Read Kodava ಲೂಕ 10 Bible Online

ಲೂಕ 10 - Kodava bible

ಲೂಕ 10

¹ಇದೆಲ್ಲಾ ಆನ ಪಿಂಞ ಯೇಸು ಇಂಞು ಎಳ್‌ವದ್[25] ಜನಳ ಗೊತ್ತ್ ಮಾಡಿತ್, ಅಂವೊಗಿಂಜ ಮಿಂಞ ಅಯಿಂಗಳ ಊರ್ ಊರ್‌ಕ್ ದಂಡ್‌ದಂಡ್ ಆಳಾಯಿತ್ ಅಯಿಚತ್.

²ಅಯಿಂಗಳ ನೋಟಿತ್: ಬೇಲ್‌ಲ್ ಬೊಳೆ ದುಂಬ ಉಂಡ್, ಆಚೇಂಗಿ ಕೊಯಿಪಣಿಕ್ ಆಳ್‍ಕಾರ ದುಂಬ ಕಮ್ಮಿ; ಆನಗುಂಡ್, ಬೊಳೆಕ್ ಕಾರಣವಾಯಿತುಳ್ಳ ಎಜಮಾನಂಡ ಪಕ್ಕ, ಆಳ್‍ವಳ ಅಯಿಪಕ್ ಅಂವೊನ ಬೋಡ್‍ವಿರ.

³ಪೊರಟಿತ್ ಪೋಯಿ; ನಿಂಗಳ ತೋಳಯಡ ಮದ್ಯತ್ ಕೊರಿಯಳ ಅಯಿಪನೆಕೆ ನಾನ್ ನಿಂಗಳ ಅಯಿಚಂಡ್ ಉಳ್ಳದ್‍ನ ಗೇನ ಬೆಚ್ಚೊಳಿ.

⁴ನಿಂಗ ಏದ್ ಒರ್ ಕೈಚೀಲ, ದುಡ್ಡ್ ಪಿಂಞ ಎಕ್ಕಡತ್‌ನ ಎಡ್‍ತಂಡ್ ಪೋಕತಿ, ಬಟ್ಟೇಲ್ ದಾಡ ಕೂಡೆಯು ಬೋಂಡತ ತಕ್ಕ್ ಪರಿಯತಿ.

⁵ದಾಡ ಮನೆಕ್ ಪೋಪಿರ ಅಲ್ಲಿ: ಈ ಮನೆಕ್ ಸಮಾದಾನ ಕ್‍ಟ್ಟಡ್‍ೕಂದ್ ಮಿಂಞ ಎಣ್ಣಿ.

⁶ಆ ಮನೆಲ್ ಸಮಾದಾನತ್‍ರ ಮನುಷ್ಯ ಉಂಡೇಂಗಿ ನಿಂಗ ಎಣ್ಣ್‌ನ ಸಮಾದಾನ ಅಲ್ಲಿ ನಿಪ್ಪ. ಇಲ್ಲತಪೋಚೇಂಗಿ, ನಿಂಗ ಎಣ್ಣ್‌ನ ಸಮಾದಾನ ಬಯ್ಯ ನಿಂಗಕ್ ಬಪ್ಪ.

⁷ಅದೇ ಮನೆಲ್ ಇಂಜಂಡ್, ಅಯಿಂಗ ತಪ್ಪದ್‍ನ ತಿಂದಂಡ್ ಕುಡ್‌ಚಂಡ್ ಇರಿ; ಒರ್ ಕೆಲಸಕಾರ ಅಂವೊಂಡ ಕೂಲಿಕ್ ಯೋಗ್ಯನಾಯಿತುಂಡ್. ಮನೆಮನೆಕ್ ಸುತ್ತ್‌ವಕ್ ಪೋಕತಿ.

⁸ಒರು ಪಟ್ಟಣಕ್ ಪೋನಕ ಅಲ್ಲಿ ಉಳ್ಳ ಜನ ನಿಂಗಳ ಸ್ವಾಗತ ಮಾಡ್‍ಚೇಂಗಿ, ಅಯಿಂಗ ನಿಂಗಕ್ ಎಂತ ತಿಂಬಕ್ ತಪ್ಪ ಅದ್‍ನ ತಿನ್ನಿ.

⁹ಅಲ್ಲಿ ಕಾಯಿಲಸ್ತಂಗಕ್ ಕಾಯಿಲೆನ ವಾಸಿ ಮಾಡಿತ್, ದೇವಡ ರಾಜ್ಯ ಬೆರಿಯ ಬಪ್ಪಾಂದ್ ಎಲ್ಲಾರ್‌ಕು ಎಣ್ಣಿ ಕೊಡಿ.

¹⁰ನಿಂಗ ಏದ್ ಪಟ್ಟಣಕ್ ಪೋಪಿರ, ಅಲ್ಲಿ ನಿಂಗಳ ಚಾಯಿತೆ ಸ್ವಾಗತ ಮಾಡತ ಪೋಚೇಂಗಿ, ಆ ಪಟ್ಟಣತ್‍ರ ಬೀದಿಲ್ ಪೋಯಿತ್:

¹¹ನಂಗಡ ಕಾಲ್‌ಲ್ ಉಳ್ಳ ಈ ಪಟ್ಟಣತ್‍ರ ದೂಳ್‍ನ ಸಹ ನಿಂಗಕ್ ಎಚ್ಚರಿಕೆಯಾಯಿತ್ ಕೊಡ್‍ಕುವಿ. ಆಚೇಂಗಿಯು ದೇವಡ ರಾಜ್ಯ ಬೆರಿಯ ಬಪ್ಪಾಂದ್ ನಿಂಗಕ್ ಗೊತ್ತಿರಡ್‍ೕಂದ್ ಎಣ್ಣಿ.

¹²ದೇವ ತೀರ್ಪ್ ಕೊಡ್‍ಪ ದಿವಸತ್‍ಲ್ ಆ ಪಟ್ಟಣಕ್ ಕ್‍ಟ್ಟುವ ಶಿಕ್ಷೆ ಸೊದೋಮ್ ಪಟ್ಟಣಕ್ ಕ್‍ಟ್ಟುವ ಶಿಕ್ಷೆಕಿಂಜಲು ಕಠಿಣವಾಯಿತ್‌ಪ್ಪಾಂದ್ ನಾನ್ ನಿಂಗಕ್ ಎಣ್ಣ್‌ವಿ.

¹³ಖೊರಾಜಿನೇ ನೀಕ್ ಅಯ್ಯೋ! ಬೆತ್ಸಾಯಿದವೇ ನೀಕ್ ಅಯ್ಯೋ! ನಿಂಗಡ ಮದ್ಯತ್‍ಲ್ ಮಾಡ್‍ನ ಬಲ್ಯ ಅದ್ಬುತ ಕಾರ್ಯತ್‍ನ ತೀರ್ ಪಿಂಞ ಸೀದೋನ್[26] ಪಟ್ಟಣತ್‍ಲ್ ಮಾಡಿತ್ಂಜತೇಂಗಿ, ಅಕ್ಕಲೆ ಅಯಿಂಗ ದುಃಖತ್‍ನ ಕಾಟ್‍ವಕ್ ಗೋಣಿಚೀಲತ್‍ರ ಬಟ್ಟೆ ಇಟ್ಟಂಡ್, ಬೂದಿರ ಮೇಲೆ ಅಳ್‌ತಿತ್ ಅಯಿಂಗಡ ಪಾಪತ್ಂಜ ಪಶ್ಚಾತಾಪ ಪಟ್ಟಿತ್ ದೇವಡ ಪಕ್ಕ ತಿರುವಕಿಂಜತ್.[27]

¹⁴ದೇವ ತೀರ್ಪ್ ಮಾಡ್‌ವ ದಿವಸತ್‍ಲ್ ನಿಂಗಕ್ ಕ್‍ಟ್ಟುವ ಶಿಕ್ಷೆಕಿಂಜ ತೀರ್ ಸೀದೋನ್ ಪಟ್ಟಣಕ್ ಕ್‍ಟ್ಟ್‌ವ ಶಿಕ್ಷೆ ಕಮ್ಮಿಯಾಯಿತಿಪ್ಪ.

¹⁵ಬಾನಕತ್ತನೆ ಪೋಪೀಂದ್ ಗೇನ ಮಾಡಿಯಂಡುಳ್ಳ ಕಪೆರ್ನೌಮ್ ಪಟ್ಟಣವೇ, ನೀನ್ ಅನ್ನನೆ ಆಪುಲೆ, ನಿಂಗ ಪಾತಾಳತ್‌ರಚ್ಚಕ್ ಅಡಿಕ್ ಪೋಪಿರ.

¹⁶ಶಿಷ್ಯಂಗಳ ನೋಟಿತ್: ನಿಂಗಡ ತಕ್ಕ್‌ನ ಕ್‍ೕಪಯಿಂಗ ನಾಡ ತಕ್ಕ್‌ನ ಕ್‍ೕಟನೆಕೆ. ನಿಂಗಳ ತಿರಸ್ಕಾರ ಮಾಡ್‌ವಯಿಂಗ, ನನ್ನ ತಿರಸ್ಕಾರ ಮಾಡ್‍ನನೆಕೆ, ನನ್ನ ತಿರಸ್ಕಾರ ಮಾಡ್‌ವಯಿಂಗ ನನ್ನ ಅಯಿಚ ದೇವನ ತಿರಸ್ಕಾರ ಮಾಡ್‌ನನೆಕೇಂದ್ ಎಣ್ಣ್‌ಚಿ.

¹⁷ಆ ಸಮಯತ್‍ಲ್ ಅಂವೊ ಅಯಿಚಿತ್ಂಜ ಎಳ್‌ವದ್ ಶಿಷ್ಯಂಗಳು ಕುಶೀಲ್ ವಾಪಸ್ ಬಂದಿತ್: ಒಡೆಯನೇ, ನೀಡ ಪೆದತ್‍ರ ಅದಿಕಾರತ್‍ಲ್ ಆಜ್ಞೆ ಮಾಡ್‌ವಕ, ಕೂಳಿಯಳು ನಂಗಡ ತಕ್ಕ್‌ಕ್ ಬಗ್ಗ್‌ಚಿಟ್ಟತ್‍ೕಂದ್ ಎಣ್ಣ್‌ಚಿ.

¹⁸ಅಂವೊ ಅಯಿಂಗಕ್: ಸೈತಾನ ಬಾನತ್ಂಜ ಮಿಂಚ್‍ರನೆಕೆ ಅಡಿಕ್ ಬೂವದ್‌ನ ನಾನ್ ಕಂಡಿಯೇಂದ್ ಎಣ್ಣ್‌ಚಿ.

¹⁹ಇದಾ, ನಿಂಗ ಪಾಂಬ್ ಪಿಂಞ ಚೇಳ್‌ರ ಮೇಲೆ ಚೌಟ್‍ವಕು, ವಿರೋದಿಯಾನ ಸೈತಾನಂಡ ಎಲ್ಲಾ ಶಕ್ತಿನ ಚೋಪ್‌ಚಿಡ್‌ವಕು ನಾನ್ ನಿಂಗಕ್ ಅದಿಕಾರ ತಪ್ಪಿ; ಏದು ನಿಂಗಳ ಒಂದು ಮಾಡುಲೆ.

²⁰ಆಚೇಂಗಿ, ನಿಂಗಡ ತಕ್ಕ್‌ಕ್ ಕೂಳಿಯ ಮಂಡೆ ಬಗ್ಗ್‌ಚಿಟ್ಟಗುಂಡ್ ನಿಂಗ ಸಂತೋಷ ಪಡತಿ. ಅದ್ಂಡ ಬದ್‍ಲ್, ನಿಂಗಡ ಪೆದ ಪರಲೋಕತ್‍ಲ್ ಒಳ್‌ದಿತುಳ್ಳಗುಂಡ್ ಸಂತೋಷ ಪಡಿರಿ.

²¹ಆ ಸಮಯತ್‍ಲ್ ದೇವಡ ಪವಿತ್ರಾತ್ಮನಗುಂಡ್ ಯೇಸು ಕುಶಿಪಟ್ಟಿತ್: ಪರಲೋಕಕು ಬೂಲೋಕಕು ಒಡೆಯನಾನ ನಾಡ ಅಪ್ಪನೇ, ನೀನ್, ಈ ಸತ್ಯವಾನ ವಿಷಯತ್‍ನ ಜ್ಞಾನಿಯಂಗಕು ಪಡಿಚಯಿಂಗಕೂ ಮರೆ ಮಾಡಿತ್, ಪಡಿಕತ ಸಾದಾರಣ ಜನಕ್ ಎಣ್ಣಿ ಕೊಡ್‌ತಿತ್ತುಳ್ಳಗುಂಡ್ ನೀಕ್ ವಂದನೆ ಮಾಡ್‌ವಿ. ಅಕ್ಕು ದೇವಾ! ಇನ್ನನೆ ಮಾಡ್‌ವಕ್ ನೀಕ್ ಕುಶಿಯಾಚಿ.

²²ನಾಡ ಅಪ್ಪ ನಾಕ್ ಎಲ್ಲಾನ ಒಪ್ಪ್‌ಚಿಟ್ಟತ್; ಅಪ್ಪನ ಬುಟ್ಟಿತ್ ಬೋರೆ ದಾರ್‌ಕು ಮೋಂವೊನ ಗೊತ್ತಿಪ್ಪುಲೆ; ಇಂಞು ಮೋಂವೊನು, ಮೋಂವೊ ದಾರ್‌ಕ್ ಅಪ್ಪನಾನ ದೇವನ ಕಾಂಬ್‍ಚಿಡ್‍ವಕ್ ಚಿತ್ತ ಉಂಡೋ, ಅಂವೊನಲ್ಲತೆ ಬೋರೆ ದಾರ್‌ಕು ಅಪ್ಪನ ಗೊತ್ತಾಪುಲೇಂದ್ ಎಣ್ಣ್‌ಚಿ.

²³ಪಿಂಞ ತಾಂಡ ಶಿಷ್ಯಂಗಡ ಪಕ್ಕ ತಿರಿತ್: ನಿಂಗ ಕಾಂಬದ್‍ನ ನೋಟುವ ಕಣ್ಣ್ ಆಶೀರ್ವಾದ ಪಡ್ಂದದ್.

²⁴ದುಂಬ ಪ್ರವಾದಿಯಳು ಪಿಂಞ ರಾಜಂಗಳು, ನಿಂಗ ಇಕ್ಕ ನೋಟ್‍ವಾನ ನೋಟ್‍ವಕು, ನಿಂಗ ಕ್‍ೕಟಂಡುಳ್ಳಾನ ಕ್‍ೕಪಕು ಆಸೆ ಪಟ್ಟತ್, ಆಚೇಂಗಿ ಅಯಿಂಗೆಲ್ಲ ಕಾಂಗತೆ, ಕ್‍ೕಕತೆ ಪೋಚೀಂದ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.

²⁵ಯೇಸುರ ಮೇಲೆ ತಪ್ಪ್ ಕಂಡ್‌ಪುಡಿಪಕಾಯಿತ್ ನ್ಯಾಯಪ್ರಮಾಣತ್‍ರ ಶಾಸ್ತ್ರಿ ಒಬ್ಬ: ಉಪಾದ್ಯನೇ, ನಿತ್ಯ ಜೀವ ಕ್‍ಟ್ಟ್‌ವಕ್ ನಾನ್ ಎಂತ ಮಾಡಂಡೂಂದ್ ಕ್‍ೕಟತ್.

²⁶ಅದ್ಂಗ್ ಯೇಸು: ದೇವಡ ವಾಕ್ಯತ್‍ಲ್ ಎಂತ ಒಳ್‍ದಿತುಂಡ್? ಅದ್ ನಿಂಗಕ್ ಎನ್ನನೆ ಅರ್ಥ ಆಪಾಂದ್ ಕ್‍ೕಟತ್.

²⁷ಅದ್ಂಗ್ ಆ ಉಪಾದ್ಯ: ನೀಡ ದೇವನಾನ ಒಡೆಯನ ಪೂರ್ತಿ ಹೃದಯತ್‍ಲ್, ಪೂರ್ತಿ ಆತ್ಮತ್‍ಲ್, ಪೂರ್ತಿ ಮನಸ್ಸ್‌ಲ್, ಪೂರ್ತಿ ಶಕ್ತಿಲ್ ಪ್ರೀತಿ ಮಾಡಂಡು.[28] ಅದಲ್ಲತೆ ನೀನ್ ನಿನ್ನ ಎನ್ನನೆ ಪ್ರೀತಿಮಾಡ್‍ವಿಯ ಅನ್ನನೆ ನೀಡ ನೆರಮನೆಕಾರಳ ಸಹ ಪ್ರೀತಿ ಮಾಡಂಡೂಂದ್ ಒಳ್‌ದಿತುಂಡಲ್ಲಾಂದ್ ಎಣ್ಣ್‌ಚಿ.[29]

²⁸ಯೇಸು ಅಂವೊಂಗ್: ಅಕ್ಕು, ಸರಿಯಾಯಿತ್ ಎಣ್ಣಿಯ. ಅನ್ನನೆ ಮಾಡ್ ಅಕ್ಕ ನೀನ್ ಬದ್‌ಕ್‍ವಿಯಾಂದ್ ಎಣ್ಣ್‌ಚಿ.

²⁹ಆ ಉಪಾದ್ಯ, ಅಂವೊ ನೀತಿವಂತಂವೋಂದ್ ಕಾಟ್‌ವಕಾಯಿತ್ ಯೇಸುರ ಪಕ್ಕ, ನಾಡ ನೆರೆಮನೆಕಾರ ದಾರ್‍ೕಂದ್ ಕ್‍ೕಟತ್.

³⁰ಅದ್ಂಗ್ ಯೇಸು ಒರ್ ಕಥೆ ಎಣ್ಣ್‌ಚಿ: ಒಮ್ಮ ಯೆರೂಸಲೇಮ್ಂಜ ಒರ್ ಮನುಷ್ಯ ಯೆರಿಕೋ ಎಣ್ಣುವ ಪಟ್ಟಣಕ್ ಪೋಯಂಡಿಪ್ಪಕ ಅಂವೊ ಕಳ್ಳಂಗಡ ಕೈಕ್ ಕ್‍ಟ್ಟ್‌ಚಿ; ಅಂವೊನ ಕಳ್ಳಂಗ ಪೊಜ್ಜಿತ್ ಅಂವೊಂಡ ಬಟ್ಟೇನ ಎಡ್‍ತಂಡ್, ಅರೆ ಜೀವ ಮಾಡಿತ್ ಪೋಚಿ.

³¹ಅಕ್ಕ ಆ ಬಟ್ಟೇಲ್ ಒರ್ ಯಾಜಕ ಬಾತ್, ಅಂವೊ ಈ ಮನುಷ್ಯನ ನೋಟಿತು ಕಾಂಗತನೆಕೆ ಬೋರೆಕಡೆ ಪೋಚಿ.

³²ಅನ್ನನೆ ಅದೇ ಬಟ್ಟೇಲ್ ಒರ್ ಲೇವಿಯು ಬಂದಂಡಿಂಜತ್. ಅಂವೊನು ಸಹ ಈ ಮನುಷ್ಯನ ನೋಟಿತು ಕಾಂಗತನೆಕೆ ಬೋರೆಕಡೆ ಪೋಚಿ.

³³ಪಿಂಞ ಒರ್ ಸಮಾರಿಯ[30] ಆ ಬಟ್ಟೇಲ್ ಪ್ರಯಾಣ ಮಾಡಿಯಂಡಿಪ್ಪಕ, ಈ ಮನುಷ್ಯನ ನೋಟಿತ್, ಕನಿಕರ ಪಟ್ಟತ್.

³⁴ಅಂವೊಂಡ ಪಕ್ಕ ಬಂತ್ ಬಗ್ಗಿತ್, ಗಾಯಕ್ ಎಣ್ಣೆ ಪಿಂಞ ದ್ರಾಕ್ಷಿರಸತ್‍ನ ಇಟ್ಟಿತ್ ಗಾಯತ್‍ನ ಕೆಟ್ಟ್‌ಚಿ; ಅಂವೊನ ತಾಂಡ ಕತ್ತೆರ ಮೇಲೆ ಇಟ್ಟಿತ್, ಚತ್ರಕ್ ಕಾಕಿಯಂಡ್ ಪೋಯಿತ್ ನೋಟಿಯಂಡಿಂಜತ್.

³⁵ಪಿತ್ಯಾಂದ್ ಅಂವೊ ಪೋಪಕಾಪಕ, ದಂಡ್ ಬೊಳ್ಳಿರ ಉರುಪಿಯತ್‌ನ ಚತ್ರಕಾರಂಗ್ ಕೊಡ್‌ಪಂಜಿ: ಇಂವೊನ ಚಾಯಿತೆ ನೋಟಿಯೊಳಿ, ಇಂವೊಂಗ್ ಇಂಞು ಖರ್ಚಿ ಆಚೇಂಗಿ ನಾನ್ ಈಲೆ ವಾಪಸ್ ಬಪ್ಪಕ ನಿಂಗಕ್ ತಪ್ಪೀಂದ್ ಎಣ್ಣ್‌ಚಿ.

³⁶ಇನ್ನನೆ ಇಪ್ಪಕ, ಕಳ್ಳಂಗಡ ಕೈಕ್ ಕ್‍ಟ್ಟ್‌ನ ಅಂವೊಂಗ್, ಈ ಮೂಂದಾಳ್‌ರ ಕೂಟ್‌ಲ್ ದಾರ್ ನೆರಮನೆಕಾರಾಂದ್ ನಿಂಗ ಗೇನ ಮಾಡ್‌ವಿರಾಂದ್ ಕ್‍ೕಟತ್.

³⁷ಅದ್ಂಗ್ ನ್ಯಾಯಪ್ರಮಾಣತ್‍ರ ಶಾಸ್ತ್ರಿ: ದಾರ್ ಅಂವೊಂಗ್ ಕನಿಕರ ಕಾಟ್‍ಚಿ ಅಂವೊನೇಂದ್ ಯೇಸುಕ್ ಎಣ್ಣ್‌ಚಿ. ಅದ್ಂಗ್ ಯೇಸು: ಅಕ್ಕು, ನೀನ್ ಎಣ್ಣ್‌ನದ್ ಸರಿ, ನೀನ್ ಸಹ ಪೋಯಿತ್ ಅನ್ನನೆ ಮಾಡ್‍ೕಂದ್ ಎಣ್ಣ್‌ಚಿ.

³⁸ಅಲ್ಲಿಂಜ ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಪ್ರಯಾಣ ಮಾಡಿಯಂಡಿಪ್ಪಕ, ಒರ್ ಊರ್‌ಕ್ ಪೋಚಿ. ಅಲ್ಲಿ ಮಾರ್ಥ ಎಣ್ಣುವ ಒರ್ ಪೊಣ್ಣಾಳ್ ಯೇಸುನ ಅವಡ ಮನೆಕ್ ಸ್ವಾಗತ ಮಾಡ್‍ಚಿ.

³⁹ಅವಕ್ ಮರಿಯ ಎಣ್ಣುವ ಒರ್ ತಂಗೆ ಇಂಜತ್: ಮರಿಯ, ಯೇಸು ಬೋದನೆ ಮಾಡ್‌ವಾನ ಕ್‍ೕಟಂಡ್ ಯೇಸುರ ಕಾಲ್‍ರ ಪಕ್ಕ ಅಳ್‍ತಂಡಿಂಜತ್.

⁴⁰ಮಾರ್ಥಕ್, ಎಲ್ಲಾ ಕೆಲಸತ್‍ನ ಒಬ್ಬಳೇ ಮಾಡ್‌ವಕ್ ಬೇಜಾರಾಯಿತ್, ಯೇಸುರ ಪಕ್ಕ ಬಂದಿತ್ ಒಡೆಯನೇ, ಎಲ್ಲಾ ಕೆಲಸತ್‍ನ ನಾನ್ ಒಬ್ಬಳೇ ಮಾಡ್‌ವಕ್ ಮರಿಯ ಬುಟ್ಟಿತುಳ್ಳದ್‌ನ ಕಂಡಿತ್ ನೀಕ್ ಬೇಜಾರ್ ಆಪುಲೆಯಾಂದ್ ಕ್‍ೕಟತ್. ನಾಕ್ ಸಹಾಯ ಮಾಡ್‌ವಕ್ ಅವಕ್ ಎಣ್ಣ್‍ೕಂದ್ ಎಣ್ಣ್‌ಚಿ.

⁴¹ಅದ್ಂಗ್ ಯೇಸು: ಮಾರ್ಥ, ಮಾರ್ಥ, ನೀನ್ ದುಂಬ ವಿಷಯತ್‍ನ ಗೇನ ಮಾಡಿಯಂಡ್ ಬೇಜಾರ್ ಮಾಡಿಯಂಡ್ ಉಳ್ಳಿಯ.

⁴²ಆಚೇಂಗಿ, ಒಂದ್ ಮಾತ್ರ ಬೋಂಡಿಯೆ. ಮರಿಯ ಅವಡ ಹೃದಯತ್ಂಜ ಎಡ್‌ಪಕಯ್ಯತ ನಲ್ಲ ಬಾಗತ್‍ನ ಗೊತ್ತ್ ಮಾಡಿತುಂಡ್‍ೕಂದ್ ಎಣ್ಣ್‌ಚಿ.