Read Kodava ಮಾರ್ಕ 13 Bible Online

ಮಾರ್ಕ 13 - Kodava bible

ಮಾರ್ಕ 13

¹ಯೇಸು ದೇವಾಲಯತ್ಂಜ ಪೊರಟಿತ್ ಪೋಪಕ ಒರ್ ಶಿಷ್ಯ, ಬೋದನೆಕಾರನೇ, ನೋಟ್ ಎಂತದೊರ್ ಕಲ್ಲ್ ಇದ್! ಎಂತದೊರ್ ಕಟ್ಟಡ ಇದ್! ಎಣ್ಣಿಯಂಡ್ ಎಣ್ಣ್‌ಚಿ.

²ಯೇಸು ಅಯಿಂಗಕ್: ನಿಂಗ ಈ ಕಟ್ಟಡತ್‌ನ ನೋಟ್‌ವಿರಾ? ಒರ್ ಕಲ್ಲ್‌ರ ಮೇಲೆ ಇಂಞೊರ್ ಕಲ್ಲ್ ಇಲ್ಲತನೆಕೆ ಈಂಗೆಲ್ಲಾ ನಾಶ ಆಯಿ ಪೋಪಾಂದ್ ಎಣ್ಣ್‌ಚಿ.

³ಪಿಂಞ ಯೇಸು ದೇವಾಲಯತ್‍ರ ಮಿಂಞತ್ ಆಲಿವ್ ಕುಂದ್‌ರ ಕೊಡಿಲ್ ಅಳ್‌ತಿತಿಪ್ಪಕ, ಪೇತ್ರ, ಯಾಕೋಬ, ಯೋಹಾನ ಪಿಂಞ ಅಂದ್ರೆಯ ಎಣ್ಣ್‌ವಯಿಂಗ ಗುಟ್ಟ್‌ಲ್ ಯೇಸುರ ಪಕ್ಕ ಬಾತ್.

⁴ಇದೆಲ್ಲಾ ಎಕ್ಕ ಆಪಾಂದ್ ನಂಗಕ್ ಎಣ್ಣ್? ಇದೆಲ್ಲ ಆಪಕ್ ಮಿಂಞ ಎಂತ ಗುರ್‌ತ್ ಕಾಂಬಕಾಪಾಂದ್ ಅಯಿಂಗ ಕ್‍ೕಟತ್.

⁵ಅದ್ಂಗ್ ಯೇಸು: ನಿಂಗಳ ದಾರೂ ವಂಚನೆ ಮಾಡತನೆಕೆ ಎಚ್ಚರತ್ ಇರಿ.

⁶ಎನ್ನಂಗೆಣ್ಣ್‌ಚೇಂಗಿ ನಾಡ ಪೆದ ಎಣ್ಣಿಯಂಡ್, ನಾನೇ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್ ದುಂಬ ಜನ ಬಂತ್ ಜನಳ ವಂಚನೆ ಮಾಡ್‌ವ.

⁷ಯುದ್ದತ್‍ನ ಪಿಂಞ ಯುದ್ದತ್‍ರ ಸುದ್ದಿನ ಕ್‍ೕಪಕ ಗಾಬರಿ ಆಕತಿ. ಎಲ್ಲಾ ನಡ್‌ಕಂಡು, ಆಚೇಂಗಿಯು ಅದ್ ಅಂತ್ಯ ಕಾಲವಾಯಿತ್‌ಪ್ಪುಲೆ.

⁸ಜನಕ್ ವಿರೋದವಾಯಿತ್ ಜನಳು, ರಾಜ್ಯಕ್ ವಿರೋದವಾಯಿತ್ ರಾಜ್ಯವು ಯುದ್ದ ಮಾಡ್‌ವ; ದುಂಬ ಜಾಗತ್‍ಲ್ ಬಲ್ಯ ಬೂಕಂಪ ಆಪ, ಬರಗಾಲ ಬಪ್ಪ. ಇದ್ದೆಲ್ಲಾ ಎನ್ನನೆ ಎಣ್ಣ್‌ಚೇಂಗಿ ಪೊಣ್ಣಾಳ್‌ಕ್ ಪೆರುವ ನೊಂಬಲ ಸುರು ಆಪನೆಕೆ.

⁹ನಿಂಗ ಎಚ್ಚರತ್‍ಲ್ ಇರಿ. ಅಯಿಂಗ ನಿಂಗಳ ನ್ಯಾಯಾಲಯಕ್ ಬಲ್‍ಚಂಡ್ ಪೋಯಿತ್ ಅಯಿಂಗಡ ಆಲೋಚನೆ ಸಬೇಲ್ ಒಪ್ಪ್‌ಚ್ಚಿಟಿತ್, ಅಯಿಂಗಡ ಸಬಾಮಂದಿರತ್‍ಲ್ ನಿಂಗಳ ಚಾಟಿಲ್ ಪೊಯ್ಯುವ, ನಾಡಗುಂಡ್ ಬಲ್ಯ ಅದಿಪತಿಯಂಗಡ ಪಿಂಞ ರಾಜಂಗಡ ಮಿಂಞತ್‍ಲ್ ನಾಡ ನಲ್ಲ ಸುದ್ದಿ ಎಣ್ಣ್‌ವಕಾಯಿತ್ ನಿಪ್ಪ್‌ಚಿಡುವ.

¹⁰ಆಚೇಂಗಿ ಅಂತ್ಯಕಾಲ ಬಪ್ಪಗಿಂಜ ಮಿಂಞ ಎಲ್ಲಾ ಜಾತಿ ಜನಕು ದೇವಡ ನಲ್ಲ ಸುದ್ದಿ ಪ್ರಚಾರ ಮಾಡಂಡು.

¹¹ನಿಂಗಳ ಜೈಲ್‌ಕ್ ಇಟ್ಟಕ ನ್ಯಾಯಲಾಯಕ್ ಕಾಕಿಯಂಡ್ ಪೋನಕ ನಿಂಗ ಎಂತ ಎಣ್ಣಂಡು, ಎಂತ ತಕ್ಕ್ ಪರಿಯಂಡು ಎಣ್ಣಿಯಂಡ್ ಬೇಜಾರ್ ಮಾಡಂಡ. ಆ ಸಮಯ ಬಪ್ಪಕ ನಿಂಗಕ್ ಎಂತ ಗೇನ ಬಪ್ಪ ಅದ್‍ನ ಎಣ್ಣಿ. ಅಕ್ಕ ನಿಂಗ ಎಂತ ತಕ್ಕ್ ಪರಿವಿರ, ಅದ್ ನಿಂಗ ತಕ್ಕ್ ಪರಿಯುವದ್ ಅಲ್ಲ, ಅದ್ ಪವಿತ್ರಾತ್ಮಂಡ ತಕ್ಕಾಯಿತ್ ಇಪ್ಪ

¹²ಮನುಷ್ಯಂಗ ತಾಂಡ ಸ್ವಂತ ಅಣ್ಣತಮ್ಮಣಂಗಳ ಒಪ್ಪ್‌ಚಿಡ್‌ವಂಜಿ ಕೊಲ್ಲ್‌ಚಿಡುವ, ಅಪ್ಪಂಗ ಸಹ ತಾಂಡ ಮಕ್ಕಳ ಅದೇ ಪ್ರಕಾರ ಒಪ್ಪ್‌ಚಿಡ್‌ವಂಜಿ ಕೊಲ್ಲ್‌ಚಿಡುವ. ಮಕ್ಕ ಅಪ್ಪವ್ವಂಗಕ್ ವಿರೋದವಾಯಿತ್ ಮಕ್ಕಳೇ ಅಯಿಂಗಳ ಕೊಲ್ಲ್‌ಚಿಡುವ.

¹³ನಿಂಗ ನಾಡ ಶಿಷ್ಯಂಗಳಾನಗುಂಡ್ ಎಲ್ಲಾರು ನಿಂಗಳ ತ್‍ಕ್ಕಾರ ಮಾಡ್‌ವ, ಆಚೇಂಗಿ ಕಡೇಕತ್ತನೆ ಸ್ತಿರವಾಯಿತ್ ನಿಪ್ಪಂವೊಂಗ್ ರಕ್ಷಣೆ ಕ್‍ಟ್ಟುವ.

¹⁴ಪಾಳ್ ಮಾಡ್‌ವ ಅಸಹ್ಯ ವಸ್ತು ನಿಪ್ಪಕ್ಕಾಗತ ಜಾಗದತ್‍ಲ್ ನಿಪ್ಪದ್‌ನ ನಿಂಗ ಕಾಂಬಕ, ಯೂದಾಯ ದೇಶತ್‍ಲ್ ಉಳ್ಳಯಿಂಗ ಕುಂದ್‌ರ ಕೊಡಿಕ್ ಓಡಡ್. ದಾನಿಯೇಲ ಪ್ರವಾದಿ ಎಣ್ಣ್‌ನನೆಕೆ, ಇದ್‍ನ ಓದ್‍ವಂವೊ ಗೇನ ಮಾಡಂಡು.

¹⁵ಮನೆರ ಕೊಡಿಲ್ ಇಪ್ಪಯಿಂಗ ಅಡಿಕ್ ಇಳಿಯತೆ, ಮನೇರೊಳ್‌ಕ್ ಪೋಯಿತ್ ಏದ್ ಒರ್ ಸಾಮಾನ್‌ನ ಎಡ್‌ತ ಬಪ್ಪಕ್ ಪೋಕತೆ ಇರಂಡು.

¹⁶ಬೇಲ್‌ಲ್ ಇಪ್ಪ ಮನುಷ್ಯಂಗ ಅಂವೊಂಡ ಬಟ್ಟೇನ ಎಡ್‌ತ ಬಪ್ಪಕ್ ಪೋಪಕ್ಕಾಗ.

¹⁷ಆ ದಿವಸತ್‍ಲ್ ಕೆಲಕರ್ತಿಯಂಗಕು, ಕುಂಞಿಕ್ ಪಾಲ್ ಕೊಡ್‍ಪ ಅವ್ವಂಗಕು ಅಯ್ಯೋ!

¹⁸ಈ ತರ ಕಠಿಣ ದಿವಸ ಕುಳ್‌ರ್ ಕಾಲವಾಯಿತ್ ಇಪ್ಪಕ್ಕಾಗಾಂದ್ ದೇವನ ಪ್ರಾರ್ಥನೆ ಮಾಡಿ.

¹⁹ದೇವ ಬೂಲೋಕತ್‍ನ ಸೃಷ್ಟಿ ಮಾಡ್‌ನಲ್ಲಿಂಜ ಇಕ್ಕಣೆಕೆ ಆಯಿತಿಲ್ಲತ, ಇಂಞು ಮಿಂಞಕು ಆಕತ ಅಚ್ಚಕ್ ಹಿಂಸೆ ಅಂದ್ ಆಪ.

²⁰ಆ ದಿವಸತ್‍ನ ದೇವ ಕಮ್ಮಿ ಮಾಡತೆ ಪೋಯಿತ್ಂಜತೇಂಗಿ, ದಾರೂ ಬದ್‌ಕಿತ್ ಇಪ್ಪುಲೆ. ಆಚೇಂಗಿ ದೇವ ಗೊತ್ತ್ ಮಾಡಿತುಳ್ಳ ಮಕ್ಕಕಾಯಿತ್ ಆ ದಿವಸತ್‍ನ ಕಮ್ಮಿ ಮಾಡಿಯತ್.

²¹ಅಕ್ಕ: ದಾರೇಂಗಿ, ನೋಟಿ! ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ[39] ಇಲ್ಲಿ ಉಂಡ್, ಅಲ್ಲಿ ಉಂಡ್‍ೕಂದ್ ಎಣ್ಣ್‌ಚೇಂಗಿ ನಂಬತಿ.

²²ಎನ್ನಂಗೆಣ್ಣ್‌ಚೇಂಗಿ, ಕಳ್ಳ ಕ್ರಿಸ್ತಂಗ ಪಿಂಞ ಕಳ್ಳ ಪ್ರವಾದಿಯಂಗ ಉದಿಚಿ, ಕಯ್ಯುವೇಂಗಿ ದೇವ ಗೊತ್ತ್ ಮಾಡಿತುಳ್ಳಯಿಂಗಡ ನಂಬಿಕೇನ ಕೆಡ್‍ತ್‌ವಕ್ ವಂಚನೆ ಮಾಡಿತ್ ಗುರ್‌ತ್ ಕಾಟಿತ್ ಆಶ್ಚರ್ಯ ಕಾರ್ಯತ್‍ನ ಮಾಡ್‌ವ.

²³ನಿಂಗ ಎಚ್ಚರತ್‍ಲ್ ಇರಿ! ಇದಾ! ನಾನ್ ಇದ್‍ನೆಲ್ಲ ಆಪಕ್ ಮಿಂಞಲೇ ಎಣ್ಣಿ ತಂದಿಯೆ.

²⁴ಅಂದತ ಕಾಲತ್‍ಲ್, ಅಂತ ಸಂಕಟ ಕಾಲ ಆನ ಪಿಂಞ, ಸೂರ್ಯ ಇರ್‌ಟ್ ಆಪ, ಚಂದ್ರ ಬೊಳಿ ಕೊಡ್‍ಪ್‍ಲೆ.

²⁵ಬಾನತ್ ಮೀನ್ ಅಡಿಕ್ ಬೂವ. ಬಾನತ್‍ರ ಪ್ರತಿಯೊರ್ ಶಕ್ತಿಯು ನಡ್‌ಗುವ.

²⁶ಅಕ್ಕ ಮನುಷ್ಯಕುಮಾರ ದುಂಬ ಶಕ್ತಿಲ್, ದುಂಬ ಮಹಿಮೆಲ್ ಮೋಡತ್‍ಲ್ ಬಪ್ಪದ್‍ನ ಕಾಂಬ.

²⁷ಅಂವೊ ತಾಂಡ ದೇವದೂತಂಗಳ ಬೂಲೋಕತ್‌ರ ಒರ್ ಮೂಲೆಯಿಂಜ ಇಂಞೊರ್ ಮೂಲೆಕತ್ತನೆ ನಾಲ್ ದಿಕ್ಕ್‌ಕ್ ಅಯಿಪಂಜಿ ದೇವ ಗೊತ್ತ್ ಮಾಡಿತುಳ್ಳಯಿಂಗಳ, ಕಾಕಿತ್ ಕೂಟ್‌ವ.

²⁸ಅತ್ತಿ ಮರ ನಿಂಗಕ್ ಒರ್ ಪಾಠ ಪಡಿಪ್‌ಚಿಡಡ್. ಆ ಮರತ್‍ರ ಕೊಂಬ್ ಪಚ್ಚೆ ಆಯಿತ್, ಚಿಗ್‌ರೆಲೆ ಬಪ್ಪಕ, ನಿಂಗಕ್ ಬೇನಿಕಾಲ ಬಪ್ಪಕಾಚೀಂದ್ ಗೊತ್ತಾಪ.

²⁹ಅನ್ನನೆ ಈ ತರತ್‍ರ ಘಟನೆಯೆಲ್ಲ ನಿಂಗ ಕಾಂಬಕಾಪಕ, ಅಂವೊ ಪಡಿರ ಪಕ್ಕತ್ ಬಂದಿತ್ತುಂಡ್‍ೕಂದ್ ನಿಂಗಕ್ ಗೊತ್ತಿರಡ್.

³⁰ಈ ಘಟನೆಯೆಲ್ಲ ಆಪಕ್ ಮಿಂಞ ಈ ಸಂತಾನ ಪಾಳಾಯಿ ಪೋಪುಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ.

³¹ಬಾನ ಬೂಮಿ ಎಲ್ಲಾ ನಾಶ ಆಪ, ಆಚೇಂಗಿ ನಾಡ ತಕ್ಕ್ ನಾಶ ಆಪುಲೆ.

³²ಆ ದಿನವು, ಆ ಸಮಯವು ನಾಡ ಅಪ್ಪನಾನ ದೇವ ಒಬ್ಬನ ಬುಟ್ಟಿತ್ ಬೋರೆ ದಾರ್‌ಕು ಗೊತ್ತ್‌ಲ್ಲೆ. ಪರಲೋಕತ್‍ಲ್ ಉಳ್ಳ ದೂತಂಗಕು ಪಿಂಞ ಅಂವೊಂಡ ಮೋಂವೊಂಗ್ ಸಹ ಗೊತ್ತಿಪ್ಪುಲೆ.

³³ಆ ಕಾಲ ಎಕ್ಕ ಬಪ್ಪಾಂದ್ ನಿಂಗಕ್ ಗೊತ್ತಿಲ್ಲತಗುಂಡ್, ಎಲ್ಲಾರು ಎಚ್ಚರತ್‍ಲ್ ಪಾರಕಾತಂಡ್, ಪ್ರಾರ್ಥನೆ ಮಾಡಿಯಂಡಿರಿ.

³⁴ಒರ್ ಮನುಷ್ಯ ಅಂವೊಂಡ ಮನೆನ ಬುಟ್ಟಿತ್ ದೂರ ದೇಶಕ್ ಪೋಪಕ, ಅಂವೊಂಡ ಆಳ್ಂಗಕ್ ಅದಿಕಾರ ಕೊಡ್‌ತಿತ್, ಅಯಿಂಗಯಿಂಗಕ್ ಕೆಲಸತ್‍ನ ಪಾಲ್ ಮಾಡಿ ಕೊಡ್‌ತಿತ್, ಎಚ್ಚರತ್‍ಲ್ ಇರ್‍ೕಂದ್ ಮನೆನ ಕಾಪಂವೊಂಗ್ ಎಣ್ಣಿತ್ ಪೋಪ.

³⁵ಅನ್ನನೆ ನಿಂಗಳು ಎಚ್ಚರವಾಯಿತಿರಿ, ಎನ್ನಂಗೆಣ್ಣ್‌ಚೇಂಗಿ, ಮನೆರ ಎಜಮಾನ ಬಪ್ಪದ್ ಬೈಟಾಕು, ಅಥವ ನಡ್‌ಪಾದ್ರೆ ಆಕು, ಅಥವ ಪೊಲಾಕ ಮಲ್ಲಂಗೋಳಿ ಕೂವ ನೇರಾಯಿತಿಕ್ಕು, ಅಥವ ಪೊಲಾಕ ಆಯಿತಿಕ್ಕು. ಎಕ್ಕ ಬಯ್ಯಕ್ ವಾಪಸ್ ಬಪ್ಪ ಎಣ್ಣಿಯಂಡ್ ನಿಂಗಕ್ ಗೊತ್ತ್‌ಲ್ಲೆ.

³⁶ನಿಂಗ ಗೇನ ಮಾಡತ ಸಮಯತ್‍ಲ್ ಅಂವೊ ಬಂತ್, ನಿಂಗ ವರಿಯಂಡಿಪ್ಪದ್‍ನ ಕಾಂಗತನೆಕೆ ಎಚ್ಚರವಾಯಿತಿರಿ.

³⁷ನಾನ್ ನಿಂಗಕ್ ಎಂತ ಎಣ್ಣ್‌ವಿ, ಅದ್‍ನ ಎಲ್ಲಾರ್‌ಕು ಎಣ್ಣ್‌ವಿ, ಎಚ್ಚರವಾಯಿತ್ ಇರಿ.