವಾದೆನ ಎಣ್ಣ್, ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತನೇಂದ್ ಎಣ್ಣ್‌ಚಿ.

⁶⁹ಅಕ್ಕ ಪೇತ್ರ ಪೊರಮೆ ಪಟ್ಟಿಲ್ ಅಳ್‌ತಿತ್‌ಪ್ಪಕ, ಒರ್ ಪಣಿಕರ್ತಿ ಅಂವೊಂಡ ಪಕ್ಕ ಬಂದಿತ್ ನೀನ್ ಸಹ ಗಲಿಲಾಯನಾನ ಯೇಸು ಕ್ರಿಸ್ತಂಡ ಕೂಡೆ ಇಂಜಂವೋಂದ್ ಎಣ್ಣ್‌ಚಿ.

⁷⁰ಆಚೇಂಗಿ ಪೇತ್ರ: ನೀನ್ ಎಂತ ತಕ್ಕ್ ಪರಿವಿಯಾಂದ್ ನಾಕ್ ಗೊತ್ತ್‌ಲ್ಲೇಂದ್ ಎಲ್ಲಾಡ ಎದಿಕೆ ಎಣ್ಣ್‌ಚಿ.

⁷¹ಪಿಂಞ ಅಂವೊ ಪೊರಮೆ ಬಾಯಿಕಂಡಿಕ್ ಪೋಚಿ. ಬಯ್ಯ ಇಂಞೊರ್ ಪಣಿಕರ್ತಿ ಬಂದಿತ್, ಈ ಮನುಷ್ಯ, ನಜರೇತ್‍ಕಾರನಾನ ಯೇಸುರ ಕೂಡೆ ಇಂಜತ್‍ೕಂದ್ ಎಣ್ಣ್‌ಚಿ.

⁷²ಆಚೇಂಗಿ ಪೇತ್ರ: ಆ ಮನುಷ್ಯನ ನಾಕ್ ಗೊತ್ತ್‌ಲ್ಲೇಂದ್ ಆಣೆ ಇಟ್ಟಿತ್ ಇಂಞೊರ್ ಕುರಿ ಎಣ್ಣ್‌ಚಿ.

⁷³ಚೆನ್ನ ನೇರ ಕಯಿಂಜ ಪಿಂಞ ಅಲ್ಲಿ ನಿಂದಂಡಿಂಜ ಚೆನ್ನ ಜನ ಪೇತ್ರಂಡ ಪಕ್ಕ ಬಂದಿತ್ ನೇರಾಯಿತ್ ನೀನ್ ಅಯಿಂಗಡಲ್ಲಿ ಒಬ್ಬೊನಾಯಿತ್ ಇಕ್ಕು. ನೀಡ ತಕ್ಕ್ ನಿನ್ನ ಕಾಟಿ ಕೊಡ್‍ಪಾಂದ್ ಎಣ್ಣ್‌ಚಿ.

⁷⁴ಅಕ್ಕ ಅಂವೊ: ಸತ್ಯ ಮಾಡಿತ್, ನಾಕ್ ಅಂವೊನ ಗೊತ್ತ್‌ಲ್ಲೆ, ಅನ್ನನೆ ನಾನ್ ಪೊಟ್ಟ್‌ಪರಿಯುವೇಂಗಿ ನಾಡ ಮೇಲೆ ಶಾಪ ಬರಡ್‍ೕಂದ್ ಎಣ್ಣ್‌ಚಿ, ಅಕ್ಕಣೆಕ್ ಮಲ್ಲಂಗೋಳಿ ಕೂಂದತ್.

⁷⁵ಅಕ್ಕ ಪೇತ್ರಂಗ್: ಮಲ್ಲಂಗೋಳಿ ಕೂವಕ್ ಮಿಂಞ ನೀನ್ ನನ್ನ ಗೊತ್ತ್‌ಲೇಂದ್ ಮೂಂದ್ ಕುರಿ ಎಣ್ಣುವಿಯಾಂದ್ ಯೇಸು ಎಣ್ಣ್‌ನದ್ ಗೇನ ಬಾತ್. ಅಂವೊ ಪೊರಮೆ ಪೋಯಿತ್ ದುಂಬ ಬೇಜಾರತ್‍ಲ್ ಮೊರಟತ್.