Read Kodava ಮಾರ್ಕ 4 Bible Online

ಮಾರ್ಕ 4 - Kodava bible

ಮಾರ್ಕ 4

¹ಯೇಸು ಗಲಿಲಾಯ ಕೆರೆರ ಬರಿಲ್ ಪುನಃ ಉಪದೇಶ ಕೊಡ್‍ಪಕ್ ಸುರು ಮಾಡ್‍ಚಿ. ದುಂಬ ಜನ ಕೂಡಿಬಂದಗುಂಡ್ ಯೇಸು ಪೋಯಿತ್ ಅಲ್ಲಿ ಇಂಜ ಒರು ದೋಣಿಲ್ ಅಳ್‌ತಂಡತ್. ಜನಡ ಕೂಟ ಕೆರೆರ ಬರಿಲ್ ನಿಂದಂಡಿಂಜತ್.

²ದುಂಬ ವಿಷಯತ್‍ನ ಅಯಿಂಗಕ್ ಕಥೇರ ರೂಪತ್‌ಲ್ ಎಣ್ಣಿ ಕೊಡ್‍ತಂಡಿಂಜತ್.

³ಇಲ್ಲಿ ಕ್‍ೕಳಿ, ಒರ್ ಮನುಷ್ಯ ಕುರುನ ಬಿತ್ತ್‌ವಕ್ ಪೊರಟ್ ಪೋಚಿ.

⁴ಅಂವೊ ಆ ಕುರುನ ಬಿತ್ತ್‌ವಕ್ ಚಾಡ್‌ವಕ ಚೆನ್ನ ಕುರು ನಡ್‍ಪ ಬಟ್ಟೇಲ್ ಬುದ್ದತ್; ಆ ಕುರುನ ಪಕ್ಷಿಯ ಬಂದಿತ್ ತಿಂದತ್.

⁵ಚೆನ್ನ ಕುರು ಮಣ್ಣ್ ಇಲ್ಲತ ಕಲ್ಲ್ ಕಲ್ಲಾಯಿತ್ಂಜ ನೆಲತ್‌ಲ್ ಬುದ್ದತ್. ಅಲ್ಲಿ ಮಣ್ಣ್ ಆಳ ಇಲ್ಲತಗುಂಡ್ ಬುದ್ದ ಕುರು ಅಕ್ಕನ್ನೆ ಮೊಳಕೆ ಬಾತ್.

⁶ಆಚೇಂಗಿ ಬೆದ್ ಬಪ್ಪಕ ಮೊಳೆಕೆ ಒಣಂಗಿ ಪೋಚಿ. ಎನ್ನಂಗೆಣ್ಣ್‌ಚೇಂಗಿ ಆ ಗಿಡತ್‌ರ ಬೇರ್ ಆಳವಾಯಿತ್ ಪೋಯಿತ್ಂಜಿಲೆ.

⁷ಚೆನ್ನ ಕುರು ಮುಳ್ಳ್ ಪೊದೆಲ್ ಬುದ್ದತ್. ಅಲ್ಲಿ ಅದ್ ಬೊಳ್ಂದತ್, ಆಚೇಂಗಿ ಮುಳ್ಳ್ ಗಿಡ ಬೊಳ್ಂದಿತ್ ಅದ್‍ನ ನೆರ್‌ಕಿತ್ ಫಲ ಕೊಡ್‍ಪಕ್ ಬುಟ್ಟಿತ್‌ಲ್ಲೆ.

⁸ಚೆನ್ನ ಕುರು ಚಾಯಿ ಮಣ್ಣ್‌ರ ನೆಲತ್‌ಲ್ ಬುದ್ದತ್. ಅದ್ ಮೊಳಕೆ ಬಾತ್, ಚಾಯಿತೆ ಬೊಳ್ಂದತ್, ಚಾಯಿತೆ ಫಲ ಕೊಡ್‍ತತ್. ಚೆನ್ನ ನುಪ್ಪದ್, ಚೆನ್ನ ಅರ್‌ವದ್, ಚೆನ್ನ ನೂರಾಯಿತ್ ಫಲ ಕೊಡ್‍ತತ್.

⁹ಕ್‍ೕಪಕ್ ಕೆಮಿ ಉಳ್ಳಯಿಂಗ ಕ್‍ೕಳೀಂದ್ ಎಣ್ಣ್‌ಚಿ.

¹⁰ಯೇಸು ಒಬ್ಬನ್ನೇ ಇಪ್ಪಕಾಪಕ ಚೆನ್ನ ಜನ ಅಂವೊಂಡ ಪನ್ನೆರಂಡ್ ಶಿಷ್ಯಂಗಡ ಕೂಡೆ ಬಂತ್ ನೀನ್ ಎಣ್ಣ್‌ನ ಕಥೇರ ರೂಪತ್‍ರ ಅರ್ಥತ್‍ನ ನಂಗಕ್ ಎಣ್ಣಿತಾಂದ್ ಕ್‍ೕಟತ್.

¹¹ದೇವಡ ರಾಜ್ಯತ್‍ರ ಗುಟ್ಟ್ ನಿಂಗಕ್ ಗೊತ್ತಾಪನೆಕೆ ಮಾಡಿತುಂಡ್. ಆಚೇಂಗಿ ಪರಲೋಕಕ್ ಪೊರಮೆವುಳ್ಳ ಜನ ಇದ್‍ನೆಲ್ಲಾ ಕಥೇರ ರೂಪತ್‌ಲ್ ಕ್‍ೕಪ.

¹²ಅಯಿಂಗ ನೋಟುವ, ಆಚೇಂಗಿ ಒಂದು ಕಾಂಬುಲೆ, ಅಯಿಂಗ ಕ್‍ೕಪ, ಆಚೇಂಗಿ ಒಂದು ಅರ್ಥ ಆಪುಲೆ, ಅನ್ನನೆ ಅರ್ಥ ಆಚೇಂಗಿ ಅಯಿಂಗ ದೇವಡ ಪಕ್ಕ ಬಂತ್, ಅಯಿಂಗಡ ಪಾಪಕ್ ಮನ್ನಿಪ್ ಕ್‍ಟ್ಟುವ.[10]

¹³ಪಿಂಞ ಯೇಸು ಅಯಿಂಗಳ ನೋಟಿತ್, ಈ ಕಥೇರ ರೂಪ ನಿಂಗಕ್ ಅರ್ಥ ಆಯಿತಿಲ್ಲೆಯಾ ಅನ್ನನೆ ಆಚೇಂಗಿ ನಿಂಗಕ್ ಬೋರೆ ಕಥೇರ ರೂಪ ಎನ್ನನೆ ಅರ್ಥ ಆಪ ಎಣ್ಣಿಯಂಡ್ ಕ್‍ೕಟತ್.

¹⁴ಕುರುನ ಬಿತ್ತ್‌ವಯಿಂಗ ದೇವಡ ವಾಕ್ಯತ್‍ನ ಬಿತ್ತುವ.

¹⁵ಚೆನ್ನ ಜನ ಬಟ್ಟೇಲ್ ಬುದ್ದ ಕುರುರನೆಕೆ, ದೇವಡ ವಾಕ್ಯತ್‍ನ ಕ್‍ೕಪ ಆಚೇಂಗಿ ಸೈತಾನ ಬಂದಿತ್ ಅದ್‍ನ ಎಡ್‌ತ್‌ರ್‌ವ.

¹⁶ಚೆನ್ನ ಜನ ಕಲ್ಲ್ ನೆಲಕ್ ಬುದ್ದ ಕುರುರನೆಕೆ. ಅಯಿಂಗ ದೇವಡ ವಾಕ್ಯತ್‍ನ ಕುಶೀಲ್ ಬೆರಿಯ ಸ್ವೀಕಾರ ಮಾಡ್‌ವ,

¹⁷ಆಚೇಂಗಿ ಅದ್ ಅಯಿಂಗಡ ಒಳ್‍ಲ್ ಆಳವಾಯಿತ್ ಬೇರ್ ಇಲ್ಲತಗುಂಡ್, ಚೆನ್ನ ಕಾಲ ಮಾತ್ರ ಇಪ್ಪ. ದೇವಡ ವಾಕ್ಯತ್‍ರಗುಂಡ್ ಕಷ್ಟ, ಹಿಂಸೆ ಬಾತೇಂಗಿ ಅಯಿಂಗ ಅದ್‍ನ ಬುಟ್ಟ್‌ರ್‌ವ.

¹⁸ಚೆನ್ನ ಜನ ಎನ್ನನೆ ಇಪ್ಪ ಎಣ್ಣ್‌ಚೇಂಗಿ ಮುಳ್ಳ್‌ರ ಪೊದೆಕ್ ಕುರು ಬುದ್ದನೆಕೆ. ಅಯಿಂಗ ದೇವಡ ವಾಕ್ಯತ್‍ನ ಕ್‍ೕಪ.

¹⁹ಈ ಬದ್‍ಕ್‍ರ ದುಃಖ, ಐಶ್ವರ್ಯತ್‍ರ ಬೋದ ಪಿಂಞ ಬೋರೆ ಬೋರೆ ತರತ್‍ರ ಇಚ್ಛೆಯು ದೇವಡ ವಾಕ್ಯತ್‍ನ ಇರ್‌ಕುವಗುಂಡ್ ಫಲ ಕ್‍ಟ್ಟುಲೆ.

²⁰ಚೆನ್ನ ಜನ ನಲ್ಲ ಮಣ್ಣ್‌ಕ್ ಬುದ್ದ ಕುರುನನೆಕೆ ಇಪ್ಪ. ಅಯಿಂಗ ಕುಶೀಲ್ ದೇವಡ ವಾಕ್ಯತ್‍ನ ಸ್ವೀಕಾರ ಮಾಡಿತ್, ಫಲ ಕೊಡ್‍ಪ. ಚೆನ್ನ ನುಪ್ಪದ್, ಚೆನ್ನ ಅರ್‌ವದ್, ಚೆನ್ನ ನೂರಾಯಿತ್ ಫಲ ಕೊಡ್‍ಪ.

²¹ಯೇಸು ಇಂಞು ಬೋದನೆ ಮಾಡಿಯಂಡ್ ಇಂಜತ್. ದಾರೇಂಗಿ ಬೊಳ್‌ಚತ್‍ನ ಎಡ್‍ತಂಡ್ ಬಂದಿತ್ ಪಾತ್ರತ್‍ರ ಒಳ್‍ಲ್ ಬೆಪ್ಪ? ಇಲ್ಲೇಂಗಿ ಕಡಿಕೆರ ಅಡಿಲ್ ಬೆಪ್ಪ? ಅದ್‍ನ ಬೊಳ್‍ಚ ಕಂಬತ್‍ಲ್ ಬೆಪ್ಪ್‌ಲೆಯಾ.

²²ಒಳ್‌ಪ್‌ಚ್ಚಿಟಂಡ್ ಉಳ್ಳದೆಲ್ಲ ಪೊರಮೆ ಬಪ್ಪ, ಮುಚ್ಚಿತುಳ್ಳದೆಲ್ಲಾ ಬೊಳಿಕ್ ಬಪ್ಪ.

²³ಕ್‍ೕಪಕ್ ಕೆಮಿ ಉಳ್ಳಯಿಂಗ ಕ್‍ೕಳೀಂದ್ ಎಣ್ಣ್‌ಚಿ.

²⁴ಇಂಞು ಅಯಿಂಗಳ ಅಂವೊ ನೋಟಿತ್ ಎಣ್ಣ್‌ಚಿ; ನಿಂಗ ಜಾಗ್ರತೆಲ್ ಕ್‍ೕಳಿ, ಏದ್ ಅಳ್‌ತೆಲ್ ನಿಂಗ ತೀರ್ಪ್ ಮಾಡ್‌ವಿರ, ಅದೇ ಅಳ್‌ತೆಲ್ ದೇವ ನಿಂಗಳ ಸಹ ತೀರ್ಪ್ ಮಾಡ್‌ವ, ಇಂಞು ದುಂಬ ಮ‌ಡುವ.

²⁵ಉಳ್ಳಯಿಂಗಕ್ ಇಂಞು ಕ್‍ಟ್ಟ್‌ವ, ಇಲ್ಲತಯಿಂಗಕ್ ಚೆನ್ನ ಉಳ್ಳದ್‍ನ ಸಹ ಎಡ್‌ತ್‌ರ್‌ವ.

²⁶ಯೇಸು ಇನ್ನನೆ ಬೋದನೆ ಮಾಡಿಯಂಡಿಂಜತ್. ದೇವಡ ರಾಜ್ಯ ಎನ್ನನೆ ಉಂಡ್‍ೕಂದ್ ಎಣ್ಣ್‌ಚೇಂಗಿ ಒರ್ ಮನುಷ್ಯ ಕುರುನ ಅಂವೊಂಡ ಬೇಲ್‍ಕ್ ಬಿತ್ತ್‌ವನೆಕೆ.

²⁷ಅಂವೊ ಬೈಟಾಪಕ ಬುದ್ದಂಡ್ ವರಿರುವ. ಪೊಲಾಕ ಎದ್ದಿತ್ ನೋಟ್‌ವಕಾಪಕ ಅಂವೊಂಗ್ ಗೊತ್ತಿಲ್ಲತನೆಕೆ ಕುರು ವಡಂದಿತ್ ಮೊಳಕೆ ಬಂದನೆಕೆ ಆಪ.

²⁸ಅಲ್ಲಿಯತ್‍ರ ಫಲವತ್ತಾನ ಮಣ್ಣ್‌ರಗುಂಡ್ ಗಿಡ ಬೊಳ್ಂದಿತ್, ಕೊಂಬ್ ಬಂದಿತ್, ಮೊಗ್ಗ್ ಬಂದಿತ್, ಕದ್ ಆಯಿತ್ ದುಂಬ ಪಣ್ಣಾಪ.

²⁹ಪಣ್ಣ್ ಆನ ಪಿಂಞ ಆ ಮನುಷ್ಯ ಕೊಯಿ ಕತ್ತಿಲ್ ಕೊಯಿಪಣಿ ಸುರು ಮಾಡ್‌ವ.

³⁰ದೇವಡ ರಾಜ್ಯತ್‍ನ ಎಂತಾಂಗ್ ಹೋಲಿಕೆ ಮಾಡ್‍ವದ್? ನಿಂಗಕ್ ಅರ್ಥ ಆಪನೆಕೆ ಏದ್ ಕಥೇರ ರೂಪತ್‌ಲ್ ಎಣ್ಣಿತ್ ದೇವಡ ರಾಜ್ಯತ್‍ನ ವಿವರಿಚಿಡ್‌ವದ್?

³¹ಅದ್ ಕಡು ಕುರುರನೆಕೆ. ಅದ್ ಬೂಲೋಕತ್‍ಲ್ ಎಲ್ಲಾ ಕುರುಕಿಂಜ ಚೆರಿಯ ಕುರುವಾಯಿತುಂಡ್.

³²ಅದ್‍ನ ನೆಲಕ್ ಬಿತ್ತ್‌ನ ಪಿಂಞ ಅದ್ ಎಲ್ಲಾ ಗಿಡಕಿಂಜ ಬಲ್ಯ ಗಿಡವಾಯಿತ್ ಬಲ್ಯ ಕೊಂಬ್ ಆಯಿತ್ ಬೊಳ್ಂದಿತ್ ಆ ಕೊಂಬ್‍ರ ನಳತ್‌ಲ್ ಬಾನತ್‍ರ ಪಕ್ಷಿಯ ಬಂದಿತ್ ಗೂಡ್ ಕೆಟ್ಟ್‌ವ.

³³ಯೇಸು ಇನ್ನತ ಬೋದನೆನ ಜನಕ್ ಎಣ್ಣಿಯಂಡ್ ಇಂಜತ್. ಜನಕ್ ಅರ್ಥ ಆಪನೆಕೆ ಕಥೇರ ರೂಪತ್‌ಲ್ ಎಣ್ಣಿತ್ ಬೋದನೆ ಮಾಡಿಯಂಡ್ ಇಂಜತ್.

³⁴ಯೇಸು ಕಥೇರ ರೂಪತ್‌ಲ್ ಎಣ್ಣತೆ ಜನಡ ಕೂಡೆ ತಕ್ಕ್ ಪರಿಯುವಕಿಂಜಿಲೆ. ಆಚೇಂಗಿ ಅಂವೊ ಅಂವೊಂಡ ಶಿಷ್ಯಂಗಡ ಕೂಡೆ ಇಪ್ಪಕ ಅಯಿಂಗಕ್ ಚಾಯಿತೆ ಅರ್ಥ ಮಾಡಿ ಕೊಡ್‌ಪಯಿಂಜತ್.

³⁵ಅಂದ್ ಬಯಿಟಾಪಕ ಯೇಸು, ನಂಗ ಕೆರೆರ ಆಬರಿಕ್ ಪೋಕನಾಂದ್ ಎಣ್ಣ್‌ಚಿ.

³⁶ಜನಡ ಈ ಕೂಟತ್‌ನ ಅಯಿಚ ಪಿಂಞ ಅಂವೊ ಅಳ್‍ತಂಡಿಂಜ ದೋಣಿಲ್ ಅನ್ನನೆ ಅಂವೊನ ಕಾಕಿಯಂಡ್ ಪೋಚಿ. ಇಂಞು ಬೋರೆ ಚೆನ್ನ ದೋಣಿಯು ಅಂವೊಂಡ ಕೂಡೆ ಇಂಜತ್.

³⁷ಒಮ್ಮಕೆ ಬಿರ್‌ಗಾಳಿ ಬೀಜಿತ್ ದೋಣಿರ ಒಳ್‍ಕ್ ನೀರ್ ದುಂಬುವನೆಕೆ ಅಲೆ ಪೊಜ್ಜತ್.

³⁸ಯೇಸು ತಲೆಮೆತ್ತೆರ ಮೇಲೆ ಮಂಡೆ ಬೆಚ್ಚಂಡ್ ದೋಣಿರ ಇಂಞೊರ್ ಮೂಲೆಲ್ ವರಿಯಂಡ್ ಇಂಜತ್. ಯೇಸುರ ಶಿಷ್ಯಂಗ ಬಂದಿತ್ ಯೇಸುನ ಎಪ್ಪ್‌ಚಿಟ್ಟಿತ್, ಉಪಾದ್ಯನೇ, ನಂಗ ಚಾವದ್ ನೀಕ್ ಬೇಜಾರಾಪ್‌ಲ್ಲೆಯಾಂದ್ ಕ್‍ೕಟತ್.

³⁹ಯೇಸು ಎದ್ದಿತ್, ನಿಪ್ಪಂಜಿ, ಗಾಳಿನ ಚೂಕಿತ್, ಕೆರೆನ ನೋಟಿತ್: ಶಾಂತ ಆಯಿರ್, ಮುಂಡತೆ ಇರ್‍ೕಂದ್ ಹುಕುಮ್ ಕೊಡ್‍ತತ್. ಅಕ್ಕನೆ ಗಾಳಿ ನಿಂದಿತ್ ದುಂಬ ಶಾಂತವಾಚಿ.

⁴⁰ಯೇಸು ಅಂವೊಂಡ ಶಿಷ್ಯಂಗಕ್ ನಿಂಗಕ್ ಇಂಞು ನಂಬಿಕೆ ಬಂದಿತ್‌ಲ್ಲೆಯಾ? ಎನ್ನಂಗ್ ನಿಂಗಕ್ ಅಚ್ಚಕ್ ಪೋಡಿ ಆಚೀಂದ್ ಕ್‍ೕಟತ್.

⁴¹ಅಯಿಂಗಕ್ ದುಂಬ ಪೋಡಿ ಆಯಿತ್, ಆಶ್ಚರ್ಯ ಆಯಿತ್: ಗಾಳಿಯು ಅಲೆಯು ಇಂವೊಂಗ್ ಬಗ್ಗಿತ್ ನಡ್‍ಂದಂಡುಂಡಲ್ಲ, ಈ ಮನುಷ್ಯ ದಾರಾಯಿತಿಕ್ಕೂಂದ್ ಅಯಿಂಗಯಿಂಗಳೇ ತಕ್ಕ್ ಪರ್‌ದಂಡಿಂಜ‌ತ್.