Read Kodava ಮಾರ್ಕ 6 Bible Online

ಮಾರ್ಕ 6 - Kodava bible

ಮಾರ್ಕ 6

¹ಯೇಸು ಈ ಪಟ್ಟಣ ಬುಟ್ಟಿತ್ ತಾಂಡ ಊರ್‌ಕ್ ಪೋಚಿ, ಅಂವೊಂಡ ಶಿಷ್ಯಂಗಳು ಅಂವೊಂಡ ಕೂಡೆ ಪೋಚಿ.

²ಸಬ್ಬತ್ ದಿನ ಬಪ್ಪಕ ಸಬಾಮಂದಿರತ್‍ಲ್ ಬೋದನೆ ಮಾಡ್‌ವಕ್ ಸುರು ಮಾಡ್‍ಚಿ. ದುಂಬ ಜನ ಕೂಡಿತ್ಂಜತ್. ಅಯಿಂಗಕ್ ಇಂವೊಂಡ ಉಪದೇಶತ್‍ನ ಕ್‍ೕಟಿತ್ ದುಂಬ ಆಶ್ಚರ್ಯ ಆಚಿ. ಇನ್ನತ ಉಪದೇಶವೆಲ್ಲ ಇಂವೊಂಗ್ ಎಲ್ಲಿಂಜ ಕ್‍ಟ್ಟ್‌ಚಿ? ಎಲ್ಲಿಂಜ ಈ ತರ ಜ್ಞಾನ ಕ್‍ಟ್ಟ್‌ಚಿ? ಇಂವೊ ಎನ್ನನೆ ಈ ತರ ಅದ್ಬುತ ಕಾರ್ಯ ಮಾಡಿಯಂಡುಂಡ್?

³ಇಂವೊ ಒರ್ ಆಚಾರಿಯಲ್ಲ? ಮರಿಯಂಡ ಮೋಂವೊನಲ್ಲಾ? ಇಂವೊ ಯಾಕೋಬ, ಯೋಸೆ, ಯೂದ ಪಿಂಞ ಸೀಮೋನ ಎಣ್ಣುವಯಿಂಗಡ ಅಣ್ಣನಲ್ಲಾ? ಅಂವೊಂಡ ತಂಗೆಯೆಲ್ಲ ಇಲ್ಲಿ ವಾಸಮಾಡಿಯಂಡುಂಡಲ್ಲಾಂದ್ ಎಣ್ಣಿಯಂಡ್ ಅಲ್ಲಿ ಉಳ್ಳಯಿಂಗ ಅಂವೊಂಡ ವಿಷಯತ್‍ಲ್ ಬೇಜಾರ್ ಮಾಡಿಯಂಡ್, ಅಂವೊ ಎಣ್ಣ್‌ವಾನ ಅಯಿಂಗಕ್ ನಂಬ್‍ವಕ್ ಕಯಿಂಜಿತ್‌ಲ್ಲೆ.

⁴ಅಕ್ಕ ಯೇಸು: ಒರ್ ಪ್ರವಾದಿಕ್ ತಾಂಡ ಊರ್ ಪಿಂಞ ಅಂವೊಂಡ ಮನೆಕಾರ ಬೆಂದ್‌ವಳ ಬುಟ್ಟಿತ್ ಬೋರೆ ಎಲ್ಲಾ ಜಾಗತ್‍ಲು ಮರ್ಯಾದಿ ಕ್‍ಟ್ಟ್‌ವಾಂದ್ ಎಣ್ಣ್‌ಚಿ.

⁵ಚೆನ್ನ ಕಾಯಿಲೆಸ್ತಂಗಡ ಮೇಲೆ ಕೈಯಿನ ಬೆಚ್ಚಿತ್ ವಾಸಿಮಾಡ್‌ನದಲ್ಲತೆ, ಬೋರೆ ಏದ್ ಅದ್ಬುತ ಕಾರ್ಯವು ಅಲ್ಲಿ ಅಂವೊಂಗ್ ಮಾಡ್‌ವಕ್ ಕಯಿಂಜಿತ್ತ್‌ಲ್ಲೆ.

⁶ಈ ಜನಕ್ ನಾಡ ಮೇಲೆ ನಂಬಿಕೆ ಬಂದಿತ್‌ಲ್ಲೇಂದ್ ಯೇಸುಕ್ ಆಶ್ಚರ್ಯ ಆಚಿ. ಪಿಂಞ ಯೇಸು ಪಕ್ಕತ್‍ರ ಊರ್‌ಕೆಲ್ಲಾ ಪೋಯಿತ್ ಜನಕ್ ಬೋದನೆ ಕೊಡ್‍ತತ್.

⁷ಯೇಸು ಅಂವೊಂಡ ಪನ್ನೆರಂಡ್ ಶಿಷ್ಯಂಗಳ ಕಾಕುವಂಜಿ ದಂಡ್ ದಂಡಾಳಾಯಿತ್ ಅಯಿಂಗಳ ಅಯಿಚತ್. ನಿಂಗ ಊರ್‌ಕ್ ಪೋಯಿತ್ ನಿಂಗ ಕೂಳಿ ಪುಡ್‌ಚಯಿಂಗಳ ಬುಡ್‍ತಿ ಎಣ್ಣಿಯಂಡ್ ಶಕ್ತಿ ಕೊಡ್‍ತತ್.

⁸ನಿಂಗ ಪ್ರಯಾಣ ಪೋಪಕ ನಿಂಗಡ ಕೂಡೆ ಏದು ಎಡ್‍ತಂಡ್ ಪೋಕತಿ. ಬರಿ ಒರ್ ಕೋಲ್ ಎಡ್‌ತ ಪೋಯಿ. ಚೀಲ, ಒಟ್ಟಿ ಪಿಂಞ ನಿಂಗಡ ಜೋಬ್‌ಲ್ ದುಡ್ಡ್‌ಕಾಸ್ ಎಡ್‌ತ ಪೋಕತಿ.

⁹ಕಾಲ್‌ಕ್ ಎಕ್ಕಡ ಇಟ್ಟೊಳಿ ಆಚೇಂಗಿ ಒರ್ ಬಟ್ಟೇನು ಎಡ್‌ತ ಪೋಕತಿ.

¹⁰ನಿಂಗಳ ದಾರ್ ಮರ್ಯಾದೆಲ್ ಸತ್ಕಾರ ಮಾಡ್‌ವೋ ಅಲ್ಲಿಯೇ ಆ ಮನೆಲ್ ನಿಂಗ ಪೋಕಣೆಕ್ ಇರಿ.

¹¹ನಿಂಗ ಒರ್ ಊರ್‌ಕ್ ಪೋನಕ ನಿಂಗಳ ಸ್ವಾಗತ ಮಾಡತ ಅಥವ ನಿಂಗ ಮಾಡ್‍ನ ಬೋದನೆನ ಕ್‍ೕಕತೆ ಪೋಚೇಂಗಿ, ನಿಂಗಡ ಕಾಲ್‌ಲ್ ಉಳ್ಳ ದೂಳ್‍ನ ಕೊಡ್‌ಕ್‌ವಂಜಿ ಬಾರಿ, ಅಯಿಂಗಕ್ ಅದ್ ಒರ್ ಎಚ್ಚರಿಕೆ ಕೊಡ್‍ತನೆಕೆ ಆಪ.[12]

¹²ಆ ಶಿಷ್ಯಂಗ ಪೊರಮೆ ಪೋಪಂಜಿ ಜನಕ್: ನಿಂಗ ದೇವಡ ಪಕ್ಕ ನಿಂಗಡ ಪಾಪಕಾಯಿತ್ ಪಶ್ಚಾತಾಪ ಪಟ್ಟಿತ್ ಬಾರೀಂದ್ ಬೋದನೆ ಕೊಡ್‌ತಂಡ್ ಪೋಚಿ.

¹³ಅಯಿಂಗ ದುಂಬ ಜನಡ ಕೂಳಿನ ಬುಡ್‌ತಿಯಂಡ್, ಕಾಯಿಲೆ ಉಳ್ಳ ಜನಕ್ ಎಣ್ಣೇನ ತೇಚಿತ್ ಜನಳ ವಾಸಿ ಮಾಡ್‍ಚಿ.

¹⁴ಅಲ್ಲಿಯತ್‍ರ ರಾಜನಾನ ಹೆರೋದಂಗ್ ಇದೆಲ್ಲಾ ಗೊತ್ತಾಚಿ. ಎನ್ನನೆ ಎಣ್ಣ್‌ಚೇಂಗಿ ಯೇಸುರ ವಿಷಯ ಎಲ್ಲೆಲಿಯು ಕ್‍ೕಳಿಪಟ್ಟಡಿಂಜತ್. ಚೆನ್ನ ಜನ, ಇಂವೊ ಚತ್ತ್‌ಪೋನ ಯೋಹಾನ. ಇಂವೊ ಚಾವ್‍ಯಿಂಜ ಬದ್‌ಕಿತ್ ಬಂದಿತುಂಡ್. ಅದ್ಂಗೇ ಇಚ್ಚಕ್ ಬಲ್ಯ ಅದ್ಬುತ ಕಾರ್ಯತ್‍ನೆಲ್ಲಾ ಇಂವೊಂಗ್ ಮಾಡ್‌ವಕ್ ಕಯ್ಯೂಂದ್ ಎಣ್ಣ್‌ಚಿ.

¹⁵ಚೆನ್ನ ಜನ: ಇಂವೊ ಎಲೀಯ ಪ್ರವಾದಿ ಎಣ್ಣ್‌ವಂವೊನಾಯಿತಿಕ್ಕೂಂದ್ ಎಣ್ಣ್‌ಚಿ; ಇಂಞು ಚೆನ್ನ ಜನ: ಇಂವೊ ಒರ್ ಪೂರ್ವ ಕಾಲತ್‍ರ ಪ್ರವಾದಿ ಆಯಿತಿಕ್ಕೂಂದ್ ತಕ್ಕ್ ಪರ್ಂದಂಡ್ ಇಂಜತ್.

¹⁶ಈ ವಿಷಯತ್‌ನೆಲ್ಲ ಹೆರೋದ ರಾಜ ಕ್‍ೕಟಿತ್: ನಾನ್ ಮಂಡೆನ ಕೆತ್ತ್‌ಚಿಟ್ಟ ಯೋಹಾನನೇ ಇಂವೊ; ಆಚೇಂಗಿ ಅಂವೊ ಎದ್ದಿತ್ ಬಾತ್‍ೕಂದ್ ಎಣ್ಣ್‌ಚಿ.

¹⁷ಈ ಹೆರೋದ ಅಂವೊಂಡ ಅಣ್ಣ ಫಿಲಿಪ್ಪಂಡ ಪೊಣ್ಣ್ ಹೆರೋದ್ಯನ ಮಂಗಲ ಕಯಿಚಗುಂಡ್, ನೀನ್ ನೀಡ ಅಣ್ಣಂಡ ಪೊಣ್ಣ್‌ನ ಮಂಗಲ ಮಾಡ್‍ನದ್ ನ್ಯಾಯವಲ್ಲಾಂದ್ ಯೋಹಾನ, ರಾಜ ಹೆರೋದಂಗ್ ಎಣ್ಣಿಯಂಡ್ ಇಂಜತ್.

¹⁸ಆನಗುಂಡ್ ಹೆರೋದ ಯೋಹಾನನ ಪುಡ್‌ಚಿತ್ ಕೈಕಾಲ್‌ಕ್ ಸರ್ಪಣಿ ಇಟ್ಟಿತ್ ಜೈಲ್‍ಲ್ ಇಟ್ಟತ್.

¹⁹ಅದ್ಂಗಾಯಿತ್ ಹೆರೋದ್ಯ ಯೋಹಾನಂಡ ಮೇಲೆ ಪಗೆ ಬೆಚ್ಚಂಡಿಂಜತ್. ಅಂವೊನ ಕೊಲ್ಲಂಡೂಂದ್ ಎಣ್ಣಿಯಂಡಿಂಜತ್, ಆಚೇಂಗಿ ಕಯಿಂಜಿತ್‌ಲ್ಲೆ.

²⁰ಎನ್ನಂಗೆಣ್ಣ್‌ಚೇಂಗಿ ಯೋಹಾನ ನೀತಿವಂತಂವೊನಾಯಿತ್ ದೇವಡ ಬಕ್ತನಾಯಿತ್ ಉಳ್ಳದ್ ಹೆರೋದಂಗ್ ಗೊತ್ತಾನಗುಂಡ್ ಅಂವೊಂಗ್ ಬೊತ್ತಿಯಂಡ್ ಜೈಲ್‍ಲ್ ಚಾಯಿತೆ ಕಾಪಾಡಿಯಂಡ್ ಇಂಜತ್. ಹೆರೋದಂಗ್ ಯೋಹಾನ ಪರಿಯುವ ಉಪದೇಶತ್‍ನ ಕ್‍ೕಪಕ್ ದುಂಬ ಕುಶಿ ಇಂಜತ್, ಆಚೇಂಗಿ ಸಹ ಯೋಹಾನಂಡ ಎಚ್ಚರಿಕೆ ಕ್‍ೕಪಕ ಹೆರೋದಂಗ್ ಪೋಡಿ ಆಪಕಿಂಜತ್.

²¹ಒಮ್ಮ ಹೆರೋದ ತಾಂಡ ಪುಟ್ಟ್‌ನ ದಿವಸತ್‍ಲ್ ಬಲ್ಯ ಬಲ್ಯ ಅದಿಕಾರಿಯಳ, ಪಡೆಲುಳ್ಳ ಬಲ್ಯ ಸೇನಾದಿಪತಿಯಳ, ಗಲಿಲಾಯತ್‍ಲುಳ್ಳ ಮುಕ್ಯಪಟ್ಟ ಜನಳ ಕಾಕಿತ್ ಗದ್ದಾಳ ಮಾಡ್‍ಚಿ. ಅಕ್ಕ ಹೆರೋದ್ಯಕ್ ಸಂದರ್ಪ ಕ್‌ಟ್ಟಿಪೋಚಿ.

²²ಉಂಡಿತ್ ಆನದು ಹೆರೋದ್ಯಡ ಮೋವ ಒಳ್‍ಕ್ ಬಂದಿತ್ ಅಯಿಂಗಡ ಎಲ್ಲಾಡ ಮಿಂಞತ್‍ಲ್ ಆಡ್‌ಚಿ. ಈ ಆಟತ್‌ನ ನೋಟ್‍ನಗುಂಡ್ ರಾಜನಾನ ಹೆರೋದಂಗೂ ಅಲ್ಲಿ ಇಂಜ ಎಲ್ಲಾರ್‌ಕು ಕುಶಿ ಆಯಿಪೋಚಿ. ಅಕ್ಕ ಹೆರೋದ ರಾಜ ಆ ಮೂಡಿನ ಕಾಕಿತ್, ನೀಕ್ ನನ್ನಗುಂಡ್ ಎಂತ ಆಂಡು, ಎಂತ ಬೋಂಡು? ನೀಕ್ ಎಂತ ಬೋಂಡ್‍ಚೇಂಗಿಯು ನಾನ್ ತಪ್ಪೀಂದ್ ಎಲ್ಲಾಡ ಮಿಂಞತ್‍ಲ್ ಸತ್ಯ ಮಾಡ್‍ಚಿ.

²³ನಾಡ ರಾಜ್ಯತ್‍ರ ಪಾದಿ ಬಾಗತ್‍ನ ಕ್‍ೕಟತೇಂಗಿಯು ನಾನ್ ನೀಕ್ ತಪ್ಪೀಂದ್ ಆಣೆ ಇಟ್ಟಿತ್ ಎಣ್ಣ್‌ಚಿ.

²⁴ಅವ ಪೊರಮೆ ಪೋಯಿತ್: ನಾನ್ ಎಂತ ಕ್‍ೕಕಂಡೂಂದ್ ಅವಡ ಅವ್ವಂಡ ಪಕ್ಕ ಕ್‍ೕಟತ್. ಅದ್ಂಗ್ ಅವ: ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಮಂಡೆನ ಕೆತ್ತಿತ್ ತರಂಡೂಂದ್ ಕ್‍ೕಳ್‍ೕಂದ್ ಎಣ್ಣ್‌ಚಿ.

²⁵ಆ ಮೂಡಿ ಬೆರಿಯ ರಾಜಂಡ ಪಕ್ಕ ಪೋಯಿತ್ ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಮಂಡೆನ ಕೆತ್ತಿತ್ ಇಕ್ಕ ತಳಿಯತ್‍ಲ್ ಬೆಚ್ಚಿತ್ ತಪ್ಪಕ್ ಎಣ್ಣ್‌ಚಿ.

²⁶ಈ ತಕ್ಕ್‌ನ ಕ್‍ೕಟದು ರಾಜ ಹೆರೋದಂಗ್ ಪೆರ್ತ್ ಬೇಜಾರ್ ಆಚಿ. ಇಂಜಕಲೂ ಎಲ್ಲಾಡ ಮಿಂಞತ್ ಆಣೆ ಮಾಡ್‍ನಗುಂಡ್ ಬಯ್ಯಕ್ ಎಡ್‌ಕತನೆಕೆ ಆಯಿಪೋಚಿ.

²⁷ರಾಜ ಒರ್ ಸಿಪಾಯಿನ ಕಾಕಿತ್ ನೀನ್ ಜೈಲ್‌ಕ್ ಪೋಪಂಜಿ ಆ ಯೋಹಾನಂಡ ಮಂಡೆನ ಕೆತ್ತಿತ್ ಕೊಂಡ್‌ಬಾಂದ್ ಎಣ್ಣ್‌ಚಿ.

²⁸ಆ ಸಿಪಾಯಿ, ರಾಜನಾನ ಹೆರೋದ ಎಣ್ಣ್‌ನ ಪ್ರಕಾರ ಯೋಹಾನಂಡ ಮಂಡೆನ ಕೆತ್ತಿತ್ ಒರ್ ತಳಿಯತ್‍ರ ಮೇಲೆ ಬೆಚ್ಚಿತ್ ಕೊಂಡ್‌ಬಂತ್ ಆ ಮೂಡಿಕ್ ಕೊಡ್‍ತತ್. ಆ ಮೂಡಿ ಅವ್ವಂಗ್ ಕೊಂಡ್ ಪೋಯಿತ್ ಕೊಡ್‍ತತ್.

²⁹ಯೋಹಾನಂಡ ಶಿಷ್ಯಂಗ ಈ ಸುದ್ದಿನ ಕ್‍ೕಪದು ಜೈಲ್‌ಕ್ ಬಂದಿತ್ ಯೋಹಾನಂಡ ತಡೀನ ಎಡ್‌ತ ಪೋಯಿತ್ ಪೂತತ್.

³⁰ಯೇಸು ಅಯಿಚ ಅಪೊಸ್ತಲಂಗ ಯೇಸುರ ಪಕ್ಕ ವಾಪಸ್ ಬಂದಿತ್, ಅಯಿಂಗ ಏದೆಲ್ಲಾ ಬೋದನೆ ಪಿಂಞ ಅದ್ಬುದ ಕಾರ್ಯತ್‍ನ ಮಾಡ್‍ಚೋ ಅದ್‍ನೆಲ್ಲಾ ಎಣ್ಣ್‌ಚಿ.

³¹ಯೇಸುರ ಪಕ್ಕ ದುಂಬ ಜನ ಪೋಯಂಡ್ ಬಂದಂಡ್ ಇಂಜತ್. ಆನಗುಂಡ್ ಯೇಸುಕ್ ಪಿಂಞ ಯೇಸುರ ಶಿಷ್ಯಂಗಕ್ ಉಂಬ ತಿಂಬಕು ಸಮಯ ಕ್‌ಟ್ಟಿಯಂಡಿಂಜಿಲೆ. ನಂಗ ಇಲ್ಲಿಂಜ ದಾರೂ ಇಲ್ಲತ ಜಾಗಕ್ ಪೋಯಿತ್ ಚೆನ್ನ ಆರಾಮ್‍ಲ್ ಇಕ್ಕನಾಂದ್ ಎಣ್ಣ್‌ಚಿ.

³²ಅಯಿಂಗ ದೋಣಿಲ್ ಅಳ್‌ತಿತ್ ದಾರೂ ಇಲ್ಲತ ಜಾಗಕ್ ಪೋಚಿ.

³³ದುಂಬ ಜನಕ್ ಈ ದೋಣಿಲ್ ಪೋಪಯಿಂಗ ದಾರ್‍ೕಂದ್ ಗೊತ್ತಾಯಿ ಪೋಚಿ. ಅಯಿಂಗ ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಆ ಕರೆಕ್ ಬಪ್ಪಕ್ ಮಿಂಞಲೇ ಓಡಿ ಪೋಯಿತ್ ಎತ್ತ್‌ಚಿ.

³⁴ಯೇಸು ದೋಣಿಯಿಂಜ ಇಳಿವಕ ದುಂಬ ಜನಡ ಗುಂಪ್‍ನ ಕಾಂಬಕ, ಕೊರಿ ಕಾಪಂವೊ ಇಲ್ಲತ ಕೊರಿ ಗುಡ್ಡೆರನೆಕೆ ಅಯಿಂಗ ಇಂಜಗುಂಡ್ ಅಯಿಂಗಡ ಮೇಲೆ ಅಂವೊಂಗ್ ದುಂಬ ಕನಿಕರ ಆಯಿತ್, ಅಯಿಂಗಕ್ ದುಂಬ ಬೋದನೆನ ವಿವರಿಚಿಟ್ಟತ್.

³⁵ಬಯಿಟ್ ಪಕ್ಕ ಬಂದಂಡಿಂಜಗುಂಡ್ ಅಂವೊಂಡ ಶಿಷ್ಯಂಗ ಯೇಸುರ ಪಕ್ಕ ಬಂದಿತ್ ಇದ್ ದಾರೂ ವಾಸ ಮಾಡತ ಜಾಗ, ದುಂಬ ಬಯಿಟಾಯಂಡುಳ್ಳಗುಂಡ್,

³⁶ಈ ಜನಳ ಪಕ್ಕತ್‍ಲ್ ಉಳ್ಳ ಊರ್ ಪಟ್ಟಣಕ್ ಪೋಪಕ್ ಎಣ್ಣ್, ಅಯಿಂಗ ಅಲ್ಲಿ ಪೋಯಿತ್ ತಿಂಬಕ್ ಎಂತೇಂಗಿ ಎಡ್‍ತಿತ್ ತಿಂಗಡ್‍ೕಂದ್ ಅಂವೊಂಗ್ ಎಣ್ಣ್‌ಚಿ.

³⁷ಅದ್ಂಗ್ ಯೇಸು: ನಿಂಗಳೇ ಅಯಿಂಗಕ್ ಉಂಬಕ್ ಕೊಡೀಂದ್ ಎಣ್ಣ್‌ಚಿ. ಅದ್ಂಗ್ ಶಿಷ್ಯಂಗ: ಎಂತ ಎಣ್ಣ್‌ವಿರಾ, ನಂಗ ಅಯಿಂಗಕ್ ಒಟ್ಟಿ ಎಡ್‌ತ ಬಪ್ಪಕಾಯಿತ್ ಇನ್ನೂರ್ ಬೊಳ್ಳಿರ ಪಣತ್‍ನ ಖರ್ಚಿಮಾಡಿತ್ ಅಯಿಂಗಡ ಕೆಲ ದುಂಬ್‌ಚಿಡುವದಾಂದ್ ಕ್‍ೕಟತ್.

³⁸ಅಕ್ಕ ಯೇಸು: ನಿಂಗಡ ಪಕ್ಕ ಎಚ್ಚಕ್ ಒಟ್ಟಿ ಉಂಡ್‍ೕಂದ್ ನೋಟಿತ್ ಬಾರೀಂದ್ ಎಣ್ಣ್‌ಚಿ. ಅಯಿಂಗ ನೋಟುವಂಜಿ ಅಂಜ್ ಒಟ್ಟಿ ದಂಡ್ ಮೀನು ಉಂಡ್‍ೕಂದ್ ಎಣ್ಣ್‌ಚಿ.

³⁹ಈ ಜನಯೆಲ್ಲ ಚೆರಿಯ ಚೆರಿಯ ಗುಂಪಾಯಿತ್ ಆ ಪಚ್ಚೆ ಪಿಲ್ಲ್‌ರ ಮೇಲೆ ಅಳ್‌ಪಕ್ ಎಣ್ಣೀಂದ್ ಯೇಸು ಶಿಷ್ಯಂಗಕ್ ಎಣ್ಣ್‌ಚಿ.

⁴⁰ಆ ಜನ ನೂರ್ ನೂರ್ ಪಿಂಞ ಐಂಬದ್ ಐಂಬದ್ ಜನಳಾಯಿತ್ ಅತ್ತಿ ಪತ್ತಿ ಅಳ್‌ತತ್.

⁴¹ಯೇಸು ಅಂಜ್ ಒಟ್ಟಿ ಪಿಂಞ ದಂಡ್ ಮೀನ್‌ನ ಪುಡ್‍ಚಂಡ್ ಕೊಡಿಕ್ ಪರಲೋಕತ್‌ನ ನೋಟುವಂಜಿ ದೇವಕ್ ವಂದನೆ ಮಾಡಿತ್, ಒಟ್ಟಿನ ಮುರಿಪಂಜಿ ಅಂವೊಂಡ ಶಿಷ್ಯಂಗಕ್ ಕೊಡ್‌ತಿತ್, ಜನಕೆಲ್ಲ ಕೊಡೀಂದ್ ಎಣ್ಣ್‌ಚಿ. ದಂಡ್ ಮೀನ್‌ನ ಸಹ ಎಲ್ಲಾರ್‌ಕು ಪಾಲ್‌ಮಾಡ್‌ಚಿ.

⁴²ಜನಯೆಲ್ಲ ಕೆಲ ದುಂಬ ತಿಂದಿತ್ ತೃಪ್ತಿಯಾನ ಪಿಂಞ,

⁴³ಪನ್ನೆರಂಡ್ ಕುಕ್ಕೆರಚ್ಚಕ್ ಒಟ್ಟಿಯು ಮೀನು ಬಾಕಿ ಆನಾನ ಯೇಸುರ ಶಿಷ್ಯಂಗ ಎಡ್‍ತತ್

⁴⁴ಒಟ್ಟಿ ಪಿಂಞ ಮೀನ್‌ನ ತಿಂದ ಆಣಾಳ್ ಮಾತ್ರ ಸುಮಾರ್ ಅಂಜ್ ಆಯಿರ ಇಂಜತ್.

⁴⁵ಯೇಸು ಜನಳ ಅಯಿಚಂಡಿಪ್ಪಕ, ಅಂವೊಂಡ ಶಿಷ್ಯಂಗಕ್, ದೋಣಿಲ್ ಪತ್ತಿತ್, ಅಕ್ಕಲೆ ಅಂವೊಂಗಿಂಜ ಮಿಂಞ ಕೆರೆರ ಆಬರಿಲ್ ಉಳ್ಳ ಬೇತ್ಸಾಯಿದ ಎಣ್ಣುವ ಜಾಗಕ್ ಬೆರಿಯ ಪೋಯೀಂದ್ ಅಯಿಚತ್.

⁴⁶ಯೇಸು ಅಲ್ಲಿಯತ್‍ರ ಜನಕೆಲ್ಲ ದೇವ ನಿಂಗಕ್ ನಲ್ಲದ್ ಮಾಡಡ್‍ೕಂದ್ ಎಣ್ಣಿತ್, ದೇವಡ ಪಕ್ಕ ಪ್ರಾರ್ಥನೆ ಮಾಡ್‌ವಕ್ ಕುಂದ್‌ರ ಕೊಡಿಕ್ ಪೋಚಿ.

⁴⁷ಬೈಟಾಪಕ ದೋಣಿ ಕೆರೆರ ಮದ್ಯತ್‍ಲ್ ಪೋಯಿತ್ಂಜತ್; ಯೇಸು ಒಬ್ಬನೇ ಕರೆಲ್ ಇಂಜತ್.

⁴⁸ಗಾಳಿ ಜೋರಾಯಿತ್ ಅಯಿಂಗಕ್ ಎದ್‍ಕೆ ಬೀಜಿಯಂಡಿಂಜಗುಂಡ್, ಯೇಸುರ ಶಿಷ್ಯಂಗ ದೋಣಿನ ಕಷ್ಟತ್‍ಲ್ ನೂಕಿಯಂಡ್ ಇಂಜಾನ ಯೇಸು ಕಂಡತ್. ಯೇಸು ಆ ಶಿಷ್ಯಂಗಡ ಪಕ್ಕ ಪೊಲಾಕ ನೇರತ್ ಒರ್ ಮೂಂದ್ ನಾಲ್ ಗಂಟೆಕ್ ನೀರ್‌ರ ಮೇಲೆ ನಡ್ಂದ್ ಬಂದಂಡಿಂಜತ್. ಅಂವೊ ಅಯಿಂಗಳ ದಾಟಿ ಪೋಪನೆಕೆ ಇಂಜತ್.

⁴⁹ಅಂವೊ ನೀರ್‌ಲ್ ನಡ್‍ಪದ್‌ನ ಕಂಡ ಅಯಿಂಗ ಅದ್ ಬೂತಾಂದ್ ಗೇನ ಮಾಡಿತ್ ಕೂತ್ ಕೊಡ್‍ಪಕ್ ಸುರು ಮಾಡ್‍ಚಿ.

⁵⁰ಅಯಿಂಗಕೆಲ್ಲ ಯೇಸುನ ಕಾಂಬದು ಪೋಡಿ ಆಯಿಪೋಚಿ. ನಿಂಗ ದೈರ್ಯ ಎಡ್‌ತೊಳಿ, ಇದ್ ನಾನೇ, ಪೋಡಿ ಬೋಂಡಾಂದ್ ಎಣ್ಣಿಯಂಡ್,

⁵¹ಯೇಸು ಅಯಿಂಗಡ ಕೂಡೆ ದೋಣಿಲ್ ಅಳ್‌ತಂಡತ್. ಅಲ್ಲಿ ಬೀಜಿಯಂಡಿಂಜ ಗಾಳಿ ನಿಂದತ್. ಆ ಶಿಷ್ಯಂಗಕ್ ಇಂಞು ಆಶ್ಚರ್ಯ ಆಚಿ.

⁵²ಅಯಿಂಗಡ ಮನಸ್ಸ್ ಕಲ್ಲಾಯಿತ್ಂಜಗುಂಡ್ ಅಂಜ್ ಆಯಿರ ಜನಕ್ ಒಟ್ಟಿಯು ಮೀನು ಇಂವೊ ಎನ್ನನೆ ಕೊಡ್‍ತತ್ ಎಣ್ಣಿಯಂಡ್ ಅಯಿಂಗಕ್ ಅರ್ಥ ಆಯಿತಿಲ್ಲೆ.

⁵³ಅಯಿಂಗ ಕೆರೆನ ದಾಟಿತ್ ಗೆನೆಜರೇತ್ ನಾಡ್‍ಕ್ ಬಂತ್ ದೋಣಿನ ಕೆಟ್ಟ್‌ಚಿ.

⁵⁴ಅಯಿಂಗ ದೋಣಿಯಿಂಜ ಇಳ್ಂಜನೆಕೆ ಯೇಸುನ ಅಲ್ಲಿಯತ್‍ರ ಜನ ಗೊತ್ತ್ ಮಾಡಿರ್‌ತ್.

⁵⁵ಅಲ್ಲಿ ಉಳ್ಳ ಜನ, ಎಲ್ಲಾ ಜಾಗಕು ಓಡಿ ಪೋಯಿತ್ ಅಲ್ಲಿಯತ್‍ರ ಕಾಯಿಲೆಕಾರಳ ಯೇಸುರ ಪಕ್ಕ ಪಲಂಬ್‌ಲ್ ಇಟ್ಟಿತ್ ನೇತಿಯಂಡ್ ಬಾತ್. ಅಂವೊ ಎಲ್ಲಿಯೆಲ್ಲಾ ಉಂಡ್‍ೕಂದ್ ಗೊತ್ತಾಚೋ ಆ ಜಾಗಕೆಲ್ಲಾ ಕಾಯಿಲೆಕಾರಳ ಕೊಂಡ್ ಬಾತ್.

⁵⁶ಯೇಸು ಏದೆಲ್ಲಾ ಊರ್‌ಕ್, ಪಟ್ಟಣಕ್, ದೇಶಕ್ಕು ಪೋಚೋ, ಜನ ಅಲ್ಲಿಯುಳ್ಳ ಪೇಟೇಕ್ ಕಾಯಿಲೆಕಾರಳ ಕಾಕಿಯಂಡ್ ಪೋಯಿತ್, ನೀನ್ ಇಟ್ಟಂಡುಳ್ಳ ಬಟ್ಟೇರ ತುದಿನಾಚೇಂಗಿಯು ಮುಟ್ಟ್‌ವಕ್ ಬುಡ್‍ೕಂದ್ ಯೇಸುನ ಬೋಡಿಯಂಡತ್. ದಾರೆಲ್ಲಾ ಮುಟ್ಟ್‌ಚೋ, ಅಯಿಂಗಡ ಕಾಯಿಲೆ ವಾಸಿ ಆಚಿ.