Read Kodava ಮಾರ್ಕ 10 Bible Online

ಮಾರ್ಕ 10 - Kodava bible

ಮಾರ್ಕ 10

¹ಯೇಸು ಆ ಜಾಗತ್‍ನ ಬುಟ್ಟಿತ್ ಯೊರ್ದನ್ ಎಣ್ಣುವ ಕೆರೆನ ದಾಟಿತ್ ಯೆಹೂದ್ಯ ಪ್ರಾಂತ್ಯಕ್ ಬಾತ್. ದುಂಬ ಜನ ಕೂಡಿತ್ ಯೇಸುರ ಪಕ್ಕ ಬಪ್ಪಕ್ ಸುರು ಮಾಡ್‍ಚಿ. ಅಯಿಂಗಕೆಲ್ಲ ಎಕ್ಕಲೂ ಮಾಡ್‌ವನೆಕೆ ಬೋದನೆ ಮಾಡಿಯಂಡಿಂಜತ್.

²ಚೆನ್ನ ಫರಿಸಾಯಂಗ ಯೇಸುನ ಕೆಣಿಪಕಾಯಿತ್ ಅಂವೊಂಡ ಪಕ್ಕ ಬಂದಿತ್: ಒರ್ ಮನುಷ್ಯ ಅಂವೊಂಡ ಪೊಣ್ಣ್‌ನ ಬೋಂಡಾಂದ್ ಬುಡ್‌ವದ್ ನ್ಯಾಯಪ್ರಮಾಣತ್‍ರ ಪ್ರಕಾರ ನ್ಯಾಯವಾಂದ್ ಕ್‍ೕಟತ್.

³ಅದ್ಂಗ್ ಯೇಸು: ಮೋಶೆ ನಿಂಗಕ್ ಎಂತ ಆಜ್ಞೆ ಕೊಡ್‌ತತ್‍ೕಂದ್ ಅಯಿಂಗಳ ಕ್‍ೕಟತ್.

⁴ಅದ್ಂಗ್ ಅಯಿಂಗ: ವಡಿಯ ತಾಂಡ ಪೊಣ್ಣ್‌ನ ಬುಡುವದಾಚೇಂಗಿ ಬುಡುವಕುಳ್ಳ ಪತ್ರತ್‍ನ ಒಳ್‍ದಿ ಕೊಡ್‌ತಿತ್ ಅಯಿಕಲೂಂದ್ ಮೋಶೆ ಎಣ್ಣಿತುಂಡ್‍ೕಂದ್ ಎಣ್ಣ್‌ಚಿ.[20]

⁵ಅದ್ಂಗ್ ಯೇಸು: ನಿಂಗಡ ಕಠಿಣ ಹೃದಯತ್‍ರಗುಂಡ್ ಎಚ್ಚಕ್ ಬೋದನೆ ಕ್‍ೕಟತೇಂಗಿಯು ನಿಂಗ ಕೆಮಿ ಕೊಡ್‍ಪ್‍ಲೇಂದ್ ಮೋಶೇಕ್ ಗೊತ್ತ್ಂಜಗುಂಡ್ ಈ ಕಾನೂನ್‌ನ ನಿಂಗಕ್ ಒಳ್‍ದಿ ಕೊಡ್‌ತತ್‍ೕಂದ್ ಎಣ್ಣ್‌ಚಿ.

⁶ಆಚೇಂಗಿ ಆದಿಲ್ ಮನುಷ್ಯಂಗಳ ಸೃಷ್ಟಿ ಮಾಡ್‍ನಂವೊ ಅಯಿಂಗಳ ಆಣಾಳ್ ಪೊಣ್ಣಾಳಾಯಿತ್ ಸೃಷ್ಟಿ ಮಾಡ್‍ಚಿ.[21]

⁷ಇದ್ಂಗಾಯಿತ್ ವಡಿಯ ಅಂವೊಂಡ ಅಪ್ಪವ್ವನ ಬುಟ್ಟಿತ್ ತಾಂಡ ಪೊಣ್ಣ್‌ರ ಕೂಡೆ ಒಂದಾಯಿತ್ ಇಪ್ಪ, ಅಯಿಂಗ ದಂಡಾಳು ಒರೇ ತಡಿಯಾಯಿತ್‌ಪ್ಪ.[22]

⁸ದೇವ ಇನ್ನನೆ ಮಾಡ್‍ನಗುಂಡ್, ಅಯಿಂಗ ದಂಡಾಳು ದಂಡಾಳಾಯಿತ್ ಇಲ್ಲತೆ ಒರೇ ತಡಿಯಾಯಿತ್ ಇಪ್ಪ.

⁹ಆನಗುಂಡ್ ದೇವ ಒಂದ್ ಮಾಡ್‍ನಯಿಂಗಳ, ಮನುಷ್ಯ ಬೋರೆ ಬೋರೆ ಮಾಡ್‌ವಕ್ ಆಗಾಂದ್ ಎಣ್ಣ್‌ಚಿ.

¹⁰ಅಯಿಂಗ ಮನೆಕ್ ಪೋನ ಪಿಂಞ ಶಿಷ್ಯಂಗ ಯೇಸುರ ಪಕ್ಕ ಈ ವಿಷಯತ್‍ನ ಪುನಃ ಕ್‍ೕಟತ್

¹¹ಅದ್ಂಗ್ ಅಂವೊ: ಏದ್ ಒರ್ ಮನುಷ್ಯನು ಅಂವೊಂಡ ಪೊಣ್ಣ್‌ನ ಬುಟ್ಟಿತ್ ಬೋರೆ ಪೊಣ್ಣಾಳ್‍ನ ಮಂಗಲ ಕಯಿಚತೇಂಗಿ, ಅದ್ ಮಿಂಞತ್‍ರ ಪೊಣ್ಣ್‌ಕ್ ವಿರೋದವಾಯಿತ್ ವ್ಯಬಿಚಾರ ಮಾಡ್‍ನನೆಕೆ.

¹²ಅನ್ನನೆ ಏದ್ ಒರ್ ಪೊಣ್ಣಾಳ್ ತಾಂಡ ವಡಿಯನ ಬುಟ್ಟಿತ್ ಬೋರೆ ಒಬ್ಬನ ಮಂಗಲ ಕಯಿಚತೇಂಗಿ, ಅದ್ ವ್ಯಬಿಚಾರ ಮಾಡ್‌ನನೆಕೇಂದ್ ಎಣ್ಣ್‌ಚಿ.

¹³ಯೇಸು ಮುಟ್ಟ್‌ವಕಾಯಿತ್ ಚೆನ್ನ ಜನ ಚೆರಿಯ ಮಕ್ಕಳ ಕಾಕಿಯಂಡ್ ಬಾತ್. ಆಚೇಂಗಿ ಯೇಸುರ ಶಿಷ್ಯಂಗ ಅಯಿಂಗಕ್ ಜೋರ್ ಮಾಡ್‍ಚಿ.

¹⁴ಯೇಸುಕ್ ಅದ್‍ನ ಕಂಡಿತ್ ಚೆಡಿ ಬಾತ್. ಚೆರಿಯ ಮಕ್ಕ ನಾಡ ಪಕ್ಕ ಬರಡ್ ಅಯಿಂಗಳ ತಡೆ ಮಾಡ್‌ವಕ್ಕಾಗ. ದೇವಡ ರಾಜ್ಯ ಈಂಗಡನೆಕೆ ಉಳ್ಳಯಿಂಗಕೇಂದ್ ಎಣ್ಣ್‌ಚಿ

¹⁵ದಾರಾಚೇಂಗಿಯು ಚೆರಿಯ ಮಕ್ಕಡನೆಕೆ ದೇವಡ ರಾಜ್ಯತ್‍ನ ಸ್ವೀಕಾರ ಮಾಡತೆ ಪೋಚೇಂಗಿ, ಅಯಿಂಗ ಅದ್ಂಡ ಒಳ್‍ಕ್ ಪೋಪ್‌ಲೇಂದ್ ನಾನ್ ನಿಂಗಕ್ ನೇರಾಯಿತ್ ಎಣ್ಣ್‌ವೀಂದ್ ಎಣ್ಣಿತ್,

¹⁶ಕುಂಞಿಯಳೆಲ್ಲಾ ಎಡ್‍ತಂಡ್, ಅಯಿಂಗಡ ಮೇಲೆ ಕೈ ಬೆಚ್ಚಿತ್ ಅಯಿಂಗಳ ಆಶೀರ್ವಾದ ಮಾಡ್‍ಚಿ.

¹⁷ಯೇಸು ಅಲ್ಲಿಂಜ ಪೋಪಕ್ ಪೊರಟತ್. ಪೋಯಂಡಿಪ್ಪಕ ಒರ್ ಮನುಷ್ಯ ಓಡಿ ಬಂದಿತ್ ಅಂವೊಂಡ ಮಿಂಞಕ್ ಮೊಣಕಾಲ್ ಇಟ್ಟಿತ್; ನಲ್ಲ ಉಪಾದ್ಯನೇ, ನಿತ್ಯ ಜೀವ ಕ್‍ಟ್ಟ್‌ವಕ್ ನಾನ್ ಎಂತ ಮಾಡಂಡೂಂದ್ ಕ್‍ೕಟತ್.

¹⁸ಅದ್ಂಗ್ ಯೇಸು: ನೀನ್ ನನ್ನ ನಲ್ಲಂವೋಂದ್ ಎನ್ನಂಗ್ ಕಾಕ್‌ವಿಯ? ದೇವನ ಬುಟ್ಟಿತ್ ಬೋರೆ ದಾರೂ ನಲ್ಲಂವೊ ಇಲ್ಲೆ.

¹⁹ಕೊಲೆ ಮಾಡ್‌ವಕ್ಕಾಗ, ವ್ಯಬಿಚಾರ ಮಾಡ್‌ವಕ್ಕಾಗ, ಕಪ್ಪಕ್ಕಾಗ, ದಾರ್‌ನು ಮುಂಡತೆ ನಿಂದನೆ ಮಾಡ್‌ವಕ್ಕಾಗ, ಅಪ್ಪವ್ವಂಗಕ್ ಮರ್ಯಾದೆ ಕೊಡ್‍ಕಂಡೂಂದ್ ಉಳ್ಳ ನ್ಯಾಯಪ್ರಮಾಣ ನೀಕ್ ಗೊತ್ತುಂಡಲ್ಲಾಂದ್ ಯೇಸು ಎಣ್ಣ್‌ಚಿ.[23]

²⁰ಅದ್ಂಗ್ ಅಂವೊ: ಉಪಾದ್ಯನೇ, ನಾನ್ ಚೆರಿಯಂವೊನಾಯಿತಿಪ್ಪಕಿಂಜಿಲೆ ಇದ್‍ನೆಲ್ಲಾ ಮಾಡಿಯೇಂದ್ ಜವಾಬ್ ಕೊಡ್‍ತತ್.

²¹ಯೇಸು ಅಂವೊನ ಪ್ರೀತಿಲ್ ನೋಟಿತ್: ನೀಕ್ ಒರ್ ವಿಷಯ ಮಾತ್ರ ಕಮ್ಮಿಯುಂಡ್, ನೀಡ ಪಕ್ಕ ಉಳ್ಳದ್‍ನೆಲ್ಲ ಮಾರ್‌ವಂಜಿ ಆ ಪಣತ್‍ನ ಗರೀಬಂಗಕ್ ಕೊಡ್, ಅಕ್ಕ ಪರಲೋಕತ್‍ಲ್ ನೀಕ್ ಐಶ್ವರ್ಯ ದುಂಬಿತ್ ಕ್‍ಟ್ಟುವ, ಪಿಂಞ ನಾಡ ಬಯ್ಯ ಬಾಂದ್ ಯೇಸು ಎಣ್ಣ್‌ಚಿ.

²²ಆ ಮನುಷ್ಯ ದುಂಬ ಆಸ್ತಿ ಉಳ್ಳಂವೊನಾಯಿತ್ ಇಂಜಗುಂಡ್ ಈ ತಕ್ಕ್‌ನ ಕ್‍ೕಟದು ಅಂವೊಂಡ ಮೂಡ್ ಬಾಡಿ ಪೋಯಿತ್, ಅಲ್ಲಿಂಜ ಬೇಜಾರತ್‍ಲ್ ಪೋಚಿ.

²³ಯೇಸು ಸುತ್ತ್‌ಮುತ್ತ್ ನೋಟುವಂಜಿ, ತಾಂಡ ಶಿಷ್ಯಂಗಳ ನೋಟಿತ್, ಪಣಕಾರಂಗ ದೇವಡ ರಾಜ್ಯತ್‍ಲ್ ಎತ್ತ್‌ವಕ್ ಎಚ್ಚಕ್ ಕಷ್ಟ ಉಂಡ್‍ೕಂದ್ ಎಣ್ಣ್‌ಚಿ.

²⁴ಯೇಸುರ ಈ ತಕ್ಕ್‌ನ ಕ್‍ೕಪದು ಶಿಷ್ಯಂಗಕ್ ದುಂಬ ಆಶ್ಚರ್ಯ ಆಚಿ. ನಾಡ ಮಕ್ಕಳೇ ದೇವಡ ರಾಜ್ಯಕ್ ಪೋಪಕ್ ಎಚ್ಚಕ್ ಕಷ್ಟ ಉಂಡ್!

²⁵ಪಣಕಾರಂಗ ದೇವಡ ರಾಜ್ಯಕ್ ಪೋಪಗಿಂಜ ಚೂದ್‌ರ ಕಣ್ಣ್‌ಲ್ ಒರ್ ಒಂಟೆ ನುಗ್ಗ್‌ವದ್ ಎಚ್ಚಕೋ ಸುಲಬ ಆಪ.

²⁶ಇದ್‍ನೆಲ್ಲ ಕ್‍ೕಟ ಶಿಷ್ಯಂಗಕ್ ದುಂಬ ಆಶ್ಚರ್ಯ ಆಯಿ ಪೋಯಿತ್: ಅನ್ನನೆ ಆಚೇಂಗಿ ದಾರ್‌ಕ್ ರಕ್ಷಣೆ ಕ್‌ಟ್ಟೂಂದ್ ಶಿಷ್ಯಂಗ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.

²⁷ಯೇಸು ಅಯಿಂಗಳ ನೋಟಿತ್: ಇದ್ ಮನುಷ್ಯಂಗಕ್ ಕಯ್ಯುಲೆ ಆಚೇಂಗಿ ದೇವಕ್ ಕಯ್ಯು. ದೇವಕ್ ಎಲ್ಲಾ ಕಯ್ಯೂಂದ್ ಎಣ್ಣ್‌ಚಿ.

²⁸ಅಕ್ಕ ಪೇತ್ರ ಅಂವೊನ ನೋಟಿತ್: ನೋಟ್, ನಂಗ ಎಲ್ಲಾನ ಬುಟ್ಟಿತ್ ನೀಡ ಬಯ್ಯ ಬಂದಂಡುಂಡ್‍ೕಂದ್ ಎಣ್ಣುವಕ್ ಸುರು ಮಾಡ್‍ಚಿ.

²⁹ಅದ್ಂಗ್ ಯೇಸು: ಅಕ್ಕು! ದಾರ್ ನಾಕಾಯಿತ್, ನಲ್ಲ ಸುದ್ದಿಕಾಯಿತ್, ಅಪ್ಪವ್ವನ, ಅಣ್ಣತಮ್ಮಣಂಗಳ ಅಕ್ಕತಂಗೆಯಳ, ಮನೆನ, ತೋಟ ಬೇಲ್‍ನ ಬುಟ್ಟ್‌ರ್‌ವ,

³⁰ಈ ಬದ್‌ಕ್‌ಲೇ, ದೇವಡ ವಿಷಯಕಾಯಿತ್ ಕಷ್ಟತ್‍ರ ಕೂಡೆ ಅಂವೊಂಗ್ ನೂರ್‌ರಚ್ಚಕ್ ಜಾಸ್ತಿ ಮನೆಮಠ, ಅಣ್ಣತಮ್ಮಣಂಗ, ಅಕ್ಕತಂಗೆಯ, ಅಪ್ಪವ್ವ, ಮಕ್ಕ, ತೋಟ ಬೇಲ್ ಎಲ್ಲಾ ಕ್‍ಟ್ಟುವ ಪಿಂಞ ಮಿಂಞತ್‍ರ ಲೋಕತ್‍ಲ್ ನಿತ್ಯ ಜೀವವು ಕ್‍ಟ್ಟ್‌ವಾಂದ್ ಎಣ್ಣ್‌ಚಿ.

³¹ಮಿಂಞತ್‍ಲ್ ಇಪ್ಪ ದುಂಬ ಜನ ಬಯ್ಯತ್ ಆಪ, ದಾರ್ ಬಯ್ಯತ್‌ಲ್ ಇಪ್ಪ ಅಯಿಂಗ ಮಿಂಞಕ್ ಬಪ್ಪ ಎಣ್ಣಿಯಂಡ್ ಯೇಸು ಎಣ್ಣ್‌ಚಿ.

³²ಅಯಿಂಗ ಯೆರೂಸಲೇಮ್‌ಕ್ ಪೋಯಂಡಿಪ್ಪಕ, ಯೇಸು ಶಿಷ್ಯಂಗಕಿಂಜ ಚೆನ್ನ ಮಿಂಞ ಪೋಯಂಡ್ ಇಂಜತ್. ಶಿಷ್ಯಂಗ ಆಶ್ಚರ್ಯತ್‍ಲ್ ಪಿಂಞ ಪೋಡಿಲ್ ಅಂವೊಂಡ ಬೆಂಬರತ್‌ಲ್ ಪೋಯಂಡಿಂಜತ್. ಅಕ್ಕ ಯೇಸು ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಕಾಕುವಂಜಿ, ಅಂವೊಂಗ್ ಮಿಂಞಕ್ ಎಂತಲ್ಲಾ ಆಪಾಂದ್ ಎಣ್ಣ್‌ವಕ್ ಸುರು ಮಾಡ್‍ಚಿ.

³³ನೋಟಿ, ಇಕ್ಕ ನಂಗ ಯೆರೂಸಲೇಮ್‌ಕ್ ಪೋಯಂಡುಂಡ್. ಅಲ್ಲಿ ಮನುಷ್ಯಕುಮಾರನ ಮುಕ್ಯ ಯಾಜಕಂಗಡ ಕೈಯಿಕೂ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡ ಕೈಯಿಕೂ ಪುಡ್‌ಚಿತ್ ಕೊಡ್‍ಪ. ಅಯಿಂಗ ಅಂವೊನ ಕೊಲ್ಲ್‌ವಕ್ ಕಂಡನೆ ಮಾಡಿತ್ ಪರದೇಶಿಯಂಗಡ ಕೈಕ್ ಒಪ್ಪ್‌ಚಿಡುವ,

³⁴ಅಯಿಂಗ ನಾನಾತರ ಬೈಗಳ ಬೈಯುವ, ಚಾಟಿಲ್ ಪೊಯ್ಯುವ, ಮೂಡ್‍ಕ್ ತುಪ್ಪ್‌ವ ಪಿಂಞ ಕೊಲ್ಲುವ; ಆಚೇಂಗಿ ಮೂಂದ್ ದಿನ ಆನ ಪಿಂಞ ನಾನ್ ಚಾವ್‍ಯಿಂಜ ಜೀವವಾಯಿತ್ ಏವೀಂದ್ ಎಣ್ಣ್‌ಚಿ.

³⁵ಅಲ್ಲಿಂಜ ಜೆಬೆದಾಯಂಡ ಕ್‌ಣ್ಣ ಮಕ್ಕ ಯಾಕೋಬ ಪಿಂಞ ಯೋಹಾನ ಯೇಸುರ ಪಕ್ಕ ಬಂತ್ ಉಪಾದ್ಯನೇ, ನಂಗಕ್ ಒರ್ ನಲ್ಲ ಕಾರ್ಯ ನೀನ್ ಮಾಡಂಡೂಂದ್ ಕ್‍ೕಟತ್.

³⁶ಅಂವೊ ಅಯಿಂಗಳ ನೋಟಿತ್: ಎಂತ ಕಾರ್ಯ ಎಣ್ಣೀಂದ್ ಕ್‍ೕಟತ್.

³⁷ಅದ್ಂಗ್ ಅಯಿಂಗ: ನೀನ್ ನೀಡ ಮಹಿಮೇರ ರಾಜ್ಯತ್‍ರ ಸಿಂಹಾಸನತ್‍ಲ್ ಅಳ್‌ಪಕ, ಒಬ್ಬನ ನೀಡ ಬಲ್‌ತೆ ಬರಿಲ್ ಇಂಞೊಬ್ಬನ ನೀಡ ಎಡ್‍ತೆ ಬರಿಲ್ ಅಳ್‍ಪನೆಕೆ ಮಾಡ್‍ೕಂದ್ ಎಣ್ಣ್‌ಚಿ.

³⁸ಯೇಸು ಅಯಿಂಗಳ ನೋಟಿತ್: ನಿಂಗ ಎಂತ ಕ್‍ೕಟಂಡುಳ್ಳೀರಾಂದ್ ನಿಂಗಕೇ ಗೊತ್ತ್‌ಲ್ಲೆ. ನಾನ್ ಕುಡಿಪ ಈ ಪಾತ್ರತ್‍ಲ್[24] ನಿಂಗ ಕುಡಿಪಕಯ್ಯುವಾ? ನಾನ್ ಎಡ್‌ಪ ಈ ದೀಕ್ಷಾಸ್ನಾನ ನಿಂಗ ಎಡ್‌ಪಕಯ್ಯುವಾಂದ್ ಕ್‍ೕಟತ್.

³⁹ಅಕ್ಕು ನಂಗಕ್ ಕಯ್ಯೂಂದ್ ಜವಾಬ್ ಕೊಡ್‍ತತ್. ಅದ್ಂಗ್ ಯೇಸು: ನಾನ್ ಕುಡಿಪ ಈ ಪಾತ್ರತ್‍ಲ್ ನಿಂಗ ಕುಡಿಪಿರ, ನಾನ್ ಎಡ್‌ಪ ಈ ದೀಕ್ಷಾಸ್ನಾನ ನಿಂಗ ಎಡ್‌ಪಿರ.

⁴⁰ಆಚೇಂಗಿ ದಾರ್ ನಾಡ ಬಲ್‌ತೆ ಬರಿಲ್ ಪಿಂಞ ಎಡ್‍ತೆ ಬರಿಲ್ ಅಳ್‌ಪಾಂದ್ ಎಣ್ಣ್‌ವಕ್ ನಾಕ್ ಹಕ್ಕ್ ಇಲ್ಲೆ. ದಾರ್ ಎಲ್ಲಿ ಅಳ್‌ಪಾಂದ್ ದೇವ ತಯಾರ್ ಮಾಡಿತುಂಡೋ ಅಯಿಂಗಕ್ ದೇವನೇ ಅದ್‍ನ ಕೊಡ್‍ಪ.

⁴¹ಬಾಕಿ ಪತ್ತ್ ಶಿಷ್ಯಂಗಕ್ ಇದ್‍ನ ಕ್‍ೕಟದು ಯಾಕೋಬ ಪಿಂಞ ಯೋಹಾನಂಡ ಮೇಲೆ ಚೆಡಿ ಬಾತ್.

⁴²ಯೇಸು ಅಯಿಂಗಳೆಲ್ಲ ತಾಂಡ ಪಕ್ಕ ಕಾಕುವಂಜಿ, ಈ ಲೋಕತ್‍ನ ಆಳುವಯಿಂಗ ಅಯಿಂಗಯಿಂಗಡ ಜನಡಮೇಲೆ ಬಲತ್ಕಾರತ್‌ಲ್ ಅದಿಕಾರ ಮಾಡಿಯಂಡುಂಡ್, ಅಯಿಂಗಡ ಅದಿಕಾರಿಯಂಗ ಅಯಿಂಗಡ ಮೇಲೆ ಬಲತ್ಕಾರತ್‌ಲ್ ಅದಿಕಾರ ಮಾಡ್‍ವದ್ ನಿಂಗಕ್ ಗೊತ್ತುಂಡ್.

⁴³ನಿಂಗಡ ಒಳ್‍ಲ್ ಅನ್ನನೆ ಇಪ್ಪಕ್ಕಾಗ. ನಿಂಗಡಲ್ಲಿ ದಾರ್‌ಕ್ ಬಲ್ಯಂವೊನಾಯಿತ್ ಇಪ್ಪಕ್ ಕುಶಿಯುಂಡೋ ಅಂವೊ ಎಲ್ಲಾರ್‌ಕು ಅಡಿಯಾಳಾಯಿತ್ ಸೇವೆ ಮಾಡ್‌ವನೆಕೆ ಇಕ್ಕಂಡು.

⁴⁴ಪಿಂಞ ನಿಂಗಡಲ್ಲಿ ದಾರ್‌ಕ್ ಮಿಂಞತ್ ಇಪ್ಪಕ್ ಕುಶಿ ಉಂಡೋ, ಅಯಿಂಗ ಎಲ್ಲಾರ್‌ಕು ಅಡಿಯಾಳಾಯಿತ್ ಇಕ್ಕಂಡು.

⁴⁵ಅನ್ನನೆ, ಮನುಷ್ಯಕುಮಾರ ಸಹ ಬೋರೆಯಿಂಗಡಿಂಜ ಸೇವೆ ಮಾಡ್‌ಚಿಟ್ಟ್‌ವಕಾಯಿತ್ ಬಂದಿತ್‌ಲ್ಲೆ. ಆಚೇಂಗಿ ಸೇವೆ ಮಾಡ್‌ವಕಾಯಿತು, ದುಂಬ ಜನಳ ಬುಡ್‍ಗಡೆ ಮಾಡ್‌ವಕ್ ತಾಂಡ ಜೀವತ್‍ನ ಕೊಡ್‍ಪಕಾಯಿತು ಬಾತ್ೕದ್ ಎಣ್ಣ್‌ಚಿ.

⁴⁶ಪಿಂಞ ಅಯಿಂಗ ಎರಿಕೋ ಪಟ್ಟಣಕ್ ಬಾತ್. ಅಂವೊ ಅಂವೊಂಡ ಶಿಷ್ಯಂಗ ಪಿಂಞ ಬಲ್ಯ ಗುಂಪ್ ಜನ ಎರಿಕೋನ ಬುಟ್ಟಿತ್ ಪೊರಡ್‍ವಕ, ತಿಮಾಯ ಎಣ್ಣುವವಡ ಮೋಂವೊನಾಯಿತ್ಂಜ ಕುರ್‌ಡನಾನ ಬಾರ್ತಿಮಾಯ ಬಟ್ಟೇರ ಬರಿಲ್ ಅಳ್‌ತಂಡ್ ಬೋಡಿಯಂಡಿಂಜತ್.

⁴⁷ನಜರೇತ್‍ರ ಯೇಸು ಬಂದಂಡುಂಡ್‍ೕಂದ್ ಗೊತ್ತಾನಗುಂಡ್, ದಾವೀದಂಡ ಮೋಂವೊನೇ[25] ನಾಡ ಮೇಲೆ ಕನಿಕರ ಕಾಟ್ ಎಣ್ಣಿಯಂಡ್ ಕೂತ್ ಕೊಡ್‍ತತ್.

⁴⁸ಅಲ್ಲಿ ಉಳ್ಳ ಜನ ಎಲ್ಲಾ ಅಂವೊಂಗ್ ಮುಂಡತೆ ಇರ್‍ೕಂದ್ ಜೋರ್ ಮಾಡಿತ್ ಬಜ್ಜತ್. ಆಚೇಂಗಿ ಅಂವೊ ಇಂಞು ಜೋರಾಯಿತ್ ದಾವೀದಂಡ ಮೋಂವೊನೇ, ನಾಡ ಮೇಲೆ ದಯಕಾಟ್‍ೕಂದ್ ಕೂತ್ ಕೊಡ್‍ಪಕ್ ಸರುಮಾಡ್‌ಚಿ.

⁴⁹ಆ ಕುರ್‌ಡ ಕೂತ್ ಕೊಡ್‌ಪಾನ ಕ್‍ೕಟಿತ್, ಯೇಸು ಅಲ್ಲೇ ನಿಂದಿತ್: ಅಂವೊನ ಕಾಕ್ ಎಣ್ಣಿಯಂಡ್ ಎಣ್ಣ್‌ಚಿ. ಅಕ್ಕ ಶಿಷ್ಯಂಗ: ನಿನ್ನ ಯೇಸು ಕಾಕಿಯಂಡುಂಡ್ ಕುಶಿ ಪಡ್‍ೕಂದ್ ಅಂವೊಂಗ್ ಎಣ್ಣ್‌ಚಿ.

⁵⁰ಕುರ್‌ಡ ಕುಶಿ ತಡ್‌ಪಕಯ್ಯತೆ ಅಂವೊಂಡ ಕೋಟ್‍ನ ಉತ್ತಿತ್ ಕನಿಪಂಜಿ, ಪಾರಿತ್ ಯೇಸುರ ಪಕ್ಕ ಬಾತ್.

⁵¹ಯೇಸು ಅಂವೊನ ನೋಟಿತ್: ನಾನ್ ನೀಕ್ ಎಂತ ಮಾಡಂಡೂಂದ್ ಕ್‍ೕಟತ್? ಅದ್ಂಗ್ ಅಂವೊ: ನಲ್ಲ ಉಪಾದ್ಯನೇ ನಾಕ್ ಕಣ್ಣ್ ಕಾಂಬನೆಕೆ ಮಾಡ್‍ೕಂದ್ ಎಣ್ಣ್‌ಚಿ.

⁵²ಅಕ್ಕ ಯೇಸು: ನೀನ್ ಇಲ್ಲಿಂಜ ಪೋ ನಾಡ ಮೇಲೆ ಉಳ್ಳ ನೀಡ ನಂಬಿಕೆ ನಿನ್ನ ಚಾಯಿ ಮಾಡ್‍ಚಿ. ಅಚ್ಚಕ್ ಬೆರಿಯ ಅಂವೊಂಡ ಕಣ್ಣ್ ಕಾಂಬನೆಕೆ ಆಚಿ, ಅಂವೊ ಯೇಸುರ ಕೂಡೆ ಬಟ್ಟೇಲ್ ಪೋಚಿ.