Read Kodava ಮತ್ತಾಯ 28 Bible Online

ಮತ್ತಾಯ 28 - Kodava bible

ಮತ್ತಾಯ 28

¹ಸಬ್ಬತ್ ದಿವಸ ಆನ ಪಿಂಞ ನಾರಾಚೆ ಪೊಲಿಂಜಿತಾಪ ನೇರತ್ ಮಗ್ದಲ ಮರಿಯಳು ಬೋರೆ ಮರಿಯಳು ಗೋರಿನ ನೋಟ್‍ವಕ್ ಪೋಚಿ.

²ಅಕ್ಕ ಅಲ್ಲಿ ಬಲ್ಯ ಬೂಕಂಪ ಆಯಿತ್, ಒಡೆಯಂಡ ದೂತ ಪರಲೋಕತ್ಂಜ ಬಂತ್ ಆ ಬಲ್ಯ ಬಂಡೆ ಕಲ್ಲ್‌ನ ಆಬರಿಕ್ ಉರ್‍ಟಿತ್ ಆಂಡ ಮೇಲೆ ಅಳ್‌ತತ್.

³ಅಂವೊಂಡ ರೂಪ, ಮಿಂಚ್‍ರನೆಕೆಯು, ಅಂವೊಂಡ ಬಟ್ಟೆ ಮಂಜ್‍ರನೆಕೆಯು ಬೊಳ್‌ತಿತೆ ಇಂಜತ್.

⁴ಅಲ್ಲಿ ಇಂಜ ಸಿಪಾಯಿಯಂಗ, ಪೋಡಿಲ್ ನಡ್‍ಗಿತ್, ಅಯಿಂಗ ಸೊಯ ತಪ್ಪಿತ್ ಚತ್ತನೆಕೆ ಆಚಿ.

⁵ಅಕ್ಕ ದೇವದೂತ ಪೊಣ್ಣಾಳ್‍ರ ಪಕ್ಕ: ನಿಂಗ ಬೊತ್ತತಿ! ಶಿಲುಬೇಕ್ ಇಟ್ಟ ಯೇಸುನ ನಿಂಗ ತ್‍ೕಡಿಯಂಡುಳ್ಳಿರಾಂದ್ ನಾಕ್ ಗೊತ್ತುಂಡ್.

⁶ಅಂವೊ ಇಲ್ಲಿ ಇಲ್ಲೆ. ಅಂವೊ ಎಣ್ಣ್‌ನನೆಕೆ ಚಾವ್‍ಯಿಂಜ ಜೀವವಾಯಿತ್ ಎದ್ದತ್. ಅಂವೊಂಡ ತಡಿ ಇಂಜ ಜಾಗತ್‍ನ ಬಂದ್ ನೋಟೀಂದ್ ಎಣ್ಣ್‌ಚಿ.

⁷ಇಕ್ಕ ನಿಂಗ ಬೆರಿಯ ಪೋಯಿತ್ ಅಂವೊಂಡ ಶಿಷ್ಯಂಗಕ್ ಅಂವೊ ಚಾವ್‍ಯಿಂಜ ಎದ್ದತ್‍ೕಂದ್ ಎಣ್ಣಿ. ಇಕ್ಕ, ನಿಂಗಕ್ ಮಿಂಞ ಅಂವೊ ಗಲಿಲಾಯಕ್ ಪೋಯಂಡುಂಡ್. ಅಲ್ಲಿ ಅಂವೊನ ನಿಂಗ ಕಾಂಬಿರಾಂದ್ ಅಯಿಂಗಕ್ ಎಣ್ಣ್‌ಚಿ.

⁸ಪೊಣ್ಣಾಳುವ ಪೋಡಿಲು ಅದೇ ಸಮಯತ್‍ಲ್ ದುಂಬ ಕುಶೀಲು ಆ ಜಾಗತ್‍ನ ಬುಟ್ಟಿತ್, ಈ ಸುದ್ದಿನ ಶಿಷ್ಯಂಗಕ್ ಎಣ್ಣ್‌ವಕ್ ಓಡಿ ಪೋಚಿ.

⁹ಒಮ್ಮಕೆ ಯೇಸು ಅಯಿಂಗಕ್ ಕಾಂಬ್‌ಚಿಟ್ಟಂಡ್, ನಿಂಗಕ್ ಸಮಾದಾನ ಇಕ್ಕಡ್‍ೕಂದ್ ಎಣ್ಣ್‌ಚಿ. ಅಕ್ಕ ಅಯಿಂಗ ಅಂವೊಂಡ ಪಕ್ಕ ಬಂದಿತ್ ಅಂವೊಂಡ ಕಾಲ್‌ನ ಪುಡ್‌ಚಿತ್ ಅಂವೊನ ತುದಿಚತ್.

¹⁰ಅಕ್ಕ ಯೇಸು ಅಯಿಂಗಳ ನೋಟಿತ್, ನಿಂಗಕ್ ಪೋಡಿ ಬೋಂಡ! ನಾಡ ತಮ್ಮಣಂಗಡ ಪಕ್ಕ ಪೋಯಿತ್, ಅಯಿಂಗಳ ಗಲಿಲಾಯಕ್ ಪೋಪಕ್ ಎಣ್ಣಿ, ಅಲ್ಲಿ ಅಯಿಂಗ ನನ್ನ ಕಾಂಬಾಂದ್ ಎಣ್ಣ್‌ಚಿ.

¹¹ಪೊಣ್ಣಾಳ್‍ವ ಬಯ್ಯಕ್ ಪೋಯಂಡಿಪ್ಪಕ ಗೋರಿನ ಕಾತಂಡಿಂಜ ಚೆನ್ನ ಸಿಪಾಯಿಯ ಪಟ್ಟಣಕ್ ಪೋಯಿತ್ ಅಯಿಂಗ ಕಂಡಾನೆಲ್ಲಾ ಮುಕ್ಯ ಯಾಜಕಂಗಡ ಪಕ್ಕ ಎಣ್ಣ್‌ಚಿ.

¹²ಮುಕ್ಯ ಯಾಜಕಂಗ ಪೆರಿಯಯಿಂಗಡ ಕೂಡೆ ಕೂಡಿತ್ ಚರ್ಚೆ ಮಾಡಿತ್ ಸಿಪಾಯಿಯಕ್ ದುಂಬ ಪಣ ಕೊಡ್‍ಪಕ್ ತೀರ್ಮಾನ ಮಾಡ್‍ಚಿ.

¹³ಅಯಿಂಗ ಸಿಪಾಯಿಯಂಗಕ್: ಯೇಸುರ ಶಿಷ್ಯಂಗ ಬಯಿಟ್ ಬಂದಿತ್, ನಂಗ ವರಿಯಂಡ್ ಇಪ್ಪಕ ಯೇಸುರ ತಡೀನ ಕಟ್ಟಂಡ್ ಪೋಯಿರ್‌ತ್‍ೕಂದ್ ಎಣ್ಣೀಂದ್ ಎಣ್ಣ್‌ಚಿ.

¹⁴ಈ ಸುದ್ದಿ ಅದಿಪತಿಕ್ ಕ್‍ೕಟತೇಂಗಿ ನಂಗ ಅಂವೊನ ಸಮಾದಾನ ಮಾಡಿತ್ ನಿಂಗಕ್ ತೊಂದರೆ ಆಕತನೆಕೆ ನಂಗ ನೋಟಿಯವಾಂದ್ ಎಣ್ಣ್‌ಚಿ.

¹⁵ಸಿಪಾಯಿಯ ಪಣತ್‍ನ ಎಡ್‍ತಂಡ್ ಅಯಿಂಗ ಎಣ್ಣ್‌ನನೆಕೆ ಮಾಡ್‍ಚಿ. ಈ ವಿಷಯ ಯೆಹೂದ್ಯಂಗಡ ಮದ್ಯತ್‍ಲ್ ಪಬ್ಬ್‌ಚಿ. ಇಂದ್‍ಕತ್ತನೆ ಅಯಿಂಗ ಈ ವಿಷಯತ್‍ನ ಎಣ್ಣುವ.

¹⁶ಪಿಂಞ ಅಂವೊಂಡ ಪನ್ನಂದ್ ಶಿಷ್ಯಂಗ ಗಲಿಲಾಯತ್‍ಲ್ ಯೇಸು ಅಯಿಂಗಕ್ ಎಣ್ಣಿತ್ಂಜ ಕುಂದ್‌ಕ್ ಪೋಚಿ.

¹⁷ಅಲ್ಲಿ ಯೇಸುನ ಕಾಂಬಕ ಅಂವೊಂಗ್ ಅಡ್ಡ ಬುದ್ದಿತ್ ಅಂವೊನ ಆರಾದನೆ ಮಾಡ್‍ಚಿ. ಆಚೇಂಗಿ, ಚೆನ್ನ ಜನ ಅನುಮಾನ ಪಟ್ಟತ್.

¹⁸ಯೇಸು ಅಯಿಂಗಡ ಪಕ್ಕ ಪೋಯಿತ್, ನಾಕ್ ಪರಲೋಕತ್‌ಲು ಬೂಲೋಕತ್‌ಲು ಎಲ್ಲಾ ಅದಿಕಾರ ನಾಕ್ ತಂದಿತುಂಡ್.

¹⁹ಆನಗುಂಡ್ ನಿಂಗ ಪೋಯಿತ್, ಎಲ್ಲಾ ದೇಶತ್‍ರ ಜನತ್‍ನ ನಾಡ ಶಿಷ್ಯಂಗಳಾಯಿತ್ ಮಾಡಿ. ಅಯಿಂಗಕ್ ಅಪ್ಪ, ಮೋಂವೊ ಪಿಂಞ ಪವಿತ್ರಾತ್ಮಂಡ ಪೆದತ್‍ಲ್ ದೀಕ್ಷಾಸ್ನಾನ ಕೊಡಿ.

²⁰ನಾನ್ ನಿಂಗಕ್ ಎಂತೆಲ್ಲಾ ಆಜ್ಞೆ ಮಾಡಿತುಂಡೋ ಅದ್‍ಂಗೆಲ್ಲಾ ಬಗ್ಗಿತ್ ನಡ್‍ಪಕ್ ಈ ಪುದಿಯ ಶಿಷ್ಯಂಗಕ್ ಎಣ್ಣಿ ಕೊಡಿ. ಇದಾ, ಈ ಲೋಕತ್‍ರ ಕಡೇಕತ್ತನೆ ನಾನ್ ನಿಂಗಡ ಕೂಡೆ ಎಕ್ಕಾಲು ಇಪ್ಪೀಂದ್ ಯೇಸು ಶಿಷ್ಯಂಗಕ್ ಎಣ್ಣ್‌ಚಿ.