Read Kodava ಮಾರ್ಕ 1 Bible Online

ಮಾರ್ಕ 1 - Kodava bible

ಮಾರ್ಕ 1

¹ಇದ್ ದೇವಡ ಮೋಂವೊನಾನ ಯೇಸು ಕ್ರಿಸ್ತಂಡ[1] ನಲ್ಲ ಸುದ್ದಿರ ತೊಡಕ.

²ನೋಟಿ, ನಾನ್ ನಾಡ ದೂತನ ನಿಂಗಕ್ಂಜ ಮಿಂಞ ಅಯಿಪಿ; ಅಂವೊ ನೀಕ್ ಮಿಂಞ ಪೋಯಿತ್, ನೀಡ ಬಟ್ಟೇನ ತಯಾರ್ ಮಾಡ್‌ವಾಂದ್;[2]

³ದಾರೋ ಮಣಬೂಮಿಲ್, ಒಡೆಯ ಬಂದಂಡ್ ಉಂಡ್ ಅದ್ಂಗಾಯಿತ್ ದೇವ ಬಪ್ಪಕ್ ಉಳ್ಳ ಬಟ್ಟೇನ ನೇರೆ ಮಾಡಿತ್ ಚಾಯಿಮಾಡ್‍ೕಂದ್, ಯೆಶಾಯ ಎಣ್ಣುವ ಪ್ರವಾದಿ ಒಳ್‌ದ್‌ನನೆಕೆ;[3]

⁴ಯೋಹಾನ: ನಿಂಗಡ ಪಾಪಕ್ ಮನ್ನಿಪ್ ಕ್‍ಟ್ಟ್‌ವಕಾಯಿತ್ ದೇವಡ ಪಕ್ಕ ತಿರಿತ್ ದೀಕ್ಷಾಸ್ನಾನ[4] ಎಡ್‌ಕೊಂಡು, ದೇವ ನಿಂಗಡ ಪಾಪತ್‍ನ ಮನ್ನಿಪ್ಪಾಂದ್ ಜನಕ್ ಮಣಬೂಮಿಲ್ ಬೋದನೆ ಮಾಡಿಯಂಡಿಂಜತ್.

⁵ಅಕ್ಕ ದುಂಬ ಜನ ಯೂದಾಯ ಎಣ್ಣುವ ನಾಡಿಂಜ, ಯೆರೂಸಲೇಮ್ಂಜ ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಪಕ್ಕ ಪೋಯಿತ್ ಅಯಿಂಗ ಅಯಿಂಗಡ ಪಾಪತ್‍ನ ಎಣ್ಣ್‌ಚಿ. ಯೋಹಾನ ಅಯಿಂಗಕ್ ಯೊರ್ದನ್ ಎಣ್ಣುವ ಪೊಳೆಲ್ ದೀಕ್ಷಾಸ್ನಾನ ಕೊಡ್‍ತತ್.

⁶ಯೋಹಾನ ಒಂಟೆರ ರೋಮತ್‍ಲ್ ಮಾಡ್‍ನ ಬಟ್ಟೆ ಇಟ್ಟಂಡ್, ತಾಂಡ ಸೊಂಟಕ್ ಚರ್ಮತ್‌ರ ಪಟ್ಟಿ ಕೆಟ್ಟಿಯಂಡಿಂಜತ್. ಅಂವೊಂಡ ಆಹಾರ ಪಚ್ಚೆ ಪುಕ್ಕ ಪಿಂಞ ಕಾಡ್‍ಲ್ ಕ್‍ಟ್ಟುವ ತೇನ್ ಆಯಿತಿಂಜತ್.

⁷ಅಂವೊ: ನಾಡ ಬಯ್ಯ ನಾಕಿಂಜ ಬಲ್ಯಂವೊ ಒಬ್ಬ ಬಂದಂಡುಂಡ್. ನಾನ್ ಬಗ್ಗಿತ್ ಅಂವೊಂಡ ಕಾಲ್‍ರ ಎಕ್ಕಡತ್‌ನ ಉತ್ತ್‌ವಕ್ ಸಹ ನಾಕ್ ಯೋಗ್ಯತೆ ಇಲ್ಲೆ.

⁸ನಾನ್ ನಿಂಗಕ್ ನೀರ್‌ಲ್ ದೀಕ್ಷಾಸ್ನಾನ ತಪ್ಪಿ, ಆಚೇಂಗಿ ಅಂವೊ ನಿಂಗಳ ಪವಿತ್ರಾತ್ಮತ್‍ಲ್ ದೀಕ್ಷಾಸ್ನಾನ ಮಾಡ್‌ವಾಂದ್ ಬೋದನೆ ಮಾಡ್‍ಚಿ.

⁹ಆ ಸಮಯತ್‍ಲ್ ಗಲಿಲಾಯ ನಾಡ್‍ಲ್ ಉಳ್ಳ ನಜರೇತ್ ಊರಿಂಜ ಯೇಸು ಬಂದಿತ್ ಯೊರ್ದನ್ ಪೊಳೆಕ್ ಪೋಚಿ. ಅಲ್ಲಿ ಯೋಹಾನ ಅಂವೊಂಗ್ ದೀಕ್ಷಾಸ್ನಾನ ಕೊಡ್‍ತತ್.

¹⁰ಯೇಸು ಪೊಳೆರ ನೀರಿಂಜ ಪೊರಮೆ ಬಪ್ಪಕ, ಪರಲೋಕ ತೊರಂದಿತ್ ಒರ್ ಪಾರಿವಾಳ ರೂಪತ್‌ಲ್ ಪವಿತ್ರಾತ್ಮ ಬಪ್ಪದ್‍ನ ಅಂವೊ ಕಂಡತ್.

¹¹ನೀನ್ ನಾಡ ಕೊದಿರ ಮೋಂವೊ, ನೀಡ ಮೇಲೆ ನಾಕ್ ದುಂಬ ಕುಶಿ ಉಂಡ್‍ೕಂದ್ ಪರಲೋಕತ್ಂಜ ಒರ್ ವಾಣಿ ಬಾತ್.

¹²ಅಚ್ಚಕ್ ಬೆರಿಯ ಪವಿತ್ರಾತ್ಮ ಅಂವೊನ ಮರುಬೂಮಿಕ್ ಪೋಪನೆಕೆ ಮಾಡ್‍ಚಿ.

¹³ಅಲ್ಲಿ ಅಂವೊ ನಾಪದ್ ದಿವಸ ಕಾಡ್ ಪ್ರಾಣಿಯಡ ಕೂಡೆ ಇಂಜತ್. ಅಲ್ಲಿ ಸೈತಾನ ಅಂವೊನ ಸೋದನೆ ಮಾಡ್‍ಚಿ. ದೇವದೂತಂಗ ಅಂವೊಂಗ್ ಸೇವೆ ಮಾಡಿಯಂಡ್ ಇಂಜತ್.

¹⁴ಯೋಹಾನನ ಜೈಲ್‌ಕ್ ಇಟ್ಟ ಪಿಂಞ ಯೇಸು ಗಲಿಲಾಯಕ್ ಪೋಯಿತ್, ಅಲ್ಲಿ ಜನಕ್ ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‍ಚಿ.

¹⁵ಕಾಲ ಪೂರ್ತಿ ಆಚಿ, ದೇವಡ ರಾಜ್ಯ ಬೆರಿಯ ಬಪ್ಪ. ನಿಂಗಡ ಪಾಪಕಾಯಿತ್ ಪಶ್ಚಾತಾಪ ಪಟ್ಟಿತ್, ದೇವಡ ನಲ್ಲ ಸುದ್ದಿನ ನಂಬೀಂದ್ ಎಣ್ಣ್‌ಚಿ.

¹⁶ಯೇಸು ಗಲಿಲಾಯತ್‍ರ ಕೆರೆರ ಬರಿಲ್ ನಡ್ಂದ್ ಪೋಯಂಡಿಪ್ಪಕ, ಸೀಮೋನ ಪಿಂಞ ಅಂದ್ರೆಯ ಎಣ್ಣ್‌ವ ಅಣ್ಣತಮ್ಮಣಂಗ ದಂಡಾಳು ಬಲೆನ ಬೀಜಿತ್ ಮೀನ್ ಪುಡ್‍ಚಂಡ್ ಇಂಜದ್‍ನ ಯೇಸು ಕಂಡತ್. ಅಯಿಂಗ ಬೆಸ್ತಂಗಳಾಯಿತ್‌ಂಜತ್.

¹⁷ಯೇಸು ಅಯಿಂಗಳ ನೋಟಿತ್: ನಾಡ ಕೂಡೆ ಬಾರಿ, ನಾನ್ ನಿಂಗಕ್ ಮನುಷ್ಯಂಗಳ ನಾಡ ಶಿಷ್ಯಂಗಳಾಯಿತ್ ಮಾಡ್‌ವಕ್ ಎಣ್ಣಿ ತಪ್ಪೀಂದ್ ಎಣ್ಣ್‌ಚಿ.

¹⁸ಅಯಿಂಗ ಒಮ್ಮಕೆ ಅಯಿಂಗಡ ಬಲೆನ ಬುಟ್ಟಿತ್ ಯೇಸುರ ಕೂಡೆ ಪೋಚಿ.

¹⁹ಯೇಸು ಇಂಞು ಚೆನ್ನ ಮಿಂಞಕ್ ಪೋಯಂಡಿಪ್ಪಕ, ಅಲ್ಲಿ ಜೆಬೆದಾಯಂಡ ಮಕ್ಕಳಾನ ಯಾಕೋಬ ಪಿಂಞ ಯೋಹಾನ ದೋಣಿಲ್ ಅಳ್‌ತಂಡ್ ಮೀನ್ ಪುಡಿಪಕ್ ಬಲೆನ ಸರಿ ಮಾಡಿಯಂಡ್ ಇಂಜಾನ ಕಂಡತ್.

²⁰ಅಯಿಂಗಳ ಸಹ ಯೇಸು ಕಾಕ್‍ಚಿ; ಅಕ್ಕಣೆಕೆ ಅಯಿಂಗ ತಾಂಡ ಅಪ್ಪನಾನ ಜೆಬೆದಾಯ ಪಿಂಞ ಪಣಿಕಾರಳ ಬುಟ್ಟಿತ್ ಯೇಸುರ ಕೂಡೆ ಪೋಚಿ.

²¹ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಕಪೆರ್ನೌಮ್ ಎಣ್ಣ್‌ವ ಪಟ್ಟಣಕ್ ಪೋಚಿ. ಸಬ್ಬತ್[5] ದಿವಸ ಬಪ್ಪಕ ಅಂವೊ ಸಬಾಮಂದಿರತ್‍ಲ್ ಪ್ರವೇಶ ಮಾಡಿತ್, ಬೋದನೆ ಮಾಡ್‌ವಕ್ ಸುರು ಮಾಡ್‍ಚಿ.

²²ಜನ ಅಂವೊ ಮಾಡ್‌ವ ಬೋದನೆನ ಕ್‍ೕಟಿತ್, ಆಶ್ಚರ್ಯ ಪಟ್ಟತ್. ಇಂವೊ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡನೆಕೆ ಬೋದನೆ ಮಾಡತೆ, ಅದಿಕಾರ ಉಳ್ಳಯಿಂಗಡನೆಕೆ ಬೋದನೆ ಮಾಡ್‌ವಾಂದ್ ಎಣ್ಣ್‌ಚಿ.

²³ಅಕ್ಕಣೆಕ್ ಒರ್ ಕೂಳಿ ಪುಡ್‌ಚ ಮನುಷ್ಯ ಸಬಾಮಂದಿರತ್‍ಲ್ ಇಂಜತ್.

²⁴ಅಂವೊ ಯೇಸುನ ಕಾಂಬಕ: ಅಯ್ಯೋ! ನಜರೇತಿನ ಯೇಸುವೇ, ನೀಕ್ ನಂಗಡಗುಂಡ್ ಎಂತ ಆಂಡು? ನಂಗಳ ಪಾಳ್ ಮಾಡ್‌ವಕಾಯಿತ್ ಬಂದಿತುಳ್ಳಿಯ? ನೀನ್ ದಾರ್‍ೕಂದ್ ನಾಕ್ ಗೊತ್ತುಂಡ್. ನೀನ್ ದೇವಡ ಪವಿತ್ರವಾನಂವೋಂದ್ ಕೂತ್ ಕೊಡ್‍ತತ್.

²⁵ಅದ್ಂಗ್ ಯೇಸು: ಮುಂಡತೆ ಇರ್, ಈ ಮನುಷ್ಯನ ಬುಟ್ಟಿತ್ ಪೋಂದ್ ಹುಕುಮ್ ಕೊಡ್‍ತತ್.

²⁶ಅಕ್ಕ ಆ ಕೂಳಿ ಆ ಮನುಷ್ಯಂಡ ತಡೀನ ಜೋರಾಯಿತ್ ಕುಲ್‍ಕಿತ್, ಜೋರಾಯಿತ್ ಕೂತ್ ಕೊಡ್‌ತಿತ್ ಅಂವೊನ ಬುಟ್ಟಿತ್ ಪೋಚಿ.

²⁷ಅಲ್ಲಿ ಇಂಜ ಎಲ್ಲಾ ಜನಳು ಆಶ್ಚರ್ಯಪಟ್ಟಿತ್: ಇದ್ ಎಂತ? ಈ ಪುದಿಯ ಬೋದನೆ ಎಂತದ್? ಅಂವೊ ಅದಿಕಾರತ್‍ಲ್ ಕೂಳಿಯಳ ಪೊರಮೆ ಪೋಪಕ್ ಆಜ್ಞೆ ಮಾಡ್‌ವ, ಅದೂ ಅಂವೊಂಡ ತಕ್ಕ್‌ನ ಕ್‍ೕಪಲ್ಲಾಂದ್ ಅಯಿಂಗಡ ಒಳ್‌ಲೇ ತಕ್ಕ್ ಪರ್‌ದಂಡ್ ಇಂಜತ್.

²⁸ಆನಗುಂಡ್, ಯೇಸುರ ಕ್‍ೕಳಿ ಗಲಿಲಾಯ ನಾಡೆಲ್ಲಾ ಹರಡ್‍ಚಿ.

²⁹ಪಿಂಞ ಯೇಸು ಸಬಾಮಂದಿರತ್‌ನ ಬುಟ್ಟಿತ್ ಯಾಕೋಬ, ಯೋಹಾನ ಪಿಂಞ ಬಾಕಿ ಶಿಷ್ಯಂಗಡ ಕೂಡೆ ಸೀಮೋನ ಪಿಂಞ ಅಂದ್ರೆಯ ಎಣ್ಣುವಯಿಂಗಡ ಮನೆಕ್ ಪೋಚಿ.

³⁰ಅಲ್ಲಿ ಸೀಮೋನಂಡ ಮಾಂವಿಕ್ ಪನಿ ಬಂದಿತ್ ಬುದ್ದಂಡ್ ಇಂಜತ್. ಬಂದನೆಕೆ ಅವಡ ವಿಷಯತ್‍ನ ಅಯಿಂಗ ಯೇಸುಕ್ ಎಣ್ಣ್‌ಚಿ.

³¹ಯೇಸು ಅವಡ ಪಕ್ಕ ಪೋಯಿತ್ ಅವಡ ಕೈ ಪುಡ್‌ಚಿತ್, ಅವಳ ಎಪ್ಪ್‌ಚಿ. ಅಕ್ಕಣೆ ಅವಡ ಪನಿ ವಾಸಿ ಆಯಿತ್, ಪನಿ ಬುಟ್ಟ್ ಪೋಚಿ. ಅವ ಎದ್ದಿತ್ ಅಯಿಂಗಕ್ ಸೇವೆ ಮಾಡ್‍ಚಿ.

³²ಸೂರ್ಯ ಮುಳ್‌ಗ್‌ನ ಪಿಂಞ ಬೈಟಾಪಕ, ಜನ ರೋಗ ಉಳ್ಳಯಿಂಗಳ, ಕೂಳಿ ಪುಡ್‌ಚಯಿಂಗಳ ಯೇಸುರ ಪಕ್ಕ ಕಾಕಿಯಂಡ್ ಬಾತ್.

³³ಆ ಊರ್‌ಲ್ ಉಳ್ಳ ಎಲ್ಲಾ ಜನಳು ಆ ಮನೆರ ಕಯ್ಯಾಲೆರ ಮಿಂಞ ಕೂಡಿತ್ಂಜತ್.

³⁴ಯೇಸು ಎಲ್ಲಾ ತರತ್‍ರ ಕಾಯಿಲೆ ಉಳ್ಳಯಿಂಗಳ ಪಿಂಞ ಕೂಳಿ ಪುಡ್‌ಚ ಮನುಷ್ಯಂಗಳ ವಾಸಿ ಮಾಡ್‍ಚಿ. ಪಿಂಞ ತಾನ್ ದಾರ್‍ೕಂದ್ ಕೂಳಿಯಕ್ ಗೊತ್ತಾನಗುಂಡ್ ಅಂವೊ ಅಯಿಂಗಳ ತಕ್ಕ್‌ಪರಿವಕ್ ಬುಟ್ಟಿತ್‌ಲ್ಲೆ.

³⁵ಪಿತ್ಯಾಂದ್ ಬೊಳಿ ಬುಡ್‌ವಕ್ ಮಿಂಞಲೇ ಯೇಸು ಎದ್ದಿತ್, ದಾರೂ ಇಲ್ಲತ ಮಣಬೂಮಿಕ್ ಪೋಯಿತ್ ದೇವನ ಪ್ರಾರ್ಥನೆ ಮಾಡಿಯಂಡಿಂಜತ್.

³⁶ಸೀಮೋನ ಪಿಂಞ ಅಂವೊಂಡ ಕೂಟಾಳಿಯಂಗ ಯೇಸುನ ತ್‍ೕಡಿಯಂಡ್ ಇಂಜತ್.

³⁷ಅಯಿಂಗ ಯೇಸುನ ಕಂಡ ಪಿಂಞ ನಿನ್ನ ಜನ ತ್‍ೕಡಿಯಂಡ್ ಉಂಡ್‍ೕಂದ್ ಎಣ್ಣ್‌ಚಿ.

³⁸ಆಚೇಂಗಿ ಯೇಸು: ನಂಗ ಇಲ್ಲಿ ಉಳ್ಳ ಬೋರೆ ಬೋರೆ ಪಟ್ಟಣಕ್ ಪೋಕಂಡು, ನಾನ್ ಅಲ್ಲಿಯು ದೇವಡ ವಿಷಯತ್‍ನ ಪ್ರಚಾರ ಮಾಡಂಡು, ಅದ್ಂಗಾಯಿತೇ ನಾನ್ ಬಂದಿಯೇಂದ್ ಎಣ್ಣ್‌ಚಿ.

³⁹ಅನ್ನನೆ ಅಂವೊ ಗಲಿಲಾಯ ನಾಡ್‍ಕೆಲ್ಲಾ ಪೋಯಿತ್, ಅಯಿಂಗಡ ಸಬಾಮಂದಿರತ್‍ಲ್ ದೇವಡ ವಿಷಯತ್‍ನ ಬೋದನೆ ಮಾಡಿಯಂಡ್, ಕೂಳಿನ ಪುಡ್‌ಚಯಿಂಗಕ್ ಕೂಳಿನ ಬುಡ್‌ತಿತ್ ಜನಳ ವಾಸಿ ಮಾಡ್‍ಚಿ.

⁴⁰ಒರ್ ಕುಷ್ಟರೋಗಿ ಯೇಸುರ ಪಕ್ಕ ಬಂದಿತ್ ಮೊಣಕಾಲ್ ಊರಿತ್: ನೀಕ್ ಕುಶಿ ಉಂಡೇಂಗಿ ನನ್ನ ಶುದ್ದ ಮಾಡ್‌ವಕ್ ನೀಕ್ ಕಯ್ಯೂಂದ್ ಬೋಡಿಯಂಡತ್.

⁴¹ಯೇಸುಕ್ ದುಂಬ ಕನಿಕರ ಆಯಿತ್, ಯೇಸು ಅಂವೊಂಡ ಕೈಯಿನ ನೀಟುವಂಜಿ ಅಂವೊನ ಮುಟ್ಟಿತ್: ನಾಕ್ ಕುಶಿ ಉಂಡ್, ಶುದ್ದ ಆಡ್‍ೕಂದ್ ಎಣ್ಣ್‌ಚಿ.

⁴²ಅಚ್ಚಕ್ ಬೆರಿಯ ಅಂವೊಂಡ ಕಾಯಿಲೆ ವಾಸಿ ಆಯಿತ್, ಅಂವೊ ಶುದ್ದ ಆಚಿ.

⁴³ಯೇಸು: ಈ ವಿಷಯತ್‍ನ ದಾರ್‌ಕು ಎಣ್ಣತೇಂದ್ ಎಚ್ಚರ ಮಾಡ್‍ಚಿ.

⁴⁴ಆಚೇಂಗಿಯು, ನೀನ್ ನೇರೆ ಯಾಜಕಂಡ ಪಕ್ಕ ಪೋಯಿತ್ ನಿನ್ನ ಕಾಂಬ್‍ಚಿಡ್; ಅಂವೊ ನಿನ್ನ ಪರೀಕ್ಷೆ ಮಾಡಡ್; ಪಿಂಞ ನೀನ್ ವಾಸಿ ಆಯಿತುಳ್ಳಾಂಗ್ ಎಲ್ಲಾರ್‌ಕು ಸಾಕ್ಷಿಯಾಯಿತ್ ಮೋಶೇರ ನ್ಯಾಯಪ್ರಮಾಣತ್‍ಲ್ ಎಣ್ಣಿತ್ತುಳ್ಳ ಕಾಣಿಕೆನ ಕೊಡ್‍ೕಂದ್ ಎಣ್ಣ್‌ಚಿ.

⁴⁵ಆಚೇಂಗಿ ಯೇಸು ಎಣ್ಣ್‌ನ ಪ್ರಕಾರ ಅಂವೊಂಡ ತಕ್ಕ್ ಕ್‍ೕಕತೆ ಈ ನಲ್ಲ ವಿಷಯತ್‍ನ ಎಲ್ಲಾ ಜಾಗತ್‍ಲು ಎಣ್ಣಿಯಂಡ್ ಪೋಚಿ. ಅದ್ಂಗಾಯಿತ್ ಯೇಸುಕ್ ಪೊರಮೆ ಪೋಪಕ್ ಕಯ್ಯತಾಚಿ. ಆನಗುಂಡ್ ಯೇಸು ದಾರೂ ಇಲ್ಲತ ಜಾಗತ್‍ಲ್ ಇಂಜತ್. ಆಚೇಂಗಿಯು ಯೇಸುರ ಪಕ್ಕ ದುಂಬ ಜನ ಬಾತ್.