Read Kodava ಮಾರ್ಕ 16 Bible Online

ಮಾರ್ಕ 16 - Kodava bible

ಮಾರ್ಕ 16

¹ಸಬ್ಬತ್ ದಿವಸ ಕಯಿಂಜ ಪಿಂಞ ಮಗ್ದಲ ಮರಿಯ, ಯಾಕೋಬಂಡ ಅವ್ವನಾನ ಮರಿಯ ಪಿಂಞ ಸಲೋಮಿ ಈಂಗೆಲ್ಲಾ ಯೇಸುರ ಚಾವ್ ತಡಿಕ್ ಸುಗಂದ ವಾಸನೆರ ಮದ್ದ್‌ನ ಇಡ್‌ವಕ್ ಬಾತ್.

²ವಾರತ್‍ರ ಆದ್ಯ ದಿವಸ ಪೊಲಾಕ ನೇರತೆ ಸೂರ್ಯ ಉದಿಪಕ್ ಮಿಂಞಲೇ ಯೇಸುರ ಚಾವ್ ತಡೀನ ಬೆಚ್ಚಿತ್ಂಜ ಗೋರಿಕ್ ಬಪ್ಪಕ,

³ಪಡಿಕ್ ಮುಚ್ಚ್‌ನ ಬಲ್ಯ ಪಾರೆಕಲ್ಲ್‌ನ ದಾರ್ ನಂಗಕ್ ದೂಡಿತ್ ತಪ್ಪ ಎಣ್ಣಿಯಂಡ್ ಅಯಿಂಗಯಿಂಗಳೇ ಬಟ್ಟೇಲ್ ತಕ್ಕ್ ಪರ್‌ದಂಡ್ ಬಂದಂಡಿಂಜತ್.

⁴ಅಯಿಂಗ ಗೋರಿನ ನೋಟ್‍ವಕ, ಆ ಬಲ್ಯ ಪಾರೆಕಲ್ಲ್‌ನ ಉರಿಟಿತ್ ತೊರ್‌ಂದ್ ಬಚ್ಚಿತ್ಂಜಾನ ಕಂಡತ್.

⁵ಅಯಿಂಗ ಒಳ್‍ಕ್ ಪೋಯಿತ್ ಬಲ್‌ತೆ ಬರಿಲ್ ಒರ್ ಬಾಲೆಕಾರ ಬೊಳ್‍ತ ಬಟ್ಟೆ ಇಟ್ಟಂಡ್ ಅಳ್‌ತಂಡಿಂಜಾನ ಕಂಡಿತ್ ಪೋಡಿ ಆಚಿ.

⁶ಅಂವೊ, ನಿಂಗ ಬೊತ್ತತಿ! ಶಿಲುಬೇಕ್ ಇಟ್ಟ ನಜರೇತ್‍ರ ಯೇಸುನ ತ್‍ೕ‌ಡಿಯೇಂಡುಳ್ಳಿರ. ಅಂವೊ ಇಲ್ಲಿ ಇಲ್ಲೆ. ಅಂವೊ ಚಾವ್‍ಯಿಂಜ ಜೀವವಾಯಿತ್ ಎದ್ದತ್. ನೋಟಿ! ಅಂವೊನ ಈ ಜಾಗತ್‍ಲ್ ಬೆಚ್ಚಿತ್ಂಜತ್.

⁷ಅಂವೊಂಡ ಶಿಷ್ಯಂಗಕ್, ಪೇತ್ರಂಗ್ ಈ ಸುದ್ದಿನ ಪೋಯಿತ್ ಎಣ್ಣಿ. ನಿಂಗಕ್ ಮಿಂಞ ಅಂವೊ ಗಲಿಲಾಯಕ್ ಪೋಯಂಡುಂಡ್. ಅಂವೊ ನಿಂಗಕ್ ಎಣ್ಣ್‌ನನೆಕೆ ನಿಂಗ ಅಂವೊನ ಅಲ್ಲಿ ಕಾಂಬಿರಾಂದ್ ಅಯಿಂಗಕ್ ಎಣ್ಣುವಿರ.

⁸ಅಯಿಂಗ ಪೊರಮೆ ಬಾತ್. ಅಯಿಂಗ ಅಲ್ಲಿಂಜ ಗಾಬರಿಯಾಯಿತ್ ಪೋಡಿಲ್ ಓಡಿ ಪೋಚಿ. ಅಯಿಂಗಕ್ ದುಂಬ ಪೋಡಿ ಆಯಿತ್ಂಜಗುಂಡ್ ದಾರ್‌ಕು ಒರ್ ತಕ್ಕು ಪರ್ಂದಿತ್‌ಲ್ಲೆ.

⁹[52] ವಾರತ್‍ರ ಆದ್ಯ ನಾಳಾಯಿತ್ಂಜ ನಾರಾಚೆ ಪೊಲಾಕ ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್, ಆದ್ಯವಾಯಿತ್ ಮಗ್ದಲದ ಮರಿಯಕ್ ಯೇಸು ಅಂವೊನ ಕಾಂಬ್‌ಚಿಟ್ಟಂಡತ್.

¹⁰ಅವಡ ಮೇಲ್‍ಲ್‍ಯಿಂಜ ಏಳ್ ಕೂಳಿಯಳ ಬುಡ್‌ತಿತ್ಂಜತ್. ಯೇಸುರ ಕೂಟ್‌ಕಾರಂಗ ಎಲ್ಲಾರು ದುಃಖತ್‍ಲ್ ಮೊರಟಂಡ್ ಇಪ್ಪಕ, ಅವ ಪೋಯಿತ್ ಈ ಸುದ್ದಿನ ಎಣ್ಣ್‌ಚಿ.

¹¹ಯೇಸು ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬದ್‍ಕಿಯಂಡುಂಡ್‍ೕಂದ್, ಅವಕ್ ಅಂವೊ ಕಾಂಬ್‍ಚಿಟ್ಟಂಡತ್‍ೕಂದ್ ಎಣ್ಣ್‌ವಕ ದಾರೂ ನಂಬಿತ್‌ಲ್ಲೆ.

¹²ಪಿಂಞ ದಂಡ್ ಶಿಷ್ಯಂಗ ಒರ್ ಗ್ರಾಮಕ್ ನಡ್ಂದಂಡ್ ಪೋಯಂಡಿಪ್ಪಕ ಅಯಿಂಗಕ್ ಅಂವೊನ ಬೋರೆ ತರತ್‍ಲ್ ಕಾಂಬ್‌ಚಿಟ್ಟಂಡತ್.

¹³ಅಯಿಂಗಳು ಪೋಯಿತ್ ನಂಗ ಯೇಸುನ ಕಂಡತ್ ಎಣ್ಣುವಕಾಪಕ ದಾರೂ ನಂಬಿತ್‌ಲ್ಲೆ.

¹⁴ಕಡೇಕ್ ಅಂವೊಂಡ ಪನ್ನಂದ್ ಶಿಷ್ಯಂಗ ಉಂಬಕ್ ಅಳ್‌ತಂಡಿಪ್ಪಕ ಯೇಸು ಪ್ರತ್ಯಕ್ಷವಾಚಿ. ಚಾವ್‍ಯಿಂಜ ಜೀವವಾಯಿತ್ ಎದ್ದ ನನ್ನ ಕಂಡಯಿಂಗ ನಿಂಗಕ್ ಬಂದಿತ್ ಎಣ್ಣುವಕಾಪಕ ನಿಂಗ ಅದ್‍ನ ನಂಬುವಕಿಂಜಿಲೆ. ಅಯಿಂಗಕ್ ನಂಬಿಕೆ ಬರತೆಗುಂಡ್ ಪಿಂಞ ಅಯಿಂಗಡ ಹೃದಯ ಅಚ್ಚಕ್ ಕಠಿಣ ಆಯಿತ್ಂಜಗುಂಡ್ ಯೇಸು ಅಯಿಂಗಳ ಜೋರ್ ಮಾಡ್‍ಚಿ.

¹⁵ಪಿಂಞ, ಅಂವೊ ಅಯಿಂಗಳ ನೋಟಿತ್: ನಿಂಗ ಬೂಲೋಕವೆಲ್ಲಾ ಪೋಯಿತ್ ದೇವಡ ನಲ್ಲ ಸುದ್ದಿನ ಎಲ್ಲಾ ಜನಕು ಪ್ರಚಾರ ಮಾಡಿ.

¹⁶ದಾರೆಲ್ಲಾ ನಿಂಗ ಎಣ್ಣ್‌ವಾನ ನಂಬಿತ್ ದೀಕ್ಷಾಸ್ನಾನ ಎಡ್‌ಪ ಅಯಿಂಗಕೆಲ್ಲ ರಕ್ಷಣೆ ಕ್‍ಟ್ಟ್‌ವ. ದಾರೆಲ್ಲಾ ನಂಬುಲೆ, ಅಯಿಂಗಕೆಲ್ಲ ಶಿಕ್ಷೆ ಕ್‍ಟ್ಟ್‌ವ.

¹⁷ನಂಬಿಕೆ ಉಳ್ಳಯಿಂಗಕ್ ಅದ್ಬುತ ಕಾರ್ಯ ಮಾಡ್‌ವಕ್ ನಾನ್ ಶಕ್ತಿ ಕೊಡ್‍ಪಿ. ನಾಡ ಪೆದತ್‍ಲ್ ಅಯಿಂಗ ಕೂಳಿ ಬುಡ್‌ತ್‌ವ, ಪುದಿಯ ತಕ್ಕ್‌ಲ್ ತಕ್ಕ್ ಪರಿಯುವ.

¹⁸ಅಯಿಂಗ ಪಾಂಬ್‍ನ ಪುಡ್‌ಚತೇಂಗಿಯೂ, ವಿಷ ಕುಡಿಚತೇಂಗಿಯೂ ಅಯಿಂಗಕ್ ಒಂದು ಆಪುಲೆ. ಕಾಯಿಲೆ ಬಂದ ಜನಡಮೇಲೆ ಕೈ ಬೆಚ್ಚತೇಂಗಿ ಅಯಿಂಗ ವಾಸಿ ಆಪಾಂದ್ ಅಂವೊ ಎಣ್ಣ್‌ಚಿ.

¹⁹ಇದ್‍ನೆಲ್ಲಾ ಒಡೆಯನಾನ ಯೇಸು ತಕ್ಕ್ ಪರ್ಂದಿತ್ ಆನ ಪಿಂಞ ಅಂವೊನ ಪರಲೋಕಕ್ ಎಡ್‍ತಂಡ್ ಪೋಚಿ, ಅಂವೊ ದೇವಡ ಬಲ್‌ತೆ ಬರಿಲ್ ಅಳ್‌ತತ್.

²⁰ಶಿಷ್ಯಂಗ ಎಲ್ಲಾ ಜಾಗಕ್ ಪೋಯಿತ್ ಪ್ರಚಾರ ಮಾಡ್‍ಚಿ. ದೇವ ಅಯಿಂಗಡ ಕೂಡೆ ಇಂಜತ್, ಅಯಿಂಗ ಬೋದನೆ ಮಾಡ್‍ವದ್ ಸತ್ಯಾಂದ್ ಅಯಿಂಗ ಮಾಡ್‌ವ ಅದ್ಬುತ ಕಾರ್ಯತ್ಂಜ ಅಂವೊ ಕಾಟಿಕೊಡ್‍ತತ್. ಆಮೆನ್.