Read Kodava ಮಾರ್ಕ 2 Bible Online

ಮಾರ್ಕ 2 - Kodava bible

ಮಾರ್ಕ 2

¹ಚೆನ್ನ ದಿವಸ ಕಯಿಂಜ ಪಿಂಞ ಯೇಸು ಕಪೆರ್ನೌಮ್‍ಕ್ ಪೋಚಿ. ಅಂವೊ ಮನೆಲ್ ಉಂಡ್‍ೕಂದ್ ಎಲ್ಲಾರ್‌ಕು ಗೊತ್ತಾಚಿ.

²ಅಂವೊಂಡ ಮನೆಕ್ ದುಂಬ ಜನ ಬಂದಿತ್ ಕೂಡ್‍ಚಿ. ಮನೆರ ಒಳ್‍ಲ್, ಬಾಯಿಕಂಡಿಲ್ ಜನ ದುಂಬ್‌ನಗುಂಡ್ ಪೊರಮೆ ಕಂಡಿಲ್ ಸಹ ಜಾಗ ಇಲ್ಲತಾಚಿ. ಯೇಸು ಅಯಿಂಗಕ್ ದೇವಡ ವಿಷಯತ್‍ನ ಬೋದನೆ ಮಾಡಿಯಂಡ್ ಇಂಜತ್.

³ಅಕ್ಕಣೆಕ್ ನಾಲ್ ಜನ ಪಾರ್ಶ್ವವಾಯುಲ್ ನರಳಿಯಂಡಿಂಜ ಒರ್ ಮನುಷ್ಯನ ಯೇಸುರ ಪಕ್ಕ ಕೊಂಡ್ ಬಾತ್.

⁴ದುಂಬ ಜನ ಇಂಜಗುಂಡ್ ಆ ಮನುಷ್ಯನ ಯೇಸುರ ಪಕ್ಕ ಎಡ್‌ತ ಪೋಪಕ್ ಕಯ್ಯತಾಚಿ. ಅಕ್ಕ ಅಯಿಂಗ ಮೋಂದಾಯತ್‌ನ ತೂತ ಮಾಡಿತ್, ಆ ಮನುಷ್ಯ ಬುದ್ದಡಿಂಜ ಕಡ್‌ಕೆನ ಅಡಿಕ್ ಇಳ್‌ಪ್‍ಚಿ.

⁵ಯೇಸು ಅಯಿಂಗಡ ನಂಬಿಕೇನ ಕಂಡಿತ್, ಆ ಮನುಷ್ಯಂಗ್: ನಾಡ ಮೋನೇ, ನೀಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಎಣ್ಣ್‌ಚಿ.

⁶ಅಲ್ಲಿ ಇಂಜ ನ್ಯಾಯಪ್ರಮಾಣತ್‍ರ ಚೆನ್ನ ಉಪಾದ್ಯಂಗ: ಈ ಮನುಷ್ಯ ಎನ್ನನೆ ಇಂತ ತಕ್ಕ್‌ನೆಲ್ಲ ಪರಿವಾಂದ್ ಗೇನ ಮಾಡಿಯಂಡ್ ಇಂಜತ್.

⁷ಇದ್ ದೇವ ದೂಷಣೆ! ದೇವಕ್ ಮಾತ್ರ ಮನುಷ್ಯಂಡ ಪಾಪತ್‍ನ ಮನ್ನಿಚಿಡ್‌ವಕ್ ಕಯ್ಯು.

⁸ಅಕ್ಕಣೆ ಯೇಸುಕ್ ಈ ಮನುಷ್ಯಂಗ ಎಂತ ಗೇನ ಮಾಡಿಯಂಡುಂಡ್‍ೕಂದ್ ಗೊತ್ತಾನಗುಂಡ್, ಅಯಿಂಗಳ ನೋಟಿತ್: ಎನ್ನಂಗ್ ನಿಂಗ ಇಂತದೆಲ್ಲ ಗೇನ ಮಾಡ್‌ವಿರಾಂದ್ ಯೇಸು ಕ್‍ೕಟತ್.

⁹ಒರ್ ಪಾರ್ಶ್ವವಾಯುಲ್ ನರಳಿಯಂಡ್ ಉಳ್ಳ ಮನುಷ್ಯಂಗ್, ನೀಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಎಣ್ಣ್‌ವಕ್ ಸುಲಬವಾ, ಇಲ್ಲತಪೋನಕ ನೀಡ ಕಾಯಿಲೆ ವಾಸಿ ಆಚಿ ಏಳ್, ನೀಡ ಕಡ್‌ಕೆನ ಸುತ್ತುವಂಜಿ ನಡೇಂದ್ ಎಣ್ಣ್‌ವಕ್ ಸುಲಬವಾ?

¹⁰ಮನುಷ್ಯಂಗಡ ಪಾಪತ್‍ನ ಮನ್ನಿಚಿಡ್‌ವಕ್ ಮನುಷ್ಯಕುಮಾರಂಗ್ ಈ ಬೂಮಿಲ್ ಅದಿಕಾರ ಉಂಡ್‍ೕಂದ್ ನಾನ್ ನಿಂಗಕ್ ಕಾಟಿತಪ್ಪೀಂದ್ ಎಣ್ಣಿತ್, ಯೇಸು ಕಾಯಿಲೆಲ್ ಇಂಜ ಮನುಷ್ಯನ ನೋಟಿತ್:

¹¹ಏಳ್, ನೀಡ ಕಡ್‌ಕೆನ ಎಡ್‍ತಂಡ್, ನೀಡ ಮನೆಕ್ ಪೋಂದ್ ಎಣ್ಣ್‌ಚಿ.

¹²ಅಕ್ಕಣೆಕ್, ಆ ಮನುಷ್ಯ ಎದ್ದಿತ್ ತಾಂಡ ಕಡ್‌ಕೆನ ಸುತ್ತಿಯಂಡ್ ಎಲ್ಲಾಡ ಮಿಂಞತ್ ನಡ್ಂದ್ ಪೋಚಿ. ಅಕ್ಕ ಅಲ್ಲಿ ಉಳ್ಳ ಜನ ಎಲ್ಲಾರು ಆಶ್ಚರ್ಯ ಪಟ್ಟಿತ್, ಇಂತ ಒರ್ ಅದ್ಬುತ ಕಾರ್ಯತ್‍ನ ನಂಗ ಕಂಡಿತೇ ಇಲ್ಲೇಂದ್ ಎಣ್ಣಿತ್, ದೇವನ ತುದಿಪಕ್ ಸುರು ಮಾಡ್‍ಚಿ.

¹³ಯೇಸು ಗಲಿಲಾಯ ಎಣ್ಣುವ ಕೆರೆರ ಕರೆಕ್ ಪುನಃ ಪೋಚಿ. ಅಂವೊಂಡ ಪಕ್ಕ ದುಂಬ ಜನ ಬಾತ್; ಅಂವೊ ಅಯಿಂಗಕ್ ಬೋದನೆ ಮಾಡ್‍ಚಿ.

¹⁴ಯೇಸು ಅನ್ನನೆ ನಡ್‌ದಂಡ್ ಪೋಯಂಡ್ ಇಪ್ಪಕ ಅಲ್ಫಾಯ ಎಣ್ಣ್‌ವಂವೊಂಡ ಮೋಂವೊ ಲೇವಿ ಎಣ್ಣ್‌ವಂವೊ ಅಂವೊಂಡ ಕಂದಾಯ ಎಡ್‌ಪ ಕಛೇರಿಲ್ ಅಳ್‌ತಂಡಿಪ್ಪದ್‍ನ ಕಂಡತ್. ಯೇಸು ಅಂವೊನ ಕಂಡದು ನಾಡ ಬಯ್ಯ ಬಾಂದ್ ಎಣ್ಣ್‌ಚಿ. ಅಕ್ಕ ಅಂವೊ ಎದ್ದಿತ್ ಅಂವೊಂಡ ಬಯ್ಯಕ್ ಪೋಚಿ.

¹⁵ಬಯ್ಯಂಜಿ ಯೇಸುಕ್ ಲೇವಿರ ಮನೆಲ್ ಗದ್ದಾಳ ಇಂಜತ್. ಲೇವಿರ ಮನೆಲ್ ದುಂಬ ಕಂದಾಯ ಎಡ್‌ಪ ಜನ ಪಿಂಞ ಸಮಾಜ ಪಾಪೀಂದ್ ಎಣ್ಣ್‌ವಂತ ಜನ ಅಲ್ಲಿಕ್ ಬಂದಿತ್ ಅಂವೊಂಡ ಕೂಡೆ ಪಿಂಞ ಶಿಷ್ಯಂಗಡ ಕೂಡೆ ಉಂಬಕಿಂಜತ್.

¹⁶ಯೇಸು ಕಂದಾಯ ಎಡ್‌ಪಂವೊ ಪಿಂಞ ಸಮಾಜ ಪಾಪೀಂದ್ ಎಣ್ಣ್‌ವ ಜನಡ ಕೂಡೆ ಉಂಬದ್‌ನ ನ್ಯಾಯಪ್ರಮಾಣತ್‍ರ ಉಪಾದ್ಯಾಂಗಳಾನ ಫರಿಸಾಯಂಗ ನೋಟಿತ್, ಯೇಸುರ ಶಿಷ್ಯಂಗಡ ಪಕ್ಕ: ಎನ್ನಂಗ್ ಅಂವೊ ಕಂದಾಯ ಎಡ್‍ಪಯಿಂಗ ಪಿಂಞ ಸಮಾಜ ಪಾಪಿಯಿಂಗಾಂದ್ ಎಣ್ಣುವ ಜನಡ ಕೂಡೆ ಉಂಬಾಂದ್ ಕ್‍ೕಟತ್.

¹⁷ಯೇಸು ಅಯಿಂಗಡ ತಕ್ಕ್‌ನ ಕ್‍ೕಟಿತ್, ಅಂತು, ದಾರ್ ಸೌಕ್ಯತ್‌ಲ್ ಉಂಡೋ ಅಯಿಂಗಕ್ ವೈದ್ಯ ಬೋಂಡ, ದಾರ್‌ಕ್ ಸೌಕ್ಯ ಇಲ್ಲತೆ ಉಂಡೋ ಅಯಿಂಗಕ್ ಮಾತ್ರ ವೈದೈಂಗ ಬೋಂಡಿಯೆ. ನೀತಿವಂತಯಿಂಗಳ ಅಲ್ಲ, ಆಚೇಂಗಿ ಪಾಪಿಯಳ ಕಾಕಿಯಂಡ್ ಪೋಪಕಾಯಿತೇ ನಾನ್ ಬಂದಿಯೇಂದ್ ಎಣ್ಣ್‌ಚಿ.

¹⁸ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಶಿಷ್ಯಂಗ ಪಿಂಞ ಫರಿಸಾಯಂಗ ಪಟ್ಟಣಿ ನಿಂದತ್. ಚೆನ್ನ ಜನ ಯೇಸುರ ಪಕ್ಕ ಬಂತ್, ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಶಿಷ್ಯಂಗ ಪಿಂಞ ಫರಿಸಾಯಂಗಡ ಶಿಷ್ಯಂಗ ಪಟ್ಟಣಿ ನಿಂದತಲ್ಲ, ಆಚೇಂಗಿ ನೀಡ ಶಿಷ್ಯಂಗ ಪಟ್ಟಣಿ ನಿಂದಿತ್‌ಲ್ಲೆಲ್ಲಾಂದ್ ಕ್‍ೕಟತ್.

¹⁹ಅದ್ಂಗ್ ಯೇಸು: ಮಂಗಲಕಾರ ಅಯಿಂಗಡ ಕೂಡೆ ಇಪ್ಪಕಾಪಕ ಅಂವೊಂಡ ಚಂಙಾದಿಯ ಪಟ್ಟಣಿ ನಿಕ್ಕಂಡುವಾ? ಪುತ್ತಾಂಗಾರ ಇಪ್ಪಕತ್ತನೆ ಅಯಿಂಗ ಪಟ್ಟಣಿ ನಿಪ್ಪುಲೆ.

²⁰ಆಚೇಂಗಿ ಮಂಗಲಕಾರನ ಅಯಿಂಗಡ ಕೂಟ್‌ಂಜ ಕಾಕಿಯಂಡ್ ಪೋಪ ಸಮಯ ಬಪ್ಪ, ಅಕ್ಕ ಅಯಿಂಗ ಉಪವಾಸ ಮಾಡ್‌ವಾಂದ್ ಎಣ್ಣ್‌ಚಿ

²¹ದಾರೂ ಪಳೆಯ ಬಟ್ಟೇಕ್, ಚುರ್ಂಗಿ ಪೋಕತ ಪುದಿಯ ತುಣಿನ ಅಡ್ಡಬೆಚ್ಚಿತ್ ಪೊಲ್ಲ್‌ಚಿಡುಲೆ. ಎನ್ನಂಗೆಣ್ಣ್‌ಚೇಂಗಿ ಪುದಿಯ ಬಟ್ಟೆ ಚುರುಂಗಿತ್ ಇಂಞು ಬಲ್ಯ ತೂತತ್‍ನ ಮಾಡ್‌ವ.

²²ದಾರೂ ಪುದಿಯದಾಯಿತ್ ಮಾಡ್‍ನ ದ್ರಾಕ್ಷಿರಸತ್‍ನ ಪಳೆಯ ಚರ್ಮತ್‌ರ ಚೀಲಕ್ ಬೂಕ್‌ಲೆ, ಅನ್ನನೆ ಮಾಡ್‍ಚೇಂಗಿ ಚರ್ಮತ್‌ರ ಚೀಲ ಒಡಂದ್ ಪೋಪ. ಚೀಲ ಒಡಂದ್ ಪೋಯಿತ್, ದ್ರಾಕ್ಷಿರಸವು ಚೆಲ್ಲಿಪೋಪ. ಅದ್ಂಡ ಬದ್‍ಲ್ ಪುದಿಯ ದ್ರಾಕ್ಷಿರಸತ್‍ನ ಪುದಿಯ ಚಕ್ಕಳತ್‍ರ ಚೀಲಕ್ ಬೂಕಂಡು.

²³ಪಿಂಞ ಯೇಸು ಸಬ್ಬತ್[6] ದಿವಸತ್‍ಲ್ ಗೋದಿ ನಟ್ಟ ಬೇಲ್‌ಲ್ ನಡ್ಂದ್ ಪೋಯಂಡ್ ಇಂಜತ್. ಅಂವೊಂಡ ಶಿಷ್ಯಂಗ ಅಂವೊಂಡ ಕೂಡೆ ನಡ್ಂದ್ ಪೋಯಂಡ್ ಇಪ್ಪಕ ಗೋದಿರ ಕೊಡಿನ ಞುಂಡ್‌ವಕ್ ಸುರ್ ಮಾಡ್‍ಚಿ.

²⁴ಫರಿಸಾಯಂಗ ಯೇಸುನ ನೋಟಿತ್: ಎನ್ನಂಗ್ ನೀಡ ಶಿಷ್ಯಂಗ ಮೋಶೇರ ಕಾನೂನ್‍ಕ್ ವಿರೋದವಾಯಿತ್ ಸಬ್ಬತ್ ದಿವಸತ್‍ಲ್ ಮಾಡಕ್ಕಾಗತ ಕೆಲಸತ್‍ನ ಮಾಡಿಯಂಡುಂಡ್‍ೕಂದ್ ಕ್‍ೕಟತ್.

²⁵ಅದ್ಂಗ್ ಯೇಸು: ದಾವೀದ ಪಿಂಞ ಅಂವೊಂಡ ಕೂಡೆ ಇಂಜಯಿಂಗ ಕೆಲ ಪಯಿಪಕ ಮಾಡ್‌ನಾನ ನಿಂಗ ಓದಿತ್‌ಲ್ಲೆಯಾ?

²⁶ಅಂವೊನು ಅಂವೊಂಡ ಕೂಟ್‌ಕಾರಳು ದೇವಡ ಮನೆರ ಒಳ್‍ಕ್ ಪೋಯಿತ್ ದೇವಕ್ ಬೆಚ್ಚ ಒಟ್ಟಿನ ತಿಂದ ವಿಷಯತ್‍ನ ನಿಂಗ ಪುಸ್ತಕತ್‍ಲ್ ಓದಿತ್‌ಲ್ಲೆಯಾಂದ್ ಕ್‍ೕಟತ್. ಆ ಸಮಯತ್‍ಲ್ ಅಬಿಯಾತರ ಎಣ್ಣ್‌ವಂವೊ ಮಹಾ ಯಾಜಕನಾಯಿತ್ಂಜತ್. ನ್ಯಾಯಪ್ರಮಾಣತ್‍ರ ಪ್ರಕಾರ ದೇವಕ್ ಬೆಚ್ಚ ಒಟ್ಟಿನ ಯಾಜಕಂಗ ಮಾತ್ರ ತಿಂಬಕ್ ಇಂಜತ್. ಆಚೇಂಗಿ ದಾವೀದ ಮಾತ್ರ ತಿಂದತಲ್ಲತೆ, ಅಂವೊಂಡ ಕೂಡೆ ಇಂಜ ಕೂಟ್‌ಕಾರಕು ಒಟ್ಟಿನ ಕೊಡ್‍ತತ್.

²⁷ಸಬ್ಬತ್ ದಿವಸ ಮನುಷ್ಯಂಗಕಾಯಿತ್ ಮಾಡ್‍ಚಿ, ಆಚೇಂಗಿ ಮನುಷ್ಯಂಗಳ ಸಬ್ಬತ್ ದಿವಸಕಾಯಿತ್ ಮಾಡಿತ್‌ಲ್ಲೆ.

²⁸ಆನಗುಂಡ್ ಮನುಷ್ಯಕುಮಾರ ಸಬ್ಬತ್ ದಿವಸಕೂ ಒಡೆಯನಾಯಿತುಂಡ್‍ೕಂದ್ ಎಣ್ಣ್‌ಚಿ.