Read Kodava ಮಾರ್ಕ 8 Bible Online

ಮಾರ್ಕ 8 - Kodava bible

ಮಾರ್ಕ 8

¹ಅಂದತ ದಿನತ್‌ಲ್ ಇಂಞೊರ್ ಬಲ್ಯ ಗುಂಪ್ ಜನ ಯೇಸುರ ಪಕ್ಕ ಬಾತ್. ಈಂಗ ನಾಡ ಪಕ್ಕ ಮೂಂದ್ ದಿವಸತ್ಂಜ ಉಂಡ್, ಅಯಿಂಗ ಒಂದು ತಿಂದಿತ್‌ಲ್ಲೆ. ಯೇಸು ಅಂವೊಂಡ ಶಿಷ್ಯಂಗಳ ಕಾಕುವಂಜಿ:

²ನಾಕ್ ಈ ಜನಳ ಕಾಂಬಕ್ ದುಂಬ ಬೇಜಾರಾಯಂಡುಂಡ್. ಈ ಜನ ನಾಡ ಪಕ್ಕ ಮೂಂದ್ ದಿವಸತ್ಂಜ ಒಂದು ತಿಂದಿತ್‌ಲ್ಲೆ.

³ಚೆನ್ನ ಜನಾಂಗ ದೂರತ್ಂಜ ಬಂದಿತುಂಡ್. ನಾನ್ ಅಯಿಂಗಕ್ ಒಂದು ತಿಂಬಕ್ ಕೊಡ್‍ಕತೆ ಬಯ್ಯಕ್ ಅಯಿಚತೇಂಗಿ ಅಯಿಂಗ ಸೊಯ ತಪ್ಪಿತ್ ಬುದ್ದ್‌ರ್‌ವ.

⁴ಅದ್ಂಗ್ ಶಿಷ್ಯಂಗ: ಈ ಮಣಬೂಮಿಲ್ ಇಚ್ಚಕ್ ಜನ ತಿಂಬಕ್ ಎಲ್ಲಿಂಜ ಒಟ್ಟಿ ಕ್‌ಟ್ಟುವಾಂದ್ ಯೇಸುನ ಕ್‍ೕಟತ್.

⁵ಅದ್ಂಗ್ ಅಂವೊ: ನಿಂಗಡ ಪಕ್ಕ ಎಚ್ಚಕ್ ಒಟ್ಟಿ ಉಂಡ್‍ೕಂದ್ ಶಿಷ್ಯಂಗಳ ಕ್‍ೕಟತ್. ಅಕ್ಕ ಶಿಷ್ಯಂಗ: ಏಳ್ ಒಟ್ಟಿ ಉಂಡ್‍ೕಂದ್ ಎಣ್ಣ್‌ಚಿ.

⁶ಅಲ್ಲಿ ಇಂಜ ಜನಳ ನೆಲತ್‍ರ ಮೇಲೆ ಅಳ್‌ಪಕ್ ಯೇಸು ಎಣ್ಣ್‌ಚಿ. ಪಿಂಞ ಯೇಸು ಆ ಏಳ್ ಒಟ್ಟಿನ ಎಡ್‍ತಿತ್, ದೇವಕ್ ವಂದನೆ ಮಾಡಿತ್, ಒಟ್ಟಿನ ಪೊಳ್‌ಚಿತ್ ಶಿಷ್ಯಂಗಕ್ ಕೊಡ್‌ತಿತ್, ಎಲ್ಲಾರ್‌ಕು ಈ ಒಟ್ಟಿನ ಕೊಡೀಂದ್ ಎಣ್ಣ್‌ಚಿ. ಅದೇ ಪ್ರಕಾರ ಯೇಸುರ ಶಿಷ್ಯಂಗ ಎಲ್ಲಾರ್‌ಕು ಒಟ್ಟಿನ ಕೊಡ್‍ತತ್.

⁷ಚೆನ್ನ ಚೆರಿಯ ಮೀನ್ ಇಂಜತ್. ಇದ್‍ನ ಸಹ ದೇವಕ್ ವಂದನೆ ಎಣ್ಣಿತ್ ಎಲ್ಲಾರ್‌ಕು ಕೊಡ್‍ಪಕ್ ಕೊಡ್‍ತತ್.

⁸ಅಯಿಂಗ ಎಲ್ಲಾರು ತೃಪ್ತಿಯಾಯಿತ್ ತಿಂದತ್. ಜನ ತಿಂದಿತ್ ಆನುದು ಏಳ್ ಬಟ್ಟಿ ಒಟ್ಟಿ ಬಾಕಿ ಇಂಜತ್.

⁹ಅಲ್ಲಿ ಒಟ್ಟಿ ತಿಂದಯಿಂಗ ನಾಲ್ ಆಯಿರ ಜನ ಇಂಜತ್. ಪಿಂಞ ಯೇಸು ಆ ಜನಳ ಅಯಿಚತ್.

¹⁰ಯೇಸು ಎಲ್ಲಾ ಜನಳ ಅಯಿಪಂಜಿ, ಅಕ್ಕಣೆ ಅಂವೊನು ಅಂವೊಂಡ ಶಿಷ್ಯಂಗಳು ದಲ್ಮನೂಥ ಎಣ್ಣುವ ಪ್ರಾಂತ್ಯಕ್ ದೋಣಿಲ್ ಪೋಚಿ.

¹¹ಚೆನ್ನ ಫರಿಸಾಯಂಗ ಯೇಸುರ ಪಕ್ಕ ಬಂದಿತ್ ಅಂವೊನ ಕೆಣಿಪಕಾಯಿತ್ ದುಂಬ ವಾದ ಮಾಡ್‍ಚಿ. ದೇವ ನಿನ್ನ ನೇರಾಯಿತು ಒಪ್ಪಿಯಂಡತಾಂದ್ ನಂಗಕ್ ಈ ವಿಷಯತ್‍ಲ್ ಬಾನತ್ಂಜ ಒರ್ ಗುರ್‍ತ್‍ನ ಕಾಟ್‍ೕಂದ್ ಕ್‍ೕಟತ್.

¹²ಯೇಸು ತಾಂಡ ಆತ್ಮತ್‍ಲ್ ನಿಟ್ಟುಸಿರ್ ಬುಟ್ಟಿತ್, ಈ ಸಂತಾನಕಾರಂಗ ಎನ್ನಂಗ್ ಗುರ್‍ತ್‍ನ ತ್‍ೕಡ್‌ವ? ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ, ಈ ಸಂತಾನಕಾರಂಗಕ್ ಬಾನತ್ಂಜ ಒರ್ ಗುರ್‍ತ್‍ನ ಸಹ ಕಾಟಿ ಕೊಡ್‍ಪ್‍ಲೇಂದ್ ಎಣ್ಣಿತ್,

¹³ಅಯಿಂಗಳ ಬುಟ್ಟ್‌ರ್‌ವಂಜಿ ಕೆರೆರ ಆ ಕರೆಕ್ ದೋಣಿಲ್ ಪೋಚಿ.

¹⁴ಯೇಸುರ ಶಿಷ್ಯಂಗ ಬೋಂಡಿಯಚ್ಚಕ್ ಒಟ್ಟಿ ಎಡ್‌ತ ಬಪ್ಪಕ್ ಮರ್ಂದ್‌ರ್‌ತ್, ಒರೇ ಒರ್ ಒಟ್ಟಿ ಮಾತ್ರ ಇಂಜತ್.

¹⁵ನಿಂಗ ಫರಿಸಾಯಂಗಡ ಪಿಂಞ ಹೆರೋದಂಡ ಈಸ್ಟ್‌ರ ವಿಷಯತ್‍ಲ್ ಜಾಗ್ರತೆಲ್ ಇರಂಡೂಂದ್ ಯೇಸು ಎಚ್ಚರ ಮಾಡ್‍ಚಿ.

¹⁶ಅದ್ಂಗ್ ಅಯಿಂಗ: ನಂಗ ಒಟ್ಟಿ ಎಡ್‌ತ ಬರತಾಂಗ್ ಯೇಸು ಇನ್ನನೆ ಎಣ್ಣುವಾಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದಂಡಿಂಜತ್.

¹⁷ಯೇಸುಕ್ ಇದ್ ಗೊತ್ತಾಯಿ ಪೋಚಿ; ನಿಂಗ ಎನ್ನಂಗ್ ಒಟ್ಟಿ ಇಲ್ಲೇಂದ್ ಎಣ್ಣುವಿರ? ನಿಂಗಕ್ ಇಂಞು ಗೊತ್ತಾಯಿತ್‌ಲ್ಲೆಯಾ ಇಲ್ಲತಪೋಚೇಂಗಿ ಅರ್ಥ ಆಪುಲೆಯಾ? ನಿಂಗಡ ಮನಸ್ಸ್ ಅಚ್ಚಕ್ ಕಮ್ಮಿ ಆಯಿಪೋಚಾ?

¹⁸ನಿಂಗಕ್ ಕಣ್ಣ್ ಇಂಜಿತು ಕಾಂಬ್‌ಲೆಯಾ? ನಿಂಗಕ್ ಕೆಮಿ ಇಂಜಿತು ಕ್‍ೕಪ್‌ಲೆಯಾ? ನಿಂಗ ಮರ್ಂದ್ ಪೋಯಿತುಳ್ಳಿರಾ?

¹⁹ನಾನ್ ಅಂಜ್ ಒಟ್ಟಿನ ಅಂಜ್ ಆಯಿರ ಜನಕ್ ಪೊಳ್‌ಚಿತ್ ಕೊಡ್‌ಪಕ ನಿಂಗ ಎಚ್ಚಕ್ ಕುಕ್ಕೆ ಒಟ್ಟಿ ಬಾಕಿ ಎಡ್‌ತಿರ? ಅದ್ಂಗ್: ಪನ್ನೆರಂಡ್‍ೕಂದ್ ಶಿಷ್ಯಂಗ ಎಣ್ಣ್‌ಚಿ.

²⁰ಪಿಂಞ ಯೇಸು: ನಾನ್ ಏಳ್ ಒಟ್ಟಿ ಮಾತ್ರ ಇಪ್ಪಕ ನಾಲ್ ಆಯಿರ ಜನಕ್ ಪೊಳ್‌ಚಿತ್ ಕೊಡ್‌ಪಕ ನಿಂಗ ಎಚ್ಚಕ್ ಕುಕ್ಕೆ ಒಟ್ಟಿ ಬಾಕಿ ಎಡ್‌ತಿರ? ಅದ್ಂಗ್: ಏಳ್ಂದ್ ಶಿಷ್ಯಂಗ ಎಣ್ಣ್‌ಚಿ.

²¹ಅಕ್ಕ ಯೇಸು: ನಿಂಗಕ್ ಇಂಞು ಅರ್ಥ ಆಯಿತಿಲ್ಲೆಯಾಂದ್ ಕ್‍ೕಟತ್.

²²ಅಯಿಂಗ ಬೇತ್ಸಾಯಿದ ಎಣ್ಣುವಲ್ಲಿಕ್ ಬಾತ್; ಅಲ್ಲಿಕ್ ಒರ್ ಕುರ್‌ಡನ ಯೇಸುರ ಪಕ್ಕ ಕಾಕಿಯಂಡ್ ಬಂತ್, ಯೇಸುನ ಅಂವೊಂಡ ಮೇಲೆ ಕೈ ಬೆಪ್ಪಕಾಯಿತ್ ಬೋಡಿಯಂಡತ್.

²³ಯೇಸು ಆ ಮನುಷ್ಯಂಡ ಕೈ ಪುಡ್‍ಚಿ ಕಾಕಿಯಂಡ್ ಊರ್‌ರ ಆಬರಿಕ್ ಪೋಯಿತ್, ಆ ಮನುಷ್ಯಂಡ ಕಣ್ಣ್‌ಕ್ ತುಪ್ಪಿತ್, ಅಂವೊಂಡ ಮೇಲೆ ಕೈ ಬೆಚ್ಚಿತ್, ನೀಕ್ ಎಂತೇಂಗಿಯು ಕಾಂಬಕ್ ಕಯ್ಯುವಾಂದ್ ಕ್‍ೕಟತ್.

²⁴ಆ ಮನುಷ್ಯ ಕೊಡಿಕ್ ನೋಟುವಂಜಿ: ಅಕ್ಕು ನಾಕ್ ಜನಳ ಕಾಂಬ, ಆಚೇಂಗಿ ಅಯಿಂಗ ಮರತ್‌ರನೆಕೆ ನಡ್‍ಪದ್ ಕಾಂಬಾಂದ್ ಎಣ್ಣ್‌ಚಿ.

²⁵ಯೇಸು ಪುನಃ ಅಂವೊಂಡ ಕೈಯಿನ ಆ ಮನುಷ್ಯಂಡ ಕಣ್ಣ್‌ಕ್ ಬೆಚ್ಚತ್, ಅಕ್ಕ ಅಂವೊಂಡ ಕಣ್ಣ್‌ರ ದೃಷ್ಟಿ ಸರಿಯಾಯಿತ್, ಅಂವೊ ಎಲ್ಲಾನ ಚಾಯಿತೆ ಕಂಡತ್.

²⁶ಪಿಂಞ ಯೇಸು, ನೀನ್ ಊರ್‌ಕ್ ಪೋಕತೆ, ದಾರ್‌ಕು ಎಣ್ಣತೆ, ನೇರೆ ಮನೆಕ್ ಪೋಂದ್ ಆಜ್ಞೆ ಮಾಡ್‍ಚಿ.

²⁷ಪಿಂಞ ಯೇಸು ಅಂವೊಂಡ ಶಿಷ್ಯಂಗಡ ಕೂಡೆ ಕೈಸರೈಯ ಫಿಲಿಪ್ಪಿ ಎಣ್ಣುವ ಪಟ್ಟಣತ್‍ರ ಅಕ್ಕಪಕ್ಕತ್‌ಲ್ ಉಳ್ಳ ಊರ್‌ಕೇರಿಕ್ ಪೋಚಿ. ಬಟ್ಟೇಲ್ ಪೋಪಕಾಪಕ, ನಾನ್ ದಾರ್‍ೕಂದ್ ಈ ಜನ ಎಣ್ಣುವಾಂದ್ ಯೇಸು ಶಿಷ್ಯಂಗಳ ಕ್‍ೕಟತ್.

²⁸ಅದ್ಂಗ್: ಚೆನ್ನ ಜನ ನೀನ್ ದೀಕ್ಷಾಸ್ನಾನ ತಪ್ಪ ಯೋಹಾನಾಂದು, ಚೆನ್ನ ಜನ ನೀನ್ ಎಲೀಯಾಂದು, ಚೆನ್ನ ಜನ ನೀನ್ ದಾರೋ ಒರು ಪ್ರವಾದೀಂದು ಎಣ್ಣಿಯಂಡುಂಡ್‍ೕಂದ್ ಅಯಿಂಗ ಜವಾಬ್ ಕೊಡ್‍ತತ್.

²⁹ಪಿಂಞ ಯೇಸು ಅಯಿಂಗಳ ನೋಟಿತ್: ಆಚೇಂಗಿ ನಿಂಗ ನನ್ನ ದಾರ್‍ೕಂದ್ ಎಣ್ಣುವಿರಾಂದ್ ಕ್‍ೕಟತ್. ಅದ್ಂಗ್ ಪೇತ್ರ: ನೀನ್ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್[16] ಎಣ್ಣ್‌ಚಿ.

³⁰ಅಕ್ಕ ಯೇಸು ಅಯಿಂಗಕ್, ನಾನ್ ದಾರ್‍ಂದ್ ದಾರ್‌ಕು ನಿಂಗ ಎಣ್ಣತೀಂದ್ ಅಯಿಂಗಕ್ ಆಜ್ಞೆ ಮಾಡ್‍ಚಿ.

³¹ಅಲ್ಲತೆ, ಮನುಷ್ಯಕುಮಾರ ದುಂಬ ಕಷ್ಟಪಟ್ಟಿತ್, ಪೆರಿಯಯಿಂಗಡ, ಮುಕ್ಯ ಯಾಜಕಂಗಡ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡ ಮಿಂಞತ್‍ಲ್ ತ್‍ಕ್ಕಾರ ಆಕಂಡು. ಎಲ್ಲಾರು ಕೂಡಿತ್ ಅಂವೊನ ಕೊಂದ್‌ರ್‌ವ, ಆಚೇಂಗಿ ಮೂಂದ್ ದಿವಸ ಆನ ಪಿಂಞ ಚಾವ್‍ಯಿಂಜ ಅಂವೊ ಜೀವವಾಯಿತ್ ಏವಾಂದ್ ಅಯಿಂಗಕ್ ಉಪದೇಶ ಮಾಡ್‌ವಕ್ ಸುರು ಮಾಡ್‍ಚಿ.

³²ಈ ವಿಷಯತ್‌ನೆಲ್ಲ ಅಂವೊ ಚಾಯಿತೆ ವಿವರಿಚಿಡುವಕ, ಪೇತ್ರ ಯೇಸುನ ಆಬರಿಕ್ ಕಾಕುವಂಜಿ ಅಂವೊನ ಚೂಕ್‌ವಕ್ ಸುರು ಮಾಡ್‍ಚಿ.

³³ಯೇಸು ಪುನಃ ತಿರಿತ್ ತಾಂಡ ಶಿಷ್ಯಂಗಡ ಪಕ್ಕ ನೋಟಿತ್ ಪೇತ್ರನ ಬಜ್ಜತ್. ನಾಡ ಬಯ್ಯಕ್ ಪೋ ಸೈತಾನೇ, ನೀನ್ ದೇವಡ ಚಿತ್ತತ್‍ರನೆಕೆ ಗೇನ ಮಾಡತೆ, ಮನುಷ್ಯಂಗಡ ಚಿತ್ತತ್‍ರನೆಕೆ ಗೇನ ಮಾಡ್‌ವಿಯಾಂದ್ ಅಂವೊನ ಚಾಕ್‍ಚಿ.

³⁴ಯೇಸು ಅಲ್ಲಿ ಉಳ್ಳ ಜನಳ ಪಿಂಞ ಅಂವೊಂಡ ಶಿಷ್ಯಂಗಳ ಕಾಕುವಂಜಿ: ನಿಂಗಡಲ್ಲಿ ದಾರ್‌ಕೇಂಗಿ ನಾಡ ಶಿಷ್ಯನಾಯಿತ್ ಇಪ್ಪಕ್ ಕುಶಿ ಇಂಜತೇಂಗಿ, ಅಂವೊ ಅಂವೊಂಡ ಆಸೆನೆಲ್ಲಾ ಬುಟ್ಟಿತ್, ತಾಂಡ ಶಿಲುಬೇನ ನೇತಿಯಂಡ್ ನಾಡ ಬಯ್ಯತ್ ಬರಡ್.

³⁵ದಾರ್‌ಕ್ ತಾಂಡ ಜೀವತ್‍ನ ಕಾಪಾಡ್‌ವಕ್ ಆಸೆ ಉಂಡೋ ಅಂವೊ ಅದ್‍ನ ಕಳೆಯುವ. ಆಚೇಂಗಿ ದಾರ್ ನಾಕಾಯಿತ್, ನಾಡ ನಲ್ಲ ಸುದ್ದಿಕಾಯಿತ್ ಜೀವತ್‍ನ ಕಳೆಯುವ ಅಂವೊ ಅದ್‍ನ ಕಾಪಾಡ್‌ವ.

³⁶ಅಂವೊ ಈ ಲೋಕತ್‍ಲ್ ಉಳ್ಳಾನೆಲ್ಲಾ ತಾಂಗ್ ಸ್ವಂತವಾಯಿತ್ ಮಾಡ್‍ಚೇಂಗಿಯು, ಅಂವೊ ತಾಂಡ ಜೀವನತ್‌ನ ಪಾಳ್ ಮಾಡ್‍ಚೇಂಗಿ, ಅಂವೊಂಗ್ ಎಂತ ಲಾಬ? ಅಂವೊ ನಿತ್ಯ ಜೀವ ಇಲ್ಲತೆ ಚತ್ತ್ ಪೋಪ.

³⁷ಅನ್ನನೆ ಆಚೇಂಗಿ ಅಂವೊಂಗ್ ನಿತ್ಯ ಜೀವ ಕ್‍ಟ್ಟ್‌ವಕ್ ಒಂದು ಮಾಡ್‌ವಕ್ ಕಯ್ಯುಲೆ.

³⁸ಪಾಪ ಪಿಂಞ ವ್ಯಬಿಚಾರ ದುಂಬ್‍ನ ಈ ಲೋಕತ್‍ಲ್, ದಾರ್ ನಾಕಾಯಿತ್ ನಾಡ ಬೋದನೆಕಾಯಿತ್ ಞಾಣ ಪಡ್‍ವ, ಮನುಷ್ಯಕುಮಾರನು ಸಹ ತಾಂಡ ಅಪ್ಪಂಡ ಮಹಿಮೆಲ್ ತಾಂಡ ಪವಿತ್ರ ದೂತಂಗಡ ಕೂಡೆ ಬಪ್ಪಕ ಇನ್ನತಂವೊಂಡ ವಿಷಯತ್ ಞಾಣ ಪಡ್‍ವಾಂದ್ ಎಣ್ಣ್‌ಚಿ.