Read Kodava ಲೂಕ 12 Bible Online

ಲೂಕ 12 - Kodava bible

ಲೂಕ 12

¹ಅಕ್ಕ, ಆಯಿರಾಯಿರ ಜನ ಬಂದಿತ್ ಒಬ್ಬಂಡ ಮೇಲೆ ಇಂಞೊಬ್ಬ ಚೌಟಿಯಂಡ್ ಇಪ್ಪಕ ಯೇಸು ಆದ್ಯವಾಯಿತ್ ಅಂವೊಂಡ ಶಿಷ್ಯಂಗಕ್ ಫರಿಸಾಯಂಗಡ ಈಸ್ಟ್‌ರನೆಕೆ ಉಳ್ಳ ಕಪಟ ಬೋದನೆರ ವಿಷಯತ್ ಎಚ್ಚರತ್‍ಲ್ ಇರೀಂದ್ ಎಣ್ಣ್‌ಚಿ.

²ಒಳ್‌ಪ್‌ಚ್ಚಿಟಂಡ್ ಉಳ್ಳದೆಲ್ಲ ಪೊರಮೆ ಬಪ್ಪ, ಮುಚ್ಚಿತುಳ್ಳದೆಲ್ಲಾ ಬೊಳಿಕ್ ಬಪ್ಪ.

³ಅಂದಕ ನಿಂಗ ಇರ್‌ಟ್‌ಲ್ ತಕ್ಕ್ ಪರ್ಂದದ್, ಪೋಲ್ ನೇರತ್‍ರ ಬೊಳಿಲ್ ಗೊತ್ತಾಪ. ಪಿಂಞ ನಿಂಗ ಪಡಿ ಮುಚ್ಚಿತ್ ಗುಟ್ಟಾಯಿತ್ ಕೆಮಿಲ್ ಎಣ್ಣ್‌ವಾನ ಮನೆರ ಕೊಡಿಲ್ ನಿಂದಿತ್ ಎಲ್ಲಾರ್‌ಕು ಕ್‍ೕಪನೆಕೆ ಜೋರಾಯಿತ್ ಪರಿಯುವ.

⁴ನಾಡ ಕೂಟ್‍ಕಾರಂಗಳೇ ನಾನ್ ನಿಂಗಕ್ ಎಣ್ಣ್‌ವಿ: ತಡೀನ ಮಾತ್ರ ಕೊಂದಿತ್, ಮಿಂಞಕ್ ಒಂದು ಮಾಡ್‌ವಕ್ ಕಯ್ಯತಯಿಂಗಕ್ ಬೊತ್ತತಿ.

⁵ಆಚೇಂಗಿ ನಿಂಗ ದಾರ್‌ಕ್ ಬೊತ್ತಂಡೂಂದ್ ನಾನ್ ಕಾಟಿತಪ್ಪಿ: ಕೊಲ್ಲೊದ್ ಮಾತ್ರ ಅಲ್ಲ ಆಚೇಂಗಿ ಕೊಂದ ಪಿಂಞ ನರಕತ್‍ಲ್ ತಳ್ಳ್‌ವಕೂ ಅದಿಕಾರವುಳ್ಳ ದೇವಕ್ ಮಾತ್ರ ಬೊತ್ತಿ. ಅಕ್ಕು, ದೇವಕ್ ಮಾತ್ರ ನಿಂಗ ಬೊತ್ತೀಂದ್ ಎಣ್ಣ್‌ವಿ.

⁶ಅಂಜ್ ಗುಬ್ಬಚ್ಚಿನ ದಂಡ್ ಕಾಸ್‍ಕ್ ಮಾರಿಯಂಡುಂಡಲ್ಲ? ಅನ್ನನಾಚೇಂಗಿಯು ಒರ್ ಗುಬ್ಬಚ್ಚಿನ ಸಹ ದೇವ ಮರ್‌ಪುಲೆ.

⁷ನಿಂಗಡ ಮಂಡೆಲುಳ್ಳ ತಲ್‍ಮಿ ಸಹ ಎಚ್ಚಕ್ ಉಂಡ್‍ೕಂದ್ ಅಂವೊಂಗ್ ಲೆಕ್ಕ ಗೊತ್ತುಂಡ್. ಆನಗುಂಡ್, ನಿಂಗ ಬೊತ್ತತಿ. ದುಂಬ ಮನೆ ಪಕ್ಷಿಯಕಿಂಜ ನಿಂಗ ಎಚ್ಚಕೋ ಬೆಲೆ ಉಳ್ಳಯಿಂಗಳಾಯಿತುಳ್ಳಿರ.

⁸ನಾನ್ ನಿಂಗಕ್ ನೇರಾಯಿತ್ ಎಣ್ಣ್‌ವಿ: ದಾರ್ ಮನುಷ್ಯಂಗಡ ಮಿಂಞತ್ ಅಂವೊ ನಾಡಂವೋಂದ್ ಎಣ್ಣ್‌ವ, ಮನುಷ್ಯಕುಮಾರ, ಅಂವೊನ ದೇವದೂತಂಗಡ ಮಿಂಞತ್ ನಾಡಂವೋಂದ್ ಎಣ್ಣುವ.

⁹ಆಚೇಂಗಿ ದಾರ್ ಮನುಷ್ಯಂಗಡ ಮಿಂಞತ್ ನನ್ನ ತ್‍ಕ್ಕಾರ ಮಾಡ್‌ವ, ಅಂವೊನ ಮನುಷ್ಯಕುಮಾರ ಸಹ ದೇವದೂತಂಗಡ ಮಿಂಞತ್ ತ್‍ಕ್ಕಾರ ಮಾಡ್‌ವ.

¹⁰ದಾರಾಚೇಂಗಿಯು ಮನುಷ್ಯಕುಮಾರಂಗ್ ವಿರೋದವಾಯಿತ್ ದೂಷಣೆ ಪರ್ಂದತೇಂಗಿ ಅಯಿಂಗಕ್ ಮನ್ನಿಪ್ಪ್ ಕ್‍ಟ್ಟ್‌ವಕ್ ಸಾದ್ಯತೆ ಉಂಡ್, ಆಚೇಂಗಿ ಪವಿತ್ರಾತ್ಮಂಗ್ ವಿರೋದವಾಯಿತ್ ಕೆಟ್ಟ ತಕ್ಕ್ ಪರಿಯುವಂಗಕ್ ಮನ್ನಿಪ್ಪ್ ಕ್‍ಟ್ಟುಲೆ.

¹¹ನಿಂಗಳ ಸಬಾಮಂದಿರತ್‍ರ ಪಿಂಞ ನ್ಯಾಯಲಾಯತ್‍ರ ಅದಿಕಾರಿಯಂಗಡ ಮಿಂಞಕ್ ಕಾಕಿಯಂಡ್ ಪೋನಕ, ನಿಂಗ ನಿಂಗಳ ಎನ್ನನೆ ಕಾಪಾಡಂಡೂಂದ್ ಪಿಂಞ ಎಂತ ಎಣ್ಣಂಡೂಂದ್ ಬೇಜಾರ್ ಮಾಡಂಡ.

¹²ನಿಂಗ ಎಂತ ತಕ್ಕ್ ಪರಿಯಂಡೂಂದ್ ಆ ಸಮಯತ್‍ಲ್ ಪವಿತ್ರಾತ್ಮ ನಿಂಗಕ್ ಎಣ್ಣಿ ತಪ್ಪ.

¹³ದುಂಬ ಜನ ಇಂಜ ಆ ಜಾಗತ್‍ಲ್ ಒರ್ ಮನುಷ್ಯ ಯೇಸುನ ನೋಟಿತ್: ಉಪಾದ್ಯನೇ, ಅಪ್ಪಂಡ ಆಸ್ತಿನ ಪಾಲ್ ಮಾಡ್‌ವಕ್ ನಾಡ ಅಣ್ಣಂಗ್ ಎಣ್ಣ್‍ೕಂದ್ ಎಣ್ಣ್‌ಚಿ.

¹⁴ನಾಡ ಸ್ನೇಹಿತನೇ: ನಿಂಗಡ ಆಸ್ತಿನ ದಂಡಾಳ್‌ಕ್ ಪಾಲ್ ಮಾಡ್‌ವಕು, ನ್ಯಾಯಾದಿಪತಿಯಾಯಿತ್ ದಾರ್ ನನ್ನ ನೇಮಿಚಿಟ್ಟತ್‍ೕಂದ್ ಯೇಸು ಕ್‍ೕಟತ್.

¹⁵ಎಲ್ಲಾ ತರ ಅತಿ ಆಸೆರ ವಿಷಯತ್‍ಲ್ ಎಚ್ಚರತ್ ಇರಿ. ನೇರಾನ ಜೀವ ನಿಂಗಡ ದುಂಬ್‍ನ ಆಸ್ತಿಯಿಂಜ ಬಪ್ಪುಲೆ.

¹⁶ಯೇಸು ಅಲ್ಲಿಯತ್‍ರ ಜನಕ್ ಒರ್ ಕಥೇರ ರೂಪತ್‍ನ ಎಣ್ಣಿ ಕೊಡ್‍ತತ್. ಐಶ್ವರ್ಯ ಉಳ್ಳ ಒರ್ ಮನುಷ್ಯಂಡ ಬೂಮಿಲ್ ಚಾಯಿ ಬೊಳೆ ಬೊಳ್ಂದತ್.

¹⁷ಅಕ್ಕ ಅಂವೊ: ನಾನ್ ಎಂತ ಮಾಡಡ್? ನಾಕ್ ಬೊಳ್ಂದ ಎಲ್ಲಾ ಬೊಳೆನ ಬೆಪ್ಪಕ್ ಜಾಗ ಇಲ್ಲೆ.

¹⁸ಇಕ್ಕ ಒಂದ್ ಮಾಡ್‌ವಿ, ನಾನ್ ನಾಡ ಈ ಚೆರಿಯ ಪತ್ತಾಯತ್‌ನ ಒಡ್‌ಪಂಜಿ ಬಲ್ಯೊರ್ ಪತ್ತಾಯ ಕೆಟ್ಟ್‌ವಿ, ಅಲ್ಲಿ ನಾಡ ಬೊಳೆರ ಕಾಳ್‌ನ ಪಿಂಞ ನಾಡ ಎಲ್ಲಾ ವಸ್ತುನ ಬೆಪ್ಪಿ.

¹⁹ನಾಕ್ ದುಂಬ ಕಾಲಕ್ ಬೋಂಡಿಯಚ್ಚಕ್ ಬೆಚ್ಚಿತುಳ್ಳ. ಆನಗುಂಡ್, ಚಾಯಿತೆ ಉಂಡಿತ್, ಕುಡಿಚಿತ್, ಚಾಯಿತೆ ಬದ್‌ಕ್‍ೕಂದ್ ಅಂವೊ ಅಂವೊಂಗೇ ಎಣ್ಣ್‌ಚಿ.

²⁰ಆಚೇಂಗಿ ದೇವ ಅಂವೊಂಗ್: ಮುಠಾಳನೇ! ಈ ಬೈಟ್ ನೀನ್ ಚತ್ತ್ ಪೋಪಿಯ. ಅಕ್ಕ ನೀ ಕೂಟಿ ಬೆಚ್ಚದೆಲ್ಲ ದಾರ್‌ಕ್ ಕ್‍ಟ್ಟ್‌ವಾಂದ್ ಎಣ್ಣ್‌ಚಿ.

²¹ಅಕ್ಕು, ಈ ಲೋಕತ್‍ರ ಐಶ್ವರ್ಯತ್‍ನ ಪರಲೋಕತ್‍ಲ್ ಉಳ್‍ಕೆ ಮಾಡತೆ ಅಯಿಂಗಕಾಯಿತ್ ಉಳ್‍ಕೆ ಮಾಡ್‌ವಯಿಂಗಕ್ ಇನ್ನನೆ ಆಪಾಂದ್ ಎಣ್ಣ್‌ಚಿ.

²²ಪಿಂಞ ಯೇಸು ಅಂವೊಂಡ ಶಿಷ್ಯಂಗಳ ನೋಟಿತ್: ನಿಂಗ ಬದ್‍ಕ್‍ವಕಾಯಿತ್ ಎಂತ ಉಂಬಿರ, ಎಂತ ಕುಡಿಪಿರ, ಇಲ್ಲತೆಪೋಚೇಂಗಿ ನಿಂಗಡ ಶರೀರಕಾಯಿತ್ ಎಂತ ಉಡ್‌ಪಿರಾಂದ್ ವ್ಯಸನ ಪಡತೀಂದ್ ನಾನ್ ನಿಂಗಕ್ ಎಣ್ಣ್‌ವಿ.

²³ನಿಂಗಡ ಆಹಾರಕಿಂಜ ಜೀವವು, ಬಟ್ಟೇಕಿಂಜ ತಡಿಯು ಮುಕ್ಯಾಂದ್ ಎಣ್ಣ್‌ಚಿ.

²⁴ಕಾಕೆಯಳ ನೋಟಿ! ಅಯಿಂಗ ಕುರುನ ಬಿತ್ತ್‌ವದು ಇಲ್ಲೆ, ಕೊಯಿಪಣಿ ಮಾಡ್‍ವುದು ಇಲ್ಲೆ, ಅಯಿಂಗಕ್ ಪತ್ತಾಯ ಕೋಂಬರೆಯು ಇಲ್ಲೆ, ಆಚೇಂಗಿಯು ದೇವ ಅಯಿಂಗಳ ಉಂಬ್‍ಚಿಡುವ. ಆನಗುಂಡ್ ಪಕ್ಷಿಯಕಿಂಜ ನಿಂಗ ದೇವಕ್ ಎಚ್ಚಕೋ ಬೆಲೆಯುಳ್ಳಯಿಂಗಳಾಯಿತುಳ್ಳಿರ.

²⁵ವ್ಯಸನ ಪಟ್ಟಂಡ್ ನಿಂಗಡಲ್ಲಿ ದಾರ್ ಅಯಿಂಗಡ ಬದ್‍ಕ್‍ರ ನಾಳ್‌ಲ್ ಒರ್ ಕ್ಷಣತ್‌ನ ಕೂಟ್‌ವಕಯ್ಯು?

²⁶ಇಚ್ಚಕ್ ಚೆರಿಯ ವಿಷಯತ್‍ಲ್ ನಿಂಗ ಒಂದು ಮಾಡ್‍ವಕಯ್ಯತಾಚೇಂಗಿ, ಬಲ್ಯ ವಿಷಯಕಾಯಿತ್ ನಿಂಗ ದುಃಖ ಪಟ್ಟಿತ್ ಎಂತ ಪ್ರಯೋಜನ.

²⁷ಕಾಡ್ ಪೂ ಎನ್ನನೆ ಬೊಳಿಯುವಾಂದ್ ನೋಟಿ, ಅದ್ ಕೆಲಸ ಮಾಡ್‌ವದು ಇಲ್ಲೆ. ಇಡ್‌ವಕ್ ಬಟ್ಟೆ ಪೊಲ್ಲ್‌ಚಿಡ್‍ವದು ಇಲ್ಲೆ. ಆಚೇಂಗಿಯು ಸೊಲೊಮೋನ ರಾಜಂಗ್ ಅಚ್ಚಕ್ ಐಶ್ವರ್ಯ ಇಂಜತೇಂಗಿಯು, ಈ ಒರ್ ಕಾಡ್ ಪೂವ್‌ರಚ್ಚಕ್ ಕೂಡೆ ಚಾಯಿ ಬಟ್ಟೆ ಇಟ್ಟಿತ್‌ಲ್ಲೇಂದ್ ನಾನ್ ನಿಂಗಕ್ ಎಣ್ಣ್‌ವಿ.

²⁸ಇನ್ನನೆ ಇಪ್ಪಕ, ಅಲ್ಪ ನಂಬಿಕೆ ಉಳ್ಳಯಿಂಗಳೇ, ಇಂದ್ ಇಂಜಿತ್ ನಾಳೆ ಪೋಪ ಪೂವ್‍ನ ದೇವ ಇಚ್ಚಕ್ ಚಾಯಿತೆ ನೋಟ್‍ಚೇಂಗಿ, ನಿಂಗಳ ನೇರಾಯಿತು ಎಚ್ಚಕ್ ಚಾಯಿತೆ ನೋಟುವ?

²⁹ಆನಗುಂಡ್, ಎಂತ ತಿಂಬ, ಎಂತ ಕುಡಿಪಾಂದ್ ಗೇನ ಮಾಡತಿ. ನಿಂಗ ಒಂದಂಗೂ ದುಃಖ ಪಡತಿ, ದೇವಡ ಮೇಲೆ ನಂಬಿಕೆ ಉಳ್ಳಯಿಂಗಳಾಯಿತಿರಿ.

³⁰ದೇವಡ ಮೇಲೆ ನಂಬಿಕೆ ಇಲ್ಲತ ಈ ಲೋಕತಯಿಂಗಳೇ ಇದ್‍ನೆಲ್ಲಾ ಗೇನ ಮಾಡಿಯಂಡ್, ಅದ್ಂಡ ಬೆಂಬರತ್ ಪೋಯಂಡುಂಡ್. ಆಚೇಂಗಿ, ಇದೆಲ್ಲಾ ನಿಂಗಕ್ ಬೋಂಡೂಂದ್ ನಿಂಗಡ ಅಪ್ಪನಾನ ದೇವಕ್ ಗೊತ್ತುಂಡ್.

³¹ಅದ್ಂಡ ಬದ್‍ಲ್ ಎಲ್ಲಾಕಿಂಜಿ ಮಿಂಞ ದೇವಡ ರಾಜ್ಯತ್‍ನ ತ್‍ೕಡಿ, ಅಕ್ಕ ಇದ‌ನ್ನೆಲ್ಲ ನಿಂಗಕ್ ಕೂಟಿ ತಪ್ಪ.

³²ನಾಡ ಶಿಷ್ಯಂಗಳೇ, ನಿಂಗ ಒಂದು ಇಲ್ಲತ ನಾಡ ಒರ್ ಚೆರಿಯ ಗುಂಪಾಯಿತ್ ಉಂಡೇಂಗಿಯು, ಬೊತ್ತತಿ, ಎನ್ನಂಗೆಣ್ಣ್‌ಚೇಂಗಿ ಅಪ್ಪನಾನ ದೇವ ಅಂವೊ ಆಳುವ ರಾಜ್ಯತ್‍ಲ್ ನಿಂಗ ಬದ್‍ಕ್‍ವಕಾಯಿತ್ ನಿಂಗಳ ಕುಶೀಲ್ ಗೊತ್ತ್ ಮಾಡಿತುಂಡ್.

³³ನಿಂಗಡ ಪಕ್ಕ ಉಳ್ಳ ಐಶ್ವರ್ಯತ್‍ನ ಮಾರಿತ್, ಬಂದ ಪಣತ್‍ನ ಗರೀಬಂಗಕ್ ದಾನಮಾಡಿ, ಇದ್ ನಿಂಗಕ್ ಪರಲೋಕತ್‍ಲ್ ಆಸ್ತಿ ಕೂಟಿ ಬೆಚ್ಚನೆಕೆ. ಪರಲೋಕತ್‍ಲ್ ಉಳ್ಳ ಪಣಚೀಲಕ್ ತೂತ ಇಲ್ಲೆ. ಅಲ್ಲಿ ಉಳ್ಳ ನಿಂಗಡ ಐಶ್ವರ್ಯತ್‍ನ ಕಳ್ಳಂಗ ಕಟ್ಟಂಡ್ ಪೋಪದು ಇಲ್ಲೆ, ಪುಳು ತಿಂಬದು ಇಲ್ಲೆ. ಅದ್ ಬದ್ರವಾಯಿತ್ ಇಪ್ಪ.

³⁴ನಿಂಗಡ ಐಶ್ವರ್ಯ ಎಲ್ಲಿ ಉಂಡೋ ಅಲ್ಲಿಯೇ ನಿಂಗಡ ಹೃದಯ ಎಕ್ಕಾಲು ಇಪ್ಪ.

³⁵ಇಂಞು ಯೇಸು ಇನ್ನನೆ ಎಣ್ಣ್‌ಚಿ: ಸೇವೆ ಮಾಡ್‌ವಕ್ ಬಟ್ಟೆ ಇಟ್ಟಿತ್ ತಯಾರಾಯಿತ್ ನಿಂಗಡ ಬೊಳ್‍ಚ ಕತ್ತಿಯಂಡ್ ಇರಡ್.

³⁶ಅನ್ನನೆ, ಮನೆರ ಎಜಮಾನ ಮಂಗಲತ್‍ರ ಮನೆಕ್ ಪೋಯಿತ್ ಬಯ್ಯಕ್ ಬಂದಿತ್ ಪಡಿನ ತಟ್ಟುವಕ, ಪಡಿನ ಬೆರಿಯ ತೊರ್‌ಪಕಾಯಿತ್ ಎನ್ನನೆ ಆಳ್‍ಕಾರಂಗ ಪಾರಕಾತಂಡ್ ಇಪ್ಪ, ಅನ್ನನೆ ನಿಂಗಳು ತಯಾರಾಯಿತಿರಿ.

³⁷ಅನ್ನನೆ ಅಂವೊ ಬಪ್ಪಕ, ಪಾರಾಕಾತಂಡ್ ತಯಾರಾಯಿತುಳ್ಳಯಿಂಗಕ್ ವಿಶೇಷ ದಯೆ ಕಾಟುವ. ಅಂವೊನೇ ಅಯಿಂಗಳ ಅಳ್‍ಪ್‍ಚಿಟ್ಟಿತ್, ಊಟೋಪಚಾರ ಮಾಡ್‌ವಕ್ ಉಳ್ಳ ಬಟ್ಟೆ ಇಟ್ಟಂಡ್, ಅಯಿಂಗ ಅಳ್‌ತಿತ್ ಉಂಬಕ, ಅಂವೊನೇ ಅಯಿಂಗಕ್ ಸೇವೆ ಮಾಡ್‌ವಾಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ.

³⁸ಅಂವೊ ಬಪ್ಪದ್, ನಡ್‌ಪಾದ್ರೆ ನೇರ ಆಯಿತಿಕ್ಕು ಅಥವ ಪೊಂಬೊಳಕ್ ನೇರತ್‍ರ ಚೆನ್ನ ಮಿಂಞಕ್ ಆಯಿತಿಕ್ಕು. ಆಚೇಂಗಿ, ಎಕ್ಕ ಬಾತೇಂಗಿಯು ಅಂವೊಂಗಾಯಿತ್ ತಯಾರಾಯಿತುಳ್ಳ ಆಳ್ಂಗಕ್ ಅಂವೊಂಡಿಂಜ ವಿಶೇಷ ದಯೆ ಇಪ್ಪ.

³⁹ನಿಂಗಕ್ ಗೊತ್ತಿರಡ್, ಕಳ್ಳ ಎಚ್ಚಕ್ ನೇರ‌ಕ್ ಬಪ್ಪಾಂದ್ ಆ ಮನೆರ ಎಜಮಾನಂಗ್ ಗೊತ್ತ್‌ಂಜತೇಂಗಿ, ಆ ಕಳ್ಳ ಮನೇಯಿಂಜ ಕಟ್ಟಂಡ್ ಪೋಪಕ್ ಬುಡುಲೆ.

⁴⁰ಅನ್ನನೆ, ನಿಂಗಳು ತಯಾರಾಯಿತಿರಿ. ಎನ್ನಂಗೆಣ್ಣ್‌ಚೇಂಗಿ ನಿಂಗ ಗೇನ ಮಾಡತ ಸಮಯತ್‍ಲ್ ಮನುಷ್ಯಕುಮಾರ ಬಪ್ಪ.

⁴¹ಅಕ್ಕ ಪೇತ್ರ ಯೇಸುನ ನೋಟಿತ್: ಒಡೆಯ, ಈ ಕಥೇರ ರೂಪತ್‍ನ ನಿಂಗ ನಂಗಕ್ ಮಾತ್ರ ಎಣ್ಣಿಯಂಡುಳ್ಳಿರ ಅಥವ ಎಲ್ಲಾರ್‌ಕು ಎಣ್ಣಿಯಂಡುಳ್ಳದಾಂದ್ ಕ್‍ೕಟತ್.

⁴²ಅಂವೊಂಗ್ ಯೇಸು: ತಾಂಡ ಮನೆಕಾರಂಗಕ್ ಸರಿಯಾನ ಸಮಯತ್‍ಲ್ ಕೂಲಿ ಕೊಡ್‍ಪನೆಕೆ ಎಜಮಾನ ಅಯಿಂಗಡ ಮೇಲೆ ಅದಿಕಾರಿಯಾಯಿತ್ ನೇಮಿಚಿಡುವಕ್ ನಂಬಿಕಸ್ತನು, ಜ್ಞಾನಿಯೂ ಆನ ಸೇವಕ ದಾರ್?

⁴³ಎಜಮಾನ ಬಪ್ಪಕ ಏದ್ ಒರ್ ಆಳ್ ಇನ್ನನೆ ಮಾಡ್‌ವಾನ ಅಂವೊ ಕಾಂಬ, ಆ ಆಳ್‍ಕಾರನೇ ಆಶೀರ್ವಾದ ಪಡ್ಂದಂವೊ. ಅಂವೊನ ಆ ಎಜಮಾನ ತಾಂಡ ಎಲ್ಲಾ ಆಸ್ತಿಕೂ ಜವಾಬ್ದಾರನಾಯಿತ್ ನೇಮಿಚಿಡ್‍ವಾಂದ್ ನೇರಾಯಿತು ನಿಂಗಕ್ ಎಣ್ಣ್‌ವಿ.

⁴⁴

⁴⁵ಆಚೇಂಗಿ, ಆ ಆಳ್, ಮನೆರ ಎಜಮಾನ ಬಪ್ಪಕ್ ಇಂಞು ಕಾಲ ಉಂಡ್‍ೕಂದ್ ಗೇನ ಮಾಡಿಯಂಡ್, ಬೋರೆಯಿಂಗಡ ಕೂಡೆ ತಿಂದಂಡ್, ಕಳ್ಳ್‌ಕುಡ್‌ಚಂಡ್, ಆಳುವಳ ಪೊಯ್ಯುವಂಜಿ, ತಾಂಡ ಮನಸ್ಸ್ ಬಂದನೆಕೆ ಮಾಡಿಯಂಡ್ ಇಂಜತೇಂಗಿ,

⁴⁶ಅಕ್ಕ ಆ ಆಳ್‍ರ ಎಜಮಾನ ಗೇನ ಮಾಡತ ದಿವಸ ಗೊತ್ತಿಲ್ಲತ ಗಳಿಗೆಲ್ ಬಂದ್‍ರ್‍ವ. ಬಂದಿತ್ ಆ ಆಳ್‍ಕ್ ಕಠಿಣವಾಯಿತ್ ಶಿಕ್ಷೆ ಕೊಡ್‌ತಿತ್, ನಂಬಿಕಸ್ತಂಗಳಾಯಿತಿಲ್ಲತಯಿಂಗ ಉಳ್ಳ ಜಾಗತ್‍ಲ್ ಅಂವೊನ ಸಹ ಇಟ್ಟ್‌ರ್‍ವ.

⁴⁷ತಾಂಡ ಒಡೆಯಂಡ ಮನಸ್ಸ್ ಗೊತ್ತ್ಂಜಿತು, ಅದ್‍ನ ಮಾಡ್‌ವಕ್ ಕುಶಿಯಿಲ್ಲತೆ, ತಾಂಡ ಜವಾಬ್ದಾರಿನ ಜಾಗ್ರತೆಲ್ ಮಾಡತೆ ಪೋನ ಆಳ್‍ಕ್ ಕಠಿಣ ದಂಡನೆ ಕ್‍ಟ್ಟ್‌ವ.

⁴⁸ಆಚೇಂಗಿ, ತಾಂಡ ಒಡೆಯಂಡ ಮನಸ್ಸ್ ಗೊತ್ತಿಲ್ಲತೆ ತಪ್ಪ್ ಮಾಡ್‌ವಯಿಂಗಕ್ ಕಮ್ಮಿ ಶಿಕ್ಷೆ ಕ್‍ಟ್ಟುವ. ದೇವ ನಿಂಗಕ್ ದುಂಬ ತಂದಿತುಂಡೇಂಗಿ, ನಿಂಗ ದುಂಬ ಪ್ರತಿಫಲ ತರಂಡೂಂದ್ ಅಂವೊ ಕ್‍ೕಪ. ದೇವ ನಿಂಗಕ್ ಇಂಞು ದುಂಬ ತಂದಿತುಂಡೇಂಗಿ, ನಿಂಗ ಇಂಞು ದುಂಬ ಪ್ರತಿಫಲ ತರಂಡೂಂದ್ ಅಂವೊ ಎಣ್ಣ್‌ಚಿ.

⁴⁹ನಾನ್ ಬೂಮಿರ ಮೇಲೆ ತಿತ್ತ್ ಇಡ್‌ವಕಾಯಿತ್ ಬಂದಿಯೆ, ಇಕ್ಕಲೆ ತಿತ್ತ್ ಕತ್ತಿಯಂಡಿಂಜತೇಂಗಿ ಎಚ್ಚಕ್ ಚಾಯಿ ಇಂಜತ್.

⁵⁰ದುಂಬ ಕಷ್ಟತ್‍ರ ಸೋದನೆಲ್ ನಾನ್ ಬೆರಿಯ ಪೋಕಂಡು. ಅದ್ ಪೂರ್ತಿ ಆಪಕತ್ತನೆ ನಾನ್ ದುಂಬ ನೊಂಬಲ ಅನುಬವಿಚಿಡಂಡು.

⁵¹ನಾನ್ ಈ ಬೂಮಿಲ್ ಸಮಾದಾನ ಕೊಡ್‍ಪಕಾಯಿತ್ ಬಂದಿಯೇಂದ್ ನಿಂಗ ಗೇನ ಮಾಡ್‌ವಿರ? ಇಲ್ಲೇಂದ್ ಎಣ್ಣ್‌ವಿ. ಸಮಾದಾನಕಾಯಿತ್ ಅಲ್ಲ, ಆಚೇಂಗಿ ಜನಳ ಬೋರೆ ಬೋರೆ ಮಾಡ್‌ವಕಾಯಿತ್ ನಾನ್ ಬಂದಿಯೆ.

⁵²ಎನ್ನನೆ ಎಣ್ಣ್‌ಚೇಂಗಿ, ಇಕ್ಕಯಿಂಜ ಒರೇ ಮನೆಲ್ ಉಳ್ಳ ಅಂಜ್ ಜನ ಬೋರೆ ಬೋರೆ ಆಯಿತ್‌ಪ್ಪ. ದಂಡ್ ಜನಕ್ ವಿರೋದವಾಯಿತ್ ಮೂಂದ್ ಜನಳು, ಮೂಂದ್ ಜನಕ್ ವಿರೋದವಾಯಿತ್ ದಂಡ್ ಜನಳು,

⁵³ಅಪ್ಪಂಗ್ ವಿರೋದವಾಯಿತ್ ಮೋಂವೊ, ಮೋಂವೊಂಗ್ ವಿರೋದವಾಯಿತ್ ಅಪ್ಪ, ಅವ್ವಂಗ್ ವಿರೋದವಾಯಿತ್ ಮೋವ, ಮೋವಕ್ ವಿರೋದವಾಯಿತ್ ಅವ್ವ, ಮಾಂವಿಕ್ ವಿರೋದವಾಯಿತ್ ಮೈಮ, ಮೈಮಕ್ ವಿರೋದವಾಯಿತ್ ಮಾಂವಿ ಇಪ್ಪಾಂದ್ ಎಣ್ಣ್‌ಚಿ.

⁵⁴ಪಿಂಞ ಯೇಸು ಜನಡ ಗುಂಪ್‌ಕ್ ತಿರಿತ್: ಪಡ್‍ಞಾರ್ ದಿಕ್ಕ್‌ಲ್ ಮೋಡ ಕೂಡ್‍ವಾನ ಕಂಡತೇಂಗಿ ಮಳೆ ಬಪ್ಪಾಂದ್ ಎಣ್ಣುವಿರ, ಅನ್ನನೆ ಆಪ.

⁵⁵ತೆಕ್ಕ್ ದಿಕ್ಕ್‌ಲ್ ಕಾತ್ ಬೀಜ್‌ವಕ, ದುಂಬ ಬೆದ್ ಆಪಾಂದ್ ಎಣ್ಣುವಿರ, ಅನ್ನನೆ ಆಪ.

⁵⁶ಕಪಟಿಯಳೇ! ಬೂಲೋಕ ಬಾನತ್‍ನ ನೋಟಿತ್, ಹವಾಗುಣ ಎಂತ್‍ೕಂದ್ ಎಣ್ಣುವಿರ, ಆಚೇಂಗಿ, ಈ ಕಾಲತ್‍ಲ್ ಎಂತ ಆಯೇಂಡುಂಡ್‍ೕಂದ್ ಎನ್ನಂಗ್ ನಿಂಗಕ್ ಗೊತ್ತಾಯಿತ್‌ಲ್ಲೆ?

⁵⁷ಎನ್ನಂಗ್ ನಿಂಗಕ್ ಸರಿಯಾನದ್‍ನ ಗೊತ್ತ್‌ಮಾಡ್‍ವಕ್ ಕಯ್ಯುಲೆ?

⁵⁸ನೀಡ ಮೇಲೆ ಆರೋಪ ಮಾಡ್‍ನಂವೊಂಡ ಕೂಡೆ ನ್ಯಾಯಲಾಯಕ್ ಪೋಪಕ್ ಮಿಂಞಲೇ ಬಟ್ಟೇಲೇ ಸಮಾದಾನ ಮಾಡಿತ್ ಸೆರಿಮಾಡ್‍ವಕ್ ಪೇಚಾಡಿ. ಇಲ್ಲತೆಪೋಚೇಂಗಿ ಅಂವೊ ನಿನ್ನ ನ್ಯಾಯಾದಿಪತಿರ ಮಿಂಞಕ್ ಬಲ್‍ಚಂಡ್ ಪೋಪ. ನ್ಯಾಯಾದಿಪತಿ ನಿನ್ನ ಜೈಲ್ ಕಾಪಂವೊಂಡ ಪಕ್ಕ ಕೊಡ್‍ಪ, ಅಂವೊ ನಿನ್ನ ಜೈಲ್‌ಕ್ ಇಡ್‌ವ.

⁵⁹ಅನ್ನನೆ ಆಚೇಂಗಿ, ನೀಡ, ಕಡೆ ಕಾಸ್‍ನ ಕೊಡ್‌ಪಕತ್ತನೆ ನೀನ್ ಜೈಲಿಂಜ ಪೊರಮೆ ಬಪ್ಪ್‌ಲೇಂದ್ ನಾನ್ ಎಣ್ಣುವೀಂದ್ ಯೇಸು ಎಣ್ಣ್‌ಚಿ.