Read Kodava ಲೂಕ 13 Bible Online

ಲೂಕ 13 - Kodava bible

ಲೂಕ 13

¹ಅಕ್ಕ ಚೆನ್ನ ಜನ ಬಂತ್: ಗಲಿಲಾಯ ಜನ ಯೆರೂಸಲೇಮ್ ದೇವಾಲಯತ್‍ಲ್ ಬಲಿ ಕೊಡ್‍ಪ ಅದೇ ಸಮಯತ್‍ಲ್, ಪಿಲಾತ ಚೆನ್ನ ಗಲಿಲಾಯ ಜನಳ ಕೊಲ್ಲ್‌ವಕ್ ಆಜ್ಞೆ ಮಾಡಿತ್‍ೕಂದ್ ಯೇಸುಕ್ ಎಣ್ಣ್‌ಚಿ.

²ಅದ್ಂಗ್ ಯೇಸು: ಗಲಿಲಾಯ ಜನಳ ಅನ್ನನೆ ಕೊಂದಾಂಗ್, ಅಯಿಂಗ ಗಲಿಲಾಯತ್‍ಲ್ ಉಳ್ಳ ಎಲ್ಲಾ ಜನಕಿಂಜ ದುಂಬ ಪಾಪಾ ಮಾಡ್‌ನಯಿಂಗಾಂದ್ ನಿಂಗ ಗೇನ ಮಾಡ್‌ವಿರ?

³ಅನ್ನೆನೆ ಅಲ್ಲ! ನಿಂಗ ಪಾಪ ಮಾಡ್‌ವಾನ ಬುಟ್ಟಿತ್, ದೇವಡ ಪಕ್ಕ ಪಶ್ಚಾತಾಪ ಪಟ್ಟಿತ್ ಬಂದಿತ್‌ಲ್ಲೇಂಗಿ ನಿಂಗೆಲ್ಲಾರು ಇನ್ನನೆ ಪಾಳಾಯಿ ಪೋಪಿರಾಂದ್ ನಾನ್ ನಿಂಗಕ್ ಎಣ್ಣ್‌ವಿ.

⁴ಅನ್ನನೆ: ಸಿಲೊವಾಮ್‌ಲ್ ಗೋಪುರ ಬುದ್ದಿತ್ ಪದನೆಟ್ಟ್ ಜನ ಚತ್ತ್ ಪೋಚಲ್ಲ! ಅದ್ಂಗ್ ಎಂತ ಎಣ್ಣುವಿರ? ಆ ಜನ ಯೆರೂಸಲೇಮ್‍ಲ್ ಉಳ್ಳ ಎಲ್ಲಾ ಜನಕಿಂಜ ದುಂಬ ಪಾಪ ಮಾಡ್‌ನಯಿಂಗಾಂದ್ ಗೇನ ಮಾಡ್‌ವಿರ?

⁵ಇಲ್ಲೆ, ಆಚೇಂಗಿ ನಿಂಗಡ ಪಾಪಕಾಯಿತ್ ನಿಂಗ ಪಶ್ಚಾತಾಪ ಪಟ್ಟಿತ್‌ಲ್ಲೇಂಗಿ, ನಿಂಗಳು ಪಾಳಾಯಿ ಪೋಪಿರಾಂದ್ ನಾನ್ ಪುನಃ ನಿಂಗಕ್ ಎಣ್ಣ್‌ವಿ.

⁶ಪಿಂಞ ಯೇಸು ಒರ್ ಕಥೇರ ರೂಪತ್‍ನ ಎಣ್ಣ್‌ಚಿ: ಒರ್ ಮನುಷ್ಯ ಅಂವೊಂಡ ದ್ರಾಕ್ಷಿ ತೋಟತ್‍ಲ್ ಒರ್ ಅತ್ತಿಪಣ್ಣ್ ಮರತ್‍ನ ನಟ್ಟ್‌ತಿಂತ್. ಎಕ್ಕಾಲು ಅಲ್ಲಿಕ್ ಪೋಯಿತ್ ಪಣ್ಣ್ ಉಂಡಾಂದ್ ನೋಟ್‍ವಕಿಂಜತ್. ಆಚೇಂಗಿ ಒರ್ ಪಣ್ಣ್ ಸಹ ಕಾಂಬಕಿಂಜಿಲೆ.

⁷ಒರ್ ದಿವಸ, ತೋಟಕಾರ ಅಂವೊಂಡ ತೋಟ ನೋಟುವ ಆಳ್‌ನ ನೋಟಿತ್: ಮೂಂದ್ ಕಾಲತ್ಂಜ ನಾನ್ ಈ ಮರತ್‍ಲ್ ಪಣ್ಣ್ ಉಂಡಾಂದ್ ನೋಟಿಯಂಡ್ ಉಳ್ಳ, ಆಚೇಂಗಿ ಒರ್ ಪಣ್ಣ್ ಸಹ ಇಲ್ಲೆ. ಆನಗುಂಡ್ ಆ ಮರತ್‍ನ ಕೆತ್ತಿರ್, ಆ ಮರ ಮಣ್ಣ್ ತಿಂದಂಡ್ ಉಂಡ್‍ೕಂದ್ ಎಣ್ಣ್‌ಚಿ.

⁸ಆಚೇಂಗಿ ತೋಟ ನೋಟ್‍ವಂವೊ: ಸ್ವಾಮೀ, ಈ ಮರತ್‍ನ ಇಂಞೊರ್ ಕಾಲ ಬುಟ್ಟ್‌ರಿ. ನಾನ್ ಆ ಮರತ್‍ರ ಸುತ್ತಲೂ ಅಗತೆ ಮಾಡಿತ್ ಗೊಬ್ಬರ ಇಡ್‌ವಿ.

⁹ಮಿಂಞಕ್ ಪಣ್ಣ್ ತಾತೇಂಗಿ ಆ ಮರ ಇರಡ್, ಆಕತೆ ಪೋನಕ ಆ ಮರತ್‍ನ ಕೆತ್ತಿರಲೂಂದ್ ಎಣ್ಣ್‌ಚಿ.

¹⁰ಒರ್ ಸಬ್ಬತ್ ದಿವಸತ್‍ಲ್ ಯೇಸು ಸಬಾಮಂದಿರತ್‍ಲ್ ಬೋದನೆ ಮಾಡಿಯಂಡಿಂಜತ್.

¹¹ಅಲ್ಲಿ ಒರ್ ಪೊಣ್ಣಾಳ್‌ಕ್ ಪದನೆಟ್ಟ್ ಕಾಲತ್ಂಜ ಕೂಳಿ ಪುಡ್‌ಚಿತ್ಂಜತ್. ಆ ಕೂಳಿ ಅವಳ ಸೌಕ್ಯ ಇಲ್ಲತೆ ಮಾಡಿತ್ಂಜತ್. ಅವ ಗೂನಿಯಾಯಿತ್, ಚೆನ್ನಂಗ್ ಸಹ ನೇರೆ ನಿಪ್ಪಕ್ ಕಯ್ಯತೆ ಬಗ್ಗಿ ಪೋಯಿತ್ಂಜತ್.

¹²ಯೇಸು ಅವಳ ಕಂಡದು, ಅವಳ ಕಾಕುವಂಜಿ, ಅವ್ವ, ನಾನ್ ನೀಡ ಮೇಲ್‍ಲುಳ್ಳ ಕೂಳಿಯಿಂಜ ನಿನ್ನ ಬುಡ್‌ತಿತ್ ವಾಸಿ ಮಾಡ್‌ವೀಂದ್ ಎಣ್ಣುವಂಜಿ,

¹³ಅವಡ ಮೇಲೆ ಕೈ ಬೆಚ್ಚತ್. ಅಚ್ಚಕ್ ಬೆರಿಯ ಅವ ನೇರೆ ನಿಪ್ಪಂಜಿ ದೇವನ ತುದಿಪಕ್ ಸುರು ಮಾಡ್‍ಚಿ.

¹⁴ಯೇಸು ಸಬ್ಬತ್ ದಿವಸತ್‍ಲ್ ವಾಸಿಮಾಡ್‍ನಗೊಂಡ್ ಸಬಾಮಂದಿತ್‍ರ ಅದಿಕಾರಿಕ್ ಚೆಡಿ ಬಾತ್. ಆ ಅದಿಕಾರಿ ಅಲ್ಲಿ ಇಂಜ ಜನಕ್, ನಂಗ ಒರ್ ವಾರತ್‍ಲ್ ಆರ್ ದಿವಸ ಕೆಲಸ ಮಾಡ್‌ವಲ್ಲ, ಆ ದಿವಸತ್‍ಲ್ ಬಂತ್ ವಾಸಿ ಮಾಡಿಯೊಳಿ, ಸಬ್ಬತ್ ದಿವಸತ್‍ಲ್ ಅನ್ನನೆ ಮಾಡ್‌ವಕ್ಕಾಗಾಂದ್ ಎಣ್ಣ್‌ಚಿ.

¹⁵ಅದ್ಂಗ್ ಯೇಸು: ಕಪಟಿಯಾನ ನಿಂಗ, ನಿಂಗಡ ಕೂಟ್‌ಲ್ ಉಳ್ಳ ಎತ್ತ್ ಪಿಂಞ ಕತ್ತೆನ ನೀರ್ ಕುಡಿಪಚಿಡ್‌ವಕ್ ಸಬ್ಬತ್ ದಿವಸತ್‍ಲ್ ಕೆಟ್ಟ್ ಉತ್ತಿತ್ ಪೊರಮೆ ಕಾಕಿಯಂಡ್ ಪೋಪ್‍ಲೆಯಾ?

¹⁶ಅನ್ನನಾಚೇಂಗಿ, ಪದನೆಟ್ಟ್ ಕಾಲತ್ಂಜ ಸೈತಾನ ಕೆಟ್ಟಿ ಇಟ್ಟಿತ್ತುಳ್ಳ ಇವ ಅಬ್ರಹಾಮಂಡ ಸಂತಾನಕರ್ತಿ. ಇವಳ, ಸಬ್ಬತ್ ದಿನತ್‌ಲ್ ಈ ಕೆಟ್ಟ್‌ಯಿಂಜ ಬುಡ್‍ಗಡೆ ಮಾಡ್‍ವದ್ ತಪ್ಪಾಂದ್ ಕ್‍ೕಟತ್.

¹⁷ಯೇಸುರ ತಕ್ಕ್ ಕ್‍ೕಪದು ಅಂವೊಂಡ ಶತ್ರುವಂಗಕ್ ಞಾಣ ಆಚಿ. ಆಚೇಂಗಿ, ಬೋರೆ ಜನಕೆಲ್ಲ ಯೇಸು ಮಾಡ್‍ನ ಈ ಬಲ್ಯ ಕಾರ್ಯತ್‍ನ ಕಂಡಿತ್ ಬಾರಿ ಕುಶಿ ಆಚಿ.

¹⁸ಅಕ್ಕ ಯೇಸು ಅಲ್ಲಿ ಉಳ್ಳ ಜನಳ ನೋಟಿತ್: ದೇವಡ ರಾಜ್ಯ ಎನ್ನನೇಂದ್ ಎಣ್ಣಡ್? ದೇವಡ ರಾಜ್ಯತ್‍ನ ನಾನ್ ಎಂತಾಂಗ್ ಹೋಲಿಕೆ ಮಾಡಡ್.

¹⁹ಅದ್ ಎನ್ನನೆ ಇಪ್ಪ ಎಣ್ಣ್‌ಚೇಂಗಿ ಒರ್ ಮನುಷ್ಯ ಕಡು ಕುರುನ ಅಂವೊಂಡ ಬೇಲ್‌ಲ್ ಬಿತ್ತ್‌ವನೆಕೆ. ಅದ್ ಬೊಳ್ಂದಿತ್ ಬಲ್ಯ ಮರ ಆಪ. ಆ ಮರತ್‍ರ ಕೊಂಬ್‌ಲ್ ಬಾನತ್‍ರ ಪಕ್ಷಿಯ ಗೂಡ್ ಕೆಟ್ಟಿತ್ ವಾಸ ಮಾಡ್‌ವ.

²⁰ಇಂಞು ನಾನ್ ಎಂತಾಂಗ್ ದೇವಡ ರಾಜ್ಯತ್‍ನ ಹೋಲಿಕೆ ಮಾಡಡ್.

²¹ಅದ್ ಎನ್ನನೆ ಎಣ್ಣ್‌ಚೇಂಗಿ ಒರ್ ಪೊಣ್ಣಾಳ್, ಚೆನ್ನ ಈಸ್ಟ್‌ನ ದುಂಬ ಮುದ್ದೆಕ್ ಕಲ್‍ಕ್‍ನನೆಕೆ. ಕಡೇಕ್ ಎಲ್ಲಾ ಮುದ್ದೆಯು ಪುಳಿಯಾಪ.

²²ಯೇಸು ಯೆರೂಸಲೇಮ್‌ಕ್ ಪೋಯಂಡಿಪ್ಪಕ, ಊರ್ ಊರ್‌ಕ್ ದೇವಡ ವಿಷಯತ್‍ನ ಬೋದನೆ ಮಾಡಿಯಂಡ್ ಪೋಚಿ.

²³ಅಕ್ಕ ಒಬ್ಬ, ಸ್ವಾಮೀ, ಚೆನ್ನ ಜನಳೇ ರಕ್ಷಣೆ ಆಪದಾ ಎಣ್ಣಿಯಂಡ್ ಕ್‍ೕಟತ್.

²⁴ಅದ್ಂಗ್ ಯೇಸು: ಪರಲೋಕಕ್ ಪೋಪ ಪಡಿ ದುಂಬ ಇರ್ಂಗ್‍ನದ್. ನಿಂಗ ಇರ್ಂಗ್‍ನ ಬಾಯಿಕಂಡಿಲ್ ಪೋಪಕ್ ಕಷ್ಟಪಡಿ. ದುಂಬ ಜನ ಇಕ್ಕಟಾನ ಪಡಿರ ಮೂಲಕ ಒಳ್‍ಕ್ ಪೋಪಕ್ ನೋಟ್‍ವ, ಆಚೇಂಗಿ ಅಯಿಂಗಕ್ ಕಯ್ಯುಲೆ.

²⁵ಮನೆರ ಎಜಮಾನ ಎದ್ದಿತ್ ಪಡಿನ ಮುಚ್ಚ್‌ನ ಪಿಂಞ ಒಳ್‍ಕ್ ಪೋಪಕ್ ಕಯ್ಯುಲೆ. ನಿಂಗ ಪೊರಮೆ ನಿಂದಿತ್: ಒಡೆಯನೇ ಒಡೆಯನೇಂದ್ ಪಡಿನ ತಟ್ಟ್‌ವಿರ, ನಂಗಕ್ ಪಡಿ ತೊರ್‌ಂದ್ ಎಣ್ಣುವಿರ, ಆಚೇಂಗಿ ಮನೆರ ಎಜಮಾನ, ನಿಂಗ ದಾರ್‍ೕಂದ್ ನಾಕ್ ಗೊತ್ತ್‌ಲ್ಲೇಂದ್ ಎಣ್ಣುವ.

²⁶ಅಕ್ಕ ನಿಂಗ, ನಂಗ ನೀಡ ಕೂಡೆ ಉಂಡಿಯತ್ ಕುಡ್‌ಚತ್, ನೀನ್ ನಂಗಕ್ ಊರ್‌ಲ್ ಬೋದನೆ ಮಾಡಿಯೇಂದ್ ಎಣ್ಣ್‌ವಕ್ ಸುರು ಮಾಡ್‌ವಿರ.

²⁷ಅದ್ಂಗ್ ಅಂವೊ: ನಾಕ್ ನಿಂಗಳ ಗೊತ್ತ್‌ಲ್ಲೆ, ಪಾಪಿಯಳೇ ಎಲ್ಲಾರು ನನ್ನ ಬುಟ್ಟಿತ್ ಇಲ್ಲಿಂಜ ಪೋಯಿರೀಂದ್ ಎಣ್ಣುವಾಂದ್ ನಾನ್ ನಿಂಗಕ್ ಎಣ್ಣ್‌ವಿ.

²⁸ಅಬ್ರಹಾಮ, ಇಸಾಕ, ಯಾಕೋಬ ಪಿಂಞ ಎಲ್ಲಾ ಪ್ರವಾದಿಯಳ ದೇವಡ ರಾಜ್ಯತ್‍ಲ್ ನಿಂಗ ಕಾಂಬಿರ. ಆಚೇಂಗಿ ನಿಂಗಳ ಪೊರಮೆ ಇಟ್ಟ್‌ರ್‍ವ ಅಕ್ಕ ನಿಂಗೆಲ್ಲಾರು ಮೊರಟಂಡ್, ಪಲ್ಲ್ ಕಡಿಚಂಡ್ ನರಳಿಯಂಡ್ ಕೂತ್‌ಕೊಡ್‌ಪಿರ.

²⁹ಇದ್‍ಲ್ಲತೆ ಕ್‍ೕಕ್ ದಿಕ್ಕಿಂಜ, ಪಡ್‍ಞಾರ್ ದಿಕ್ಕಿಂಜ, ತೆಕ್ಕ್ ದಿಕ್ಕಿಂಜ, ಬಡಕ್ ದಿಕ್ಕಿಂಜ ಬಂದ ಜನ ದೇವಡ ರಾಜ್ಯತ್‍ಲ್ ಗದ್ದಾಳ ಉಂಬಕ್ ಅಳ್‌ಪ.

³⁰ಅಕ್ಕ, ದಾರ್ ಮಿಂಞತ್‍ಲ್ ಉಂಡೋ ಅಯಿಂಗ ಬಯ್ಯತ್ ಆಯಿಪೋಪ. ಬಯ್ಯತ್ ಉಳ್ಳಯಿಂಗ ಮಿಂಞಕ್ ಇಪ್ಪಾಂದ್ ಎಣ್ಣ್‌ಚಿ.

³¹ಅದೇ ಗಳಿಗೆಲ್ ಚೆನ್ನ ಫರಿಸಾಯಂಗ ಯೇಸುರ ಪಕ್ಕ ಬಂದಿತ್, ನೀನ್ ಇಲ್ಲಿಂಜ ಬೆರಿಯ ಪೋಯಿರ್, ರಾಜನಾನ ಹೆರೋದ[33] ನಿನ್ನ ಕೊಲ್ಲುವಕ್ ನೋಟಿಯಂಡ್ ಉಂಡ್‍ೕಂದ್ ಎಣ್ಣ್‌ಚಿ.

³²ಅದ್ಂಗ್ ಯೇಸು: ನಾನ್ ಇಂದ್ ಪಿಂಞ ನಾಳೆ ಕೂಳಿ ಪುಡ್‌ಚಯಿಂಗಕ್ ಕೂಳಿ ಬುಡ್‌ತಿತ್, ಕಾಯಿಲಸ್ತಂಗಕ್ ಕಾಯಿಲೆನ ವಾಸಿ ಮಾಡ್‌ವಿ, ಪಿಂಞ ಮೂಂದನೆ ದಿವಸ ನಾನ್ ಬಂದ ಕಾರ್ಯತ್‍ನ ಪೂರ್ತಿ ಮಾಡ್‌ವಿ.

³³ಇಂದ್, ನಾಳೆ ಪಿಂಞ ಮತ್ಯಾಂದ್ ನಾನ್ ನಾಡ ಪ್ರಯಾಣತ್‍ನ ಮಾಡಿಯಂಡಿಪ್ಪಿ. ಯೆರೂಸಲೇಮ್‍ಲ್ ಅಲ್ಲತೆ ಬೋರೆ ಎಲ್ಲಿಯು ಪ್ರವಾದಿಯಂಗಳ ಕೊಂದಿತ್‌ಲ್ಲೇಂದ್ ಆ ಕುರ್‌ಕ ಬುದ್ದಿಯುಳ್ಳ ಹೆರೋದಂಗ್ ಪೋಯಿತ್ ಎಣ್ಣೀಂದ್ ಎಣ್ಣ್‌ಚಿ.

³⁴ಓ ಯೆರೂಸಲೇಮೇ, ಯೆರೂಸಲೇಮೇ, ಪ್ರವಾದಿಯಂಗಳ ಕೊಂದಿತ್ ದೇವ ಅಯಿಚ ಜನಳ ಕಲ್ಲ್ ಕನ್‍ಚಿತ್ ಕೊಲ್ಲುವ ಜನಳೇ, ಕೋಳಿ ತಾಂಡ ಕುಂಞಿಯಳ ರೆಕ್ಕೆರ ಒಳ್‍ಕ್ ಕೂಟಿಯಂಡ್ ಇಪ್ಪನೆಕೆ, ನೀಡ ಮಕ್ಕಳ ನಾನ್ ಸಹ ಕೂಟಿಯಂಡ್ ರಕ್ಷಣೆ ಮಾಡ್‌ವಕ್ ಎಚ್ಚಕೋ ಕುರಿ ನಾಕ್ ಮನಸ್ಸ್ ಇಂಜತ್, ಆಚೇಂಗಿ ನಿಂಗಕ್ ನಾನ್ ಅನ್ನನೆ ಮಾಡ್‍ವದ್ ಕುಶಿಯಿಲ್ಲೆ.

³⁵ಆನಗುಂಡ್, ನಿಂಗಡ ದೇವಾಲಯ ದಾರೂ ಪೋಪಕ್ಕಾಗತ ಜಾಗ ಆಯಿಪೋಪ. ಒಡೆಯಂಡ ಪೆದತ್‍ಲ್ ಬಪ್ಪಂವೊ ಆಶೀರ್ವಾದ ಮಾಡ್‍ನಂವೋಂದ್ ನಿಂಗ ಎಣ್ಣ್‌ವಕತ್ತನೆ ನನ್ನ ನಿಂಗ ಕಾಂಬ್‍ಲೇಂದ್ ನೇರಾಯಿತ್ ನಾನ್ ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ.[34]