Read Kodava ಮಾರ್ಕ 3 Bible Online

ಮಾರ್ಕ 3 - Kodava bible

ಮಾರ್ಕ 3

¹ಇಂಞೊರ್ ಕುರಿ ಯೇಸು ಸಬಾಮಂದಿರಕ್ ಪೋಚಿ. ಅಲ್ಲಿ ಒರ್ ಕೈ ಊನವಾನ ಒಬ್ಬ ಇಂಜತ್.

²ಚೆನ್ನ ಜನ, ಯೇಸು ಸಬ್ಬತ್ ದಿನತ್‌ಲ್ ಈ ಮನುಷ್ಯಂಡ ಕೈಯಿನ ವಾಸಿ ಮಾಡ್‍ಚೇಂಗಿ, ಅಂವೊನ ಕುತ್ತಪರಿವಕ್ ನೋಟಿಯಂಡಿಂಜತ್.

³ಯೇಸು ಆ ಮನುಷ್ಯನ ಎಲ್ಲಾಡ ಮಿಂಞತ್ ಎದ್ದಿತ್ ನಿಪ್ಪಕ್ ಎಣ್ಣ್‌ಚಿ.

⁴ನಿಂಗಡ ಕಾನೂನ್ ಪ್ರಕಾರ ಸಬ್ಬತ್ ದಿವಸತ್‍ಲ್ ಏದ್ ಮಾಡ್‍ವದ್ ನ್ಯಾಯ? ನಲ್ಲದ್ ಮಾಡ್‌ವದಾ ಅಥವ ಕೆಟ್ಟದ್ ಮಾಡ್‌ವದಾ? ಮನುಷ್ಯಂಡ ಜೀವತ್‍ನ ಕಾಪಾಡ್‌ವದಾ ಅಥವ ಅಂವೊನ ಪಾಳ್ ಮಾಡ್‌ವದಾಂದ್ ಅಲ್ಲಿ ಉಳ್ಳ ಜನಳ ಕ್‍ೕಟತ್. ಅಲ್ಲಿ ಉಳ್ಳ ಜನ ಒರ್ ತಕ್ಕು ಪರ್‍ಂದ್‍ತ್ತ್‌ಲ್ಲೆ.

⁵ಸುತ್ತ್‌ಮುತ್ತ್ ನೋಟಿತ್ ಯೇಸುಕ್ ಚೆಡಿ ಬಾತ್, ಅದೇ ಸಮಯತ್‍ಲ್ ಅಯಿಂಗಡ ಕಠಿಣ ಹೃದಯತ್‍ನ ಕಂಡಿತ್ ಯೇಸುಕ್ ಬೇಜಾರ್ ಆಚಿ. ಯೇಸು ಆ ಮನುಷ್ಯಂಗ್, ನೀಡ ಕೈಯಿನ ನೀಟ್‍ೕಂದ್ ಎಣ್ಣ್‌ಚಿ, ಅಂವೊ ಕೈ ನೀಟ್‌ಚಿ, ಅಂವೊಂಡ ಕೈ ಪೂರ್ತಿ ವಾಸಿಯಾಚಿ.

⁶ಅಕ್ಕ ಫರಿಸಾಯಂಗ ಅಲ್ಲಿಂಜ ಪೋಯಿತ್ ಹೆರೋದ ರಾಜಂಡ ಪಕ್ಷಕಾರಂಗಳ ಕಂಡತ್. ಅಯಿಂಗ ಯೇಸುನ ಕೊಲ್ಲ್‌ವಕ್ ಉಪಾಯ ಮಾಡ್‍ಚಿ.

⁷ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಆ ಜಾಗತ್‍ನ ಬುಟ್ಟಿತ್ ಗಲಿಲಾಯ ಕೆರೆರ ಕರೆಕ್ ಪೋಚಿ.

⁸ಯೆರೂಸಲೇಮ್ ಕೂಡಿತ್, ಯೂದಾಯ ಪ್ರಾಂತ್ಯತ್ಂಜಲು, ಇದೂಮಾಯ ಪ್ರಾಂತ್ಯತ್ಂಜಲು, ಯೊರ್ದನ್ ಕೆರೆರ ಅಪ್ಪರತ್ಂಜಲು, ತೀರ್, ಸೀದೋನ್ ಪಟ್ಟಣತ್‍ರ ಸುತ್ತ್‌ಮುತ್ತ್‌ಯಿಂಜಲು ದುಂಬ ಜನ ಅಂವೊಂಡ ಪಕ್ಕ ಬಾತ್.

⁹ಅಂವೊ ದುಂಬ ಜನಡ ಕಾಯಿಲೆನೆಲ್ಲ ವಾಸಿ ಮಾಡ್‍ಚಿ, ಕಾಯ್ಲೆಸ್ತೆಂಗೆಲ್ಲ ಅದ್‍ನ ಕ್‍ೕಟಿತ್ ಅಂವೊನ ಮುಟ್ಟ್‌ವಕಾಯಿತ್ ಜನಡ ಕೂಟ‌ತ್‍ಲ್ ನೂಕಿತ್ ನುಗ್ಗಿಯಂಡಿಂಜತ್.

¹⁰ಬಪ್ಪ ಜನಡ ಕೂಟ ಬಲ್ಯದಾನದ್‌ನ ಕಂಡಿತ್, ಯೇಸು ಅಂವೊಂಡ ಶಿಷ್ಯಂಗಕ್ ನಾಕ್ ಒರ್ ದೋಣಿನ ತಯಾರ್ ಮಾಡಿ, ಈ ಜನ ನನ್ನ ನೆರ್‍ಕತನೆಕೆ ಮಾಡೀಂದ್ ಎಣ್ಣ್‌ಚಿ.

¹¹ಕೂಳಿ ಪುಡ್‌ಚ ಜನ ಅಂವೊನ ಕಾಂಬಕ, ನೀನ್ ನೇರಾಯಿತು ದೇವಡ ಮೋಂವೊನೇ ಎಣ್ಣಿಯಂಡ್ ನೆಲಕ್ ಬುದ್ದಿತ್ ಕೂತ್ ಕೊಡ್‍ತತ್.

¹²ಆಚೇಂಗಿ ತಾಂಡ ವಿಷಯತ್‍ನ ದಾರ್‌ಕು ಎಣ್ಣತೀಂದ್ ಅಯಿಂಗಕ್ ಆಜ್ಞೆ ಕೊಡ್‍ತತ್.

¹³ಯೇಸು ಕುಂದ್‌ರ ಕೊಡಿಕ್ ಪೋಯಿತ್ ಅಂವೊಂಗ್ ಬೋಂಡಿಯಾನಯಿಂಗಳ ಕಾಕ್‍ಚಿ. ಅಯಿಂಗ ಅಂವೊಂಡ ಪಕ್ಕ ಬಾತ್.

¹⁴ಅಕ್ಕ ಅಂವೊ ಪನ್ನೆರಂಡ್ ಜನಳ ಆಯ್ಕೆ ಮಾಡಿತ್, ಅಯಿಂಗಕ್ ಅಪೊಸ್ತಲ ಎಣ್ಣುವ ಪೆದ ಇಟ್ಟತ್. ಅಯಿಂಗ ತಾಂಡಕೂಡೆ ಇಪ್ಪಕು, ಪ್ರಚಾರ ಮಾಡ್‌ವಕು,

¹⁵ಜನಡ ವ್ಯಾದಿನ ವಾಸಿ ಮಾಡಿತ್ ಕೂಳಿ ಬುಡ್‌ತ್‌ವಕು ಅದಿಕಾರ ಉಳ್ಳವಯಿಂಗಳಾಯಿತ್ ಅಯಿಂಗಳ ನೇಮಿಚಿಟ್ಟತ್.

¹⁶ಆ ಪನ್ನೆರಂಡ್ ಶಿಷ್ಯಂಗ ದಾರ್‍ೕಂದ್ ಎಣ್ಣ್‌ಚೇಂಗಿ; ಸೀಮೋನ, ಯೇಸು ಅಂವೊಂಗ್ ಪೇತ್ರ[7] ಎಣ್ಣ್‌ವ ಪೆದ ಕೊಡ್‍ತತ್.

¹⁷ಜೆಬೆದಾಯಂಡ ಕ್‌ಣ್ಣ ಮಕ್ಕ ಯಾಕೋಬ ಪಿಂಞ ಯೋಹಾನ, ಅಯಿಂಗಕ್ ಬೊವನೆರ್ಗೆಸ್ ಎಣ್ಣ್‌ವ ಪೆದ ಕೊಡ್‍ತತ್; ಅದ್ಂಗ್ ತೆಡ್‌ರ ಮಕ್ಕಾಂದ್ ಅರ್ಥ.

¹⁸ಅಂದ್ರೆಯ, ಫಿಲಿಪ್ಪ, ಬಾರ್ತೊಲೊಮಾಯ, ಮತ್ತಾಯ, ತೋಮ, ಅಲ್ಫಾಯಂಡ ಮೋಂವೊನಾನ ಯಾಕೋಬ, ತದ್ದಾಯ, ದೇಶ ಪ್ರೇಮಿಯಾನ[8] ಸೀಮೋನ

¹⁹ಪಿಂಞ ಯೇಸುನ ಕೊಲ್ಲ್‌ವಕ್ ಕಾಟಿಕೊಡ್‌ತಂವೊನಾನ ಇಸ್ಕರಿಯೋತ ಯೂದ ಎಣ್ಣ್‌ವಯಿಂಗಳೇ.

²⁰ಪಿಂಞ ಯೇಸು ಮನೆಕ್ ಪೋಚಿ. ಅಲ್ಲಿ ಅಂವೊಂಗು ಅಂವೊಂಡ ಶಿಷ್ಯಂಗಕು ಉಂಬಕ್ ಸಹ ಸಮಯ ಕ್‌ಟ್ಟತಚ್ಚಕ್ ಜನ ಪುನಃ ಬಂದಿತ್ ಕೂಡಿತ್ಂಜತ್.

²¹ಇದ್ ಯೇಸುರ ಕುಟುಂಬಕಾರಕ್ ಗೊತ್ತಾಚಿ. ಯೇಸುಕ್ ಪುಚ್ಚ್ ಪುಡ್‍ಚಿ ಪೋಚೀಂದ್ ಗೇನ ಮಾಡಿತ್ ಯೇಸುನ ಕಾಕಿಯಂಡ್ ಪೋಪಕ್ ನೋಟಿಯಂಡ್ ಇಂಜತ್.

²²ಯೆರೂಸಲೇಮ್ಂಜ ಚೆನ್ನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಬಂದಿತ್, ಯೇಸುಕ್ ಬೆಲ್ಜೆಬೂಲ್[9] ಎಣ್ಣುವ ಕೂಳಿ ಪುಡ್‌ಚಿತುಂಡ್, ಇಂವೊ ಸೈತಾನಂಡ ಎಜಮಾನನಗುಂಡ್ ಸೈತಾನನ ಬುಡ್‌ತಿಯಂಡುಂಡ್‍ೕಂದ್ ಎಣ್ಣ್‌ಚಿ.

²³ಯೇಸು ಅಯಿಂಗಳ ಕಾಕುವಂಜಿ ಕಥೇರ ರೂಪತ್‌ಲ್: ಸೈತಾನ ಸೈತಾನನ ಬುಡ್‌ತ್‌ವಕ್ ಕಯ್ಯುವ?

²⁴ಒರೇ ದೇಶತ್‍ರ ಜನ ಅಯಿಂಗಯಿಂಗಳೇ ಜಗಳ ಮಾಡಿಯಂಡ್ ಇಂಜತೇಂಗಿ ನಾಶ ಆಯಿಪೋಪಲ್ಲಾ

²⁵ಅನ್ನನೆ ಒರ್ ಕುಟುಂಬತ್‍ಲ್ ಉಳ್ಳಯಿಂಗ ಅಯಿಂಗಯಿಂಗಳೇ ಜಗಳ ಮಾಡಿಯಂಡ್ ಇಂಜತೇಂಗಿ ಆ ಕುಟುಂಬ ಒಡಂದ್ ಪೋಪಲ್ಲಾ.

²⁶ಅನ್ನನೆ, ಸೈತಾನ ಅಂವೊಂಗ್ ವಿರೋದವಾಯಿತ್ ಅಂವೊಂಡ ಗುಂಪ್‌ಲ್ ಜಗಳ ಮಾಡಿಯಂಡಿಂಜತೇಂಗಿ ಅಂವೊ ನಿಪ್ಪಕಯ್ಯತೆ ನಾಶ ಆಯಿಪೋಪ.

²⁷ಒರ್ ಗಟ್ಟಿಮುಟ್ಟಾನ ಮನುಷ್ಯನ ಕೆಟ್ಟಿ ಇಡತೆ ಪೋಚೇಂಗಿ ಅಂವೊಂಡ ಮನೆನ ಒಡ್‌ಪಂಜಿ ಅಂವೊಂಡ ಮನೆರ ಒಳ್‍ಲ್ ಉಳ್ಳದ್‍ನ ಲೂಟಿ ಮಾಡ್‌ವಕಯ್ಯುವ? ಅಂವೊಂಡ ಕೈಕಾಲ್ ಕೆಟ್ಟಿತ್ ಇಟ್ಟಿತುಂಡೇಂಗಿ ಮಾತ್ರ ಅಂವೊಂಡ ಮನೆನ ಲೂಟಿ ಮಾಡ್‌ವಕಯ್ಯು.

²⁸ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ: ಮನುಷ್ಯಂಗ ಮಾಡ್‌ವ ಏದ್ ಪಾಪಕು ಪಿಂಞ ಅಯಿಂಗ ಪರಿಯುವ ದೇವದೂಷಣೆಕು ಮನ್ನಿಪ್ ಕ್‍ಟ್ಟ್‌ವ.

²⁹ಆಚೇಂಗಿ ದಾರ್ ಪವಿತ್ರಾತ್ಮಂಡ ಮೇಲೆ ದೂಷಣೆ ಪರಿಯುವ ಅಯಿಂಗಕ್ ಮನ್ನಿಪ್ ಕ್‍ಟ್ಟ್‌ಲೆ. ಎನ್ನಂಗೆಣ್ಣ್‌ಚೇಂಗಿ ಇದ್ ನಿತ್ಯ ಪಾಪ, ಆನಗುಂಡ್ ನಿತ್ಯ ಕಂಡನೆಕ್ ಒಳಪಡ್‌ವ.

³⁰ಯೇಸುರ ಮೇಲ್‌ಲ್ ಕೂಳಿ ಉಂಡ್‍ೕಂದ್ ಅಯಿಂಗ ಪರ್‌ದಂಡ್ ಇಂಜಗುಂಡ್ ಯೇಸು ಇನ್ನನೆ ಎಣ್ಣ್‌ಚಿ.

³¹ಅಕ್ಕ ಅಂವೊಂಡ ಅವ್ವಳು ಪಿಂಞ ತಮ್ಮಣಂಗಳು ಬಂತ್, ಪೊರಮೆ ನಿಂದಿತ್ ಅಂವೊನ ಕಾಕ್‌ವಕಾಯಿತ್ ಒಬ್ಬನ ಒಳ್‍ಕ್ ಅಯಿಚತ್.

³²ಅಲ್ಲಿ ಅಂವೊಂಡ ಸುತ್ತ್‌ಲ್ ಇಂಜ ಜನ ಅಂವೊನ ನೋಟಿತ್, ಅದೋ ನೀಡ ಅವ್ವ ಪಿಂಞ ತಮ್ಮಣಂಗ ನಿನ್ನ ತ್‍ೕಡಿಯಂಡುಂಡ್‍ೕಂದ್ ಎಣ್ಣ್‌ಚಿ.

³³ಅದ್ಂಗ್ ಅಂವೊ: ದಾರ್ ನಾಡ ಅವ್ವ? ದಾರ್ ನಾಡ ಅಣ್ಣತಮ್ಮಣಂಗಾಂದ್ ಎಣ್ಣಿತ್;

³⁴ಯೇಸು ತಾಂಡ ಸುತ್ತ್‌ಲ್ ಅಳ್‌ತಿತ್ ಉಳ್ಳ ಜನಳ ನೋಟಿತ್, ನೋಟಿ, ಇಲ್ಲಿ ಅಳ್‍ತಿತುಳ್ಳ ಜನಳೇ ನಾಡ ಅವ್ವ, ಅಣ್ಣತಮ್ಮಣಂಗ ಪಿಂಞ ಅಕ್ಕತಂಗೆಯ.

³⁵ದಾರೆಲ್ಲಾ ದೇವಡ ಚಿತ್ತ ಮಾಡ್‌ವ ಅಯಿಂಗಳೇ ನಾಡ ಅಣ್ಣತಮ್ಮಣಂಗ, ಅಕ್ಕತಂಗೆಯ, ಅವ್ವಾಂದ್ ಎಣ್ಣ್‌ಚಿ.