Read Kodava ಮತ್ತಾಯ 4 Bible Online

ಮತ್ತಾಯ 4 - Kodava bible

ಮತ್ತಾಯ 4

¹ಪಿಂಞ ಸೈತಾನ ಯೇಸುನ ಸೋದನೆ ಮಾಡ್‌ವಕಾಯಿತ್ ಪವಿತ್ರಾತ್ಮ ಅಂವೊನ ಮಣಬೂಮಿಕ್ ಕಾಕಿಯಂಡ್ ಪೋಚಿ.

²ಯೇಸು ನಾಪದ್ ದಿವಸ ಪೋಲ್ ಬಯಿಟ್ ಒಂದು ತಿಂಗತೆ ಪಟ್ಟಣಿ ನಿಂದಂಡಿಂಜಗುಂಡ್, ಅಂವೊಂಗ್ ದುಂಬ ಕೆಲ ಪಯಿಚತ್.

³ಅಕ್ಕ ಸೈತಾನ ಯೇಸುರ ಪಕ್ಕ ಬಂತ್: ನೀನ್ ದೇವಡ ಮೋಂವೊನಾಚೇಂಗಿ ಈ ಕಲ್ಲ್‌ನ ಒಟ್ಟಿ ಆಪಕ್ ಅಪ್ಪಣೆ ಕೊಡ್‍ೕಂದ್ ಎಣ್ಣ್‌ಚಿ.

⁴ಅದ್ಂಗ್ ಅಂವೊ: ಮನುಷ್ಯ ಒಟ್ಟಿಯಿಂಜ ಮಾತ್ರ ಅಲ್ಲ, ದೇವಡ ಬಾಯಿಂಜ ಬಪ್ಪ ಓರೋರ್ ತಕ್ಕಿಂಜಲು ಬದ್‌ಕ್‌ವಾಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಂಡ್‍ೕಂದ್ ಎಣ್ಣ್‌ಚಿ.[10]

⁵ಅಕ್ಕ ಸೈತಾನ ಯೇಸುನ ಪವಿತ್ರವಾನ ಯೆರೂಸಲೇಮ್ ಪಟ್ಟಣಕ್ ಕಾಕಿಯಂಡ್ ಪೋಯಿತ್ ದೇವಾಲಯತ್‍ರ ಎತ್ತರವಾನ ಜಾಗತ್‍ಲ್ ನಿಪ್ಪ್‌ಚಿಟ್ಟಿತ್,

⁶ನೀನ್ ದೇವಡ ಮೋಂವೊನಾಚೇಂಗಿ ಇಲ್ಲಿಂಜ ಅಡಿಕ್ ಪಾರ್, ಎನ್ನಂಗೆಣ್ಣ್‌ಚೇಂಗಿ: ನಿನ್ನ ಕ‌ಪಾಡಂಡೂಂದ್ ನೀಕಾಯಿತ್ ದೇವದೂತಂಗಕ್ ದೇವ ಆಜ್ಞೆ ತಪ್ಪಾಂದೂ, ನೀಡ ಕಾಲ್‍ರ ಬೆರ ಕಲ್ಲ್‌ಲ್ ಮುಟ್ಟತನೆಕೆ, ಅಯಿಂಗ ನಿನ್ನ ಕೈಯಿಲ್ ಪೋರ್ಪಾಂದ್ ಒಳ್‌ದಿತುಂಡಲ್ಲಾಂದ್ ಎಣ್ಣ್‌ಚಿ.[11]

⁷ಅದ್ಂಗ್ ಯೇಸು: ನೀಡ ಒಡೆಯನಾನ ದೇವನ ಪರೀಕ್ಷೆಮಾಡತೇಂದ್ ಸಹ ಒಳ್‌ದಿತುಂಡಲ್ಲಾಂದ್ ಜವಾಬ್ ಕೊಡ್‍ತತ್.[12]

⁸ಪಿಂಞ ಸೈತಾನ ಯೇಸುನ ಒರ್ ಬಲ್ಯ ಕುಂದ್‌ರ ಕೊಡಿಕ್ ಕಾಕಿಯಂಡ್ ಪೋಯಿತ್, ಬೂಲೋಕತ್‌ರ ಎಲ್ಲಾ ರಾಜ್ಯತ್‍ನ ಪಿಂಞ ಅದ್ಂಡ ಮಹಿಮೆನ ಕಾ‌ಟಿಕೊಡ್‌ತಿತ್:

⁹ನೀನ್ ಬಗ್ಗಿತ್ ನನ್ನ ಆರಾದನೆ ಮಾಡ್‍ಚೇಂಗಿ ಇದ್‍ನೆಲ್ಲ ನಾನ್ ನೀಕ್ ತಪ್ಪೀಂದ್ ಎಣ್ಣ್‌ಚಿ.

¹⁰ಅದ್ಂಗ್ ಯೇಸು: ನಾಡ ಬಯ್ಯಕ್ ಪೋ ಸೈತಾನೇ, ನೀಡ ಒಡೆಯನಾನ ದೇವನ ಮಾತ್ರ ಸೇವೆ ಮಾಡಿತ್, ಅಂವೊ ಒಬ್ಬಂಗೇ ಆರಾದನೆ ಮಾಡಂಡೂಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಂಡ್‍ೕಂದ್ ಎಣ್ಣ್‌ಚಿ.[13]

¹¹ಅಕ್ಕ ಸೈತಾನ ಯೇಸುನ ಬುಟ್ಟಿತ್ ಪೋಚಿ; ದೇವದೂತಂಗ ಬಂತ್ ಅಂವೊಂಗ್ ಸೇವೆ ಮಾಡ್‍ಚಿ.

¹²ಯೋಹಾನನ ಜೈಲ್‍ಲ್ ಇಟ್ಟಿತುಂಡ್‍ೕಂದ್ ಕ್‍ೕಟ ಪಿಂಞ ಯೇಸು ಗಲಿಲಾಯಕ್ ಪುನಃ ಪೋಚಿ.

¹³ಆಚೇಂಗಿ ಯೇಸು ನಜರೇತ್‍ಲ್ ವಾಸ ಮಾಡ್‌ವಕ್ ಬದ್‍ಲ್ ಕಪೆರ್ನೌಮ್‍ಕ್ ಪೋಚಿ. ಆ ಪೇಟೆ, ಗಲಿಲಾಯ ಕೆರೆಕ್ ಪಕ್ಕತ್‍ಲ್ ಜೆಬುಲೋನ್ ಪಿಂಞ ನೆಫ್ತಲೀಮ್ ಪ್ರಾಂತ್ಯತ್‍ಲ್ ಇಂಜತ್.

¹⁴ಕಡಕರೆ ಪಕ್ಕತ್‍ಲ್ ಉಳ್ಳಯಿಂಗಳಾನ, ಯೆಹೂದ್ಯಂಗಲ್ಲತ ಬೋರೆ ಜನ ವಾಸ ಮಾಡ್‌ವ ಯೊರ್ದನ್ ಪೊಳೆರ ಆ ಬರಿಲುಳ್ಳ

¹⁵ಜೆಬುಲೋನ್ ಪಿಂಞ ನೆಫ್ತಲೀಮ್ ನಾಡಾನ ಗಲಿಲಾಯ ಪ್ರಾಂತ್ಯತ್‍ಲ್ ಉಳ್ಳ,

¹⁶ಇರ್‌ಟ್‌ಲ್ ಉಳ್ಳ ಜನಯೆಲ್ಲ ಬಲ್ಯ ಬೊಳಿನ ಕಂಡತ್; ಚಾವ್‍ರ ದಿಕ್ಕ್‌ಲ್ ಉಳ್ಳಯಿಂಗಕ್ ಬೊಳಿ ಉದ್‍ಚಿತ್‍ೕಂದ್,[14] ಯೆಶಾಯ ಪ್ರವಾದಿ ಎಣ್ಣ್‌ನದ್ ಪೂರ್ತಿ ಆಪನೆಕೆ ಇನ್ನನೆ ಆಚಿ.

¹⁷ಅಕ್ಕಯಿಂಜ ಯೇಸು: ನಿಂಗ ನಿಂಗಡ ಪಾಪಕಾಯಿತ್ ಪಶ್ಚಾತಾಪ ಪಟ್ಟಿತ್ ದೇವಡ ಪಕ್ಕ ಬಾರಿ, ಪರಲೋಕ ರಾಜ್ಯ ಬೆರಿಯ ಬಂದಂಡುಂಡ್‍ೕಂದ್ ಬೋದನೆ ಮಾಡ್‌ವಕ್ ಸುರ್ ಮಾಡ್‍ಚಿ.

¹⁸ಯೇಸು ಗಲಿಲಾಯತ್‍ರ ಕೆರೆರ ಬರಿಲ್ ನಡ್ಂದ್ ಪೋಯಂಡಿಪ್ಪಕ, ದಂಡ್ ಅಣ್ಣತಮ್ಮಣಂಗಳ ಕಂಡತ್. ಅಯಿಂಗ ಬೆಸ್ತಂಗಳಾನ ಪೇತ್ರ[15] ಎಣ್ಣುವ ಸೀಮೋನ ಪಿಂಞ ಅಂದ್ರೆಯ ಎಣ್ಣುವಯಿಂಗಳೇ. ದಂಡಾಳು ಬಲೆನ ಬೀಜಿತ್ ಮೀನ್ ಪುಡ್‍ಚಂಡ್ ಇಂಜತ್. ಯೇಸು ಅಯಿಂಗಕ್:

¹⁹ನಾಡ ಕೂಡೆ ಬಾರಿ, ನಾನ್ ನಿಂಗಕ್ ಮನುಷ್ಯಂಗಳ, ನಾಡ ಶಿಷ್ಯಂಗಳಾಯಿತ್ ಮಾಡ್‌ವಕ್ ಎಣ್ಣಿ ತಪ್ಪೀಂದ್ ಎಣ್ಣ್‌ಚಿ.

²⁰ಅಯಿಂಗ ಒಮ್ಮಕೆ ಬಲೆನ ಬುಟ್ಟಿತ್ ಯೇಸುರ ಕೂಡೆ ಪೋಚಿ.

²¹ಯೇಸು ಇಂಞು ಚೆನ್ನ ಮಿಂಞಕ್ ಪೋಯಂಡಿಪ್ಪಕ, ಅಲ್ಲಿ ಜೆಬೆದಾಯಂಡ ಮಕ್ಕಳಾನ ಯಾಕೋಬ ಪಿಂಞ ಯೋಹಾನನ ಕಂಡತ್. ಅಯಿಂಗ ಅಯಿಂಗಡ ಅಪ್ಪ ಜೆಬೆದಾಯಂಡ ಕೂಡೆ ದೋಣಿಲ್ ಮೀನ್ ಪುಡಿಪಕ್ ಬಲೆನ ಸರಿ ಮಾಡಿಯಂಡ್ ಇಂಜತ್. ಯೇಸು ಅಯಿಂಗಳ ಕಾಕ್‍ಚಿ;

²²ಅಕ್ಕಣೆಕೆ ಅಯಿಂಗ ದೋಣಿನ ಪಿಂಞ ಅಯಿಂಗಡ ಅಪ್ಪನ ಬುಟ್ಟಿತ್ ಯೇಸುರ ಕೂಡೆ ಪೋಚಿ.

²³ಪಿಂಞ ಯೇಸು, ಗಲಿಲಾಯ ನಾಡ್‍ಕೆಲ್ಲಾ ಪೋಯಿತ್, ಅಯಿಂಗಡ ಸಬಾಮಂದಿರತ್‍ಲ್ ಬೋದನೆ ಮಾಡಿಯಂಡ್, ದೇವಡ ರಾಜ್ಯತ್‍ರ ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡ್, ಅಲ್ಲಿಯತ್‍ರ ಜನಡ ಎಲ್ಲಾ ಕಾಯಿಲೆನ ಪಿಂಞ ರೋಗತ್‍ನ ವಾಸಿ ಮಾಡ್‍ಚಿ.

²⁴ಅಂವೊಂಡ ಕೀರ್ತಿ ಸಿರಿಯ ನಾಡ್‍ಲೆಲ್ಲಾ ಪಬ್ಬ್‌ಚಿ. ಅಕ್ಕ ಬೋರೆ ಬೋರೆ ಕಾಯಿಲೆ ಪಿಂಞ ನೊಂಬಲತ್‍ಲ್ ಉಳ್ಳ ಎಲ್ಲಾ ರೋಗಿಯಳ, ಕೂಳಿ ಪುಡ್‌ಚಿತ್ಂಜಯಿಂಗಳ ಪಿಂಞ ಮೂರ್ಛೆ ರೋಗಿಯಳ, ಪಾರ್ಶವಾಯು ಕಾಯಿಲೆಯಿಂಜ ನರಳಿಯಂಡುಳ್ಳಯಿಂಗಳ ಅಂವೊಂಡ ಪಕ್ಕ ಕೊಂಡ್ ಬಾತ್. ಯೇಸು ಅಯಿಂಗಳ ವಾಸಿ ಮಾಡ್‍ಚಿ.

²⁵ಗಲಿಲಾಯ, ದೆಕಪೊಲಿ, ಯೆರೂಸಲೇಮ್, ಯೂದಾಯ ಪಿಂಞ ಯೊರ್ದನ್ ಪೊಳೆರ ಆ ಬರಿಯಿಂಜ ದುಂಬ ಜನ ಬಂದಿತ್ ಅಂವೊಂಡ ಬಯ್ಯಕ್ ಪೋಚಿ.