Read Kodava ಮತ್ತಾಯ 9 Bible Online

ಮತ್ತಾಯ 9 - Kodava bible

ಮತ್ತಾಯ 9

¹ಅಕ್ಕ ಯೇಸು ಹಡಗ್‍ಲ್ ಅಳ್‌ತಂಡ್ ಕೆರೆರ ಆಬರಿಕ್ ಅಂವೊಂಡ ಪಟ್ಟಣಕ್ ಪೋಚಿ.

²ಚೆನ್ನ ಜನ ಅಲ್ಲಿಕ್, ಪಾರ್ಶ್ವವಾಯುಲ್ ನರಳಿಯಂಡಿಂಜ ಒರ್ ಮನುಷ್ಯನ, ಕಡ್‌ಕೆರ ಮೇಲೆ ಬುದ್ದಾಕ್‌ಚಿಟ್ಟಿತ್ ಕಾಕಿಯಂಡ್ ಬಾತ್. ಯೇಸು ಅಯಿಂಗಡ ನಂಬಿಕೇನ ಕಂಡಿತ್: ನಾಡ ಮೋಂವೊನೇ, ದೈರ್ಯ ಎಡ್‌ತ, ನೀಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಎಣ್ಣ್‌ಚಿ.

³ಅಕ್ಕ, ನ್ಯಾಯಪ್ರಮಾಣತ್‍ರ ಚೆನ್ನ ಉಪಾದ್ಯಂಗ: ಇಂವೊ ದೇವ ದೂಷಣೆ ಮಾಡಿಯಂಡುಂಡ್‍ೕಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.

⁴ಅಯಿಂಗೆಲ್ಲಾ ಎಂತ ಗೇನ ಮಾಡಿಯಂಡುಂಡ್‍ೕಂದ್ ಯೇಸುಕ್ ಗೊತ್ತಾಚಿ. ಆನಗುಂಡ್ ಯೇಸು: ಎನ್ನಂಗ್ ನಿಂಗ ಇನ್ನನೆ ಕೆಟ್ಟದ್ ಗೇನ ಮಾಡ್‌ವಿರಾಂದ್ ಕ್‍ೕಟತ್.

⁵ನೀಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಎಣ್ಣ್‌ವದ್ ಸುಲಬವ ಅಥವ ನೀಕ್ ವಾಸಿ ಆಚಿ, ಎದ್ದಿತ್ ನಡೇಂದ್ ಎಣ್ಣುವದ್ ಸುಲಬವ?

⁶ಮನುಷ್ಯಂಗಡ ಪಾಪತ್‍ನ ಮನ್ನಿಚಿಡ್‌ವಕ್ ಮನುಷ್ಯಕುಮಾರಂಗ್ ಈ ಬೂಮಿಲ್ ಅದಿಕಾರ ಉಂಡ್‍ೕಂದ್ ನಾನ್ ನಿಂಗಕ್ ಕಾಟಿತಪ್ಪೀಂದ್ ಎಣ್ಣಿತ್, ಯೇಸು ಕಾಯಿಲೆಲ್ ಇಂಜ ಮನುಷ್ಯನ ನೋಟಿತ್: ಏಳ್, ನೀಡ ಕಡ್‌ಕೆನ ಎಡ್‍ತಂಡ್, ನೀಡ ಮನೆಕ್ ಪೋಂದ್ ಎಣ್ಣ್‌ಚಿ.

⁷ಅಕ್ಕಣೆಕ್ ಆ ಮನುಷ್ಯ ಎದ್ದಿತ್ ಮನೆಕ್ ಪೋಚಿ.

⁸ಇದ್‍ನ ನೋಟಿತ್ ಜನಕ್ ಪೋಡಿ ಆಚಿ. ಮನುಷ್ಯಂಗ್ ಇನ್ನನೆ ಮಾಡ್‌ವಕ್ ಅದಿಕಾರ ಕೊಡ್‍ತ ದೇವನ ತುದಿಚತ್.

⁹ಅಲ್ಲಿಂಜ ಯೇಸು ಪೋಯಂಡಿಪ್ಪಕ, ಮತ್ತಾಯಾಂದ್ ಪೆದ ಉಳ್ಳ ಒಬ್ಬ ಕಂದಾಯ ಎಡ್‌ಪ ಅಲ್ಲಿಯತ್‍ರ ಕಛೇರಿಲ್ ಅಳ್‌ತಂಡಿಪ್ಪದ್‍ನ ಕಂಡತ್. ಅಂವೊಂಗ್ ಯೇಸು: ನಾಡ ಬಯ್ಯ ಬಾಂದ್ ಎಣ್ಣ್‌ಚಿ. ಅಕ್ಕ ಅಂವೊ ಎದ್ದಿತ್ ಅಂವೊಂಡ ಬಯ್ಯಕ್ ಪೋಚಿ.

¹⁰ಬಯಿಟ್ ಯೇಸುಕ್ ಮತ್ತಾಯಂಡ ಮನೆಲ್ ಗದ್ದಾಳ ಇಂಜತ್. ದುಂಬ ಕಂದಾಯ ಎಡ್‌ಪ ಜನ ಪಿಂಞ ಸಮಾಜ ಪಾಪಿಯಂಗಾಂದ್ ಎಣ್ಣ್‌ವಂತ ಜನ ಅಂವೊಂಡ ಕೂಡೆ ಬಂದಿತ್ಂಜಗುಂಡ್, ಅಲ್ಲಿಕ್ ಬಂದಿತ್ ಅಂವೊಂಡ ಕೂಡೆ ಪಿಂಞ ಶಿಷ್ಯಂಗಡ ಕೂಡೆ ಉಂಬಕಿಂಜತ್.

¹¹ಚೆನ್ನ ಫರಿಸಾಯಂಗ ಯೇಸುರ ಶಿಷ್ಯಂಗಳ ನೋಟಿತ್: ಎನ್ನಂಗ್ ನಿಂಗಡ ಉಪಾದ್ಯ ಕಂದಾಯ ಎಡ್‍ಪಯಿಂಗ ಪಿಂಞ ಸಮಾಜ ಪಾಪಿಯಿಂಗಾಂದ್ ಎಣ್ಣುವ ಜನಡ ಕೂಡೆ ಉಂಬಾಂದ್ ಕ್‍ೕಟತ್.

¹²ಇದ್‍ನ ಕ್‍ೕಟ ಯೇಸು: ದಾರ್ ಸೌಕ್ಯತ್‌ಲ್ ಉಂಡೋ ಅಯಿಂಗಕ್ ವೈದ್ಯ ಬೋಂಡ, ದಾರ್‌ಕ್ ಸೌಕ್ಯ ಇಲ್ಲತೆ ಉಂಡೋ ಅಯಿಂಗಕ್ ಮಾತ್ರ ವೈದ್ಯಂಗ ಬೊಂಡಿಯೇಂದ್ ಎಣ್ಣ್‌ಚಿ.

¹³ನಿಂಗ ದೇವಕ್ ಕೊಡ್‍ಪ ಬಲೀಲ್ ನಾಕ್ ಕುಶಿ ಇಲ್ಲೆ. ಆಚೇಂಗಿ ನಿಂಗ ಜನಡಮೇಲೆ ಕಾಟುವ ಕರುಣೇಲ್ ನಾಕ್ ದುಂಬ ಕುಶಿ ಉಂಡ್‍ೕಂದ್[26] ಎಣ್ಣುವ ದೇವಡ ವಾಕ್ಯಕ್‍ತ್‍ರ ಅರ್ಥ ಎಂತ್‍ೕಂದ್ ಪೋಯಿತ್ ಪಡಿರೀಂದ್ ಎಣ್ಣ್‌ಚಿ. ನೀತಿವಂತಯಿಂಗಳ ಅಲ್ಲ, ಆಚೇಂಗಿ ಪಾಪಿಯಳ ಕಾಕಿಯಂಡ್ ಪೋಪಕಾಯಿತೇ ನಾನ್ ಬಂದಿಯೇಂದ್ ಎಣ್ಣ್‌ಚಿ.

¹⁴ಒರ್ ದಿನ ಯೋಹಾನಂಡ ಶಿಷ್ಯಂಗ ಯೇಸುರ ಪಕ್ಕ ಬಪ್ಪಂಜಿ, ನಂಗಳು, ಫರಿಸಾಯಂಗಳು ಅಕ್ಕಕ್ಕ ಪಟ್ಟಣಿ ನಿಂದಂಡಿಪ್ಪಕ, ನೀಡ ಶಿಷ್ಯಂಗ ಎನ್ನಂಗ್ ಪಟ್ಟಣಿ ನಿಂದಂಡಿಲ್ಲೇಂದ್ ಕ್‍ೕಟತ್.

¹⁵ಅದ್ಂಗ್ ಯೇಸು: ಮಂಗಲತ್‍ರ ಮನೆಲ್, ಮಂಗಲಕಾರ ಕೂಡೆ ಇಪ್ಪಕ, ಎನ್ನನೆ ಅಂವೊಂಡ ಚಂಙಾದಿಯ ಬೇಜಾರತ್‍ಲ್ ಇಪ್ಪ. ಮಂಗಲಕಾರನ ಅಯಿಂಗಡ ಕೂಟ್‌ಂಜ ಕಾಕಿಯಂಡ್ ಪೋಪ ಸಮಯ ಬಪ್ಪ, ಅಕ್ಕ ಅಯಿಂಗ ಪಟ್ಟಣಿ ನಿಪ್ಪಾಂದ್ ಎಣ್ಣ್‌ಚಿ.

¹⁶ದಾರೂ ಪಳೆಯ ಬಟ್ಟೇಕ್, ಚುರ್ಂಗಿ ಪೋಕತೆ ಪುದಿಯ ತುಣಿನ ಅಡ್ಡಬೆಚ್ಚಿತ್ ಪೊಲ್ಲ್‌ಚಿಡುಲೆ. ಎನ್ನಂಗೆಣ್ಣ್‌ಚೇಂಗಿ ಪುದಿಯ ಬಟ್ಟೆ ಚುರುಂಗಿತ್ ಇಂಞು ಬಲ್ಯ ತೂತತ್‍ನ ಮಾಡ್‌ವ.

¹⁷ಅನ್ನನೆ ದಾರೂ ಪುದಿಯದಾಯಿತ್ ಮಾಡ್‍ನ ದ್ರಾಕ್ಷಿರಸತ್‍ನ ಪಳೆಯ ಚರ್ಮತ್‌ರ ಚೀಲಕ್ ಬೂಕ್‌ಲೆ, ಅನ್ನನೆ ಮಾಡ್‍ಚೇಂಗಿ ಚರ್ಮತ್‌ರ ಚೀಲ ಒಡಂದ್ ಪೋಪ. ಚೀಲ ಒಡಂದ್ ಪೋಯಿತ್, ದ್ರಾಕ್ಷಿರಸವು ಚೆಲ್ಲಿಪೋಪ. ಪುದಿಯ ದ್ರಾಕ್ಷಿರಸತ್‍ನ ಪುದಿಯ ಚರ್ಮತ್‌ರ ಚೀಲತ್‍ಲ್ ಬೂಕಂಡು, ಅಕ್ಕ ದಂಡು ಬದ್ರತೆಲ್ ಇಪ್ಪ.

¹⁸ಇನ್ನನೆ ಯೇಸು ತಕ್ಕ್ ಪರ್‌ದಂಡ್ ಇಪ್ಪಕಾಪಕ, ಒರ್ ಅದಿಕಾರಿ ಬಂದಿತ್ ಯೇಸುರ ಪಕ್ಕ ಮೊಣಕಾಲ್ ಇಟ್ಟಿತ್, ನಾಡ ಮೋವ ಇಕ್ಕಲೆ ಚತ್ತ್ ಪೋಚಿ. ಆಚೇಂಗಿ ನೀನ್ ಬಂದಿತ್ ನೀಡ ಕೈಯಿನ ಅವಡ ಮೇಲೆ ಬೆಚ್ಚತೇಂಗಿ ಅವ ಬದ್‌ಕ್‌ವಾಂದ್ ಎಣ್ಣ್‌ಚಿ.

¹⁹ಯೇಸು ಎದ್ದಿತ್, ಅಂವೊ ಪಿಂಞ ಅಂವೊಂಡ ಶಿಷ್ಯಂಗ ಅದಿಕಾರಿರ ಕೂಡೆ ಪೋಚಿ.

²⁰ಪೋಯಂಡಿಪ್ಪಕಲೆ, ಪನ್ನೆರಂಡ್ ಕಾಲತ್ಂಜ ಚೋರೆ ಪೋಪ ರೋಗತ್‌ಂಜ ಕಷ್ಟಪಟ್ಟಂಡಿಂಜ ಒರ್ ಪೊಣ್ಣಾಳ್:

²¹ನಾನ್ ಇಂವೊಂಡ ಬಟ್ಟೇನ ಮುಟ್ಟ್‌ಚೇಂಗಿ ಮದಿ ನಾನ್ ವಾಸಿ ಆಪೀಂದ್ ಗೇನ ಮಾಡಿತ್, ಯೇಸುರ ಬಯ್ಯ ಬಂತ್ ಅಂವೊಂಡ ಬಟ್ಟೇರ ತುದಿನ ಮುಟ್ಟ್‌ಚಿ.

²²ಯೇಸು ತಿರಿತ್ ಅವಳ ನೋಟಿತ್: ನಾಡ ಮೋಳೆ, ದೈರ್ಯ ಎಡ್‌ತ, ನೀಡ ನಂಬಿಕೆ ನಿನ್ನ ವಾಸಿ ಮಾಡ್‍ಚೀಂದ್ ಎಣ್ಣ್‌ಚಿ. ಆ ಕ್ಷಣತ್‍ಲ್ ಅವಡ ರೋಗ ವಾಸಿ ಆಚಿ.

²³ಯೇಸು ಆ ಅದಿಕಾರಿಯಂಡ ಮನೆಕ್ ಬಪ್ಪಕ ಎಲ್ಲಾರು ಚಾವ್ ಪಾಟ್ ಪಾಡಿಯಂಡ್, ಸದ್ದ್ ಮಾಡಿಯಂಡುಳ್ಳದ್‍ನ ಕಂಡಿತ್:

²⁴ನಿಂಗ ಎಲ್ಲಾರು ಪೋಯಿ, ಈ ಮೂಡಿ ಕುಂಞಿ ಚತ್ತಿತ್ ಇಲ್ಲೆ, ಅವ ಬರಿ ವರಿಯಂಡುಂಡ್‍ೕಂದ್ ಎಣ್ಣ್‌ಚಿ. ಅದ್ಂಗ್ ಎಲ್ಲಾರು ಅಂವೊನ ನೋಟಿತ್ ತೆಳ್‍ಚತ್.

²⁵ಜನಳೆಲ್ಲ ಪೊರಮೆ ಅಯಿಚ ಪಿಂಞ ಯೇಸು ಒಳ್‍ಕ್ ಪೋಯಿತ್ ಆ ಕುಂಞಿರ ಕೈ ಪುಡ್‍ಚತ್. ಅಕ್ಕ ಅವ ಎದ್ದತ್.

²⁶ಈ ಸುದ್ದಿ ಎಲ್ಲೆಲಿಯು ಪಬ್ಬ್‌ಚಿ.

²⁷ಯೇಸು ಆ ಜಾಗತ್ಂಜ ಪೋಯಂಡ್ ಇಪ್ಪಕ, ದಂಡ್ ಕುರ್‌ಡಂಗ ಯೇಸುರ ಬಯ್ಯಕ್ ಪೋಚಿ. ದಾವೀದಂಡ ಮೋಂವೊನೇ,[27] ನಂಗಕ್ ಕನಿಕರ ಕಾಟ್‍ೕಂದ್ ಅಯಿಂಗ ಕೂತ್ ಕೊಡ್‍ತತ್.

²⁸ಯೇಸು ಒಳ್‍ಕ್ ಪೋನ ಪಿಂಞ ದಂಡ್ ಕುರ್‌ಡಂಗ ಯೇಸುರ ಪಕ್ಕ ಪೋಚಿ. ಅಕ್ಕ ಯೇಸು ಅಯಿಂಗಳ, ನಾಕ್ ನಿಂಗಳ ವಾಸಿ ಮಾಡ್‌ವಕ್ ಕಯ್ಯೂಂದ್ ನಿಂಗ ನಂಬುವಿರಾಂದ್ ಕ್‍ೕಟತ್. ಅಕ್ಕು ಸ್ವಾಮೀಂದ್ ಅಯಿಂಗ ಎಣ್ಣ್‌ಚಿ.

²⁹ಯೇಸು ಅಯಿಂಗಡ ಕಣ್ಣ್‌ನ ಮುಟ್ಟುವಂಜಿ, ನಿಂಗ ನನ್ನ ನಂಬ್‍ನನೆಕೆ ನಿಂಗಕ್ ಆಪಾಂದ್ ಎಣ್ಣ್‌ಚಿ.

³⁰ಒಡನೆ ಅಯಿಂಗಕ್ ಕಣ್ಣ್ ಕಾಂಬಕಾಚಿ. ಪಿಂಞ ಯೇಸು ಅಯಿಂಗಕ್, ನಿಂಗ ದಾರ್‌ಕು ಎಣ್ಣ್‌ವಕ್ಕಾಗಾಂದ್ ಕಠಿಣವಾಯಿತ್ ಎಚ್ಚರ ಮಾಡ್‍ಚಿ.

³¹ಆಚೇಂಗಿ, ಅಯಿಂಗ ಪೋಯಿತ್ ಆ ಪ್ರಾಂತ್ಯತ್‍ಲ್ ಎಲ್ಲಾ ಜಾಗತ್‍ಲ್ ಇಂವೊಂಡ ಕೀರ್ತಿನ ಪಬ್ಬ್‌ಚಿ.

³²ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಅಲ್ಲಿಂಜ ಪೊರಡ್‍ವಕ, ಚೆನ್ನ ಜನ, ಕೂಳಿ ಪುಡ್‌ಚಿತ್ ಬಾಯಿ ಬಕ್ಕತೆ ಉಳ್ಳ ಒರ್ ಮನುಷ್ಯನ ಯೇಸುರ ಪಕ್ಕ ಕಾಕಿಯಂಡ್ ಬಾತ್.

³³ಅಂವೊಂಡ ಮೇಲ್‌ಲ್ ಇಂಜ ಕೂಳಿನ ಬುಡ್‍ತ್‍ನ ಪಿಂಞ ಮೂಗನಾಯಿತ್ಂಜ ಅಂವೊ ತಕ್ಕ್ ಪರ್ಂದತ್. ಜನ ಆಶ್ಚರ್ಯತ್‍ಲ್: ಇಸ್ರಾಯೇಲ್‌ಲ್ ಇನ್ನನೆ ಎಕ್ಕಾಲು ನಡ್ಂದ್‍ತ್‌ಲ್ಲೆಲ್ಲಾಂದ್ ಎಣ್ಣ್‌ಚಿ.

³⁴ಆಚೇಂಗಿ ಫರಿಸಾಯಂಗ: ಇಂವೊ ಕೂಳಿಯಡ ಮುಕ್ಯಸ್ತ ಕೊಡ್‍ಪ ಶಕ್ತಿಯಿಂಜ ಕೂಳಿನ ಬುಡ್‌ತಿಯಂಡುಂಡ್‍ೕಂದ್ ಎಣ್ಣ್‌ಚಿ.

³⁵ಯೇಸು ಅಲ್ಲಿ ಉಳ್ಳ ಎಲ್ಲಾ ಪಟ್ಟಣಕ್ ಪಿಂಞ ನಾಡ್‍ಕೆಲ್ಲಾ ಪೋಯಿತ್, ಅಯಿಂಗಡ ಸಬಾಮಂದಿರತ್‍ಲ್ ಬೋದನೆ ಮಾಡಿಯಂಡ್, ದೇವಡ ರಾಜ್ಯತ್‍ರ ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡ್, ಜನಡ ಎಲ್ಲಾ ಕಾಯಿಲೆನ ಪಿಂಞ ರೋಗತ್‍ನ ವಾಸಿ ಮಾಡ್‍ಚಿ.

³⁶ಬಲ್ಯ ಜನಡ ಗುಂಪ್‍ನ ಕಾಂಬಂಜಿ ಯೇಸುಕ್ ದುಂಬ ಕನಿಕರ ಆಚಿ. ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ಕೊರಿ ಕಾಪಂವೊ ಇಲ್ಲತ ಕೊರಿರನೆಕೆ ಗೊಂದಲತ್‍ಲ್, ದಾರೂ ಗತಿ ಇಲ್ಲತಯಿಂಡನೆಕೆ ಇಂಜತ್.

³⁷ಅಕ್ಕ ಯೇಸು ಅಂವೊಂಡ ಶಿಷ್ಯಂಗಳ ಕಾಕ್‍ವಂಜಿ, ಬೇಲ್‌ಲ್ ಬೊಳೆ ದುಂಬ ಉಂಡ್, ಆಚೇಂಗಿ ಕೊಯಿಪಣಿಕ್ ಆಳ್‍ಕಾರ ದುಂಬ ಕಮ್ಮಿ ಉಂಡ್‍ೕಂದ್ ಎಣ್ಣ್‌ಚಿ.

³⁸ಆನಗುಂಡ್, ಬೊಳೆಕ್ ಕಾರಣವಾಯಿತುಳ್ಳ ಎಜಮಾನಂಡ ಪಕ್ಕ, ಆಳ್‍ವಳ ಅಯಿಪಕ್ ಅಂವೊನ ಬೋಡ್‌ವಿರಾಂದ್ ಎಣ್ಣ್‌ಚಿ.