Read Kodava ಲೂಕ 11 Bible Online

ಲೂಕ 11 - Kodava bible

ಲೂಕ 11

¹ಯೇಸು ಒರ್ ಜಾಗತ್‍ಲ್ ಪ್ರಾರ್ಥನೆ ಮಾಡಿತಾನ ಪಿಂಞ, ಅಂವೊಂಡ ಒರ್ ಶಿಷ್ಯ: ಒಡೆಯನೇ, ಯೋಹಾನ ಅಂವೊಂಡ ಶಿಷ್ಯಂಗಕ್ ಪ್ರಾರ್ಥನೆ ಮಾಡ್‌ವಕ್ ಎಣ್ಣಿ ಕೊಡ್‍ತನೆಕೆ ನಂಗಕ್ ಸಹ ಎಣ್ಣಿತಾಂದ್ ಕ್‍ೕಟತ್.

²ಅದ್ಂಗ್ ಅಂವೊ: ನಿಂಗ ಪ್ರಾರ್ಥನೆ ಮಾಡ್‌ವಕ: ಪರಲೋಕತ್‍ಲ್ ಉಳ್ಳ ನಂಗಡ ಅಪ್ಪನೇ, ನೀಡ ಪೆದ ಎಕ್ಕಾಲು ಪವಿತ್ರವಾಯಿತಿರಡ್; ನೀಡ ರಾಜ್ಯ ಬೂಲೋಕಕ್ ಬರಡ್;[31]

³ದಿನಾಲು ಬೋಂಡಿಯಾನ ಕೂಳ್‌ನ ನಂಗಕ್ ತಾ;

⁴ನಂಗಕ್ ವಿರೋದವಾಯಿತ್ ತಪ್ಪ್ ಮಾಡ್‍ನಯಿಂಗಳ ನಂಗ ಮನ್ನಿಚಿಡ್‌ವನೆಕೆ, ನಂಗಡ ಪಾಪತ್‍ನ ಮನ್ನಿಚಿಡ್; ನಂಗ ಸೋದನೆಕ್ ಒಳಪಡತನೆಕೆ ನಂಗಳ ಕ್‍ೕಡ್‌ಂಜ ಕಾಪಾಡ್‍ೕಂದ್ ಪ್ರಾರ್ಥನೆ ಮಾಡ್‌ವಕ್ ಎಣ್ಣಿ ಕೊಡ್‍ತತ್.

⁵ಇಂಞು ಅಯಿಂಗಳ ನೋಟಿತ್: ನಿಂಗಡಲ್ಲಿ ಒಬ್ಬ ತಾಂಡ ಸ್ನೇಹಿತಂಡ ಮನೆಕ್ ನಡ್‌ಪಾದ್ರೆ ನೇರ‌ಕ್ ಪೋಯಿತ್:

⁶ನಾಡ ಸ್ನೇಹಿತನೇ: ಪ್ರಯಾಣ ಮಾಡಿಯಂಡಿಂಜ ನಾಡ ಒರ್ ಸ್ನೇಹಿತ ಮನೆಕ್ ಬಂದಿತುಂಡ್, ಅಂವೊಂಗ್ ತಿಂಬಕ್ ಕೊಡ್‍ಪಕ್ ನಾಡ ಪಕ್ಕ ಒಂದು ಇಲ್ಲೇಂದ್ ಎಣ್ಣುವಕ,

⁷ಮನೆರ ಒಳ್‍ಲ್ ಇಂಜಂವೊ: ಸ್ನೇಹಿತನೇ, ನನ್ನ ತೊಂದರೆ ಮಾಡತೆ, ನಾನ್ ಪಡಿಕ್ ಬೀಗ ಇಟ್ಟಿತುಳ್ಳ, ನಾಡ ಮಕ್ಕಳು ನಾನು, ಬುದ್ದಂಡ್ ಉಂಡ್, ನಾನ್ ಎದ್ದಿತ್ ನೀಕ್ ಒಂದು ತಪ್ಪಕ್ ಕಯ್ಯುಲೇಂದ್ ಎಣ್ಣುವ.

⁸ಆಚೇಂಗಿ, ಅಂವೊ ಅಂವೊಂಡ ಸ್ನೇಹಿತನಾಯಿತ್ ಉಳ್ಳಗುಂಡ್ ಎದ್ದಿತ್ ಕೊಡ್‍ಕತೆ ಪೋಚೇಂಗಿಯು, ಅಂವೊ ಅಚ್ಚಕ್ ಒತ್ತಾಯ ಮಾಡ್‌ವಗುಂಡ್ ಅಂವೊಂಗ್ ಬೋಂಡಿಯಾನದ್‍ನ ಕೊಡ್‍ಪಾಂದ್ ನಿಂಗಕ್ ನಾನ್ ಎಣ್ಣ್‌ವಿ.

⁹ಆನಗುಂಡ್, ಇಂಞು ನಾನ್ ನಿಂಗಕ್ ಎಣ್ಣುವದ್‍ನ ಎಂತ ಎಣ್ಣ್‌ಚೇಂಗಿ: ಕ್‍ೕಳಿ, ಅಕ್ಕ ನಿಂಗಕ್ ತಪ್ಪ. ತ್‍ೕಡಿ ನಿಂಗಕ್ ಕ್‍ಟ್ಟುವ. ಪಡಿನ ತಟ್ಟಿ, ಅಕ್ಕ ನಿಂಗಕ್ ಪಡಿ ತೊರ್‌ಪ.

¹⁰ಎನ್ನಂಗೆಣ್ಣ್‌ಚೇಂಗಿ ದಾರೆಲ್ಲಾ ಕ್‍ೕಪ ಅಯಿಂಗಕ್ ಕ್‍ಟ್ಟುವ; ದಾರೆಲ್ಲ ತ್‍ೕಡ್‌ವ, ಅಯಿಂಗಕ್ ಕಾಂಬ; ದಾರೆಲ್ಲ ತಟ್ಟ್‌ವ, ಅಯಿಂಗಕ್ ಪಡಿ ತೊರ್‌ಪ.

¹¹ನಿಂಗಡಲ್ಲಿ, ಅಪ್ಪನಾಯಿತುಳ್ಳ ಒಬ್ಬ, ತಾಂಡ ಮೋಂವೊ ಮೀನ್‌ನ ಕ್‍ೕಪಕ ಪಾಂಬ್‍ನ ತಪ್ಪ?

¹²ಅಲ್ಲತೆ, ಮೊಟ್ಟೆನ ಕ್‍ೕಪಕ ಚೇಳ್‍ನ ತಪ್ಪ?

¹³ಕಪಟಿಯಾನ ನಿಂಗ, ನಿಂಗಡ ಮಕ್ಕಕ್ ನಲ್ಲ ಇನಾಮ್‍ನ ಕೊಡ್‍ಪಕ್ ಗೊತ್ತಿಪ್ಪಕ, ಪರಲೋಕತ್‍ಲ್ ಉಳ್ಳ ನಿಂಗಡ ಅಪ್ಪ, ಅಂವೊಂಡ ಪಕ್ಕ ಬೋಡ್‌ವಯಿಂಗಕ್ ಪವಿತ್ರಾತ್ಮತ್‍ನ ತಪ್ಪದ್ ಎಚ್ಚಕ್ ನೇರ್‍ೕಂದ್ ಎಣ್ಣ್‌ಚಿ.

¹⁴ಅಲ್ಲಿಂಜ, ಒರ್ ಮನುಷ್ಯನ ತಕ್ಕ್‌ಪರಿವಕ್ ಕಯ್ಯತ ಮಾಡಿತ್ಂಜ ಕೂಳಿನ ಯೇಸು ಬುಡ್‌ತ್‌ಚಿ. ಆ ಕೂಳಿ ಬುಟ್ಟಿತ್ ಪೋನ ಪಿಂಞ ಆ ಮನುಷ್ಯಂಗ್ ತಕ್ಕ್‌ಪರಿವಕ್ ಆಚಿ; ಅಲ್ಲಿ ಉಳ್ಳ ಜನಕೆಲ್ಲ ದುಂಬ ಆಶ್ಚರ್ಯ ಆಚಿ.

¹⁵ಆಚೇಂಗಿ, ಅಲ್ಲಿ ಉಳ್ಳ ಚೆನ್ನ ಜನ: ಇಂವೊ ಕೂಳಿಯಡ ಮುಕ್ಯಸ್ತ ಬೆಲ್ಜೆಬೂಲನಗುಂಡ್[32] ಕೂಳಿ ಬುಡ್‌ತಿಯಂಡುಂಡ್‍ೕಂದ್ ಎಣ್ಣ್‌ಚಿ.

¹⁶ಚೆನ್ನ ಜನ ಯೇಸುನ ಕೆಣಿಪಕಾಯಿತ್: ನೀನ್ ಬಾನತ್ಂಜ ಒರ್ ಗುರ್‍ತ್‍ನ ನಂಗಕ್ ಕಾಟಿತಾಂದ್ ಕ್‍ೕಟತ್.

¹⁷ಆಚೇಂಗಿ, ಯೇಸುಕ್ ಅಯಿಂಗ ಎಂತ ಗೇನ ಮಾಡಿಯಂಡುಂಡ್‍ೕಂದ್ ಗೊತ್ತಾಚಿ. ಆನಗುಂಡ್ ಅಯಿಂಗಳ ನೋಟಿತ್: ಏದ್ ಒರ್ ರಾಜ್ಯತ್‍ರ ಜನ, ಅಯಿಂಗಯಿಂಗಳೇ ಜಗಳ ಮಾಡಿಯೊವ ಅಯಿಂಗ ಪಾಳ್ ಆಪ. ಏದ್ ಒರ್ ಮನೆರ ಜನ, ಅಯಿಂಗಯಿಂಗಳೇ ಜಗಳ ಮಾಡಿಯೊವ ಅಯಿಂಗ ಪಾಳ್ ಆಪ.

¹⁸ಅನ್ನನೆ ಇಪ್ಪಕ, ಸೈತಾನ ಅಂವೊಂಗ್ ವಿರೋದವಾಯಿತ್ ಅಂವೊಂಡ ಗುಂಪ್‌ಲ್ ಜಗಳ ಮಾಡಿಯಂಡಿಂಜತೇಂಗಿ ಅಂವೊಂಡ ರಾಜ್ಯ ಎನ್ನನೆ ನಿಪ್ಪ? ಅಕ್ಕ, ನಾನ್ ಬೆಲ್ಜೆಬೂಲನಗುಂಡ್ ಕೂಳಿಯಳ ಬುಡ್‌ತಿಯಂಡುಂಡ್‍ೕಂದ್ ನಿಂಗ ಎನ್ನನೆ ಎಣ್ಣುವಿರಾಂದ್ ಕ್‍ೕಟತ್.

¹⁹ಇಕ್ಕ ನಾನ್ ಕೂಳಿಯಳ ಬೆಲ್ಜೆಬೂಲ್‌ರ ಶಕ್ತಿಯಿಂಜ ಬುಡ್‌ತ್‌ಚೇಂಗಿ, ನಿಂಗಡ ಶಿಷ್ಯಂಗ ದಾಡ ಶಕ್ತಿಯಿಂಜ ಕೂಳಿಯಳ ಬುಡ್‌ತಿಯಂಡುಂಡ್? ಆನಗುಂಡ್, ಅಯಿಂಗಳೇ ನಿಂಗಕ್ ತೀರ್ಪ್ ತಪ್ಪ.

²⁰ನಾನ್ ದೇವಡ ಶಕ್ತಿಲ್ ಕೂಳಿಯಳ ಬುಡ್‌ತಿಯಂಡುಂಡೇಂಗಿ, ದೇವಡ ರಾಜ್ಯ ಇಕ್ಕಲೆ ನಿಂಗಡಲ್ಲಿ ಬಂದಿತುಂಡ್‍ೕಂದ್ ಗೊತ್ತಾಪ.

²¹ಒರ್ ಗಟ್ಟಿಮುಟ್ಟಾನ ಮನುಷ್ಯ, ಅಂವೊಂಗ್ ಬೋಂಡಿಯಾನ ಎಲ್ಲಾ ಆಯುದತ್‍ನ ಇಟ್ಟಂಡ್ ತಾಂಡ ಮನೆನ ಕಾಪಕ, ಅಂವೊಂಡ ಎಲ್ಲಾ ವಸ್ತು ಬದ್ರವಾಯಿತ್‌ಪ್ಪ.

²²ಆಚೇಂಗಿ ಅಂವೊಗಿಂಜ ಬಲಶಾಲಿಯಾನ ಮನುಷ್ಯ ಬಂದಿತ್ ಅಂವೊನ ಚೋಪ್‌ಚಿಟ್ಟತೇಂಗಿ, ಆ ಬಲಶಾಲಿ ನಂಬಿಕೆ ಬೆಚ್ಚಿತ್ಂಜ ಆ ಎಲ್ಲಾ ಆಯುದತ್‍ನ ಎಡ್‌ತ ಪೋಯಿತ್ ಪಿಂಞ ಆ ಎಲ್ಲಾ ವಸ್ತುನ ಬೋರೆಯಿಂಗಡ ಕೂಡೆ ಪಾಲ್ ಮಾಡ್‌ವ.

²³ನಾಡ ಕೂಡೆ ಇಲ್ಲತಂವೊ ನಾಕ್ ವಿರೋದಿಯಾಯಿತ್‌ಪ್ಪ. ನಾಡ ಕೂಡೆ ಬೊಳೆನ ಕೂಟತಂವೊ ನಾಡದ್‌ನ ಚದ್‍ರಿಚಿಡುವ.

²⁴ಒರ್ ಕೂಳಿ ಒರ್ ಮನುಷ್ಯನ ಬುಟ್ಟಿತ್ ಪೋಪಕ, ಆ ಕೂಳಿ ವಾಸ ಮಾಡ್‌ವಕಾಯಿತ್ ಮಣಬೂಮಿಲ್ ಜಾಗ ತ್‍ೕಡಿಯಂಡ್ ಪೋಪ. ಆಚೇಂಗಿ ಜಾಗ ಕ್‍ಟ್ಟತೆ ಪೋಪಕ, ಆ ಕೂಳಿ: ನಾನ್ ಬುಟ್ಟ್ ಬಂದ ಮನೆಕ್ ವಾಪಸ್ ಪೋಪೀಂದ್ ಎಣ್ಣಿತ್,

²⁵ಆ ಮನೆಕ್ ಬಪ್ಪಕ, ಆ ಮನೆ ಒಡ್‌ಕಿತ್, ಚಾಯಿ ಮಾಡಿತ್ ಇಪ್ಪದ್‍ನ ಕಂಡಿತ್,

²⁶ಅದ್ ಪೊರಮೆ ಪೋಪಂಜಿ ಅದ್‍ಕಿಂಜ ಮೋಸವಾಯಿತುಳ್ಳ ಇಂಞು ಏಳ್ ಕೂಳಿಯಳ ಕಾಕಿಯಂಡ್ ಬಪ್ಪ. ಅಯಿಂಗೆಲ್ಲಾರು ಆ ಮನೆಲ್ ಪೋಯಿತ್ ವಾಸ ಮಾಡ್‌ವ; ಅಕ್ಕ ಆ ಮನುಷ್ಯ ಮಿಂಞ ಇಂಜಾಂಗಿಂಜ ಪಾಳ್ ಸ್ತಿತಿಲ್ ಇಪ್ಪಾಂದ್ ಎಣ್ಣ್‌ಚಿ.

²⁷ಯೇಸು ಇನ್ನನೆ ಎಣ್ಣಿಯಂಡಿಪ್ಪಕ, ಜನಡ ಗುಂಪಿಂಜ ಒರ್ ಪೊಣ್ಣಾಳ್: ನಿನ್ನ ಪೆತ್ತ ಅವ್ವ, ನಿನ್ನ ಪಾಲ್ ಕುಡಿಪ್‍ಚಿಟ್ಟವ ಎಚ್ಚಕ್ ಆಶೀರ್ವಾದ ಪಡ್ಂದವಾಂದ್ ಕೂತ್ ಕೊಡ್‍ತತ್.

²⁸ಅದ್ಂಗ್ ಅಂವೊ: ಅಕ್ಕು ನೇರೇ, ಆಚೇಂಗಿಯು, ದೇವಡ ವಾಕ್ಯತ್‍ನ ಕ್‍ೕಟಿತ್, ಅದ್ಂಡ ಪ್ರಕಾರ ನಡ್‍ಪಯಿಂಗಳೇ ನೇರಾಯಿತ್ ಆಶೀರ್ವಾದ ಪಡ್ಂದಯಿಂಗಾಂದ್ ಎಣ್ಣ್‌ಚಿ.

²⁹ಪಿಂಞ ಜನಡ ಕೂಟ ದುಂಬಿತ್ ನೂಕಿಯಂಡ್ ಬಂದಿತ್‌ಪ್ಪಕ ಯೇಸು ಎಣ್ಣ್‌ಚಿ: ಈಂಗ ಮೋಸವಾನ ಸಂತಾನಕಾರಂಗಳಾಯಿತ್ ಉಂಡ್, ಅಯಿಂಗ ಎಕ್ಕಾಲು ಒರ್ ಗುರ್‌ತ್ ಬೋಂಡೂಂದ್ ತ್‍ೕಡ್‌ವ. ಆಚೇಂಗಿಯು ಯೋನ ಪ್ರವಾದಿರ ಗುರ್‌ತ್ ಅಲ್ಲತೆ ಬೋರೆ ಒರ್ ಗುರ್‌ತು ಅಯಿಂಗಕ್ ಕಾಟಿತಪ್ಪುಲೆ.

³⁰ಯೋನ ಪ್ರವಾದಿ ನಿನೆವೆ ಪಟ್ಟಣತ್‍ರ ಜನಕ್ ಎಚ್ಚರತ್‍ರ ಗುರ್‌ತಾಯಿತ್ಂಜನೆಕೆ, ಮನುಷ್ಯಕುಮಾರನು ಈ ಸಂತಾನಕಾರಂಗಕ್ ಗುರ್‌ತಾಯಿತ್‌ಪ್ಪ.

³¹ತೆಕ್ಕ್ ದಿಕ್ಕ್‌ಂಜ ಬಂದ ಶೀಬ ರಾಜ್ಯತ್‍ರ ರಾಣಿ, ಸೊಲೊಮೋನ ರಾಜಂಡ ಜ್ಞಾನತ್‍ನ ಕ್‍ೕಪಕಾಯಿತ್ ಈ ಲೋಕತ್‍ರ ಕಡೇಯಿಂಜ ಪ್ರಯಾಣ ಮಾಡಿತ್ ಬಾತ್. ಇಕ್ಕ ಸೊಲೊಮೋನ ರಾಜಕಿಂಜ ಬಲ್ಯಂವೊ ಇಲ್ಲಿ ಉಂಡ್. ಆಚೇಂಗಿ ನಿಂಗ ಅಂವೊಂಡ ಬೋದನೆನ ಕ್‍ೕಟಿತ್‌ಲ್ಲೆ. ಆನಗುಂಡ್, ನ್ಯಾಯತೀರ್ಪ್ ದಿನತ್‌ಲ್ ಶೀಬ ರಾಜ್ಯತ್‍ರ ರಾಣಿ ಈ ಸಂತಾನಕಾರಡ ಕೂಡೆ ನಿಂದಿತ್ ಈಂಗಳ ಕುತ್ತ ಪರಿಯುವ.

³²ನ್ಯಾಯತೀರ್ಪ್ ದಿವಸತ್‍ಲ್ ನಿನೆವೆ ಪಟ್ಟಣತ್‍ರ ಜನ ಈ ಸಂತಾನಕಾರಡ ಕೂಡೆ ನಿಂದಿತ್ ಈಂಗಳ ಕುತ್ತ ಪರಿಯುವ. ಎನ್ನಂಗೆಣ್ಣ್‌ಚೇಂಗಿ, ಯೋನಂಡ ಬೋದನೆನ ಕ್‍ೕಟಿತ್ ನಿನವೆ ಪಟ್ಟಣತ್‍ರ ಜನ ದೇವಡ ಪಕ್ಕ ತಿರ್‍ಗ್‍ಚಿ. ಇಕ್ಕ, ಯೋನಕಿಂಜ ಬಲ್ಯಂವೊ ಇಲ್ಲಿ ಉಂಡ್ ಆಚೇಂಗಿ ನಿಂಗ ಅಂವೊಂಡ ಬೋದನೆನ ಕ್‍ೕಟಿತ್‌ಲ್ಲೆ.

³³ದಾರೂ ಬೊಳ್‌ಚತ್‍ನ ಕತ್ತ್‌ಚಿಟ್ಟಿತ್ ಪಾತ್ರತ್‍ರ ಒಳ್‍ಲ್ ಅಡಗಿಚಿಟ್ಟಿತ್ ಬೆಪ್ಪುಲೆ, ಅದ್‍ನ ಬೊಳ್‍ಚ ಕಂಬತ್‍ಲ್ ಬೆಪ್ಪ. ಅಕ್ಕ, ಅಲ್ಲಿ ಬಪ್ಪ ಜನಕ್ ಬೊಳ್‍ಚ ಕಾಂಬಾಂದ್ ಯೇಸು ಎಣ್ಣ್‌ಚಿ.

³⁴ಕಣ್ಣ್ ನಿಂಗಡ ತಡೀರ ಬೊಳ್‌ಚವಾಯಿತುಂಡ್. ನಿಂಗಡ ಕಣ್ಣ್ ಚಾಯಿತೆ ಉಂಡೇಂಗಿ ನಿಂಗಡ ತಡಿ ಪೂರ್ತಿ ಬೊಳಿಯಾಯಿತ್‌ಪ್ಪ; ಆಚೇಂಗಿ ನಿಂಗಡ ಕಣ್ಣ್ ಕೆಟ್ಟದಾಯಿತ್ಂಜತೇಂಗಿ ನಿಂಗಡ ತಡಿ ಪೂರ್ತಿ ಇರ್‌ಟಾಯಿತಿಪ್ಪ.

³⁵ಆನಗುಂಡ್, ನಿಂಗಡ ನಂಬಿಕೆ ನಿಂಗಳ ಇರ್‌ಟ್‌ಲ್ ಕಾಕಿಯಂಡ್ ಪೋಕತನೆಕೆ ನೋಟಿಯೊಳಿ

³⁶ನಿಂಗಡ ತಡೀಲ್ ಏದ್ ಬಾಗವು ಇರ್‌ಟ್‌ಲ್ ಇಲ್ಲತೆ, ಎಲ್ಲಾ ಬಾಗವು ಬೊಳಿಯಾಯಿತ್ಂಜತೇಂಗಿ, ಅಕ್ಕ ನೀನ್ ಪೂರ್ತಿಯಾಯಿತ್ ಬೊಳಿಲ್ ಇಪ್ಪಿಯ ಪಿಂಞ ಬೊಳ್‍ಚತ್‍ರ ಬೊಳಿ ನೀಡ ಮೇಲೆ ಪ್ರಕಾಶಿಚಿಡುವಾಂದ್ ಎಣ್ಣ್‌ಚಿ.

³⁷ಯೇಸು ಇನ್ನನೆ ತಕ್ಕ್ ಪರ್‌ದಂಡ್ ಇಪ್ಪಕ, ಒರ್ ಫರಿಸಾಯ ಯೇಸುನ ಅಂವೊಂಡ ಕೂಡೆ ಉಂಬಕ್ ಕಾಕ್‍ಚಿ. ಯೇಸು ಅನ್ನನೆ ಪೋಯಿತ್ ಕಾಲ್ ಮಡ್‌ಕಿತ್ ಅಳ್‌ತತ್.

³⁸ಯೇಸು ಉಂಬಕಿಂಜಿ ಮಿಂಞ ಕೈ ಕತ್ತತೆ ಉಂಬಕ್ ಅಳ್‌ತದ್‌ನ ಕಂಡಿತ್ ಆ ಫರಿಸಾಯಂಗ್ ಆಶ್ಚರ್ಯ ಆಚಿ.

³⁹ಪಿಂಞ ಒಡೆಯ ಅಂವೊಂಗ್: ಫರಿಸಾಯ ಎಣ್ಣುವ ನಿಂಗ ಕುಡಿಪ ಕಪ್ಪ್‌ರ ಪೊರಮೆ ಪಿಂಞ ಉಂಬ ತಳಿಯತ್‍ರ ಪೊರಮೆ ಚಾಯಿತೆ ಶುದ್ದವಾಯಿತ್ ಕತ್ತ್‌ವಿರ, ಆಚೇಂಗಿ ನಿಂಗಡ ಹೃದಯತ್‍ರ ಒಳ್‍ಲ್ ದುಂಬ ಬೋಂಡತ ಆಸೆ ಪಿಂಞ ಕೆಟ್ಟದ್ ದುಂಬಿತುಂಡ್

⁴⁰ಮುಠಾಳಂಗಳೇ! ಪೊರ ಅಂಷತ್‍ನ ಮಾಡ್‍ನ ದೇವನೇ ಒಳ ಅಂಷತನೂ ಮಾಡಿತಲ್ಲ?

⁴¹ನಿಂಗ ನಿಂಗಡದ್‍ೕಂದ್ ಗೇನಮಾಡಿಯಂಡುಳ್ಳದ್‍ನ ಗರೀಬಂಗಕ್ ಕೊಡಿ, ಅಕ್ಕ ಎಲ್ಲಾ ನಿಂಗಕ್ ಶುದ್ದ ಆಪ.

⁴²ಫರಿಸಾಯಂಗಳೇ, ನಿಂಗಕ್ ಅಯ್ಯೋ! ನಿಂಗ ಪುದಿನ ತೊಪ್ಪು, ಮರುಗ ಪಿಂಞ ಎಲ್ಲಾ ತರತ್‍ರ ಗಿಡ ಮೂಲಿಕೆಲ್‌ ಪತ್ತ್‌ಲ್ ಒರ್ ಪಾಲ್‍ನ ದೇವಕ್ ಕೊಡ್‍ಪಿರ, ಆಚೇಂಗಿ ದೇವಡ ಪ್ರೀತಿ ಪಿಂಞ ನ್ಯಾಯತ್‍ನ ಬುಡ್‍ವಿರ, ಇದ್‍ನ ಸಹ ನಿಂಗ ಮಾಡಂಡು ಅದ್‍ನ ಸಹ ನಿಂಗ ಬುಡ್‌ವಕ್ಕಾಗ.

⁴³ಫರಿಸಾಯಂಗಳೇ ನಿಂಗಕ್ ಅಯ್ಯೋ! ಸಬಾಮಂದಿರತ್‍ಲ್ ಸಬಾಮಂದಿರತ್ ಮುಕ್ಯಪಟ್ಟ ಕುರ್ಚಿ ನಿಂಗಕ್ ಬೋಂಡು, ಚತ್ತೆಲ್ ನಿಂಗಕ್ ಮರ್ಯಾದೆ ತಪ್ಪಯಿಂಗ ಬೋಂಡು.

⁴⁴ಕಪಟಿಯಾನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳೇ, ಫರಿಸಾಯಂಗಳೇ ನಿಂಗಕ್ ಅಯ್ಯೋ! ನಿಂಗ ಒರ್ ಗುರ್‌ತ್ ಇಲ್ಲತ ಸಮಾದಿರನೆಕೆ ಉಳ್ಳಿರ, ಜನಕ್ ಅದ್ ಎಂತ್‍ೕಂದ್ ಗೊತ್ತಿಲ್ಲತೆ ಅದ್ಂಡಮೇಲೆ ನಡ್‍ಪ.

⁴⁵ನ್ಯಾಯಪ್ರಮಾಣತ್‍ರ ಶಾಸ್ತ್ರಿ ಒಬ್ಬ, ನೀನ್ ಇನ್ನನೆ ಎಣ್ಣಿತ್ ನಂಗಳ ಞಾಣ ಕೆಡ್‍ತಿಯಂಡುಳ್ಳಿಯಾಂದ್ ಕ್‍ೕಟತ್.

⁴⁶ಅದ್ಂಗ್ ಯೇಸು: ನ್ಯಾಯಪ್ರಮಾಣತ್‍ರ ಶಾಸ್ತ್ರಿಯಳೇ ನಿಂಗಕ್ ಅಯ್ಯೋ! ಜನ ಎಡ್‌ಪಕಯ್ಯತಚ್ಚಕ್ ಬಾರತ್‍ನ ಅಯಿಂಗಡ ಮೇಲೆ ಇಟ್ಟಿತುಳ್ಳಿರ, ಅಯಿಂಗ ಆ ಬಾರತ್‍ನ ಪೊರ್‍ಪಕ್ ನಿಂಗಡ ಬೆರತ್‌ನ ಸಹ ನೇತಿತ್ ಸಹಾಯ ಮಾಡುಲೆ.

⁴⁷ನಿಂಗಕ್ ಅಯ್ಯೋ! ನಿಂಗಡ ಪೂರ್ವಕಾಲತ್‌ರಯಿಂಗ ಕೊಂದ ಪ್ರವಾದಿಯಂಗಕ್ ನಿಂಗ ಬಲ್ಯ ಗೋರಿ ಕೆಟ್ಟುವಿರ.

⁴⁸ನಿಂಗಡ ಪೂರ್ವಕಾಲತ್‌ರಯಿಂಗ ಮಾಡ್‍ನ ಪಾಪಕ್ ನಿಂಗಳು ಕೂಡಿತುಳ್ಳಿರಾಂದ್ ನಿಂಗಳೇ ಸಾಕ್ಷಿ ಆಯಿತುಳ್ಳಿರ, ಎನ್ನನೆ ಎಣ್ಣ್‌ಚೇಂಗಿ ಅಯಿಂಗ ಕೊಂದಯಿಂಗಕ್ ನಿಂಗ ಬಲ್ಯ ಗೋರಿ ಕೆಟ್ಟಿತುಳ್ಳಿರ.

⁴⁹ಇದ್ಂಗಾಯಿತ್ ದೇವಡ ಜ್ಞಾನ ಎಣ್ಣ್‌ಚಿ: ನಾನ್ ದೇವಡ ಪ್ರವಾದಿಯಂಗಳ, ಅಪೊಸ್ತಲಂಗಳ ಅಯಿಂಗಡ ಪಕ್ಕ ಅಯಿಪಿ; ಅಯಿಂಗಡಲ್ಲಿ ಚೆನ್ನ ಜನಳ ಕೊಲ್ಲುವ, ಚೆನ್ನ ಜನಳ ತೊಂದರೆ ಮಾಡ್‌ವ;

⁵⁰ಆನಗುಂಡ್ ದೇವ ಬೂಲೋಕತ್‍ನ ಸೃಷ್ಟಿ ಮಾಡ್‍ನ ಕಾಲತ್ಂಜ ಆನ ಪ್ರವಾದಿಯಂಗಡ ಕೊಲೆಕ್, ಈ ಕಾಲತ್‍ರ ಸಂತಾನಕಾರಂಗಳಾನ ನಿಂಗಳೇ ಜವಾಬ್ದಾರಂಗ.

⁵¹ಕೊಲೆಯಾನ ಹಾಬೇಲಂಡ ಚೋರೆಯಿಂಜ ಪುಡ್‌ಚಿತ್, ಬಲಿಪೀಠಕು ದೇವಾಲಯಕು ಮದ್ಯತ್‍ಲ್ ಕೊಲೆಯಾನ ಜಕರಿಯಂಡ ಚೋರೆಕತ್ತನೆ ಆನ ಪ್ರವಾದಿಯಂಗಳಾನ ಎಲ್ಲಾ ಕೊಲೆಕ್ ಕಂಡಿತವಾಯಿತ್ ನಿಂಗಕ್ ಶಿಕ್ಷೆ ಕ್‍ಟ್ಟುವ, ನೇರಾಯಿತು ಈ ಸಂತಾನತ್‍ರಯಿಂಗಳ ನ್ಯಾಯ ಕ್‍ೕಪಾಂದ್ ನಿಂಗಕ್ ಎಣ್ಣ್‌ವಿ.

⁵²ನ್ಯಾಯಪ್ರಮಾಣತ್‍ರ ಶಾಸ್ತ್ರಿಯಳೇ ನಿಂಗಕ್ ಅಯ್ಯೋ! ದೇವಡ ಜ್ಞಾನತ್‍ನ ಎಣ್ಣಿ ಕೊಡ್‍ಪ ಪಡಿರ ಬೀತ್‌ಕೈನ ನಿಂಗ ಬೆಚ್ಚಂಡುಳ್ಳಿರ, ನಿಂಗಳು ಅದ್ಂಡ ಒಳ್‍ಕ್ ಪೋಪುಲೆ, ಪೋಪಯಿಂಗಳ ಸಹ ನಿಂಗ ಪೋಪಕ್ ಬುಡುಲೆ.

⁵³ಯೇಸು ಅಲ್ಲಿಂಜ ಪೋನ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಪಿಂಞ ಫರಿಸಾಯಂಗ ಯೇಸುರ ಮೇಲೆ ಜೋರಾಯಿತ್ ನಿಂದನೆಮಾಡ್‌ವಕ್, ನಾನಾ ತರತ್‍ರ ಪ್ರಶ್ನೆ ಕ್‍ೕಪಕ್, ಯೇಸುರ ಮೇಲೆ ಕುತ್ತ ಕಂಡ್‌ಪುಡಿಪಕ್, ಅಂವೊಂಡ ತಕ್ಕ್‌ಲ್ ಕೆಣಿಪಕಾಯಿತ್ ನೋಟಿಯಂಡ್ ಇಂಜತ್.