Read Kodava ಮಾರ್ಕ 14 Bible Online

ಮಾರ್ಕ 14 - Kodava bible

ಮಾರ್ಕ 14

¹ಇಂಞು ದಂಡ್ ದಿವಸ ಆಪಕ ಪಸ್ಕ[40] ಪಿಂಞ ಪುಳಿಯಿಲ್ಲತ ಒಟ್ಟಿ ತಿಂಬ ನಮ್ಮೆ ಬಪ್ಪ. ಅಕ್ಕ ಮುಕ್ಯ ಯಾಜಕಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಯೇಸುನ ಗುಟ್ಟಾಯಿತ್ ಪುಡ್‌ಚಿತ್ ಕೊಲ್ಲ್‌ವಕ್ ನೋಟಿಯಂಡ್ ಇಂಜತ್.

²ನಂಗ ಈ ನಮ್ಮೆರ ದಿವಸತ್‍ಲ್ ಮಾಡ್‌ವಕ್ಕಾಗ, ಅನ್ನನೆ ಮಾಡ್‍ಚೇಂಗಿ ಜನ ಅಯಿಂಗಯಿಂಗಳೇ ಜಗಳ ಮಾಡ್‌ವಾಂದ್ ಎಣ್ಣಿಯಂಡಿಂಜತ್.

³ಯೇಸು ಬೇಥಾನ್ಯತ್‍ಲ್ ಕುಷ್ಟರೋಗಿಯಾಯಿತ್ಂಜ ಸೀಮೋನಂಡ ಮನೆಲ್ ಉಂಬಕ್ ಅಳ್‌ತಂಡಿಪ್ಪಕ, ಒರ್ ಪೊಣ್ಣಾಳ್ ದುಂಬ ಬೆಲೆಯುಳ್ಳ ಸುಗಂದ ತೈಲತ್‌ನ[41] ಅಲಬಸ್ಟರ್[42] ಎಣ್ಣುವ ಕುಪ್ಪಿಲ್ ಕೊಂಡ್ ಬಾತ್. ಆ ಕುಪ್ಪಿನ ಒಡ್‌ಪಂಜಿ ತೊರ್‌ಪಂಜಿ ಯೇಸುರ ಮಂಡೆರ ಮೇಲೆ ಬೂಕ್‍ಚಿ.

⁴ಅಲ್ಲಿ ಉಳ್ಳ ಚೆನ್ನ ಜನಕ್ ದುಂಬ ಚೆಡಿ ಬಾತ್; ಎನ್ನಂಗ್ ಇವ ಇಚ್ಚಕ್ ಬೆಲೆಯುಳ್ಳ ಸುಗಂದ ತೈಲತ್‌ನ ಇನ್ನನೆ ಪಾಳ್ ಮಾಡಿಯೆ?

⁵ಈ ತೈಲತ್‌ನ ಮುನ್ನೂರ್ ಬೊಳ್ಳಿರ ದುಡ್ಡ್‌ಕಿಂಜ ಜಾಸ್ತಿಕ್ ಮಾರಿತ್, ಆ ದುಡ್ಡ್‌ನ ಗರೀಬಂಗಕ್ ಕೊಡಕಲಿಂಜತಲ್ಲ ಎಣ್ಣಿಯಂಡ್ ಅವಳ ಅಯಿಂಗಯಿಂಗಳೇ ಗೊಣಗಿಯಂಡಿಂಜತ್. ಅದ್ಂಗ್ ಯೇಸು: ಅವಳ ತೊಂದರೆ ಮಾಡತಿ.

⁶ಅವಳ ಮುಂಡತೆ ಬುಟ್ಟ್‌ರಿ: ನಿಂಗ ಅವಳ ಎನ್ನಂಗ್ ತೊಂದರೆ ಮಾಡ್‌ವಿರ? ಅವ ನಾಕ್ ನಲ್ಲ ಕಾರ್ಯತ್‍ನ ಮಾಡ್‍ಚಿ.

⁷ಗರೀಬಂಗ ಎಕ್ಕಾಲು ನಿಂಗಡ ಕೂಡೆ ಇಪ್ಪ. ಎಕ್ಕ ಬೋಂಡೇಂಗಿಯು ನಿಂಗ ಗರೀಬಂಗಕ್ ಸಹಾಯ ಮಾಡಲು, ಆಚೇಂಗಿ ನಾನ್ ನಿಂಗಡ ಕೂಡೆ ಎಕ್ಕಾಲು ಇಪ್ಪುಲೆ.

⁸ಅವಕ್ ಎಂತ ಕಯ್ಯುವ ಅದ್‍ನ ಅವ ಮಾಡ್‍ಚಿ. ನನ್ನ ಪೂಪಂಗ್ ಮಿಂಞಲೇ ಅವ ಈ ತರ ಸುಗಂದ ತೈಲತ್‌ನ ಬೂಕಿತ್ ನನ್ನ ತಯಾರ್ ಮಾಡ್‍ಚಿ.

⁹ಬೂಲೋಕತ್‍ಲ್ ಎಲ್ಲೆಲ್ಲಾ ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವ ಅಲ್ಲಿ ಎಲ್ಲಾ ಇವ ಮಾಡ್‌ನದು ಇವಡ ನೆನಪ್‍ಲ್ ಎಣ್ಣುವಾಂದ್ ನಿಂಗಕ್ ನಾನ್ ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ.

¹⁰ಅಲ್ಲಿಂಜ ಪನ್ನೆರಂಡ್ ಶಿಷ್ಯಂಗಡ ಕೂಟ್‌ಲ್ ಉಳ್ಳ ಇಸ್ಕರಿಯೋತ ಯೂದ ಎಣ್ಣ್‌ವಂವೊ ಯೇಸುನ ಪುಡ್‍ಚಿ ಕೊಡ್‍ಪಕ್ ಏರ್ಪಾಡ್ ಮಾಡ್‌ವಕಾಯಿತ್ ಮುಕ್ಯ ಯಾಜಕಂಗಡ ಪಕ್ಕ ಪೋಚಿ.

¹¹ಅಯಿಂಗ ಯೂದಂಡ ತಕ್ಕ್ ಕ್‍ೕಪಂಜಿ ಬಾರಿ ಕುಶಿಪಟ್ಟತ್. ಅಯಿಂಗ ನೀಕ್ ನಂಗ ದುಡ್ಡ್ ತಪ್ಪಾಂದ್ ತಕ್ಕ್ ಕೊಡ್‍ತತ್. ಅಲ್ಲಿಂಜ ಯೂದ ಯೇಸುನ ಕಾಟಿ ಕೊಡ್‍ಪಕ್ ಸರಿಯಾನ ಸಮಯ ನೋಟಿಯಂಡ್ ಇಂಜತ್.

¹²ಪಸ್ಕ ನಮ್ಮೆಕಾಯಿತ್ ಕೊರಿಕುಟ್ಟಿ ಬಲಿ ಮಾಡಿ ಪುಳಿಯಿಲ್ಲತೆ ಒಟ್ಟಿ ತಿಂಬ ನಮ್ಮೆರ ಆದ್ಯ ದಿವಸ, ಯೇಸುರ ಶಿಷ್ಯಂಗ ಅಂವೊಂಡ ಪಕ್ಕ ಬಂದಿತ್; ನಿಂಗ ಪಸ್ಕ ತಿಂಬಕ್ ನಂಗ ಎಲ್ಲಿ ಪೋಯಿತ್ ತಯಾರ್ ಮಾಡ್‌ವಕ್ ನೀಕ್ ಕುಶಿಯುಂಡ್‍ೕಂದ್ ಕ್‍ೕಟತ್.

¹³ಯೇಸು ತಾಂಡ ಶಿಷ್ಯಂಗಡಡೆಲ್ ದಂಡಾಳ್‌ನ ನೋಟಿತ್: ಪಟ್ಟಣತ್‍ಲ್ ಒರ್ ಮನುಷ್ಯಂಡ ಪಕ್ಕ ಪೋಯಿ, ಅಕ್ಕ ಒರ್ ಮನುಷ್ಯ ಕುಡಿಕೆಲ್ ನೀರ್ ಎಡ್‍ತಂಡ್ ಬಂದಂಡಿಪ್ಪ. ಅಂವೊಂಡ ಬಯ್ಯಕ್ ಪೋಯಿ.

¹⁴ಅಂವೊ ಪೋಪ ಮನೆರ ಒಳ್‍ಕ್ ಅಂವೊಂಡ ಬಯ್ಯಕ್ ಪೋಯಿತ್, ಆ ಮನೆರ ಎಜಮಾನನ ನೋಟಿತ್: ನಾನ್ ನಾಡ ಶಿಷ್ಯಂಗಡ ಕೂಡೆ ಪಸ್ಕ ತಿಂಬಕುಳ್ಳ ಜಾಗ ಎಲ್ಲೀಂದ್ ಉಪಾದ್ಯ ಕ್‍ೕಟತ್‍ೕಂದ್ ಎಣ್ಣುವಿರ.

¹⁵ಅಕ್ಕ ಅಂವೊ ಮನೆರ ಕೊಡಿಲ್ ಉಳ್ಳ ಬಲ್ಯೊರ್ ತಯಾರ್ ಮಾಡ್‍ನ ಕೋಂಬರೆನ ಕಾಟಿತಪ್ಪ. ಅಲ್ಲಿ ನಂಗಕಾಯಿತ್ ಎಲ್ಲಾ ತಯಾರ್ ಮಾಡೀಂದ್ ಎಣ್ಣ್‌ಚಿ.

¹⁶ಯೇಸು ಎಣ್ಣ್‌ನನೆಕೆ ಶಿಷ್ಯಂಗ ಪಟ್ಟಣಕ್ ಪೋಪಕ, ಅಂವೊ ಎಣ್ಣ್‌ನನೆಕೆ ಎಲ್ಲಾ ಇಂಜತ್, ಅಯಿಂಗ ಪಸ್ಕಕುಳ್ಳ ಅಡಿಗೆ ತಯಾರ್ ಮಾಡ್‍ಚಿ.

¹⁷ಬೈಟಾಪಕ ಪನ್ನೆರಂಡ್ ಶಿಷ್ಯಂಗಡ ಕೂಡೆ ಯೇಸು ಅಲ್ಲಿಕ್ ಬಾತ್.

¹⁸ಅಯಿಂಗೆಲ್ಲಾರು ಅಳ್‌ತಿತ್ ಉಂಬಕಾಪಕ, ಯೇಸು ಎಣ್ಣ್‌ಚಿ; ನಿಂಗಡ ಕೂಟ್‌ಲ್ ಒಬ್ಬ ನನ್ನ ಪುಡ್‌ಚಿತ್ ಕೊಡ್‍ಪಾಂದ್ ನೇರಾಯಿತು ನಾನ್ ಎಣ್ಣ್‌ವಿ.

¹⁹ಶಿಷ್ಯಂಗಕೆಲ್ಲ ಬೇಜಾರಾಯಿತ್: ಒಬ್ಬೊಬ್ಬನು, ನಾನಾ ನಾನಾಂದ್ ಯೇಸುನ ಕ್‍ೕಟತ್.

²⁰ಅದ್ಂಗ್ ಯೇಸು: ಈ ಪನ್ನೆರಂಡ್ ಶಿಷ್ಯಂಗಡ ಕೂಟ್‌ಲ್ ಉಳ್ಳ ಒಬ್ಬನೇಂದ್ ಎಣ್ಣಿತ್, ನಾಡ ಕೂಡೆ ಒಟ್ಟಿನ ಪಾತ್ರತ್‍ಲ್ ಮುಳುಕುವಂವೋನೇ ಅಂವೋಂದ್ ಎಣ್ಣ್‌ಚಿ;

²¹ಮನುಷ್ಯಕುಮಾರ ದೇವಡ ವಾಕ್ಯತ್‍ಲ್ ಒಳ್‌ದ್‌ನನೆಕೆ ಚಾವ. ಆಚೇಂಗಿ ಮನುಷ್ಯಕುಮಾರನ, ಏದ್ ಮನುಷ್ಯ ಪುಡ್‍ಚಿ ಕೊಡ್‍ಪ ಅಂವೊಂಗ್ ಅಯ್ಯೋ. ಆ ಮನುಷ್ಯ ಪುಟ್ಟತೆ ಇಂಜತೇಂಗಿ ಅಂವೊಂಗ್ ನಲ್ಲದಾಯಿತ್ಂಜತ್‍ೕಂದ್ ಎಣ್ಣ್‌ಚಿ.

²²ಅಯಿಂಗೆಲ್ಲಾರು ಉಂಬಕಾಪಕ ಯೇಸು ಒಟ್ಟಿನ ಎಡ್‌ಪಂಜಿ, ದೇವನ ತುದಿಚಿತ್ ಪೊಳಿಪಂಜಿ ಶಿಷ್ಯಂಗಕೆಲ್ಲ ಕೊಡ್‍ತತ್: ಇದ್‍ನ ಎಡ್‌ತ್‌ ತಿನ್ನಿ, ಇದ್ ನಾಡ ತಡೀಂದ್ ಎಣ್ಣ್‌ಚಿ.

²³ಅಲ್ಲಿಂಜ ಅಂವೊ ದ್ರಾಕ್ಷಿರಸ ಉಳ್ಳ ಪಾತ್ರತ್‍ನ ಎಡ್‌ಪಂಜಿ ದೇವನ ತುದಿಚಿತ್ ಅಯಿಂಗಕ್ ಕುಡಿಪಕ್ ಕೊಡ್‍ತತ್. ಅಯಿಂಗೆಲ್ಲ ಕುಡಿಚತ್.

²⁴ಅಕ್ಕ ಅಂವೊ ಅಯಿಂಗಳ ನೋಟಿತ್: ಇದ್ ದುಂಬ ಜನಕಾಯಿತ್ ಬೂಕ್‌ವ ಪುದಿಯ ಒಪ್ಪಂದತ್‍ರ[43] ನಾಡ ಚೋರೆ,

²⁵ನಾನ್ ದೇವಡ ರಾಜ್ಯತ್‍ಲ್ ಪುದಿಯ ರಸತ್‌ನ ಕುಡಿಪಕತ್ತನೆ ಈ ದ್ರಾಕ್ಷಿರಸತ್‍ನ ಕುಡಿಪ್‌ಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವೀಂದ್ ಎಣ್ಣ್‌ಚಿ.

²⁶ಅಯಿಂಗೆಲ್ಲಾರು ದೇವಡ ಪಾಟ್ ಪಾಡಿಯಂಡೇ ಆಲಿವ್ ಎಣ್ಣುವ ಕುಂದ್‌ಕ್ ಪೋಚಿ.

²⁷ಅಕ್ಕ ಯೇಸು ಅಯಿಂಗಳ ನೋಟಿತ್: ಕೊರಿ ಕಾಪಂವೊನ ಕೊಲ್ಲುವಿ, ಕೊರಿಯೆಲ್ಲ ಚದ್‌ರಿ ಪೋಪಾಂದ್ ಪುಸ್ತಕತ್‍ಲ್ ಒಳ್‌ದ್‌ನನೆಕೆ ನಿಂಗೆಲ್ಲಾರು ಇಂದ್ ಬಯಿಟ್ ನನ್ನ ಬುಟ್ಟಿತ್ ಓಡಿ ಪೋಪಿರ.[44]

²⁸ಆಚೇಂಗಿಯು, ನಾನ್ ಚತ್ತಿತ್, ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಂದ ಪಿಂಞ, ನಿಂಗಕ್ ಮಿಂಞ ಗಲಿಲಾಯಕ್ ಪೋಪೀಂದ್ ಎಣ್ಣ್‌ಚಿ.

²⁹ಅದ್ಂಗ್ ಪೇತ್ರ: ನಿನ್ನ ಎಲ್ಲಾರು ಬುಟ್ಟಿತ್ ಪೋಚೇಂಗಿಯು ನಾನ್ ನಿನ್ನ ಬುಟ್ಟಿತ್ ಪೋಪುಲೇಂದ್ ಎಣ್ಣ್‌ಚಿ.

³⁰ಇಂದ್ ಬಯಿಟ್ ನೇರತೆ ದಂಡ್ ಕುರಿ ಮಲ್ಲಂಗೋಳಿ ಕೂವಾಂಗಿಂಜ ಮಿಂಞ ನೀನ್ ನನ್ನ ಮೂಂದ್ ಕುರಿ ಗೊತ್ತಿಲ್ಲೇಂದ್ ಎಣ್ಣುವಿಯಾಂದ್ ಯೇಸು ಎಣ್ಣ್‌ಚಿ.

³¹ಅದ್ಂಗ್ ಪೇತ್ರ: ನಾನ್ ನೀಡ ಕೂಡೆ ಚತ್ತ್ ಪೋಂಡೂಂದ್ ಇಂಜತೇಂಗಿಯು, ನಾನ್ ಅನ್ನನೆ ಎಣ್ಣುಲೇಂದ್ ಎಣ್ಣ್‌ಚಿ. ಎಲ್ಲಾ ಶಿಷ್ಯಂಗಳು ಅಂವೊ ಎಣ್ಣ್‌ನನೆಕೆ ಎಣ್ಣ್‌ಚಿ.

³²ಅಯಿಂಗೆಲ್ಲಾ ಗೆತ್ಸೇಮನೆ ಎಣ್ಣುವ ಜಾಗಕ್ ಬಾತ್. ಯೇಸು ಅಂವೊಂಡ ಶಿಷ್ಯಂಗಕ್: ನಾನ್ ಪ್ರಾರ್ಥನೆ ಮಾಡಿತ್ ಬಪ್ಪಕತ್ತನೆ ಇಲ್ಲಿ ಅಳ್‌ತಿತ್ ಇರೀಂದ್ ಎಣ್ಣ್‌ಚಿ.

³³ಪೇತ್ರ, ಯೋಹಾನ ಪಿಂಞ ಯಾಕೋಬನ ಅಂವೊಂಡ ಕೂಡೆ ಕಾಕಿಯಂಡ್ ಪೋಚಿ, ಅಂವೊಂಗ್ ವ್ಯಸನವು ಗಾಬರಿಯು ಆಪಕ್ ಸುರು ಆಚಿ.

³⁴ಅಕ್ಕ ಅಂವೊ: ನಾನ್ ಚಾವ್‍ರ ನೊಂಬಲತ್‍ರಚ್ಚಕ್ ನಾಡ ಆತ್ಮ ದುಃಖಪಟ್ಟಂಡುಂಡ್. ನಿಂಗ ಇಲ್ಲೇ ಇಂಜಿತ್ ವರಿಯತೆ ಎಚ್ಚರವಾಯಿತಿರೀಂದ್ ಎಣ್ಣಿತ್,

³⁵ಚೆನ್ನ ದೂರ ಪೋಪಂಜಿ ನೆಲಕ್ ಬೂವಂಜಿ: ಅಪ್ಪಾ ದೇವ ಈ ಕಷ್ಟತ್‍ರ ಸಮಯ ನನ್ನ ಬುಟ್ಟಿತ್ ಪೋಪಕಾಚೇಂಗಿ ಪೋಡ್‍ೕಂದ್ ಪ್ರಾರ್ಥನೆ ಮಾಡ್‍ಚಿ.

³⁶ನಾಡ ಅಪ್ಪ, ನೀಕ್ ಎಲ್ಲಾ ಮಾಡ್‌ವಕ್ ಕಯ್ಯು. ಈ ಪಾತ್ರತ್‍ನ ನಾಡ ಪಕ್ಕತ್ಂಜ ನೀಕಿರ್, ಆಚೇಂಗಿಯು ನಾಡ ಚಿತ್ತ ಅಲ್ಲ ನೀಡ ಚಿತ್ತವೇ ಆಡ್‍ೕಂದ್ ಎಣ್ಣ್‌ಚಿ.

³⁷ಯೇಸು ಇನ್ನನೆ ಪ್ರಾರ್ಥನೆ ಮಾಡ್‌ವಂಜಿ ಅಲ್ಲಿಂಜ ಅಂವೊ ಶಿಷ್ಯಂಗಡ ಪಕ್ಕ ಬಾತ್. ಅಯಿಂಗ ವರಿಯಂಡಿಂಜಾನ ಕಂಡತ್; ಪೇತ್ರನ ನೋಟಿತ್, ಸೀಮೋನನೇ, ನಾಕಾಯಿತ್ ಒರ್ ಗಂಟೆ ವರಿಯತೆ ಇಪ್ಪಕ್ ಕಯ್ಯುಲೆಯಾಂದ್ ಎಣ್ಣ್‌ಚಿ.

³⁸ನಿಂಗ ಪರಿಕ್ಷೇಕ್ ಒಳಪಡತನೆಕೆ ಎಚ್ಚರ ಎಡ್‍ತಂಡ್ ಪ್ರಾರ್ಥನೆ ಮಾಡಿ; ಆತ್ಮಕ್ ಕುಶಿ ಉಂಡ್ ಆಚೇಂಗಿ ತಡಿ ತಳ್ಂದಿತ್ ಉಂಡ್‍ೕಂದ್ ಯೇಸು ಎಣ್ಣ್‌ಚಿ.

³⁹ಅಂವೊ ಪುನಃ ಪೋಯಿತ್ ಇಂಞೊಮ್ಮ ಇದೇ ತರ ತಕ್ಕ್ ಪರಿಯುವಂಜಿ ಪ್ರಾರ್ಥನೆ ಮಾಡ್‍ಚಿ.

⁴⁰ಅದೇ ತರ ಪ್ರಾರ್ಥನೆ ಮಾಡಿತ್, ಬಯ್ಯ ಬಂತ್ ನೋಟ್‌ವಕ, ಅಯಿಂಗ ಪುನಃ ವರಿಯಂಡಿಂಜಾನ ಕಂಡತ್. ಅಯಿಂಗಕ್ ಕಣ್ಣ್ ತೊರ್‌ಪಕ್ ಕಯ್ಯತಚ್ಚಕ್ ವರ್‌ಕ್ ಇಂಜತ್. ಪಿಂಞ ಅಂವೊಂಗ್ ಎಂತ ಎಣ್ಣಂಡೂಂದ್ ಗೊತ್ತಿಲ್ಲತೆ ಇಂಜತ್.

⁴¹ಮೂಂದನೆ ಕುರಿಯು ಪ್ರಾರ್ಥನೆ ಮಾಡಿತ್ ಬಯ್ಯಕ್ ಬಪ್ಪಕ ಅಯಿಂಗಳ ನೋಟಿತ್: ಇಂಞು ನಿಂಗ ವರಿಯಂಡ್, ಆರಾಮಾಯಿತ್ ಉಳ್ಳಿರ? ಇದ್ ಮದಿ, ಸಮಯ ಬಂದ್‌ರ್‌ತ್, ಏಳೀ, ಅದ! ಮನುಷ್ಯಕುಮಾರನ, ಪಾಪಿ ಮನುಷ್ಯಂಗಡ ಕೈಕ್ ಒಪ್ಪ್‌ಚಿಡ್‌ವ ನೇರ ಬಂದ್‌ರ್‌ತ್.

⁴²ಏಳೀ, ನಂಗ ಪೋಕ, ನೋಟಿ ನನ್ನ ಪುಡ್‌ಚಿತ್ ಕೊಡ್‍ಪಂವೊ ಇಕ್ಕಲೆ ಬಾತ್‍ೕಂದ್ ಎಣ್ಣ್‌ಚಿ.

⁴³ಪನ್ನೆರಂಡ್ ಶಿಷ್ಯಂಗಡ ಕೂಟ್‌ಲ್ ಉಳ್ಳ ಯೂದ ಎಣ್ಣ್‌ವಂವೊ ಯೇಸು ತಕ್ಕ್ ಪರ್‌ದಂಡ್ ಇಪ್ಪಕಾಪಕ ಬಾತ್. ಅಂವೊಂಡ ಕೂಡೆ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ, ಮುಕ್ಯ ಯಾಜಕಂಗ, ಪೆರಿಯಯಿಂಗ ಅಯಿಚ ಒರ್ ಬಲ್ಯ ಗುಂಪ್ ಕತ್ತಿ, ಕಂಬ್ ಎಡ್‍ತಂಡ್ ಅಂವೊಂಡ ಪಕ್ಕ ಬಾತ್.

⁴⁴ಯೇಸುನ ಪುಡ್‌ಚಿತ್ ಕೊಡ್‍ಪಂವೊ: ನಾನ್ ದಾರ್‌ಕ್ ಮುತ್ತ್ ಕೊಡ್‍ಪಿ, ಅಂವೊನೇಂದ್ ಆ ಜನಡ ಗುಂಪ್‌ಕ್ ಸನ್ನೆ ಕೊಡ್‌ತಿತ್ಂಜತ್.

⁴⁵ಯೂದ ಬಂದನೆಕೆ ನೇರ ಯೇಸುರ ಪಕ್ಕ ಪೋಯಿತ್, ಉಪಾದ್ಯಾಂದ್ ಎಣ್ಣಿತ್ ಮುತ್ತ್ ಕೊಡ್‍ತತ್.

⁴⁶ಅಕ್ಕ ಅಯಿಂಗ ಬಂತ್ ಯೇಸುನ ಬಂದನೆ ಮಾಡ್‍ಚಿ.

⁴⁷ಅಲ್ಲಿ ನಿಂದಂಡ್ ಇಂಜ ಒಬ್ಬ ಅಂವೊಂಡ ಕತ್ತಿನ ಎಡ್‌ಪಂಜಿ ಮಹಾ ಯಜಕಂಡ ಆಳ್‍ರ ಕೆಮಿನ ಕೆತ್ತಿರ್‌ತ್.

⁴⁸ಯೇಸು ಅಯಿಂಗಳ ನೋಟಿತ್; ಕಳ್ಳನ ಪುಡಿಪಕ್ ಬಂದನೆಕೆ ಕತ್ತಿ ಪಿಂಞ ದೊಣ್ಣೆನೆಲ್ಲ ಎಡ್‌ತ ಬಂದಿತುಳ್ಳಿರಲ್ಲಾ?

⁴⁹ನಾನ್ ದಿನಾಲು ನಿಂಗಡ ಕೂಡೆ ದೇವಾಲಯತ್‍ಲ್ ಬೋದನೆ ಮಾಡಿಯಂಡಿಂಜ್, ಅಕ್ಕ ನಿಂಗ ಪುಡ್‌ಚಿತ್‌ಲ್ಲೆ. ಆಚೇಂಗಿ ದೇವಡ ವಾಕ್ಯತ್‍ಲ್ ಎಂತ ಒಳ್‍ದಿತುಂಡೋ ಅದ್ ನೆರವೇರಂಡೂಂದ್ ಎಣ್ಣ್‌ಚಿ.

⁵⁰ಅಕ್ಕ ಎಲ್ಲಾ ಶಿಷ್ಯಂಗಳು ಯೇಸುನ ಬುಟ್ಟಿತ್ ಓಡಿ ಪೋಚಿ.

⁵¹ಒರ್ ಬಾಲೆಕಾರ ಒರ್ ನಾರ್ ಬಟ್ಟೆ ಮಾತ್ರ ಪೊತ್ತಿತ್ ಯೇಸುರ ಬೆಂಬರತ್‌ಲ್ ಬಂದಡಿಂಜತ್. ಅಂವೊನ ಅಯಿಂಗ ಪುಡಿಪಕ,

⁵²ಅಂವೊ ಅಂವೊಂಡ ಬಟ್ಟೇನ ಉತ್ತಿರುವಂಜಿ ಬೆತ್ತಲೆಯಾಯಿತ್ ಓಡಿ ಪೋಚಿ.

⁵³ಯೇಸುನ ಅಯಿಂಗ ಮಹಾ ಯಾಜಕಂಡ ಪಕ್ಕ ಕೊಂಡ್ ಪೋಚಿ. ಅಲ್ಲಿ ಮುಕ್ಯ ಯಾಜಕಂಗ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಪಿಂಞ ಪೆರಿಯಯಿಂಗ ಎಲ್ಲಾರು ಕೂಡಿಯಾಡಿತ್ಂಜತ್.

⁵⁴ಪೇತ್ರ ದೂರತ್‍ಲ್ ಯೇಸುರ ಬಯ್ಯಕ್ ಪೋಯಿತ್, ಮಹಾ ಯಾಜಕಂಡ ಅರಮನೆರ ಕಯ್ಯಾಲೆಕತ್ತನೆ ಬಂತ್, ಒಳ್‍ಕ್ ಪೋಯಿತ್, ಸಿಪಾಯಿಯಡ ಕೂಡೆ ಅಳ್‌ತಂಡ್, ತಿತ್ತ್ ಕಾಂಜಂಡ್ ಇಂಜತ್.

⁵⁵ಯೇಸುನ ಕೊಲ್ಲ್‌ವಕಾಯಿತ್ ಮುಕ್ಯ ಯಾಜಕಂಗಳು, ಯೆಹೂದ್ಯಂಗಡ ಆಲೋಚನೆ ಸಬೆರ ಜನಳು ಅಂವೊಂಡ ಮೇಲೆ ಪೊಟ್ಟ್ ಸಾಕ್ಷಿ ಕಂಡ್‌ಪುಡಿಪಕಾಯಿತ್ ಗೇನ ಮಾಡಿಯಂಡ್ ಇಂಜತ್. ಆಚೇಂಗಿ ಯೇಸುರ ಮೇಲೆ ಒರ್ ತಪ್ಪು ಕಂಡ್‌ಪುಡಿಪಕ್ ಕಯಿಂಜಿತ್‌ಲ್ಲೆ.

⁵⁶ದುಂಬ ಜನ ಪೊಟ್ಟ್ ಸಾಕ್ಷಿನ ಯೇಸುಕ್ ವಿರೋದವಾಯಿತ್ ಎಣ್ಣ್‌ಚಿ, ಆಚೇಂಗಿ ಅಯಿಂಗ ಪರಿಯುವ ಪೊಟ್ಟ್ ಸಾಕ್ಷಿ ಸರಿ ಬಂತ್‌ಲೆ.

⁵⁷ಪಿಂಞ ಚೆನ್ನ ಜನ ಎದ್ದಿತ್ ಮನುಷ್ಯಂಗ ಕೆಟ್ಟ್‌ನ ಈ ದೇವಾಲಯತ್‍ನ ನಾನ್ ಪೊಳಿಪಂಜಿ, ಮನುಷ್ಯಂಗಡ ಕೆಲಸ ಇಲ್ಲತೆ ಇಂಞೊರ್ ದೇವಾಲಯತ್‍ನ ಮೂಂದ್ ದಿವಸತ್‍ಲ್ ಕೆಟ್ಟುವೀಂದ್ ಇಂವೊ ಎಣ್ಣ್‌ನದ್ ನಂಗ ಕ್‍ೕಟತ್‍ೕಂದ್ ಯೇಸುಕ್ ವಿರೋದವಾಯಿತ್ ಪೊಟ್ಟ್ ಸಾಕ್ಷಿ ಎಣ್ಣ್‌ಚಿ.

⁵⁸

⁵⁹ಇನ್ನನೆ ಎಣ್ಣ್‌ನ ಸಾಕ್ಷಿಯು ಸಹ ಒತ್ತಂಡಿತ್‌ಲ್ಲೆ.

⁶⁰ಮಹಾ ಯಾಜಕ ಏವಂಜಿ; ನೀಡ ಮೇಲೆ ಇದ್‍ನೆಲ್ಲಾ ನೀಕ್ ವಿರೋದವಾಯಿತ್ ಎಣ್ಣುವ, ಇದ್ಂಗ್ ನೀನ್ ಜವಾಬ್ ಕೊಡ್‍ಪ್‌ಲೆಯಾಂದ್ ಕ್‍ೕಟತ್.

⁶¹ಆಚೇಂಗಿ ಯೇಸು ಒರ್ ತಕ್ಕ್ ಪರಿಯತೆ ಮುಂಡತೆ ಇಂಜತ್. ಪುನಃ ಮಹಾ ಯಾಜಕ ನೀನ್ ದೇವಾದಿ ದೇವಡ ಮೋಂವೊನಾನ ಕ್ರಿಸ್ತನಾ[45] ಎಣ್ಣಿಯಂಡ್ ಕ್‍ೕಟತ್?

⁶²ಅದ್ಂಗ್ ಯೇಸು: ಅಕ್ಕು, ನಾನ್ ಅಂವೊನೇ; ಮನುಷ್ಯಕುಮಾರ ಸರ್ವ ಶಕ್ತಿಯುಳ್ಳಂವೊಂಡ ಬಲ್‌ತೆ ಬರಿಲ್ ಅಳ್‌ತಿತ್, ಬಾನತ್‍ರ ಮೋಡತ್‍ಲ್ ಬಪ್ಪದ್‍ನ ನಿಂಗೆಲ್ಲಾರು ಕಾಂಬಿರಾಂದ್ ಎಣ್ಣ್‌ಚಿ.[46]

⁶³ಮಹಾ ಯಾಜಕ ಇದ್‍ನ ಕ್‍ೕಟದು, ತಾಂಡ ಬಟ್ಟೇನ ಕೀತಿತ್:[47] ನಂಗಕ್ ಇಂಞು ಏದ್ ಸಾಕ್ಷಿ ಬೋಂಡು.

⁶⁴ದೇವ ದೂಷಣೆನ ನಿಂಗೆಲ್ಲಾರು ಕ್‍ೕಟಿರಲ್ಲ! ನಿಂಗ ಎಂತ ತೀರ್ಮಾನ ಮಾಡ್‌ವಿರಾಂದ್ ಕ್‍ೕಟತ್, ಅಲ್ಲಿ ಉಳ್ಳಯಿಂಗೆಲ್ಲಾರೂ ಯೇಸು ತಪ್ಪ್ ಮಾಡ್‌ನಂವು ಅಂವೊಂಗ್ ಮರಣ ಶಿಕ್ಷೆ ಕೊಡ್‍ಕಂಡೂಂದ್ ತೀರ್ಮಾನ ಮಾಡ್‍ಚಿ.

⁶⁵ಚೆನ್ನ ಜನ ಯೇಸುರ ಮೂಡ್‍ಕ್ ತುಪ್ಪ್‌ವಕ್ ಸುರು ಮಾಡ್‍ಚಿ. ಅಂವೊಂಡ ಮೂಡ್ ಕೆಟ್ಟುವಂಜಿ ಗುದ್ದಿರ್‌ವಂಜ ನೀಕ್ ದಾರ್ ಗುದ್ದಿಯೇಂದ್ ಪ್ರವಾದೆನ ಎಣ್ಣೀಂದ್ ಎಣ್ಣಿಯಂಡಿಂಜತ್. ಪಿಂಞ ಪಡೆಯಾಳಿಯಂಗ ಅಂವೊನ ಪೊಜ್ಜತ್.

⁶⁶ಅಕ್ಕಣೆಕ್ ಪೇತ್ರ ಅರಮನೆರ ಅಡಿಲ್ ಕಯ್ಯಾಲೆಲ್ ಇಪ್ಪಕ, ಮಹಾ ಯಾಜಕಂಡ ಪಣಿಕರ್ತಿ ಬಂತ್,

⁶⁷ಅಂವೊ ತಿತ್ತ್ ಕಾಂಜಂಡ್ ಇಪ್ಪಕಾಪಕ, ಆ ಮೂಡಿ ಪೇತ್ರನ ನೇರೆ ನೋಟುವಂಜಿ ನೀನ್ ಸಹ ನಜರೇತ್‍ರ ಯೇಸುರ ಕೂಡೆ ಇಂಜಲ್ಲಾಂದ್ ಕ್‍ೕಟತ್.

⁶⁸ಅಂವೊ ಆ ತಕ್ಕ್‌ಕ್ ಒತ್ತತೆ: ನಾಕ್ ಗೊತ್ತ್‌ಲ್ಲೆ. ನೀನ್ ಎಂತ ಎಣ್ಣ್‌ವಿಯಾ, ಅದ್ ನಾಕ್ ಅರ್ಥ ಆಪುಲೇಂದ್ ಒತ್ತತೆ ಪೊರಮೆ ಉಳ್ಳ ಪಡಿ ಮಂಟಪಕ್ ಪೋಚಿ. ಅಕ್ಕಣೆಕೆ ಮಲ್ಲಂಗೋಳಿ ಕೂಂದತ್.

⁶⁹ಪಣಿಕರ್ತಿ ಅಂವೊನ ಅಲ್ಲಿ ಪುನಃ ನೋಟಿತ್: ಅಲ್ಲಿ ನಿಂದಿತ್ ಉಳ್ಳಯಿಂಗಕ್ ಇಂವೊ ಅಯಿಂಗಡ ಕೂಟ್‌ಲ್ ಒಬ್ಬಾಂದ್ ಎಣ್ಣ್‌ಚಿ.

⁷⁰ಅನ್ನನೆ ಪುನಃ ಪೇತ್ರ ಒತ್ತತೆಯಿಂಜತ್. ಚೆನ್ನ ನೇರ ಕಯಿಂಜ ಪಿಂಞ ಅಲ್ಲಿ ನಿಂದಿತುಳ್ಳಯಿಂಗ ನೀನ್ ನೇರಾಯಿತ್ ಅಯಿಂಗಡಲ್ಲಿ ಒಬ್ಬೊನಾಯಿತ್ ಇಕ್ಕು, ನೀನ್ ಗಲಿಲಾಯ ಜಾಗತ್‍ಲ್ ಉಳ್ಳಂವೊ, ನೀಡ ತಕ್ಕ್ ಅಯಿಂಗಡ ತಕ್ಕ್‌ರನೆಕೆ ಉಂಡ್‍ೕಂದ್ ಎಣ್ಣ್‌ಚಿ.

⁷¹ಅದ್ಂಗ್ ಅಂವೊ: ನಾನ್ ಸತ್ಯ ಪರಿಯುವಿ, ನಿಂಗ ತಕ್ಕ್ ಪರಿಯುವ ಮನುಷ್ಯನ ನಾಕ್ ಗೊತ್ತ್‌ಲ್ಲೆ, ನಾನ್ ಪೊಟ್ಟ್‌ಪರಿಯುವೇಂಗಿ ನಾಡ ಮೇಲೆ ಶಾಪ ಬರಡ್‍ೕಂದ್ ಎಣ್ಣ್‌ಚಿ.

⁷²ಅಕ್ಕಣೆಕೆ ಮಲ್ಲಂಗೋಳಿ ದಂಡನೆ ಕುರಿ ಕೂಂದತ್. ಮಲ್ಲಂಗೋಳಿ ದಂಡ್ ಕುರಿ ಕೂವಾಂಗ್ ಮಿಂಞ ನನ್ನ ಮೂಂದ್ ಕುರಿ ಗೊತ್ತಿಲ್ಲೇಂದ್ ಎಣ್ಣುವಿಯಾಂದ್ ಯೇಸು ಎಣ್ಣ್‌ನದ್ ಪೇತ್ರಂಗ್ ಗೇನ ಬಂತ್ ದುಃಖಿಚಿಟ್ಟಂಡ್ ಮೊರಟತ್.