Read Kodava ಮತ್ತಾಯ 27 Bible Online

ಮತ್ತಾಯ 27 - Kodava bible

ಮತ್ತಾಯ 27

¹ಪೊಲಿಂಜಿತಾಪಕ, ಎಲ್ಲಾ ಮುಕ್ಯ ಯಾಜಕಂಗಳು, ಜನಡ ಪೆರಿಯಯಿಂಗಳು ಕೂಡಿತ್, ಯೇಸುನ ಕೊಲ್ಲ್‌ವಕ್ ತೀರ್ಮಾನ ಮಾಡಿತ್,

²ಅಂವೊನ ಕೆಟ್ಟುವಂಜಿ, ಕಾಕಿಯಂಡ್ ಪೋಯಿತ್ ರೋಮ್ ರಾಜ್ಯಕ್ ಅದಿಪತಿಯಾಯಿತುಳ್ಳ ಪೊಂತ್ಯ ಪಿಲಾತಂಡ ಪಕ್ಕ ಒಪ್ಪ್‌ಚಿಟ್ಟತ್.

³ಯೇಸುಕ್ ಮರಣ ಶಿಕ್ಷೇರ ತೀರ್ಪ್ ಕೊಡ್‍ತಿತುಂಡ್‍ೕಂದ್, ಅಂವೊನ ಪುಡ್‍ಚಿ ಕೊಡ್‍ತ ಯೂದಂಗ್ ಗೊತ್ತಾನ ಪಿಂಞ, ಅಂವೊ ದುಂಬ ಪಶ್ಚಾತಾಪ ಪಟ್ಟಿತ್, ಆ ನುಪ್ಪದ್ ಬೊಳ್ಳಿರ ನಾಣ್ಯತ್‍ನ ಮುಕ್ಯ ಯಾಜಕಂಗಡ ಪಕ್ಕ ಪಿಂಞ ಜನಡ ಪೆರಿಯಯಿಂಗಡ ಪಕ್ಕ ಕೊಡ್‌ತಿತ್,

⁴ನಾನ್ ಒರ್ ತಪ್ಪು ಮಾಡತ ಒಬ್ಬನ ಪುಡ್‍ಚಿ ಕೊಡ್‌ತಗುಂಡ್, ನಾನ್ ಪಾಪ ಮಾಡಿಯೇಂದ್ ಎಣ್ಣ್‌ಚಿ. ಅದ್ಂಗ್ ಅಯಿಂಗ: ಇದ್ ನಂಗಕ್ ಸಂಬಂದ ಪಟ್ಟದ್‌ಲ್ಲೆ. ಅದ್‍ನ ನೀನೇ ನೋಟಿಯಾಂದ್ ಎಣ್ಣ್‌ಚಿ.

⁵ಅಕ್ಕ ಯೂದ ನುಪ್ಪದ್ ಬೊಳ್ಳಿರ ನಾಣ್ಯತ್‍ನ ಆ ದೇವಾಲಯತ್‍ಲ್ ಚಾಡಿರುವಂಜಿ ತೂಂಗಿಯಂಡ್ ಚತ್ತತ್.

⁶ಅಕ್ಕ ಮುಕ್ಯ ಯಾಜಕಂಗ ಆ ಪಣತ್‍ನ ಎಡ್‍ತಿತ್: ಈ ದುಡ್ಡ್ ಒಬ್ಬನ ಕೊಲ್ಲ್‌ಚಿಡ್‌ವಕಾಯಿತ್ ಕೊಡ್‍ತ ಪಣ, ಇದ್‍ನ ಬಂಡಾರ ಪೊಟ್ಟಿಕ್ ಇಡ್‌ವಕ್ಕಾಗಾಂದ್ ಎಣ್ಣಿಯಂಡ್,

⁷ಆ ಪಣತ್‌ಲ್ ಚತ್ತ್‌ಪೋನ ಯೆಹೂದ್ಯಂಗಲ್ಲತ ಜನಳ ಪೂಪಕಾಯಿತ್ ಕುಂಬಾರಂಗ ಮಣ್ಣ್ ಎಡ್‍ತಂಡಿಂಜ ಜಾಗತ್‍ನ ದುಡ್ಡ್‌ಕ್ ಎಡ್‌ಪಕಾಯಿತ್ ಆಲೋಚನೆ ಮಾಡಿತ್ ಆ ಜಾಗತ್‍ನ ಎಡ್‍ತತ್.

⁸ಆಂಗಾಯಿತ್ ಆ ಜಾಗತ್‍ನ ಇಂದ್ ಸಹ ಚೋರೆರ ಜಾಗಾಂದ್ ಕಾಕ್‍ವ.

⁹ಅಯಿಂಗ ಇನ್ನನೆ ಮಾಡ್‌ವಕ ಪ್ರವಾದಿಯಾನ ಯೆರೆಮೀಯ: ಅಯಿಂಗ ನುಪ್ಪದ್ ಬೊಳ್ಳಿರ ನಾಣ್ಯತ್‍ನ ಎಡ್‍ತಂಡತ್, ಇಸ್ರಾಯೇಲ್ ಜನ ಅಂವೊಂಡ ಜೀವಕ್ ಕೊಡ್‍ತ ಬೆಲೆ ಅಚ್ಚಕೇ.

¹⁰ಒಡೆಯ ನಾಕ್ ಮಾಡ್‍ನ ಆಜ್ಞೆರನೆಕೆ ಕುಂಬಾರಂಡ ಜಾಗಕ್ ಅಯಿಂಗ ಕೊಡ್‌ತತ್‍ೕಂದ್ ಎಣ್ಣ್‌ನ ತಕ್ಕ್ ಅಕ್ಕ ನೆರವೇರ್‍ಚಿ.[78]

¹¹ಯೇಸು ಅದಿಪತಿಕ್ ಎದಿಕೆ ನಿಂದಿತ್ಂಜತ್. ಅದಿಪತಿ ಅಂವೊನ ನೋಟಿತ್: ನೀನ್ ಯೆಹೂದ್ಯ ಜನಡ ರಾಜನಾಂದ್ ಕ್‍ೕಟತ್. ಅಕ್ಕು, ನೀನ್ ಎಣ್ಣ್‌ನನೆಕೇಂದ್ ಯೇಸು ಎಣ್ಣ್‌ಚಿ.

¹²ಮುಕ್ಯ ಯಾಜಕಂಗ ಪಿಂಞ ಪೆರಿಯಯಿಂಗ ಕುತ್ತ ಪರಿಯುವಕ ಯೇಸು ಒರ್ ತಕ್ಕು ಪರಿಂದಿತ್‌ಲ್ಲೆ.

¹³ಅಕ್ಕ ಪಿಲಾತ ಯೇಸುನ ನೋಟಿತ್: ಈಂಗೆಲ್ಲಾ ನೀಕ್ ವಿರೋದವಾಯಿತ್ ಕುತ್ತ ಪರಿಯುವಾನೆಲ್ಲ ನೀನ್ ಕ್‍ೕಟಂಡಿಲ್ಲೆಯಾಂದ್ ಕ್‍ೕಟತ್.

¹⁴ಆಚೇಂಗಿ ಯೇಸು ಒರ್ ತಕ್ಕು ಪರಿಂದಿತ್‌ಲ್ಲೆ. ಅಕ್ಕ ಅದಿಪತಿಕ್ ದುಂಬ ಆಶ್ಚರ್ಯ ಆಚಿ.

¹⁵ಜನ ಕುಶಿ ಪಡುವ ಜೈಲ್‍ಲ್ ಉಳ್ಳ ಒರ್ ಕೈದಿನ ಪಸ್ಕ ನಮ್ಮೆರ ಸಮಯತ್‍ಲ್ ಬುಡುಗಡೆ ಮಾಡ್‍ವದ್ ದೇಶಾತಿಪದಿರ ಪದ್ದತಿಯಾಯಿತ್ಂಜತ್.

¹⁶ಆ ಸಮಯತ್‍ಲ್ ಬರಬ್ಬ ಎಣ್ಣುವ ಕ್‍ೕಳಿಪೋನ ಕೆಟ್ಟ ಕೈದಿ ಇಂಜತ್.

¹⁷ಅಕ್ಕ, ಜನ ಕೂಡಿತ್‌ಪ್ಪಕ ಪಿಲಾತ ಅಯಿಂಗಡ ಪಕ್ಕ: ದಾರ್‌ನ ಬುಡಂಡು? ಬರಬ್ಬನ? ಇಲ್ಲೆ ಕ್ರಿಸ್ತ ಎಣ್ಣಿಯಂಡುಳ್ಳ ಯೇಸುವಾಂದ್ ಕ್‍ೕಟತ್.

¹⁸ಎನ್ನಂಗೆಣ್ಣ್‌ಚೇಂಗಿ ಯೇಸುರ ಮೇಲೆ ಉಳ್ಳ ಒಟ್ಟೆಕಿಚ್ಚ್‌ಯಿಂಜಲೇ ಅಂವೊನ ಪುಡ್‍ಚಿ ಕೊಡ್‌ತತ್‍ೕಂದ್ ಪಿಲಾತಂಗ್ ಗೊತ್ತಾನಗುಂಡ್ ಇನ್ನನೆ ಕ್‍ೕಟತ್.

¹⁹ಪಿಲಾತ, ನ್ಯಾಯತೀರ್ಪ್ ಕೊಡ್‍ಪ ಜಾಗತ್‍ಲ್ ಅಳ್‌ತಿತ್ ಇಪ್ಪಕ ಪಿಲಾತಂಡ ಪೊಣ್ಣ್ ಅಂವೊಂಗ್: ನೀನ್ ಆ ನೀತಿವಂತಂವೊನ ಒಂದು ಮಾಡತೆ; ಎನ್ನಂಗೆಣ್ಣ್‌ಚೇಂಗಿ ನಿನ್ನಾಂದ್ ಬಯಿಟ್ ಅಂವೊಂಡ ವಿಷಯತ್ ಸ್ವಪ್ನತ್‌ಲ್ ದುಂಬ ಕಷ್ಟಪಟ್ಟಿಯೇಂದ್ ಸುದ್ದಿ ಅಯಿಚತ್.

²⁰ಆಂಡಡೆಲ್ ಮುಕ್ಯ ಯಾಜಕಂಗಳು ಜನಡ ಪೆರಿಯಯಿಂಗಳು ಬರಬ್ಬನ ಬುಡುವಕು ಯೇಸುನ ಕೊಲ್ಲ್‌ವಕು ಜನಕ್ ಎಣ್ಣಿ ಕೊಡ್‍ತತ್.

²¹ಅದಿಪತಿ ಪುನಃ ಅಯಿಂಗಳ: ಈ ದಂಡ್ ಮನುಷ್ಯಂಗಡಡೆಲ್ ದಾರ್‌ನ ಬುಡಂಡೂಂದ್ ಕ್‍ೕಟತ್. ಅದ್ಂಗ್ ಅಯಿಂಗ: ಬರಬ್ಬನ ಬುಡಂಡೂಂದ್ ಎಣ್ಣ್‌ಚಿ.

²²ಅಕ್ಕ ಪಿಲಾತ ಅಯಿಂಗಳ ನೋಟಿತ್: ಅನ್ನನೆ ಆಚೇಂಗಿ ಕ್ರಿಸ್ತ ಎಣ್ಣುವ ಯೇಸುನ ನಾನ್ ಎಂತ ಮಾಡಂಡೂಂದ್ ಕ್‍ೕಟತ್. ಅಂವೊನ ಶಿಲುಬೇಕ್[79] ಇಡೀಂದ್ ಕೂತ್ ಕೊಡ್‍ತತ್.

²³ಅಕ್ಕ ಅದಿಪತಿ: ಎನ್ನಂಗ್? ಅಂವೊ ಎಂತ ತಪ್ಪ್ ಮಾಡಿತುಂಡ್‍ೕಂದ್ ಕ್‍ೕಟತ್. ಆಚೇಂಗಿ ಜನ ಇಂಞು ಜೋರಾಯಿತ್ ಅಂವೊನ ಶಿಲುಬೇಕ್ ಇಡೀಂದ್ ಕೂತ್ ಕೊಡ್‍ತತ್.

²⁴ಗಲಾಟೆ ಜಾಸ್ತಿ ಆಪದ್ ಅಲ್ಲತೆ ಅಂವೊಂಡ ಪ್ರಯತ್ನತ್ಂಜ ಒರ್ ಪ್ರಯೋಜನವು ಇಲ್ಲೇಂದ್ ಗೊತ್ತಾನ ಪಿಂಞ ಪಿಲಾತ ಚೆನ್ನ ನೀರ್‌ನ ಎಡ್‍ತಂಡ್ ಜನಡ ಮಿಂಞ ಕೈ ಕತ್ತ್‌ವಂಜಿ, ಜನಡ ಮಿಂಞತ್: ಈ ನೀತಿವಂತಂವೊಂಡ ಚಾವ್‍ಕ್ ನಾನ್ ಜವಾಬ್‍ದಾರನಲ್ಲ! ನಿಂಗಕ್ ಎಂತ ಬೋಂಡ್‌ವೋ ಅದ್‍ನ ನಿಂಗಳೇ ಮಾಡಿಯೊಳೀಂದ್ ಎಣ್ಣ್‌ಚಿ.

²⁵ಅಕ್ಕ ಎಲ್ಲಾ ಜನಳು ಒಮ್ಮಕೆ: ಅಂವೊಂಡ ಚಾವ್‍ರ ಜವಾಬ್ದಾರಿ ನಂಗಡ ಮೇಲೆ ಪಿಂಞ ನಂಗಡ ಮಕ್ಕಡ ಮೇಲೆ ಇರಡ್‍ೕಂದ್ ಎಣ್ಣ್‌ಚಿ.

²⁶ಅಕ್ಕ ಅಂವೊ ಬರಬ್ಬನ ಅಯಿಂಗಕ್ ಬುಟ್ಟ್ ಕೊಡ್‌ತಿತ್, ಯೇಸುನ ಕೊರಡ್‍ಲ್ ಪೊಜ್ಜಿತ್ ಶಿಲುಬೇಕ್ ಇಡ್‌ವಕ್ ಒಪ್ಪ್‌ಚಿಟ್ಟತ್.

²⁷ಅಕ್ಕ ಅದಿಪತಿರ ಸಿಪಾಯಿಯಂಗ ಯೇಸುನ ಅಂವೊಂಡ ಅರಮನೆಕ್ ಕಾಕಿಯಂಡ್ ಪೋಯಿತ್, ಬೋರೆ ಎಲ್ಲಾ ಸಿಪಾಯಿಯಳ ಅಂವೊಂಡ ಪಕ್ಕ ಕೂಟ್‌ಚಿ.

²⁸ಅಯಿಂಗ ಅಂವೊಂಡ ಬಟ್ಟೇನ ಉತ್ತ್‌ವಂಜಿ ಒರ್ ಚೋಂದ ರಂಗ್‍ರ ಬಟ್ಟೇನ ಇಟ್ಟತ್.

²⁹ಪಿಂಞ ಒರ್ ಮುಳ್ಳ್ ಕಿರೀಟತ್‍ನ ಮಾಡ್‌ವಂಜಿ ಅಂವೊಂಡ ಮಂಡೆಕ್ ಇಟ್ಟಿತ್, ಬಲ್‌ತೆ ಕೈಯಿಕ್ ಒರ್ ಕೋಲ್ ಕೊಡ್‌ಪಂಜಿ ಅಂವೊಂಡ ಮಿಂಞತ್‍ಲ್ ಮೊಣಕಾಲ್ ಇಟ್ಟಿತ್: ಯೆಹೂದ್ಯಂಗಡ ರಾಜನೇ ಕಾಲಕಾಲಕ್ ಬದ್‌ಕ್‍ೕಂದ್, ಅಂವೊನ ಹಿಯಾಳ್‌ಚಿಟ್ಟತ್.

³⁰ಅಂವೊಂಡ ಮೇಲೆ ತುಪ್ಪಿತ್, ಆ ಓಡೆ ಕೋಲ್‍ನ ಎಡ್‍ತಿತ್ ಅಂವೊಂಡ ಮಂಡೆಕ್ ಪುನಃ ಪುನಃ ಪೊಜ್ಜತ್.

³¹ಅನ್ನನೆಲ್ಲಾ ಪರಿಹಾಸ ಮಾಡ್‍ನ ಪಿಂಞ, ಅಂವೊಂಗ್ ಇಟ್ಟ ಬಟ್ಟೇನ ಉತ್ತಿತ್, ಅಂವೊಂಡ ಬಟ್ಟೇನ ಅಂವೊಂಗ್ ಇಡ್‌ವಂಜಿ, ಅಂವೊನ ಶಿಲುಬೇಲ್ ಕೊಲ್ಲ್‌ವಕಾಯಿತ್ ಕಾಕಿಯಂಡ್ ಪೋಚಿ.

³²ಅಂವೊನ ಕಾಕಿಯಂಡ್ ಪೋಪಕ, ಕುರೇನ್ಯ ಊರ್‌ಕ್ ಕೂಡ್‍ನ ಸೀಮೋನ ಎಣ್ಣ್‌ವಂವೊನ ಕಂಡತ್. ಸಿಪಾಯಿಯ ಯೇಸುರ ಶಿಲುಬೇನ ಪೊರ್‍ಪಕ್ ಅಂವೊನ ಒತ್ತಾಯ ಮಾಡ್‍ಚಿ.

³³ಬಯ್ಯ ಅಯಿಂಗ ಗೊಲ್ಗೊಥಾ ಎಣ್ಣುವ ಜಾಗಕ್ ಬಾತ್. ಗೊಲ್ಗೊಥಾ ಎಣ್ಣ್‌ಚೇಂಗಿ ಮಂಡೆರ ಓಡ್‍ರ ಜಾಗಾಂದ್ ಅರ್ಥ.

³⁴ಕಯಿಪು ಕಲ್‌ಕ್‌ನ ದ್ರಾಕ್ಷಿರಸತ್‍ನ ಕೊಡ್‍ತತ್. ಯೇಸು ಅದ್‍ನ ರಸ ನೋಟಿತ್, ಕುಡಿಕತೆ ಇಂಜತ್.

³⁵ಅಂವೊನ ಶಿಲುಬೇಕ್ ಇಟ್ಟಿತಾನ ಪಿಂಞ ಸಿಪಾಯಿಯ ಅಂವೊಂಡ ಬಟ್ಟೇನ ಚೀಟಿ ಇಟ್ಟಿತ್ ಪಾಲ್ ಮಾಡಿತ್ ಎಡ್‍ತಂಡತ್.

³⁶ಪಿಂಞ ಅಯಿಂಗ ಅಲ್ಲಿ ಅಳ್‌ತಿತ್ ಅಂವೊನ ಕಾತಂಡಿಂಜತ್.

³⁷ಯೇಸುಕ್ ಎನ್ನಂಗ್ ಈ ಶಿಕ್ಷೆ ಕ್‍ಟ್ಟ್‌ಚೀಂದ್ ಕಾಟ್‌ವಕಾಯಿತ್ ಅಂವೊಂಡ ಮಂಡೆರ ಮೇಲೆ ಇಂವೊ ಯೆಹೂದ್ಯಂಗಡ ರಾಜ ಯೇಸು ಎಣ್ಣಿಯಂಡ್ ಒಳ್‍ದಿ ಬೆಚ್ಚತ್.

³⁸ಇದ್ ಆನ ಪಿಂಞ ಇಂಞು ದಂಡ್ ಕಳ್ಳಂಗಳ ಯೇಸುರ ಬಲ್‌ತೆ ಬರಿಲ್ ಒಬ್ಬನ, ಎಡ್‍ತೆ ಬರಿಲ್ ಒಬ್ಬನ ಶಿಲುಬೇಕ್ ಇಟ್ಟತ್.

³⁹ಆ ಬರಿ ಪೋಯಂಡಿಂಜ ಜನ ಮಂಡೆನ ಕುಲ್‍ಕಿತ್ ಯೇಸುನ ಅವಮಾನ ಮಾಡಿತ್:

⁴⁰ಆಹಾ! ದೇವಾಲಯತ್‍ನ ಪೊಳಿಪಂಜಿ ಮೂಂದ್ ದಿವಸತ್‍ಲ್ ಪುನಃ ಕೆಟ್ಟ್‌ವೀಂದ್ ಎಣ್ಣಿಯಲ್ಲಾ; ನೀನ್ ದೇವಡ ಮೋಂವೊನಾಚೇಂಗಿ, ನಿನ್ನ ಬಚಾವ್ ಮಾಡಿತ್ ಶಿಲುಬೆಯಿಂಜ ಇಳ್ಂಜಿತ್ ಬಾ! ಎಣ್ಣಿಯಂಡ್ ಹಿಯಾಳ್‍ಚಿಟ್ಟಿತ್ ಪೋಚಿ.

⁴¹ಅನ್ನನೆ, ಮುಕ್ಯ ಯಾಜಕಂಗ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಪಿಂಞ ಪೆರಿಯಯಿಂಗ ಹಿಯಾಳ್‌ಚಿಟ್ಟಿತ್:

⁴²ನೀನ್ ಬೋರೆಯಿಂಗಳ ಬಚಾವ್ ಮಾಡಿಯಾ, ಆಚೇಂಗಿ ನಿನ್ನ ನೀಕ್ ಇಕ್ಕ ಬಚಾವ್ ಮಾಡ್‌ವಕ್ ಕಯಿಂಜಿತ್‌ಲ್ಲೆ. ಇಂವೊ ಇಸ್ರಾಯೇಲ್‍ರ ರಾಜಾನಲ್ಲ? ಇಕ್ಕ ಅಂವೊ ಶಿಲುಬೆಯಿಂಜ ಇಳಿಂಜಿತ್ ಬರಡ್, ಅಕ್ಕ ನಂಗ ಅಂವೊನ ನಂಬಲೂಂದ್ ಎಣ್ಣ್‌ಚಿ.

⁴³ಇಂವೊ, ಇಂವೊನ ದೇವ ಕುಮಾರಾಂದ್ ಎಣ್ಣಿಯಂಡ್, ದೇವಡ ಮೇಲೆ ನಂಬಿಕೇಲ್ ಇಂಜತಲ್ಲ; ಅಂವೊಂಗ್ ಇಂವೊಂಡ ಮೇಲೆ ಕುಶಿ ಇಂಜತೇಂಗಿ ಇಕ್ಕ ಇಂವೊನ ಬಚಾವ್ ಮಾಡಡ್‍ೕಂದ್ ಅಯಿಂಗ ಎಣ್ಣ್‌ಚಿ.

⁴⁴ಯೇಸುರ ಕೂಡೆ ಶಿಲುಬೇಕ್ ಇಟ್ಟ ದಂಡ್ ಕಳ್ಳಂಗಳು ಯೇಸುನ ಅದೇ ಪ್ರಕಾರ ನಿಂದನೆ ಮಾಡ್‍ಚಿ.

⁴⁵ಮಜ್ಜಣ ಪನ್ನೆರಂಡ್ ಗಂಟೆಯಿಂಜ ಮೂಂದ್ ಗಂಟೆಕತ್ತನೆ ದೇಶ ಪೂರ್ತಿ ಇರ್‌ಟಾಚಿ.

⁴⁶ಸುಮಾರ್ ಮೂಂದ್ ಗಂಟೆಕ್ ಯೇಸು: ಏಲೀ, ಏಲೀ, ಲಮಾ ಸಬಕ್ತಾನೀ ಎಣ್ಣಿಯಂಡ್ ಬಲ್ಯ ಕೂತ್ ಕೊಡ್‍ತತ್.[80] ಆಂಡ ಅರ್ಥ ನಾಡ ದೇವನೇ, ನಾಡ ದೇವನೇ, ಎನ್ನಂಗ್ ನನ್ನ ಕೈ ಬುಟ್ಟಿಯೇಂದ್ ಎಣ್ಣ್‌ವದ್.

⁴⁷ಅಲ್ಲಿ ನಿಂದಂಡಿಂಜ ಚೆನ್ನ ಜನ: ಇಂವೊ ಎಲೀಯನ ಕಾಕಿಯಂಡ್ ಉಂಡ್‍ೕಂದ್ ಎಣ್ಣ್‌ಚಿ.

⁴⁸ಅಕ್ಕ ಒಬ್ಬ ಸಮುದ್ರತ್‍ಲ್ ಕ್‍ಟ್ಟುವ ಒರ್ ತರ ಪಾಚಿನ ಎಡ್‌ತ ಬಂದಿತ್, ಅದ್‍ನ ಪುಳಿಯಾಯಿತುಳ್ಳ ದ್ರಾಕ್ಷಿರಸಕ್ ಮುಕ್ಕಿತ್, ಒರ್ ಕೋಲ್‍ಲ್ ಕೆಟ್ಟಿತ್ ಅಂವೊಂಗ್ ಕುಡಿಪಕ್ ಕೊಡ್‍ತತ್.

⁴⁹ಬಾಕಿ ಉಳ್ಳಿಯಿಂಗ: ಇರ್, ಎಲೀಯ ಬಂದಿತ್ ಇಂವೊನ ರಕ್ಷಣೆ ಮಾಡ್‌ವೋ ಎಂತೋ ನೋಟನಾಂದ್ ಎಣ್ಣ್‌ಚಿ.

⁵⁰ಯೇಸು ಪುನಃ ಬಲ್ಯ ಸ್ವರತ್‍ಲ್ ಕೂತ್ ಕೊಡ್‌ಪಂಜಿ ಜೀವ ಬುಟ್ಟತ್.

⁵¹ಅಕ್ಕ, ದೇವಾಲಯತ್‍ಲ್ ಇಂಜ ಪಡಿರ ಬಟ್ಟೆ ದಂಡ್ ಬಾಗವಾಯಿತ್ ಕೊಡಿಯಿಂಜ ಅಡಿಕತ್ತನೆ ಕೀತಿ ಪೋಚಿ. ಬೂಮಿ ಅಲ್ಲಾಡ್‌ಚಿ, ಬಂಡೆ ಕಲ್ಲ್ ದಂಡ್ ಬಾಗವಾಚಿ,

⁵²ಗೋರಿಯಂಗ ಸಹ ತೊರ್ಂದತ್. ಪಿಂಞ ಚತ್ತ್‌ಪೋನ ದುಂಬ ದೇವಡ ಮಕ್ಕ ಸಹ ಚಾವ್‍ಯಿಂಜ ಎದ್ದತ್.

⁵³ಯೇಸು ಚಾವ್‍ಯಿಂಜ ಜೀವವಾಯಿತ್ ಎದ್ದ ಪಿಂಞ ಅಯಿಂಗೆಲ್ಲ ಪೊರಮೆ ಬಂತ್ ಪವಿತ್ರ ಪಟ್ಟಣವಾನ ಯೆರೂಸಲೇಮ್‍ರ ಒಳ್‍ಕ್ ಪೋಯಿತ್, ದುಂಬ ಜನಕ್ ಅಯಿಂಗಳ ಕಾಂಬ್‌ಚಿಟ್ಟಂಡತ್.

⁵⁴ನೂರ್ ಸಿಪಾಯಿಯಂಗಡ ಅದಿಕಾರಿ ಪಿಂಞ ಅಂವೊಂಡ ಕೂಡೆ ನಿಂದಂಡ್ ಯೇಸುನ ನೋಟಿಯಂಡಿಂಜ ಜನ ಬೂಕಂಪ ಪಿಂಞ ಅಲ್ಲಿ ಆಪಾನೆಲ್ಲಾ ಕಂಡಿತ್, ಬೊತ್ತಿತ್: ಈ ಮನುಷ್ಯ ನೇರಾಯಿತ್ ದೇವಡ ಮೋಂವೊನಾಯಿತ್ಂಜತ್ ಎಣ್ಣಿಯಂಡ್ ಎಣ್ಣ್‌ಚಿ.

⁵⁵ಯೇಸು ಗಲಿಲಾಯತ್‍ಲ್ ಇಪ್ಪಕಾಪಕ, ಅಂವೊಂಗ್ ಸಹಾಯ ಮಾಡಿತ್, ಅಂವೊಂಡ ಕೂಡೆ ಬಂದ ದುಂಬ ಪೊಣ್ಣಾಳುವ ದೂರತ್ಂಜ ನೋಟಿಯಂಡಿಂಜತ್.

⁵⁶ಅಯಿಂಗಡ ಕೂಡೆ, ಮಗ್ದಲ ಮರಿಯ, ಯಾಕೋಬ ಪಿಂಞ ಯೋಸೇಯಂಡ ಅವ್ವ ಮರಿಯ ಪಿಂಞ ಯಾಕೋಬ ಪಿಂಞ ಯೋಹಾನಂಡ ಅವ್ವಳು ಇಂಜತ್.

⁵⁷ಬಯಿಟಾಪಕ ಅರಿಮಥಾಯ ಎಣ್ಣುವ ಊರಿಂಜ ಯೋಸೇಫ ಎಣ್ಣುವ ಒರ್ ಬಲ್ಯ ಮನುಷ್ಯ ಅಲ್ಲಿ ಬಾತ್. ಅಂವೊನು ಯೇಸುರ ಶಿಷ್ಯನಾಯಿತ್ಂಜತ್.

⁵⁸ಅಂವೊ ಪಿಲಾತಂಡ ಪಕ್ಕ ಪೋಯಿತ್ ಯೇಸುರ ತಡೀನ ಕ್‍ೕಟತ್. ಅಕ್ಕ ತಡೀನ ಕೊಡ್‍ಪಕ್ ಪಿಲಾತ ಆಜ್ಞೆ ಮಾಡ್‍ಚಿ.

⁵⁹ಯೋಸೇಫ ಅಂವೊಂಡ ತಡೀನ ಎಡ್‍ತಿತ್, ಒರ್ ಪುದಿಯ ಬೊಳ್‍ತ ಬಟ್ಟೇಲ್ ಸುತ್ತುವಂಜಿ,

⁶⁰ಒರ್ ಪುದಿಯ ಬಂಡೆ ಕಲ್ಲ್‌ಯಿಂಜ ಅಂವೊಂಗಾಯಿತ್ ಕೆತ್ತಿತ್ ಮಾಡ್‍ನ ಗೋರಿರ ಒಳ್‍ಕ್ ಇಡ್‌ವಂಜಿ, ಆ ಬಾಯಿಕಂಡಿ‍ನ ಒರ್ ಬಲ್ಯ ಬಂಡೆ ಕಲ್ಲ್‌ಯಿಂಜ ಮುಚ್ಚಿತ್, ಅಲ್ಲಿಂಜ ಪೋಯಿರ್‌ತ್.

⁶¹ಮಗ್ದಲ ಮರಿಯಳು ಪಿಂಞ ಇಂಞೊರ್ ಮರಿಯಳು ಗೋರಿರ ಮಿಂಞತ್ ಅಳ್‍ತಂಡಿಂಜತ್.

⁶²ಪಿತ್ಯಾಂದ್ ಸಬ್ಬತ್ ದಿವಸ ಆಯಿತ್ಂಜತ್. ಮುಕ್ಯ ಯಾಜಕಂಗ ಪಿಂಞ ಫರಿಸಾಯಂಗ ಪಿಲಾತನ ಕಾಂಬಂಜಿ,

⁶³ಅಂವೊಂಗ್: ಎಜಮಾನನೇ, ಆ ಮೋಸಗಾರ ಬದ್‌ಕಿತ್ ಇಪ್ಪಕಾಪಕ, ನಾನ್ ಮೂಂದ್ ದಿವಸ ಆನ ಪಿಂಞ ಚಾವ್‍ಯಿಂಜ ಎದ್ದ್ ಬಪ್ಪೀಂದ್ ಎಣ್ಣಿಯಂಡ್ ಇಂಜದ್ ನಂಗಕ್ ಗೇನ ಉಂಡ್.

⁶⁴ಆನಗುಂಡ್, ಅಂವೊಂಡ ಶಿಷ್ಯಂಗ ಬಯಿಟ್ ಬಂದಿತ್ ಅಂವೊಂಡ ತಡೀನ ಕಟ್ಟಂಡ್ ಪೋಯಿತ್, ಅಂವೊ ಚಾವ್‍ಯಿಂಜ ಜೀವವಾಯಿತ್ ಬಾತ್‍ೕಂದ್ ಜನಕ್ ಎಣ್ಣುವಕ್ಕಾಗ. ಅನ್ನನೆ ಅಯಿಂಗ ಮಾಡ್‍ಚೇಂಗಿ, ಅಂವೊ ಜೀವವಾಯಿತ್ ಇಪ್ಪಕ ಮಾಡ್‍ನ ಮೋಸಕಿಂಜ ಇಕ್ಕ ಜನಕ್ ಮಾಡ್‌ವ ಮೋಸ ದುಂಬ ಬಲ್ಯದಾಯಿತಿಪ್ಪ. ಆನಗುಂಡ್ ನಿಂಗ ಮೂಂದ್ ದಿವಸಕತ್ತನೆ ಗೋರಿನ ಬದ್ರಮಾಡ್‌ವಕ್ ಸಿಪಾಯಿಯಂಗಕ್ ಹುಕುಮ್ ಕೊಡ್‍ಕಂಡೂಂದ್ ಕ್‍ೕಟತ್.

⁶⁵ಅಕ್ಕ ಪಿಲಾತ: ನಿಂಗಕ್ ಸಿಪಾಯಿಯಂಗ ಉಂಡಲ್ಲಾ, ನಿಂಗಕ್ ಎಚ್ಚಕ್ ಬದ್ರಮಾಡ್‌ವಕ್ ಕಯ್ಯುವೋ ಅಚ್ಚಕ್ ಮಾಡೀಂದ್ ಅಯಿಂಗಕ್ ಎಣ್ಣ್‌ಚಿ.

⁶⁶ಅಕ್ಕ ಅಯಿಂಗ ಪೋಯಿತ್ ಆ ಬಂಡೆ ಕಲ್ಲ್‌ಕ್ ಮುದ್ರೆ ಇಟ್ಟಿತ್ ಸಿಪಾಯಿಯಂಗಳ ಅಲ್ಲಿ ನಿಪ್ಪ್‌ಚಿಟ್ಟಿತ್ ಗೋರಿನ ಬದ್ರಮಾಡ್‍ಚಿ.