Read Kodava ಮತ್ತಾಯ 5 Bible Online

ಮತ್ತಾಯ 5 - Kodava bible

ಮತ್ತಾಯ 5

¹ದುಂಬ ಜನಡ ಗುಂಪ್ ಬಂದಂಡಿಪ್ಪದ್‍ನ ಕಂಡಿತ್ ಯೇಸು, ಅಂವೊಂಡ ಶಿಷ್ಯಂಗಡ ಕೂಡೆ ಕುಂದ್‌ರ ಕೊಡಿಕ್ ಪೋಯಿತ್ ಅಳ್‌ತತ್. ಅಕ್ಕ ಅಂವೊಂಡ ಶಿಷ್ಯಂಗ ಅಂವೊ ಎಣ್ಣ್‌ವಾನ ಕ್‍ೕಪಕ್ ಅಂವೊಂಡ ಪಕ್ಕ ಬಾತ್.

²ಅಂವೊ ಬೋದನೆ ಮಾಡ್‌ವಕ್ ಸುರ್ ಮಾಡ್‍ಚಿ.

³ಆತ್ಮತ್‍ಲ್ ಗರೀಬ[16] ಆಯಿತುಳ್ಳಯಿಂಗ ಆಶೀರ್ವಾದ ಪಡ್ಂದಯಿಂಗ; ಪರಲೋಕ ರಾಜ್ಯ ಅಯಿಂಗಡದಾಯಿತ್‌ಪ್ಪ.

⁴ದುಃಖ ಪಟ್ಟಂಡುಳ್ಳಯಿಂಗ ಆಶೀರ್ವಾದ ಪಡ್ಂದಯಿಂಗ; ದೇವ ಅಯಿಂಗಳ ಸಮಾದಾನ ಮಾಡ್‌ವ.

⁵ತಗ್ಗಿತ್ ಉಳ್ಳಯಿಂಗ ಆಶೀರ್ವಾದ ಪಡ್ಂದಯಿಂಗ; ಈ ಲೋಕ ಅಯಿಂಗಡದಾಯಿತ್‌ಪ್ಪ.

⁶ನೀತಿಕಾಯಿತ್ ಕೆಲ ಪಯಿಚಿತುಳ್ಳಯಿಂಗಳು, ಬಾಯಾರಿಕೆ ಆಯಿತುಳ್ಳಯಿಂಗಳು ಆಶೀರ್ವಾದ ಪಡ್ಂದಯಿಂಗ; ಅಯಿಂಗಳ ದೇವ ತೃಪ್ತಿ ಪಡ್‍ತ್‍ವ.

⁷ಕನಿಕರ ಕಾಟ್‍ವಯಿಂಗ ಆಶೀರ್ವಾದ ಪಡ್ಂದಯಿಂಗ; ಅಯಿಂಗಕ್ ಕನಿಕರ ಕ್‍ಟ್ಟುವ.

⁸ಶುದ್ದ ಹೃದಯ ಉಳ್ಳಯಿಂಗ ಆಶೀರ್ವಾದ ಪಡ್ಂದಯಿಂಗ; ಅಯಿಂಗ ದೇವನ ಕಾಂಬ.

⁹ಸಮಾದಾನ ಮಾಡ್‌ವಯಿಂಗ ಆಶೀರ್ವಾದ ಪಡ್ಂದಯಿಂಗ; ಅಯಿಂಗಳ ದೇವಡ ಮಕ್ಕಾಂದ್ ಎಣ್ಣ್‌ವ.

¹⁰ನೀತಿಕಾಯಿತ್ ಹಿಂಸೆನ ಸಹಿಸುವಯಿಂಗ ಆಶೀರ್ವಾದ ಪಡ್ಂದಯಿಂಗ; ಪರಲೋಕ ರಾಜ್ಯ ಅಯಿಂಗಡದಾಯಿತ್‌ಪ್ಪ.

¹¹ಜನ ನಿಂಗಳ ನಾಡಗುಂಡ್ ಅವಮಾನ ಮಾಡಿತ್, ಹಿಂಸೆ ಮಾಡಿತ್ ಪಿಂಞ ನಿಂಗಡ ಮೇಲೆ ಕೆಟ್ಟ ತಕ್ಕ್ ಪರ್ಂದತೇಂಗಿ, ನಿಂಗ ಆಶೀರ್ವಾದ ಪಡ್ಂದಯಿಂಗ;

¹²ಸಂತೋಷವಾಯಿತ್ ಇರಿ, ಕುಶಿ ಪಡಿರಿ; ಪರಲೋಕತ್‍ಲ್ ನಿಂಗಡ ಫಲ ಬಲ್ಯದಾಯಿತ್‌ಪ್ಪ. ಎನ್ನಂಗೆಣ್ಣ್‌ಚೇಂಗಿ, ನಿಂಗಕಿಂಜ ಮಿಂಞ ಇಂಜ ಪ್ರವಾದಿಯಂಗಕ್ ಸಹ ಅಯಿಂಗ ಇನ್ನನೆ ಹಿಂಸೆ ಮಾಡ್‍ಚಿ.

¹³ನಿಂಗ ಈ ಲೋಕತ್‍ರ ಜನಕ್ ಉಪ್ಪಾಯಿತ್ ಉಳ್ಳಿರ. ಆಚೇಂಗಿ ಉಪ್ಪ್‌ರ ಸತ್ವ ಪೋಚೇಂಗಿ ಎಂತ ಫಲ? ಪುನಃ ನಿಂಗಕ್ ಉಪ್ಪ್‌ನ ಎನ್ನನೆ ಸತ್ವ ಮಾಡ್‌ವಕಯ್ಯು?[17] ಅದ್‍ನ ಚಾಡಿತ್ ಚೌಟ್‍ವಕ್ ಅಲ್ಲತೆ ಬೋರೆ ಒರ್ ಕೆಲಸಕೂ ಅದ್ ಪ್ರಯೋಜನ ಆಪುಲೆ.

¹⁴ನಿಂಗ ಈ ಲೋಕತ್‍ರ ಜನಕ್ ಬೊಳಿ ಆಯಿತುಳ್ಳಿರ. ಕುಂದ್‌ರ ಕೊಡಿಲ್ ಉಳ್ಳ ಪಟ್ಟಣತ್‍ನ ಒಳ್‌ಪ್‍ಚಿಡುವಕಯ್ಯುಲೆ.

¹⁵ದಾರೂ ಬೊಳ್‌ಚತ್‍ನ ಕತ್ತ್‌ಚಿಡುವಂಜಿ ಒರ್ ಪಾತ್ರತ್‍ರ ಒಳ್‍ಲ್ ಮುಚ್ಚಿತ್ ಬೆಪ್ಪುಲೆ. ಅದ್‍ನ ಬೊಳ್‍ಚ ಕಂಬತ್‍ಲ್ ಬೆಪ್ಪ. ಅದ್ ಮನೆಲ್ ಉಳ್ಳಯಿಂಗಕೆಲ್ಲಾ ಬೊಳಿಯಾಯಿತ್ ಮಿನ್ನುವ.

¹⁶ಆನಗುಂಡ್ ನಿಂಗಡಲ್ಲಿ ಉಳ್ಳ ಬೊಳಿ, ಜನಡ ಮಿಂಞತ್ ಪ್ರಕಾಶವಾಯಿತ್ ಕಾಂಗಡ್, ನಿಂಗ ಮಾಡ್‌ವ ನಲ್ಲ ಕೆಲಸತ್‍ನ ಕಂಡಿತ್ ಪರಲೋಕತ್‍ಲ್ ಉಳ್ಳ ನಿಂಗಡ ಅಪ್ಪನ ತುದಿಪಕ್ ಕಾರಣ ಆಪ.

¹⁷ನ್ಯಾಯಪ್ರಮಾಣ ಅಥವ ಪ್ರವಾದಿಯಂಗಡ ಬೋದನೆನ ನಾಶ ಮಾಡ್‌ವಕಾಯಿತ್ ನಾನ್ ಬಂದಿಯೇಂದ್ ನಿಂಗ ಗೇನ ಮಾಡತಿ. ನಾಶ ಮಾಡ್‌ವಕಾಯಿತ್ ಅಲ್ಲ ಆಚೇಂಗಿ ಅದ್‍ನ ನೆರೆವೇರಿಚಿಡ್‌ವಕಾಯಿತ್ ಬಂದಿಯೆ.

¹⁸ನಿಂಗಕ್ ನೇರಾಯಿತು ಎಣ್ಣ್‌ವಿ: ಬಾನವು ಬೂಮಿಯು ಮಾಯ ಆಚೇಂಗಿಯು, ನ್ಯಾಯಪ್ರಮಾಣತ್‍ರ ಒಳ್‍ತ್‍ರ ಒರ್ ಚೆರಿಯ ಬಾಗ ಕೂಡೆ ಪಾಳಾಕತೆ, ಅದ್ಂಡ ಉದ್ದೇಶ ನೆರೆವೇರುವಕತ್ತನೆ ಅನ್ನನೆ ಇಪ್ಪ.

¹⁹ಆನಗುಂಡ್ ಒಬ್ಬ, ನ್ಯಾಯಪ್ರಮಾಣತ್‍ಲ್ ಉಳ್ಳ ಒರ್ ಚೆರಿಯ ವಿಷಯಕ್ ಸಹ ಬಗ್ಗಿತ್ ನಡ್‍ಕತೆ ಪೋಯಿತ್, ಅನ್ನನೆ ಬೋರೆಯಿಂಗಕು ಬೋದನೆ ಮಾಡ್‌ವಂವೊ ಪರಲೋಕ ರಾಜ್ಯತ್‍ಲ್ ಎಲ್ಲಾರ್ಕಿಂಜ ಚೆರಿಯವಂವೊನಾಯಿತ್‌ಪ್ಪ. ಇದ್‍ನೆಲ್ಲ ಮಾಡಿತ್ ಅನ್ನನೆ ಬೋದನೆ ಮಾಡ್‌ವಂವೊ ಪರಲೋಕ ರಾಜ್ಯತ್‍ಲ್ ಎಲ್ಲಾರ್ಕಿಂಜ ಬಲ್ಯಂವೊನಾಯಿತ್‌ಪ್ಪ.

²⁰ನಾನ್ ನಿಂಗಕ್ ಎಣ್ಣ್‌ವಿ: ನಿಂಗಡ ನೀತಿ ಫರಿಸಾಯಂಗಡ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡ ನೀತಿಗಿಂಜ ಬಲ್ಯದಾಯಿತ್ ಇಲ್ಲತೆಪೋಚೇಂಗಿ ನೇರಾಯಿತು ನಿಂಗ ಪರಲೋಕ ರಾಜ್ಯತ್‍ಲ್ ಪ್ರವೇಶ ಮಾಡುಲೆ.

²¹ಕೊಲೆ ಮಾಡ್‌ವಕ್ಕಾಗ,[18] ಅನ್ನೆನೆ ಕೊಲೆ ಮಾಡ್‍ಚೇಂಗಿ, ನಿಂಗ ನ್ಯಾಯತೀರ್ಪ್‌ಕ್ ಒಳಪಡ್‍ವಿರಾಂದ್ ನಂಗಡ ಪೂರ್ವೀಕಂಗಕ್ ಎಣ್ಣ್‌ನಾನ ನಿಂಗ ಕ್‍ೕಟಿತುಳ್ಳಿರ.

²²ಆಚೇಂಗಿ ನಾನ್ ಎಣ್ಣ್‌ವಿ, ನಿಂಗ ನಿಂಗಡ ಅಣ್ಣತಮ್ಮಣನಂಗಡ ಕೂಡೆ ಚೆಡಿಲ್ ಉಂಡೇಂಗಿ ನ್ಯಾಯತೀರ್ಪ್‌ಕ್ ಒಳಪಡ್‍ವಿರ; ನಿಂಗಡ ಏದೋರ್ ಅಣ್ಣತಮ್ಮಣನಂಗಕ್: ನೀನ್ ಒಂದಾಂಗು ಲಾಯಕ್ ಇಲ್ಲೇಂದ್ ಎಣ್ಣ್‌ಚೇಂಗಿ ಯೆಹೂದ್ಯಂಗಡ ಆಲೋಚನೆ ಸಬೇಕ್ ಮಿಂಞತ್ ನಿಪ್ಪಿರ. ನಿಂಗಡ ಅಣ್ಣತಮ್ಮಣನಂಗಳ ನಿಂಗ ಮುಠಾಳಂಗಾಂದ್ ಎಣ್ಣ್‌ಚೇಂಗಿ, ನಿಂಗ ನರಕ ಲೋಕತ್‍ಲ್ ಉಳ್ಳ ತಿತ್ತ್‌ಕ್ ಪೋಪಕ್ ಬಟ್ಟೆ ಮಾಡ್‌ವಿರ.

²³ಆನಗುಂಡ್ ನಿಂಗ ನಿಂಗಡ ಕಾಣಿಕೆನ ಬಲಿಪೀಠಕ್ ಎಡ್‌ತ ಬಪ್ಪಕ, ನಿಂಗಡ ಮೇಲೆ ನಿಂಗಡ ಅಣ್ಣತಮ್ಮಣಂಗಕ್ ವಿರೋದ ಉಂಡ್‍ೕಂದ್ ನಿಂಗಕ್ ಗೇನ ಬಾತೇಂಗಿ,

²⁴ನಿಂಗಡ ಕಾಣಿಕೆನ ಬಲಿಪೀಠತ್‍ರ ಪಕ್ಕ ಬುಟ್ಟಿತ್, ನಿಂಗ ಅಂವೊಂಡ ಪಕ್ಕ ಪೋಯಿತ್, ಅಂವೊಂಡ ಕೂಡೆ ಸಮಾದಾನ ಆಯಿತ್, ಬಯ್ಯ ಬಂತ್ ನಿಂಗಡ ಕಾಣಿಕೆನ ಅರ್ಪಣೆ ಮಾಡಂಡು.

²⁵ದಾರೇಂಗಿ ನಿಂಗಡ ಪಕ್ಕ ಬಂದಿತ್ ನಿಂಗ ತಪ್ಪ್‌ಮಾಡಿತುಳ್ಳಿರಾಂದ್ ನಿಂಗಳ ನ್ಯಾಯಾದಿಪತಿರ ಪಕ್ಕ ಕಾಕಿಯಂಡ್ ಪೋಪಕ, ಆ ವಿಷಯತ್‍ನ ಬಟ್ಟೇಲೇ ಸಮಾದಾನ ಮಾಡಿಯೊಳಿ. ಇಲ್ಲತಪೋಚೇಂಗಿ ನೀಡ ವಿರೋದಿ ನಿನ್ನ ನ್ಯಾಯಾದಿಪತಿಕ್ ಒಪ್ಪ್‌ಚಿಟ್ಟಿತ್, ಪಿಂಞ ಅಂವೊ ನಿನ್ನ ಅದಿಕಾರಿಕ್ ಒಪ್ಪ್‌ಚಿಟ್ಟಿತ್, ನಿನ್ನ ಜೈಲ್‌ಕ್ ಇಡ್‌ವ.

²⁶ನೀಡ, ಕಡೆ ಕಾಸ್‍ನ ಕೊಡ್‌ಪಕತ್ತನೆ ನಿಂಗ ಜೈಲಿಂಜ ಪೊರಮೆ ಬಪ್ಪ್‌ಲೇಂದ್ ನಿಂಗಕ್ ನಾನ್ ನೇರಾಯಿತು ಎಣ್ಣ್‌ವಿ.

²⁷ವ್ಯಬಿಚಾರ ಮಾಡ್‌ವಕ್ಕಾಗಾಂದ್[19] ಎಣ್ಣ್‌ವ ದೇವಡ ಆಜ್ಞೆನ ಎಣ್ಣ್‌ನಾನ ನಿಂಗ ಕ್‍ೕಟಿತುಳ್ಳಿರ.

²⁸ಆಚೇಂಗಿ ನಾನ್ ನಿಂಗಕ್ ಎಣ್ಣ್‌ವಿ: ಬೋರೆ ಪೊಣ್ಣಾಳ್‍ನ ಆಸೆಯಿಂಜ ನೋಟ್‍ಚೇಂಗಿ ಸಹ, ಅಂವೊ ತಾಂಡ ಹೃದಯತ್‍ಲ್ ಅವಡ ಕೂಡೆ ವ್ಯಬಿಚಾರ ಮಾಡ್‍ನನೆಕೆ.

²⁹ನೀಡ ಬಲ್‌ತೆ ಕಣ್ಣ್ ಪಾಪ ಮಾಡ್‌ವಕ್ ಕಾರಣವಾಚೇಂಗಿ, ಅದ್‍ನ ಬಲ್‍ಚಿತ್ ಕನ್‍ಚಿರ್. ನೀಡ ಪೂರ್ತಿ ತಡೀನ ನರಕತ್‍ಲ್ ತಳ್ಳ್‌ವಕಿಂಜ, ನೀಡ ತಡೀರ ಒರ್ ಬಾಗ ಇಲ್ಲತಿಪ್ಪದ್ ನಲ್ಲದ್.

³⁰ನೀಡ ಬಲ್‌ತೆ ಕೈ ಪಾಪ ಮಾಡ್‌ವಕ್ ಕಾರಣವಾಚೇಂಗಿ, ಅದ್‍ನ ಕೆತ್ತಿತ್ ಆ ಕೈಯಿನ ಚಾಡಿರ್. ನೀಡ ಪೂರ್ತಿ ತಡೀನ ನರಕತ್‍ಲ್ ತಳ್ಳ್‌ವಕಿಂಜ, ನೀಡ ತಡೀರ ಒರ್ ಬಾಗ ಇಲ್ಲತಿಪ್ಪದ್ ನಲ್ಲದ್.

³¹ಒಬ್ಬ, ತಾಂಡ ಪೊಣ್ಣ್‌ನ ತ್‍ಕ್ಕಾರ ಮಾಡಿತ್ ಬುಟ್ಟಿತ್ ಪೋಂಡೂಂದ್ ಗೇನ ಮಾಡ್‍ಚೇಂಗಿ, ಒರ್ ಕಾಗದತ್‍ಲ್ ಅಂವೊ ಅವಳ ಬುಟ್ಟಂಡುಳ್ಳ್‌ಂದ್ ಒಳ್‍ದಿತ್ ಕೊಡ್‍ಕಂಡೂಂದ್ ಉಳ್ಳ ದೇವಡ ಆಜ್ಞೆನ ಕ್‍ೕಟಿತ್ತುಳ್ಳಿರ.[20]

³²ಆಚೇಂಗಿ ಇಕ್ಕ ನಾನ್ ನಿಂಗಕ್ ಎಣ್ಣ್‌ವಿ: ವ್ಯಬಿಚಾರ ಮಾಡ್‍ನ ಕಾರಣಕ್ ಅಲ್ಲತೆ ಬೋರೆ ಏದ್ ಕಾರಣಕಾಯಿತು ಒಬ್ಬ ತಾಂಡ ಪೊಣ್ಣ್‌ನ ಬುಟ್ಟ್‌ರ್‍ತೇಂಗಿ, ಅವ ವ್ಯಬಿಚಾರ ಮಾಡ್‌ವಕ್ ಇಂವೊ ಕಾರಣ ಆಪ. ಅನ್ನನೆ ಬೋಂಡಾಂದ್ ಬುಟ್ಟ ಪೊಣ್ಣಾಳ್‍ನ ಮಂಗಲ ಕಯಿಪಂವೊನು ವ್ಯಬಿಚಾರ ಮಾಡ್‍ವಂವೊನಾಯಿತ್‌ಪ್ಪ.

³³ಕೊಡ್‍ತ ತಕ್ಕ್‌ನ ಪೂರೈಚಿಡತೆ ಇಪ್ಪಕ್ಕಾಗ, ದೇವಡ ಪಕ್ಕ ಮಾಡ್‍ನ ಆಣೆನ ನೆರವೇರಿಚಿಡಂಡೂಂದ್ ಪಂಡತ ಕಾಲತ್‍ಲ್ ಎಣ್ಣ್‌ನಾನ ನಿಂಗ ಕ್‍ೕಟಿತುಳ್ಳಿರ.[21]

³⁴ಆಚೇಂಗಿ ನಾನ್ ಎಣ್ಣ್‌ವಿ: ಆಣೆ ಇಡಂಡ. ಪರಲೋಕತ್‍ರ ಮೇಲೆ ಆಣೆ ಇಡಂಡ, ಎನ್ನಂಗೆಣ್ಣ್‌ಚೇಂಗಿ, ಅದ್ ದೇವಡ ಸಿಂಹಾಸನವಾಯಿತುಂಡ್.

³⁵ಬೂಮಿರ ಮೇಲೆ ಆಣೆ ಇಡಂಡ, ಅದ್ ಅಂವೊಂಡ ಪಾದಪೀಠ. ಯೆರೂಸಲೇಮ್‍ರ ಪೆದತ್‍ಲು ಇಡಂಡ, ಅದ್ ಮಹಾರಾಜಂಡ ಪಟ್ಟಣವಾಯಿತುಂಡ್.

³⁶ನೀಡ ಮಂಡೆರ ಮೇಲೆ ಸಹ ಆಣೆ ಇಡಂಡ. ಎನ್ನಂಗೆಣ್ಣ್‌ಚೇಂಗಿ, ನೀನ್ ಒರ್ ತಲ್‌ಮಿನ ಕೂಡೆ ಕರ್ತಿತ್ ಅಥವ ಬೊಳ್‌ತಿತ್ ಮಾಡ್‌ವಕಯ್ಯುಲೆ.

³⁷ನಿಂಗಡ ತಕ್ಕ್ ಅಕ್ಕೂಂದ್ ಎಣ್ಣ್‌ಚೇಂಗಿ ಅದ್ ಅಕ್ಕುವಾಯಿತಿರಡ್, ಇಲ್ಲೇಂದ್ ಎಣ್ಣ್‌ಚೇಂಗಿ ಇಲ್ಲೇಂದಿರಡ್. ಇದ್ ಬುಟ್ಟಿತ್ ಬೋರೆ ಏದ್ ಎಣ್ಣ್‌ಚೇಂಗಿಯು, ಅದ್ ಸೈತಾನಿಂಜ ಬಪ್ಪದೇ.

³⁸ಕಣ್ಣ್‌ಕ್ ಬಂದದ್ ಕಣ್ಣ್‌ಕ್, ಪಲ್ಲ್‌ಕ್ ಬಂದದ್ ಪಲ್ಲ್‌ಕ್, ಇನ್ನನೆ ಎಣ್ಣ್‌ವಾನ ಕ್‍ೕಟಿತುಳ್ಳಿರ.[22]

³⁹ನಾನ್ ಇಕ್ಕ ಎಣ್ಣ್‌ವಿ. ನಿಂಗಕ್ ಮೋಸ ಮಾಡ್‍ನಯಿಂಗಡ ಮೇಲೆ ಪಗೆ ಬೆಕ್ಕತಿ. ಒಬ್ಬ ನೀಡ ಬಲ್‌ತೆ ದವಡೆಕ್ ಪೊಜ್ಜತೇಂಗಿ, ಅಂವೊ ನಿಂಗಡ ಎಡ್‍ತೆ ದವಡೆಕ್ ಸಹ ಪೊಯ್ಯುವಕ್ ಕಾಟಿಕೊಡಿ.

⁴⁰ಒಬ್ಬ ನೀಡ ಬಟ್ಟೆ ಬೋಂಡೂಂದ್ ನಿನ್ನ ನ್ಯಾಯಾಲಯಕ್ ಅಯಿಚತೇಂಗಿ, ನೀನ್ ಅಂವೊಂಗ್ ನೀಡ ಕೋಟ್‍ನ ಸಹ ಕೊಡ್‍ತ್‍ರ್.

⁴¹ಒಬ್ಬ ಅಂವೊಂಡ ಚೀಲತ್‍ನ ಒರ್ ಕಿಲೋಮೀಟರ್‌ಕ್ ಎಡ್‍ತಂಡ್ ಪೋಂಡೂಂದ್ ನಿನ್ನ ಒತ್ತಾಯ ಮಾಡ್‍ಚೇಂಗಿ, ನೀನ್ ಆ ಚೀಲತ್‍ನ ದಂಡ್ ಕಿಲೋಮೀಟರ್‌ಕ್ ಎಡ್‍ತಂಡ್ ಪೋ.

⁴²ನೀಡ ಪಕ್ಕ ಉಳ್ಳದ್‍ನ ಬೋಂಡೂಂದ್ ಕ್‍ೕಪಂವೊಂಗ್ ಕೊಡ್, ಸಾಲ ಕ್‍ೕಪಯಿಂಗಕ್ ಒಂದು ಗೇನ ಮಾಡತೆ ಸಾಲ ಕೊಡ್.

⁴³ನಿಂಗ ನಿಂಗಡ ಸ್ನೇಹಿತಂಗಳ ಪ್ರೀತಿ ಮಾಡಂಡು, ಶತ್ರುವಳ ದ್ವೇಶ ಮಾಡಂಡೂಂದ್ ಎಣ್ಣುವ ನ್ಯಾಯಪ್ರಮಾಣತ್‍ನ ಕ್‍ೕಟಿತುಳ್ಳಿರ.[23]

⁴⁴ಆಚೇಂಗಿ ನಾನ್ ಇಕ್ಕ ಎಣ್ಣ್‌ವಿ, ನಿಂಗಡ ಶತ್ರುವಳ ಪ್ರೀತಿ ಮಾಡಿ, ನಿಂಗಳ ಹಿಂಸೆ ಮಾಡ್‌ವಯಿಂಗಕ್ ಪ್ರಾರ್ಥನೆ ಮಾಡಿ.

⁴⁵ಅನ್ನನೆ ಮಾಡ್‍ಚೇಂಗಿ ನಿಂಗ ಪರಲೋಕತ್‍ಲ್ ಉಳ್ಳ ದೇವಡ ಮಕ್ಕಡನೆಕೆ ನಡ್‍ಪಿರ. ಅಂವೊ ನಲ್ಲಯಿಂಗಕು ಕೆಟ್ಟಯಿಂಗಕೂ ಸೂರ್ಯತ್‍ನ ಉದಿಪ್‍ಚಿಟ್ಟಿತ್ ಬೊಳಿನ ಕೊಡ್‍ಪ ಪಿಂಞ ನೀತಿವಂತಯಿಂಗಕು ಅನೀತಿವಂತಯಿಂಗಕು ಮಳೆ ತಪ್ಪ.

⁴⁶ನಿಂಗಳ ಪ್ರೀತಿ ಮಾಡ್‌ವಯಿಂಗಳ ಮಾತ್ರ ನಿಂಗ ಪ್ರೀತಿ ಮಾಡ್‍ಚೇಂಗಿ ಎಂತ ಫಲ? ಕಂದಾಯ ಎಡ್‌ಪಯಿಂಗಳು ಅನ್ನನೆ ಮಾಡ್‌ವಲ್ಲ?

⁴⁷ನಿಂಗ ನಿಂಗಡ ಸ್ನೇಹಿತಂಗಡ ಕೂಡೆ ಮಾತ್ರ ಕುಶೀಲ್ ಇಂಜತೇಂಗಿ, ನಿಂಗಕು, ಬೋರೆಯಿಂಗಕು ಎಂತ ವೆತ್ಯಾಸ? ದೇವನ ಗೊತ್ತಿ‌ಲ್ಲತಯಿಂಗಳೂ ಅನ್ನನೆ ಮಾಡ್‌ವಲ್ಲ?

⁴⁸ಆನಗುಂಡ್ ನಿಂಗಳ ಪ್ರೀತಿ ಮಾಡತಯಿಂಗಳ ಸಹ ನಿಂಗ ಪ್ರೀತಿ ಮಾಡಿತ್, ಪರಲೋಕತ್‍ಲ್ ಉಳ್ಳ ನಿಂಗಡ ಅಪ್ಪ ಪೂರ್ತಿಯಾಯಿತುಳ್ಳನೆಕೆ ನಿಂಗಳು ಪೂರ್ತಿಯಾಯಿತಿರಿ.