Read Kodava ಮಾರ್ಕ 15 Bible Online

ಮಾರ್ಕ 15 - Kodava bible

ಮಾರ್ಕ 15

¹ಪೊಲಾಕ ನೇರತೆ ಅವಸರ ಅವಸರತ್‌ಲ್ ಮುಕ್ಯ ಯಾಜಕಂಗಳು ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳು ಪೆರಿಯಯಿಂಗಳು ಕೂಟ್ ಕೂಡ್‍ಚಿ. ಅಲ್ಲಿಯತ್‍ರ ಯೆಹೂದ್ಯಂಗಡ ಆಲೋಚನೆ ಸಬೇಕಾರ ಕೂಡಿಯಂಡ್ ಯೇಸುನ ಎಂತ ಮಾಡಂಡು ಎಣ್ಣಿಯಂಡ್ ಯೋಚನೆ ಮಾಡಿಯಂಡ್, ಯೇಸುನ ಸರ್ಪಣಿಲ್ ಕೆಟ್ಟಿತ್, ಪೊರಮೆ ಕಾಕುವಂಜಿ ಪಿಲಾತ ರಾಜಂಡ ಪಕ್ಕ ಒಪ್ಪ್‌ಚಿಟ್ಟತ್.

²ಪಿಲಾತ ಯೇಸುನ ನೋಟಿತ್: ನೀನ್ ಯೆಹೂದ್ಯಂಗಡ ರಾಜನಾಂದ್ ಕ್‍ೕಟತ್. ಅದ್ಂಗ್ ಯೇಸು: ಅಕ್ಕು, ನೀನ್ ಎಣ್ಣ್‌ನನೆಕೇಂದ್ ಎಣ್ಣ್‌ಚಿ.

³ಅಲ್ಲಿ ಇಂಜ ಮಹಾ ಯಾಜಕಂಗ ಯೇಸುಕ್ ನಾನಾತರ ಕುತ್ತ ಪರ್ಂದಂಡಿಂಜತ್, ಆಚೇಂಗಿ ಯೇಸು ಒರ್ ತಕ್ಕು ಪರ್ಂದಿತ್‌ಲ್ಲೆ.

⁴ಅದ್ಂಗ್ ಪಿಲಾತ ಯೇಸುನ ನೋಟಿತ್: ಈಂಗ ನೀಡ ಮೇಲೆ ಎಚ್ಚಕೋ ಕುತ್ತಪರ್ಂದಡುಂಡ್, ಆಚೇಂಗಿ ನೀನ್ ಎನ್ನಂಗ್ ಒರ್ ಉತ್ತರವು ಕೊಡ್‍ತಂಡಿಲ್ಲೇಂದ್ ಕ್‍ೕಟತ್.

⁵ಆಚೇಂಗಿಯು ಯೇಸು ಒರ್ ತಕ್ಕು ಪರ್ಂದಿತ್‌ಲ್ಲೆ. ಆನಗುಂಡ್ ಪಿಲಾತಂಗ್ ಆಶ್ಚರ್ಯ ಆಚಿ.

⁶ಜನ ಕುಶಿ ಪಡುವ ಜೈಲ್‍ಲ್ ಉಳ್ಳ ಒರ್ ಕೈದಿನ ಪಸ್ಕ ನಮ್ಮೆರ ಸಮಯತ್‍ಲ್ ಬುಡುಗಡೆ ಮಾಡ್‍ವದ್ ದೇಶಾತಿಪದಿರ ಪದ್ದತಿಯಾಯಿತ್ಂಜತ್.

⁷ಕಲಹ ಮಾಡಿತ್, ಆ ಕಲಹತ್‌ಲ್ ಕೊಲೆ ಮಾಡ್‍ನ ಬರಬ್ಬ ಎಣ್ಣ್‌ವಂವೊ ಆ ಸಮಯತ್‍ಲ್ ಜೈಲ್‍ಲ್ ಇಂಜತ್.

⁸ಅಲ್ಲಿಯತ್‍ರ ಜನ ನಂಗಕ್ ಒರ್ ಮನುಷ್ಯನ ಪದ್ದತಿರ ಪ್ರಕಾರ ಬುಡಂಡೂಂದ್ ಕೂತ್ ಕೊಡ್‍ಪಕ್ ಸುರು ಮಾಡ್‍ಚಿ.

⁹ಯೇಸುರ ಮೇಲೆ ಇಂಜ ಒಟ್ಟೆಕಿಚ್ಚ್‌ಲ್ ಈ ಮುಕ್ಯ ಯಾಜಕಂಗ ಯೇಸುನ ಪುಡ್‌ಚಿತ್ ಒಪ್ಪ್‌ಚಿಟ್ಟತ್‍ೕಂದ್ ಪಿಲಾತಂಗ್ ಗೊತ್ತಾನಗುಂಡ್,

¹⁰ಯೆಹೂದ್ಯಂಗಡ ರಾಜನ ನಾನ್ ನಿಂಗಕಾಯಿತ್ ಬುಡುಗಡೆ ಮಾಡ್‌ವಕ್ ನಿಂಗಕ್ ಕುಶಿಯುಂಡಾಂದ್ ಪಿಲಾತ ಕ್‍ೕಟತ್.

¹¹ಆಚೇಂಗಿ ಮುಕ್ಯ ಯಾಜಕಂಗ ಜನಡ ಗುಂಪ್‌ಕ್ ಬರಬ್ಬನ ಜೈಲಿಂಜ ಬುಡಂಡೂಂದ್ ನಿಂಗ ಕ್‍ೕಳೀಂದ್ ಎಣ್ಣ್‌ಚಿ.

¹²ಪುನಃ ಪಿಲಾತ ಅಯಿಂಗಳ ನೋಟಿತ್: ಅನ್ನನಾಚೇಂಗಿ ಯೆಹೂದ್ಯಂಗಡ ರಾಜಾಂದ್ ನಿಂಗ ಕಾಕುವ ಇಂವೊನ ನಾನ್ ಎಂತ ಮಾಡಂಡೂಂದ್ ಕ್‍ೕಟತ್.

¹³ಜನಡ ಗುಂಪು: ಅಂವೊನ ಶಿಲುಬೇಕ್[48] ಇಡೀಂದ್ ಪುನಃ ಜೋರಾಯಿತ್ ಕೂತ್ ಕೊಡ್‍ತತ್.

¹⁴ಅಕ್ಕ ಪಿಲಾತ: ಆಚೇಂಗಿ, ಎನ್ನಂಗ್? ಅಂವೊ ಎಂತ ತಪ್ಪ್ ಮಾಡಿತುಂಡ್‍ೕಂದ್ ಕ್‍ೕಟತ್. ಆಚೇಂಗಿ ಜನ ಇಂಞು ಜೋರಾಯಿತ್: ಅಂವೊನ ಶಿಲುಬೇಕ್ ಇಡೀಂದ್ ಕೂತ್ ಕೊಡ್‍ತತ್.

¹⁵ಅಕ್ಕ ಪಿಲಾತ: ಜನಳ ಕುಶಿಪಡುತ್‌ವಕಾಯಿತ್, ಬರಬ್ಬನ ಅಯಿಂಗಕ್ ಬುಡ್‌ತಿತ್, ಯೇಸುನ ಕೊರಡ್‍ಲ್ ಪೊಜ್ಜಿತ್ ಶಿಲುಬೇಲ್ ಇಡ್‌ವಕ್ ಒಪ್ಪ್‌ಚಿಟ್ಟತ್.

¹⁶ಚೆನ್ನ ಪಡೆಯಾಳಿಯಂಗ ದೇಶಾದಿಪತಿ ಅರಮನೆರ ಒಳ್‍ಕ್ ಯೇಸುನ ಕಾಕಿಯಂಡ್ ಪೋಯಿತ್, ಇಂಞು ಉಳ್ಳ ಪಡೆಯಾಳಿಯಂಗ ಕೂಟತ್‌ನ ಕಾಕ್‍ಚಿ.

¹⁷ಚೋಂದ ರಂಗ್‍ರ ಬಟ್ಟೇನ ಯೇಸುಕ್ ಇಟ್ಟಿತ್, ಮುಳ್ಳ್ ಕಿರೀಟತ್‍ನ ಮಾಡ್‌ವಂಜಿ ಅಂವೊಂಡ ಮಂಡೆಕ್ ಇಟ್ಟತ್.

¹⁸ಅಯಿಂಗ ಯೇಸುಕ್ ಪರಿಹಾಸತ್‌ಲ್ ವಂದೆನ ಮಾಡಿತ್, ಯೆಹೂದ್ಯಂಗಡ ರಾಜನೇ ಕಾಲಕಾಲಕ್ ಬದ್‌ಕ್‍ೕಂದ್ ಎಣ್ಣ್‌ಚಿ.

¹⁹ಆ ಓಡೆ ಕೋಲ್‍ನ ಎಡ್‍ತಿತ್ ಅಂವೊಂಡ ಮಂಡೆಕ್ ಪುನಃ ಪುನಃ ಪೊಜ್ಜತ್, ಅಂವೊಂಡ ಮೇಲೆ ತುಪ್ಪಿತ್, ಪಿಂಞ ಅಯಿಂಗ ಮೊಣಕಾಲ್ ಇಟ್ಟಿತ್ ಅಯಿಂಗಡ ಮಂಡೆನ ಬಗ್ಗ್‌ಚಿಟ್ಟತ್.

²⁰ಇಚ್ಚಕೆಲ್ಲಾ ಪರಿಹಾಸ ಮಾಡ್‍ನ ಪಿಂಞ ಅಂವೊಂಡ ಚೋಂದ ರಂಗ್‍ರ ಬಲ್ಯ ಬಟ್ಟೇನ ಉತ್ತ್‌ವಂಜಿ, ಅಂವೊಂಡ ಬಟ್ಟೇನ ಇಟ್ಟಿತ್, ಶಿಲುಬೇಲ್ ಕೊಲ್ಲ್‌ವಕಾಯಿತ್ ಪೊರಮೆ ಕಾಕಿಯಂಡ್ ಪೋಚಿ.

²¹ಯೇಸುನ ಕೊಲ್ಲುವಕ್ ಕಾಕಿಯಂಡ್ ಪೋಯಂಡಿಪ್ಪಕ, ಬಟ್ಟೇಲ್, ಕುರೇನ್ಯ ಊರಿಂಜ ಬಂದಡಿಂಜ ಸೀಮೋನನ ಕಂಡತ್. ಅಂವೊ ಅಲೆಕ್ಸಾಂದ್ರ ಪಿಂಞ ರೂಫ ಎಣ್ಣುವಯಿಂಗಡ ಅಪ್ಪ. ಸಿಪಾಯಿಯ ಅಂವೊನ ಒತ್ತಾಯ ಮಾಡಿತ್ ಯೇಸುರ ಶಿಲುಬೇನ ಎಡ್‍ತಂಡ್ ಪೋಪಕ್ ಎಣ್ಣ್‌ಚಿ.

²²ಯೇಸುನ ಕಪಾಲಸ್ಥಳಾಂದ್ ಅರ್ಥ ಆಪ ಗೊಲ್ಗೊಥಾ ಎಣ್ಣುವ ಜಾಗಕ್ ಕಾಕಿಯಂಡ್ ಪೋಚಿ.

²³ಅಲ್ಲಿ ರಕ್ತಬೋಳ[49] ಕಲ್‌ಕ್‌ನ ದ್ರಾಕ್ಷಿರಸತ್‍ನ ಕೊಡ್‍ತತ್. ಯೇಸು ಅದ್‍ನ ಕುಡಿಚಿತಿಲ್ಲೆ.

²⁴ಅಕ್ಕ ಅಂವೊನ ಶಿಲುಬೇಕ್ ಇಟ್ಟತ್. ಯೇಸುರ ಬಟ್ಟೇನ ಬಾಗ ಮಾಡಿತ್, ಅಯಿಂಗ ಚೀಟಿ ಇಟ್ಟಿತ್ ದಾರ್‌ಕ್ ಎದೇದ್ ಬಟ್ಟೆ ಕ್‍ಟ್ಟುವ ಎಣ್ಣಿಯಂಡ್ ನೋಟಿತ್ ಎಡ್‍ತಂಡತ್.

²⁵ಪೊಲಾಕ ಒಯಿಂಬದ್ ಗಂಟೆಕ್ ಅಂವೊನ ಶಿಲುಬೇಕ್ ಇಟ್ಟತ್.

²⁶ಅಂವೊಂಗ್ ಕ್‍ಟ್ಟ್‌ನ ಶಿಕ್ಷೆನ ಕಾಟ್‌ವಕಾಯಿತ್, ಇಂವೊ ಯೆಹೂದ್ಯಂಗಡ ರಾಜ ಎಣ್ಣಿಯಂಡ್ ಒಳ್‍ದಿ ಶಿಲುಬೇರ ಮೇಲೆ ಕೆಟ್ಟಿ ಬೆಚ್ಚತ್.

²⁷ಅದಲ್ಲತೆ ಇಂಞು ದಂಡ್ ಕಳ್ಳಂಗಳ ಯೇಸುರ ಬಲ್‌ತೆ ಬರಿಲ್ ಒಬ್ಬನ, ಎಡ್‍ತೆ ಬರಿಲ್ ಒಬ್ಬನ ಶಿಲುಬೇಕ್ ಇಟ್ಟತ್.

²⁸ಕಳ್ಳಂಗಡ ಕೂಡೆ ಒಬ್ಬನಾಯಿತ್ ಗೇನ ಮಾಡ್‌ವಾಂದ್ ಎಣ್ಣುವ ದೇವಡ ವಾಕ್ಯ ಅಕ್ಕ ಪೂರ್ತಿಯಾಚಿ.

²⁹ಅಲ್ಲಿ ಪೋಯಂಡಿಂಜ ಜನ ಮಂಡೆನ ಕುಲ್‍ಕಿತ್ ಯೇಸುನ ಅವಮಾನ ಮಾಡಿತ್, ಆಹಾ! ದೇವಾಲಯತ್‍ನ ಪೊಳಿಪಂಜಿ ಮೂಂದ್ ದಿವಸತ್‍ಲ್ ಪುನಃ ಕೆಟ್ಟ್‌ವೀಂದ್ ಎಣ್ಣಿಯಲ್ಲಾ?

³⁰ಇಕ್ಕ ನಿನ್ನ ಬಚಾವ್ ಮಾಡಿತ್ ಶಿಲುಬೆಯಿಂಜ ಇಳ್ಂಜಿತ್ ಬಾಂದ್ ಕೆಣಕಿಯಂಡಿಂಜತ್.

³¹ಅನ್ನನೆ, ಮುಕ್ಯ ಯಾಜಕಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ: ನೀನ್ ಬೋರೆಯಿಂಗಳ ಬಚಾವ್ ಮ‌ಡಿಯ ಆಚೇಂಗಿ ನಿನ್ನ ನೀಕ್ ಇಕ್ಕ ಬಚಾವ್ ಮಾಡ್‌ವಕ್ ಕಯ್ಯುಲೆ ಎಣ್ಣಿಯಂಡ್ ಅಯಿಂಗಯಿಂಗಳೇ ಕೆಣಕಿಯಂಡ್ ತಕ್ಕ್ ಪರ್ಂದತ್.

³²ಇಸ್ರಾಯೇಲ್‍ರ ರಾಜಾಂದ್ ಎಣ್ಣುವ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ[50] ಇಕ್ಕ ಶಿಲುಬೆಯಿಂಜ ಇಳಿಂಜಿತ್ ಬಂದತೇಂಗಿ ನಂಗ ಅಂವೊನ ನಂಬಲೂಂದ್ ಎಣ್ಣ್‌ಚಿ. ಯೇಸುರ ಕೂಡೆ ಶಿಲುಬೇಕ್ ಇಟ್ಟ ದಂಡ್ ಕಳ್ಳಂಗಳು ಯೇಸುನ ಅದೇ ಪ್ರಕಾರ ನಿಂದನೆ ಮಾಡ್‍ಚಿ.

³³ಮಜ್ಜಣ ಪನ್ನೆರಂಡ್ ಗಂಟೆಯಿಂಜ ಮೂಂದ್ ಗಂಟೆಕತ್ತನೆ ದೇಶ ಪೂರ್ತಿ ಇರ್‌ಟಾಚಿ.

³⁴ಮೂಂದ್ ಗಂಟೆಕ್ ಯೇಸು: ಎಲೋಹಿ, ಎಲೋಹಿ, ಲಮಾ ಸಬಕ್ತಾನೀ ಎಣ್ಣಿಯಂಡ್ ಜೋರಾಯಿತ್ ಕೂತ್ ಕೊಡ್‍ತತ್. ಅದ್ಂಗ್ ನಾಡ ದೇವ, ನಾಡ ದೇವ, ಎನ್ನಂಗಾಯಿತ್ ನೀನ್ ನನ್ನ ಕೈ ಬುಟ್ಟಿಯೇಂದ್ ಅರ್ಥ.[51]

³⁵ಅಲ್ಲಿ ಉಳ್ಳ ಚೆನ್ನ ಜನ ಅದ್‍ನ ಕ್‍ೕಟಿತ್: ನೋಟಿ ಇಂವೊ ಎಲೀಯನ ಕಾಕಿಯಂಡ್ ಉಂಡ್‍ೕಂದ್ ಎಣ್ಣ್‌ಚಿ.

³⁶ಒರ್ ಮನುಷ್ಯ ಸಮುದ್ರತ್‍ಲ್ ಕ್‍ಟ್ಟುವ ಒರ್ ತರ ಪಾಚಿನ ಪುಳಿಯಾಯಿತುಳ್ಳ ದ್ರಾಕ್ಷಿರಸಕ್ ಮುಕ್ಕುವಂಜಿ ಒರ್ ಕೋಲ್‌ರ ತುದಿಲ್ ಬೆಪ್ಪಂಜಿ ಯೇಸುರ ಕಿರಿರ ಪಕ್ಕ ಮುಟ್ಟಿತ್: ಇಕ್ಕ ಎಲೀಯ ಬಂದಿತ್ ಇಂವೊನ ಶಿಲುಬೆಯಿಂಜ ಅಡಿಕ್ ಕೊಂಡ್ ಬಂದಿತ್ ಬಚಾವ್ ಮಾಡ್‍ವೋಂದ್ ನೋಟನಾಂದ್ ಎಣ್ಣ್‌ಚಿ.

³⁷ಯೇಸು ಜೋರಾಯಿತ್ ಕೂತ್ ಕೊಡ್‌ಪಂಜಿ ಜೀವ ಬುಟ್ಟತ್.

³⁸ಅಕ್ಕ, ದೇವಾಲಯತ್‍ಲ್ ಇಂಜ ಪಡಿರ ಬಟ್ಟೆ ದಂಡ್ ಬಾಗವಾಯಿತ್ ಕೊಡಿಯಿಂಜ ಅಡಿಕತ್ತನೆ ಕೀತಿ ಪೋಚಿ.

³⁹ಶಿಲುಬೇರ ಎದ್‍ರ್‌ಲ್ ನಿಂದಂಡಿಂಜ ನೂರ್ ಪಡೆಯಾಳಿಯಡ ಅದಿಕಾರಿ, ಯೇಸು ಇನ್ನನೆ ಕೂತ್ ಕೊಡ್‌ತಿತ್ ಜೀವ ಬುಟ್ಟದ್‌ನ ನೋಟಿತ್, ಈ ಮನುಷ್ಯ ನೇರಾಯಿತು ದೇವಡ ಮೋಂವೋಂದ್ ಎಣ್ಣ್‌ಚಿ.

⁴⁰ಚೆನ್ನ ಪೊಣ್ಣಾಳುವ ದೂರತ್ಂಜ ನೋಟಿಯಂಡಿಂಜತ್. ಅಯಿಂಗೆಲ್ಲಾ ದಾರ್ ಎಣ್ಣ್‌ಚೇಂಗಿ, ಯೇಸು ಗಲಿಲಾಯತ್‍ಲ್ ಇಪ್ಪಕಾಪಕ, ಅಂವೊಂಗ್ ಸಹಾಯ ಮಾಡಿತ್, ಅಂವೊಂಡ ಬೆಂಬರತ್‌ಲ್ ಬಂದ, ಮಗ್ದಲ ಮರಿಯ, ಚೆರಿಯ ಯಾಕೋಬ ಪಿಂಞ ಯೋಸೇಯ ಎಣ್ಣುವಯಿಂಗಡ ಅವ್ವ ಮರಿಯ ಪಿಂಞ ಸಲೋಮಿ ಎಣ್ಣ್‌ವಯಿಂಗಳೇ.

⁴¹ಯೆರೂಸಲೇಮ್ಂಜ ಬಂದ ಬೋರೆ ದುಂಬ ಪೊಣ್ಣಾಳುವ ಅಯಿಂಗಡ ಕೂಡೆ ಇಂಜತ್.

⁴²ಸಬ್ಬತ್ ದಿವಸಕ್ ಮಿಂಞತ್‍ರ ದಿವಸ ತಯಾರ್ ನಾಳಾಯಿತ್ಂಜಗುಂಡ್, ಅಲ್ಲಿಯತ್‍ರ ಸಬೆರ ಒರ್ ಮರ್ಯಾದೆ ಉಳ್ಳ ಮನುಷ್ಯ ಇಂಜತ್. ಅಂವೊ ದೇವಡ ರಾಜ್ಯ ಬಪ್ಪಕ್ ಪಾರಕಾತಂಡಿಂಜತ್. ಅರಿಮಥಾಯ ಊರ್‍ಂಜ ಬಂದ ಯೋಸೇಫ ಎಣ್ಣುವ ಇಂವೊ ಒರ್ ಪೋಡಿಯು ಇಲ್ಲತೆ ಪಿಲಾತ ರಾಜಂಡ ಪಕ್ಕ ಪೋಯಿತ್ ಚತ್ತ್‌ಪೋನ ಯೇಸುರ ಚಾವ್ ತಡೀನ ಕ್‍ೕಟತ್.

⁴³

⁴⁴ಯೇಸು ಇಚ್ಚಕ್ ಬೆರಿಯ ಚತ್ತ್ ಪೋಚೀಂದ್ ಉಳ್ಳ ವಿಷಯತ್‍ನ ಕ್‍ೕಟಿತ್ ಪಿಲಾತಂಗ್ ಆಶ್ಚರ್ಯ ಆಚಿ. ನೂರ್ ಪಡೆಯಾಳಿಯಡ ಅದಿಕಾರಿನ ಕಾಕಿತ್ ಯೇಸು ಇಚ್ಚಕ್ ಬೆರಿಯ ಚತ್ತ್ ಪೋಚಾಂದ್ ಪಿಲಾತ ಕ್‍ೕಟತ್.

⁴⁵ನೂರ್ ಪಡೆಯಾಳಿಯಡ ಅದಿಕಾರಿಯಡ ತಕ್ಕ್ ಕ್‍ೕಪಂಜಿ, ಯೋಸೇಫಂಗ್ ನೀನ್ ಯೇಸುರ ಚಾವ್ ತಡೀನ ಎಡ್‍ತಾಂದ್ ಪಿಲಾತ ಎಣ್ಣ್‌ಚಿ.

⁴⁶ಯೋಸೇಫ ಒರ್ ನಾರ್ ಬಟ್ಟೇನ ಕೊಂಡ್‌ಬಂತ್, ಯೇಸುರ ಚಾವ್ ತಡೀನ ಶಿಲುಬೆಯಿಂಜ ಅಡಿಕ್ ಕೊಂಡ್‌ಬಂತ್, ಆ ಬಟ್ಟೇಲ್ ಸುತ್ತಿತ್, ಒರ್ ಪಾರೆಕಲ್ಲ್‌ರಗುಂಡ್ ಕೆತ್ತಿತ್ಂಜ ಗೋರಿರ ಒಳ್‍ಕ್, ಚತ್ತ್‌ಪೋನ ಯೇಸುರ ಚಾವ್ ತಡೀನ ಬೆಚ್ಚತ್. ಆ ಬಂಡೆ ಗೋರಿರ ಮುಂಬಾಗತ್‌ಲ್ ಒರ್ ಬಲ್ಯ ಪಾರೆಕಲ್ಲ್‌ನ ಉರ್‌ಟಿಯಂಡ್ ಬಂತ್ ಮುಚ್ಚತ್.

⁴⁷ಅಂವೊಂಡ ಚಾವ್ ತಡೀನ ಬೆಚ್ಚ ಜಾಗತ್‍ನ ಮಗ್ದಲ ಮರಿಯಳು, ಯೇಸುರ ಅವ್ವ ಮರಿಯಳು ನೋಟಿಯಂಡ್ ಇಂಜತ್.