Read Kodava ಮಾರ್ಕ 7 Bible Online

ಮಾರ್ಕ 7 - Kodava bible

ಮಾರ್ಕ 7

¹ಯೆರೂಸಲೇಮ್ಂಜ ಚೆನ್ನ ಫರಿಸಾಯಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗೆಲ್ಲ ಯೇಸುರ ಪಕ್ಕ ಬಂತ್ ಸುತ್ತ್ ಕೆಟ್ಟ್‌ಚಿ.

²ಅಕ್ಕ ಯೇಸುರ ಚೆನ್ನ ಶಿಷ್ಯಂಗ, ಪದ್ದತಿರ ಪ್ರಕಾರ ಕೈಯಿನ ಕತ್ತತೆ ಉಂಬದ್‌ನ ಕಂಡಿತ್ ತಪ್ಪ್ ಕಂಡ್‌ಪುಡ್‌ಚತ್.

³ಎನ್ನಂಗೆಣ್ಣ್‌ಚೇಂಗಿ ಫರಿಸಾಯಂಗ ಪಿಂಞ ಯೆಹೂದ್ಯಂಗೆಲ್ಲರು, ಪೂರ್ವ ಕಾಲತ್‍ರ ಪೆರಿಯಯಿಂಗ ಎಣ್ಣ್‌ನ ಪದ್ದತಿರ ಪ್ರಕಾರ ಕೈಯಿನ ಕತ್ತತೆ ಉಂಬಕಿಂಜಿಲೆ.

⁴ಅದ್ ಅಲ್ಲತೆ ಪೇಟೇಯಿಂಜ ಬಂದ ಪಿಂಞ ಕುಳಿಕತೆ ಉಂಬಕಿಂಜಿಲೆ. ಅನ್ನನೆ ಕುಡಿಪ ಕಪ್ಪ್‌ನ, ಕುಡಿಕೆನ, ಚೆಂಬ್ ಪಾತ್ರತ್‍ನ ಚಾಯಿತೆ ಕತ್ತತೆ ಉಪಯೋಗಿಚಿಡುವಕಿಂಜಿಲೆ.

⁵ಅದ್ಂಗ್ ಫರಿಸಾಯಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಅಂವೊನ ನೋಟಿತ್: ಎನ್ನಂಗ್ ನೀಡ ಶಿಷ್ಯಂಗ ಪೂರ್ವ ಕಾಲತ್‍ರ ಪೆರಿಯಯಿಂಗ ಎಣ್ಣ್‌ನ ಪದ್ದತಿರ ಪ್ರಕಾರ ಮಾಡತೆ, ಕೈಯಿನ ಕತ್ತತೆ ಉಂಬಾಂದ್ ಯೇಸುನ ಕ್‍ೕಟತ್.

⁶ಅದ್ಂಗ್ ಯೇಸು ಇನ್ನನೆ ಜವಾಬ್ ಕೊಡ್‍ತತ್: ಈ ಜನ ಬರಿ ತಕ್ಕ್‌ಲ್ ನನ್ನ ತುದಿಪ, ಆಚೇಂಗಿ, ಅಯಿಂಗಡ ಹೃದಯ ನೇರಾಯಿತು ನನ್ನಿಂಜ ದೂರ ಉಂಡ್.

⁷ಅಯಿಂಗ ನನ್ನ ಆರಾದನೆ ಮಾಡ್‌ವ ಆಚೇಂಗಿ ಪ್ರಯೋಜನ ಇಲ್ಲೆ. ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ಜನ ಎಣ್ಣ್‌ನ ಕಾನೂನ್‌ನ, ನ್ಯಾಯಪ್ರಮಾಣವಾಯಿತ್ ಉಪದೇಶ ಮಾಡಿಯಂಡುಂಡ್‍ೕಂದ್,[13] ಕಪಟಿಯಾನ ನಿಂಗಡ ವಿಷಯತ್ ಯೆಶಾಯ ಪ್ರವಾದಿ ಚಾಯಿತೆ ಎಣ್ಣಿತುಂಡ್.

⁸ನಿಂಗ ದೇವಡ ವಾಕ್ಯತ್‍ನ ತ್‍ಕ್ಕಾರ ಮಾಡಿತ್, ಮನುಷ್ಯಂಡ ಉಪದೇಶ ಪ್ರಕಾರ ನಡ್‍ಪಿರ.

⁹ಇಂಞು ಯೇಸು, ನಿಂಗ ನಿಂಗಡ ಆಚಾರತ್‍ನ ಮಿಂಞಕ್ ನಡ್‍ತಿಯಂಡ್ ಪೋಪಕಾಯಿತ್ ಎಚ್ಚಕ್ ಹುಶಾರ್‌ಲ್ ದೇವಡ ವಾಕ್ಯತ್‍ನ ತ್‍ಕ್ಕಾರ ಮಾಡಿಯಂಡುಂಡ್‍ೕಂದ್ ಎಣ್ಣ್‌ಚಿ.

¹⁰ಮೋಶೆ ಆಜ್ಞೆ ಮಾಡ್‍ನ ಪ್ರಕಾರ, ನಿಂಗ ನಿಂಗಡ ಅಪ್ಪವ್ವಂಗಕ್ ಮರ್ಯಾದೆ ಕೊಡಿ,[14] ದಾರ್ ಅಪ್ಪವ್ವನ ದೂಷಣೆ ಮಾಡ್‌ವ ಅಂವೊನ ಕೊಲ್ಲಂಡು.[15]

¹¹ಆಚೇಂಗಿ ನಿಂಗ ದಾರಾಚೇಂಗಿಯು ನಿಂಗಡ ಅಪ್ಪವ್ವಂಡ ಪಕ್ಕ ನಾಕ್ ಇಕ್ಕ ಸಹಾಯ ಮಾಡ್‌ವಕ್ ಕಯ್ಯುಲೆ, ನಾನ್ ನಿಂಗಕ್ ತಪ್ಪಕುಳ್ಳಾನ ನಾನ್ ಕೊರ್ಬಾನಾಯಿತ್, ಎಣ್ಣ್‌ಚೇಂಗಿ ದೇವಕ್ ಕಾಣಿಕೆ ಕೊಡ್‍ಪ ವಸ್ತುವಾಯಿತ್ ಕೊಡ್‌ಪೀಂದ್ ಎಣ್ಣ್‌ಚೇಂಗಿ ನಿಂಗಡ ಜವಾಬ್ದಾರಿ ತ್‍ೕಂದತ್‍ೕಂದ್ ಎಣ್ಣುವಿರ.

¹²ಇಂಞು ಮಿಂಞಕ್ ಅಂವೊ ಅಂವೊಂಡ ಅಪ್ಪವ್ವಂಗಕ್ ಒರ್ ಸಹಾಯವು ಮಾಡ್‌ವಕ್ ಅವಸ್ಯ ಇಲ್ಲೆ.

¹³ಇನ್ನನೆ ನಿಂಗಡ ಆಚಾರತ್‍ರಗುಂಡ್ ದೇವಡ ವಾಕ್ಯತ್‍ನ ಅವಮಾನಮಾಡ್‌ವಿರ. ಅನ್ನನೆ ನಿಂಗ ಬೋರೆ ವಿಷಯತತ್‌ಲ್ ಸಹ ಮಾಡಿಯಂಡುಂಡ್.

¹⁴ಇಂಞೊಮ್ಮ ಅಂವೊ ಜನಡ ಗುಂಪ್‍ನ ಕಾಕುವಂಜಿ, ಅಯಿಂಗಳ ನೋಟಿತ್: ನಿಂಗ ಇದ್‍ನ ಚಾಯಿ ಕ್‍ೕಳಿ, ನಾಡ ತಕ್ಕ್‌ನ, ಕ್‍ೕಟಂಡ್ ಅರ್ಥ ಮಾಡಿಯೊಳಿ.

¹⁵ಪೊರಮೆಯಿಂಜ ಮನುಷ್ಯಂಡ ಬಾಯಿರೊಳ್‌ಕ್ ಪೋಪದ್ ಒಂದು ಅಂವೊನ ಅಶುದ್ದ ಮಾಡುಲೆ. ಆಚೇಂಗಿ ಮನುಷ್ಯಂಡ ಒಳ್‌ಳಿಂಜ ಪೊರಮೆ ಬಪ್ಪದೇ, ಅಂವೊನ ಅಶುದ್ದ ಮಾಡ್‌ವ.

¹⁶ದಾರ್‌ಕೇಂಗಿ ಕ್‍ೕಪಕ್ ಕುಶಿ ಉಂಡೇಂಗಿ ಕ್‍ೕಟಿತ್ ಅರ್ಥ ಮಾಡಿಯೊಳಿ.

¹⁷ಯೇಸು ಜನಡ ಗುಂಪ್‍ನ ಬುಟ್ಟಿತ್ ಮನೆರ ಒಳ್‍ಲ್ ಪೋಪಕ, ಅಂವೊಂಡ ಶಿಷ್ಯಂಗ ನೀನ್ ಇಕ್ಕ ಎಣ್ಣ್‌ನ ತಕ್ಕ್‌ನ ಅರ್ಥ ಮಾಡಿತ್ ಬುಡ್‌ತಿತ್ ಎಣ್ಣಿತಾಂದ್ ಎಣ್ಣ್‌ಚಿ.

¹⁸ಅದ್ಂಗ್ ಯೇಸು: ನಿಂಗಕ್ ಕೂಡೆ ಈ ತಕ್ಕ್ ಅರ್ಥ ಆಯಿತಿಲ್ಲೆಯಾ? ಮನುಷ್ಯಂಡ ಬಾಯಿರೊಳ್‌ಕ್ ಪೊರಮೆಯಿಂಜ ಪೋಪದ್ ಅಂವೊನ ಅಶುದ್ದ ಮಾಡುಲೆ,

¹⁹ಎನ್ನಂಗೆಣ್ಣ್‌ಚೇಂಗಿ ನಂಗ ಪೊರಮೆಯಿಂಜ ಏದ್ ತಿಂಬ ಅದ್ ಕೆಲತ್‍ರ ಒಳ್‍ಕ್ ಪೋಪದಲ್ಲತೆ ಹೃದಯಕ್ ಪೋಪುಲೆ. ಕೆಲತ್‍ರ ಒಳ್‍ಕ್ ಪೋಯಿತ್ ಅರ್‌ಗಣೆ ಆಯಿತ್ ಅದ್ ಪೊರಮೆ ಬಪ್ಪ. ಆನಗುಂಡ್ ಎಲ್ಲಾನ ತಿಂಗಲೂಂದ್ ಯೇಸು ಎಣ್ಣ್‌ಚಿ.

²⁰ಏದೆಲ್ಲಾ ಮನುಷ್ಯಂಡ ಹೃದಯತ್ಂಜ ಪೊರಮೆ ಬಪ್ಪ, ಅದೇ ಮನುಷ್ಯನ ಅಶುದ್ದ ಮಾಡ್‌ವ.

²¹ಎನ್ನಂಗೆಣ್ಣ್‌ಚೇಂಗಿ ನಾನಾತರ ಕೆಟ್ಟ ಗೇನ, ನೀತಿ ಇಲ್ಲತ ಕೆಲಸ, ದರೋಡೆ, ಕೊಲೆ, ವ್ಯಬಿಚಾರ,

²²ಬೋಂಡತಾಸೆ, ಎಲ್ಲಾ ಕೆಟ್ಟ ಕೆಲಸ, ಮೋಸ, ಅಯೋಗ್ಯತನ, ಒಟ್ಟೆಕಿಚ್ಚ್, ಬೈಗಳ, ಹಮ್ಮ್, ಬುದ್ದಿ ಕೆಟ್ಟ ಗುಣ ಎಲ್ಲಾ ಮನುಷ್ಯಂಗಡ ಹೃದಯತ್ಂಜೆ ಬಪ್ಪ.

²³ಇದೆಲ್ಲಾ ಮನುಷ್ಯಂಡ ಹೃದಯತ್ಂಜ ಬಪ್ಪಂಜಿ ಅಂವೊನ ಅಶುದ್ದ ಮಾಡ್‌ವ.

²⁴ಪಿಂಞ ಯೇಸು ಆ ಜಾಗತ್‍ನ ಬುಟ್ಟಿತ್ ತೀರ್ ಎಣ್ಣುವ ಒರ್ ಪಟ್ಟಣಕ್ ಪೋಚಿ. ಅಲ್ಲಿ ಅಂವೊ ಒರ್ ಮನೇರೊಳ್‌ಕ್ ಪೋಚಿ. ನಾನ್ ಇಲ್ಲಿ ಉಳ್ಳದ್ ದಾರ್‌ಕು ಗೊತ್ತಾಪನೆಕೆ ಇರಡ್‍ೕಂದ್ ಇಷ್ಟಪಟ್ಟತ್, ಆಚೇಂಗಿ ಅಂವೊ ಅನ್ನನೆ ಇಪ್ಪಕಯಿಂಜಿತ್‌ಲ್ಲೆ.

²⁵ಒರ್ ಪೊಣ್ಣಾಳ್‍ರ ಮೋವಕ್ ಕೂಳಿ ಪುಡ್‌ಚಿತ್ಂಜತ್. ಅವಕ್ ಯೇಸು ಇಲ್ಲಿ ಉಂಡ್‍ೕಂದ್ ಗೊತ್ತಾನಗುಂಡ್ ಅವ ಯೇಸುರ ಪಕ್ಕ ಬಂದಿತ್ ಅಂವೊಂಡ ಕಾಲ್‌ಕ್ ಬುದ್ದತ್.

²⁶ಅವ ಸಿರಿಯ ದೇಶತ್‍ರ ಪೊಯಿನಿಕ ಪ್ರಾಂತ್ಯತ್‌ಳುಲ್ಲ ಗ್ರೀಕ್ ತಕ್ಕ್ ಪರಿಯುವ ಪೊಣ್ಣಾಳಾಯಿತ್ಂಜತ್. ಅವ, ನಾಡ ಮೋವಳ ಪುಡ್‌ಚಿತುಳ್ಳ ಕೂಳಿನ ಬುಡ್‍ತಿ ಎಣ್ಣಿಯಂಡ್ ಬೋಡಿಯಂಡತ್.

²⁷ಅವಕ್ ಯೇಸು: ನಂಗಡ ಮಕ್ಕ ಮಿಂಞ ತಿಂದಿತ್ ತೃಪ್ತಿಯಾಡ್. ಚೆರಿಯ ಮಕ್ಕಡ ಆಹಾರತ್‍ನ ಎಡ್‍ತಿತ್ ನಾಯಿಕ್ ಕನಿಪದ್ ಸರಿಯಲ್ಲಾಂದ್ ಎಣ್ಣ್‌ಚಿ.

²⁸ಅದ್ಂಗ್ ಅವ: ಅಕ್ಕು ಒಡೆಯನೇ, ಮೇಜಿರ ಅಡಿಲಿಪ್ಪ ನಾಯಿಯು, ಮಕ್ಕ ತಿಂಬಕ ಅಡಿಕ್ ಬುದ್ದಾನ ತಿಂಬಾಂದ್ ಎಣ್ಣ್‌ಚಿ.

²⁹ಅಕ್ಕ ಯೇಸು: ನೀನ್ ಈ ತರ ಉತ್ತರ ಕೊಡ್‍ತಾಂಗ್ ನೀನ್ ಮನೆಕ್ ಪೋ, ನೀಡ ಮೋವಡ ಕೂಳಿ ಅವಳ ಬುಟ್ಟ್ ಪೋಯಿತಿಪ್ಪಾಂದ್ ಎಣ್ಣ್‌ಚಿ.

³⁰ಅವ ಮನೆಕ್ ಪೋಯಿತ್ ನೋಟುವಕ ಕುಂಞಿರ ಮೇಲ್‍ಲುಳ್ಳ ಕೂಳಿ ಬುಟ್ಟ್ ಪೋಯಿತ್ ಕುಂಞಿ ಬುದ್ದಂಡ್ ಇಂಜಾನ ಕಂಡತ್.

³¹ಯೇಸು ಪುನಃ ತೀರ್ ಸೀದೋನ್ ಪಟ್ಟಣತ್‍ರ ಪ್ರಾಂತ್ಯತ್‍ನ ಬುಟ್ಟಿತ್ ದೆಕಪೊಲಿ ಪ್ರಾಂತ್ಯತ್‍ರ ಬಟ್ಟೆ ಮೂಲಕ ಗಲಿಲಾಯ ಕೆರೆರ ಕರೆಕ್ ಎತ್ತ್‌ಚಿ.

³²ಚೆನ್ನ ಜನ, ಕೆಮಿ ಕೇಕತ ಪಿಂಞ ಬಾಯಿ ಬರತ ಒರ್ ಮನುಷ್ಯನ ಯೇಸುರ ಪಕ್ಕ ಕಾಕಿಯಂಡ್ ಬಂತ್ ನೀಡ ಕೈಯಿನ ಇಂವೊಂಡ ಮೇಲೆ ಬೆಯ್ಯ್ಂದ್ ಬೋಡಿಯಂಡತ್.

³³ಯೇಸು ಜನಡ ಗುಂಪ್‌ಂಜ ಅಂವೊನ ದೂರ ಕಾಕಿಯಂಡ್ ಪೋಯಿತ್ ಅಂವೊಂಡ ಕೆಮಿರ ಮೇಲೆ ಬೆರತ್‌ನ ಬೆಚ್ಚಿತ್, ತುಪ್ಪಿತ್ ಅಂವೊಂಡ ನಾವ್‌ನ ತೊಟ್ಟತ್.

³⁴ಅಂವೊ ಕೊಡಿಕ್ ಪರಲೋಕತ್‌ನ ನೋಟ್‌ವಂಜಿ, ನಿಟ್ಟುಸಿರ್ ಬುಟ್ಟಿತ್, ಎಪ್ಫಥಾಂದ್ ಎಣ್ಣ್‌ಚಿ. ಅದ್ಂಗ್ ತೊರಕ್‌ಡ್‍ೕಂದ್ ಅರ್ಥ.

³⁵ಅಚ್ಚಕ್ ಬೆರಿಯ ಆ ಮನುಷ್ಯಂಡ ಕೆಮಿ ಕ್‍ೕಟಿತ್, ಅಂವೊಂಡ ನಾವ್‌ಡ ಕೆಟ್ಟ್ ಅಯಿಂಜಿತ್, ಒರ್ ತೊಂದರೆಯು ಇಲ್ಲತೆ ತಕ್ಕ ಪರಿಯುವಕ್ ಸುರು ಮಾಡ್‍ಚಿ.

³⁶ದಾರ್‌ಕು ಎಣ್ಣ್‌ವಕ್ಕಾಗಾಂದ್ ಯೇಸು ಜನಕೆಲ್ಲಾ ಎಣ್ಣ್‌ಚಿ. ಅಂವೊ ದಾರ್‌ಕು ಎಣ್ಣ್‌ವಕ್ಕಾಗಾಂದ್ ಎಚ್ಚಕ್ ಎಣ್ಣ್‌ಚೋ, ಅಚ್ಚಕ್ ಈ ನಲ್ಲ ಸುದ್ದಿನ ಜನ ಪ್ರಚಾರ ಮಾಡಿಯಂಡ್ ಇಂಜತ್.

³⁷ಯೇಸುರ ವಿಷಯತ್ ಜನಕೆಲ್ಲಾ: ಅಂವೊ ಎಲ್ಲಾ ಚಾಯಿತೆ ಮಾಡ್‍ಚಿ, ಕೆಮಿ ಕೇಕತಯಿಂಗಳ ಕ್‍ೕಪನೆಕೆ, ಬಾಯಿ ಬಕ್ಕತಯಿಂಗಳ ತಕ್ಕ ಪರಿಯುವನೆಕೆ ಮಾಡ್‍ಚೀಂದ್ ದುಂಬ ಆಶ್ಚರ್ಯ ಆಚಿ.