Read Kodava ಮತ್ತಾಯ 8 Bible Online

ಮತ್ತಾಯ 8 - Kodava bible

ಮತ್ತಾಯ 8

¹ಯೇಸು ಕುಂದ್ಂಜ ಅಡಿಕ್ ಇಳ್ಂಜಿತ್ ಬಂದ ಪಿಂಞ ಬಲ್ಯ ಗುಂಪ್‍ರ ಜನ ಅಂವೊಂಡ ಬಯ್ಯತ್ ಪೋಚಿ.

²ಕುಷ್ಟರೋಗ ಇಂಜ ಒರ್ ಮನುಷ್ಯ ಯೇಸುರ ಪಕ್ಕ ಬಂದಿತ್ ಮೊಣಕಾಲ್ ಇಟ್ಟಿತ್: ಒಡೆಯನೇ, ನೀಕ್ ಕುಶಿ ಉಂಡೇಂಗಿ ನನ್ನ ಶುದ್ದ ಮಾಡ್‌ವಕ್ ನೀಕ್ ಕಯ್ಯೂಂದ್ ಎಣ್ಣ್‌ಚಿ.

³ಯೇಸು ಅಂವೊಂಡ ಕೈಯಿನ ನೋಟ್‌ವಂಜಿ ಅಂವೊನ ಮುಟ್ಟಿತ್: ನಾಕ್ ಕುಶಿ ಉಂಡ್, ಶುದ್ದ ಆಡ್‍ೕಂದ್ ಎಣ್ಣ್‌ಚಿ. ಒಡನೆ ಆ ಮನುಷ್ಯಂಡ ಕುಷ್ಟರೋಗ ವಾಸಿ ಆಚಿ.

⁴ಅಕ್ಕ ಯೇಸು ಅಂವೊಂಗ್: ಈ ವಿಷಯತ್‍ನ ದಾರ್‌ಕು ಎಣ್ಣತೆ, ನೀನ್ ಯಾಜಕಂಡ ಪಕ್ಕ ಪೋಯಿತ್ ನಿನ್ನ ಕಾಂಬ್‍ಚಿಡ್, ಅಂವೊ ನಿನ್ನ ಪರೀಕ್ಷೆ ಮಾಡಡ್; ಪಿಂಞ ನೀನ್ ವಾಸಿ ಆಯಿತುಳ್ಳಾಂಗ್ ಎಲ್ಲಾರ್‌ಕು ಸಾಕ್ಷಿಯಾಯಿತ್ ನ್ಯಾಯಪ್ರಮಾಣತ್‍ಲ್ ಎಣ್ಣಿತ್ತುಳ್ಳ ಕಾಣಿಕೆನ ಕೊಡ್‍ೕಂದ್ ಎಣ್ಣ್‌ಚಿ.

⁵ಯೇಸು ಕಪೆರ್ನೌಮ್‍ಕ್ ಬಪ್ಪಕ ರೋಮ್ ರಾಜ್ಯತ್‍ರ ಒರ್ ಅದಿಕಾರಿ ಯೇಸುರ ಪಕ್ಕ ಬಂತ್:

⁶ಸ್ವಾಮೀ, ನಾಡ ಆಳ್ ಒಬ್ಬ ಪಾರ್ಶ್ವವಾಯುಲ್ ದುಂಬ ಕಷ್ಟಪಟ್ಟಂಡ್ ಬುದ್ದಿತುಂಡ್‍ೕಂದ್ ಬೋಡಿಯಂಡತ್.

⁷ಯೇಸು ನಾನ್ ಬಂತ್ ಅಂವೊನ ಚಾಯಿಮಾಡ್‌ವೀಂದ್ ಎಣ್ಣ್‌ಚಿ.

⁸ಅದ್ಂಗ್ ಆ ನೂರ್ ಸಿಪಾಯಿಯರ ಅದಿಕಾರಿ: ಸ್ವಾಮೀ, ನೀನ್ ನಾಡ ಮನೆಕ್ ಬಪ್ಪಕ್ ನಾನ್ ಯೋಗ್ಯನಲ್ಲ. ನೀನ್ ಒರ್ ತಕ್ಕ್ ಮಾತ್ರ ಎಣ್ಣ್, ಅಕ್ಕ ನಾಡ ಆಳ್ ವಾಸಿಯಾಪ.

⁹ನಾನ್ ಬೋರೆಯಿಂಗಡ ಅದಿಕಾರತ್‍ರ ಅಡಿಲ್ ಉಂಡೇಂಗಿಯು, ನಾಡ ಅದಿಕಾರತ್‍ಲ್ ಸಹ ಸಿಪಾಯಿಯಂಗ ಉಂಡ್; ನಾನ್ ಒಬ್ಬನ ಪೋಂದ್ ಎಣ್ಣ್‌ಚೇಂಗಿ ಅಂವೊ ಪೋಪ, ಬೋರೆ ಒಬ್ಬನ ಬಾಂದ್ ಎಣ್ಣ್‌ಚೇಂಗಿ ಅಂವೊ ಬಪ್ಪ; ಇನ್ನನೆ ಮಾಡ್‍ೕಂದ್ ಒಬ್ಬಂಗ್ ಎಣ್ಣ್‌ವಕ, ಅಂವೊ ಅನ್ನನೆ ಮಾಡ್‌ವಾಂದ್ ಎಣ್ಣ್‌ಚಿ.

¹⁰ಇದ್‍ನ ಕ್‍ೕಟ ಯೇಸು, ಅಲ್ಲಿ ಉಳ್ಳ ಜನಳೆಲ್ಲ ನೋಟ್‌ವಂಜಿ: ಇನ್ನತ ಒರ್ ನಂಬಿಕೇನ ಇಸ್ರಾಯೇಲ್ ಜನತ್‍ಲ್ ಸಹ ನಾನ್ ಕಂಡಿತ್‌ಲ್ಲೇಂದ್ ಆಶ್ಚರ್ಯತ್‍ಲ್ ಎಣ್ಣ್‌ಚಿ.

¹¹ದುಂಬ ಜನ ಕ್‍ೕಕ್ ದಿಕ್ಕಿಂಜ, ಪಡ್‍ಞಾರ್ ದಿಕ್ಕಿಂಜ ಬಂದಿತ್ ಪರಲೋಕ ರಾಜ್ಯತ್‍ಲ್ ಅಬ್ರಹಾಮ ಇಸಾಕ ಪಿಂಞ ಯಾಕೋಬಂಡ ಕೂಡೆ ಗದ್ದಾಳ ಉಂಬಕ್ ಅಳ್‌ಪ.

¹²ಆಚೇಂಗಿ ರಾಜ್ಯತ್‍ರ ಮಕ್ಕಳ ಪೊರಮೆ ಇರ್‌ಟ್‌ಲ್ ತಳ್ಳಿರ್‌ವ. ಅಲ್ಲಿ ಮೊರಟಂಡ್, ಪಲ್ಲ್ ಕಡಿಚಂಡ್ ನರಳಿಯಂಡ್ ಇಪ್ಪ.

¹³ಪಿಂಞ ಯೇಸು ಆ ಅದಿಕಾರಿಕ್: ಪೋ! ನೀನ್ ನಂಬ್‍ನನೆಕೆ ನೀಕ್ ಆಪಾಂದ್ ಎಣ್ಣ್‌ಚಿ. ಅದೇ ಸಮಯತ್‍ಲ್ ಅಂವೊಂಡ ಆಳ್‍ಕ್ ವಾಸಿಯಾಚಿ.

¹⁴ಯೇಸು ಪೇತ್ರಂಡ ಮನೆಕ್ ಬಪ್ಪಕ, ಅಂವೊಂಡ ಮಾಂವಿಕ್ ಪನಿ ಬಂದಿತ್ ಸೌಕ್ಯಯಿಲ್ಲತೆ ಕಟ್ಟ್‌ಲ್ ಬುದ್ದಂಡಿಂಜತ್.

¹⁵ಆಚೇಂಗಿ ಯೇಸು ಅವಡ ಕೈಯಿನ ಮುಟ್ಟ್‌ವಕ ಅವಡ ಪನಿ ಪೋಚಿ. ಅವ ಎದ್ದಿತ್ ಅಯಿಂಗಕ್ ಸೇವೆ ಮಾಡ್‍ಚಿ.

¹⁶ಅಂದ್ ಬೈಟಾಪಕ ಕೂಳಿ ಪುಡ್‍ಚಿತ್ಂಜ ದುಂಬ ಜನಳ ಯೇಸುರ ಪಕ್ಕ ಕಾಕಿಯಂಡ್ ಬಾತ್. ಯೇಸು ಅಂವೊಂಡ ತಕ್ಕ್‌ಂಜ ಆ ಕೂಳಿಯಳ ಬುಡ್‌ತಿತ್, ಎಲ್ಲಾ ರೋಗತ್‍ನ ವಾಸಿ ಮಾಡ್‍ಚಿ.

¹⁷ಅಂವೊ, ತಾಂಗ್ ತಾನೆ ನಂಗಡ ಕಾಯಿಲೆನ ಎಡ್‍ತಿತ್, ರೋಗತ್‍ನ ವಾಸಿ ಮಾಡ್‌ವಾಂದ್ ಎಣ್ಣುವ ಯೆಶಾಯಂಡ ಪ್ರವಾದನೆ ನೆರವೇರುವನಕೆ ಇದ್ ನಡ್ಂದತ್[25].

¹⁸ಯೇಸು, ಜನಡ ಗುಂಪ್‍ನ ನೋಟ್‌ವಂಜಿ, ಅಂವೊಂಡ ಶಿಷ್ಯಂಗಳ ಕೆರೆರ ಆಬರಿಕ್ ಪೋಪಕ್ ಆಜ್ಞೆ ಮಾಡ್‍ಚಿ.

¹⁹ಅಕ್ಕ, ನ್ಯಾಯಪ್ರಮಾಣತ್‍ರ ಉಪಾದ್ಯ ಒಬ್ಬ ಬಂತ್: ಉಪಾದ್ಯನೇ, ನೀನ್ ಎಲ್ಲಿ ಪೋಚೇಂಗಿಯು ನಾನ್ ನೀಡ ಕೂಡೆ ಬಪ್ಪೀಂದ್ ಎಣ್ಣ್‌ಚಿ.

²⁰ಅದ್ಂಗ್ ಯೇಸು: ಕುರ್‌ಕಂಗ ವಾಸ ಮಾಡ್‌ವಕ್ ತೂತ ಉಂಡ್, ಬಾನತ್‍ರ ಪಕ್ಷಿಯಕ್ ಗೂಡ್ ಉಂಡ್, ಆಚೇಂಗಿ ಮನುಷ್ಯಕುಮಾರಂಗ್ ಮಂಡೆ ಬೆಪ್ಪಕ್ ಜಾಗ ಇಲ್ಲೇಂದ್ ಎಣ್ಣ್‌ಚಿ.

²¹ಇಂಞೊರ್ ಶಿಷ್ಯ: ಒಡೆಯನೇ, ಆದ್ಯವಾಯಿತ್ ನಾನ್ ಪೋಯಿತ್ ನಾಡ ಅಪ್ಪನ ಪೂತಿತ್ ಬಪ್ಪೀಂದ್ ಎಣ್ಣ್‌ಚಿ.

²²ಅಕ್ಕ ಯೇಸು, ಚತ್ತಯಿಂಗ ಚತ್ತಯಿಂಗಳ ಪೂಕಡ್, ನೀನ್ ನಾಡ ಬಯ್ಯ ಬಾಂದ್ ಎಣ್ಣ್‌ಚಿ.

²³ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಒರ್ ದೋಣಿಲ್ ಪತ್ತಿತ್ ಕೆರೆರ ಆಬರಿಕ್ ಪೋಚಿ.

²⁴ಒಮ್ಮಕೆ, ಒರ್ ಎಚ್ಚರಿಕೆಯು ಇಲ್ಲತೆ ದೋಣಿ ಅಲೆಯಿಂಜ ಮುಳ್‌ಗ್‌ವನೆಕೆ ಜೋರಾಯಿತ್ ಬಿರ್‌ಗಾಳಿ ಬಾತ್. ಆಚೇಂಗಿ ಯೇಸು ವರಿಯಂಡಿಂಜತ್.

²⁵ಶಿಷ್ಯಂಗ ಅಂವೊಂಡ ಪಕ್ಕ ಪೋಪಂಜಿ, ಯೇಸುನ ಎಪ್ಪಿತ್, ಒಡೆಯನೇ! ನಂಗಳ ಕಾಪಾಡ್, ನಂಗ ನೀರ್‌ಲ್ ಮುಳ್‍ಗಿಯಂಡುಂಡ್‍ೕಂದ್ ಜೋರಾಯಿತ್ ಕೂತ್ ಕೊಡ್‍ತತ್.

²⁶ಅದ್ಂಗ್ ಯೇಸು: ಅಲ್ಪ ನಂಬಿಕೆ ಉಳ್ಳಯಿಂಗಳೇ, ಎನ್ನಂಗ್ ನಿಂಗಕ್ ಅಚ್ಚಕ್ ಪೋಡಿ ಆಚೀಂದ್ ಕ್‍ೕಟಿತ್, ಏವಂಜಿ, ಗಾಳಿಕೂ ಅಲೆಕೂ ಮುಂಡತ್‌ಪ್ಪಕ್ ಆಜ್ಞೆ ಮಾಡ್‍ಚಿ. ಬಯ್ಯ ದುಂಬ ಶಾಂತವಾಚಿ.

²⁷ಶಿಷ್ಯಂಗ ಆಶ್ಚರ್ತಯತ್‍ಲ್: ಅನ್ನನೆ ಅಳ್‌ತಿತ್, ಇಂವೊ ದಾರಾಯಿತಿಕ್ಕು, ಗಾಳಿಯು ಅಲೆಯು ಇಂವೊಂಗ್ ಬಗ್ಗಿತ್ ನಡ್‍ಂದಂಡುಂಡಲ್ಲಾಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.

²⁸ಯೇಸು ಕೆರೆರ ಆಬರಿಕ್ ಗದರೇನ ಊರ್‌ಕ್ ಬಪ್ಪಕ, ಕೂಳಿ ಪುಡ್‍ಚಿತ್ಂಜ ದಂಡ್ ಮನುಷ್ಯಂಗ ಅಂವೊಂಗ್ ಎದ್‍ರ್‌ಲ್ ಬಾತ್. ಅಯಿಂಗ ತೂಟ್‌ಂಗಳತ್‌ಲ್ ವಾಸ ಮಾಡಿಯಂಡಿಂಜತ್. ಅಯಿಂಗ ಅಚ್ಚಕ್ ಬಯಂಕರತ್‍ಲ್ ಇಂಜಗುಂಡ್ ದಾರೂ ಆಬರಿಕ್ ಪೋಪಯಿಂಜಿತ್‌ಲ್ಲೆ.

²⁹ಅಯಿಂಗ ದಂಡಾಳು ಯೇಸುನ ಕಂಡಿತ್: ದೇವಡ ಮೋಂವೊನೇ ನೀಕ್ ನಂಗಡಗುಂಡ್ ಎಂತ ಆಂಡು? ದೇವ ಬೆಚ್ಚಿತುಳ್ಳ ಸಮಯಕಿಂಜಿ ಮಿಂಞ, ನಂಗಕ್ ಕಷ್ಟ ತಪ್ಪಕಾಯಿತ್ ಬಂದಿಯಾಂದ್ ಕೂತ್ ಕೊಡ್‍ತತ್.

³⁰ಅಲ್ಲಿಂಜ ಚೆನ್ನ ದೂರತ್‍ಲ್ ದುಂಬ ಪಂದಿಯ ಮೇಯಿಜಂಡ್ ಇಂಜತ್.

³¹ಆ ಕೂಳಿಯ, ನಂಗಳ ದೌತ್‌ಚೇಂಗಿ, ಆ ಪಂದಿಯಡ ಒಳ್‍ಕ್ ನಂಗ ಕೂಡಿರುವಾಂದ್ ಯೇಸುನ ಬೋಡ್‍ಚಿ.

³²ಅದ್ಂಗ್ ಯೇಸು: ಪೋಯೀಂದ್ ಎಣ್ಣ್‌ಚಿ. ಅಕ್ಕ ಆ ಕೂಳಿಯ ಪೊರಮೆ ಬಂದಿತ್ ಪಂದಿಯಡ ಒಳ್‍ಕ್ ಕೂಡ್‍ಚಿ. ಆ ಪಂದಿರ ಹಿಂಡ್ ಓಡಿ ಪೋಯಿತ್ ಅಲ್ಲಿಂಜ ನೇರೆ ಕೆರೆಕ್ ಬುದ್ದಿತ್ ಮುಳ್‍ಗಿ ಚತ್ತ್ ಪೋಚಿ.

³³ಪಂದಿಯಳ ಮೇಪ ಜನ, ಓಡಿ ಪೋಯಿತ್ ಪಟ್ಟಣತ್‍ಲ್ ಎಲ್ಲಾರ್‌ಕು ಎಂತ ಆಚೀಂದ್ ಎಣ್ಣ್‌ಚಿ. ಕೂಳಿ ಪುಡ್‍ಚಿತ್ಂಜ ಮನುಷ್ಯಂಗಕ್ ಸಹ ಎಂತಾಚೀಂದ್ ಅಯಿಂಗಕ್ ಎಣ್ಣ್‌ಚಿ.

³⁴ಆ ಪಟ್ಟಣತ್‍ಲ್ ಇಂಜ ಎಲ್ಲಾ ಜನಳು ಯೇಸುನ ಕಾಂಬಕ್ ಬಂತ್, ಅಯಿಂಗಳ ಬುಟ್ಟಿತ್ ಪೋಪಕ್ ಬೋಡಿಯಂಡತ್.