Read Kodava ಮಾರ್ಕ 11 Bible Online

ಮಾರ್ಕ 11 - Kodava bible

ಮಾರ್ಕ 11

¹ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಯೆರೂಸಲೇಮ್‍ರ ಆಲಿವ್ ಕುಂದ್‌ರ ಪಕ್ಕತ್‍ಲ್ ಇಂಜ ಬೇತ್ಫಗೆ ಪಿಂಞ ಬೇಥಾನ್ಯ ಊರ್‌ರ ಪಕ್ಕ ಬಪ್ಪಕ, ಯೇಸು ತಾಂಡ ದಂಡ್ ಶಿಷ್ಯಂಗಳ ಕಾಕಿತ್:

²ನಿಂಗಕ್ ಎದ್‍ರ್‌ಲ್ ಉಳ್ಳ ಊರ್‌ಕ್ ಪೋಯಿತ್ ನಿಂಗ ಅಲ್ಲಿ ಎತ್ತ್‌ವಕ, ಅಲ್ಲಿ ದಾರೂ ಸವಾರಿ ಮಾಡತ ಒರ್ ಕತ್ತೆ ಕುಟ್ಟಿನ ಕೆಟ್ಟಿತ್‌ ಉಳ್ಳಾನ ಕಾಂಬಿರ. ಅದ್‍ನ ಉತ್ತಿಯಂಡ್ ಇಲ್ಲಿಕ್ ಆಟಿಯಂಡ್ ಬಾರಿ.

³ದಾರೇಂಗಿ ಎನ್ನಂಗ್ ಈ ಕತ್ತೆ ಕುಟ್ಟಿನ ಉತ್ತಿಯಂಡುಳ್ಳಿರಾಂದ್ ಕ್‍ೕಟತೇಂಗಿ, ಅದ್ ಒಡೆಯಂಗ್ ಬೋಂಡೂಂದ್ ಎಣ್ಣಿ. ಅಕ್ಕ, ಕತ್ತೆ ಕುಟ್ಟಿನ ಬೆರಿಯ ಅಯಿಚಿತ್ ತಂದ್‌ರ್‌ವಾಂದ್ ಎಣ್ಣಿತ್ ಅಯಿಚತ್.

⁴ಯೇಸು ಎಣ್ಣ್‌ನನೆಕೆ ಕತ್ತೆ ಕುಟ್ಟಿನ ಬೀದಿಲ್ ಒರ್ ಮನೆರ ಮಿಂಞತ್‍ಲ್ ಕೆಟ್ಟಿತ್ಂಜಾನ ಕಂಡತ್. ಅಯಿಂಗ ಕೆಟ್ಟಿತ್ಂಜ ಕತ್ತೆ ಕುಟ್ಟಿನ ಉತ್ತುವಕಾಪಕ

⁵ಅಲ್ಲಿ ನಿಂದಂಡಿಂಜ ಚೆನ್ನ ಜನ ಎನ್ನಂಗ್ ಕತ್ತೆ ಕುಟ್ಟಿನ ಉತ್ತ್‌ವಿರಾಂದ್ ಕ್‍ೕಟತ್?

⁶ಶಿಷ್ಯಂಗ ಯೇಸು ಎಣ್ಣ್‌ನನೆಕೆ ಎಣ್ಣ್‌ಚಿ. ಆ ಮನುಷ್ಯಂಗ ಮುಂಡತೆ ಪೋಪಕ್ ಬುಟ್ಟತ್.

⁷ಅಯಿಂಗ ಆ ಕತ್ತೆ ಕುಟ್ಟಿನ ಯೇಸುರ ಪಕ್ಕ ಕೂಟಿಯಂಡ್ ಬಾತ್. ಅಯಿಂಗಯಿಂಗಡ ಬಟ್ಟೇನ ಕತ್ತೆರ ಮೇಲೆ ಇಟ್ಟತ್. ಅಂವೊ ಅದ್ಂಡಮೇಲೆ ಪತ್ತಿತ್ ಅಳ್‌ತತ್.

⁸ಅಕ್ಕ ದುಂಬ ಜನ ಅಯಿಂಗಯಿಂಗಡ ವಸ್ತ್ರತ್‍ನ ನಡ್‍ಪ ಬಟ್ಟೇಲ್ ಬಿರಿಚತ್. ಚೆನ್ನ ಜನ ಮರತ್‍ರ ಕೊಂಬ್‍ನ ಕೆತ್ತುವಂಜಿ ಬಟ್ಟೇಲ್ ಇಟ್ಟತ್.

⁹ಯೇಸುರ ಮಿಂಞತ್‍ಲ್ ಬಯ್ಯತ್‌ಲ್ ಇಂಜ ಜನ ಹೊಸನ್ನ![26] ಒಡೆಯನಾನ ದೇವಡ ಪೆದತ್‍ಲ್ ಬಪ್ಪಂವೊಂಗ್ ಆಶೀರ್ವಾದಾಂದ್ ತುದಿಪಕ್ ಸುರ್ ಮಾಡ್‍ಚಿ.[27]

¹⁰ದೇವಡ ಪೆದತ್‍ಲ್ ಬಪ್ಪ ನಂಗಡ ಅಪ್ಪನಾನ ದಾವೀದಂಡ ರಾಜ್ಯಕ್ ಆಶೀರ್ವಾದ ಕ್‍ಟ್ಟಡ್; ಪರಲೋಕತ್‍ಲ್ ಹೊಸನ್ನಾಂದ್ ಕೂತ್ ಕೊಡ್‍ತತ್.

¹¹ಯೇಸು ಯೆರೂಸಲೇಮ್‌ಕ್ ಬಂತ್, ದೇವಾಲಯಕ್ ಪೋಯಿತ್ ಅಲ್ಲಿ ಎಲ್ಲಾನ ಸುತ್ತ್‌ಮುತ್ತ್ ನೋಟ್‌ಚಿ. ಬಯಿಟಾಯಿ ಬಂದಗುಂಡ್ ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಕಾಕಿಯಂಡ್ ಬೇಥಾನ್ಯ ಎಣ್ಣುವಲ್ಲಿಕ್ ಪೋಚಿ.

¹²ಪಿತ್ಯಾಂದ್ ಬೇಥಾನ್ಯಯಿಂಜ ಬಯ್ಯಕ್ ಬಪ್ಪಕ ಯೇಸುಕ್ ಕೆಲಪಯಿಪಕ್ ಸುರ್ ಆಚಿ.

¹³ಯೇಸು ದೂರತ್‍ಲ್ ಒರ್ ಎಲೆ ದುಂಬ್‍ನ ಅತ್ತಿಪಣ್ಣ್ ಮರತ್‍ನ ಕಂಡಿತ್, ಮರತ್‍ರ ಪಕ್ಕ ಪೋಯಿತ್ ಅತ್ತಿಪಣ್ಣ್ ಉಂಡಾಂದ್ ನೋಟ್‌ಚಿ. ಬರಿ, ಎಲೆನ ಮಾತ್ರ ಕಂಡತ್, ಎನ್ನಂಗೆಣ್ಣ್‌ಚೇಂಗಿ ಅಕ್ಕ ಅತ್ತಿಪಣ್ಣ್ ಆಪ ಸಮಯ ಆಯಿತ್ಂಜಿಲೆ.

¹⁴ಇಂಞು ಮಿಂಞಕ್ ದಾರೂ ಈ ಮರತ್‍ರ ಪಣ್ಣ್‌ನ ತಿಂಬಕ್ಕಾಗ ಎಣ್ಣಿಯಂಡ್ ಯೇಸು ಆ ಮರಕ್ ಎಣ್ಣ್‌ಚಿ. ಇದ್‍ನ ಅಂವೊಂಡ ಶಿಷ್ಯಂಗ ಕ್‍ೕಟತ್.

¹⁵ಅಯಿಂಗ ಯೆರೂಸಲೇಮ್‌ಕ್ ಬಾತ್. ಯೇಸು ದೇವಾಲಯತ್‍ರ ಒಳ್‍ಕ್ ಪೋಯಿತ್, ಅಲ್ಲಿ ವ್ಯಾಪಾರ ಮಾಡಿಯಂಡಿಂಜ ಜನಳ ದೌತ್‌ಚಿ. ದುಡ್ಡ್‌ನ ಬದ್‍ಲ್ ಮಾಡಿಯಂಡಿಂಜ ಜನತ್‍ರ ಮೇಜಿನ ಪಿಂಞ ಪಾರಿವಾಳ ಪಕ್ಷಿನ ಮಾರ್‌ವಯಿಂಗಡ ಕುರ್ಚಿನ ಮುರ್‌ಚಿತ್ ಇಟ್ಟತ್.

¹⁶ದಾರೂ ದೇವಾಲಯತ್‍ರ ಒಳ್‍ಕ್ ಏದ್ ಸಮಾನತ್‍ನ ಎಡ್‌ತ ಪೋಪಕ್ ಬುಟ್ಟಿತ್‌ಲ್ಲೆ.

¹⁷ನಾಡ ಮನೆ ಎಲ್ಲಾ ದೇಶತ್‍ರ ಜನಕ್ ಪ್ರಾರ್ಥನೆರ ಮನೆಯಾಯಿತ್ ಇಪ್ಪಾಂದ್ ದೇವಡ ವಾಕ್ಯತ್‍ಲ್ ಒಳ್‌ದಿತ್‌ಲ್ಲೆಯಾ?[28] ಆಚೇಂಗಿ ನಿಂಗ ಅದ್‍ನ ಕಳ್ಳಂಗಡ ಗುಹೆರನೆಕೆ ಮಾಡಿತುಳ್ಳಿರಾಂದ್ ಅಯಿಂಗಕ್ ಪಡಿಪ್‌ಚಿಟ್ಟತ್.[29]

¹⁸ಮುಕ್ಯ ಯಾಜಕಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಯೇಸು ತಕ್ಕ್ ಪರಿವಾನ ಕ್‍ೕಟತ್. ಅಂದಕ ಅಯಿಂಗ ಎಂತಾಚೇಂಗಿಯು ಮಾಡಿತ್ ಯೇಸುನ ಕೊಲ್ಲುವಕ್ ನೋಟಿಯಂಡ್ ಇಂಜತ್. ಆಚೇಂಗಿ ಜನಕೆಲ್ಲಾ ಯೇಸುರ ಬೋದನೆ ಕ್‍ೕಟಿತ್ ದುಂಬ ಆಶ್ಚರ್ಯ ಆನಗುಂಡ್ ಅಯಿಂಗ ಯೇಸುನ ಕಂಡಿತ್ ಬೊತ್ತ್‌ವಯಿಂಜತ್.

¹⁹ಬೈಟಾಪಕ ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಯೆರೂಸಲೇಮ್‍ನ ಬುಟ್ಟಿತ್ ಪೋಯಿರ್‌ತ್.

²⁰ಪಿತ್ಯಾಂದ್ ಪೊಲಾಕ ನೇರತೆ ಅಯಿಂಗ ಬಟ್ಟೇಲ್ ನಡ್ಂದ್ ಪೋಯಂಡಿಪ್ಪಕ ಅತ್ತಿಪಣ್ಣ್ ಮರ ಬೇರೋಡೆ ಒಣಂಗಿ ಚತ್ತ್ ಪೋಯಿತ್ಂಜಾನ ಕಂಡತ್.

²¹ಪೇತ್ರಂಗ್ ಗೇನ ಆಯಿತ್: ಉಪಾದ್ಯನೇ: ನೀನ್ ಈ ಅತ್ತಿಪಣ್ಣ್ ಮರಕ್ ಶಾಪ ಇಟ್ಟನೆಕೆ ಮರ ಚತ್ತ್ ಪೋಚೀಂದ್ ಎಣ್ಣ್‌ಚಿ.

²²ಅದ್ಂಗ್ ಯೇಸು: ದೇವಡ ಮೇಲೆ ನಂಬಿಕೆ ಬೆಚ್ಚೊಳಿ,

²³ದಾರಾಚೇಂಗಿಯು ಈ ಕುಂದ್‌ಕ್ ಏಳ್, ನೀನ್ ಆ ಸಮುದ್ರಕ್ ಬುದ್ದ್‌ಪೋಂದ್ ಎಣ್ಣಿತ್, ಅಂವೊಂಡ ಮನಸ್ಸ್‌ಲ್ ಅಂವೊ ಎಣ್ಣ್‌ನ ಪ್ರಕಾರ ನಡ್‌ಪಾಂದ್ ಅನುಮಾನ ಇಲ್ಲತೆ ನಂಬ್‍ಚೇಂಗಿ ಅದ್ ಅನ್ನನೆ ಆಪಾಂದ್ ನಾನ್ ನಿಂಗಕ್ ನೇರಾಯಿತು ಎಣ್ಣ್‌ವಿ.

²⁴ಅದ್ಂಗಾಯಿತ್, ಪ್ರಾರ್ಥನೆ ಮಾಡ್‌ವಕ, ನಿಂಗ ಎಂತ ಕ್‍ೕಪಿರ ಅದ್ ನಂಗಕ್ ಕ್‍ಟ್ಟ್‌ಚೀಂದ್ ನಂಬಿತ್ ಪ್ರಾರ್ಥನೆ ಮಾಡಿ. ಅಕ್ಕ ಅದ್ ನಿಂಗಕ್ ಆಪಾಂದ್ ನಾನ್ ನಿಂಗಕ್ ಎಣ್ಣ್‌ವಿ.

²⁵ನಿಂಗ ನಿಂದಂಡ್ ಪ್ರಾರ್ಥನೆ ಮಾಡ್‌ವಕ ನಿಂಗಕ್ ದಾರಾಚೇಂಗಿಯು ಪಾಪ ಮಾಡಿತುಂಡೇಂಗಿ ಅಯಿಂಗಳ ಮನ್ನಿಚಿಡಿ, ಅಕ್ಕ ಪರಲೋಕತ್‍ಲ್ ಉಳ್ಳ ನಿಂಗಡ ದೇವನಾನ ಅಪ್ಪ ನಿಂಗ ಮಾಡ್‍ನ ಪಾಪತ್‍ನ ಸಹ ಮನ್ನಿಚಿಡುವ.

²⁶ನಿಂಗ ಅಯಿಂಗಳ ಮನ್ನಿಚಿಡತ ಪೋಚೇಂಗಿ, ಪರಲೋಕತ್‌ಲುಳ್ಳ ನಿಂಗಡ ದೇವನಾನ ಅಪ್ಪ ನಿಂಗ ಮಾಡ್‍ನ ಪಾಪತ್‍ನ ಮನ್ನಿಚಿಡುಲೇಂದ್ ಎಣ್ಣ್‌ಚಿ.

²⁷ಪುನಃ ಅಯಿಂಗ ಯೆರೂಸಲೇಮ್‌ಕ್ ಬಾತ್. ಯೇಸು ದೇವಾಲಯತ್‍ಲ್ ನಡ್ಂದ್ ಪೋಯಂಡಿಪ್ಪಕ, ಮುಕ್ಯ ಯಾಜಕಂಗಳು ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳು ಪಿಂಞ ಪೆರಿಯಯಿಂಗಳು ಯೇಸುರ ಪಕ್ಕ ಬಂದಿತ್:

²⁸ಇದ್‍ನೆಲ್ಲ ನೀನ್ ಏದ್ ಅದಿಕಾರತ್‍ಲ್ ಮಾಡಿಯಂಡುಳ್ಳಿಯಾ? ದಾರ್ ನೀಕ್ ಇನ್ನನೆಲ್ಲಾ ಮಾಡ್‌ವಕ್ ಅದಿಕಾರತ್‍ನ ಕೊಡ್‌ತತ್‍ೕಂದ್ ಕ್‍ೕಟತ್.

²⁹ಯೇಸು: ನಾನ್ ನಿಂಗಳ ಒರ್ ಪ್ರಶ್ನೆ ಕ್‍ೕಪಿ. ನಿಂಗ ಅದ್ಂಗ್ ಉತ್ತರ ಕೊಡ್‍ತತೇಂಗಿ, ನಾನ್ ಏದ್ ಅದಿಕಾರತ್‍ಲ್ ಈ ಕ್ರಿಯೇಯೆಲ್ಲಾ ಮಾಡಿಯಂಡುಂಡ್‍ೕಂದ್ ನಿಂಗಕ್ ನಾನ್ ಎಣ್ಣಿ ತಪ್ಪಿ.

³⁰ನಿಂಗಕ್ ದೀಕ್ಷಾಸ್ನಾನ ತಪ್ಪ ಅದಿಕಾರ ಯೋಹಾನಂಗ್ ಪರಲೋಕತ್ಂಜ ಕ್‍ಟ್ಟ್‌ನದಾ? ಅಥವ ಮನುಷ್ಯಡಿಂಜ ಕ್‍ಟ್ಟನದಾಂದ್ ನಿಂಗ ಇಕ್ಕ ಎಣ್ಣಿ.

³¹ಅಕ್ಕ ಅಯಿಂಗಯಿಂಗಳೇ ಚರ್ಚೆ ಮಾಡ್‌ವಕ್ ಸುರು ಮಾಡ್‍ಚಿ: ನಂಗ ಎಂತ ಎಣ್ಣುವ? ನಂಗ ಇಕ್ಕ ಪರಲೋಕತ್ಂಜ ಬಾತ್‍ೕಂದ್ ಎಣ್ಣ್‌ಚೇಂಗಿ ನಿಂಗ ಎನ್ನಂಗ್ ಯೋಹಾನನ ನಂಬುಲೇಂದ್ ಕ್‍ೕಪ.

³²ಆಚೇಂಗಿ ಇದ್ ಮನುಷ್ಯಂಡಲ್ಲಿಂಜ ಬಾತ್‍ೕಂದ್ ಎಣ್ಣ್‌ಚೇಂಗಿ, ನಂಗ ಮನುಷ್ಯಂಗಕ್ ಬೊತ್ತ್‌ಚಿಟ್ಟನೆಕೆ ಅಯಿಂಗಕ್ ಆಪ. ಎನ್ನಂಗೆಣ್ಣ್‌ಚೇಂಗಿ ಯೋಹಾನ ಎಣ್ಣ್‌ವಂವೊ ನೇರಾಯಿತು ಪ್ರವಾದೀಂದ್ ಜನ ಗೇನ ಮಾಡಿಯಂಡಿಂಜತ್.

³³ಇದ್‍ನಗುಂಡು ಅಯಿಂಗ ಯೇಸುನ ನೋಟಿತ್, ನಂಗಕ್ ಗೊತ್ತ್‌ಲ್ಲೇಂದ್ ಎಣ್ಣಿರ್‌ತ್. ಅದ್ಂಗ್ ಯೇಸು: ಅನ್ನನಾಚೇಂಗಿ ನಾನು ಇದ್‍ನೆಲ್ಲ ಏದ್ ಅದಿಕಾರತ್‍ಲ್ ಮಾಡಿಯಂಡುಂಡ್‍ೕಂದ್ ನಿಂಗಕ್ ಎಣ್ಣುಲೇಂದ್ ಎಣ್ಣ್‌ಚಿ.