Read Kodava ಮತ್ತಾಯ 6 Bible Online

ಮತ್ತಾಯ 6 - Kodava bible

ಮತ್ತಾಯ 6

¹ನಿಂಗ ಮಾಡ್‌ವ ದರ್ಮ ಕಾರ್ಯತ್‍ನ ಎಲ್ಲಾರು ಕಂಡಿತ್ ಮೆಚ್ಚ್‌ವನೆಕೆ ಮಾಡ್‌ವಕ್ಕಾಗ. ಅನ್ನನೆ ಮಾಡ್‍ಚೇಂಗಿ ಪರಲೋಕತ್‍ಲ್ ಉಳ್ಳ ನಿಂಗಡ ಅಪ್ಪಯಿಂಜ ಕ್‍ಟ್ಟ್‌ವಕುಳ್ಳ ಫಲತ್‍ನ ನಿಂಗ ಕಳೆಂದ್‍ರ್‍ವಿರ.

²ಆನಗುಂಡ್ ನಿಂಗ ದರ್ಮ ಕಾರ್ಯ ಮಾಡ್‌ವಕ, ಕಪಟಿಯಂಗ ಮಾಡ್‌ವನೆಕೆ ಸಬಾಮಂದಿರತ್‍ಲ್ ಪಿಂಞ ರಸ್ತೆಲ್ ಪೋಪಯಿಂಗಕ್, ಅಯಿಂಗ ಮಾಡ್‌ವ ದರ್ಮ ಕಾರ್ಯ ಗೊತ್ತಾಡ್‍ೕಂದು ಅಯಿಂಗ ನಿಂಗಳ ಕೊಂಡಾಡಂಡೂಂದು ಕೊಂಬ್ ಊದ್‍ವನೆಕೆ ನಿಂಗ ಮಾಡಂಡ. ಅಯಿಂಗಕ್ ಕ್‍ಟ್ಟ್‌ವಕುಳ್ಳ ಎಲ್ಲಾ ಫಲವು ಕ್‍ಟ್ಟ್‌ಚೀಂದ್ ನಾನ್ ನೇರಾಯಿತು ನಿಂಗಕ್ ಎಣ್ಣ್‌ವಿ.

³ಆಚೇಂಗಿ, ನಿಂಗ ಒಬ್ಬಂಗ್ ಕೊಡ್‌ಪಕ ನಿಂಗಡ ಬಲ್‌ತೆ ಕೈ ಮಾಡಿಯಂಡುಳ್ಳದ್ ಎಡ್‌ತ ಕೈಯಿಕ್ ಗೊತ್ತಾಪಕ್ಕಾಗ.

⁴ನಿಂಗಡ ಇನಾಮ್‍ನ ಗುಟ್ಟಾಯಿತ್ ಕೊಡಿ, ಎಲ್ಲಾ ಒಳಗುಟ್ಟ್‌ನ ಗೊತ್ತುಳ್ಳ ನಿಂಗಡ ಅಪ್ಪ ನಿಂಗಕ್ ಫಲ ತಪ್ಪ.

⁵ನಿಂಗ ಪ್ರಾರ್ಥನೆ ಮಾಡ್‌ವಕಾಪಕ ಕಪಟಿಯರನೆಕೆ ಮಾಡಂಡ. ಎಲ್ಲಾರು ಕಾಂಗಂಡೂಂದ್ ಎದ್ದ್ ನಿಂದಿತ್ ಸಬಾಮಂದಿರತ್‍ಲ್, ಬೀದಿ ಮೂಲೆಲ್ ಪ್ರಾರ್ಥನೆ ಮಾಡ್‌ವಕ್ ಅಯಿಂಗ ಕುಶಿ ಪಡ್‍ವ. ಪೂರ್ತಿಯಾಯಿತ್ ಅಯಿಂಗಕ್ ಫಲ ಕ್‍ಟ್ಟ್‌ಚೀಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ

⁶ಆಚೇಂಗಿ ನಿಂಗ ಪ್ರಾರ್ಥನೆ ಮಾಡ್‌ವಕಾಪಕ ದಾರ್‌ಕು ಗೊತ್ತಿಲ್ಲತೆ ನಿಂಗಡ ಕೋಂಬರೇಕ್ ಪೋಯಿತ್, ಪಡಿ ಇಟ್ಟಂಡ್ ನಿಂಗಕ್ ಕಾಂಗತ ಅಪ್ಪನಾನ ದೇವನ ನೋಟಿತ್ ಪ್ರಾರ್ಥನೆ ಮಾಡಿ. ದಾರ್‌ಕು ಗೊತ್ತಿಲ್ಲತೆ ಮಾಡ್‌ವಾನೆಲ್ಲ ನೋಟುವ ನಿಂಗಡ ಅಪ್ಪ ನಿಂಗಕ್ ಫಲ ತಪ್ಪ.

⁷ಆಚೇಂಗಿ ಪ್ರಾರ್ಥನೆ ಮಾಡ್‌ವಕಾಪಕ ದೇವನ ಗೊತ್ತಿಲ್ಲತಯಿಂಗ ಮಾಡ್‌ವನೆಕೆ ಪುನಃ ಪುನಃ ಎಣ್ಣ್‌ನದ್‍ನೇ ಎಣ್ಣುವಕ್ಕಾಗ. ಎನ್ನಂಗೆಣ್ಣ್‌ಚೇಂಗಿ, ಉದ್ದವಾಯಿತ್ ಪ್ರಾರ್ಥನೆ ಮಾಡ್‍ಚೇಂಗಿ ಅಯಿಂಗ ಕ್‍ೕಪಾನ ಅಯಿಂಗಡ ದೇವ ತಪ್ಪಾಂದ್ ಅಯಿಂಗ ಗೇನ ಮಾಡಿಯಂಡುಂಡ್.

⁸ಅಯಿಂಗಡನೆಕೆ ನಿಂಗ ಮಾಡಂಡ; ಎನ್ನಂಗೆಣ್ಣ್‌ಚೇಂಗಿ, ನಿಂಗಕ್ ಎಂತ ಬೋಂಡೂಂದ್ ನಿಂಗ ಕ್‍ೕಪಕಿಂಜ ಮಿಂಞಲೇ ನಿಂಗಡ ಅಪ್ಪಂಗ್ ಗೊತ್ತುಂಡ್.

⁹ಆನಗುಂಡ್, ನಿಂಗ ಇನ್ನನೆ ಪ್ರಾರ್ಥನೆ ಮಾಡಂಡು: ಪರಲೋಕತ್‍ಲ್ ಉಳ್ಳ ನಂಗಡ ಅಪ್ಪನೇ, ನೀಡ ಪೆದ ಎಕ್ಕಾಲು ಪವಿತ್ರವಾಯಿತಿರಡ್;

¹⁰ನೀಡ ರಾಜ್ಯ ಬೂಲೋಕಕ್ ಬರಡ್; ನೀಡ ಚಿತ್ತ ಪರಲೋಕತ್‍ಲ್ ಆಪನೆಕೆ ಬೂಲೋಕತ್‌ಲು ಆಡ್;

¹¹ಇಂದತೆ ದಿವಸಕ್ ಬೋಂಡಿಯಾನ ಕೂಳ್‌ನ ನಂಗಕ್ ತಾ;

¹²ನಂಗಕ್ ವಿರೋದವಾಯಿತ್ ಪಾಪ ಮಾಡ್‍ನಯಿಂಗಳ ನಂಗ ಮನ್ನಿಚಿಡ್‌ವನೆಕೆ, ನಂಗಡ ಪಾಪತ್‍ನ ಮನ್ನಿಚಿಡ್;

¹³ನಂಗ ಸೋದನೆಕ್ ಒಳಪಡತನೆಕೆ ನಂಗಳ ಕೕಡ್‌ಂಜ ಕಾಪಾಡ್. ರಾಜ್ಯವು, ಅದಿಕಾರವು, ಮಹಿಮೆಯು ಎಕ್ಕಾಲು ನೀಡದೇ. ಆಮೆನ್.[24]

¹⁴ನಿಂಗಕ್ ವಿರೋದವಾಯಿತ್ ಪಾಪ ಮಾಡ್‍ನಯಿಂಗಳ ಮನ್ನಿಚಿಟ್ಟತೇಂಗಿ, ನಿಂಗಡ ಪರಲೋಕತ್‍ರ ಅಪ್ಪ ನಿಂಗಳ ಮನ್ನಿಚಿಡ್‌ವ.

¹⁵ಆಚೇಂಗಿ ಬೋರೆಯಿಂಗ ಮಾಡ್‍ನ ಪಾಪತ್‍ನ ಮನ್ನಿಚಿಡತ ಪೋನಕ ನಿಂಗಡ ಪಾಪತ್‍ನ ಸಹ ದೇವ ಮನ್ನಿಚಿಡುಲೆ.

¹⁶ನಿಂಗ ಪಟ್ಟಣಿ ನಿಂದಕ, ಕಪಟಿಯರನೆಕೆ ಮೂಡ್‍ನ ಬಾಡ್‌ಚಿಡತಿ. ಅಯಿಂಗ ಪಟ್ಟಣಿ ನಿಪ್ಪದ್‌ನ ಜನ ಕಾಂಗಂಡೂಂದ್ ತಂಗಡ ಮೂಡ್‍ನ ಚಪ್ಪೆಯಾಯಿತ್ ಬೆಚ್ಚವ. ಅಯಿಂಗಕ್ ತಂಗಡ ಫಲ ಪೂರ್ತಿಯಾಯಿತ್ ಕ್‍ಟ್ಟ್‌ಚೀಂದ್ ನಿಂಗಕ್ ನೇರಾಯಿತು ಎಣ್ಣ್‌ವಿ.

¹⁷ನಿಂಗ ಪಟ್ಟಣಿ ನಿಪ್ಪಕ, ನಿಂಗ ಎಕ್ಕಾಲು ಇಪ್ಪನೆಕೆ ಮಂಡೆಕ್ ಎಣ್ಣೆ ಇಟ್ಟಿತ್, ಮೂಡ್‍ನ ಕತ್ತಿತ್ ಇರಿ.

¹⁸ಅಕ್ಕ ನಿಂಗ ಗುಟ್ಟ್‌ಲ್ ಎಂತ ಮಾಡಿಯಂಡುಳ್ಳಿರಾಂದ್ ಗೊತ್ತುಳ್ಳ ನಿಂಗಡ ಅಪ್ಪನ ಬುಟ್ಟಿತ್, ಬೋರೆ ದಾರ್‌ಕು ನಿಂಗ ಪಟ್ಟಣಿ ನಿಂದಂಡುಳ್ಳದ್ ಗೊತ್ತಾಪುಲೆ. ಅಕ್ಕ, ಎಲ್ಲಾ ಗುಟ್ಟು ಗೊತ್ತುಳ್ಳ ನಿಂಗಡ ಅಪ್ಪ, ನಿಂಗಕ್ ಫಲ ತಪ್ಪ.

¹⁹ನಿಂಗಡ ಐಶ್ವರ್ಯತ್‍ನ ಈ ಬೂಲೋಕತ್‍ಲ್ ಕೂಟಿ ಬೆಕ್ಕತಿ. ಇಲ್ಲಿ ಕೆದ ಪಿಂಞ ಕಿಲ್ಂಬ್ ಅದ್‍ನ ಪಾಳ್ ಮಾಡ್‌ವ; ಪಿಂಞ ಕಳ್ಳಂಗ ಪಡಿನ ಪೊಳ್‌ಚಿತ್ ಕಟ್ಟಂಡ್ ಪೋಯಿರುವ.

²⁰ಅದ್ಂಡ ಬದ್‍ಲ್ ನಿಂಗಡ ಐಶ್ವರ್ಯತ್‍ನ ಪರಲೋಕತ್‍ಲ್ ಕೂಟಿ ಬೆಯ್ಯಿರಿ. ಅದ್‍ನ ಕೆದ ತಿಂಬದು ಇಲ್ಲೆ, ಕಿಲ್ಂಬ್ ಪುಡಿಪದು ಇಲ್ಲೆ, ಪಿಂಞ ಕಳ್ಳಂಗ ಕಟ್ಟಂಡ್ ಪೋಪದು ಇಲ್ಲೆ.

²¹ನಿಂಗಡ ಐಶ್ವರ್ಯ ಎಲ್ಲಿ ಉಂಡೋ ಅಲ್ಲಿಯೇ ನಿಂಗಡ ಹೃದಯ ಎಕ್ಕಾಲು ಇಪ್ಪ.

²²ಕಣ್ಣ್ ನೀಡ ತಡೀರ ಬೊಳ್‌ಚವಾಯಿತುಂಡ್. ನೀಡ ಕಣ್ಣ್ ಚಾಯಿತೆ ಉಂಡೇಂಗಿ ನೀಡ ತಡಿ ಪೂರ್ತಿ ಬೊಳಿಯಾಯಿತ್‌ಪ್ಪ.

²³ನೀಡ ಕಣ್ಣ್ ಕೆಟ್ಟದಾಯಿತ್ ಇಂಜತೇಂಗಿ ನೀಡ ತಡಿ ಪೂರ್ತಿ ಇರ್‌ಟಾಯಿತ್ ಇಪ್ಪ. ಅನ್ನನೆ ನೀಡ ತಡೀಲುಳ್ಳ ಬೊಳಿ ಇರ್‌ಟಾಯಿತ್ ಪೋಚೇಂಗಿ, ನೀಡ ಇರ್‌ಟ್ ಎಚ್ಚಕ್ ಆಳವಾಯಿತ್‌ಪ್ಪ!

²⁴ದಾರೂ ದಂಡ್ ಎಜಮಾನಂಗ್ ಸೇವೆ ಮಾಡ್‌ವಕ್ ಕಯ್ಯುಲೆ. ಅಂವೊ ಒಬ್ಬನ ಕುಶಿಪಡ್‌ತ್‌ವ, ಇಂಞೊಬ್ಬನ ದ್ವೇಶ ಮಾಡ್‌ವ. ಅಥವ ಒಬ್ಬನ ಪ್ರೀತಿ ಮಾಡಿಯಂಡ್ ಇಂಞೊಬ್ಬನ ದೂರ್‌ವ. ನಿಂಗ ದೇವನ ಪಿಂಞ ಪಣತ್‍ನ ಒಕ್ಕಚೆ ಸೇವೆ ಮಾಡ್‌ವಕ್ ಕಯ್ಯುಲೆ.

²⁵ಆನಗುಂಡ್ ನಿಂಗ ಬದ್‍ಕ್‍ವಕಾಯಿತ್ ಎಂತ ಉಂಬಿರ, ಎಂತ ಕುಡಿಪಿರ, ಇಲ್ಲತೆಪೋಚೇಂಗಿ ನಿಂಗಡ ಶರೀರಕಾಯಿತ್ ಎಂತ ಇಡ್‌ವಿರಾಂದ್ ವ್ಯಸನ ಪಡತೀಂದ್ ನಾನ್ ನಿಂಗಕ್ ಎಣ್ಣ್‌ವಿ. ಆಹಾರಕಿಂಜ ಜೀವವು, ಬಟ್ಟೇಕಿಂಜ ತಡಿಯು ಮುಕ್ಯವಾಯಿತುಂಡಲ್ಲ?

²⁶ಬಾನತ್‍ರ ಪಕ್ಷಿನ ನೋಟಿ, ಅಯಿಂಗ ಕುರುನ ಬಿತ್ತ್‌ವದು ಇಲ್ಲೆ, ಕೊಯಿಪಣಿ ಮಾಡ್‍ವುದು ಇಲ್ಲೆ, ಬೊಳೆನ ಪತ್ತಾಯಕ್ ಇಟ್ಟಿತ್ ಬೆಪ್ಪದು ಇಲ್ಲೆ. ಆಚೇಂಗಿಯು ನಿಂಗಡ ಪರಲೋಕತ್‍ರ ದೇವ ಅಯಿಂಗಳ ಉಂಬ್‍ಚಿಡ್‌ವ. ಅದ್ಂಗಿಂಜ ನಿಂಗ ಬೆಲೆ ಉಳ್ಳಯಿಂಗಲ್ಲಾ?

²⁷ವ್ಯಸನ ಪಟ್ಟಂಡ್ ನಿಂಗಡಲ್ಲಿ ದಾರ್ ಅಯಿಂಗಡ ಬದ್‍ಕ್‍ಲ್ ಒರ್ ಕ್ಷಣತ್‌ನ ಕೂಟ್‌ವಕಯ್ಯು?

²⁸ನಿಂಗ ಇಡ್‍ವಕುಳ್ಳ ಬಟ್ಟೇಕಾಯಿತ್ ಎನ್ನಂಗ್ ವ್ಯಸನ ಪಡ್‌ವಿರ? ಕಾಡ್ ಪೂ ಎನ್ನನೆ ಬೊಳಿಯುವಾಂದ್ ಚಾಯಿತೆ ನೋಟಿ. ಅದ್ ಕೆಲಸ ಮಾಡ್‌ವದು ಇಲ್ಲೆ, ಇಡ್‌ವಕ್ ಬಟ್ಟೆ ಪೊಲ್ಲ್‌ಚಿಡ್‍ವದು ಇಲ್ಲೆ.

²⁹ಆಚೇಂಗಿಯು ಸೊಲೊಮೋನ ರಾಜಂಗ್ ಅಚ್ಚಕ್ ಐಶ್ವರ್ಯ ಇಂಜತೇಂಗಿಯು, ಈ ಒರ್ ಕಾಡ್ ಪೂವ್‌ರಚ್ಚಕ್ ಸಹ ಚಾಯಿ ಬಟ್ಟೆ ಇಟ್ಟಿತ್‌ಲ್ಲೇಂದ್ ನಾನ್ ನಿಂಗಕ್ ಎಣ್ಣ್‌ವಿ.

³⁰ಅಲ್ಪ ನಂಬಿಕೆ ಉಳ್ಳಯಿಂಗಳೇ, ಇಂದ್ ಇಂಜಿತ್ ನಾಳೆ ಪೋಪ ಪೂವ್‍ನ ದೇವ ಇಚ್ಚಕ್ ಚಾಯಿತೆ ನೋಟ್‍ಚೇಂಗಿ, ನಿಂಗಳ ನೇರಾಯಿತು ಎಚ್ಚಕ್ ಚಾಯಿತೆ ನೋಟ್‌ವ?

³¹ಆನಗುಂಡ್, ನಂಗ ಎಂತ ತಿಂಬ, ಎಂತ ಕುಡಿಪ ಪಿಂಞ ಎಂತ ಇಡ್‍ವಾಂದ್ ಗೇನ ಮಾಡಿತ್ ವ್ಯಸನ ಪಡಂಡ.

³²ದೇವಡ ಮೇಲೆ ನಂಬಿಕೆ ಇಲ್ಲತಯಿಂಗ ಇದ್‍ನೆಲ್ಲ ಗೇನ ಮಾಡಿಯಂಡ್, ಬೇಜಾರ್ ಮಾಡಿಯಂಡಿಪ್ಪ. ಇದೆಲ್ಲ ನಿಂಗಕ್ ಬೋಂಡೂಂದ್ ನಿಂಗಡ ಪರಲೋಕತ್‍ರ ಅಪ್ಪಂಗ್ ಗೊತ್ತುಂಡ್.

³³ಆಚೇಂಗಿ ಎಲ್ಲಾಕಿಂಜ ಮಿಂಞ ದೇವಡ ರಾಜ್ಯತ್‍ನ, ನೀತಿನ ತ್‍ೕಡಿ, ಅಕ್ಕ ಇದ್‍ನೆಲ್ಲ ನಿಂಗಕ್ ಕೂಟಿ ತಪ್ಪ.

³⁴ಆನಗುಂಡ್ ನಾಳೆಕಾಯಿತ್ ವ್ಯಸನ ಪಡಂಡ. ನಾಳೆತ್‍ರ ದಿವಸ ಅದ್ಂಗಾಯಿತ್ ವ್ಯಸನ ಪಡ್‌ವ. ಓರೋರ್ ದಿವಸಕೂ ಅದ್ಂಗ್ ಉಳ್ಳ ಕಷ್ಟ ಮದಿ.