Read Kodava ಮಾರ್ಕ 5 Bible Online

ಮಾರ್ಕ 5 - Kodava bible

ಮಾರ್ಕ 5

¹ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಗಲಿಲಾಯತ್‍ರ ಆ ಕರೆಯಿಂಜ ಗದರೇಸನರ ನಾಡ್‍ಕ್ ಬಾತ್

²ಯೇಸು ದೋಣಿಯಿಂಜ ಪೊರಮೆ ಇಳ್ಂಜದು ಒರ್ ಮನುಷ್ಯ ಅಂವೊಂಗ್ ಎದ್‍ಕೆ ಬಾತ್. ಅಂವೊ ಚಾವ್‍ನ ಪೂಪ ತೂಟ್ಂಗಳತ್ಂಜ ಬಾತ್. ಅಂವೊ ಕೂಳಿ ಪುಡ್‌ಚ ಮನುಷ್ಯನಾಯಿತ್ಂಜತ್.

³ಅಂವೊ ತೂಟ್‌ಂಗಳತ್‌ಲ್ ವಾಸ ಮಾಡಿಯಂಡಿಂಜತ್. ದಾರ್‌ಕು ಅಂವೊನ ಪುಡ್‌ಚಿತ್ ಸರ್ಪಣಿಲ್ ಕೆಟ್ಟ್‌ವಕ್ ಕಯಿಂಜಿತ್‌ಲ್ಲೆ.

⁴ಎಚ್ಚಕೋ ಕುರಿ ಅಂವೊಂಡ ಕಾಲ್‌ಕೈಯಿನ ಸರ್ಪಣಿಲ್ ಕೆಟ್ಟ್‌ಚಿ. ಆಚೇಂಗಿ ಎಕ್ಕಾಲು ಸರ್ಪಣಿನ ಪೊಳ್‌ಚಿತ್ ಅಂವೊಂಡ ಕಾಲ್‌ಕ್ ಕೆಟ್ಟ್‌ನ ಇರ್‍ಂಬ್‍ರ ಸರ್ಪಣಿನ ಚೂರ್ ಚೂರ್ ಮಾಡ್‌ವಕಿಂಜತ್. ಅಂವೊ ಅಚ್ಚಕ್ ಗಟ್ಟಿಮುಟ್ಟಾಯಿತ್ ಇಂಜತ್.

⁵ಅಂವೊ ಪೊಲಾಕ ಬೈಯಿಟ್ ಕುಂದ್ ಪಿಂಞ ತೂಟ್‌ಗಳಂತಲ್ ಕೂತ್ ಕೊಡ್‌ತಂಡ್, ಕಲ್ಲ್‌ಲ್ ತಾಂಡ ತಡೀನ ಗಾಯಮಾಡಿಯಂಡಿಂಜತ್.

⁶ಚೆನ್ನ ದೂರತ್‍ಲ್ ಯೇಸು ಬಪ್ಪದ್‍ನ ಕಂಡಿತ್ ಅಂವೊ ಯೇಸುರ ಪಕ್ಕ ಓಡಿ ಬಂದಿತ್ ಮೊಣಕಾಲ್ ಊರ್‌ಚಿ.

⁷ಅಂವೊ ಜೋರಾಯಿತ್ ಕೂತ್ ಕೊಡ್‌ತಂಡ್: ದೇವಾದಿ ದೇವಡ ಮೋಂವೊನಾನ ಯೇಸುವೇ, ನನ್ನಗುಂಡ್ ನೀಕ್ ಎಂತಾಂಡು, ನಾಕ್ ದಯಬೆಚ್ಚಿತ್ ಶಿಕ್ಷೆ ತರತೇಂದ್ ದೇವಡ ಮೇಲೆ ಆಣೇಂದ್ ಎಣ್ಣ್‌ಚಿ.

⁸ಎನ್ನಂಗೆಣ್ಣ್‌ಚೇಂಗಿ, ಅಂವೊನ ಪುಡ್‌ಚ ಕೂಳಿಕ್ ನೀನ್ ಅಂವೊನ ಬುಟ್ಟಿತ್ ಪೋಂದ್ ಯೇಸು ಎಣ್ಣಿತ್ಂಜತ್.

⁹ಅಕ್ಕ ಯೇಸು ಅಂವೊನ ನೋಟಿತ್: ನೀಡ ಪೆದ ಎಂತ್‍ೕಂದ್ ಕ್‍ೕಟತ್. ಅದ್ಂಗ್ ಅಂವೊ: ನಾಡ ಪೆದ ಲೇಗಿಯೊನ್[11], ನಂಗ ಸುಮಾರ್ ಕೂಳಿಯ ಉಂಡ್.

¹⁰ದಯಬೆಚ್ಚಿತ್ ನಂಗಳ ಈ ಜಾಗತ್ಂಜ ಅಯಿಕತೇಂದ್ ಬೋಡ್‍ಚಿ.

¹¹ಅಕ್ಕ ಕುಂದ್‌ರ ಪಕ್ಕ ದುಂಬ ಪಂದಿಯ ಮೇಯಿಜಂಡ್ ಇಂಜತ್.

¹²ಆ ಕೂಳಿಯ, ಈ ಪಂದಿಯಡ ಕೂಡೆ ನಂಗಳ ಅಯಿಚತೇಂಗಿ ನಂಗ ಅಯಿಂಗಡ ಒಳ್‍ಕ್ ಕೂಡಿರುವಾಂದ್ ಯೇಸುನ ಬೋಡ್‍ಚಿ.

¹³ಅಂವೊ ಅದ್ಂಗ್ ಒತ್ತತ್. ಆ ಕೂಳಿಯ ಈ ಮನುಷ್ಯನ ಬುಟ್ಟಿತ್ ಪಂದಿಯಡ ಒಳ್‍ಕ್ ಕೂಡಿಯಂಡತ್. ಸುಮಾರ್ ದಂಡ್ ಆಯಿರ ಪಂದಿಯಡ ಗುಂಪು ಕುಂದ್‌ರ ಕೊಡಿಕ್ ಓಡಿ ಪೋಯಿತ್ ಅಲ್ಲಿಂಜ ನೇರೆ ಕೆರೆಕ್ ಬುದ್ದಿತ್ ಮುಳ್‍ಗಿ ಚತ್ತ್ ಪೋಚಿ.

¹⁴ಪಂದಿಯಳ ಮೇಪ ಜನ ಇದ್‍ನ ಕಂಡಿತ್ ಓಡಿ ಪೋಯಿತ್ ಪಟ್ಟಣತ್‍ಲ್ ಪಿಂಞ ಸುತ್ತ್‌ಮುತ್‍ಲುಳ್ಳ ಎಲ್ಲಾರ್‌ಕು ಈ ಸುದ್ದಿನ ಎಣ್ಣ್‌ಚಿ. ಎಲ್ಲಾ ಜನ ಬಂದಿತ್ ಎಂತ ಆಚೀಂದ್ ನೋಟ್‌ಚಿ.

¹⁵ಜನ ಎಲ್ಲಾ ಯೇಸುರ ಪಕ್ಕ ಬಾತ್, ಕೂಳಿ ಪುಡ್‌ಚಂವೊ ಚಾಯಿತೆ ಬಟ್ಟೆ ಇಟ್ಟಿತ್ ನಲ್ಲ ಮನಸ್ಸ್‌ಲ್ ಅಳ್‌ತಿತ್ಂಜನ ನೋಟಿತ್ ಜನಕೆಲ್ಲಾ ಪೋಡಿ ಆಚಿ.

¹⁶ಇದ್‍ನ ಕಂಡ ಜನ ಪೋಯಿತ್, ಕೂಳಿಪುಡ್‌ಚಂವೊಂಡ ವಿಷಯ ಪಿಂಞ ಪಂದಿಯಡ ವಿಷಯತ್‍ನ ಜನಕೆಲ್ಲ ಅರಿಚಿಟ್ಟತ್.

¹⁷ಅಕ್ಕ ಜನಯೆಲ್ಲ ಯೇಸುನ ನಂಗಡ ಪ್ರಾಂತ್ಯತ್‍ನ ಬುಟ್ಟಿತ್ ಪೋಪಕ್ ಬೋಡಿಯಂಡತ್.

¹⁸ಅನ್ನನೆ ಯೇಸು ದೋಣಿರೊಳ್‌ಲ್ ಪೋಯಿತ್ ಅಳ್‌ಪಕ, ಕೂಳಿ ಪುಡ್‍ಚಿತ್ಂಜ ಮನುಷ್ಯ ಯೇಸುನ ನೋಟಿತ್: ನೀಡ ಕೂಡೆ ನಾನು ಬಪ್ಪೀಂದ್ ಬೋಡಿಯಂಡತ್.

¹⁹ಯೇಸು ಇಂವೊಂಡ ತಕ್ಕ್‌ಕ್ ಒತ್ತಂಡಿಲ್ಲೆ. ಅದ್ಂಡ ಬದ್‍ಲ್, ನೀನ್ ನೀಡ ಮನೆಕ್ ಪೋಯಿತ್ ದೇವ ನೀಕ್ ಕನಿಕರ ಕಾಟ್‌ವಂಜಿ ಎಚ್ಚಕ್ ನಲ್ಲದ್ ಮಾಡ್‍ಚೀಂದ್ ನೀಡ ಕುಟುಂಬಕ್ ಎಣ್ಣ್‍ೕಂದ್ ಎಣ್ಣ್‌ಚಿ.

²⁰ಅಲ್ಲಿಂಜ ಆ ಮನುಷ್ಯ ದೆಕಪೊಲಿಕ್ ಪೋಯಿತ್ ಯೇಸು ಅಂವೊಂಗ್ ಎಚ್ಪಕ್ ನಲ್ಲದ್ ಮಾಡ್‍ಚೀಂದ್ ಎಣ್ಣ್‌ಚಿ. ಜನಕ್ ಇದ್‍ನ ಕ್‍ೕಪಕ ಆಶ್ಚರ್ಯ ಆಚಿ.

²¹ಯೇಸು ಕೆರೆರ ಇಂಞೊರ್ ಬರಿಕ್ ಪೋಚಿ. ಅಲ್ಲಿಯತ್‍ರ ಕೆರೆರ ಬರಿಲ್ ದುಂಬ ಜನ ಅಂವೊಂಡ ಪಕ್ಕ ಕೂಡಿ ಬಾತ್.

²²ಸಬಾಮಂದಿರತ್‍ರ ಒರ್ ಅದಿಕಾರಿಯಾಯಿತ್ಂಜ ಯಾಯೀರ ಎಣ್ಣ್‌ವಂವೊ ಯೇಸುನ ಕಾಂಬದು ಅಂವೊಂಡ ಪಕ್ಕ ಬಾತ್. ಅಂವೊ ಮೊಣಕಾಲ್ ಇಟ್ಟಿತ್,

²³ನಾಡ ಮೂಡಿ ಕುಂಞಿ ದುಂಬ ಕಾಯಿಲೆಲ್ ಬುದ್ದಿತ್ ಉಂಡ್, ನೀನ್ ದಯಬೆಚ್ಚಿತ್ ಬಂದಿತ್ ನೀಡ ಕೈಯಿನ ಅವಡ ಮೇಲೆ ಬೆಯ್ಯಿ; ಅಕ್ಕ ಅವಡ ಕಾಯಿಲೆ ವಾಸಿಯಾಯಿತ್ ಬದ್‌ಕ್‌ವಾಂದ್ ಬಕ್ತಿಲ್ ಬೋಡಿಯಂಡತ್.

²⁴ಯೇಸು ಅಂವೊಂಡ ಕೂಡೆ ಪೋಚಿ. ದುಂಬ ಜನಳು ಅಂವೊಂಡ ಕೂಡೆ ಅಂವೊನ ನೆರ್‌ಕಿಯಂಡ್ ಪೋಚಿ.

²⁵ಅಲ್ಲಿ ಪನ್ನೆರಂಡ್ ಕಾಲತ್ಂಜ ಚೋರೆ ಪೋಪ ರೋಗತ್‌ಂಜ ಕಷ್ಟಪಟ್ಟಂಡಿಂಜ ಒರ್ ಪೊಣ್ಣಾಳ್ ಇಂಜತ್.

²⁶ಅವ ಎಚ್ಚಕೋ ವೈದ್ಯಂಗಡಗುಂಡ್ ಮದ್ದ್ ಎಡ್‍ತಂಡ್ ಕಷ್ಟಪಟ್ಟಂಡ್, ಅವಡ ಪಕ್ಕ ಇಂಜ ಎಲ್ಲಾನ ಕರ್ಚ್ ಮಾಡಿತ್ಂಜತ್. ಆಚೇಂಗಿ ಅವ ವಾಸಿ ಆಯಿತಿಲ್ಲೆ. ದಿನ ದಿನ ಬಂದನೆಕೆ ಜಾಸ್ತಿಯಾಯಂಡಿಂಜತ್.

²⁷ಅವ ಯೇಸುರ ವಿಷಯ ಕ್‍ೕ‍ಟಿತ್ಂಜತ್. ಅವ ಆ ಜನಡ ಕೂಟ‌ತ್‍ಲ್ ಅಂವೊಂಡ ಬಯ್ಯ ಇಂಜತ್.

²⁸ನಾನ್ ಅಂವೊಂಡ ಬಟ್ಟೇನ ಮುಟ್ಟ್‌ಚೇಂಗಿ ನಾನ್ ವಾಸಿ ಆಯಿಪೋಪೀಂದ್ ಅವ ಗೇನ ಮಾಡ್‍ಚಿ.

²⁹ಅನ್ನನೆ ಅವ ಬಂದಿತ್ ಯೇಸುರ ಬಟ್ಟೇನ ಮುಟ್ಟ್‌ಚಿ. ಅಕ್ಕಣೆಕೆ, ಅವಡ ಚೋರೆ ಪೋಪದ್ ನಿಂದ್ ಪೋಚಿ. ನಾಡ ತಡೀಲ್ ಇಂಜ ಈ ತೊಂದರೆ ವಾಸಿ ಆಯಿಪೋಚೀಂದ್ ಅವಕ್ ಗೊತ್ತಾಚಿ.

³⁰ಅಕ್ಕಣೆ ಯೇಸು, ತಾಂಡ ದೇಹತ್ಂಜ ಅದ್ಬುತ ಶಕ್ತಿ ಪೊರಟಿತ್ ಪೋಚೀಂದ್ ಗೊತ್ತಾಯಿತ್, ನನ್ನ ದಾರ್ ಮುಟ್ಟಿಯೇಂದ್ ಜನಡ ಗುಂಪ್‍ರ ಸುತ್ತ್‌ಲೂ ನೋಟ್‌ಚಿ.

³¹ಅಂವೊಂಡ ಶಿಷ್ಯಂಗ ಅಂವೊನ ನೋಟಿತ್: ಇಚ್ಚಕ್ ಜನಡ ಗುಂಪ್‌ಲ್ ನಿನ್ನ ದಾರ್ ಮುಟ್ಟಿಯೇಂದ್ ಕ್‍ೕಪಿಯಲ್ಲಾಂದ್ ಎಣ್ಣ್‌ಚಿ.

³²ಆಚೇಂಗಿ ಯೇಸು ಇನ್ನನೆ ದಾರ್ ನನ್ನ ಮುಟ್ಟಿಯೇಂದ್ ಜನಡ ಸುತ್ತ್‌ಲ್ ನೋಟಿಯಂಡೇ ಇಂಜತ್.

³³ಆ ಪೊಣ್ಣಾಳ್‌ಕ್ ಎಂತಾಚೀಂದ್ ಗೊತ್ತಾನಗುಂಡ್ ಅವ ಬೊತ್ತಿಯಂಡ್ ಗ್‌ಡ್‌ಗಿಯಂಡ್ ಯೇಸುರ ಪಕ್ಕ ಬಂದಿತ್ ಮೊಣಕಾಲ್ ಇಟ್ಟಿತ್ ಅವಡ ಕಥೇನೆಲ್ಲ ಎಣ್ಣ್‌ಚಿ.

³⁴ಯೇಸು ತಿರಿತ್ ಅವಳ ನೋಟಿತ್: ನಾಡ ಮೋಳೆ, ದೈರ್ಯ ಎಡ್‌ತ, ನೀಡ ನಂಬಿಕೆ ನಿನ್ನ ವಾಸಿ ಮಾಡ್‍ಚಿ. ನೀನ್ ಶಾಂತಿಲ್ ಪೋಯಿತ್, ಪೂರ್ತಿ ವಾಸಿಯಾಯಿತ್ ಕುಶೀಲ್ ಪೋಂದ್ ಯೇಸು ಎಣ್ಣ್‌ಚಿ.

³⁵ಯೇಸು ಇನ್ನನೆ ತಕ್ಕ್ ಪರ್‌ದಂಡ್ ಇಪ್ಪಕ ಸಬಾಮಂದಿರ ಅದಿಕಾರಿಯಡ ಮನೇಯಿಂಜ ಚೆನ್ನ ಜನ ಸುದ್ದಿ ಎಡ್‌ತ ಬಂದಿತ್, ನೀಡ ಮೋವ ಚತ್ತ್ ಪೋಚಿ ಎನ್ನಂಗ್ ಈ ಉಪಾದ್ಯಂಗ್ ಇಂಞು ತೊಂದರೆ ಕೊಡ್‍ಪಿಯಾಂದ್ ಎಣ್ಣ್‌ಚಿ.

³⁶ಯೇಸು ಈ ತಕ್ಕ್‌ಕ್ ಕೆಮಿ ಕೊಡ್‍ಕತೆ ಅದಿಕಾರಿಯಂಗ್: ನೀನ್ ಬೊತ್ತತೆ, ನನ್ನ ನಂಬ್‍ೕಂದ್ ಎಣ್ಣ್‌ಚಿ.

³⁷ಯೇಸು ಅಂವೊಂಡ ಕೂಡೆ ದಾರ್‌ನು ಬಪ್ಪಕ್ ಬುಡತೆ, ಬರಿ ಅಂವೊಂಡ ಶಿಷ್ಯಂಗಳಾನ ಪೇತ್ರ, ಯಾಕೋಬ ಪಿಂಞ ಅಂವೊಂಡ ತಮ್ಮಣನಾನ ಯೋಹಾನನ ಕೂಟಿಯಂಡ್ ಯಾಯೀರ ಮನೆಕ್ ಪೋಯಿತ್ ಎತ್ತ್‌ಚಿ.

³⁸ಅಲ್ಲಿ ಜನಡ ಗಾಬರಿ, ಜೋರ್ ಮೊರೆ ಪಡೆನ ಕಂಡತ್.

³⁹ಯೇಸು ಒಳ್‍ಕ್ ಪೋಯಿತ್ ಎಂತ ಇಚ್ಚಕೆಲ್ಲಾ ಗಾಬರಿ? ಎನ್ನಂಗ್ ನಿಂಗ ಮೊರಟಂಡುಳ್ಳಿರ? ಕುಂಞಿ ಚತ್ತಿತ್‌ಲ್ಲೆ, ಅವ ವರಿಯಂಡ್ ಮಾತ್ರ ಉಂಡ್‍ೕಂದ್ ಯೇಸು ಎಣ್ಣ್‌ಚಿ.

⁴⁰ಯೇಸುರ ತಕ್ಕ್‌ಕ್ ಅಲ್ಲಿ ಉಳ್ಳಯಿಂಗೆಲ್ಲಾ ತೆಳ್‍ಚತ್. ಯೇಸು ಅಯಿಂಗಳೆಲ್ಲ ಪೊರಮೆ ಇಟ್ಟಿತ್, ಬರಿ ಕುಂಞಿರ ಅಪ್ಪವ್ವ ಅಂವೊಂಡ ಮೂಂದ್ ಶಿಷ್ಯಂಗಳ ಕಾಕಿಯಂಡ್ ಕುಂಞಿ ಬುದ್ದಂಡುಳ್ಳ ಕೋಂಬರೇಕ್ ಪೋಚಿ.

⁴¹ಕುಂಞಿರ ಕೈಯಿನ ಪುಡ್‌ಚಿತ್ ತಲಿಥಾಕೂಮ್‌ಂದ್ ಎಣ್ಣ್‌ಚಿ. ಅದ್ಂಗ್ ಚುಮ್ಮಿ ಕುಂಞಿ ನೀನ್ ಏಳ್‍ೕಂದ್ ನಾನ್ ಎಣ್ಣ್‌ವೀಂದ್ ಅರ್ಥ.

⁴²ಅವ ಒಮ್ಮಕೆ ಎದ್ದುರ್‌ವಂಜಿ ಆಲೆ ಈಲೆ ನಡ್‍ಪಕ್ ಸುರು ಮಾಡ್‍ಚಿ. ಅವ ಪನ್ನೆರಂಡ್ ವಯಸ್‌ರ ಮೂಡಿ ಕುಂಞಿ ಆಯಿತ್ಂಜತ್. ಇದ್‍ ಅಲ್ಲಿ ಉಳ್ಳಯಿಂಗಕೆಲ್ಲಾ ಆಶ್ಚರ್ಯ ಆಚಿ.

⁴³ಆಚೇಂಗಿ ಯೇಸು ಅಲ್ಲಿ ಉಳ್ಳಯಿಂಗಕೆಲ್ಲಾ ನಿಂಗ ಈ ವಿಷಯತ್‍ನ ದಾರ್‌ಕು ಎಣ್ಣ್‌ವಕ್ಕಾಗಾಂದ್ ಹುಕುಮ್ ಕೊಡ್‍ತತ್. ಅವಕ್ ಎಂತೇಂಗಿ ತಿಂಬಕ್ ಕೊಡೀಂದ್ ಯೇಸು ಎಣ್ಣ್‌ಚಿ.